Author: webrwanda

Mu gihe urubyiruko rw'u Rwanda rwari mu gihirahiro rwibaza uko hazaza hameze, rwamurikiwe n'umucyo udasanzwe uruyobora mu nzira nziza igana aheza. Uwo mucyo warumurikiye nta wundi, ni YouthConnekt!

Mu 2012, ni bwo hatangiye iyo gahunda ya YouthConnekt, iza ari igisubizo ku iterambere rirambye kandi rigera kuri buri wese mu muryango Nyarwanda.

Ni gahunda yaje kuva mu Rwanda ikwira hirya no hino muri Afurika kuko kugeza ubu ibihugu bigera kuri 30 bimaze kuyiha ikaze.

Yaje guhindurirwa izina yitwa YouthConnekt Africa, aho ifite intego zirimo guhanga imirimo y'urubyiruko igera kuri miliyoni 10, kongerera ubushobozi urubyiruko miliyoni 25, kuzamura urwego rw'urubyiruko miliyoni no gukemura ikibazo cy'uburinganire.

Ku wa 1 Ukuboza 2012, Perezida Kagame yabwiye abari bitabiriye YouthConnekt ya mbere ko igihugu gikeneye ko urubyiruko rufite impano zibyazwa umusaruro.

Ati 'Aho mujya hameze neza, ibyiza bikiri imbere kugira ngo umuntu abigereho, atangira ubu ntabwo abikorera ageze imbere, abikorera ubu. Igihugu gishya cy'u Rwanda twubaka, ni ukugira ngo impano ya buri muntu, ayimenye, akoreshe amahirwe ahari, iyo mpano imenyekane, iye n'iy'undi byubake umuryango w'u Rwanda.'

Youth Connekt Africa Summit yatangiriye mu Rwanda nk’igitekerezo cya Perezida wa Repubulika y’u Rwanda, Paul Kagame, nyuma yo kubona ko ari ngombwa ko urubyiruko ubwarwo ruhurira hamwe rugafata ingamba ku iterambere ryabo, baryigiriyemo uruhare ndetse bakigiranaho.

Minisitiri w’Urubyiruko n’Iterambere ry’Ubuhanzi, Dr Utumatwishima Abdallah, yasobanuye uko Inama ya Youth Connekt yatangiye ari igitekerezo Nyarwanda cyo gushaka ibisubizo, bikarangira cyagutse kikagera ku rwego Nyafurika aho kimaze kugezwa mu bihugu 33.

Yakomeje agira ati: 'Iyo urebye igihe Youth Connekt imaze, muri izi nama zose uko ari esheshatu, hari ibintu byinshi byabaye. Yatangiye ari iy'u Rwanda gusa. 

Ubungubu tumaze kugira ibihugu 33 byavuze ngo kiriya gitekerezo cyiza cyo mu Rwanda, […] mureke tukijyane mu bindi bihugu byacu bya Afurika. Ubungubu tugeze ku bihugu 33 byafashe Youth Connekt nk'uburyo bwo kwita ku rubyiruko, igihugu cya nyuma duheruka kwakira ni icy'Ubwami bwa Lesotho.

Uko kuntu rero Youth Connekt nk'igitekerezo cy'u Rwanda cyagiye mu mahanga, byatumye izina ry'u Rwanda rikomera ku buryo ubu urubyiruko iyo ruhuriye mu nama baramenyana, abafite 'business' bakajya gukorerayo ndetse n'urubyiruko rwa Afurika rwaje hano mu Rwanda, bamenye ibintu byinshi harimo n'amashuri.'

Gahunda ya YouthConnekt, igitangira, ibihumbi by'urubyiruko rwa ba rwiyemezamirimo bato babyumvise kare, bafata iya mbere bahanga imishinga ibyara inyungu kandi ifasha abaturage batuye hafi y'aho batuye.

Kugeza ubu yaragutse ku buryo itanga igishoro ku rubyiruko rukora ubuhinzi (Youth Connekt Agri-Connekt), ndetse hashyizweho na Youth Connekt Arts-Connekt aho hazajya hahembwa abafasha abahanzi kwiteza imbere.

Igiye kongera kubera mu Rwanda muri Kigali Convention Center kuva kuri uyu wa Gatanu tariki 8 Ugushyingo kugeza ku Cyumweru tariki 10 Ugushyingo 2024.

Youth Connekt Africa Summit igiye kongera kuba ku nshuro ya 7

Kuva yatangira, imaze gutanga amahirwe yahanzwemo imirimo igera ku 50,000 

Kuba ibiza bitwara ubuzima bw'abantu, imitungo, bikanangiza ibikorwaremezo, biri mu bihagarika imitima ya benshi. Umwaka ushize muri Gicurasi, abantu 135 bishwe n'ibiza mu Ntara y'Amajyaruguru, iy'Iburengerazuba n'Iy'Amajyepfo, abarenga ibihumbi 20 bakurwa mu byabo.

Hagati ya 2018 na 2023 habaye ibiza bigera ku 7.961 bitwara ubuzima ubuzima bw'abantu 1.209. Muri abo, abishwe n'inkangu banganaga na 329, abishwe n'inkuba ni 301, abishwe n'imyuzure bageraga kuri 212 mu gihe abishwe n'imvura nyinshi banganaga na 200.

Icyo gihe hangiritse ibikorwaremezo birimo n'imihanda, bitwara ibiraro 355.

MINEMA, igaragaza ko ingaruka z'ibiza ziri mu bitwara amafaranga menshi u Rwanda, aho buri mwaka rukoresha miliyoni 300$ [arenga miliyari 400 Frw].

Ibi biza ngo ahanini biterwa n'imihindagurikire y'ibihe ku rugero rwa 20% mu gihe ibifitanye isano n'imiterere y'ubukungu, imibereho y'abaturage n'ibikorwaremezo biriho bishobora guteza ibiza ku rugero rwa 25%.

Hari kandi uburyo butaboneye bwo kwitegura ibiza bijyana n'ingengo y'imari yo guhangana na byo idahagije n'uburyo budatanga umusaruro mu kugabanya ibyago bifitanye isano n'ibiza, bituma biba ku rugero rwa 55%.

Ku wa 07 Ugushyingo, mu nama yigiraga hamwe uko hakorwa imicungire y'ibiza hagamijwe kubaka ubudahangarwa bw'u Rwanda, Minisitiri ushinzwe ibikorwa by'ubutabazi, Maj Gen (Rtd) Albert Murasira, yakomoje kuri gahunda zizahabwa umwihariko.

Ati 'Mu myaka itanu iri imbere icyo tuzibandaho ni ugushyira mu bikorwa ibigomba gukorwa mu nzego zose zirimo iz'imiturire, ubuhinzi n'ibikorwaremezo, buri wese akareba ibyo agomba gukurikiza kuko ni iterambere ry'igihugu.'

Yakomeje agira ati 'Hari ugushyira imbaraga mu kugerageza gukora ubukangurambaga, kubaka ikoranabuhanga ryo kuburira abaturage mbere y'igihe haramutse hagiye kuba nk'ibiza kugira ngo bitegure turamire ubuzima bwabo.'

Maj Gen (Rtd) Murasira yavuze ko hakwiye no gushyirwa imbaraga muri gahunda zo kongerera abatura ubumenyi mu bikorwa binyuranye nk'ubwutasi, bagakangurirwa kubikora bijyanye n'ibyo amategeko ateganya, kuko byatanga umusanzu mu kugabanya ingaruka mbi z'ibiza.

Yavuze ko kandi mu myaka itanu iri imbere, ibikorwa bizibandwaho harimo gusana no kuvugurura ahatangirwa ubuvuzi bw'ibanze, kunoza imicungire y'ibishanga, ndetse no gushyira mu bikorwa ingamba zo kurwanya imyuzure mu duce dufite ibyago byinshi byo kwibasirwa n'ibiza.

U Rwanda rukomeje gushyiraho ingamba zitandukanye zijyanye no kwitegura mu buryo bufatika guhangana n'ibiza, kongera ubukangurambaga n'ibindi.

Umwaka ushize hemejwe politiki y'igihugu y'imicungire y'ibiza igaragaza uburyo iyo micungire ishobora gukorwa. Igaragaza ko ishyirwa mu bikorwa ryayo rizasaba ingengo y'imari isanzwe igera kuri miliyari 40,26 Frw mu myaka irindwi.

Iyi politiki izibanda cyane ku gushyiraho uburyo bwo gusobanukirwa neza ibyago bizanwa n'ibiza no gushyira imbaraga mu guhangana n'ibizi binyuze mu nzego zifite ububasha.

Hazibandwa kandi ku kongera ubushobozi bwo kubyitegura no gukora igenamigambi rya gahunda zigamije kongera ubudahangarwa bw'igihugu ku biza.

Magingo aya urwego rw'ubuhinzi rufite ubushobozi bwo kwihagararaho mu guhangana n'ibiza ku rugero rwa 44%, imiturire 55%, ubwikorezi 39%, urwego rw'ingufu 57%, ubucukuzi bw'amabuye y'agaciro 42%.

Muri rusange igihugu cyose gifite ubudahangarwa ku biza bungana na 46%, ariko intego ikaba ari ukugera ku rugero rwa 60% byibuze mu 2030.

Minisitiri ushinzwe ibikorwa by’ubutabazi, Maj Gen (Rtd) Albert Murasira, yavuze ko hazashyirwaho uburyo bwo gutanga umuburo mbere y’igihe bityo abaturage babashe kwirinda

Iyi nama yari yitabiriwe n’abo mu nzego zitandukanye

Byabereye mu mudugudu wa Gashirwe, Akagari ka Gacurabwenge mu murenge wa Byumba ho mu karere ka Gicumbi.

Amakuru y'uko yiyahuye akoresheje imiti yica imbeba yamenyekanye ku wa 04 Ugushyingo 2024. Abamubonye bahise bamujyana kwa muganga igitaraganya aravurwa bamugarura mu rugo, bucyeye bwaho ahita ashiramo umwuka.

Umusore wiyahuye yari asanzwe akora akazi ko mu rugo kimwe n'uwo mukobwa bakundanaga.

Hari andi makuru avuga ko yari yarahaye uwo mukobwa ibihumbi 300 Frw bateganya kuzabana, gusa umukobwa akaza kumuhakanira amubwira ko bahagarika iby'urukundo.

Umunyamabanga Nshingwabikorwa w'Umurenge wa Byumba Ngezahuremyi Théoneste yavuze ko mu gihe hari ibibazo, abaturage badakwiriye kwiyambura ubuzima ahubwo babimenyekanisha bigashakirwa umuti.

Byabereye mu murenge wa Byumba mu kerere ka Gicumbi

Ni inkunga igizwe n'ibiribwa, imiti n'ibikoresho byo kwa muganga. U Rwanda rwaherukaga gutanga inkunga nk'iyo mu Ukwakira 2023.

Itangazo ryashyizwe hanze na Guverinoma rigira riti 'Iyi nkunga igamije gushyigikira ingamba mpuzamahanga zashyizweho, yakiriwe n'umuryango Jordan Hashemite Charity Organization. Igizwe na toni 19 z'ibiribwa (birimo ibigenewe abana), imiti ndetse n'ibikoresho byo kwa muganga'.

Guverinoma y'u Rwanda yagaragaje ko ishyigikiye ko amakimbirane ahosha muri Gaza kandi ubuzima bw'abasivile bukarindwa.

Gaza imaze umwaka mu ntambara hagati y'ingabo za Israel n'umutwe wa Hamas. Ni intambara imaze guhitana abanya-Gaza basaga ibihumbi 34 n'abanya-Israel basaga 1200.

Leta ya Israel ivuga ko izaruhuka ari uko iranduye burundu Hamas ifata nk'umutwe w'iterabwoba, mu gihe amahanga yo akomeje gusaba agahenge n'ibiganiro nk'uburyo nyabwo bwo kurangiza ikibazo burundu.

Umwaka ushize nabwo u Rwanda rwatanze toni 16 z'inkunga y'ibiribwa, ibinyobwa n'imiti.

Inkunga y’u Rwanda yanyujijwe mu Muryango w’Abagiraneza, Jordan Hashemite Charity Organization

Indege itwara imizigo ya RwandAir niyo yatwaye iyo nkunga

Iyi filime yitwa 'Killer Music, Chapter 1: Blood Bird, The Saga' igaruka ku rugendo rw'ubuzima abanyamuziki babamo umunsi ku wundi kuva umuntu atekereje kwinjira mu muziki, igihe abaye icyamamare ndetse n'ubuzima anyuramo mu majoro mu bitaramo.

Yubakiye inkuru yayo ku banyamuziki muri rusange, ikaba igaruka ku banyempano bashaka kugira aho bagera mu muziki. Irimo imirwano, urukundo, kubyina ndetse n'umuziki. Iri mu bwoko bw'izitwa 'Musical Drama'' mu rurimi rw'Icyongereza, ikaba imara amasaha abiri n'iminota irenga 40.

Yanditswe na Mighty Popo ari na we 'Excutive Producer' wayo, mu gihe ifatwa ry'amashusho yayo ryakozwe na Anirban Mitra ukomoka mu Buhinde.

Mu bandi bagize uruhare rukomeye kuri iyi filime harimo Nasser Naizi na Meddy Salleh bayishyizeho ukuboko nka 'Directors of Photography'' mu gihe umuziki uryoheye amatwi wumvikanamo haba mu kuwucuranga no kuwandika uretse Mighty Popo, byagizwemo uruhare n'abandi barimo Clément Ishimwe, Joachim Mugengakamere uzwi nka The Major na Nehemiah Shema.

Ubwo yayimurikiraga itangazamakuru mu ijoro ryo kuwa Kane tariki 6 Ugushyingo 2024, Mighty Popo yavuze ko ari filime yari amaze imyaka myinshi yandika ndeste ikamutwara imbaraga n'ubutunzi bwinshi.

Ati: 'Nari maze imyaka myinshi nandika, ariko ni ubwa mbere nahuye n'umuntu tugahuza tugashyira iyi nyandiko mu mashusho. Ni filime natangiye kwandika nkiri hanze nigisha Toronto muri Canada nabyohererezaga inshuti, nazo zikamfasha kubikosora.'

Yakomeje agira ati: 'Yatangiye asoma nyinshi mu nyandiko nari mfite ageze kuri 'Killer Music' niyo yambwiye ko yo yakorwa.Ni filime ivuga ubuzima tubamo nk'abanyamuzika. Ni ubuzima bw'ibi tubamo mu ijoro. Hari urukundo, abakundana bikanga, muzika, hari no gukundana bikanga ukaba wakora ishyano.'

Mighty Popo agaragaza ko iyi filime bayikoze bashaka kwerekana ko bishoboka cyane ko n'Umunyarwanda yakora filime nziza, iri ku rwego rwo hejuru kandi igakundwa.

Avuga ko bitari byoroshye kuri we ubwo yakoraga iyi filime cyane ko yagurishije ikibanza, imodoka n'ibindi bintu by'agaciro kugira ngo akabye inzozi ze.

Biteganijwe ko yi filime izajya hanze mu Ukuboza uyu mwaka, ikaba izaragaramo abakinnyi b'abanyarwanda nka Rwasibo, Lee Dia, Neema Rehema basanzwe ari abahanzi; The Major wo muri Symphony n'abandi batandukanye basanzwe bazwi mu ruganda rw'imyidagaduro Nyarwanda. Izagaragaramo n'abandi bakinnyi basanzwe bakina filime muri Kenya na Uganda.

Muri rusange, Mighty Popo avuga ko iyi filime yatanze akazi ku bantu barenga 300, ndetse ikaba yaratewe inkunga na Imbuto Foundation. Kugeza ubu, ngo haracyashakishwa imbuga zikomeye izanyuzwaho, ndetse n'aho yazerekanirwa mu nzu zerekanirwamo filime igihe izaba yagiye ahagaragara.

Mighty Popo usanzwe umenyerewe mu muziki yavuze uko yinjiye muri Sinema

Yamurikiye itangazamakuru n’inshuti ze filime yakoze itari mu bwoko bw’izisanzwe zimenyerewe mu Rwanda

Anirban Mitra ukomoka mu buhinde niwe wayoboye ifatwa ry’amashusho y’iyi filime ifite aho ihurira cyane na muzika

Ishimwe Clement yagize uruhare mu itunganwa ry’umuziki wumvikana muri iyi filime izajya hanze mu Ukuboza 2024 

Gloire ATS ni umuhanzi w’umuhanga cyane uhimbaza Imana mu njyana ya Rock, Reggae na Afrobeat. Yamenyekanye mu ndirimbo yise “Icyubahiro” yakoze akiri mu Rwanda atarajya gutura muri Canada. Ni umuramyi akaba n’intiti mu bijyanye n’amashanyarazi afitemo “Master’s”. Izindi ndirimbo ze zamenyekanye harimo “Arashoboye”, “Mbwira” n’izindi.

Kuri ubu yashyize hanze Album nshya y’indirimbo 10 yise “Child of God” iriho indirimbo 7 ziri mu rurimi rw’Igifaransa n’izindi 3 ziri mu Cyongereza. Yavuze ko iyi Album ishoye imizi mu kwizera no gucungurwa, ikaba yerekana isano yihariye iri hagati y’umuntu n’Imana ku bwo gusenga bivuye ku mutima, gushimira no kubaha urukundo n’ubuntu bwayo.

Indirimbo “Love Letter” na “Child of God” zivuga imbaraga zihindura z’ubwiza bw’Imana, mu gihe “Fee” na “Libéré” zishimira kubohorwa mu cyaha ku bw’igitambo cya Yesu. Iyi Album ihuza guhimbaza, gutekereza no kwizera, igashimangira insanganyamatsiko zo guhitamo, kuvugururwa no gutsinda binyuze mu rukundo rwa Kristo.

Indirimbo eshatu ziri mu Cyongereza ni “Love Letter”, “Child of God” na “Free”. Ni mu gihe indirimbo 7 ziri mu rurimi rw’Igifaransa ari “Enfant de Dieu”, “Lettre d'amour”, “Roi Jésus”, “Enfant de Dieu”, “En toi seul”, “Libéré”, “Vainqueur” na “Un feu nouveau”.

“Child of God” ni Album ya gatatu Gloire ashyize hanze aho ebyiri zabanje zari mu Kinyarwanda, iyi nshya akaba ari yo ya mbere iri mu Gifaransa n'Icyongereza. Yavuze ko nyuma y'iyi album hakurikiyeho ibitaramo, ati “Icya mbere kiri tariki ya 19-10-2024. Icya kabiri tugifite tariki 9-11-024, icya 3 tugifite mu kwa 12, amatariki ntiturayemeza neza”.

Gloire ATS [Nkundayesu Gloire] wo guhangwa maso muri Diaspora nyarwanda, yabwiye inyaRwanda ko mu ntangiriro z'umwaka wa 2025 ateganya gukora igitaramo gikomeye cyo kumurika ku mugaragaro Album ye nshya “Child of God” [Official Album Lauch concert] kizabera muri Canada muri Quebec City, ati “Abahatuye mushonje muhishiwe”.

KANDA HANO WUMVE INDIRIMBO ZIGIZE ALBUM NSHYA YA GLOIRE ATS

Gloire ATS yamamaye mu ndirimbo yise “Icyubahiro”

Yashyize hanze album nshya anaeguza igitaramo gikomeye mu 2025

Gloire ATS yavuze umwihariko wa Album ya gatatu yise “Child of God”

Ibyavuye mu matora ya Perezida yabaye kuri uyu wa Kabiri, bigaragaza ko Donald Trump wo mu ishyaka ry'aba-républicains ari we watsinze amatora, ahigitse Kamala Harris wo mu ishyaka ry'aba-democrates.

Intsinzi ya Trump yashimishije benshi cyane cyane muri Afurika, kubera igitutu no kwivanga mu miyoborere ya Afurika bikunze kuranga icyo gihugu.

Ubwo yiyamamazaga, Trump yakunze kugaragaza ko adashyigikiye uburyo igihugu cye kivanga muri politiki z'abandi kandi nacyo abaturage bacyo bafite ibibazo bikwiriye gukemurwa.

Mu butumwa Tito Rutaremara yanyujije kuri X, yavuze ko uburyo amatora ya Amerika akorwa nta demokarasi irimo, ariyo mpamvu utowe wese aba afite ingufu zimuri inyuma zimugenzura.

Ati 'Buriya Abraham Lincoln yarabeshye ngo demokarasi muri Amerika ni iy'abaturage ; igakorwa n'abaturage igakorerwa abaturage. Ahubwo muri Amerika ; demokarasi ni iy'abakire, ni iy'amasendika akize, igahabwa umurongo na maneko za Amerika.'

Rutaremara yavuze ko yaba ishyaka rya Trump cyangwa irya Kamala Harris, intego yabo ari imwe nubwo mu mvugo basa nk'abatandukanye.

Ati 'Bose intego yabo ni ukurwanira ko Amerika itegeka isi yose ikavuga ururimi rw'Amerika, igatekereza nka Amerika, igakurikira politike n'intekerezo za Amerika, ikayoborwa na Amerika, ikaririmba Amerika, umuco n'ibitekerezo by'isi bikaba ibya Amerika.'

Tito Rutaremara yavuze ko ibihugu byose ku isi imbere ya Amerika biri mu byiciro bishingiye ku kamaro bifitiye icyo gihugu.

1) AMATORA YA AMERIKA

Buriya Abraham Lincoln yarabeshye ngo democracy muri Amerika ni iy'abaturage ; igakorwa n'abaturage igakorerwa abaturage.

Ahubwo muri Amerika ; democracy niya abakire , niya amasendika akize, igahabwa umurongo na maneko z'Amerika. pic.twitter.com/qNv8oJhXqV

— Tito Rutaremara (@titorutaremara4) November 6, 2024

Hari urwego rwa mbere rwegereye Amerika yarwise 'abagaragu b'inshuti cyane' barimo ibihugu nk'u Bwongereza na Israel. Urwego rwa kabiri ni abagaragu b'ibyegera bagizwe n'ibindi bihugu byo mu Burayi, u Buyapani, Australia, New Zealand.

Urwego rwa gatatu Rutaremara yarwise 'abagaragu b'abatahira' barimo; Brésil, Mexique, Indonesia, u Buhinde na Arabie Saoudite.

Afurika n'ibihugu byo muri Aziya ukuyemo u Bushinwa ndetse na Amerika y'Amajyepfo, yagaragaje ko Amerika ibifata nka rubanda rwa giseseka.

Ati 'Aba bagaragu bose Amerika ibategekesha ibintu byinshi ariko hari ibintu binini; kimwe ni imbunda. Nicyo gituma Amerika ifite ibirindiro byinshi by'ingabo birenze 700 biri ku isi yose. Ikindi bategekesha ni idolari. Abanyamerika birirwa bakora idolari isi yose ikarikoresha bo bigaramiye.'

Yavuze ko kuba Kamala Harris yatsinda amatora cyangwa Donald Trump ari 'bya bindi abanyakole bavuga ngo 'Nta Kamali nta Kigeli bona ( bose ) ni Abanyarwanda'.

Tito Rutaremara yagaragaje ko nta tandukaniro ry’abayobora Amerika kuri politiki mpuzamahanga

Bazishikirijwe kuri uyu wa 06 Ugushyingo 2024. Umushinga wose ugizwe n'amakamyo 13 ndetse yamaze kugurwa, afite agaciro ka miliyoni 829 Frw. Harimo amanini n'amato.

Yaguzwe ku bufatanye bw'Ikigo cy'Igihugu gishinzwe guteza imbere iyoherezwa mu mahanga ry'ibikomoka ku buhinzi n'ubworozi (NAEB) n'Umushinga USAID-Kungahara Wagura Amasoko n'abohereza ibicuruzwa mu mahanga batanze 40% by'agaciro k'izo kamyo.

Afite agaciro gakomeye cyane kuko umusaruro wangirikaga mu itwarwa ryawo ari munini cyane, ibyahombyaga akayabo ba rwiyemezamirimo.

Bishimangirwa n'Umuyobozi Mukuru w'Ikigo cyohereza ibikomoka ku buhinzi mu mahanga cya Tropi Wanda, Ingabire Marie Ange Claudine, ugaragaza ko nk'urusenda n'imiteja bisaba gusarurwa ubikora afite imodoka ikonjesha n'icyumba gikonjesha bishyirwamo mbere yo koherezwa mu mahanga.

Ati 'Cyari igihombo gikabije cyane twahuraga na cyo cyane cyane mu rusenda no mu miteja ku bwo kutagira iyo kamyo. Hari ubwo washoboraga gusarura nka toni eshanu z'urusenda ukaramura nka toni imwe izindi zose zamaze kuma inkondo, kandi urusenda rwose rwumye icyo gice ntiruba rwemerewe koherezwa mu mahanga.”

Ingabire watangiye gusogongera ku byiza by'izo kamyo mu minsi 30 ayimaranye, yari amaze kurengera miliyoni 1 Frw ku rusenda gusa, akavuga ko iyo nyungu ayiteze no ku bindi yohereza mu mahanga.

Mu 2020 Ingabire ahereye ku bakozi umunani yoherezaga ibilo 800 bya avoka, imirimo iraguka aho ubu afite abakozi 321 n'abahinzi bakorana bagera ku 2000, bigatuma yohereza toni 82 z'imboga n'imbuto nk'urusenda, amatunda, avoka n'ibindi buri cyumweru.

Yagaragaje ko nubwo bakomeje gukura banakomeje guhamagarira abashora imari mu Rwanda muri iyo mirimo, kugira ngo binjire byeruye no mu byo kongerera umusaruro agaciro mbere yo kuwohereza mu mahanga.

Ati 'Nk'urugero kuri avoka dusarura hari izangirika, nk'iyakomeretseho ntabwo yoherezwa mu mahanga, iyo yagakwiriye guhita ibyazwamo amavuta, ntihagire n'imwe yangirika. Ni yo mpamvu duhora dushishikariza abashoramari kuza mu Rwanda.'

Umuyobozi Mukuru wa NAEB, Claude Bizimana yavuze ko ayo makamyo aje gufasha byinshi kuko n'ubwo bafite ibyumba bikonjesha, haba kuri NAEB, ku Kibuga Mpuzamahanga cy'Indege cya Kigali, mu ndege n'ahandi mu bice by'igihugu, uburyo bwo kugeza uwo musaruro kuri ibyo byumba bwari hafi ya ntabwo.

Ati 'Iri shoramari rizanjye ibisubizo by'ibibazo byagaragaraga mu ruhererekane rwo kohereza umusaruro w'imboga n'imbuto mu mahanga. Izi kamyo zigiye kudufasha kongera ingano y'umusaruro twohereza mu mahanga ariko unujuje ubuziranenge busabwa.'

Umuyobozi w'Ikigo cya Leta Zunze Ubumwe za Amerika gishinzwe iterambere mpuzamahanga (USAID) mu Rwanda no mu Burundi, Keisha Effiom, yavuze ko aherutse gusura abohereza imboga n'imbuto bo mu Karere ka Rwamagana no mu Mujyi wa Kigali, abona uburyo aho kunguka bahanganye n'ibihombo bikabije ku bwo ikamyo zibafasha kugeza umusaruro aho ubikwa utegereje koherezwa mu mahanga.

Ati 'Ibyo ni byo dushaka guca. Aya makamyo agaragaza uburyo gushora imari mu kubungabunga umusaruro utakara ari ingenzi mu Rwanda. Kugira ngo rushinge imizi ku isoko mpuzamahanga ni uko rugomba kumenya ko ibicuruzwa byarwo bigeze kuri iryo soko bikimeze neza bitangiritse. Ni yo mpamvu tugomba gufatanya tugashora muri ibi, tukishimira umusaruro twese hamwe.'

Imibare ya NAEB igaragaza ko mu myaka itanu ishize ni ukuvuga kuva mu 2020-2024, u Rwanda rwohereje mu mahanga ibilo 261.636.526 by'imboga, imbuto n'indabyo.

Muri ibyo harimo ibilo 170.842.040 by'imboga, ibilo 86.459.793 by'imbuto n'ibilo 4.334.692 by'indabyo.

Byinjirije u Rwanda 233.632.762$ (arenga miliyari 317 Frw), zirimo miliyoni 128,5$ z'imboga, miliyoni 79,5$ z'imbuto na miliyoni zirenga 25,4$ z'indabyo.

Umuyobozi Mukuru wa NAEB, Claude Bizimana aganiriza abitabiriye umuhango wo gushyikiriza amakamyo icyenda akonjesha, abohereza imboga n’imbuto mu mahanga

Umuyobozi Mukuru wa Tropi Wanda Ltd, Ingabire Marie Ange Claudine yohereza toni zirenga 80 z’imboga n’imbuto mu mahanga buri cyumweru

Umuyobozi w'Ikigo cya Leta Zunze Ubumwe za Amerika gishinzwe iterambere mpuzamahanga (USAID) mu Rwanda no mu Burundi yahishuye ko aherutse gusura abohereza imboga n’imbuto mu mahanga ashengurwa n’ibihombo bahura na byo ku bwo kubura ibikoresho bikonjesha

Amakamyo akonjesha abohereza imboga n’imbuto mu mahanga bahawe

Umuyobozi Mukuru wa NAEB, Claude Bizimana na we yaganuye ku makamyo akonjesha ibikomoka ku buhinzi yahawe abohereza imboga n’imbuto bo mu mahanga bo mu Rwanda

Umuyobozi wa USAID yumva niba imodoka zahawe abohereza imboga n’imbuto mu mahanga zikora neza

Umuyobozi Mukuru wa NAEB, Claude Bizimana yerekanye ko bamaze iminsi barwana no kubona amakamyo akonjesha afasha mu kuramira umusaruro w’ubuhinzi wangirika mu gihe utwawe aho uzakurwa ujyanwa mu mahanga

Umuyobozi Mukuru w'Ikigo cyohereza imboga n’imbuto mu mahanga,Tropi Wanda Ltd, Ingabire Marie Ange Claudine (ibumoso) na we yashyikirijwe imodoka ikonjesha umusaruro

Urukiko rw'Ibanze rwa Kicukiro rwari rwagaragaje ko hari impamvu zikomeye zituma abaregwa bakekwaho ibyaha bakurikiranyweho, kandi ko hakenewe gukorwa iperereza ryimbitse kugira ngo hagaragazwe icyishe nyakwigendera mu buryo budashidikanywaho, rutegeka ko bafungwa iminsi 30 y'agateganyo.

Aba basore bajuririye icyo cyemezo bagaragaza ko Urukiko rwasesenguye mu buryo butari bwo raporo z'abahanga ku rupfu rwa nyakwigendera.

Mu iburanisha ryo kuri uyu wa 7 Ugushyingo 2024 mu Rukiko Rwisumbuye rwa Nyarugenge, abo basore babiri n'ababunganira bagaragarije urukiko ko bajuririye icyemezo cyo gufungwa iminsi 30 y'agateganyo kuko batanyuzwe nacyo.

Bagaragaje ko Umucamanza mu Rukiko rw'Ibanze rwa Kicukiro yaciye urubanza yifashishije raporo y'abaganga yakozwe ku isuzuma ry'umubiri wa nyakwigendera Kayirangwa Olga nyamara ayivugisha ibyo itavugaga.

Urukiko mu gusesengura iyo raporo y'abahanga ngo rwasanze, aho bafashe ibizamini bigamije kureba niba nyakwigendera yarasambanyijwe, mu isesengura ry'iyo raporo ngo byagaragaye ko harimo amasohoro y'umugabo mu gitsina cye.

Kuri raporo y'abahanga y'isuzumamurambo, ruvuga ko mu kuyisesengura igaragaza ko igituza n'ijosi bya Kayirangwa bifite ikimenyetso cyo gukomereka cyangwa inguma bigaragaza ko hashobora kuba harabayeho kuniga Olga mu ijosi cyangwa kumufata hakoreshejwe imbaraga bigatera gukomereka.

Abaregwa bagaragaje ko raporo y'abahanga isobanutse kuko itagaragaza ikintu runaka cyaba cyarateye urupfu rwa Kayirangwa Olga.

Bavuze ko batazi impamvu umucamanza mu Rukiko rw'Ibanze rwa Kicukiro yavugishije raporo ibyo itavuga, basaba ko Urukiko Rwisumbuye rwa Nyarugenge rwakongera gusesengura ibimenyetso byatanzwe.

Bavuze ko kuba iyo raporo yanditswe mu rurimi rw'Icyongereza kandi harimo n'amagambo akomeye yifashishwa mu mwuga w'ubuvuzi bishobora kuba ari byo byateye umucamanza kuyivugisha ibyo itavuga.

Basabye urukiko ko mu kuyisesengura bishobora no kuba byiza mu gihe rwahamagaza abayikoze bakayisobanura uko iri.

Abaregwa basabye ko bakurikiranwa bari hanze kuko nta ruhare bagize mu rupfu rw'uwo bita inshuti yabo Olga Kayirangwa.

Ubushinjacyaha bubajijwe niba bwemeranywa na raporo bwirinze kugira icyo bubivugaho bugaragaza ko raporo yatanzwe n'abahanga kandi igomba gusesengurwa n'urukiko rugafata icyemezo.

Bwagaragaje ko urukiko mu gukora isesengura umucamanza yazareba niba yemeranya n'icyemezo cy'umucamanza wo mu Rukiko rw'Ibanze abaregwa bagakomeza gufungwa by'agateganyo.

Bwagaragaje kandi ko mu gihe umucamanza mu rukiko rwisumbuye yabibona ukundi na we yafata icyemezo ariko yemeza ko Ubushinjacyaha bwagaragaje ko iperereza rigikomeje bityo abaregwa bakwiye gukomeza gukurikiranwa bafunzwe.

Mu iburanisha mu Rukiko rw'Ibanze, Umushinjacyaha yari yagaragaje ko raporo y'abaganga atari cyo kimenyetso gusa gishingirwaho ahubwo ko hari n'ibindi kandi ari yo mpamvu basaba ko abaregwa bafungwa by'agateganyo mu gihe iperereza rigikomeje.

Kayirangwa wari umwana w'imfura mu muryango yitabye Imana ku wa 26 Nzeri 2024. Ni urupfu rwatunguranye ubwo yari yagiye gusura inshuti ze bigakekwa ko ari ho yaguye nubwo hataramenyekana icyamwishe.

Gatera Junior na Nasagambe Fred bahise batabwa muri yombi. Kuri ubu bafungiwe mu Igororero rya Nyarugenge nyuma y'uko Urukiko rw'Ibanze rwa Kicukiro rutegetse ko bafungwa iminsi 30 y'agateganyo ku wa 21 Ukwakira 2024.

Urupfu rwa Olga Kayirangwa rwababaje abatari bake

Yifashishije konti ye ya Instagram kuri uyu wa Gatatu tariki 6 Ugushyingo 2024, The Ben yagaragaje ko yahaye imbabazi Fatakumavuta nubwo amagambo yamuvuzeho yasize ibikomere. Yongeraho ngo 'Ndasenga ngo ugire umutima uciye bugufi kandi ufite amahoro (Yabwiraga Fatakumavuta).'

The Ben witegura gukora igitaramo cye bwite ku wa 1 Mutarama 2025, ariko kandi yarengejeho ko ubutabera bukwiye kuganza cyo kimwe n'imbabazi. Yungamo ati 'Ndabizi ko twese twatsikira ariko tukazongera tukabyuka.'

The Ben yavuze ko mu isengesho rye asaba Imana gufasha Fatakumavuta akarekurwa kandi yiringiye ko mu gihe kiri imbere amahoro azaba inganzamarumbo mu buzima bwa Fatakumavuta.

Ati 'Fatakumavuta ndasenga ngo urekurwe. Ndizera ko amahoro azaganza mu hazaza hawe.'

Yavuze ko kuri we 'Urukundo ruzahora rutsinda urwango.' Ati 'Urumuri ruzahora rutsinda umwijima. Reka twizere ko ubutabera n'imbabazi bijya kugira aho bihurira.'

Ubu butumwa yanditse bwaherekejwe n’ibaruwa yari yandikiye Urukiko rw’Ibanze rwa Kicukiro, agaragaza ko yatanze imbabazi kuri Fatakumavuta.

Iyi baruwa igomba gushyikirizwa Umunyamategeko we, Fatikaramu Jean Pierre akayifashisha mu bujurire mu gihe umukiriya we yakatiwe iminsi 30 y’agateganyo.

Iyi baruwa kandi igomba gushyirwa muri 'Sisiteme', umunyamategeko akayifashisha nk'ikimenyetso cy'uko umwe mu baregaga Fatakumavuta yatanze imbabazi.

The Ben afatwa nka kizigenza muri uru rubanza nubwo harimo n’abandi batanze ibirego bagaragaza ko Fatakumavuta yagiye abaharabika mu bihe bitandukanye binyuze mu biganiro yakoraga ku rubuga rwa Youtube rwa 3D TV ndetse no ku rubuga rwe rwa X.

Iyi baruwa The Ben yayanditse ku wa 5 Ugushyingo 2024, mbere y’uko Urukiko rw’Ibanze rwa Kicukiro rufata umwanzuro kuri uyu wa 6 Ugushyingo 2024.

Muri iyi baruwa ye agaragazamo imyirondoro ye, irimo aho abarizwa muri iki gihe. Maze akabwira Urukiko rw’Ibanze rwa Kicukiro ati “Nandikiye Urukiko rw’Ibanze rwa Kicukiro mbamenyesha ko ntanze imbabazi ku makosa yankoreye nkaba nsaba ko Sengabo Jean Bosco ‘Fatakumavuta’ yarekurwa.” Iyi baruwa kandi yashyizweho umukono na Noteri David.

The Ben yari yatanze ibirego bibiri muri iyi Dosiye. Icya mbere yagitanze tariki 7 Ukuboza 2024, agishyikiriza Urwego rw’Igihugu rw’Ubugenzacyaha ku Kimihurura. Yavuze ko Fatakumavuta yifashishije urubuga rwe rwa X ndetse n’umuyoboro wa Youtube 3D TV Rwanda, yanyujijeho ibiganiro n’inyandiko biharabika The Ben.

Yavuze ko ibi biganiro yabikoze mu bihe bitandukanye kandi hose agamije guharabika The Ben.

Urwego rw’Igihugu rw’Ubugenzacyaha, rwavuze ko bashingiye ku byo Fatakumavuta yagiye avuga kuri The Ben “twasanze yaragiye akoresha amagambo mabi agize ibyaha kandi ubugenzacyaha bwasanze ibyo byaha bidakorerwa The Ben gusa, ahubwo twasanze harimo n’abandi yibasira barimo Meddy, Bahati Makaca” biyemeza kumurikirana.

Iperereza ryagaragaje ko Fatakumavuta yagiye akora ibiganiro byinshi kuri The Ben, birimo ikiganiro cyagarutse ku bukwe bwe, ko atazi kuririmba, ikiganiro yavuzemo ko The Ben yabuze amafaranga y’inkwano, ikiganiro yavuzemo ko The Ben yambara shene y’amabati n’ibindi.

Umunyamategeko Fatikaramu Jean Paul wunganira Fatakumavuta, yabwiye InyaRwanda ko mu busanzwe iyo umuntu atanze imbabazi n'ubutabera bugira uko bubireba.

Ati 'Iyo umuntu atanze imbabazi ubutabera bugira inzira bubirebamo. Ushobora gutanga imbabazi urukiko rwabisuzuma, rukabisesengura rugasanga ari ngombwa imbabazi zigatangwa…'

 

The Ben yandikiye Urukiko rw'Ibanze rwa Kicukiro mu Mujyi wa Kigali atanga imbabazi kuri Fatakumavuta

The Ben yanifashishije imbuga nkoranyambaga ze agaragaza ko yababariye Fatakumavuta 

Kuri uyu wa Gatatu tariki 6 Ugushyingo 2024, nibwo Fatakumavuta yakatiwe iminsi 30 y'agateganyo n'Urukiko rw'Ibanze rwa Kicukiro

KANDA HANO UREBE IKIGANIRO KIGARUKA KU RUBANZA RWA MUHETO NA FATAKUMAVUTA

“>

KANDA HANO UREBE IKIGANIRO TWAGIRANYE N’UMUNYAMATEGEKO WA FATAKUMAVUTA

“>