Tag: featured

Abarebwa n’iri tangazo ni abanyeshuri biga mu mwaka wa mbere, uwa kabiri n’uwa kane w’amashuri yisumbuye n’amashuri y’imyuga n’ubumenyingiro (TVET) muri level 3 biga bacumbikirwa.

Ni muri urwo rwego Minisiteri y’Uburezi imenyesha ababyeyi n’abanyeshuri ko gahunda y’ingendo kuri abo banyeshuri ivuguruwe.

Uburyo bazasubira ku mashuri, ku wa Kane tariki ya 19 Ugushyingo 2020, hazagenda abanyeshuri biga mu bigo by’amashuri biri mu Turere twa Huye na Gisagara mu Ntara y’Amajyepfo , Gakenke mu Ntara y’Amajyaruguru, Ngororero na Nyabihu mu Ntara y’Iburengerazuba na Bugesera mu Ntara y’Iburasirazuba .

Ku wa Gatanu tariki ya 20 Ugushyingo 2020, hazagenda abanyeshuri biga mu bigo by’amashuri biri mu Turere twa Nyarugenge, Gasabo na Kicukiro mu Mujyi wa Kigali, Nyanza mu Ntara y’Amajyepfo, Musanze mu Ntara y’Amajyaruguru, Nyamasheke na Rusizi mu Ntara y’Iburengerazuba na Ngoma na Kirehe mu Ntara y’Iburasirazuba.

Ku wa Gatandatu tariki ya 21 Ugushyingo 2020, hazagenda abanyeshuri biga mu bigo by’amashuri biri mu Turere twa Ruhango, Nyamagabe na Nyaruguru mu Ntara y’Amajyepfo, Gicumbi na Rulindo mu Ntara y’Amajyaruguru, Karongi na Rutsiro mu Ntara y’Iburengerazuba, na Rwamagana na Kayonza mu Ntara y’Iburasirazuba.

Ku Cyumweru, tariki ya 22 Ugushyingo 2020, hazagenda abanyeshuri biga mu bigo by’amashuri biri mu Turere twa Muhanga na Kamonyi mu Ntara y’Amajyepfo, Burera mu Ntara y’Amajyaruguru, Rubavu mu Ntara y’Iburengerazuba na Gatsibo na Nyagatare mu Ntara y’Iburasirazuba .

Minisiteri y’Uburezi irasaba ababyei kubahiriza ingengabihe y’ingendo uko iteganyijwe, bohereza abana hakiri kare kugira ngo bagere ku mashuri yabo bitarenze saa kumi n’imwe z’umugoroba, kandi bambaye umwambaro w’ishuri.

MINEDUC kandi isaba ababyeyi guha abana babo amafaranga y’urugendo azabageza ku mashuri bigaho, kandi abashinzwe uburezi mu turere no mu mirenge bagakurikirana igikorwa cyo kwakira abanyeshuri aho abagenzi bategera imodoka, no gukurikirana uko bakirwa mu bigo bigamo.

Abanyeshuri bose barasabwa gukomeza kubahiriza amabwiriza ajyanye no kwirinda icyorezo cya COVID-19 mu gihe cy’ingendo no ku mashuri harimo kwambara neza agapfukamunwa.

MINEDUC yavuze ko mu rwego rwo korohereza abanyeshuri mu ngendo, abanyeshuri bahagurukira i Kigali n’abandi banyura i Kigali berekeza mu zindi ntara, bazafatira imodoka kuri Sitade i Nyamirambo zibajyana ku mashuri bigaho.

Koperative Girubuzima yatewe inkunga igura imashini icunda, ibisabo bakoreshaga n’amaboko babicikaho

Yabitangaje ku wa Gatanu tariki 06 Ugushyingo 2020, mu bikorwa byo kugaragaza no gusoza ibikorwa umushinga PASP wakoze mu Karere ka Nyagatare.

Umushinga wa PASP watangiye ibikorwa byawo mu Karere ka Nyagatare mu mwaka wa 2014.

Nkundanyirazo Elvis Blaise, umukozi w’uyu mushinga, avuga ko Minisiteri y’Ubuhinzi n’Ubworozi yawutekereje hagamijwe gufasha abahinzi n’aborozi gufata neza umusaruro, kuwongerera agaciro no kuwugeza ku isoko.

Ibikorwa byose by’uyu mushinga byatwaye amafaranga y’u Rwanda miliyari enye na miliyoni 270 mu gihe cy’imyaka itandatu.

Nkundanyirazo avuga ko abantu bashobora kumva ko ayo mafaranga ari make, ariko ngo impamvu ni uko yashowe mu bikorwa bijyanye no kubaka ndetse no kugura imashini zifata zikanongerera agaciro umusaruro.

Agira ati “Burya ibikorwa by’ubuhinzi bihenda ni kugura imbuto n’amafumbire, naho twe ni ukongerera agaciro umusaruro wabonetse mu buhinzi n’ubworozi, hubakwa ubuhunikiro, ibicuba, ibyuma bikonjesha amata n’ibindi. Ni yo mpamvu bamwe bumva harakoreshejwe amafaranga make”.

Rosette Cyarikora, ni umuyobozi wa koperative Girubuzima Matimba, y’abagore bongerera agaciro amata bagakuramo amavuta.

Avuga ko mbere bakoreshaga amaboko mu kubona amavuta, ndetse ngo bamwe batangira gucika intege kubera imvune. Nyuma ngo PASP yabateye inkunga bagura imashini icunda ku buryo batangiye kongera umusaruro.

Ati “Abagore ibisabo byari bimaze kubavuna ugasanga barasigana gucunda, ariko PASP yatuguriye imashini ifite ubushobozi bucunda litiro 60 z’amata mu minota 10 gusa. Urumva tugiye no kongera ishoramari tujye ducunda menshi ku munsi”.

Umunyamuryango wa koperative COHIKA y’abahinzi b’ibigori mu Murenge wa Karama, Twiringiyimana Jean Chrysostome, avuga ko mbere umusaruro wabo wangirikaga kubera kutagira ubuhunikiro.

Avuga ko PASP yabateye inkunga babasha kubaka ubuhunikiro buhunika toni ibihumbi bibiri, ndetse ngo banabatera inkunga babasha kwigurira imodoka itwara umusaruro wabo.

Agira ati “Umusaruro wacu waranyagirwaga ugasanga byaraboze kuko twari dufite ubuhunikiro buto bubika toni 70 gusa, ariko baduhaye miliyoni zisaga 60 twubaka ubuhunikiro bubika toni ibihumbi bibiri, umusaruro wacu ntucyangirika”.

Umuyobozi w’Akarere ka Nyagatare wungirije ushinzwe ubukungu Rurangwa Steven, ashimira Minisiteri y’Ubuhinzi n’Ubworozi yatekereje ku musaruro w’abaturage kuko mbere ngo wangirikaga cyane.

Avuga ko PASP yatumye umusaruro ufatwa neza ndetse wongererwa agaciro, ku buryo n’abahinzi n’aborozi basigaye bakora mu buryo bwa kinyamwuga.

Umusaruro w’ibigori ntucyangirika kuko amwe mu makoperative yubakiwe ubuhunikiro na hangari zo kwanikamo

Agira ati “Twari dufite icyuho mu gufata neza umusaruro, twarezaga ariko tukagira ikibazo gikomeye cyo guhunika no kwanika. PASP rero yadufashije gukemura icyo kibazo nubwo kitarangiye burundu ariko bafashije abahinzi n’aborozi”.

Mu bworozi, umushinga PASP wafashije amakusanyirizo y’amata atanu kubona umuriro w’amashanyarazi, ndetse hanubakwa amakusanyirizo mato y’amata 12, hatangwa ibucuba by’amata ku makusanyirizo y’amata 15 ndetse aborozi 125 bafashwa kubona imifuka 500 ihunika ubwatsi.

Naho mu buhinzi, imishinga 17 ijyanye n’uruhererekane rwo kongerera agaciro ibishyimbo n’ibigori iterwa inkunga n’umwe mu ruhererekane rwo kongerera agaciro imboga n’imbuto.

Mu Rwanda, ikoti rishyushye ariko ritaremereye ryagufasha mu gihe cy’ubukonje

Mu kumenya uko umuntu akwiye kwambara mu bihe by’ubukonje, Kigali Today yaganiriye na Rutayisire Noella, umucuruzi w’imyenda adufasha gusobanukirwa byinshi mu byo umuntu yagakwiye kwirinda.

Imyenda yoroshye ntabwo ari iy’ibihe bikonje

Rutayisire asobanura ko imyenda yoroshye atari iy’ibihe bikonje kuko ntawe irinda imbeho. Ati “Iriya ni imyenda yo kwamabara mu gihe cy’ubushyushye (impeshyi). Muri iki gihe umuntu aba akeneye imyenda imurinda imbeho. Unarebye si henshi wayibona”.

Inkweto zirimo ubwoya n’amakoti ashyuhirana cyane si ngombwa

Muri ibi bihe, si ngombwa kwambara inkweto zifite ubwoya mu Rwanda

Mu Rwanda harakonja ariko ntihagera aho urubura rumara igihe rugwa nko mu bihugu bwo mu Burayi. Aho ni ho bakenera kwambara ziriya nkweto zifitemo ubwoya cyangwa amakoti ashyuhirana cyane. Rutayisire avuga ko ibyiza ari ukwambara umupira w’imbeho usanzwe cyangwa se ikoti ritaremereye cyane ariko rifubika.

Inkweto zifunze ni ngombwa

Sandals kimwe n’izindi nkweto zose zifunguye si izo kwambara mu bukonje. Bitewe n’aho ugiye, Rutayisire avuga ko ibyiza ari ukwambara inkweto zifunze ibirenge mu kwirinda imbeho ariko zijyanye n’imyenda.

Amakoti adashyuhiranye ariko afubitse

Ikirere gishobora kuba kitagaragaramo imvura mu gitondo mu gihe ugiye kuva mu rugo ukibeshya ko ari ko biri bwirirwe. Biba byiza iyo wambaye ukarenzaho umwenda wo kwifubika utari buze gushyuha cyane, ariko nanone uri bukurinde mu gihe haje ubukonje.

Umuhanzi Edouce yemeza ko Producer Element yazanye umwihariko muri muzika y’u Rwanda

Prosucer Element ukorera muri Country Records, ni umwe mu batunganya umuziki kandi uri gukora indirimbo nyinshi kandi zikunzwe. Nta gihe kinini gishize atangiye gukora kuko yatangiye mu mpera za 2019, amenyakana muri 2020 ku ndirimbo ya Bruce Melody yakoze yitwa ‘Henzapu’.

Nyuma yaho abandi bahanzi bafite amazina akomeye batangiye kujya kumwishakira ngo bakorane, harimo nka The Ben, Uncle Austin, Emmy, Safi Madiba, Marina, Queen Cha. Si aba gusa kuko n’abakizamuka yarabakoreye kandi inyinshi muri zo zirakundwa.

Mu minsi ishize ni bwo umuhanzi LilG udaheruka gukora indirimbo ngo ikundwe, yikomye Producer Element, avuga ko akora indirimbo zisa, yewe ko nta mwihariko ugaragara mu ndirimbo ze.

Ibi yabivugiye kuri televiziyo ya Isango Star TV, ati “Niba uri kutwumva wiminjiremo agafu, kuko uri gukora ibintu bisa bidafite umwihariko”. Ibi byatumye abenshi bamutera utwatsi bavuga ko abikoze kugira ngo yongere avugwe kuko yazimye.

Producer Element

Umuhanzi Edouce Softman aganira na KT Radio, yashimye Element ku mwihariko yazanye. Ati “Gukorana na Element byari byiza kuko afite umwihariko/touche we utandukanye, utuma indirimbo akoze zikundwa. Ni ibintu byiza kuko byari bikenewe”.

Ibi Edouce yabivuze mu gihe yarimo amurika indirimbo ye nshya aherutse gushyira hanze yitwa ‘Nyaranja’, yakorewe na Producer Element.

Abayobozi bo muri Nyaruguru bereka abaturage igikombe bahawe cyo kuba aba mbere mu kwesa imihigo

Ibi abihera ngo ku mbaraga bashyize mu kwesa imihigo nk’abaturage, agira ati “Mu by’ukuri twari dusanzwe tuba aba nyuma, ariko dukurikije imbaraga twashyizemo, imbaraga abayobozi bashyizemo, ntabwo byadutunguye cyane kuko ibikorwa byacu ni byo byivugira. Byaragaragaraga rwose”!

Nk’umuyobozi w’Inama Njyanama yo mu Murenge wa Ruheru kandi, avuga ko mu bikorwa avuga bagezeho nk’abaturage bafatanyije n’ubuyobozi, harimo kuba barubakiye abatari bafite aho kuba, ahanini binyujijwe mu miganda.

Kuri we ngo igisigaye bazanashyiramo imbaraga ubutaha, ni ugukora ku buryo abantu bose basigara batuye mu nzu zubakishije amabati, zifite isuku, kuko ngo iz’amategura usanga zidasukuye uko bikwiye, bituma azigereranya na nyakatsi.

Abatuye muri Nyaruguru n’abahakorera na bo bishimiye igikombe

Ati “Uyu munsi turashaka ko buri wese atura mu ibati. Twagize amahirwe dufite umuriro mu mpande zinyuranye. Igisigaye ni ukuba ahantu heza, hasukuye”.

Kuba kuba aba mbere bitaratunguye abatuye mu Karere ka Nyaruguru bishimangirwa na Assoumpta Byukusenge, umunyamabanga nshingwabikorwa w’Umurenge wa Mata wanabaye uwa mbere mu kwesa imihigo muri Nyaruguru.

Agira ati “Murabizi ibikorwa igihugu cyacu gikora, umuturage ni we washyizwe ku isonga. Dukunda abaturage, bakatwibonamo, bigatuma dufatanya mu kwesa imihigo tunabifashijwemo n’abafatanyabikorwa”.

Aline Yvette Nirere, umunyamabanga nshingwabikorwa w’Umurenge wa Cyahinda wabaye uwa kabiri mu kwesa imihigo muri Nyaruguru, amwunganira avuga ko ibyo bashyize imbere byabahesheje amanota meza, ari ukwita ku baturage no kubazamurira imibereho myiza.

Agira ati “Icya mbere twakoze ni ugukemura ibibazo bibangamiye imibereho myiza y’abaturage cyane cyane hitabwa ku kubakira abatishoboye, ndetse no gukemura ibibazo by’abaturage by’ubutabera bituma bishima bakananyurwa. Icya kabiri ni ukubazamurira imibereho bashishikarizwa kwitabira mituweli ndetse no kubazamurira ubukungu cyane cyane hashingiwe ku buhinzi”.

Naho ku bijyanye n’icyakosowe cyatumaga Nyaruguru iza mu myanya ya nyuma, Umuyobozi w’Akarere ka Nyaruguru, François Habitegeko, avuga ko aho byapfiraga cyane ari ukudahuza kw’abayobozi, kandi ko byakemutse.

Abatarahuzaga ni uyu Meya Habitegeko hamwe n’uwari gitifu w’akarere ndetse na visi meya ushinzwe ubukungu. Aba bombi hashize igihe basezerewe.

Yungamo ati “N’iyo myanya ya nyuma twagiraga na yo navuga ko yadufashije. Yadufashije kwisubiramo, turicara turisuzuma tubona aho bipfira, ahongaho tuhakubita umwotso turavuga ngo ayo makosa atuma tutagera ku ntego tuyagabanye cyangwa se tunayakureho burundu”.

Umunyamabanga nshingwabokorwa w’umurenge wa Mata, Assoumpta Byukusenge, yashyikirijwe icyemezo cy’ishimwe cy’uko umurenge ayobora witwaye neza kurusha iyindi mu kwesa imihigo

Kuva uturere twatangira gukorera ku mihigo, ni ubwa mbere Akarere ka Nyaruguru kaje ku isonga y’utundi twose two mu Rwanda. Meya Habitegeko hamwe n’abo bafatanyije babigezeho habura amezi makeya ngo manda ye ya kabiri irangire. Ni ukuvuga ko umwaka utaha atazongera kwiyamamariza kuyobora Nyaruguru.

Ku kibazo cy’icyo abona uzamusimbura yazibandaho, agira ati “Turacyafite urugendo mu kuzamura imibereho myiza y’abaturage no kuzamura imyumvire yabo. Turacyafite urugendo mu kubagezaho ibikorwa remezo, turacyafite urugendo runini cyane mu gutanga serivise nziza abaturage bose bishimiye ibanyura”.

Asoza agira ati “Aho hose namusaba kuzahashyira imbaraga, kandi nkamusaba ko iyi ntambwe duteye itazasubira inyuma”.

Muri iyi video turakwereka uko abayobozi bakirwaga ku Ngoro y’Inteko Ishinga Amategeko, ahabereye umwiherero.

Video: Richard Kwizera

Uyu mukecuru ngo ashobora kumara iminsi ibiri atarya, atunzwe n’Amakera

Ayo mazi araboneka mu mariba atatu mu Murenge wa Muhoza, aho iriba rimwe riherereye mu Kagari ka Kigombe, mu gihe andi mariba abiri aboneka mu Kagari ka Cyabararika mu Murenge wa Muhoza mu Karere ka Musanze, aho abaturage bemeza ko ayo mazi ari yo buzima bwabo kuko abarinda indwara n’inzara.

Abo Kigali Today yasanze kuri ayo mariba bayanywa, mu gihe abandi bagiye bayavoma bakayacyura mu ngo zabo, baremeza ko rimwe na rimwe hari ubwo bibagirwa no kurya bakararira ayo mazi kandi ntibagire ikibazo cy’inzara, kuko ngo uwayanyoye ntaho aba ataniye n’uwariye.

Ayo mazi anyobwa n’ingeri zose z’abaturage baba abana bato, urubyiruko, abasore n’inkumi badasize abakecuri n’abasaza, gusa umubare munini w’abitabira kuyanywa ukaba ari uw’abageze mu za bukuru.

Urubyiruko ruri mu bakunda aya mazi

Bamvuganumva Sifa waganiriye na Kigali Today ubwo yari ku iriba ryo mu Kagari ka Cyabararika yaje kunywa ayo mazi, ati “Ntureba ko maze kuyanywa, reba inda uko ibaye, iyo niboneye aya mazi ntabyo kwikoza ibiryo, ubu maze kunywa ndahaze isaha n’isaha ndongera nze ninywere, iyo uhagera ku wa Gatatu cyangwa ku wa Gatandatu ngo urebe abazungu baba baje kuvoma aya mazi”.

Arongera ati “Ubuze umwana mu rugo amusanga kuri aya mazi, ni umuti wo mu nda, igifu n’izindi. N’inka ubwayo yarwaye mu nda mu mwanya wo kuyigurira igikukuri uyizanira aya mazi igahita ikira, umaze gusinda ugenda adandabirana araza yakubitaho igikombe inzoga zihita zimushiramo”.

Mugenzi we witwa Ntahorutaba Abel, ati “Amakera ni umutungo ukomeye dufite, ni amazi ava ikuzima ameze nka gaze, uyashyira mu kajerekani ugapfundikira mu mwanya wafungura agaturika nk’arimo gaze, urayanywa ugatura umubi nk’uwanyweye inzoga”.

Na we avuga ko hari abanyamahanga baza kuvomera ayo mazi bakayapakira mu modoka, ati “Abazungu n’abandi baturutse kure iyo za Rubavu, bahora hano baza kuvoma ayo mazi bakayapakira mu modoka”.

Iriba ry’Amakera ryo mu Kagari ka Kigombe

Nyirandinzwenimana Triphonie wari ku iriba ryo mu Kagari ka Kigombe, ati “Aya ni amazi y’umugisha, urabona mvuye ku isoko ariko iyi ndobo nari nitwaje ni iyo kuvomeramo amazi kugira ngo nyacyure kuko ntuye kure yayo”.

Abo baturage bavuga ko ayo mazi adatekeshwa, aho ngo uwabigerageje amafunguro yagiye gushya yamaze kuba umukara ari na cyo giteye impungenge kuri ayo mazi.

Nubwo abo baturage bakunze ayo mazi, iyo usuye ayo mariba ikigaragara ni umwanda ukabije urimo udusashe tw’ifu bakunze kwita supadipe bavanga muri ayo mazi mu rwego rwo kugira ngo arusheho kuryoha, dore ko abo baturage bavuka ko ari fanta y’ubuntu biboneye.

Ikindi giteye impungenge, ni ibikoresho usanga kuri ayo mariba abaturage bifashisha banywa ayo mazi, aho usanga byanduye cyane ku buryo byatera impungenge zo kuba byakwanduza indwara ziterwa n’umwanda, dore ko nta n’umuntu uhaba ushinzwe kurinda ayo mariba.

Ku mariba y’Amakera hagaragara umwanda

Hari n’abakoresha intoki iyo banywa ayo mazi, aho bayanywa bahagaze hejuru y’iriba amazi ava mu ntoki agasubira mu iriba, hakaba n’abitwaza udukoresho twabo twa pulasitike ugasanga badutizanya, ibyo bigatera impungenge ku buzima bwabo.

Mu kumenya ubuziranenge bw’ayo mazi y’Amakera, Kigali Today yegereye Murigo Jean Claude uhagarariye WASAC mu Karere ka Musanze, na we agaragaza impungenge ku buziranenge bw’ayo mazi.

Yagize ati “Ntabwo ndi umuhanga mu kumenya iby’ayo mazi y’Amakera, ariko kuba aba ahantu hadatunganyije ashobora guteza ibibazo, ashobora kuvura wenda ibintu bimwe ntabwo nzi iby’ubuvuzi bwa Kinyarwanda, ariko ashobora kubavura bike agateza ibibazo byinshi cyane byabatwara ubuzima”.

Arongera ati “Ibyo ni ibintu biba bikeneye laboratwari bagapima bakamenya ibyo abo baturage bavuga, kuko kureka abaturage bagashoka ahantu nk’aho bakanywa ayo mazi ndumva byateza ibibazo, numva twavugana n’Akarere tukareba ko ayo mazi yapimwa tukamenya ibyayo”.

Ku iriba rimwe rya Cyabararika, ni ahantu hubatswe ikimenyetso cy’amateka kigaragaza umwimerere w’iyo soko y’Amakera, aho abantu banyuranye bakomeje kuhakorera ubukerarugendo.

Mu Rwanda hasigaye ibigo 6 gusa bivurirwamo Covid-19

Ibyo byakozwe hagendewe ku mibare y’abandura icyo cyorezo yagabanutse cyane, kuko hashize igihe abandura buri munsi bari munsi ya 10.

Umuyobozi Mukuru wa RBC, Dr Nsanzimana Sabin, avuga ko uko umubare w’abarwayi ugenda ugabanuka hari n’ahandi hazafungwa.

Ati “Twari dufite ibigo bivura Covid-19 bigera kuri 27, uyu munsi hasigaye ibigo bitandatu gusa. Muri ibyo byafunzwe ibyinshi byari amavuriro na ho ibindi byari amashuri yari yarifashishijwe, ariko amashuri agiye gutangira ni bwo byafunzwe”.

Arongera ati “Ibigo nderabuzima byari byaratoranyijwe byo kuvuriramo Covid-19, ubu byongeye gutangira serivisi zabyo zo kuvura abaturage muri rusange. Izisigaye nkeya n’ubundi zirimo kuvura abarwaye Covid-19 zo zizakomeza ariko uko umubare w’abarwayi ugabanuka na zo zishobora kugabanuka, kimwe n’uko uburwayi bwongeye kwiyongera izo twari twafunze twakongera tukazisubukura”.

Kuba ibyo bigo bigenda bifungwa, uwo muyobozi avuga ko biterwa n’uko ubwandu bugenda bugabanuka, ariko kandi ngo binaterwa n’uko hari abarwayi benshi ba Covid-19 batarembye ndetse batanagaragaza ibimenyetso bari muri gahunda yo kuvurirwa mu ngo iwabo.

Dr Nsanzimana avuga ko kimwe mu byatumye icyorezo cya Covid-19 kigabanuka mu gihugu, harimo n’uko hari imirimo akenshi igenda ikorerwa ahantu hadafunganye.

Ati “Kimwe mu byatumye Covid-19 igabanuka nk’uko bigaragara mu bushakashatsi, ni uko imirimo ikorerwa hanze y’inzu ni ukuvuga ahantu hari umwuka uhagije yiyongereye. Ni na yo mpamvu ngira inama abantu bakoresha inama cyangwa izindi gahunda zihuza abantu benshi nko kwakira abanshyitsi, ko zakorerwa hanze inzu”.

Ati “Ni ikintu kirimo kudufasha, kandi ni na cyo twabonye gikoreshwa mu bihugu byateye imbere, cyane cyane iby’i Burayi nko muri iyi minsi hatangiye gukonja, abantu barasubira mu nzu bityo uburwayi bukiyongera. Ibyo natwe ni byo dutanga nk’ubutumwa, abantu ko bakongera imirimo ikorerwa hanze, bakaganirira hanze kuko ari byo bigabanya ikwirakwira rya Covid-19”.

Dr. Sabin Nsanzimana, Umuyobozi Mukuru wa RBC

Kugeza kuri wa 6 Ugushyingo 2020, mu Rwanda abakirwaye Covid-19 ni abantu 220, abayikira bakaba bakomeje kwiyongera kuko ubu bari ku kigero cya 95%, abamaze kwamdura icyo cyorezo bose bakaba 5,208 na ho abo kimaze guhitana ni 36.

Icyakora nubwo imibare y’abarwaye icyo cyorezo igenda igabanuka, abantu bagirwa inama yo kutadohoka ku mabwiriza yashyizweho yo kucyirinda, arimo gukaraba intoki kenshi n’isabune n’amazi meza cyangwa umuti usukura intoki, kwambara neza agapfukamunwa, guhana intera nibura ya metero, kwirinda gusuhuzanya bakoranaho n’ibindi.

Abo barwayi bashya 16 babonetse mu bipimo 1,333 bakaba barimo ababonetse i Kirehe:6, Nyagatare:6, Rubavu:2, Rusizi:2.

Kugeza kuri uyu wa Gatanu, mu Rwanda abamaze kwandura icyo cyorezo ni 5,208 muri bo abamaze gukira ni 4,953 naho abakivurwa ni 220.

Abamaze kwicwa na COVID-19 mu Rwanda bose hamwe ni 36.

Umuyobozi w’Akarere ka Muhanga, Kayitare Jacqueline, yabwiye Kigali Today ko abinjiye mu kirombe barimo n’umugore uhetse urwo ruhinja bagwiriwe n’ikirombe batanu bakahasiga ubuzima abandi babiri bakaba barokotse.

Kayitare avuga ko amakuru yamenye ari uko abapfuye bari baje gucukura amabuye y’agaciro mu buryo butemewe n’amategeko bazwi ku izina ry’abanyogosi, ariko ataramenya uko urwo ruhinja rwaba rwabajemo.

Hari andi makuru avuga ko abo bantu bari baje kuvoma amazi yo kuyunguruza umucanga bakuramo amabuye y’agaciro ikirombe kikaba cyaba cyabagwirije bacyugamyemo.

Iyi mpanuka ibaye ku mugoroba wo kuri uyu wa Gatanu tariki 06 Ugushyingo 2020 ikaba yabereye mu Kagari ka Nyamirama mu Murenge wa Muhanga mu Karere ka Muhanga. Imirambo y’abapfuye yajyanywe ku bitaro bya Kabgayi gukorerwa isuzuma.

Babiri bakomeretse na bo bahise bajya kwitabwaho n’abaganga, aba bakaba ari bo bitezweho gutanga amakuru y’impamo y’uko impanuka yagenze.