Author: webrwanda

Ikipe y’igihugu ya Espagne yerekeje ku mukino wa nyuma w’Igikombe cy’Isi cya 2026 nyuma yo gutsinda u Bufaransa ibitego 2-0 mu mukino wa ½ wabereye kuri Dallas Stadium i Arlington muri Leta ya Texas ho muri Leta Zunze Ubumwe z’Amerika .

Espagne yagaragaje umukino mwiza kuva utangiye, igenzura umupira ndetse ibuza u Bufaransa bukomeye mu busatirizi kubona uburyo bwinshi bwo gutsinda.

Igitego cya mbere cyabonetse ku munota wa 22 gitsinzwe na Mikel Oyarzabal kuri penaliti, nyuma y’uko myugariro Lucas Digne akoreye ikosa Lamine Yamal wari winjiye mu rubuga rw’amahina. Oyarzabal yinjije umupira neza mu izamu, atsinda igitego cye cya gatanu muri iri rushanwa.

Mbere y’uko igice cya mbere kirangira, u Bufaransa bwongeye kwisanga mu gihombo nyuma y’uko myugariro wabwo , William Saliba avunitse agasimburwa.

Mu gice cya kabiri, Espagne yakomeje gukina neza, maze ku munota wa 58 Pedro Porro atsinda igitego cya kabiri nyuma yo guhererekanya neza umupira na Dani Olmo, asiga umunyezamu Mike Maignan ntacyo ashoboye gukora.

Nubwo Kylian Mbappé yari yabanje mu kibuga ndetse yari afite amahirwe yo kongera ibitego bye mu rugamba rwo guhatanira inkweto ya zahabu, ntiyabashije kubona uburyo bufatika imbere y’ubwugarizi bwa Espagne bwakinnye umukino uri ku rwego rwo hejuru.

Muri iri rushanwa, Espagne imaze gutsindwa igitego kimwe gusa, mu gihe u Bufaransa bwari bwinjijwe ibitego bibiri mbere y’uyu mukino.

Intsinzi y’Abanya-Espagne yahagaritse inzozi z’u Bufaransa zo kugera ku mukino wa nyuma ku nshuro ya gatatu yikurikiranya, nyuma yo kwegukana igikombe mu 2018 no gutsindirwa ku mukino wa nyuma na Argentine mu 2022.

Uyu mukino wanabaye uwa nyuma wa Didier Deschamps muri ½ cy’Igikombe cy’Isi, kuko biteganyijwe ko azava ku mwanya w’umutoza w’u Bufaransa nyuma y’iri rushanwa, asoje imyaka 14 atoza iyi kipe.

Espagne, yatwaye Igikombe cy’Isi rimwe gusa mu 2010, izahurira ku mukino wa nyuma n’izava hagati ya Argentine n’U Bwongereza, nabo bagomba guzakina umukino wa kabiri wa ½ ku munsi wejo. Abanya-Espagne bazaba bashaka kongera kwandika amateka begukana iki gikombe ku nshuro ya kabiri yo muri 2010 muri Afurika y’Epfo.

Espagne yageze ku mukino wa nyuma

U Bufaransa bwatashye amara masa

Rutahizamu Cheikh Djibril Ouattara yagizwe kapiteni wa APR FC asimbuye Niyomugabo Claude watandukanye n’iyi kipe.

Niyomugabo Claude wari kapiteni wa APR FC, mu minsi ishize nibwo iyi kipe y’Ingabo z’Igihugu yatangaje ko batazakomezanya.

Hibazwaga uzasigarana izi nshingano zo kuyobora bagenzi muri APR FC aho amahirwe menshi yahabwaga Nshimiyimana Yunusu uheruka kongera amasezerano.

Kuri uyu wa Kabiri tariki ya 14 Nyakanga 2026 APR FC yemeje ko rutahizamu ukomoka muri Burkina Faso, Cheikh Djibril Ouattara ari we kapiteni mushya wayo.

Cheikh Djibril Ouattara wabaye rutahizamu watsinze ibitego byinshi muri Shampiyona ya 2025-26, akaba azungirizwa na Nshimiyimana Yunusu.

Cheikh Djibril Ouattara yagizwe kapiteni wa APR FC

Nshimiyimana Yunusu azungiriza Cheikh Djibril Ouattara

Aya masezerano azatuma Visit Rwanda iba umuterankunga mukuru (Principal Partner), umufatanyabikorwa mu bukerarugendo (Official Tourism Partner) ndetse n'utanga ikawa yemewe n'iyi kipe (Official Coffee Provider).

Muri aya masezerano, ikirango cya Visit Rwanda kizajya kigaragara imbere ku mipira y'amakipe yose ya Aston Villa arimo iy'abagabo, abagore ndetse n'amakipe y'abakiri bato n'ahandi hantu h'ingenzi.

Uretse guteza imbere ubukerarugendo, ubu bufatanye buzibanda no ku kumenyekanisha u Rwanda nk'igihugu gifite amahirwe mu ishoramari, kwakira ibikorwa mpuzamahanga ndetse n'inama zitandukanye n'imikino.

Impande zombi zizafatanya mu bikorwa bigamije guteza imbere umupira w'amaguru n'amahugurwa y'abatoza, ibikorwa by'ubugiraneza, guteza imbere imiyoborere ndetse no gutanga amahirwe yo kongera ubumenyi mu myuga itandukanye.

Umuyobozi ushinzwe ibikorwa by'ubucuruzi muri Aston Villa, Francesco Calvo, yavuze ko ubu bufatanye ari ikimenyetso cy'iterambere ry'ikipe mu kwagura ibikorwa byayo ku masoko mpuzamahanga.

Yagize ati 'Ubu ni ubufatanye bushimishije cyane kuri Aston Villa kandi bugaragaza uburyo ikipe ikomeje kwaguka no kugera ku masoko mashya ku rwego mpuzamahanga. Hari amahirwe menshi y'ubufatanye, kwiga, guhanga ibishya ndetse dushishikajwe no gukorana na Visit Rwanda, mu buryo buzagira impinduka nziza, binyuze mu bukerarugendo, ishoramari n'iterambere rya siporo.'

Umuyobozi Mukuru w'Ikigo cy'u Rwanda gishinzwe kumenyekanisha ubukerarugendo bushingiye ku nama, RCB, Janet Karemera, yavuze ko ubu bufatanye ari uburyo bukomeye bwo kumenyekanisha u Rwanda ku Isi binyuze mu mikino ikunzwe na benshi.

Ati 'Aya masezerano agaragaza ubushake bw'u Rwanda bwo kugera ku bantu benshi ku Isi binyuze ku mbuga zikomeye ku Isi, no kwerekana igihugu cyacu nk'ahantu ho gusura, gushoramo imari no gukorera ubucuruzi.'

Yakomeje avuga ko aya masezerano aje akurikira imyaka umunani u Rwanda rumaze rukorana ibikorwa byo kwamamaza igihugu mu Bwongereza, kimwe mu bihugu by'ingenzi bikomokamo ba mukerarugendo basura u Rwanda.

Ati 'Dushishikajwe no gukorana na Aston Villa mu kugera ku bantu benshi bashya mu Bwongereza, mu Burayi no hirya no hino. Binyuze muri ubu bufatanye, intego yacu ni ugushimangira umubano n'abantu basanzwe batekereza gusura u Rwanda, haba ku bw'ubukerarugendo, gushora imari cyangwa kwitabira ibikorwa by'ubucuruzi, ari na ko tugira uruhare mu iterambere rirambye no guteza imbere urwego rwa ruhago mu Rwanda.'

Aston Villa yatangaje ko abafana bamaze kugura umwambaro mushya w'ikipe wa shampiyona ya 2026/27 mbere y'uko ubu bufatanye butangazwa, bazawujyanayo kugira ngo bashyirweho ikirango cya Visit Rwanda ku buntu.

Visit Rwanda izasimbura Betano, ikigo cy'imikino y'amahirwe cyari gisanzwe cyamamaza imbere ku mwambaro wa Aston Villa.

Iyi kipe yari ikeneye umuterankunga mushya kubera icyemezo cya Premier League cyo guhagarika kwamamaza ibigo by'imikino y'amahirwe imbere ku myambaro y'abakinnyi, guhera mu mwaka w'imikino wa 2026/2027.

Umuyobozi ushinzwe ibikorwa by'ubucuruzi muri Aston Villa, Francesco Calvo, ni we wari warahawe inshingano zo gushakira ikipe abaterankunga bashya no kongera amafaranga yinjiza.

Amakuru ava mu bantu bazi iby'aya masezerano avuga ko ashobora kuba ari yo afite agaciro kanini kurusha andi yose Aston Villa yagiranye n'umuterankunga mu mateka yayo.

Aston Villa ibaye indi kipe ikomeye yo ku Mugabane w'u Burayi igiye gukorana na Visit Rwanda, gahunda y'igihugu igamije kumenyekanisha u Rwanda nk'ahantu ho gusura no gushora imari.

Visit Rwanda isanzwe ifitanye amasezerano na Paris Saint-Germain yo mu Bufaransa na Atlético de Madrid yo muri Espagne.

Yari imaze imyaka umunani ikorana na Arsenal yo mu Bwongereza, aho ikirango cya Visit Rwanda cyashyirwaga ku kuboko kw'imyambaro y'abakinnyi.

Gushyira ikirango cya Visit Rwanda imbere ku mwambaro wa Aston Villa bizatuma kigaragara cyane mu mikino ya Premier League, mu marushanwa yo ku Mugabane w'u Burayi, mu bikorwa byo kwamamaza ndetse no ku bicuruzwa by'iyi kipe.

Aston Villa ni imwe mu makipe afite amateka akomeye mu Bwongereza. Yegukanye Champions League mu 1982, ndetse mu 2026 yegukanye UEFA Europa League. Mu myaka ya vuba yongeye kugaragara mu makipe ahatanira imyanya ya mbere muri Premier League.

Imibare itangwa n'ishami ry'uburezi mu Karere ka Gatsibo igaragaza ko muri Nzeri 2025 ubwo umwaka w'amashuri watangiraga aka Karere kari gafite abana 1.712 bataye ishuri. Ubuyobozi bwakoze ubukangurambaga abana 1.224 basubira mu ishuri.

Abana 488 bari basigaye habonetsemo 126 byagaragaye ko bakuze ku buryo gusubira mu ishuri batabyemera bafashirizwa mu masomero y'abakuze. Abana 362 bo binangiye ku gusubira mu ishuri hakaba hateganyijwe ubukangurambaga bwo kubagarura mu ishuri.

Umuyobozi w'Akarere ka Gatsibo wungirije ushinzwe imibereho myiza, Mukamana Marcelline, avuga ko ibibazo byinshi bigaragara mu bana yaba abagaragara mu mirire mibi, abata amashuri byose bituruka ku makimbirane aba ari hagati y'abashakanye.

Yagize ati ' Kuba tugifite abana bake tukibona bata ishuri akenshi bituruka muri bya bibazo by'imiryango yabo hari umufatanyabikorwa turi gufatanya mu mushinga ugamije kuba nta mwana uri hanze y'ishuri. Dufite abakangurambaga kuri buri Kagari badufasha kureba abana biga nabi n'abana bava mu ishuri kugira ngo barigarukemo.''

Yakomeje agira ati ' Ubu imbaraga tuzishyira mu kumenya icyatumye umwana ava mu ishuri nibyo biduha umusaruro nyawo kuko akenshi bituruka mu miryango yabo. Umugabo n'umugore ntibumvikana, barara batongana n'ibindi bibazo byinshi bituma umwana adatekana mu muryango. Ibyo rero ni byo turi guheraho dukemura kugira ngo tubashe gutuma wa mwana yiga neza.''

Visi Meya Mukamana yavuze ko hari n'ibibazo bike bituruka ku bukene aho usanga biba inzitizi ku bana, yanagarutse ku bana baba kwa nyirakuru batishoboye, ababa mu miryango aho bagenda babashakira abafatanyabikorwa babafasha kugira ngo bige banahabwe ibyangombwa by'ibanze.

Mugorewera Costance utuye mu Murenge wa Kageyo, yabwiye IGIHE ko hakwiye ubukangurambaga mu babyeyi kuko hari abo usanga babuze abana kwiga ku bushake ngo kuko amashuri atariyo atuma abana babaho neza.

Yakomeje agira ati ' Hari n'abafite ubukene badafite ubushobozi ku buryo nko kubona imyenda y'ishuri n'ibindi bikoresho bibagora. Iyo rero amashuri atangiye wa mubyeyi akabura amafaranga yo kugura bya bikoresho abuza umwana kujya kwiga bikarangira umwana arivuyemo gutyo.''

Semana Augustin we yavuze ko ubuyobozi bubashije gukemura ikibazo cy'amakimbirane yo mu miryango abana bose babasha kwiga neza kuko abava mu ishuri akenshi ari ukubera iki kibazo.

Akarere ka Gatsibo kabarurwamo ibigo by'amashuri 203, umwaka w'amashuri wa 2025/2026 warangiye byigamo abanyeshuri ibihumbi 196 bigaga mu mashuri y'inshuke, abanza ndetse n'ayisumbuye.

Visit Rwanda yasinyanye amasezerano y’ubufatanye n’ikipe ya Aston Villa ikina mu cyiciro cya mbere mu Bwongereza aho izajya iyambara mu gatuza.

Ni nyuma y’uko amasezerano Visit Rwanda yari ifitanye na Arsenal yarangiranye n’umwaka w’imikino wa 2025-26. Yari amaze imyaka 8.

Ni muri urwo rwego Ikigo cy’Igihugu cy’Iterambere (RDB), mu rwego rwo gukomeza kwamamaza ubukerarugendo bw’u Rwanda binyuze muri Visit Rwanda basinyanye aya masezerano na Aston Villa.

Ku mwambaro wa Aston Villa, Visit Rwanda ikaba izasimbura ikigo cy’imikino y’amahirwe cya Betano yari isanzwe yambara mu gatuza, ni nyuma y’uko Premier League yanzuye ko guhera ku mwaka w’imikino wa 2026-27 nta kipe izajya yamamaza imikino y’amahirwe imbere ku myambaro y’abakinnyi.

Aston Villa kwambara Visit Rwanda mu gatuza bivuze ko iki kirango kizagaragara cyane mu mikino izakina yaba Shampiyona ndetse n’imikino ya Champions League nayo izitabira.

Iyi kipe ikaba yiyongereye ku makipe Paris Saint-Germain yo ku Bufaransa na Atletico Madrid yo muri Espagne asanzwe akorana n’u Rwanda binyuze muri Visit Rwanda.

Aston Villa yasinyanye amasezerano na Visit Rwanda

Amakuru atangwa n'abaturage bo muri ako gace ndetse n'andi masoko akurikirana ibibera mu burasirazuba bwa RDC avuga ko abarwanyi ba Twirwaneho na AFC/M23 binjiye muri Kiseke nyuma y'imirwano ikaze yo kuri uyu wa 13 Nyakanga 2026 yamaze amasaha menshi ihanganishije izi mpande n'ingabo za Leta ya RDC (FARDC), zifatanyije n'imitwe yitwaje intwaro ikorana na yo, irimo Wazalendo, FDLR n'ingabo z'u Burundi.

Ifatwa rya Kiseke rije rikurikira imirwano imaze igihe ikomeje mu misozi miremire ya Kivu y'Amajyepfo, cyane cyane muri teritwari za Mwenga, Fizi na Uvira. Ni agace gafite akamaro mu ngendo no mu bikorwa bya gisirikare, kuko gahuza ibice bitandukanye byo mu misozi miremire y'iyo ntara.

Mu mezi ashize, Twirwaneho na AFC/M23 bakomeje kwagura ibice bagenzura muri Kivu y'Amajyepfo. Mu ntangiriro z'uku kwezi kwa Nyakanga kandi batangaje ko bafashe utundi duce two muri Mwenga nyuma y'imirwano ikomeye, ibintu byakomeje guhindura isura y'intambara muri iyo ntara.

Kugenzura Kiseke bishobora korohereza Twirwaneho na AFC/M23 gukomeza ibikorwa bya gisirikare mu bindi bice bya Mwenga, ndetse bikabaha uburyo bworoshye bwo kugenzura inzira z'ingenzi zihuza uduce two mu misozi miremire.

Imirwano ikomeje muri Kivu y'Amajyepfo yakomeje guteza umutekano muke, aho abaturage benshi bamaze kuva mu byabo bahunga, mu gihe imiryango itabara imbabare ikomeje kugaragaza impungenge z'uko umubare w'abakeneye ubutabazi ugenda wiyongera.

Kugeza ubu, ubuyobozi bwa Repubulika Iharanira Demokarasi ya Congo ntiburagira icyo butangaza ku mugaragaro ku makuru avuga ko Kiseke yafashwe na Twirwaneho ifatanyije na AFC/M23. Gusa amakuru aturuka mu bice by'imirwano agaragaza ko ibikorwa bya gisirikare bikomeje, ndetse ko hashobora kuba hakiri imirwano mu duce twegeranye na Kiseke.

Intambara ikomeje mu burasirazuba bwa RDC iri mu zikomeje gukurikirwa n'umuryango mpuzamahanga, mu gihe hakomeje gushakwa inzira za dipolomasi zagabanya ubushyamirane no kugarura amahoro muri aka karere.

Gusinya ayo masezerano byabereye i Kigali ku itariki 13 Nyakanga 2026, ndetse ni kimwe mu bikorwa biri mu murongo wa Radisson Blu Hotel & Kigali Convention Centre wo kwizihiza imyaka 10 imaze ikorera mu Rwanda.

Ibyo bikorwa byabimburiwe no gutera ibiti 10 by'imbuto mu busitani bwaho bishushanya iyo myaka imaze mu kwera imbuto ndetse no gusinya ayo masezerano ariko bizamara iki cyumweru cyose hakorwa ibindi bitandukanye.

Ayo masezerano yayagiranye n'imiryango Avega Agahozo, SOS Children's Village Rwanda hamwe na Hope Shines Rwanda. Kuri SOS ayo masezerano ajyanye no gutera inkunga uburezi binyuze mu kwishyurira abana irera ishuri no kubashyirira internet mu mashuri n'ibindi.

Kuri Avega ibafasha kwita ku bapfakazi ba Jenoside yakorewe Abatutsi harimo kubaha ubuvuzi no kubaremera amacumbi.

Ni mu gihe kuri Hope Shines ho Radisson Blu Hotel & Kigali Convention Centre iyifasha kubona imashini n'ibikoresho bikenewe mu mishinga yo kwita ku rubyiruko uwo muryango usanzwe ukora.

Ayo masezerano ariko, asinywa buri mwaka bitewe n'ibikenewe kandi buri muryango watangajwe ko uzaterwa inkunga na Radisson Blu Hotel & Kigali Convention Centre mu bihe bitandukanye gusa Avega Agahozo bo batangiranye mu 2016.

Umuyobozi Mukuru w'Agateganyo wa Radisson Blu Hotel & Kigali Convention Centre, Uwase Nice yavuze ko gutera inkunga iyo miryango biri mu murongo w'ibikorwa byo kwita ku muryango mugari basanzwe bakora no mu zindi ngeri zirimo uburezi no gusuzumisha abantu indwara zitandura no kwita ku rubyiruko.

By'umwihariko mu burezi, Radisson Blu Hotel & Kigali Convention Centre ifasha abanyeshuri biga iby'amahoteli n'ubukerarugendo kubaha imenyerezamwuga rigamije kuzamura urwego rwabo no kurwongerera ubushobozi nk'uko Leta ibyifuza.

Ati 'Ni umwuga twifuza ko wakorwa mu buryo buhamye kuko biri no mu cyerekezo cy'Igihugu. Biteganyijwe ko amafaranga ava mu kwakira inama n'ibindi bikorwa (MICE) mu 2028 azaba ageze kuri miliyoni 224$ azajya ava muri ibyo bikorwa azaba yinjira mu musaruro mbumbe w'igihugu. Ibyo rero ntibidusaba gusa inyubako ahubwo biradusaba n'abantu babikora babyumva.'

Umunyamabanga Nshingwabikorwa wa Avega Agahozo, Kalisa Etienne yabwiye IGIHE ko Radisson Blu Hotel & Kigali Convention Centre yababereye inkingi mwikorezi mu gufasha abanyamuryango bayo hashingiwe ku bikenewe.

Ati 'Icyiza ni uko badutega amatwi bakumva ibyo dukeneye ku buryo byafashije cyane abapfakajwe na Jenoside yakorewe Abatutsi kubasha guhangana n'ingaruka zabyo. Si abaterankunga ahubwo ni abafatanyabikorwa. Ubu badufashije kubakira no gusanira abanyamuryango bacu hamwe no kwita ku babyeyi b'intwaza.'

Radisson Blu Hotel & Kigali Convention Centre mu myaka 10 imaze igaragaza ko buri mwaka igira gahunda y'ibikorwa byo kwita ku muryango mugari.

Kugeza ubu imaze guha akazi abantu 10.000 muri iyo myaka bagiye bakorana ndetse n'abandi 2.000 bahakora mu buryo buhoraho.

Tariki 12 Nyakanga 2026, ni bwo abaturage bahamagaye inzego z'ibanze n'iz'umutekano bavuga ko hari abagabo babiri bishwe n'itsinda ry'ibihazi bikora ubucukuzi butemewe bw'amabuye y'agaciro.

Ni urugomo rwatangiye saa mbili z'umugoroba tariki 11 Nyakanga, aho iryo tsinda ryagiye ahitwa ku Marembo mu Murenge wa Murambi rifata abaturage babiri ribashorera ribakubita, baza kuboneka mu murenge wa Cyinzuzi yapfuye.

Umuvugizi wa Polisi y'u Rwanda mu Ntara y'Amajyaruguru, CIP Ngirabakungi Ignace, yabwiye IGIHE ko bakimenya aya makuru Polisi y'u Rwanda yajyanyeyo n'inzego z'umutekano na RIB batangira iperereza.

Ati “Ku ikubitiro habanje gukekwa abantu 8, ariko byaje kugararagara ko hari abaturage bamenye amakuru ntibatabara, bakurikiranyweho icyaha cyo kudatabara umuntu uri mu kaga. Abamaze gufatwa bose hamwe ni 17, bafungiye kuri sitasiyo ebyiri iya Murambi n'iya Bushoki”.

CIP Ngirabakunzi yasabye abaturage gukora ibyemewe n'amategeko, kwirinda amakimbirane no kwihorera.

Ibi byabaye mu gihe nta minsi ibiri irashira, itsinda ry'ibihazi rikora ubucukuzi butemewe bw'amabuye y'agaciro rikubise abandi bantu babiri ariko bo ntabwo bapfuye. Iryo tsinda kandi hari n'inzu y'umuturage riherutse gusenya.

Umuyobozi w'Akarere ka Rulindo, Mukanyirigira Judith yageze ahabereye ubu bugizi bwa nabi, aganiriza abaturage, abasaba gutangira amakuru ku gihe no kwirinda urugomo, anasaba uwaba afite amakuru yafasha mu iperereza ko yayageza ku buyobozi.