Aya masezerano y'imikoranire (MoU) yashyiriweho umukono i Seoul muri Koreya y'Epfo, ku wa Kane tariki ya 20 Kanama 2026, hagati y'Umuyobozi Mukuru wa Polisi y'u Rwanda, CG Felix Namuhoranye, na CG Yoo Jae-Sung uyobora Polisi ya Koreya y'Epfo.
Umuhango wo gusinya aya masezerano witabiriwe kandi na Ambasaderi w'u Rwanda muri Koreya y'Epfo, Nkubito Manzi Bakuramutsa.
Aya masezerano agamije gushyiraho uburyo bw'imikoranire mu guhangana n'ibyaha byambukiranya imipaka bikorwa n'imitwe y'abagizi ba nabi, gusangira amakuru n'ubumenyi, gutanga amahugurwa ndetse no gushyira mu bikorwa izindi gahunda zigamije kongerera ubushobozi inzego za Polisi z'ibihugu byombi.
Binyuze muri ubu bufatanye, Polisi zombi zizajya zifashanya mu guteza imbere ubumenyi n'ubushobozi mu bikorwa byo kurwanya ibyaha, hagamijwe kongera umutekano no gukaza imbaraga mu guhangana n'ibyaha bifite aho bihurira n'ibihugu byombi.
Leave a Reply