Author: webrwanda

Aya masezerano azamara iminsi 60, mu gihe hazaba hari kuba ibiganiro by’amasezerano ya nyuma yo guhagarika intambara. Mu ngingo z’ingenzi 14 ziyagize harimo guhagarika ibitero ahantu hose impande zombi zarasaga mu Burasirazuba bwo Hagati, kubaha ubusugire n’ubwigenge bwa buri gihugu, gufungura inzira ya Hormuz, gufungura ibyambu bya Iran.

Iran isabwa kandi kudatunganya intwaro za nucléaire, Amerika nayo yemeye koroshya ibihano no gukomorera amafaranga ya Iran yafatiriwe muri za banki, kwishyura miliyari 300$ zo gusana ibyangijwe n’ibindi.

Ibiciro by’ibikomoka kuri peteroli ku isoko mpuzamahanga byahise bisubira ku giciro kingana n’icyo byahozeho mbere y’intambara ya Amerika na Iran. Mu gihe imirwano yari ikaze, akagunguru k’ibikomoka kuri peteroli bidatunganyije kageze no kuri 120$, ariko ubu kasubiye kuri 77,69$. Ibikomoka kuri peteroli byo muri Amerika byo byageze kuri 74,90$ ku kagunguru.

Hormuz inyuramo 20% by’ibikomoka kuri peteroli bikoreshwa ku Isi buri munsi n’ibicuruzwa byinshi biva mu Burasirazuba bwo hagati cyangwa ibijyanwayo bitangirika vuba.

Ibiciro byatumbagiye ku isoko mpuzamahanga byatumye no ku isoko ry’u Rwanda bizamuka bwa mbere mu mateka kuko ku wa 5 Kamena 2026, ibiciro bishya byatangajwe byagaragazaga ko litiro ya lisansi igura 2.938 Frw, mu gihe litiro ya mazutu yageze kuri 2.927 Frw bitewe n’impinduka zagaragaye ku isoko mpuzamahanga.

Minisitiri w’Intebe, Dr Justin Nsengiyumva ku wa 6 Kamena yabwiye itangazamakuru ko iyo Leta idashyira nkunganire kuri mazutu, litiro yari kugura 3.581 Frw, bivuze ko nkunganire yashyizweho ari 18,16%.

Donald Trump yasinye kuri aya masezerano ari mu Bufaransa ubwo yari yitabiriye inama ya G7. Iran na yo yemeje ko Perezida wayo Masoud Pezeshkian yasinye kuri izi nyandiko ku wa 17 Kamena.

Minisitiri w’Imari n’Igenamigambi, Yusuf Murangwa ubwo yari mu kiganiro n’abanyamakuru ku wa 16 Kamena, yavuze ko nubwo amasezerano yasinywa, u Rwanda rugomba kureba niba bizaramba.

Ati ‘Twabonye amakuru meza ko hari amasezerano y’ibanze ku ntambara iri mu Burasirazuba bwo Hagati ariko ihame ryacu ni ugutegereza tukabanza tukareba. Kubera ibintu bibiri, icya mbere ni ukubanza kureba niba bishyirwa mu bikorwa kandi bikamara igihe kirekire.’

Ibiciro by’ibikomoka kuri peteroli mu Rwanda bihinduka buri mezi abiri, ndetse haba hari ibyabitswe mu bubiko byakoreshwa mu bihe bigoye.

Ubwato buvuye ku byambu bya Dubai cyangwa Bandar Abbas bifata iminsi ibarirwa hagati y’itandatu na 12 kugira ngo bugere ku byambu bya Mombasa muri Kenya cyangwa Dar es Salaam. Ku bijya mu Rwanda hiyongeraho urugendo rubivana ku cyambu kugeza byinjiye mu gihugu.

Ibi bivuze ko hari n’ibicuruzwa byaranguwe ahandi ku giciro gihanitse biri mu nzira bitaragera mu gihugu cyangwa ibyahageze muri ibi bihe by’intambara bikiri mu bubiko.

Murangwa ati ‘n’iyo ibintu byose byajya ku murongo uyu munsi haba hakiri byinshi byo gukemura. Rero turacyateganya ko tuzakomeza kubona ingaruka z’ikibazo cyabayeho, kugeza igihe tuzabonera neza ibiri kuba ku ruhando mpuzamahanga mu bijyanye n’ubucuruzi, uko abacuruzi mpuzamahanga bazashobora gukura ibintu byaheze mu kigobe [cya Persique].’

Amasezerano y’ibanze ya Amerika na Iran ateganya ko ibikorwa byo gutegura ibisasu bya mine byaba biteze mu mazi ya Hormuz n’ibindi byabera urujya n’uruza imbogamizi bizamara nibura iminsi 30. Ni na yo Amerika izakoresha ikura ingabo zayo n’ubwato bw’intambara ku byambu bya Iran yari yarafunze.

Iyi ngingo ivuga ko muri icyo gihe ubwato butwara ibicuruzwa bugomba kuba bungana n’ubwagendaga mbere y’intambara, bikazashyirwa mu bikorwa ba Leta ya Iran.

U Rwanda ruhamya ko ibikomoka kuri peteroli rwizigamye bitakozweho kuva intambara yo muri Iran itangiye, ndetse rwiyemeje gukora ibishoboka ngo bitazabura ku isoko, kimwe n’ibindi bicuruzwa bikenerwa mu buzima bwa buri munsi.

Ikigo cy’Igihugu cy’Ibarurishamibare kigaragaza ko muri Gicurasi 2026, ibiciro ku masoko byiyongereyeho 12,9% ugereranyije na Gicurasi 2025.

Minisitiri Murangwa yavuze ko impinduka zabaho zaterwa n’uko amasezerano azubahirizwa mu gihe kirekire kizaza

Tshisekedi warebye uyu mukino muri stade, ndetse ikipe ya RDC ikora amateka yo kunganya na Portugal no kubona inota rya mbere mu Gikombe cy’Isi yitabiriye bwa kabiri. Yagiherukagamo mu myaka 52 ishize.

Kuri Tshisekedi, ntiwari umwanya wo kwishimira amateka Les Léopards yanditse yo gutsinda igitego bwa mbere mu Gikombe cy’Isi, ahubwo yahisemo guhura n’Abanye-Congo baba muri Amerika ababwira ibijyanye na politiki.

Tshisekedi yavuze ko bijyanye n’uko igihugu cyabo kiri mu ntambara, abakinnyi babo bakoze ibitangaza kuko hari abatekerezaga ko bazagorwa n’abarimo rutahizamu Cristiano Ronaldo uri mu bakomeye ku Isi, ariko ko bagaragaje ko bashobora kwihagararaho.

Asobanura iby’iyi ntambara, Tshisekedi yavuze ko Leta ya RDC yatahuye abagambanyi bakorana n’ihuriro AFC/M23 rigenzura igice kinini cy’uburasirazuba bw’igihugu, asobanura ko ngo yibwiraga ko baba mu Rwanda gusa ariko ngo yasanze baracengeye n’i Kinshasa.

Ati ‘Ntimuzemere kugambanira igihugu cyanyu. Abarozi babaho. Twatekerezaga ko baba mu Rwanda gusa ariko baraducengeye.’

Tshisekedi yavuze ko nyuma y’ubutegetsi bwa Mobutu Sese Seko, RDC yabonye umuyobozi mwiza, Laurent-Désiré Kabila ariko ko nyuma abo yise abanzi binjiye mu gihugu cyabo bamukuraho, bishyiriraho uwo yise imbwa, bayitoza ibyo bashaka.

Uretse kwibasira Joseph Kabila, Tshisekedi yabwiye Abanye-Congo baba muri Amerika mu gihe cya vuba bazisubiza Umujyi wa Goma n’uwa Bukavu zimaze igihe kirenga umwaka zitagenzura.

Ati ‘Mfite icyizere ko mu minsi iri imbere, Congo yose izabohorwa. Abavandimwe na bashiki bacu i Goma na Bukavu barishimye, tuzaba turi kumwe. Abanzi baracengeye, kandi uyu munsi twarize, tuhakura isomo. Ubu tugomba kubaka ikintu gikomeye.’

Umuvugizi wa Guverinoma y’u Rwanda, Yolande Makolo abinyijije kuri X yavuze ko Ikipe y’Igihugu ya RDC (Les Léopards) yahaye ibyishimo byinshi Abanyafurika ariko Tshisekedi agahitamo kubidobya atuka Abanyarwanda n’abenegihugu.

Ati ‘Les Léopards yashimishije Afurika mu mukino wabo wa mbere w’Igikombe cy’Isi. Perezida Tshisekedi yahisemo kudobya ibi bihe atuka Abanyarwanda n’Abanye-Congo, n’ubutaka bwa Amerika, yigamba gukomeza kugaba ibitero mu Burasirazuba bwa RDC. Tshisekedi yifashishije ibikorwa bikomeye by’imikino mu nyungu za politiki iciriritse, ndetse amagambo ye y’ubushotoranyi agaragaza ukutubaha no kutemera amasezerano ya Washington n’intego zayo.’

Amasezerano yasinywe hagati y’u Rwanda na RDC ku wa 4 Ukuboza 2025, ateganya ibyo gusenya umutwe w’iterabwoba wa FDLR, bikozwe n’ingabo za RDC, byamara gukorwa u Rwanda rugakuraho ingamba z’ubwirinzi. Harimo kandi ingingo yo gucyura impunzi.

Mu bikorwaremezo, byitezwe ko u Rwanda na RDC bizongera imbaraga mu bufatanye mu kubaka urugomero rwa Rusizi III ruzatanga megawatt 206 z’amashanyarazi, rucanire abaturage barenga ibihumbi 300. Biteganyijwe ko ruzuzura mu 2030 rutwaye miliyoni 800$.

Hari kandi ibijyanye n’amabuye y’agaciro, aho u Rwanda na RDC bizajya mu cyiciro kirenze kuyacukura, biyatunganye kuko ari bwo yagirira inyungu abaturage bo mu karere, kandi ko hazajyaho amategeko ahuriweho ajyanye n’umutekano w’ubucuruzi bwayo.

Amasezerano ya Washington kandi ateganya ko ibihugu byombi bizifatanya gukura Gaz Méthane muri iki kiyaga, biyitunganyemo ingufu z’amashanyarazi. Icyakora nubwo ayo masezerano yasinywe ku ruhande rwa RDC bisa n’aho yabaye amasigaracyicaro.

Guverinoma y’u Rwanda ihamya ko ibihugu byombi bifite amahirwe menshi byabyaza umusaruro, akabifasha kwirinda amakimbirane. Yizera ko habayeho ubufatanye buteganywa mu masezerano ya Washington, akarere kagira amahoro arambye.

Umuvugizi wa Guverinoma y’u Rwanda, Yolande Makolo yanenze Perezida Tshisekedi utubaha amasezerano ya Washington akigamba kurasa mu Burasirazuba bwa RDC

Yabigarutseho ubwo yari amaze guhererekanya ububashya na Dr. Jimmy Gasore asimbuye kuri uyu mwanya.

Ku wa 10 Kamena 2026 ni bwo Perezida Kagame yakoze impinduka muri minisiteri eshatu icyarimwe, zisiga hose hinjijwemo abayobozi bashya barimo na Murwanashyaka wagizwe Minisitiri w’Ibikorwaremezo.

Murwanashyaka yashimye Perezida Kagame yagereranyije n’umutoza w’ikipe, kuba yaramutoranyije ngo ayobore iyi minisiteri ifite uruhare runini mu iterambere ry’igihugu, agaragaza ko na we atazamutenguha.

Ati ‘Ndashimira umutoza wangize kapiteni w’iri tsinda…. umutoza ushyira abakinnyi mu mwanya. Ndamushimira ko yatekereje ko naba umuyobozi wa Minisiteri y’Ibikorwaremezo. Minisiteri ifite ubuzima bw’igihugu ifite uruhare rukomeye cyane.’

Murwanashyaka yavuze ko nk’uko kapiteni atari kamara ko ari we uba uzi gukina kurusha abandi ahubwo ari ushobora guhuza bagenzi bakagera ku ntsinzi, na we azakora uko ashoboye kose ngo bagere ku musaruro witezwe, asaba abo asanze kumufasha.

Ati ‘Bakinnyi beza muzanyemerere mbe kapiteni mwiza. Nanjye nzabemerera mube abakinnyi beza. Icyo bivuze muri rusange reka dukorane.’

Murwanashyaka Damien wagizwe Minisitiri w’lbikorwaremezo, kuva mu 2025 yari Umuyobozi Mukuru w’ikigo cy’ubwubatsi yashinze cyitwa Preferred Contractors Ltd. Mbere yo kukijyamo kuva mu 2024-2025 yabaye Umuyobozi Mukuru wa Ultimate Developers Ltd izwi cyane mu bikorwa byo kubaka inyubako zo guturamo.

Murwanashyaka kandi yakoreye ibigo bitandukanye birimo Real Contractors Ltd na ROKO Constructions Ltd.

Yakoze kandi muri Cimerwa PPC, GASABO 3D DESIGN LTD no muri Century Engineering Contractors kandi hose agenda agaragaza ubumenyi buhambaye mu gucunga imishinga ikomeye.

Yavuze ko nubwo yakunze gukorera mu bigo by’abikorera cyane, bikaba ari ubwa mbere yinjiye muri Guverinoma, ariko yiga vuba ndetse atazatenguha Abanyarwanda.

Ati ‘Niga vuba. Ntabwo nzabatenguha. Icyo ndagifite ndabizi ko mundushya byinshi ndabizi ko ngiye kubigiraho. Ni byo navugaga kapiteni ntabwo bivuze ko ari we urusha abakinnyi gukina ahubwo bivuze ko bamutoranyije kugira ngo [ahuze] umutoza uri hanze n’abakinnyi bari mu kibuga, akore akazi ke neza ikipe itsinde.’

Kuko ikipe itsinzwe umusaruro mubi utazirwa ikipe yose, Murwanashyaka yasabye abakozi gutahiriza umugozi umwe bagafatanya kugera ku musaruro wifuzwa.

Minisiteri y’Ibikorwaremezo iri muri nke mu Rwanda zahawe abanyamabanga ba Leta babiri.

Barimo Zingiro Armand wagizwe Umunyamabanga wa Leta muri Minisiteri y’Ibikorwaremezo wari Umuyobozi Mukuru w’Ikigo gishinzwe Ingufu, REG na Col Bizimungu Claudien wahoze ari Umuyobozi Wungirije Engineer Command [urwego rushinzwe ibikorwaremezo mu ngabo z’u Rwanda].

Minisitiri Murwanashyaka ati ‘Murumva ingufu n’intambwe ubuyobozi bushaka ko tugenderaho. Iyo bajya gushyiraho undi munyamabanga wa Leta mushya muba mwumva icyo bishatse kuvuga. Mwakoraga neza ariko mureke turusheho. Ntabwo abaminisitiri ari bo bagiye kubikora ahubwo ni twe twese dufatanyije.’

Murwanashyaka ni inzobere mu bijyanye n’ubwubatsi (Professional Civil Engineer). Afite uburambe burenga imyaka 15 mu rwego rw’ubwubatsi n’imishinga y’iterambere ndetse akaba n’umunyamuryango w’Urwego Mpuzamahanga rw’Abakemurampaka (Chartered Institute of Arbitrators).

Yize ibijyanye n’Ubwubatsi muri Kaminuza aho yarangije amasomo afite amanota ya mbere (First Class) muri Kaminuza y’u Rwanda.

Yize icyiciro cya gatatu cya Kaminuza muri Oklahoma Christian University.

Ahawe minisiteri ifatwa nk’umutima w’iterambere ry’igihugu, kuko iterambere ry’ibikorwaremezo ari ryo rizafasha u Rwanda kuzaba igihugu gifite ubukungu buringaniye bitarenze mu 2035.

Minisitiri w’Ibikorwaremezo mushya, Murwanashyaka Damien ari kumwe na Perezida Kagame nyuma yo kurahira

Minisitiri w’Ibikorwaremezo mushya, Murwanashyaka Damien, yavuze ko atazatenguha Abanyarwanda

Minisitiri w’Ibikorwaremezo mushya, Murwanashyaka Damien (iburyo) yahererekanyije ububasha na Dr. Jimmy Gasore asimbuye

Abayobozi bashya ba Minisiteri y’Ibikorwaremezo bari kumwe n’abo basimbuye

Umushumba Mukuru wa Noble Family Church akaba n’uwashinze Women Foundation Ministries, Apostle Mignonne Kabera, yatangaje ko azakora ibishoboka akitabira igitaramo gikomeye cya Ambassadors of Christ Choir cyo kwizihiza imyaka 30 bamaze bakora umurimo w’Imana.

Iki gitaramo kizaba ku wa 30 Kanama 2026 muri Kigali Arena.

Yabigarutseho mugoroba wihariye wo gusangira n’abaramyi n’abakozi b’Imana uzwi nka Worshippers Dinner, wabaye ku wa 11 Kamena 2026 muri Kigali Marriott Hotel, mu giterane ngarukamwaka cya 7 Days of Worship 2026 [Iminsi irindwi yo kuramya Imana].

Ubwo yaganirizaga abari bitabiriye, Apostle Mignonne Kabera yavuze ko akunda byimazeyo Sarah Sanyu Uwera wo muri iyi Chorale.

Ati “Ntabwo nava hano ntabikubwiye…turagukunda cyane.”

Yakomeje avuga ko iki gitaramo cya Ambassadors of Christ Choir yo mu Itorero ry’Abadiventiste b’Umunsi wa Karindwi na we azakora ibishoboka akacyitabira.

Yagize ati: “Mbatumiye mu gitaramo cya Ambassadors of Christ Choir kizaba tariki ya 30 Kanama 2026. Nziyeranja [nzakora ibishoboka byose mpaboneke]. Ndashima Imana ko Représentant wanyu ari inshuti yanjye. Nzaza, turabakunda cyane.”

Amatike akaba yaramaze kugera ku isoko aho ari mu byiciro bitandukanye: Upper Zone ni 10,000 Frw ku bazayagura ku munsi w’igitaramo, ariko abayagura mbere yacyo bari kuyabona ku 5,000 Frw. Lower Zone ni 15,000 Frw, ariko mbere y’igitaramo ari kugura 10,000 Frw.

Amatike yo mu gice cya Ground Floor ari kugura 20,000 Frw; ayo muri CIP ni 30,000 Frw; ayo muri Premium ni 25,000 Frw, naho ayo muri Platinum Zone ni 50,000 Frw.

Ku bashaka kugura amatike hakiri kare, ashobora kuboneka kuri www.ticqet.rw cyangwa bakifashisha kode *513*1*1#.

Apostle Mignonne Kabera yavuze ko azitabira igitaramo cya Ambassadors

Iminsi irabarirwa ku ntoki ngo Prophet Vincent Mackay ukorera ivugabutumwa muri Leta Zunze Ubumwe za Amerika arushinge n’Umunyarwandakazi Kate Clinton Ndikumagenge.

Nyuma y’igihe bamaze bari mu rukundo, Prophet Vincent Mackay na Kate Clinton Ndikumagenge, bazarushinga ku wa Gatandatu, tariki ya 20 Kamena 2026.

Mu butumwa yanyujije ku mbuga nkoranyambaga ze by’umwihariko kuri Instagram, Clinton Ndikumagenge, yasangije abamukurikira amashusho ari kumwe n’umukunzi we, bari mu byishimo.

Aya mashusho yafatiwe mu Majyaruguru y’u Rwanda yayaherekesheje amagambo agira ati ‘Ku wa Gatandatu hatinze kugera.’

Ubukwe bwa Prophet Vincent Mackay na Kate Clinton Ndikumagenge, buzabera muri Camp Kigali.

Ni ibirori byahawe umwihariko kuko mu kurimbisha aho bizabera hifashishijwe Umunya-Uganda Icandy, umuhanga mu gukora decoration uzwi cyane mu Karere na Afurika muri rusange.

Prophet Vincent Mackay amaze igihe ari mu rukundo na Ndikumagenge kuko yamwambikiye impeta y’urukundo mu Kirwa cya Santorini mu Bugiriki mu 2022.
Kate Clinton Ndikumagenge yamenyekanye binyuze mu nyigisho anyuza kuri Instagram, aho yigisha ubutumwa bwiza abinyujije mu cyo yise ‘Preeminent Touch’.

Umukunzi we, Prophet Vincent, ni we washinze akaba anayobora Umuryango w’Ivugabutumwa witwa ‘Prayer Warriors Global’. Umaze imyaka itandatu aho ukorera muri Leta zitandukanye muri Amerika, Afurika, u Burayi na Amerika y’Amajyaruguru.

Abinyujije muri uyu Muryango, Prophet Vincent Mackay ategura ibiterane bigari mu bice bitandukanye by’Isi. Nko mu mpeshyi ya 2023, yahurije abagera kuri 500 mu cyo yise ‘Purpose Conference’ cyabereye i Dallas muri Texas.

Prophet Vincent Mackay na Kate Clinton Ndikumagenge bagiye gushyingirwa

Umunyezamu wa Kiyovu Sports, Desire Bienvenue Djaoyang James arimo gufasha bamwe mu bakinnyi b’Abanyarwanda kuba bajya gukina hanze y’u Rwanda.

Uyu munyezamu ukomoka muri Cameroun akaba ari ku mwaka we wa kabiri muri Kiyovu Sports yagezemo avuye muri Vision FC yari imanutse mu cyiciro cya.

Uyu munyezamu bitewe n’aho yagiye anyura hose, yagiye ahura n’abashinzwe gushakira abakinnyi isoko benshi.

Ageze muri Kiyovu Sports yabone harimo abakinnyi bakiri bato kandi bafite impano, yatangiye kubegera ababaza niba yabafasha akabahuza n’abantu babafasha kujya gukina i Burayi.

Amakuru ISIMBI yamenye ni uko ari we wafashije Niyo David kuba yajya gukina muri Ukraine mu ikipe ya NK Veres Rivne.

Bivugwa ko uyu munyezamu yamuhuje n’uwamufashije kubona iyi kipe yerekejemo.

Si ibyo gusa, amakuru avuga ko ari na we urimo gufasha Uwineza Rene na we ukinira Kiyovu Sports kuba yajya mu gukina hanze.

James Desire arimo gufasha abakinnyi b’abanyarwanda kuba bajya gukina hanze y’u Rwanda

Bivugwa ko yafashije Niyo David kujya muri Ukraine

Ngo ari mu bantu barimo gufasha Uwineza Rene

Bigirwamo uruhare n’inzira nshya abaturage ba Nyaruguru bayobotse yo kuzamura ingano y’ubuso buhingwaho icyayi hagamijwe kuzamura umusururo gitanga.

Bikorwa binyuze mu nguzanyo zitagira inyungu zihabwa abahinzi cyane cyane ab’amasambu atarengeje hegitari imwe.

Ubu buhinzi abaturage b’i Nyaruguru babufashwamo n’umushinga SCON (Services Company Outgrowers Nyaruguru) , ubafasha kubona igishoro cyo guhingisha, ingemwe nziza z’icyayi cyo gutera ndetse n’ubujyanama mu buhinzi bw’icyayi.

Uyu mushinga wa SCON watangijwe ku bufatanye bwa Leta y’u Rwanda n’Umuryango The Wood Foundation, ugamije gufasha abaturage bafite ubutaka buto kwinjira mu buhinzi bw’icyayi no kububyaza umusaruro, binyuze mu nguzanyo zitagira inyungu.

Umuyobozi wa SCON mu Karere ka Nyaruguru, Hategekimana Vincent, yavuze ko kuva uyu mushinga watangira mu 2017, intego nyamukuru yari ugufasha abaturage bafite ubutaka butarenga hegitari imwe kubasha guhinga icyayi no kubona inyungu zituruka ku buhinzi bwacyo.

Yagize ati ‘Twatangiye duha abaturage inguzanyo y’ibihumbi 900 Frw itagira inyungu, ubu tugeze kuri miliyoni 1 Frw. Iyo nguzanyo ibafasha gutegura umurima, kubona ingemwe z’icyayi zitanga umusaruro vuba ndetse n’ifumbire ku giciro cyiza, bityo bakinjira mu buhinzi, bakazatangira kwishyura make make basaruye.’

Hategekimana yavuze ko SCON ifite intego yo gufasha abaturage guhinga icyayi kuri hegitari 6400 bizakorwa n’imiryango ibihumbi 12 mu myaka 10 na 15. Kugeza ubu hamaze guterwa hegitari 2741 zifitwe n’imiryango 3697.

Yagaragaje ko umusaruro watangiye kwiyongera ku buryo mu mwaka umwe gusa hasaruwe toni 4500 z’amababi y’icyayi, zinjirije abahinzi bashya bakorana na SCON arenga miliyari 1.9 Frw.

Ndagijimana Jean Marie Vianney w’imyaka 35 wo mu Murenge wa Mata, yavuze ko yigeze kugera aho atekereza kugurisha ubutaka bwe kubera ubukene abona nta n’ikibweraho, ariko kuva mu 2021 atangiye yo gufashwa gutera icyayi kuri hegitari 1,37, ubu yabaye umukoresha nawe.

Ati ‘Ubu mfite amatungo, abana bariga kandi natanze n’akazi, nkoresha abakozi barenga 10 buri munsi. Icyayi cyampaye icyizere cy’ubuzima bw’ejo hazaza.’

Mukamisha Domitille wo mu Murenge wa Kibeho na we yavuze ko mbere yari afite agashyamba kamwinjirizaga atarenga ibihumbi 10 Frw mu myaka itanu, ariko ubu icyayi yahahihinze akibonamo ya mafaranga y’ishyamba mu cyumweru kimwe.

Ati ‘Ubu nkoresha abakozi 15 mu gusarura n’abandi 20 mu kubagara. Ubuzima bwarahindutse rwose kubera guhinga icyayi.’

Umuyobozi w’Akarere ka Nyaruguru Wungirije ushinzwe Iterambere ry’Ubukungu, Gashema Janvier, yabwiye IGIHE ko ubuhinzi bw’icyayi bumaze gufata igice gikomeye cy’ubukungu bw’akarere kabo.

Yashingiye nganda enye z’icyayi zimaze kuhubakwa ndetse n’ubuso bwa hegitari 9362 buhinzeho iki gihingwa, mu gihe hari gahunda ko buri mwaka hongerwaho nibura hegitari 500 z’icyayi gishya.

Ati ‘Kuva mu 2018 tumaze gutera hegitari 3500 nshya z’icyayi. Muri zo izisaga 2700 ni iz’abaturage ubwabo, izindi zirenga 700 ni iz’inganda. Ibi byose bigamije kongera umusaruro no guhanga imirimo, kandi koko ni byo kuko byazamuye ubukungu muri rusange n’ubushobozi bw’abaturage bwo guhaha.’

Yavuze ko abaturage basaga 9800 bafite akazi gahoraho gakomoka ku cyayi binyuze mu kukibagara, kugisarura no gukora mu nganda ubwazo, kandi hari gahunda yo gukomeza kuzamura iyi mibare y’ubuhinge bw’icyayi kuri hegitari 12.000 mu bihe biri imbere.

Imibare y’Akarere ka Nyaruguru igaragaza ko mu mwaka umwe gusa wa 2025/2026, icyayi cyinjije mu mifuka y’abahinzi arenga miliyari 13 Frw.

Icyayi cy’i Nyaruguru cyatumye abahinzi babona asaga miliyari 13 Frw muri uyu mwaka w’ingengo y’imari

Abaturage b’i Nyaruguru bamaze kumenya agaciro k’icyayi

Umuyobozi wa SCON mu Karere ka Nyaruguru, Hategekimana Vincent, yavuze ko batanga inguzanyo ya miliyoni 1 Frw itagira inyungu ifasha abahinzi kongera umusaruro w’icyayi

Shumbusho Eliezer w’imyaka 70, wo mu Murenge wa Busanze, i Nyaruguru, yavuze ko yamenye uburyo icyayi ari imari akuze

Visi Meya Wungirije ushinzwe Iterambere ry’Ubukungu muri Nyaruguru, Gashema Janvier, yavuze ka icyayi gikomeje kuba inkingi y’ubukungu bw’aka karere

Mukamisha Domitille, yavuze ko mbere yo gufashwa gutangira guhinga icyayi yacaga inshuro, none ubu yabaye umukoresha nawe

Ibi Minisitiri Lamola yabigarutseho kuri uyu wa 17 Kamena 2026 ubwo yakiraga i Pretoria mugenzi we w’u Rwanda, Amb. Olivier Nduhungirehe mu biganiro bigamije kuzahura umubano w’ibihugu byombi.

Minisitiri Lamola yavuze ko nubwo hashobora kubaho kutavuga rumwe cyangwa kutabona ibintu kimwe, buri gihe hahora hari ubucuti hagati y’u Rwanda na Afurika y’Epfo.

Ati ‘Hejuru yo kudahuza no kutabona ibintu kimwe, umubano hagati y’ibihugu byacu buri gihe uba ari ubucuti, ari mwiza, ndetse wubakiye ku bufatanye n’ubwubahane. Afurika y’Epfo n’u Rwanda byikoreye inshingano yo gufatanya birushijeho, kuko hari byinshi bihuza abantu bacu.’

Yakomeje agaragaza ko ibihugu byombi bisangiye amateka asharaririye, ashingiye kuri Apartheid muri Afurika y’Epfo na Jenoside yakorewe Abatutsi mu Rwanda.

Ati ‘Ibihugu byacu byombi byaciye mu mateka ababaje, kuva ku gihe cya Apartheid muri Afurika na Jenoside yakorewe Abatutsi mu Rwanda. Tuzahora twibuka intwari zatanze ubuzima bwazo mu kubaka umusingi w’ibi bihugu uyu munsi byitwa u Rwanda na Afurika y’Epfo. Ibi biduhuza kandi byubakiye ku myemerere dusangiye yo kunga ubumwe, ubumwe bwa Afurika no gushyira imbere ubunyafurika.’

Iyi nama ije mu gihe hamaze igihe hari agatotsi mu mubano w’u Rwanda na Afurika y’Epfo. U Rwanda rushinja iki gihugu gucumbikira abafite imigambi yo kuruhungabanyiriza umutekano.

Hejuru y’ibi bibazo mu myaka ya vuba hiyongereyeho n’ikijyanye n’uruhare Ingabo za Afurika y’Epfo zagize mu ntambara imaze igihe mu Burasirazuba bwa Repubulika Iharanira Demokarasi ya Congo, aho zarwanaga ku ruhande rw’ihuriro ry’ingabo z’iki gihugu ririmo na FDLR yasize ikoze Jenoside yakorewe Abatutsi rihanganye n’umutwe wa AFC/M23

U Rwanda rwagiye ruburira kenshi Afurika y’Epfo ku kwinjira muri iyi ntambara yari irimo n’imigambi yo kuruhungabanyiriza umutekano, yagiye ku karubanda ubwo Umujyi wa Goma wafatwaga na AFC/M23 igasanga harunze intwaro zikomeye zari kwifashishwa muri uyu mugambi.

Minisitiri Lamola yagaragaje ko igihugu cye cyiteguye kuzahura umubano n’u Rwanda cyane ko hari umusingi washyizweho watuma bishoboka.

Ati ‘Afurika y’Epfo yongeye gushimangira ubushake bwayo mu kongera gusubiza ibintu mu buryo, ibihugu byacu byombi byashyizeho umusingi w’iki cyerekezo gishya, nk’urugero Naledi Pandor wahoze ari Minisitiri yakiriye abakubanjirije hano muri Kamena mu 2021, turibuka kandi ubwo Perezida Ramaphosa yasuraga u Rwanda muri Mata mu 2024 ubwo hibukwaga abishwe muri Jenoside ku nshuro ya 30, bombi, we na Perezida Kagame bashimangiye intego yo kuzahura no kongerera imbaraga umubano hagati y’ibihugu byombi. Ku bw’ibyo intambwe z’ingenzi zaratewe mu kongera kubaka icyizere no gukomeza inzira zashyizweho zo kuganira.’

Imwe mu ngaruka z’ibi bibazo bya Afurika y’Epfo n’u Rwanda ni uko Abanyarwanda bagorwa na kubona visa zo kujya muri iki gihugu. Minisitiri Lamola yijeje ko bishobora gukemuka vuba.

Ati ‘Iyi nama kandi izatuma haterwa intambwe mu kuba twabasha gukuraho icyemezo cyo gukumira ibijyanye na Visa ku Banyarwanda bafite Pasiporo zisanzwe, bashaka kuza muri Afurika y’Epfo.’

Yashimye kandi icyemezo cyafashwe n’u Rwanda cyo gukomorera ibikomoka ku matungo biva muri Afurika y’Epfo. Ni icyemezo u Rwanda rwari rwarafashe mu 2017 kubera icyorezo cya listeriosis.

Minisitiri w’Ububanyi n’Amahanga w’u Rwanda, Amb. Olivier Nduhungirehe yagarutse ku mateka y’ubutwererane hagati y’ibihugu byombi, ashimangira ko Afurika y’Epfo yafashije u Rwanda kongera kwiyubaka nyuma ya Jenoside yakorewe Abatutsi.

Ati ‘Nyuma ya Jenoside yakorewe Abatutsi mu Rwanda mu 1994, Afurika y’Epfo yagize uruhare rukomeye mu gufasha kongera kwiyubaka n’umuhate wo gutera imbere. Nka kimwe mu bihugu bifite ubukungu bukomeye muri Afurika, niba ahubwo atariyo ya mbere, Afurika y’Epfo yatanze ubufasha mu nzego zitandukanye, igira uruhare mu kongera kwiyubaka k’u Rwanda n’iterambere ry’igihe kirekire.’

Nduhungirehe yavuze ko mu rwego rw’uburezi Afurika y’Epfo yatanze buruse, amahugurwa n’ubufatanye mu by’uburezi. Iki gihugu kandi cyafashije u Rwanda mu rwego rw’ubuzima, ubukungu n’ishoramari cyane ko ikigo cya MTN ari ho gikomoka.

Minisitiri Nduhungirehe yavuze ko ‘Inama y’uyu munsi igaragaza ubushake bw’abakuru b’ibihugu byacu bwo gutangira amateka mashya mu mubano w’u Rwanda na Afurika y’Epfo. Yerekana imyemerere duhuriyeho ko ibiganiro, ubwubahane no kuganira byubaka ari uburyo bwiza bwo gukemura ubwumvikane buke no gushimangira ubufatanye.’

Minisitiri Nduhungirehe hamwe na mugenzi we wa Afurika y’Epfo, Ronald Lamola