Sisiter Hope amaze kwigarurira imitima ya benshi cyane cyane abakunda indirimbo zaririmbiwe Imana. Akora umuziki akawufatanya n'umurimo w'ivugabutumwa no kwamamaza ingoma y'Imana. Ubusanzwe ni Masera 'Umubikira' mu idini Gatolika. 

Kuri ubu abarizwa muri Region Pacis i Remera mu mujyi wa Kigali. Yibukije abantu n'Abakiristo bose gutegereza amasezerano y'Imana, naho yatinda. Ni ubutumwa yatanze abunyujije mu indirimbo yise 'Ndacyategereje”. 

'Dore ndi hano ndacyategereje rya sezerano ryanjye wambwiye, iyakuremye yaragutatse uri uw’agaciro, uwo uriwe wese waba umushomeri cyangwa ufite uburwayi budakira'. Ayo ni amwe mu magambo agize indirimbo “Ndacyategereje” ya Sister Hope.

Sr Sister Hope amaze imyaka ine atangiye umuziki kuko yawutangiye mu mwaka wa 2020 – ni bwo yashyize hanze indirimbo ye ya mbere. Amaze gukora indirimbo zirenga 35 harimo nka Humura shenge, Uburenganzira bw'Umwana, Unaisaidia mungu, Winsiga nicaye;

Abayo Sandirine yahimbiye umunyamakuru ukora ibyegeranyo bitandukanye n’izindi nkuru. Kwinjira mu muziki kwe, byabanjirijwe no kwinjira mu murimo w'ivugabutumwa ryo kwamamaza ingoma y'Imana avuga ko yatangiye afite imyaka icyenda.

Sister Hope yavutse mu mwaka wa 1985, afite umubeyi umwe ariwe Mama we witwa Musaninyange Therese, akaba avuka mu karere ka Gatsibo, umurenge wa Kiziguro, akagali Rubona, Santarare ya Gakenke, Paruwasi ya Kiziguro, Diyoseze Byumba.

Sister Hope yasoje amashuri yisumbuye muri Ecole Secondaire Baptiste de la Fraternite (E.S.B.F Gisenyi, akaba afite impamyabumenyi mu icungamutungo. Ibyo akora byose abifatanya no kwamamaza ingoma y'Imana. 

Sister Hope amaze gukora indirimbo zirenga 35

Avuga ko urugendo rwe rw'ubuhanzi arufatanya n'umuhamagaro. Yibitseho n'impano yo gucuranga gitari akaba ageze no ku rwego rwo kwigisha gucuranga no kuririmba mu majwi Korari zidatndukanye. Yagiye ajya mu bihugu bitandukanye nka Congo, Tanzania, Uganda na Kenya nk'umwe mu bihaye Imana b’aba Misiyoneri (Missionary).

Mu kiganiro yagiranye na InyaRwanda, Sister Hope yagize ati: 'Njye natangiye umurimo wo kwamamaza ingoma y'Imana nkiri muto, mfite imyaka icyenda, ntabwo nabitegetswe n'ababyeyi ngo babimpitiremo ahubwo ni umuhamagaro kuko njye nahamagawe n'ijwi ry'Imana;

Ndumvira niyemeza kwamamaza ubutumwa bwa Yezu Kirisito no gusengera abatuye isi, kuko njye ndibuka ndi muto nakundaga gusenga cyane ndetse n’ubu. Urugendo rurakomeje kuko ndi kumwe na Yezu udukunda byahebuje. Yego navukiye mu muryango ukijijwe ni byiza ariko nagiye mu muryango w’abihaye Imana ku bwo kubikunda no guhamagarwa na Kristo”.

Yavuze ko kuba ari Masera akabifatanya n'ubuhanzi “ntabwo ari inzira yo guta umuhamagaro nk’uko benshi babitekereza, ahubwo byuzuza umuhamagaro wanjye kuko burya uririmbye aba akoze amasengesho byikubye kabiri”. 

Ku bw’ibyo ahamya ko bimwukaba rwose. Ati “Birumvikana ntabwo bisenya ahubwo binyongerera imbaraga mu rugendo rwanjye kandi bizagera no ku rwego mpuzamahanga ndabyizeye kubera Imana natangiye no kuririmba mu zindi ndimi urugero Igiswahili!.”

Akomeza agira ati: 'Impamvu ikomeye nakoze iyi ndirimbo “Ndacyategereje” nashakaga kwibutsa abantu bose ko Imana yaturemye idukunda ikatugira beza kandi yaturemeye imirimo myiza, ikadusezeranya ibyiza amasezerano y’ibyiza kuri twe”.

Ati “Bityo ntidukwiye kwiheba ngo twumve ko byayinaniye ahubwo dukwiriye kuguma ku birindiro tugategereza isezerano ry'Imana nubwo twaba dukennye, dushonje, dufite uburwayi budakira, cyangwa mu rugo byagoranye tubona ntagutabarwa ariko Imana irahari”.

Sister Hope yaboneyeho kwibutsa abakunzi be bakunda ibihangano anyuza kuri YouTube ye ariyo Mukamana Esperance Sr Hope nk’uko badahwema kubimwereka, abashimira urukundo rwabo badahwema kumugaragariza.

Yanabasabye gukomeza kureba ibihangano bye bakumva ubutumwa bukubiyemo kuko ari cyo “mba nshaka ko bumva ubutumwa bwiza bagahinduka abana b’Imana, bakava mu bidatunganye bagahindukirira Yezu Kiristo bakanabisangiza abandi”.

REBA HANO INDIRIMBO NSHYA “NDACYATEGEREJE” YA SISTER HOPE

Sister Hope aririmba anicurangira gitari

Umwanditsi: Iyakaremye Emmanuel (Director Melvin Pro)

Bishop Prophet Sibomana Samuel ni umugabo wubatse ufite umugore umwe witwa Nsekonziza Alice bafitanye abana batatu. Tariki 08 Nyakanga mu mwaka wa 2017 ni bwo aba bombi basezeranye imbere y’Imana mu birori by’agatangaza.

Bishop Prophet Sibomana Samuel ni izina cyane mu Iyobokamana dore ko uyu mukozi w’Imana ari umuhanuzi ukomeye wahanuriye abantu banyuranye kandi bigasohora. Yabaye mu bihugu birimo u Rwanda, Uganda, u Buhinde na USA ari kubarizwa uyu munsi wa none.

Ni umwana wa kabiri mu muryango w'abana 9 akaba yarize muri Rusumo High School, akomereza Kaminuza mu Buhinde muri Anamalai Universtity aho yakuye impanyabumenyi y'icyiciro cya kabiri cya kaminuza mu bijyanye no guteza imbere abaturage. Nyuma yaho yaje gukomeza amashuri muri Masters mu bijyanye na Population study (Demographic).

Yimitswe nka Bishop mu 2016 asukwaho amavuta na Bishop Rubanda Jacques. Afite Itorero ryitwa Shekinah Glory Church rikorera mu bihugu binyuranye birimo u Buhinde rifitemo paruwase nini na Uganda afitemo amaparuwase abiri aherereye i Mbarara ndetse na Nakivale. Birashoboka ko no muri Amerika yahatangiza Itorero.

Mbere y’uko Bishop Prophet Sibomana ajya gutura muri Amerika, yakorewe agashya n’umuramyi w’inshuti ye cyane Israel Mbonyi wagiye kumusezera mu Buhinde aho yabaga n’umuryago we. Ni urugendo bagize ibanga rikomeye ariko hari amafoto yabo inyaRwanda yabonye bose banezerewe cyane ari naho twahereye tuganira n’uyu muhanuzi.

Umubano wa Israel Mbonyi na Bishop Prophet Sibomana ni uwa kera kuko bize muri Kaminuza imwe mu Buhinde, na nyuma yaho bakomeza kubana neza nk’abakozi b’Imana bagabura ibyayo byejejwe. Ntibakiri inshuti gusa, ahubwo basigaye ari nk’abavandimwe.

Mu 2016 Israel Mbonyi yatumiwe Bishop Prophet Sibomana mu muhango wo gufungura ku mugaragaro Shekinah Glory Church muri Uganda. Ni na bwo aheruka gutaramira muri iki gihugu gituanyi, ariko ubu agiye gusubirayo muri uyu mwaka nk’uko aherutse kubitangariza abakunzi be n’itangazamakuru.

Icyo gihe Mbonyi yahembuye benshi. Bishop Sibomana ati “Ni byo Israel Mbonyi namutumiye mu giterane muri Uganda, ndabyibuka ko twabonye Imana, abakristo baturutse mu bice bitandukanye by’Ubugande i Kampala n’ahandi henshi twahimbaje Imana. Muri make cyari igiterane cyatanze ibyishimo ku bakristo benshi batuye muri Uganda”.

Mu ntangiriro za 2024, Israel Mbonyi yagiye mu Buhinde gusezera Bishop Prophet Sibomama n’umuryango we mbere y’uko bajya gutura muri Amerika. Kuba uyu muramyi yarahise ajya mu Buhinde nta kuruhuka dore ko hari hashize iminsi mbarwa akoze igitaramo kuri Noheli muri BK Arena, biragaragaza umubano ukomeye bafitanye.

Mu kiganiro na inyaRwanda, Bishop Prophet Sibomama Samuel yaduhishuriye amateka ye na Israel Mbonyi afata nk’umuvandimwe we. Ati “Amateka yanjye na Mbonyi atangirira mu gihugu cy’u Buhinde aho twahuriye tugiye kwiga kaminuza, ndi imbere kuri stage, Imana imbwira ko Israel Mbonyi azakomera akaba umuhanzi w’igihangange ku isi”.

Arakomeza ati “Naramuhagurukije mu materaniro mbimubwirira mu ruhame abize mu Buhinde bose barabyibuka nk’ibyabaye ejo. Ibyo namuhanuriye byose yambwiye ko yabyiboneye n’amaso ye. No muri ino minsi yaje kunsezera hano mu Buhinde tumarana iminsi itatu mu masengesho, Imana imuha andi masezerano menshi”.

Bishop Prophet Sibomana yavuze ko Israel Mbonyi ari umukozi w’Imana none ndetse n’ejo hazaza “kuko ashyigikiwe n’Imana, hari ibindi byinshi biri imbere muzabona Imana izamukoresha kubera ko dusenga Imana ivuga kandi ikanasohoza”.

Mu myaka irenga 10 ishize Bishop Sibomana yabwiwe n’Imana ko Israel Mbonyi azaba umuhanzi ukomeye ku Isi. Ibyo Imana yamubwiye byatangiye gusohora, ubu Israel Mbonyi ari gutigisa East Africa binyuze mu ndirimbo ziryohera ndetse zikora imitima ya benshi.

Mbonyi niwe muhanzi rukumbi mu Rwanda wujuje BK Arena yakira abantu ibihumbi icumi. Yabikoze inshuro ebyiri mu bitaramo akora kuri Noheli byitwa “Icyambu Live Concert”. Niwe muhanzi mu Rwanda ufite indirimbo ya Gospel yarebwe kurusha izindi, iyo ni “Nina Siri” imaze kurebwa n’abarenga Miliyoni 36 kuri Youtube mu mezi 7 yonyine.

Bishop Prophet Sibomana yemeje amakuru yo kwimukira muri Amerika, ati “Njye n’umuryango wanjye ni byo twimukiye muri America guturayo, nkaba ariho ngiye gukomereza umurimo w’Imana nkoresha impano imana yampaye yo gusengera abantu n’ubuhanuzi, gusa ningira iyerekwa ryo gutangizayo itorero nabyo nzabibamenyesha”.

Avuga ko afatanyije n’aba Diaspora, bagiye gusenga babone Imana ikora ibitangaza. Ati “Hamwe n’Imana tuzahembura imitima ya benshi, abarwayi bazakira indwara, abandi Imana izabaha amasezerano, tuzahembura imitima yari yihebye, gusa buri wese azamenya umugambi w’Imana kuri we. Ibizakoreka ni byinshi, gusa mvuze make ariko Diaspora yitege byinshi”.

Mbere yo kuvuka kwe byari byarahanuwe ko azaba 'Umuhanuzi' ukomeye ku isi

Mu bijyanye n'impano y'ubuhanuzi Bishop Prophet Sibomana Samuel yadutangarije ko yayihawe mu 2000 ubwo yari afite imyaka 16. Abajijwe na Inyarwanda.com aho impano ye yo guhanura ikomoka, yavuze ko mbere yo kuvuka kwe byari byarahanuwe ko azaba umuhanuzi ukomeye ku isi 'Prophet'.

Yatangaje ko Imana yabihishuriye umuhanuzi witwa Karikofi Eraston, nawe akabibwira nyina [umubyeyi wa Bishop Prophet Sibomana] ko umwana atwite azamwita Samuel, akazaba umuhanuzi mpuzamahanga.

Mu magambo ye yagize ati: “Mu muryango w'iwacu hari umuhanuzi witwaga Karikofi Eraston yahanuriye Mama akiri umukobwa ko azasama inda, akazabyara umwana w’umuhungu uzitwa Samuel akazaba umuhanuzi mpuzamahanga”.

“Nkiri muto nari mfite isezerano y’uko nzaba umuhanuzi, nyuma impano yaje intunguye ntangira kuzura imbaraga z’Umwuka Wera, ntangira kuvuga indimi nshya ubwo, ntangira gusenga amasengesho yo kwiyiriza ubusa y'igihe kirekire.”

“Ubwo Imana inyongerera ubushobozi bwo gusengera indwara no guhanurira amahanga mu bihugu bitandukanye by’isi (India, RDC, Rwanda, Uganda, Kenya, Burundi,..) ndetse ntangira no gusengera abantu kuri telefone bagakira indwara zitandukanye mu mpande zose z’isi”.

Bishop Prophet Sibomana Samuel yatangiye umurimo w'Imana akiri muto, arererwa mu itorero rya Dave rikorera ku Gitega i Kigali, akaba yararirimbaga muri korali Apotres de Jesus. Mu 2003 Imana yamuhaye impano y'ubuhanuzi akiri muto ageze mu mashuri yisumbuye, kugeza uyu munsi akaba akiyikoresha.

Yaminurije mu Buhinde aho yagaragaye cyane mu bikorwa byo kubwiriza Abahinde, benshi bava mu byaha bakira Yesu Kristo nk'Umwami n'Umukiza. Yahakuye impamyabumenyi y'icyiciro cya gatatu cya kaminuza (Masters) mu bijyanye n'ibarurishamibare.

Prophet Sibomana Samuel yagiye arangwa no gukora ibiterane bitandukanye hirya no hino ku isi nka R.D Congo, u Burundi, u Buhinde, Uganda no mu Rwanda aho twavugamo nk'igiterane aherutse gukora cyabereye muri Four Square Gospel Church ku Kimironko.

Ubwo Bishop Rubanda Jacques wa New Jerusalem yimikaga Prophet Sibomana Samuel nka Bishop, yamusutseho amavuta, amwaturaho imbaraga n’amavuta yo kuba Umushumba Mukuru wa Shekinah Glory church ku isi. Yahawe inkoni y'ubushumba, Bibiliya nk’inkota azajya agendana ndetse yambikwa n'umwambaro w'abatambyi.

Umuryango wa Bishop Prophet Sibomana wishimiye cyane urukundo weretswe na Israel Mbonyi wavuye mu Rwanda akajya mu Buhinde kubasezera mbere y’uko bajya muri Amerika

Bishop Prophet Sibomana yishimira ko Imana ikomeje gusohoza ibyo yamubwiye kuri Israel Mbonyi ko izamugira umuhanzi mpuzamahanga

Israel Mbonyi yishimiwe cyane n’abana ba Bishop Prophet Sibomana Samuel 

Bishop Prophet Sibomama Samuel yize mu Buhinde ari na ho yahuriye bwa mbere na Mbonyi

Mu 2016 ni bwo Bishop Rubanda Jacques yimitse Bishop Prophet Sibomana

Bishop Prophet Sibonana yahishuye ko yahanuriwe kuzaba umuhanuzi mbere y’uko avuka

Bishop Prophet Sibomana Samuel na Nsekonziza Alice barushinze mu mwaka wa 2017

Samuel & Alice ku munsi w’ubukwe bwabo

Nsekonziza Alice umugore wa Bishop Prophet Sibomana Samuel

Umuryango wa Bishop Prophet Samuel wimukiye muri Amerika

Biteguye gukorera Imana mu gihugu cya Leta Zunze Ubumwe za Amerika

Bombi bahora mu Ijuru rito binjiyemo kuva mu mwaka wa 2017

Pastor Sebagabo Christophe ni ko yari asanzwe yitwa, akaba ari Umushumba Mukuru w’Itorero Calvary Wide Fellowship Ministries. Kuri uyu wa Gatandatu tariki 30 Ukuboza 2023, yasutsweho amavuta y’Intumwa mu muhango wayobowe na Apotre Dr. Paul Gitwaza uyobora Zion Temple ku Isi.

“Amavuta y’Intumwa amutembeho, yamanutse mu mutwe wa Aroni, agera ku bwanwa bwe”. Ni ko Apotre Dr. Gitwaza yavuze ubwo yimikaga uyu mukozi w’Imana Sebagabo Christophe. Yamwatuyeho kuzajya asengera abarwayi bagakira.

Ati “Mu izina rya Yesu, azakize abarwayi, azirukane abadayimoni, abazure abapfuye, azamanure imvure, azategeke ibicu, azacemo Yorodani, azakore ibihambaye, intege nke zihinduke imbaraga zawe, umukoreshe”.

Yahise atangira kumuhanurira ati “Umwuka w’Uwiteka akuriho, agusize amavuta ngo ubwirize ubutumwa abakene”. Yanateye indirimbo ivuga ngo “Amavuta asa n’izahabu y’imyerayo amutembaho”. 

Christophe yambitswe ikimenyetso cy’Ubushumba mu ishati, “Ni ikiziriko cyo mu Ijosi, ni imbata ya Kristo”. Yambitswe kandi umwambaro w’umweru ugera ku maguru, anakenyezwa umushumi/umukandara usobanura ukuri. Gitwaza ati “Uzabwirize ukuri, ntuzace ku ruhande”. 

Nyuma yo kumwambika igishura cy’umweru, Apotre Gitwaza yagize ati “Umwambaro w’umweru ni igishura cyo gukiranuka, uzakiranuke mu byo uvuga, mu byo ukora byose mu murimo w’Imana uhawe”. 

Yongeyeho ati “Hanyuma azahabwa icyubahiro kuko akorera Imana”. Yahise amwambika furari, umusaraba ndetse n’impeta isanzwe yambarwa n’abashyingiranywe, ati “Uyu munsi ushyingiwe n’Itorero Calvary n’umubiri wa Kristo wose. Iyi ni impeta y’ubu Bushop n’Ubushumba”.

Apotre Christophe yahawe kandi inkoni y’ubutware nk’ikimenyetso cyo kuragira umukumbi w’Imana. Inkoni yahawe irimo ebyiri; inkoni igarura izagiye kure “ukazigarura, abananiwe n’abarushye uzabagaruze ineza kuko uri umwungeri”, ndetse n’inkoni yo kurinda umukumbi aho azayikoresha mu kurwanya umwanzi”.

Mbere yo kumushyigikiriza Bibiliya, Apotre Dr. Gitwaza yabwiye Sebagabo ati “Ntukiri Christophe usanzwe uri Intumwa Christophe Sebagabo. Ibyo twavuze byose biri muri iki gitabo. Iki gitabo kirimo amagambo y’ubugingo, kizakuyobore, amagambo akirimo uzayabwire isi yose.

Uzarinde umukumbi nk’uko Umwuka Wera agushyiriyeho kuba umushumba wabo, uzakomeze abizira, ugarure abasubiye inyuma, wubake umubiri wa Kristo. Emera iki gitabo kizabe isoko wowe n’abo uyobora muzavomeramo amazi y’ubugingo”.

Apotre Christophe Sebagabo anafite impano yo kuramya Imana, ndetse yigeze gushyirwa ku rutonde rw’abantu 10 bazi gusirimba cyane ku Isi. Mu byo ateganya harimo no gukora indirimbo ze bwite nk’uko yabihamirije umunyamakuru wa InyaRwanda mu mpera za 2022.

Itorero Calvary Wide Fellowship Ministries (CWFM) rikorera Kimironko – Zindiro. Ni umuryango ushingiye ku kwizera Imana watangijwe n’umukozi w’Imana Sebagabo Christophe, tariki 17 Gicurasi 2017. Ryatangiriye mu Rwanda mbere y’uko ryaguka.

Icyerekezo cyaryo ni ubuzima bwuzye (Imana, Abantu, Umutungo) mu kwigana Yesu Kristo nk’umwami n’umukiza wabo n’umukoresha mukuru (1 Abakorinto 11:1). Inshingano biyemeje harimo guteza imbere umwuka w’ububyutse (kwihana, kwiyiriza ubusa no gusenga);

Kubwiriza ijambo ry’Imana no kurera urubyaro n’ingabo z’abinginzi kugira ngo baharanire kugaragara k’Ubwami bw’Imana ku isi, no guteza imbere impinduka nziza z’abantu mu bice byose by’ubuzima (Umwuka, ubukungu n’imibereho myiza).

CWFM ifite amatorero (Parish) mu migabane ibiri Afrika n’Uburayi ndetse na E-Church (Diaspora) mu migabane yose. Ifite amatorero (Parush) 12 akorera mu Rwnda, DR Congo, Kenya na Uganda. Ifite abashumba 20 bakorera umurimo w’Imana muri ayo matorero atandukanye. Ifite abayoboke barenga 3,000 ku Isi yose.

Mu bikorwa by’iterambere bamaze gukora harimo kubaka inyubako y’Itorero rya CWFM icyicaro gikuru Zindiro-Kimironko, byahagaze Miliyoni 300 Frw. Bubatse kandi inyubako y’itorero rya CWFM Paruwase ya Bugesera, ifite agaciro ka Miliyoni 20 Frw. Bubatse umuhanda wa kaburimbo ufite metero 200 ku mafaranga Miliyoni 17 Frw. 

Banafashije ama Paruwase gusana inyubako bateraniramo; Bukavu, Nairobi, n’ahand. Byahagaze hejuru y’ibihumbi 50 by’amadorali ya Amerika (ararenga Miliyoni 60 Frw). Banagize ruhare mu bikorwa bitandukabye by’ubugiraneza nko gtanga mituweli ku batishoboye, no gusangira n’abatishoboye mu bihe bitandukanye.

Apotre Christophe Sebagabo yasabwe kwita ku mukumbi w’Imana ahamagariwe kuyobora

Apotre Christophe yimitswe na Apotre Gitwaza wa Zion Temple

Apotre Christophe Sebagabo amaze imyaka 6 atangije Calvary Wide Fellowship Ministries

Apotre Sebagabo Christophe hamwe na Apotre Dr. Paul Gitwaza

Padiri Uwimana aganira n’itangazamakuru, ubwo yari ageze i Kanombe avuye mu gihugu cy’u Budage ari naho n’ubundi asanzwe akurikiranira amasomo ye ajyanye n’igipadiri, yatangaje byinshi ku muziki we.

Abajijwe na inyaRwanda ku kijyanye n’ishusho y’umuziki we, iyo ari mu Budage yagize ati: “Hariya ntabwo biba byoroshye kuko mba ndi muri rwinshi gusa ariko nyine nk’iyo ntari mu ishuri ndiyiba nkawukora.

Gusa ariko nyine ntabwo uwo muziki mba nkoze uba ari muto cyane kuko n’umwanya uba ubaye muto ariko nyine iyo ibiruhuko bigeze ndawukora mwinshi.

Gusa ariko noneho ikindi kintu kingora hariya ni ukumvisha (Convince) abazungu ngo baze bajye mu ndirimbo zanjye igihe ndi gukora amashusho yazo. Ikindi kandi kugira ngo banyeganyege cyangwa se babyine biba bigoye cyane, ni ukuvuga ko Style yabo ari ukwigumira hamwe bakaririmba gusa”.

Uyu mupadiri akomeza avuga ko n’ubwo biba bigoye kumvisha umuzungu kuza mu ndirimbo ye ngo abyine, iyo abonye akanya gato abakoresha amahugurwa yo kubyina.

Yavuze ko bitewe n’umwanya muto afite, n’ibimukundira azava mu Rwanda ahakoreye indirimbo 3 afite zitararangira neza.

Padiri Jean François Uwimana, atangaza abantu batari bake bitewe n’imyitwarire ye, aho abantu benshi bibaza ku mupadiri uririmba injyana ya Rap, Reggae n’izindi nyinshi zitandukanye.

Urugero ni nk’indirimbo yakoranye n’umuraperi AmaG The Black yise “Umuriro” yavuzweho byinshi bitandukanye.

Padiri Uwimana avuga ko ataba yitaye ku bantu bamuvuga ndetse n’abihaye Imana bagerageza kumucira urubanza, ntabwo abaha umwanya.

Yabitangaje ubwo yaganiraga n’itangazamakuru i Kanombe 

Yari avuye mu Budage aje mu karuhuko gato

Reba indirimbo “Umuriro” ya Padiri Francois na AmaG The Black

“>

Reba ikiganiro Padiri Uwimana yagiranye n’itangazamakuru

“>

Ni indirimbo imaze guhembura imitima ya benshi, ikaba ikunzwe bikomeye ndetse magigo aya yamaze kuzuza miliyoni 10 z’abayirebye kuri Youtube mu mezi atatu gusa imazeho. Kimwe mu bishimisha cyane Papi Clever kuri iyi ndirimbo ni uko benshi bamaze kwakira agakiza kubera yo.

Ubwo iyi ndirimbo yuzuzaga uyu mubare ikaba indirimbo ya mbere ya Papi Clever na Dorcas irebwe kuri uru rwego, Papi Clever yandikanye amashimwe menshi kuri Instagram, ashimira cyane abakunzi babo baryohewe cyane n’iyi ndirimbo iri mu Giswahili. Ati “Murakoze cyane”. 

Mu kiganiro na inyaRwanda, Papi Clever yavuze ko iyi ndirimbo “Ameniweka Huru Kweli” bayiririmbye bayikuye mu gitabo cyitwa Nyimbo za wokovu ikaba ari numero ya 40. Ati “Kuva ntangiye kuyumva hari hashize imyaka irenga 13 nari nkiri umwana muto birumvikana”. 

Yakomeje asobanura uko inganzo y’iyi ndirimbo yabajemo, avuga ko “Nk’uko twaririmbaga indirimbo zo mu gitabo cy’ikinyarwanda ni na ko twashatse kuririmba iza Swahili ari bwo nayo twaje kuyigeraho turayikora nkuko dusanzwe dukora n’izindi”.

Yavuze ko batunguwe cyane no gukundwa kw’iyi ndirimbo kugeza ku rwego biriho ubu, ati “Byaradutunguye cyane kuko ntitwabikekaga noneho igakundwa cyane hanze y’u Rwanda. Ni ibintu tutigeze dutekereza mbere turi kuyikora”. 

Yunzemo at “Ikiri ku mutima wacu ni ibyishimo byinshi kandi dushimira Imana cyane ko dukomeje kubona ibohora imitima. Benshi bakiriye Yesu benshi basubijwemo imbaraga ku bwayo turabishimira Imana kandi tunashimira abantu badushyigikiye bakayireba kugeza ubu aho igeze”.

Tuyizere Pierre Claver wamamaye nka Papi Clever, yahishiye ko kwakirwa neza kw’iyi ndirimbo n’izindi zo mu rurimi rw’igiswahili “byaradufunguye cyane bituma dutekereza byagutse mu buryo bw’umuziki tugereranije n’ibihe byabanje aho twakoraga indirimbo twumva izaba iy’abanyarwanda gusa, ubu iyo tugiye gukora dutekereza byagutse kandi nyuma y’igiswahili turi gutegura n’izindi ndirimbo zo muzindi ndimi zitandukanye”.

Aba baramyi baramya Imana nk’itsinda ry’umugabo n’umugore, bari mu baramyi bafite igikundiro cyinshi mu Karere ndetse na Afrika dore ko indirimbo zabo zidasiba gukirwa kuri Televiziyo mpuzamahanga kuri shene ya Trace Music. Bakunzwe mu ndirimbo zirimo “Ameniweka Huru Kweli”, “Mwokozi Wetu”, “Roho Yangu Inaimba”, “Nilikwenda Mbali Sana” n’izindi.

Papi Clever na Dorcas barashima Imana ko benshi bari gukizwa kubera ibihangano byabo

Papi Clever na Dorcas batangiye kuririmbana nyuma yo gukora ubukwe

Indirimbo “Ameniweka Huru Kweli” yujuje Miliyoni 10 z’abayirebye

“Tujyane Mwami Live Concert” ni igitaramo kidasanzwe cyateguwe na K2 Conference & Event Management (Ksquare) isanzwe itegura inama n'ibindi. Kizabera mu Mujyi wa Kigali – Gisozi kuri Dove Hotel, tariki 24 Nzeri 2023, kiririmbemo abaramyi b’amazina akomeye mu gihugu. 

Ni ku nshuro ya mbere kibaye ariko abagiteguye bavuga ko kizajya kiba rimwe mu gihembwe, ni ukuvuga nyuma y'amezi atatu. Bavuga ko iki ari cyo gihe cyagenwe n'Imana ngo iri vugabutumwa ritangire. Ni igitaramo kidasanzwe bitewe n’ibihe bizakiranga, bidakunze kuba mu bindi bitaramo.

Umwe mu bari gutegura iki gitaramo, yabwiye inyaRwanda ko intego nyamukuru yacyo ari “ukongera kwibutsa abantu gusaba ngo bagendane nayo muri iki gihe cy'ubuhenebere aho abantu bakora gahunda zabo nyamara batabajije Imana kandi ariyo ifite imigambi yabo mu biganza”.

Yavuze ko bagiteguye bisunze umurongo wo mu gitabo cyo Kuva: 33:15-17 aho Mose yasabaga Imana ngo ijyane nabo mu rugendo barimo. Aragira ati “Kandi koko Imana yarabikoze, ariyo mpamvu twakise 'Tujyane Mwami Live concert”. 

Akomeza agira ati “Tukaba tubwira abantu n'abazitabira kongera gusaba Imana ikajyana nabo haba mu rugendo bagiyemo, mu bucuruzi, mu kazi, ku Ishuri aho ariho hose mbere y’uko bajya muri byo umuntu akabanza agasaba Imana kujyana nabo muri icyo gikorwa cyangwa urugendo ndetse n'ibindi”. 

Abazitabira iki gitaramo bazataramana na James na Daniella, True Promises, Danny Mutabazi na Musinga Joe. Ku bibaza impamvu ari bo batumiwe, abagiteguye basubije ko “nta kidasanzwe, ni uko ubwo aribo Imana yatoranyije. Gusa n'abandi tuzabatumira kuko kizajya kiba buri gihembwe”.

Akarusho k’iki gitaramo ni uko abazitabira bose, bazumva ijambo ry’Imana, ariko bakanasangira ibyubaka umubiri. Bati “Kutaza muri iki gitaramo ni igihombo kuko harimo ibidasanzwe nko kuba abantu bose bazitabira iki gitaramo bazasangira nk’uko byagendana mu itorero rya mbere”. 

“Bibiliya iravuga ngo basangiraga ibyabo, Imana ikarushaho kubongerera abakizwa. Ikindi bazahomba ibihe byiza byo kuramya no guhimbaza Imana ariko kdi n'Ijambo ry'Imana. Hazaba ubusabane budasanzwe”. Andi makuru arambuye kuri iki gitaramo azatangazwa mu minsi iri imbere.

Josh Ishimwe azaririmba muri iki gitaramo cyiswe “Tujyane Mwami Live Concert”

James na Daniella bamamaye mu ndirimbo “Mpa Amavuta” bategerejwe muri iki gitaramo kidasanzwe

Danny Mutabazi akomeje kwiyambazwa mu bitaramo binyuranye kandi bikomeye

True Promises yatumiwe kuririmba muri iki gitaramo kigiye kuba ku nshuro ya mbere

Igitaramo “Tujyane Mwami Live Concert” kizabera muri Dove Hotel kuwa 24.09.2023