Ahagana ku i saa tatu za tariki 14 Ukwakira 2026, mu Mudugudu wa Nyenge, Akagari ka Bugoba, Umurenge wa Rukoma ho mu Karere ka Kamonyi, uwitwa Twibanire Emmanuel w'imyaka 39 y'amavuko ari mu nzira ataha yahuye n'itsinda ry'abasore avuga ko ryaremye umutwe w'Abajura n'abagizi ba nabi baramutema, bamuca ikiganza gitandukana n'Ukuboko, banamutema akaguru ariko kuko yari yambaye inkweto ndende(Bote) umupanga nti wafata ku mubiri, hacika Bote yari yambaye. Avuga ko mu basaga icumi yiboneye bamwe akanabamemya, hamaze gufatwa 9.
Amakuru y'ubu bugizi bwa nabi, intyoza.com ya yamenye nyuma gato yo gitemwa ikiganza kwa Twibanire Emmanuel, ariko habanza gushakishwa amakuru mpamo arenze ibyavugwaga ariko kandi ndetse n'imvano y'ubu bugizi bwa nabi.
Twibanire Emmanuel watemwe ikiganza, ubwe yabwiye intyoza.com ko aba basore baremye umutwe w'Abajura ndetse n'abagizi ba nabi kandi ko benshi mu banyarukoma babazi, aho bamwe ngo baba mu gatsiko k'abacukura buhebyi(Abahebyi) amabuye y'agaciro mu buryo butemewe.
Yabwiye umunyamakuru wa intyoza.com ko ubu yamaze kugezwa ku bitaro bya Kaminuza y'u Rwanda/CHUB ngo yitabweho. Avuga ko ajya gutemwa ikiganza yari mu nzira ataha ava mu kazi, ageze ku rugo rw'umu Mama witwa Ingabire Marie Claire, asanga bamugose bamubujije no kwinjira iwe ahubwo ari guhungira ku muturanyi, amubonye aramuhamagara ngo aze amubwire kuko yari atarabageramo.
Ati' Mugezeho yarambwiye ati dore bariya bahungu ni wa mutwe w'abambuzi(Abajura), shaka nawe indi nzira wacamo'. Akomeza ati' Mu gihe tukiri mu magambo tuganira baje batumurika n'amatoroshi, we yahise apfumura urugo arinjira njyewe bangeraho bambwira ngo ibyo mfite byose hasi. Namenyemo bane harimo n'uwanciye ikiganza, bantema no ku kaguru ariko umuhoro nti wafata ku mubiri hacika Bote nari nambaye. Icyenda nziko bamaze gufatwa na Polisi ariko bari hejuru y'icumi abo niboneye, nka12'.
Akomeza avuga ko bamaze kumutema bakamuca ikiganza, bagiye nawe akagita aho ariko abavandimwe be yahuruje ngo nibo baje kugishaka barakimuzanira yinjira mu bitaro bya Remera Rukoma agifite ukwacyo.
Umuvugizi wa Polisi y'u Rwanda mu Ntara y'Amajyepfo, CIP Hassan Kamanzi, mbere y'uko intyoza.com ivugana na Twibanire Emmanuel waciwe ikiganza, CIP Hassan yabwiye Umunyamakuru ko Polisi yafashe abantu 8 bakekwaho gukorera urugomo mugenzi wabo bapfuye ubucukuzi bwa mabuye y'agaciro butemewe.
Avuga ko abafashwe bose bafungiye kuri Sitasiyo ya Polisi ya Rukoma, aho Ubugenzacyaha/RIB bwatangiye gukurikirana abamaze gufatwa ariko kandi ngo n'abandi bose bakekwa muri ubu bugizi bwa nabi barakomeza gushakishwa.
Mu butumwa bwa Polisi, CIP Hassan Kamanzi aributsa buri wese kwirinda ibikorwa bitemewe birimo; Urugomo, Ubucukuzi bw'Amabuye y'agaciro butemewe ndetse n'Ubusinzi kuko byose bigize ibyaha bihungabanya Umutekano n'Ituze ry'Abaturage. Asaba kandi Abaturage gukomeza kugira uruhare rufatika mu kubungabunga Umutekano batangira Amakuru ku gihe kandi vuba kucyo ba bona cyose kibangamiye Amahoro n'ituze ryabo.
Umuremge wa Rukoma, ni hamwe mu bice by'Akarere ka Kamonyi hakunze kugaragara urugomo, akenshi rukorwa n'insoresore zibarizwa mu bucukuzi bw'Amabuye y'agaciro butemewe. Abaturage baho baratabaza kuko muri iyi minsi ikibazo cy'Urugomo n'Umutekano muke byongeye kubura, ariko bakavuga ko impamvu nyamukuru ari abashinzwe Umutekano( twirinze kuvuga) bajyaga babafasha guhashyababa bagizi ba nabi ubu bahakuwe bakimurirwa ahandi. Basaba ko hashyirwa imbaraga mu kongera guhashya aba bagizi ba nabi babibasiye.
Théogène Munyaneza
The post Kamonyi-Rukoma: Bamwe mu bakekwaho gutema Umuntu bakamuca ikiganza batawe muri yombi, Uwatemwe ageze CHUB first appeared on Intyoza.
The post Kamonyi-Rukoma: Bamwe mu bakekwaho gutema Umuntu bakamuca ikiganza batawe muri yombi, Uwatemwe ageze CHUB appeared first on Intyoza.
Leave a Reply