Author: webrwanda

Umuhanzi w’Umunyarwanda Gisa Cyinganzo yatangaje ko ari mu myiteguro yo gushyira hanze album ye nshya, ayifata nk’intambwe ikomeye igiye kongera kubyutsa no gushimangira urugendo rwe rw’umuziki umaze imyaka myinshi.

Umuhanzi Gisa James wamamaye nka Gisa Cyinganzo uzwiho ijwi rikora ku mutima ya benshi, yahishuye ko afite album iri hafi kurangira ku kigero cya 60%, ikazaba igizwe n’indirimbo 12.

Gisa Cyinganzo yasobanuye ko iyi album izaba itandukanye n’izo yakoze mbere, kuko izibanda cyane ku byiyumvo byimbitse, ubuzima bwa buri munsi n’amasomo yakuye mu rugendo rwe rw’ubuzima n’umwuga.

Ati 'Ndi gukora kuri album yanjye nshya igeze ku kigero cya 60% , izibanda ahanini mu kwibutsa abantu njyewe bazi ndetse no kubaha amasomo y’ubuzima bwa buri munsi.'

Nk’uko yabitangaje mu kiganiro yagiranye na The New Times.
Yavuze ko ari kuyishyiramo umutima n’ubunararibonye amaze kugeraho, agamije gukomeza kuguma ku mwanya mwiza mu muziki nyarwanda no guha abakunzi be umuziki ufite ubutumwa bufatika.

Uyu muhanzi agaragaza ko ari gukorana n’abatunganya indirimbo bafite izina rinini, anizeza abafana be ko azabaha izindi ndirimbo nshya mbere y’uko album isohoka.

Kugaruka kwa Gisa Cyinganzo mu muziki byongeye kugaragara cyane mu mpera za 2025, ubwo yasohoraga indirimbo 'Kumutima', yamubereye intangiriro nshya nyuma y’igihe yari amaze atagaragara cyane mu ruhando rw’umuziki.

Iyi ndirimbo yakiriwe neza n’abakunzi b’umuziki, igaragaza ko agifite ubushobozi bwo gukora indirimbo zifite amarangamutima n’ubutumwa bukora ku mitima ya benshi.

Gisa Cyinganzo yanyuze mu bihe bitamworoheye mu rugendo rwe, birimo no gufungwa gusa akaza kurekurwa muri Mata 2019 nyuma yo kurangiza igihano yari yarakatiwe azira gukoresha ibiyobyabwenge. Ibyo bihe avuga ko byamubereye amasomo y’ingenzi mu buzima bwe.

Mu bagize uruhare runini mu kongera kumwereka abanyarwanda, harimo umuhanzi The Ben, wamuhaye umwanya wo kuririmba mu gitaramo cya NU Year Groove, igikorwa Gisa avuga ko cyamwongereye icyizere no kongera kumva ko agishyigikiwe n’abakunzi b’umuziki.

Gisa Cyinganzo agiye gusohora album

Intizanyo y’Intare FC muri Kiyovu Sports, Niyo David, yagiye gukora igeragezwa mu ikipe ya NK Veres Rivine ikina icyiciro cya mbere muri Ukraine.

Niyo David umwe mu bakinnyi beza iyi kipe igenderaho akaba yamaze gufata rutimikirere asanga iyi kipe muri Turikiya aho shampiyona y’iki gihugu ikinirwa mu gihe yaritsinda yahita ayisinyira.

Uyu mukinnyi w’imyaka 19 wakuriye mu ishuri ryigisha umupira rya APR FC akaza kujya mu Intare FC agomba gukora igeragezwa kugeza tariki ya 11 Gashyantare 2026.

Yageze muri Kiyovu Sports muri 2025 atijwe n’Intare akaba muri uyu mwaka w’imikino wa 2025-26 yarafashije Kiyovu Sports gusoza imikino ibanza iri ku mwanya wa 5 n’amanota 27.

Niyo David ukina mu kibuga hagati ariko asatira akaba amaze gutsinda ibitego bitatu ndetse yanatanze imipira ine yavuyemo ibitego, bivuze ko afite uruhare rw’ibitego 7 mu bitego 16 Kiyovu imaze gutsinda.

Niyo David yagiye gukora igeragezwa mu ikipe yo muri Ukraine

Nyampinga w’u Rwanda 2020, Nishimwe Naomie yavuze ko ibyo gutwita kwe atari umushinga rusange bityo ko abantu bakwiye kumuha amahoro.

Ibi yasubizaga uwitwa Edman Ishimwe wagiye ku rukuta rwa Twitter akandika ati 'Umwaka urashize n’undi uratashye, Miss Naomie akoze ubukwe, ariko nta kanunu ko gusama.'

Ni amagambo yakuruye impaka ndende benshi babwira uyu muntu kureka kwivanga mu bitamureba kuko atari byiza na gato kujya mu buzima bwite bwa muntu.

Miss Nishimwe Naomie na we yanze guceceka maze amubwira ko gutwita kwe atari umushinga rusange kandi ko nta w’uwamushinze kugenzura ubuzima bwe.

Ati 'Ni inde wagushinze kugenzura ubuzima bwanjye? Gutwita kwanjye si umushinga rusange nshuti. Shyiraho indi nkuru nyamuneka. Mujye mwubaha.'

Naomie avuze ibi mu gihe mu gitabo 'More Than Crown’ aheruka gushyira hanze, muri Chapter 9 yagarutse ku buryo inda ye yatwitse yaje kuvamo.

Miss Nishimwe Naomie yasezeranye mu mategeko n’umugabo we Michael Tesfay ku wa 27 Ukuboza 2024, mu gihe indi mihango y’ubukwe bwabo yabaye ku wa 29 Ukuboza uwo mwaka, nyuma y’igihe bari bamaze bakundana.

Kuva icyo gihe, yakomeje kwibutsa abantu ko ibyerekeye umuryango we ari ibye bwite, bidasaba kugibwaho impaka ku mbuga nkoranyambaga.

Who assigned you to monitor my life? my womb is not a public project Nshuti. Next headline please.
Respectfully

— Naomie (@NaomieNishimwe) January 27, 2026

Naomie yavuze ko gutwita kwe atari umushinga rusange

Nyuma yo gutizwa na Police FC rutahizamu Mugisha Didier, impaka zabaye nyinshi benshi bavuga ko atari we mukinnyi yari ikeneye abandi bakemeza ko yari imukeneye ariko uburyo yajemo ikipe nka Rayon Sports itakabyemeye.

Rayon Sports muri Mutarama 2026 yabaye nk’ikipe yasubiye ku isoko bundi bushya aho yagiye yongeramo abakinnyi benshi kugeza ubu abo imaze gutangaza ni 7.

Mugisha Didier bagize impungenge niba azafasha Rayon Sports cyane ko yari amaze iminsi muri Police FC adakina kuba yaza agahita afatiraho agafasha Gikundiro.

Nta muntu washidikanya ku mpano ya Mugisha Didier, ni umukinnyi ufite imbaraga, ushobora gucenga agatanga akazi ku bwugarizi bahanganye.

Mugisha Dideir ni we Rayon Sports yari ikeneye?

Ugiye kureba ku isoko rya ba rutahizamu by’umwihariko b’abanyarwanda bashobora kuboneka wavuga ko nta rutahizamu umuri hejuru rero kumuzana yaba ari amahitamo.

Gusa na none ntiwakirengagiza ko na none nta tandukaniro rinini rihari no kuba barekura Rivaldo bakazana Didier bose ni abakinnyi bari ku rwego rumwe bakaba batandukanira ku byo umutoza yifuza gukina.

Ikindi kuri Mugisha Didier, uwanenga Rayon Sports ko yemeye gutizwa uyu mukinnyi amezi 6 ntabwo yaba abeshye, ni umukinnyi byanashobokaga ko yamubona burundu cyane ko nawe yabishakaga kuko muri Police FC ibintu bitari bimeze neza.

Hari impungenge ko Didier ufite amasezerano y’umwaka n’igice wa Police FC, aramutse yitwaye neza mu mezi 6 yatijwe, ntabwo Rayon Sports yamubona umwaka utaha kuko Police FC yahita imwisubiza nta gushidikanya, rero yakabaye yaratekereje ibirenze kuko ni umukinnyi mwiza kandi w’umuhanga.

Nubwo ari umukinnyi mwiza gusa hari ibyo bamushinja binatuma n’abatoza akenshi batamukinisha, uretse kuba yaba avugwaho imyitwarire itari myiza gusa kubijyanye n’imikinire ashinjwa kutumva ibyo abatoza bamubwira.

Mugisha Didier ashinjwa na bagenzi be kuba yiharira adakunda gukinana n’abandi, iyo afashe umupira biragorana ko awurekura inshuro nyinshi bakanawumwambura rero ntibishimishe bagenzi be n’umutoza.

Iki ni ikintu asabwa gukoraho kuko mu gihe atahindura imikinire bizagorana ko no muri Rayon Sports yazakina kuko nta mutoza ukunda umukinnyi wiharira umupira ntakinane na bagenzi be.

Mugisha Didier ni umukinnyi mushya wa Rayon Sports

Umuhanzikazi Bwiza yateguje abakunzi be urugendo rw’ibitaramo bizenguruka hirya no hino ku Isi mu kumenyekanisha album ye ya gatatu.

Kuri uyu wa Kabiri tariki ya 27 Mutarama 2026 ni bwo umuhanzikazi Bwiza Emmerance yifashishije urukuta rwe rwo ku rubuga rwa Instagram mu kurarika abakunzi be bari hirya no hino ku isi.

Urugendo rw’ibitaramo byiswe 'Home World Tour 2026′ bitezwe ruzarangwa n’ibikorwa byo gutaramira abakunzi n’uyu muhanzikazi baherereye ku mugabane w’u Burayi, Africa, Canada ndetse na Leta Zunze Ubumwe z’Amerika.

Mu kiganiro yagiranye na ISIMBI, Uhujimfura Jean Claude usanzwe areberera inyungu z’uyu muhanzikazi yagaragaje ko urugendo rw’ibitaramo rugiye gikorwa mu rwego guteguza abakunzi be album nshya bagiye gushyira hanze yanitiriwe ibi bitaramo.

Aho yagize ati 'Iyi tour igamije gutuma abantu bitegura album yacu ya gatatu yitwa 'Home’, tukaba dushaka guhuza abakunzi ba Bwiza n’ibihangano bye aho bari hose ku Isi.'

Claude yanongeyeho ko nubwo kugeza ubu batari bahitamo itariki nyirizina yo gutangira uru rugendo rw’ibitaramo gusa ko andi makuru baza kuyashyira hanze vuba aha.

Home izaba ibaye album ya gatatu ya Bwiza nyuma y’uko mu mwaka ushize yasohoye iyitwa '25 Shades’ yakunzwe cyane.

Bwiza Emerence agiye kuzenguruka Isi akora ibitaramo

Uwumukiza Obed wakiniraga ikipe ya Mukura VS yamaze kugurishwa muri Rayon Sports aho aje kuyifasha mu bwugarizi uhereye mu mikino yo kwishyura ya 2025-26.

Nyuma y’uko kapiteni w’iyi kipe, Serumogo Ali agiye gukina muri Sudani mu ikipe ya Al Merreikh Bentiu, Rayon Sports yasigaye ishakisha umusimbura we.

Yahise ijya gukomanga mu ikipe ya Mukura VS ivuga ko ishaka myugariro wabo ukina ku ruhande rw’iburyo, Uwumukiza Obed.

Uyu mukinnyi umwe mu bakinnyi bahagaze neza ku mwanya wabo mu Rwanda, we yababwiye ko nibumvikana nta kibazo afite yiteguye kuba yasinyira iyi kipe ifte abafana benshi mu gihugu.

Amakuru avuga ko impande zombi zicaye zikaganira maze zumvikana ko uyu mukinnyi agomba gutangwaho miliyoni 15 z’Amafaranga y’u Rwanda.

Obed aje yiyongera kuri Mugisha Didier waraye utangajwe, Kwizera Olivier, Yannick Bangala, Tshimanga, Lakau Kitoko, Ben Aziz Dao na Bienvenu Joachim Vigninou baje muri uku kwezi kwa Mutarama 2026.

Uwumukiza Obed yamaze kerekeza muri Rayon Sports

Police FC yamaze gutiza Rayon Sports, rutahizamu Mugisha Didier utarimo ukoreshwa muri iyi minsi.

Mu itangazo Rayon Sports yashyize hanze yavuze ko uyu mukinnyi ari uwa Rayon Sports mu gihe kingana n’amezi 6..

Aje nyuma y’uko nyuma yo kongera amasezerano atigeze yisanga mu mikinire y’umutoza Ben Moussa.

Akaba yarahisemo kuzana Rudasingwa Prince avuye muri AS Kigali akaba yabisikanye na Mugisha Didier wagiye muri Rayon Sports.

Mugisha Didier akaba aheruka kongera amasezerano y’imyaka 2 muri Police FC akaba amaze kuyikinira amezi 6, akaba asigajemo umwaka n’igice akaba agiye gukina amezi 6 muri Rayon Sports azayigarukamo mu mwaka utaha w’imikino.

Rayon Sports yakiriye Mugisha Didier