Minisitiri w'Intebe Dr. Nsengiyumva yasobanuriwe imikorere y'uruganda Shema Power rutanga megawatt 56 z'amashanyarazi – #rwanda #RwOT

Uru ruganda rwabaye igisubizo mu kongera ingano y'amashanyarazi mu Rwanda, binyuze mu gucukura Gaz Méthane yo mu Kiyaga cya Kivu.

Ni igikorwa cyabaye wa 6 Nzeri 2025, mu ruzinduko rw'akazi yagiriye mu Karere ka Rubavu.

Minisitiri w'Intebe Dr. Nsengiyumva yasobanuriwe ko Uruganda rwa Shema Power rwamaze gushyira megawatt 50 z'amashanyarazi rutunganya ku muyoboro mugari, mu gihe izindi zisigaye zikoreshwa mu ruganda.

Uru ruganda ruherereye mu kagari ka Busoro mu Murenge wa Nyamyumba ho mu Karere ka Rubavu, rwatangiye kubakwa mu Ukwakira 2019, imirimo yo kurwubaka irangira muri Gashyantare 2024, rwuzuye rutwaye miliyari 400 Frw.

Icyiciro cya mbere cy'umushinga wo kubyaza umusaruro gaz methane iri mu Kiyaga cya Kivu, muri Gicurasi 2016 watangiye gutanga megawatt 25.

Leta y'u Rwanda yashyize imbaraga mu kwegereza abaturage bayo amashanyarazi nk'imwe mu ngamba zayifashije kuzahura ubukungu bw'Igihugu, hibandwa ku bikorwa byatuma kirushaho gutera imbere birimo kongera ingufu z'umuriro w'amashanyarazi.

Mu 2009, ni bwo Guverinoma y'u Rwanda yashyizeho gahunda igamije kongera no gukwirakwiza amashanyarazi (Electricity Access Rollout Program, EARP), hagamijwe kuzamura umubare w'ingo zifite amashanyarazi.

Abakozi b’uruganda Shema Power batembereje Minisitiri w’Intebe bamwereka imikorere yarwo

Minisitiri w'Intebe Dr. Nsengiyumva yasobanuriwe imikorere y'uruganda Shema Power rutanga megawatt 56 z'amashanyarazi

Umuyobozi wa Diviziyo ya gatatu y'ingabo z'u Rwanda ikorera mu ntara y'Iburengerazuba, Gen. Maj. Nkubito Eugène na we yari mu basuye uruganda Shema Power