Author: webrwanda

Uru ruganda rw'abashoramari bo mu Buhinde ruzubakwa mu Karere ka Musanze mu Murenge wa Kimonyi mu cyanya cyahariwe inganda cya Musanze, biteganyijwe ko ruzakora ibyuma rubikuye mu butare bucukurwa mu bice bya Burera ndetse na Ngororero kandi ko nta mpungenge rufite kuko mu Gihugu hari ubutare buhagije bwo guhaza urwo ruganda.

Ku ikubitiro uru ruganda ruzatangira rutanga akazi ku bakozi 1000 bahoraho rutunganya toni 250.000 by'ibyuma byiganjemo Fer à beton, n'ibindi bikoreshwa mu bwubatsi ndetse runatunganya amabuye y'agaciro y'ubutare ruzibe icyuho cy'ibyatumizwaga hanze y'Igihugu, ahubwo rwoherezeyo ibifite agaciro ka miliyoni 50 z'Amadolari ya Amerika.

Umuyobozi Mukuru w'Uruganda A1 Iron & Steel Rwanda Ltd, Himanshu Tiwari, avuga ko uru ruganda ruzagira uruhare runini mu kurangiza ikibazo cy'ibyuma u Rwanda rwatumizaga mu mahanga kandi ko ruzaba igicumbi gikomeye mu Karere ruherereyemo rukazagira n'uruhare mu kuzamura ubukungu n'imibereho y'abaturage baruturiye.

Yagize ati “Uru ruganda ruzaba umusemburo mu kugabanya ibyo u Rwanda rwatumizaga mu mahanga rujye ku rwego rwo kuyobora isoko ryo mu Karere ka Afurika y'Uburasirazuba. Tuzakomeza kandi no gushyiraho amahirwe ku baturage batuye hano hagamijwe kubazamurira ubukungu, iterambere n'imibereho myiza yabo.”

Yakomeje ashimira Leta y'u Rwanda, abafatanyabikorwa babo n'abaturage, abizeza ko mu ntego bafite ari ugufasha igihugu kuba intangarugero ku ruhando mpuzamahanga mubyo gutunganya ibyuma.

Ati “Ndagira ngo nshimire abafatanyabikorwa bacu, abo dufatanyije na Guverinoma y'u Rwanda badufashije muri uru rugendo. Umusanzu wanyu niwo watumye tugera kuri uru rwego. Twese hamwe tugiye kubaka ahazaza h'u Rwanda heza mu iterambere rirambye mu by'inganda. Tuzakomeza kuzamura no guteza imbere abaturage binyuze mu burezi, ubuzima no guteza imbere abagore.”

Umunyamabanga Uhoraho muri Minisiteri y'Ubucuruzi n'Inganda, Antoine Marie Kajangwe, avuga ko kuba inganda zikomeye ziri kwiyongera mu Rwanda, ari amahirwe azafasha igihugu kugabanya ibyo rwatumizaga hanze no kugera ku ntego bihaye muri gahunda ya NST2 y'imyaka itanu iri imbere.

Yagize ati “Biragaragaza ko inganda zikomeye ziri kwiyongera mu Rwanda kandi zibasha kongerera agaciro ibyo dufite mu gihugu. Bizadufasha kugabanya ibyuma dutumiza hanze binagabanye icyuho twari dufite mu bucuruzi bwambukiranya imipaka ndetse rizanafasha no kongera ibyo twoherezaga hanze bikomoka ku butare.”

Yakomeje agira ati “Uru ruganda rero ruzaba rufite akamaro gakomeye mu guteza imbere ubuhahirane byaba mu byo twohereza mu mahanga n'ibyo dutumiza. Muri gahunda ya leta y'imyaka itanu harimo ko u Rwanda rukeneye kongera ibikomoka ku nganda bikongera agaciro ku bukungu bw'u Rwanda byibura 10% buri mwaka. Rero birakenewe ko twongera n'inganda dufite n'ubushobozi bwazo bukongerwa.”

Umuyobozi w'Akarere ka Musanze, Nsengimana Claudien, yasabye abaturage bazahabona akazi kugira umuco wo kwizigamira no kwibumbira mu bimina bagakora, bagatera imbere ntibasesagure amafaranga bazahembwa kuko ubu igihugu gishyize imbere ukwigira k'umuturage ahereye ku mahirwe aba yahawe.

Bamwe mu baturage batangiye gukora mu mirimo yo gutunganya ahagiye kubakwa uru Ruganda rwa A1 Iron & Steel Rwanda Ltd, bemeza ko izi nganda bagenda begerezwa zibafasha mu gukemura bimwe mu bibazo baba bafite kandi ko nabo barajwe ushinga n'iterambere.

Ambasaderi w'Ubuhinde mu Rwanda, Mridu Pawan Das, agendeye ku mahirwe abashora imari mu Rwanda baba bafite bakesha imiyoborere myiza, umutekano, kubona abakozi byoroshye n'imitere y'ikirere cyaho. Yavuze ko bazakomeza gufatanya na Leta y'u Rwanda mu kwerekana ayo mahirwe no ku bandi bifuza gushora imari mu Rwanda.

Yagize ati “Turishimira imiyoborere myiza iri mu Rwanda biturutse kuri Nyakubahwa Perezida wa Repubulika Paul Kagame. Mu Rwanda hari byinshi birimo umutekano, abaturage beza bazi gukora n'ibindi. Aya ni amahirwe akomeye ku bashoramari kandi tuzakomeza gufatanya na Leta y'u Rwanda kumenyekanisha ayo mahirwe kuko yahisemo kuborohereza.”

Mu mwaka wa 2022, u Rwanda rwatumije hanze ibyuma bipima hafi toni ibihumbi 184, mu 2023 rutumiza toni ibihumbi 195 mu gihe mu mezi umunani abanza ya 2024 rwatumije toni ibihumbi 146 aribyo rushaka gukemura kuko urwo ruganda ruzaba rufite ubushobozi bwo gutunganya toni ibihumbi 250 ku mwaka.

Leta y'u Rwanda ifite ingamba zo gufasha no korohereza abashoramari aho baturuka hose yo ikaborohereza mu gushyiraho politiki iborohereza, kongera ibikorwa remezo, uburezi, umutekano byose bigamije kwihutisha iterambere.

Imirimo yo gutunganya ahazubakwa uruganda A1 Iron & Steel Rwanda Ltd imaze ukwezi kurenga itangiye

Imashini zatangiye gusiza ahazubakwa uruganda

Uruganda rwa 'A1 Iron & Steel Rwanda Ltd' ruzaba rufite ubushobozi bwo guhaza isoko ry’Igihugu rusagurire n’amahanga

Ambasaderi w’u Buhinde mu Rwanda, Mridu Pawan Das yemeje ko bazakomeza gushishikariza abashoramari gukomeza kuyishora mu Rwanda kuko hari amahirwe menshi yo gutera imbere

Umunyamabanga Uhoraho muri Minisiteri y’Ubucuruzi n’Inganda, Antoine Kajangwe avuga ko iyi uru ruganda ruzagira uruhare runini mu kongera ibyo igihugu cyohereza hanze rugabanye ibyatumizwaga

Umuyobozi Mukuru w’Uruganda A1 Iron & Steel Rwanda Ltd, Tiwari yavuze ko bafite intego yo kujya batunganya toni 250.000 z’ibyuma bivuye mu butare ku mwaka

Umuyobozi w’Akarere ka Musanze, Nsengimana Claudien yasabye abaturage bazahabwa akazi n'uru ruganda kutazapfusha ubusa amafaranga bazakorera, ahubwo ko bazayaheraho biteza imbere

Ni ibihembo bitangwa hagamijwe kuzirikana uruhare rw'abanyamakuru mu guteza imbere ibikorwa bitandukanye, bakanashimirwa umuhate wabo muri uyu mwuga.

Ibi bihembo byatanzwe ku nshuro ya 11 byahawe abanyamakuru 31, harimo n'icyahawe umunyamakuru w'umwaka. Ibihembo byegukanywe n'abagabo 16 mu gihe abagore ari 15.

Inkuru zihembwa ni izo mu byiciro byihariye byatoranyijwe, aho umunyamakuru asabwa kugaragaza inkuru yakoze, zigakosorwa n'abahanga, izihize izindi zigahabwa amanota ya mbere.

Mu banyamakuru ba IGIHE batsinze harimo Mugisha Nshuti Christian watsinze mu cyiciro cy'inkuru zivuga ku guteza imbere imikurire y'umwana, na ho Jean de Dieu Tuyizere atsinda mu cyiciro cy'inkuru zibanda ku gutanga ibisobanuro by'imibare (Data Journalism Award).

Umunyamakuru w'umwaka watowe ni Oswald Mutuyeyezu wa Radio Tv 10.

Umuyobozi Mukuru wa RGB, Dr Doris Uwicyeza Picard yagaragaje ko ubufatanye bw'imiryango itandukanye n'inzego za Leta mu kuzamura urwego rw'itangazamakuru ari ingirakamaro.

Ati 'Gushyira itsinda rishinzwe iterambere ry'itangazamakuru muri RGB byatumye imikoranire yacu irushaho kuba myiza, dukorera hamwe tugamije iterambere ry'itangazamakuru. Byatumye abafatanyabikorwa batandukanye bahuriza hamwe gahunda zigenewe uru rwego.'

Yahamije ko binyuze muri ubu bufatanye babasha kumenya ibigo by'itangazamakuru n'abanyamakuru n'ibyo bakeneye mu rwego rwo kuzamura ubushobozi ndetse ubushobozi buhari bugakoreshwa neza.

Muri uyu muhango kandi hatangijwe koperative y'abanyamakuru (MEDECO) rihabwa inkunga ya miliyoni zirenga 43,9 Frw azakorehswa mu ishoramari.

Mugisha Nshuti Christian wa IGIHE yahembwe nk’umunyamakuru w’indashyikirwa wakoze ku nkuru ziteza imbere uburere n’imikurire y’umwana

Uko ibihembo byatanzwe

Feature story harimo inkuru ndende zasohotse ku bitangazamakuru byandika kuri murandasi
Steven Nsamaza/ Rwanda Dispatch

Inkuru z'ubuzima
Itangishatse Lionel/ Radio Ishingiro

Inkuru ziteza imbere ikoranabuhanga n'itumanaho
Ineza Leontine/ Energy Radio

Inkuru zivuga ku burere n'imikurire by'umwana
1. Byavuka Rachel/ Isangano Radio
2. Vestine Umurerwa/ Isango Star TV
3. Mugisha Nshuti Christian/ IGIHE.COM

Inkuru za sports
Kayishema Titi Thierry/ RBA

Inkuru zivuga ku buhinzi
1. Jeannine Ndayizeye/ RBA-Radio
2. Cyubahiro Bonaventure/ RBA-RTV
3. Emma Marie Umurerwa/ Iriba News

Inkuru ziteza imbere uburenganzira bw'abafite ubumuga
Michel Nkurunziza/ The New Times

Inkuru ndende/ Best documentary
Mukantagengwa Marie Louise/ Radio Ishingiro

Inkuru zibanda ku bisobanuro mu mibare/ Data Journalism Awards
Tuyizere Jean de Dieu/ IGIHE.COM

Inkuru ziteza imbere akamaro k'amazi, isuku n'isukura, no kurwanya indwara zituruka ku mwanda

Habineza Venuste / Radio Salus
Phoibe Mukandayisenga/ Radio Ishingiro

Inkuru ku buvugizi ku kurwanya inda ziterwa abangavu
Rurangangabo Patrick/ Radio Salus

Inkuru ziteza imbere uburinganire n'ubwuzuzanye
Ntambara Garleon/ Flash TV

Inkuru ku buvugizi ku ihohoterwa rishingiye ku gitsina n'irikorerwa abana
Marie Jeanne Umutoni/ Radio Salus

Inkuru ku buringanire hagati y'umugabo n'umugore
Alice Tembasi/ Radio Salus

Ikiganiro cy'umwaka/ Talkshow of the year
Gatarara Emmanuel/ Radio Ishingiro

Inkuru ivuga ku miyoborere myiza, imitangire ya serivisi inoze
Agahozo Mwizerwa Mary Peace/ TV 1

Inkuru zivuga ku bucuruzi
Kazungire Merci Dieu /Radio Salus

Inkuru zivuga kuri gahunda ya Gira Wigire
Linda Mbabazi Kagire/ The New Times

Inkuru zivuga ku itangwa rya serivisi hakoreshejwe ikoranabuhanga/ Byikorere
Aphrodice Muhire/ RBA

Inkuru nziza zivuga ku kamaro k'umuganda mu kubaka ubumwe n'ubufatanye
Gabriel Imaniriho/ Isango Star

Inkuru zicukumbuye
Dushimimana Ngabo Emmanuel/ Radio Isangano
Desire Bizimana/ Radio Ishingiro

Inkuru nziza yakozwe n'umugore
Gloria Iribagiza/ The New Times

Umugore watsiniye igihembo cy'inkuru nziza
Emilienne Kayitesi / Isango Star

Inkuru y'Umwaka
Steven Nsamaza/ Rwanda Dispatch

Umunyamakuru w'umwaka
Oswald Mutuyeyezu/ Radio TV10

Tuyizere Jean de Dieu, umunyamakuru wa IGIHE ashyikirizwa igihembo nk’umunyamakuru w’indashyikirwa

Inzego zitandukanye zari zakereye guhemba abanyamakuru babaye indashyikirwa

Abanyamakur u 29 bahawe ibihembo kubera inkuru zitandukanye zabaye indashyikirwa

Mu butumwa yanyujije ku mbuga nkoranyambaga ze, Anangwe yagaragaje ko atewe ishema no kuba Umunyarwanda, nyuma yo guhabwa ubwenegihugu, mu gikorwa cyabereye mu Karere ka Kicukiro mu Mujyi wa Kigali.

Yagize ati “Rwanda nziza gihugu cyacu, ngobyi iduhetse gahorane ishya. Berwa, sugira, singizwa iteka. Urakoze Rwanda, ndi hano kugira ngo ngukorere, nkurinde n'imbaraga zanjye zose. Kuri Nyakubahwa Perezida Kagame, ni iby'icyubahiro [kuba mpawe ubwenegihugu] […] Baca umugani mu Kinyarwanda ngo, ushonje uhishiwe.”

Yasoje ubutumwa bwe ashimira inzego zamufashije anavuga ko ari umuturage utewe ishema no kuba Umunyarwanda.

Eugene Anagwe yavukiye mu Burengerazuba bwa Kenya mu 1986, arinaho yigiye amasomo ye anahatangirira umwuga, mbere y'uko mu 2008 atangira gukorera mu Rwanda ahereye kuri Contact FM.

Eugene Anangwe yahawe ubwenegihugu Nyarwanda

Anangwe yavuze ko yishimiye kuba Umunyarwanda

Ubwenegihugu yabuherewe mu Karere ka Kicukiro mu Mujyi wa Kigali

Ni mu mushinga watewe inkunga na Banki y'Isi witezweho gutangira muri uku kwezi k'Uguhsyingo aho Akarere kawufatanyije na REG.

Muri aka Karere kari abaturage benshi bakigorwa no kubona umuriro w'amashanyarazi, urugero ni nk'abo mu midugudu ine ariyo Busindu,Rugwagwa,Nkuba II, na Nkuba I yo mu Kagari ka Cyabajwa mu Murenge wa Kabarondo.

Aba baturage baherutse kubwira IGIHE ko bagorwa no kujya kwiyogoshesha, ubikeneye ashobora gutegesha 2000 Frw ni ukuvuga 1000 Frw cyo kugera mu isantere ya Kabarondo n'ikindi 1000 Frw cyo kugaruka nyamara ajyanywe no kwiyogoshesha gusa.

Umuyobozi w'Umudugudu wa Nkuba I, Bikomindera Joseph, yavuze ko abayobozi bahora bababwira ko umushinga wo kubagezaho umuriro uri mu nyigo ariko ko hashize imyaka myinshi bawijejwe amaso akaba yaraheze mu kirere.

Ruzindana Jean Baptiste, umuyobozi w'Urwunge rw'Amashuri rwa Rubira ishuri riherereye mu Kagari ka Kabura mu Murenge wa Kabarondo, yabwiye IGIHE ko kuri iki kigo hari abanyeshuri 1570 biga mu mashuri abanza ndetse n'icyiciro rusange cya Tronc Commun, yavuze ko kuba badafite umuriro bituma abana batabasha kwiga ikoranabuhanga ku buryo bamwe binabatera ipfunwe.

Ati ' Dufite ikibazo cy'amashanyarazi atagera ku ishuri bikadindiza imyigire, mu bindi bigo usanga abana bigira kuri mudasobwa ariko twe kuko nta muriro nta n'izihari. Abana usanga baba bafite ipfunwe kuko batabasha kwiga ikoranabuhanga. Natwe nk'ubuyobozi biratundindiza kuko raporo nyinshi cyangwa ibizamini dutanga dukora ibirometero birindwi tujya gushaka ahari umuriro.'

Umuyobozi w'Akarere ka Kayonza, Nyemazi John Bosco, yavuze ko muri aka Karere bafite ibigo umunani by'amashuri bitagerwaho n'amashanyarazi ariko ko ubuyobozi bw'Akarere kubufatanye ba REG bari kubigezaho umuriro w'imirasire y'izuba.

Ati ' Mu rwego rwo kubagezaho umuriro w'amashanyarazi, hari umushinga munini ugiye gutangira muri uku kwezi k'Ugushyingo uzageza amashanyarazi ku ngo ibihumbi 25 ziri ahantu hatari hagezwa umuriro zose zikazahabwa amashanyarazi. Ayo mashuri nayo arimo uyu mushinga uzasubiza ahari ikibazo cy'amashanyarazi hose.'

Kuri ubu Akarere ka Kayonza kageze kuri 77% mu kugeza amashanyarazi mu baturage mu gihe gasaba abatari bayabona kuba bihanganye ngo kuko uyu mushinga watewe inkunga na Banki y'Isi uzayakwirakwiza mu bice byose bisigaye bitari byabona amashanyarazi.

Urwunge rw'Amashuri rwa Rubira nta muriro uhaba ibituma abanyeshuri bahiga batiga ikoranabuhanga

Girinka ni gahunda yatangijwe n'ubuyobozi bukuru bw'igihugu mu 2006, mu rwego rwo gufasha imiryango itishoboye kwivana mu bukene.

Umuryango worojwe binyuze muri iyi gahunda uba ufite inshingano eshatu zirimo kwiteza imbere, kutazimya igicaniro no kwitura kugira ngo iyi gahunda ikomeze igere kuri benshi.

Nyirambonwa Immacullee wo mu Kagari ka Kigoya Umurenge wa Kanjongo, yabwiye IGIHE ko mu myaka itanu ishize ari bwo yahawe inka muri gahunda ya Girinka. Ni ubwa mbere yari atunze inka mu myaka 35 amaze ashinze urugo.

Ati 'Mbere nta fumbire nabonaga n'imboga aho naziteraga ntabwo zazaga ariko aho mboneye inka, nanyoye amata, n'abana banjye bagira imirire myiza, imboga ndatera ziraza'.

Uyu mubyeyi avuga ko atarahabwa inka muri gahunda ya Girinka yezaga ibilo 20 by'ibishyimbo, ariko ubu yeza ibilo 70 cyangwa 80. Ibigori yezaga ibilo 50 ariko ubu ngo asigaye yeza ibilo 200.

Ati 'Ntarahabwa inka nari mfite udutsina duke dusa nabi. Nengaga ijerekani imwe ariko ubu nsigaye nenga amajerekani atatu. Igitoki cyabaga ari uduseri tubiri ariko ubu insina isigaye yera igitoki cy'amaseri arindwi kuzamura'.

Munyankindi Sylvestre wo mu Mudugudu wa Kajumiro, Akagari ka Kigarama Umurenge wa Kanjongo, mu myaka ine ishize nibwo yorojwe inka muri gahunda ya Girinka. Uyu mugabo wari umaze imyaka 31 ashinze urugo avuga ko iyi myaka yose yari ayimaze nta nka agira.

Ati 'Inzara yari igiye no kunyica rwose. Nagiraga akarima kadafumbirwa, ariko aho bampereye inka, narafumbiye imyaka iraza ahantu nezaga indobo y'ibishyimbo y'ibilo 12 ubu ndi kujya mpeza indobo eshanu. Nezaga utugori two kurya nk'ibilo bitanu ariko ubu nsigaye neza ibilo 150 by'ibigori'.

Abaturage bo mu karere ka Nyamasheke bihagije mu biribwa babikesha inka bahawe muri gahunda ya Girinka Munyarwanda bashimira ubuyobozi bukuru bw'igihugu bwatekereje gushyiraho iyi gahunda, bakavuga ko nyuma yo kubona ibyiza byayo batabyikubiye ko ahubwo bituye kugira ngo ibi byiza byayo bigere no ku bandi.

Imibare y'ubuyobozi bw'akarere ka Nyamasheke igaragaza ko kuva iyi gahunda yatangira imaze kugera ku miryango 9,816. Uyu mwaka akarere karateganya koroza imiryango mishya 442.

Abaturage bo mu karere ka Nyamasheke borojwe muri gahunda ya Girinka bavuga ko inka borojwe zabafashijwe kwihaza mu biribwa

Mu kiganiro n’itangazamakuru cyo kuri uyu wa Kane itariki 7 Ugushyingo 2024 Perezida wa FERWAFA, Munyantwari Alphonse yagarutse ku kongerera amasezerano umutoza w'ikipe y'Igihugu, Frank Trosten Spittler, avuga ko ibiganiro hagati ye n'ubuyobozi bigeze kure aho bitarenze uku kwezi bazaba batangaje ibyavuyemo.

FERWAFA yavuze ko yishimira uko ikipe y'igihugu imaze iminsi yitwara, aho yatsinze imikino itanu mu 10 iheruka gukina, bikaba byerekana akazi gakomeye kamaze gukorwa n'uyu mutoza wo mu Budage waje mu Rwanda mu kwezi k'Ugushyingo 2023.

Perezida wa FERWAFA Munyantwari yavuze ko batazigera bivanga mu kazi k'umutoza ngo babe bamusaba guhamagara abakinnyi barimo Hakim Sahabo na Rafael York, gusa bavuga ko imiryango igifunguye kuri aba bakinnyi bakiri bato, aho igihe icyo ari cyo cyose bakongera guhamagarwa.

Yagize ati “Umutoza twatangiye ibiganiro kandi icyavuyemo muzakimenya vuba, ntabwo tuzarindira kugeza mu Ukuboza 2024 (Igihe masezerano asanganywe azarangirira).”

Tariki 1 Ugushyingo 2023, ni bwo ishyirahamwe ry'umupira w'amaguru mu Rwanda FERWAFA, ryemeje ko Umudage w'imyaka 61, Torsten Frank Spittler yagizwe umtoza mukuru w'ikipe y'Igihugu Amavubi.

Mu minsi ishize uyu mutoza yari yatangaje ko agiye kumanika inkweto ye kuko ngo ishaje, ariko ubu ibiganiro hagati ye na FERWAFA bikaba bishobora kurangira yisubiyeho ku cyemezo yari yafashe.

Perezida wa FERWAFA yanakomeje no ku kibazo abanyarwanda bamaze iminsi bibaza ku ikipe y’igihugu y’u Rwanda “Amavubi”, bavuga ko ari ikipe ikina neza ariko byagera mu busatirizi ikagenda gake. Benshi bagaragaza ko hakomeza gushakwa abakinnyi bafite amamuko mu Rwanda bakabareshya bakareba ko bazaza gukinira Amavubi. 

Perezida wa FERWAFA yakomeje agira ati “Navuga ko nta mbaraga twagira twakwima ikipe y'igihugu. Uko mwagiye mubibona, nk'uko byagumye bigenda nubwo tutavuga ngo nibyo gusa twifuza, ariko umubare w'abakina mu ikipe y'igihugu bagiye bava hirya no hino ku migabane itandukanye, niba ntibesha wagiye wiyongera.

Imibare irabigaragaza, yaba abo dutumira muri rusange, yaba abo duhurira ku bibuga, ibyo ni imibare mufite itabeshya, ikigamijwe ni ugushaka abakinnyi beza bo gukinira ikipe y'igihugu gusa hari ibiba bisabwa kugira ngo n'uwo mukinnyi aze”.

Yakomeje avuga ko n’ubwo hari abakinnyi batandukanye bari kurambagizwa hirya no hino ku isi, hagomba kuba hari ibintu bikomeye ikipe iba yaragezeho bishobora kureshya abo bakinnyi, nko kuba itsinda ndetse mu gihugu hari n’ibikorwa remezo.

Munyantwari Alphonse yatangaje ko FERWAFA iri gukora ibishoboka byose kugira ngo ikipe y’igihugu ibeho neza

FERWAFA yatangaje ko mu minsi mike abanyarwanda baramenya umwanzuro ku mutoza w’ikipe y’igihugu 

Perezida wa FERWAFA yavuze ko hari abakinnyi bafite amamuko mu Rwanda bakigerageza kureba ko bazemera kurukinira

“>

 

Turayizeye Vanessa w'imyaka umunani yasanzwe mu murima w'icyayi yapfuye. Yari amaze iminsi ine ashakishwa n'ababyeyi be bakamubura, gusa baje kumusanga hafi y'urugo rw'umugabo wari waramubwiye ko niyongera kumufata amwibira amatunda azahita amwica.

Umurambo w'umwana wabonetse ku wa Kabiri tariki 5 Ugushyingo 2024, uboneka mu mudugudu wa Mugorore, Akagari ka Kibari, mu murenge wa Byumba.

Abaturage bavuga ko uwo mugabo wafashwe akekwaho kwica uwo mwana, hari igihe yigeze gufata uwo mwana yamwibye amatunda mu murima we akamufungirana ahgaagamaza ababyeyi be, avuga ko niyongera kumufata azamwica.

Umuvugizi wa Polisi y'u Rwanda mu Ntara y' Amajyaruguru, SP Mwiseneza Bosco, yavuze ko uwafashwe afungiye kuri sitasiyo ya Polisi ya Byumba mu gihe iperereza rikomeje.

Korali Hoziana izaba iri kumwe n'abandi bakozi b'Imana batandukanye muri iki giterane cyiswe Hoziana Gospel Celebration – Tugumane 2024. Iki gitaramo cyari gitegerejwe cyane, kizaba kuva ku wa Gatanu tariki 22 Ugushyingo, kugeza ku Cyumweru tariki 24 Ugushyingo 2024, kuri ADEPR Nyarugenge mu Gakinjiro.

Iyi minsi itatu y'igitaramo izahuriza hamwe amakorali, abahanzi n'abakozi b'Imana harimo Korali Hoziana, Korali Shalom, Ntora Worship Team, n'abahanzi nka Papy Clever n'umugore we Dorcas, aho ibihe byiza byo kuramya Imana no kwamamaza ubutumwa bwiza bwa Kristo bizazanira abantu kumenya Kristo ndetse byongerere abandi imbaraga n'ibyiringiro.

Nk’uko Ubuyobozi bwa Hoziana Choir bwabitangarije inyaRwanda, insanganyamatsiko y'igitaramo cy'uyu mwaka ishingiye mu Ibyakozwe n'Intumwa 3:19, hagira hati: 'Nuko mwihane muhindukire, ibyaha byanyu bihanagurwe ngo iminsi yo guhemburwa ibone uko iza…'

Dore uko gahunda y'igitaramo iteye:

• Ku wa Gatanu, tariki 22 Ugushyingo – Saa kumi z'umugoroba

• Ku wa Gatandatu, tariki 23 Ugushyingo – Saa munani z'amanywa

• Ku Cyumweru, tariki 24 Ugushyingo – Saa munani z'amanywa

Buri wese yahawe ikazee muri iki giterane kizabera kuri ADEPR Nyarugenge mu minsi itatu yo kuramya no guhimbaza Imana ndetse no kwishimira ubutumwa bwiza bwa Kristo. Kwinjira mu gitaramo cya Hoziana Gospel Celebration – Tugumane 2024 ni Ubuntu..

Korali Hoziana yashinzwe mu mwaka wa 1968. Imaze imyaka irenga mirongo itanu ikwirakwiza ubutumwa bwiza binyuze mu ndirimbo, aho yaririmbye mu Rwanda no mu karere.

Hoziana izwi cyane ku ndirimbo zo hambere zirimo Gitare, Yerusalemu, na Mugeni wa Yesu, ndetse ubu iracyakunzwe cyane mu ndirimbo nshya zirimo Dufite Ibihamya, inaherutse kurenza umubare w'abantu miliyoni imwe bayirebye kuri YouTube.

Korali Hoziana imaze imyaka irenga 50 yamamaza ubutumwa bwiza bwa Yesu Kristo

Hoziana Choir yateguy igiterane “Hoziana Gospel Celebration – Tugumane 2024”

Yisunze Noteri David, The Ben yasabiye Fatakumavuta kurekurwa. Hashize umunsi umwe, ubwo ni ukuvuga kuri uyu wa Gatatu tariki 6 Ugushyingo 2024, uyu muhanzi wamamaye mu ndirimbo zirimo nka 'Habibi' yanditse kuri konti ye ya Instagram, agaragaza ko yahisemo urukundo no kubabarira imbere ya Fatakumavuta. 

Ni ubutumwa bwasamiwe hejuru n'ibihumbi by'abantu bamukurikira umunsi ku munsi. Bitewe n'uko iyi baruwa itari yakagiye mu itangazamakuru, byatumye hari abamwandikira bamubwira gusaba guhagarikisha ikirego, abandi bashima umuhate wo gutanga imbabazi.

Ariko kandi The Ben yavuze ko atari we watanze ikirego. Ushingiye ku byo amategeko ateganya, uyu muhanzi yisunze umunyamategeko we batanze ikirego mu Urwego rw'Igihugu rw'Ubugenzacyaha (RIB), hanyuma RIB isuzuma ishingiro ryacyo.

Bitewe n'imiterere y'iki kirego ndetse n'ibyaha uru rwego rwagaragaje ko ibyo Fatakumavuta yakoze atabikoze kuri The Ben gusa, kuko hari n'abandi basanzwe bazwi mu ruganda rw'imyidagaduro, ikirego cyashyikirijwe Ubushinjacyaha.

Hanyuma Ubushinjacyaha buregera Urukiko rw'Ibanze rwa Kicukiro. Bivuze ko The Ben si we watanze ikirego mu Rukiko rw'Ibanze rwa Kicukiro, ahubwo cyatanzwe n'ubushinjacyaha.

Amategeko avuga iki ku mbabazi yahaye Fatakumavuta?

Mu kiganiro na InyaRwanda, Umunyamategeko Nshimiyimana Fortunatus yatangiye asobanura ko mu busanzwe icyaha gikorerwa sosiyete Nyarwanda ariko uwo cyagizeho ingaruka z'ako kanya, akaba ari we ugitanga mu Bugenzacyaha.

Kimwe n'uko aramutse atagitanze, n'undi wese ubona ko yabangamiwe n'ikintu cyakozwe n'umuntu runaka ashobora kubitangira ikirego.

Ariko kandi n'iyo hatagira ugitanga Urwego rubifitiye ububasha 'Ubugenzacyaha' rushobora kubona ko hakozwe icyaha rukibwiriza gukurikirana wa muntu wakoze icyaha 'ntawigeze abisaba'.

Ati 'Urumva ni muri uwo murongo rero. Iyo icyaha cyakurikiranywe byanze bikunze haba hari uwatanze ikirego! Kuko hatagize utanga ikirego ntabwo icyaha gikurikiranwa. Nta muntu uba ufitemo inyungu. Gusa, ubugenzacyaha bushobora kwibwiriza. 

Urugero nk'ibi byaha biri ku mbuga nkoranyambaga muri iyi minsi, rimwe na rimwe nta n'umuntu uba watanze ikirego bakabona ko umuntu yakoze ibigize ibyaha, bakibwiriza kubikurikirana, cyangwa se bakabanza kumwihaniza.'

Umunyamategeko Nshimiyimana yavuze ko mu busanzwe mu mategeko, imbabazi zirasabwa kandi ntabwo zihatirwa gutangwa. Ariko kandi zisabwa n'ubundi ufite ububasha bwo kuzitanga.

Ati 'Niba atari wowe watanze ikirego, nta n'ubwo ari wowe ufite ububasha bwo gutanga imbabazi. Ni ukuvuga ngo uwatanze ikirego ni ubushinjacyaha, ni ukuvuga ngo ni urugendo ruturuka mu gukurikirana icyaha kugenza ukagera mu bushinjacyaha, bwabona ko hari impamvu zo gukurikirana icyaha bukakiregera urukiko.”

Akomeza agira ati 'Mu by'ukuri ikirego cya Fatakumavuta cyatanzwe n'ubushinjacyaha nyuma y'uko cyagenjejwe n'ubugenzacyaha. Birashoboka ko ubugenzacyaha bwagejejweho ikirego n'umuntu umwe, wenda n'uwo arimo (The Ben) cyangwa se bwaribwirije…'

Nshimiyimana yavuze ko igihe cyose Urukiko rwasuzuma rugasanga ko koko The Ben yarakorewe icyaha, nta ndishyi z'akababaro yakurikirana. Ati 'Imbabazi yatanze zifite aho zihuriye no kutazamukurikiranaho indishyi mu gihe yaba ahamwe n'icyaha cy'uko Fatakumavuta yamusebeje.'

Yungamo ati 'Noneho Fatakumavuta kiramutse kimuhamye, none bikagaragara ko The Ben yakorewe icyaha yaba yivanyeho inshingano zo kuzamurikiranaho indishyi z'akababaro.'

Uyu munyamategeko yavuze ko uwakorewe icyaha atagira uruhare mu guhitamo igihano gihabwa ushinjwa, yaba kugikuraho cyangwa se kugishyiraho kuko 'kiba giteganwa n'amategeko'.

The Ben yanditse iyi baruwa atanga imbabazi ku wa 5 Ugushyingo 2024, mu gihe Urukiko rw'Ibanze rwa Kicukiro rwafashe umwanzuro kuri uyu wa Gatatu tariki 6 Ugushyingo 2024, rutegeka ko uyu mugabo afungwa iminsi 30 y'agateganyo.

Nshimiyimana yavuze ko n'iyo iyi baruwa igera muri 'system' y'urukiko mbere y'uko rufata umwanzuro ntirwari kuyishingiraho. Ati 'Ntabwo urukiko rwari kuyishingiraho kuko The Ben siwe watanze ikirego, icyakora mu bakorewe icyaha nawe arimo, kimwe n'uko nawe urimo, nanjye ndimo, twese, sosiyete nyarwanda.'

'Niba The Ben yarumvise ko yakorewe icyaha mu buryo bwihariye akabimenyesha urwego rw'ubugenzacyaha rugakora iperereza rugasanga hari ibimenyetso bigaragaza ko habaye icyaha nibyo koko icyo kirego cyaba cyaratanzwe mu nyungu za Sosiyete ariko bisabwe na The Ben ugaragaza ko yakorewe icyaha mu buryo bwihariye.'

Uyu munyamategeko yavuze ko 'iyo ikirego kimaze gutangira ntabwo aba akigifiteho ubushobozi bikurikiza amategeko abigena.' Yavuze ko bitewe n'imbabazi The Ben yatanze, igihe cyose urukiko rwahamya ibyaha Fatakumavuta ntiyakurikiranwaho ibijyanye n'indishyi z'akababaro.

Nshimiyimana avuga ko hari igihe urukiko rushobora kubura ibimenyetso 'ubwarwo rukanga kwakira ikirego' ariko 'igihe cyose rwakiriye ikirego rugomba kukiburanisha'.

Yasobanuye ko ubushinjacyaha buregera urukiko urubanza igihe basanze rufite inshingiro bihagije byatuma batanga ikirego. Ati 'Ubu aho Dosiye igeze ntacyo The Ben yayikoraho. Icyo yazakora gusa, ni mu gihe cyo gusaba indishyi kuko n'icyo aba yamubabariye.'

The Ben yandikiye Urukiko rw'Ibanze rwa Kicukiro mbere y'uko rufata umwanzuro, avuga ko yahaye imbabazi Fatakumavuta   

Ibaruwa The Ben yandikiye urukiko ku wa 5 Ugushyingo 2024 mbere y'uko rufata umwanzuro