Author: webrwanda

Umuhanzi w’icyamamare muri Tanzania, Diamond Platnumz, yongeye gutuma abantu bacicikana ku mbuga nkoranyambaga nyuma yo gushyira hanze ifoto y’umukobwa w’uburanga buhebuje witwa Kristine Boris, amasaha make nyuma y’uko Zuchu atangaje ko umubano wabo warangiye.

Yifashishije ahashyirwa ubutumwa bumara amasaha 24 ku rukuta rwe rwa Instagram, Diamond yaherekeje iyo foto amagambo y’indirimbo ye “Natulizana”, ijambo ryo mu Giswahili risobanura nko gutuza cyangwa kuba amahoro agarutse, anongeraho ikimenyetso cy’umuriro.

Ibi byatumye benshi bakeka ko yashakaga gutanga ubutumwa bwihariye ku wahoze ari umukunzi we.

Ibi byabaye nyuma y’uko Zuhura Othman Soud uzwi nka Zuchu, atangaje ku mbuga nkoranyambaga ko we na Diamond batakiri mu rukundo.

Ubutumwa bwe bwatunguranye cyane kuko bwaje mu gihe hari hamaze iminsi hakwirakwira ibihuha bivuga ko ashobora kuba atwite inda ya Diamond.

Abafana kandi bahise bibuka ko Zuchu atigeze agaragara mu birori byo kwizihiza imyaka 59 y’amavuko ya Mama Dangote, nyina wa Diamond, ibintu byari byaratumye benshi batangira gukeka ko umubano wabo utari ugihagaze neza.

Mu gihe bamwe bari bategereje ko Diamond agira icyo atangaza ku itandukana ryabo, yahisemo gushyira hanze ifoto y’undi mukobwa aho kugira icyo abivugaho.

Icyo gikorwa cyafashwe na benshi nk’ikigaragaza ko atashenguwe n’ibyabaye cyangwa ko ashaka kwerekana ko yamaze gukomeza ubuzima bwe.

Diamond Platnumz, azwi cyane mu muziki wa Afurika y’Iburasirazuba ndetse no mu nkuru z’urukundo zagiye zimuvugwaho. Yigeze gukundana n’ibyamamare birimo Zari Hassan na Tanasha Donna bose banafitanye abana.

Umukobwa Diamond Platnumz yerekanye

Diamond Platnumz yavugishije benshi

Ikibazo cy'abangavu basambanywa bagaterwa inda kiri mu bikomeye u Rwanda rukomeje guhangana na byo.

Mu mpera za Kamena 2026, Minisitiri w'Ubuzima, Dr. Sabin Nsanzimana, yatangaje ko mu Rwanda abana b'abakobwa baterwa inda nibura buri mwaka barenga ibihumbi 23, bakaba abana 60 ku munsi.

Mu Karere ka Rutsiro abangavu basambanyijwe bakanaterwa inda mu 2024 bari 533, umubare waje kugabanyuka mu 2025 bagera kuri 390, mu gihe kuva muri Mutarama 2026 kugeza uyu munsi abangavu 310 bamaze guterwa inda.

Abangavu batewe inda imburagihe baganiriye na IGIHE bo mu Murenge wa Kivumu bavuze ko nyuma yo gusambanywa bakanaterwa inda imiryango yabo itaboroheye ndetse bamwe bakisanga mu nzu bikodeshereza.

Umwe yavuze ko yatewe inda ubwo yigaga mu mwaka wa kane w'amashuri abanza, avuga ko umuryango wahise umuha akato ndetse kuri ubu yikodeshereza inzu 4000 Frw abona avuye guhingira abaturanyi cyangwa yayabura akayishyura imibyizi.

Ati 'Iwacu batuye ahantu hari agashyamba nari ngiye ku muhanda umusore aramfata andyamisha hasi muri iryo shyamba aransambanya ndetse anantera inda mfite imyaka 14, nageze mu rugo ndabibabwira tujya gutanga ikirego kuri RIB baje ku mufata basanga yatorotse kugeza uyu munsi.'

Uyu mwangavu agaragaza ko ababyeyi be kubyakira byabananiye, baramutererana agerageza no kwiyahura nyuma abitekerezaho arabireka, aho agaragaza ko abonye ubushobozi bwo kwiga imyuga, yabasha kwiteza imbere.

Acumbitse mu nzu avuga ko akodesha ibihumbi 4 Frw ku kwezi, mu buzima bumugoye kuko atunzwe no kujya guhingira abaturanyi, ndetse uyu munsi akaba nta n'ubushobozi afite bwo kwiyishyurira no kwishyurira uwo yabyaye ubwisungane mu kwivuza, aho asabwa 10.000 Frw, kuko utwo aronse badusangira bakabona bukeye kabiri.

Uretse uyu hari na mugenzi we utuye mu Murenge wa Kivumu, Akagari ka Nganzo yatewe inda afite imyaka 14 ari mu mwaka wa gatanu w'amashuri abanza, avuga ko ababyeyi be bamwirukanye mu rugo bakimara kumenya ko atwite.

Ati 'Nagiye kwa muganga bambwira ko ntwite, ngeze mu rugo mbibwiye Papa anyirukaho, ndetse ahita anyirukana, Mama yahise ajya kunkodeshereza inzu mbanamo na musaza wanjye. Nkimara kubyara ntabwo nahise mbyakira, nagize ihungabana kuko umwana namaze iminsi irenga ibiri naranze ku mwonsa, bamutangiza amata y'ifu.'

Uyu mukobwa ahamya ko umusore wamuteye inda bamenyaniye mu bukwe bw'abaturanyi, akajya amushukisha amafaranga 1000 Frw akamusambanya ndetse babikoze inshuro nyinshi kugeza amuteye inda.

Avuga ko umusore wamusambanyije bari bahuriye mu gashyamba avuye kurangura ibisheke, amupfuka igitambaro ku munwa, ndetse ko nyuma bagerageje gutanga ikirego ariko akaba adafatwa ngo abifungirwe.

Avuga ko we na musaza we batunzwe no kujya gushaka ubwatsi bwo gusasira ikawa kugira ngo babone ikibatunga, ndetse ko abonye igishoro cy'ibihumbi 50 Frw yabasha kurangura ibisheke byinshi bagacuruza bakiteza imbere.

Akagahinda bagahuriyeho na mugenzi wabo utuye mu Murenge wa Kivumu, Akagari ka Kabere watewe inda afite imyaka 16 avuga ko inda yayitewe n'umumotari wamushukishije umunyenga, ubwo yari avuye ku ishuri, ndetse uyu munsi umwana we agize umwaka n'igice.

Uwase wigaga mu mwaka wa gatatu w'amashuri yisumbuye ku ishuri ryo mu Karere ka Rutsiro, Umurenge wa Murunda yahuye n'umumotari ubwo yarimo ataha iwabo basoje igihembwe cya kabiri, amusaba ko yamutemberana, bajya mu i Santere ya Nkomero, amugurira ibyo kurya n'ibyo kunywa atazi ibyo bayishyizemo yisanga yamusambanyije, kuko banyweraga ku buriri.

Avuga ko ababyeyi be bakimara kumenya ko atwite yatotejwe bikabije, ndetse ni uwamuteye inda yahise akuraho terefone, aho atunzwe no guca inshuro.

Ahamya ko bakeneye abantu benshi bo kubaganiriza ku mateka y'ubuzima banyuzemo nk'uko Anita Ingabire wakuriye mu buzima bwo kwihakanwa n'umubyeyi we (se) bibongerera imbaraga, no kudacika intege bakongera kwigirira icyizere cy'ejo hazaza.

Ingabire Anitha, washinze umuryango Anitha True Reflection of Humanity ufasha abangavu 100 babyaye imburagihe bo mu Murenge wa Kivumu asanga Leta ikwiriye gushyira imbaraga mu gukangurira ababyeyi kudatererana abana ngo ni uko batwite, no kurushaho kwita ku mibereho yabo.

Ati 'Natangiranye abana 100 bo mu Murenge wa Kivumu mvukamo kandi ndifuza gukomeza nkagera kuri benshi kuko babayeho nabi, gusa aba bangavu bose bahuje ikibazo cyo kuba badafite akazi, bamwe bikaba byanatuma bashukwa, bakeneye kwigishwa imyuga bakabasha gukora bakiteza imbere.'

Ingabire avuga ko ababyeyi bahohotera abana kubwo kunanirwa kwakira ko batwite, bikarangira abana n'abo batwite bibagizeho ingaruka zo kubaho mu buzima bubi, aho asanga hakenewe gushyirwa imbaraga mu bukangurambaga bwigisha ababyeyi no kurushaho kwita ku mibereho y'abangavu babyaye imburagihe.

Umuyobozi w'Ikigo Nderabuzima cya Bitenga, mu Karere ka Rutsiro, Dr. Iyakaremye Venant mu kiganiro na IGIHE yavuze hakiri urugendo rukomeye rwo kwigisha ababyeyi.

Ati 'Guterwa inda bakiri bato birahangayikishije, bikagerekwaho gutereranwa n'ababyeyi kuko abenshi baba bavuga ko ari igisebo ku muryango, uzasanga ababyeyi bataganira ni abana ngo babasobanurire ubuzima bw'imyororokere.'

Umuyobozi ushinzwe Gahunda mu Mpuzamiryango yita ku Burenganzira bwa Muntu CLADHO, Murwanashyaka Evariste avuga ko guha akato abana batewe inda imburagihe bidakwiriye.

Ati 'Umubyeyi afite inshingano ku mwana 18 atitaye ku bibazo yahuye na byo byose, ndetse itegeko rirengera umwana riteganya ibihano birimo n'igifungo ku mubyeyi wese watereranye umwana, kuko hari ubwo bituma umwana agwa mu bindi bishuko.'

Murwanashyaka avuga ko umwana wahuye n'ikibazo cyo guterwa inda akiri muto aba akeneye kwitabwaho by'umwihariko, kuko aba akeneye kurerwa kandi yabyaye undi na we ukeneye kurerwa, iyo ababyeyi bamutereranye aba akorewe ihohoterwa, ari na ho ahera avuga ko ababyeyi nk'aba iyo bamenyekanye bashyikirizwa ubutabera.

Imibare igaragaza ko mu 2017, abangavu batewe inda zitateganyijwe bari 17.331, umubare urazamuka cyane mu myaka yakurikiyeho bagera ku 23.622 mu 2019, na ho mu 2020 bagera kuri 19.701, bigeze mu 2021 baba ibihumbi 23.534 na ho mu 2023 uba 19.406, mu 2024 baba 22.454.

Ubushakashatsi bwa DHS 2025 bugaragaza ko abana b'abakobwa batarangije amashuri abanza bafite ibyago byo kubyara byikubye gatanu ugereranyije na bagenzi babo barangije amashuri yisumbuye.

Abarangije amashuri yisumbuye ababyara muri bo ni 4% batwita bari munsi y'imyaka 19 mu gihe bagenzi babo ibyago byabo ari 21%.

Uru rugomo rwabereye mu Murenge wa Murambi n'uwa Cyinzuzi tariki 11 Nyakanga 2026.

Sibomana Théogène wari aho uru rugombo rwatangiriye mu Murenge wa Murambi mu Karere ka Rulindo yabwiye IGIHE ko Saa Mbiri z'ijoro, itsinda ry'abakora ubucukuzi butemewe bw'amabuye y'agaciro bazwi ku izina ry'abapari bageze mu isantere y'ubucuruzi y'ahitwa ku Marembo ritwara umugabo witwa Munyakindi Vincent, n'undi bahimba Mudimba.

Iryo tsinda ryerekeje mu gace ka Budakiranya, rijyana abo bantu mu Rugaragara, rigenda ribakubita inzira yose, bukeye umurambo w'umwe uboneka mu Mudugudu wa Rudogo, undi uboneka mu Rugaragara.

Ati 'Dukeka ko babahoye ibyo baba barapfuye bari gucukura amabuye mu buryo butemewe. Icyo dusaba ni uko ababikoze bahanwa, hakanasenywa itsinda ry'ibihazi bikora ubucukuzi butemewe bw'amabuye y'agaciro'.

Umuvugizi wa Polisi y'u Rwanda mu Ntara y'Amajyaruguru, CIP Ngirabakunzi Ignace yabwiye IGIHE ko bakimenya aya makuru bajyanyeyo n'izindi nzego zirimo DASSO, Ingabo, ubuyobozi bw'Inzego z'ibanze na RIB.

Ati 'Byabaye mu ijoro ryakeye ariko twabimenye mu gitondo. Abakekwa bose hamwe ni umunani, tumaze gufata umuntu umwe, abandi baracyashakishwa. Uwafashwe afungiye kuri sitasiyo ya Polisi ya Murambi, imirambo yajyanywe ku Bitaro bya Rutongo'.

CIP Ngirabakunzi yasabye abaturage gukora ibyemewe n'amategeko, kwirinda amakimbirane no kwihorera.

Ibi bibaye mu gihe nta minsi ibiri irashira, itsinda ry'ibihazi rikora ubucukuzi butemewe bw'amabuye y'agaciro rikubise abandi bantu babiri ariko bo ntabwo bapfuye. Iryo tsinda kandi hari n'inzu y'umuturage riherutse gusenya.

Umuyobozi w'Akarere ka Rulindo, Mukanyirigira Judith yageze ahabereye ubu bugizi bwa nabi, aganiriza abaturage, abasaba gutangira amakuru ku gihe no kwirinda urugomo, anasaba uwaba afite amakuru yafasha mu iperereza ko yayageza ku buyobozi.

Ni igikorwa cyabaye kuri uyu wa 11 Nyakanga 2026, cyahuje urubyiruko rw'abakorerabushake 200 bahagarariye abandi baturutse mu Turere turimo Kicukiro,Nyarugenge, na Gasabo.

Ku wa 11 Mata mu 1994 ni bwo Ingabo za RPA zari muri batayo ya Alpha Mobile Force zageze muri Kigali zigiye kunganira bagenzi babo 600 bari baroherejwe muri CND (ubu hakorera Inteko Ishinga Amategeko).

Mu duce binjiriyemo harimo n'umusozi wa Kagugu kuko ku mugoroba wo ku wa 10 Mata Ingabo za RPA zari zamaze gufata aka gace, abahatuye no mu nkengero zaho bafite agahenge.

Mu rucyerera rwo ku wa 11 Mata 1994 nibwo Ingabo zari iza Habyarimana zigabije aka gace zizanye burende eshatu n'imodoka zuzuye abasirikare.

Umugambi mubisha wari uzizanye ntiwabashije kugerwaho kuko Inkotanyi zabarashe rugikubita. Uku kuraswaho byatumye burende yari imbere ishya abandi bakwira imishwaro bahunga basubira iyo bari bavuye.

Umuhuzabikorwa w'urubyiruko rw'abakorerabushake mu Mujyi wa Kigali, Uwitonze Alexia, yavuze ko bahisemo kuza kwiga amateka y'urugamba rwo kubohora igihugu by'umwihariko i Kagugu kugira ngo barusheho gusobanukirwa amateka yaho n'uko byakozwe.

Ati 'Abapfobya Jenoside bavuga ko Inkotanyi zari ziri kurwanira ubutegetsi, ariko ntabwo ariko kuri kuko icyo twabonye ni uko intego yabo yari ukurokora Abatutsi bicwaga kugira ngo bashyireho leta y'ubumwe bw'Abanyarwanda. Ndashishikariza bagenzi banjye gukomeza kwiga amateka kugira ngo bashobore guhangana n'abapfobya Jenoside.'

Umuyobozi wa IBUKA mu Murenge wa Kinyinya, wanarokokeye muri aka gace, Uwamahoro Godelieve, yavuze ko gutoteza Abatutsi byatangiye mbere y'uko na Jenoside iba, agaragaza ko icyo gihe ubwo yigaga mu mashuri abanza ibyo yabibonaga ndetse na we yagiye abuzwa amahirwe yo kwiga kuko habagamo ivangura.

Yavuze ko urubyiruko rufite amahirwe akomeye kuko rufite uburenganzira bwo kwiga rukaminuza ndetse rukabona akazi ariko kuri bo si uko byari bimeze.

Ati 'Ubundi urubyiruko mwe mufite amahirwe mutazi, mbese ni ukuvuga ngo mufite zahabu mupfumbatiye mu biganza byanyu ariko ntimuzi agaciro kayo. Twe twaciye mu bihe bibi, kwiga byari ingorabahizi, aha muri aka gace haberaga imyigaragambo rimwe na rimwe igahitana abantu, kubona akazi nabwo bikaba uko kuko bitari byoroshye.

Yasabye urubyiruko gukoresha amahirwe rufite, kwirinda kumva amabwire kuko aba yuzuyemo ibinyoma, ahubwo ko bagomba gusoma, icyo batumva bagasobanuza, kuko aribwo bizabafasha guhangana n'abapfobya Jenoside.

Lt Col Semucyo Gaétan yasabye urubyiruko kurushaho gukunda igihugu no gusigasira ubumwe bw'abanyarwanda, ndetse no guhangana n'abakwirakwiza ingengabitekerezo ya Jenoside bifashisha imbuga nkoranyambaga.

Ati 'Ubutwari bwaranze Inkotanyi nibwo bukwiye kubaranga kuko nabo bari urubyiruko. Nimurangwe n'indangagaciro zaranze bakuru banyu nko gukunda igihugu, kukitangira no gukomeza gusigasira amateka y'igihugu cyacu, kandi muyigishe barumuna banyu bayamenye ndetse muzayigishe n'abazabakomokaho.'

Urubyiruko rw'abakorerabushake bo mu Mujyi wa Kigali rurenga ibihumbi 200. Batangiye ibikorwa byo kwiga no gusobanukirwa amateka binyuze mu gusura ahari ibimenyetso bibitse amateka mu 2013.

Kugeza ubu abamaze guhugurwa ni abagera ku bihumbi 80, ndetse bakomeje gutegura gahunda zigamije gufasha n'abandi bo bice bitandukanye byo mu gihugu kugira ngo bige amateka.

Izi mashini zatanzwe n'Ikigo bioMérieux cyo mu Bufaransa kizobereye mu gukora ibikoresho byo gupima indwara binyuze mu bufatanye gifitanye n'Ikigo cy'Igihugu gishinzwe Ubuzima (RBC) n'Ikigo gishinzwe kugura no gukwirakwiza imiti n'ibikoresho byo kwa muganga mu Rwanda (RMS).

Zirimo imashini enye zo mu bwoko bwa BioFire Torch n'ibice byazo hamwe n'ibikoresho byifashishwa mu gupima indwara, bishobora gutahura indwara zirimo Ebola, Marburg n'izindi zitandukanye zandura.

Izi mashini zagenewe Ibitaro bya Gihundwe, ibya Rwamagana, ibya Gisenyi na Laboratwari Nkuru y'Igihugu ibarizwa muri RBC kugira ngo zifashe abaganga gupima abantu bakekwaho uburwayi mu buryo bwihuse, cyane cyane abaca ku mipaka no mu bindi bice bikekwaho ibyago byinshi byo guhura n'ibyorezo.

Umuyobozi w'Ishami rya Serivisi z'Ubuzima muri RBC, Dr. Mukagatare Isabelle, yavuze ko nubwo u Rwanda rutaragaragaramo Ebola, gukomeza kwitegura ari ingenzi bitewe n'uko iki cyorezo cyagiye cyibasira abaturanyi.

Ati 'Izi mashini enye za BioFire zizadufasha kurushaho kwitegura kuzahangana na Ebola. Kuba u Rwanda rutaragaragaramo Ebola ntabwo bivuze ko tutagomba kwitegura. Umuntu wese wagaragaza ibimenyetso biyishamikiyeho tugomba kuba twiteguye guhita dufata ibipimo bye no kubisuzuma.'

Dr. Mukagatare yavuze ko u Rwanda rusanzwe rufite izindi mashini zakoreshejwe mu gupima icyorezo cya Marburg, ariko ko izi nshya zigiye kongera ubushobozi bwo gupima ndetse zishimangira icyizere abafatanyabikorwa bafitiye Igihugu.

Ati 'Abafatanyabikorwa bacu babonye uburyo u Rwanda rwitwara mu guhangana n'ibyorezo n'uburyo dukoresha neza ibikoresho duhawe. Ni cyo cyatumye baduha izi mashini enye kugira ngo turusheho kongera ubushobozi bwo gusuzuma indwara.'

Kimwe mu byihariye kuri izi mashini ni uko zigabanya cyane igihe cyo gutegereza ibisubizo.

Ni mu gihe uburyo busanzwe bwo gupima bwafataga amasaha ari hagati y'ane n'atandatu ariko iza BioFire zishobora gutanga ibisubizo mu gihe kitarenze isaha imwe.

Ibyo binajyana n'inzira zinyurwamo kugira ngo gupima bikorwe kuko imashini zisanzwe zisaba inzira nyinshi cyane, ariko iza BioFire zisaba intambwe nke kandi na zo zoroshye gukora.

Icyakora izo mashini za BioFire hari igihe ibisubizo bimwe zitanga bishobora kubanza kongera kwemezwa hifashishijwe ubundi buryo bwa laboratwari.
Umuyobozi Wungirije wa RMS, Diana Mutoni, yavuze ko iki gikorwa kigaragaza akamaro k'ubufatanye hagati ya Leta n'abikorera mu guteza imbere urwego rw'ubuzima.

Ku ruhande rwa bioMérieux, Visi Perezida ushinzwe Afurika, Marc Haribou, yavuze ko icyo kigo gikomeje gukorana n'inzego z'ubuzima mu bihugu bya Afurika mu gukwirakwiza izi mashini n'ibikoresho byo gupima aho bikenewe cyane.

Ibyo biri mu rwego rwo gufata ingamba zihuse zo guhagarika ikwirakwira ry'ibyorezo no gukumira ibizaza mu gihe kiri imbere.

Izo mashini zije zikurikira izindi zirindwi u Rwanda ruherutse guhabwa binyuze muri ubwo bufatanye, zipima indwara zifata amaraso, zashyizwe mu bitaro bitandukanye mu rwego rwo kongera ubushobozi bwa za laboratwari zabyo.