Kamonyi: Abantu umunani bafunzwe bakekwaho gutema mugenzi wabo ikiganza kikavaho – #rwanda #RwOT

Abakekwaho kugira uruhare muri uru rugomo basanzwe bakorana ibikorwa by'ubucukuzi bw'amabuye y'agaciro butemewe n'amategeko mu Karere ka Kamonyi.

Amakuru avuga ko ku wa 13 Ukwakira 2026, abagabo bari basanzwe bakorana ubucukuzi bw'amabuye y'agaciro nta ruhushya bagiye kunywa inzoga, baza gusinda, bituma amakimbirane bari bafitanye kuva kera abyuka.

Muri ayo makimbirane ni bwo Twibanire Emmanuel w'imyaka 39 yakorewe urugomo, agatemwa ikiganza kikavaho.

Ibi byabereye mu Mudugudu wa Nyenga, Akagari ka Bugoba, Umurenge wa Rukoma mu Karere ka Kamonyi.

Umuvugizi wa Polisi mu Ntara y'Amajyepfo, CIP Kamanzi Hassan, yabwiye IGIHE ko Polisi ikimara kumenya ibyabaye, yahise ijya aho byabereye, ita muri yombi abantu umunani bakekwaho kugira uruhare muri urwo rugomo.

Ati “Iperereza rirakomeje kandi n'undi uwo ari we wese wagaragara ko yagize uruhare muri urwo rugomo ndetse n'ubucukuzi bw'amabuye y'agaciro butemewe bose Polisi ntawe izihanganira barafatwa bafungwe”

Abatawe muri yombi bafungiye kuri Sitasiyo ya Polisi ya Rukoma, mu gihe Twibanire wajyanywe mu Bitaro bya Remera Rukoma, aho ari kwitabwaho n'abaganga.

Polisi yibukije abaturage kwirinda urugomo n'ibindi bikorwa binyuranyije n'amategeko, kuko bishobora kugira ingaruka zikomeye ku buzima bw'abantu no ku mutekano rusange.

Yasabye kandi abaturage gukomeza ubufatanye n'inzego z'umutekano, bagatanga amakuru ku gihe ku bikorwa byose bishobora guhungabanya umutekano n'ituze rusange.

Polisi yashimangiye ko gutanga amakuru ku bikorwa binyuranyije n'amategeko atari ukuregana, ahubwo ari inshingano ya buri muturage mu kubungabunga umutekano no gukunda igihugu.