Blog

Ibi bitaramo byatangajwe na Institut Français du Rwanda kuri uyu wa Kabiri tariki 17 Ukuboza 2024. mu rwego rwo kugaragaza ibikorwa bafite umwaka utaha mu 2025, muri Mutarama, Gashyantare ndetse na Werurwe.

Ni ibitaramo bagaragaza ko bizatangira guhera tariki 17 Mutarama 2025, bigasozwa tariki 22 Werurwe 2025.

Bigaragara ko batumiye cyane abahanzi bubakiye umuziki wabo ku njyana ya Rap, Pop, abacuranzi ba Saxophone, ndetse n’abandi bakora umuziki gakondo hagamijwe kwinjiza abakunzi b’umuziki mu 2025.

Ibi bitaramo bizabimburirwa n’igitaramo cy’umucuranzi wa Saxophone Watersax n’inshuti ze, kizaba ku wa 17 Mutarama 2025, bikurikirwe n’igitaramo cya E.T. Ndahigwa kizaba ku wa 23 Mutarama 2025. 

Ni mu gihe Peace Jolis wamamaye cyane mu iserukiramuco ‘Mashariki’ azakora igitaramo tariki 30 Mutarama 2025.

Pastor P wagize uruhare cyane mu gutunganya indirimbo z’abahanzi benshi bakomeye mu Rwanda, agiye gutaramira abanya-Kigali nyuma y’igihe kinini, binyuze mu gitaramo azakora tariki 6 Gashyantare 2025.

Ni mu gihe Massamba Intore uzaba ukubutse mu Butaliyani, azataramira abakunzi be, ku wa 21 Gashyantare 2025.

Umuraperi Rapstars afatanyije na Skillz bo bazataramira abakunzi babo tariki 28 Gashyantare 2025.

Nirere Shanel wari umaze igihe kinini adataramira i Kigali, azongera kubataramira tariki 8 Werurwe 2024, ku Munsi Mpuzamahanga w’Umugore. Ni mu gihe umukirigitananga Deo Salvator ubarizwa muri iki gihe i Burayi, azataramira i Kigali, ku wa 14 Werurwe 2025, aho azaba ari kumwe n’inshuti ze.

Ibi bitaramo bizasozwa n’ibizaba ku wa 22 Werurwe 2025, bizaririmbamo Steve Bedi, umuhanga mu gucuranga Saxophone wo mu gihugu cya Ghana.

Pastor P ugiye gukora igitaramo cye bwite, niwe wakoze indirimbo nka 'Adi Top' ya Meddy, 'Habibi' ya The Ben, 'Indoro' ya Charly na Nina n'izindi zo mu bihe byashize nka 'Mu Gihirahiro' ya Jay Polly na Scillah, 'Sintuza' ya Urban Boys n'izindi. 

Aherutse kwinjira mu muziki, ndetse yahisemo gukoresha izina rya Kagurano Rwimo. Muri Gicurasi 2023, yatangaje isohoka rya Album ye yise 'Ruticumugambi' igizwe n'indirimbo 10 zirimo nka nka 'Kabanyana k'Abakobwa'', 'Rubanda rugira ayabo', 'Wiriweho mwali'', 'Ibare', 'Agashinge', 'Yewe Roza' na 'Amashyo Rugamba'.

Pastor P uherutse gushyira ku isoko Album ya gakondo, yatangaje ko mu 2025 azakorera igitaramo kuri Institut Français du Rwanda

Nyuma y'igihe kinini, Nirere Shanel agiye kongera gutaramira i Kigali 

Massamba Intore ataramira abakunzi be Institut Français du Rwanda avuye mu bitaramo mu Butaliyani

Hatangajwe ibitaramo by'abahanzi icyenda bizaba hagati ya Mutarama na Werurwe 2025

REBA HANO UREBE AMASHUSHO Y’INDIRIMBO ‘ATURA’ YA NIRERE SHANEL

“>
KANDA HANO UBASHE KUMVA ALBUM YA PASTOR P

“>

Hari umuhanzi wigeze gutuka urupfu ngo 'ruragapfa, rupfakare', icyakora yari amaburakindi kuko na we arabizi ko ariyo nzira ya twese, gupfa si igitangaza, nubwo ari bibi.

Mu Rwanda uyu ni umwaka utazibagirana mu mitima ya benshi cyane ko aribwo abarimo Nyiransengiyumva Valentine [Dorimbogo] wasetsaga benshi, Pastor Ezra Mpyisi wakundwaga cyane, Anne Mbonimpa wari umukozi muri FERWAFA n'abandi.

Umwaka wa 2024 uri kugana ku musozo, nubwo wagize itandukaniro ry'agahenge ugereranyije n'imyaka yabanje nka 2020, 2021 na 2022 yabaye iy'icyorezo cya Covid-19, urupfu rwo ntirwabaniye Abanyarwanda.

Ni umwaka watwaye benshi mu bo twakundaga, uhereye mu ngeri zose z'ubuzima: Abanyapolitiki, abahanzi, abakinnyi, abacuruzi, abahinzi n'abandi.

Muri iyi nkuru, turagaruka ku byamamare twabuze mu 2024.

1.     Dorimbogo

Nyiransengiyumva Valentine wamenyekanye nka Dorimbogo, yitabye Imana ku wa 27 Nyakanga 2024 aguye mu Bitaro bya Kibuye. Uyu mukobwa yitabye Imana nyuma yo kugera ku bitaro abaganga bakagerageza kumuha ubufasha bw'ibanze ariko bikananirana.

Amakuru InyaRwanda yabonye ni uko nyakwigendera yari amaze igihe arwaye indwara zifata imyanya y'ubuhumekero. Yari amaze iminsi arwariye mu Bitaro bya Kibogora i Nyamasheke, ahava bamuhaye 'Transfer' yo kujya kwivuriza mu Bitaro bya Kibuye.

Ubwo yari mu bitaro bya Kibogora, hari amajwi ya Nyiransengiyumva yagiye hanze avuga ko yabanje kwivuriza mu Mujyi wa Kigali ariko akabona bihenze cyane, biba ngombwa ko asubira mu rugo i Nyamasheke kuhivuriza.

Icyo gihe yagize ati 'Nintagaruka i Kigali muzansabire imbabazi abo nahemukiye, kandi nintagaruka muzansezere neza.'

Nyiransengiyumva yiswe 'Dore Imbogo' biturutse ku ndirimbo yaririmbye aho inyikirizo yayo avugamo ati “Dore imbogo, dore impala, dore imvubu….'. Yamenyekanye cyane kubera ibiganiro yakundaga gutanga kuri shene za YouTube zitandukanye.

2.     Pastor Ezra Mpyisi

Umukambwe Pastor Ezra Mpyisi wakunzwe na benshi kubera amagambo ye y’ubwenge, yatabarutse ku myaka 102.

Pastor Ezra Mpyisi yatabarutse mu minota micye ishize ku wa Gatandatu tariki 27 Mutarama 2024. “Aratabarutse pe. Mu kanya gashize”. Ni amagambo InyaRwanda yatangarijwe n’inshuti y’umuryango wa Pastor Ezra Mpyisi wakoreye Imana mu mbaraga ze zose kuva mu busore bwe kugeza ku munsi we wa nyuma.

Pastor Mpyisi yabonye izuba ku ngoma ya Musinga ku itariki ya 19 Gashyantare mu 1922, akaba yaburaga iminsi 23 gusa akuzuza imyaka 102. Yavukiye hafi y’ i Nyanza, i Bwami ku marembo y’u Rwanda. Yakoreraga umurimo w’Imana mu Itorero ry’Abadivantiste b’Umunsi wa Karindwi.

Ni byinshi azibukirwaho birimo kuba ari mu bashyize Bibiliya mu rurimi rw’Ikinyarwanda, kuba yarabaye Umujyanama w’Umwami Mutara III Rudahigwa, kuba ari we Mudivantise wa mbere wabonye ‘License’, kunyomoza abavuga ko nta muntu urenza imyaka 100, n’ibindi. Yari inzu y’ibitabo n’umugishwanama ukomeye.

3.     Cherissa Tona

Uwanjye Cherissa Tona wari umwe mu baririmbyi b'inkingi ya mwamba mu itsinda rya Healing Worship Ministry akaba n'umuvandimwe wa Umunyana Shanitah wegukanye ikamba rya Miss East Africa 2021, yitabye Imana ku wa 3 Ugushyingo 2024, afite imyaka 23 y'amavuko.

InyaRwanda yabonye amakuru avuga ko ku wa Gatanu tariki 1 Ugushyingo 2024, Cherissa yizihije isabukuru y’amavuko, hanyuma inshuti ze zikomeza kumufasha kuyizihiza kugeza kuri iki Cyumweru tariki 3 Ugushyingo 2024 ari nabwo yasohokanaga n’inshuti ze.

Ubwo yari kumwe n’inshuti ze yakomezaga kuzibwira ko ashaka kujya kwifatanya na Korali, mu gihe yiteguraga kugenda abanza kunyura mu bwiherero. Ariko, inshuti ze zakomeje kubona ko yatinze, zitangira kwibaza uko byagenze, bagiyeyo basanga niho yaguye.

4.     Amb. Mukaruliza Monique 

Ambasaderi Mukaruliza Monique wabaye mu nzego zitandukanye nkuru z'igihugu, yitabye Imana azize uburwayi. Yaguye i Bruxelles mu Bubiligi aho yari amaze iminsi arwariye.

Mu ntangiriro za Werurwe, Perezida Kagame yari yamuhaye inshingano zo kuba Ambasaderi (Ambassador at large) ushinzwe gahunda zo kwihuza kw'Akarere muri Minisiteri y'Ububanyi n'Amahanga. Yari asanzwe akora muri Minisiteri y'Ububanyi n'Amahanga ari Umujyanama.

Ni we wabaye Minisitiri wa Mbere w'u Rwanda mu Muryango wa Afurika y'Ibihugu by'Iburasirazuba, EAC. Izo nshingano yazikoze guhera mu 2008 kugera ku wa 25 Gashyantare 2013.

Mukaruliza yabaye Umuyobozi w'Umujyi wa Kigali hagati ya 2016 na 2017. Yanabaye Ambasaderi w'u Rwanda muri Zambia no muri Malawi ubwo yari avuye ku nshingano zo kuyobora Umujyi wa Kigali.

Kuva mu 2006 kugeza mu 2007 yari ahagarariye by'agateganyo Umuryango wa Afurika Yunze Ubumwe muri Sudani. Mbere y'aho yabaye umuyobozi wungirije ushinzwe ubutumwa bwa Afurika Yunze Ubumwe muri Sudani kuva mu 2004 kugeza mu 2006.

Yari afite ubunararibonye mu bucungamari n'ibijyanye na yo, dore ko ari no mu bafashishije gushyiraho Ikigo cy'Igihugu cy'Imisoro (Rwanda Revenue Authority) yanabereye Komiseri w'imbere mu kigo ushinzwe ubugenzuzi bw'imari nyuma aba komiseri ushinzwe imisoro y'imbere.

Mukaruliza kandi yanabaye mu buyobozi bwa Banki ya Kigali aho yakoze nk'umugenzuzi w'imari, nyuma aba umuyobozi mukuru w'imari mu kigo cy'impfubyi, Village d'Enfants SOS Kinderdolf International-Rwanda.

5.     Anne Mbonimpa

Anne Mbonimpa wari umukozi muri Komisiyo Ishinzwe Iterambere ry'Umupira w'Amaguru w'Abagore mu Ishyirahamwe ry'Umupira w'Amaguru mu Rwanda, FERWAFA, akaba yaranakiniye amakipe atandukanye, yitabye Imana ku gicamunsi cyo kuwa Gatandatu taliki ya 9 Ugushyingo 2024. Amakuru avuga ko Mbonimpa Anne yapfuye urupfu rutunguranye kuko atari arwaye.

Usibye kuba Anne Mbonimpa yari umukozi wa FERWAFA mu bijyanye no guteza imbere umupira w’amaguru w’Abagore ahubwo yanakinnye mu makipe atandukanye ndetse aba n’umutoza.

Yakiniye amakipe arimo Bugesera WFC, Ruhango WFC na GS Remera Rukoma. Mu mwaka ushize, yari umwe mu batozaga APR WFC bayifasha kuzamuka mu Cyiciro cya Mbere.

6.     Martin Mateso

Umunyamakuru Martin Mateso wakoreraga umwuga mu Bufaransa, yitabye Imana afite imyaka 70.

Mateso wakoreye ibinyamakuru birimo Radio Rwanda, Televiziyo Rwanda na TV5 Monde, bivugwa ko yitabye Imana tariki 20 Ukwakira 2024 ubwo yari yaje mu Rwanda, azize indwara y'umutima.

Radiyo Ijwi rya Amerika yatangaje ko Mateso yari yaje mu Rwanda kwizihiza isabukuru ye y'imyaka 70. Martin Mateso yari atuye mu Bufaransa aho yageze muri Mata 1994.

Ntamuhanga Ningi Emmanuel wakoranye na Mateso, yigeze kuvuga ko Mateso yakundwaga cyane kuri Radio Rwanda kubera uburyo yavugaga neza Igifaransa.

Ni umwe mu bakoze umwuga w'itangazamakuru ari n'umuhanzi, aho azwi ku ndirimbo zakunzwe zirimo 'Bibiyana', 'Amagorwa yo mu rugo', n'izindi.

7.     Dr Adel Zrane

Uwari umutoza wongerera imbaraga abakinnyi ba APR FC, Umunya- Tunisia Dr Adel Zrane, yitabye Imana aguye mu rugo iwe ku wa Kabiri tariki ya 2 Mata 2024.

Amakuru InyaRwanda ifite ni uko uyu mutoza yitabye Imana ubwo yari mu rugo iwe aho abakinnyi na 'staff' babibwiwe ubwo berekezaga mu myitozo ku wa Kabiri bagahita basubira iwabo.

Mu 2018-19, Dr Zrane yatwaranye na Simba SC Igikombe cya Shampiyona na Community Shield ari kumwe n'Umutoza mukuru w'Umubiligi, Patrick Aussems.

Mu mwaka wakurikiyeho wa 2019-20, yatwaye ibikombe bitatu birimo icya Shampiyona, Igikombe cy'Igihugu na Community Shield ari kumwe n'Umubiligi Sven Vandenbroeck.

Uyu mutoza yakoranye kandi n'Umufaransa Didier Gomez Da Rosa mu 2020-21, atwarana nawe ibikombe bitatu birimo icya shampiyona, icy'Igihugu na Community Shield.

Yatoje mu yandi makipe nka Etoile Sportif du Sahel y'iwabo muri Tunisia, Al Ain yo muri Arabie Saudite, Al-Wehdat Sportif Club yo muri Jordanie n'Ikipe y'Igihugu ya Mauritania yitabiriye Igikombe cya Afurika cya 2022 muri Cameroun.

8. Mungo Jitiada 'Vigoureux' 

Umutoza Mungo Jitiada, wamenyekanye cyane nka 'Vigoureux', uzwiho kuzamura abakiri bato mu mupira w'amaguru, yitabye Imana nyuma y'uburwayi yari amaranye igihe kinini.

Mu mwaka ushize wa 2023 ni bwo amakuru yamenyekanye ko uyu mutoza afite uburwayi bwo kubura amaraso na hépatite C kugeza ubwo kuva mu nzu byabaye ikibazo gikomeye.

Ubu burwayi bwagendaga buhinduka kuko rimwe na rimwe akaguru kamwe kagiraga 'paralysie', ikindi gihe kakabyimba. Nk'abandi barwaye bose ngo iyo yabonaga abamusura bakamuganiriza yasaga n'ugaruye agatege ariko nyuma bikongera bigasubira irudubi.

Inkuru y'incamugongo yamenyekanye mu gitondo cyo ku wa Kane, tariki ya 12 Nzeri 2024, ko uyu mugabo yamaze kwitaba Imana.

Vigoureux ni umwe mu batoza bakomeye mu Karere ka Rubavu, wari uzwiho kuzamura abakinnyi bakiri bato bakavamo abakomeye. Yakiniye Etincelles FC igishingwa mu 1980. 

Mu Rwanda hari amazina y'abakinnyi bakomeye bamunyuze mu biganza nka Niyonzima Haruna, Tuyisenge Jacques, Bizimana Djihad, Hakizimana Muhadjiri, Nizeyimana Mirafa n'abandi benshi.

9. Mukonya

Myugariro wa AS Kigali, Ahoyikuye Jean Paul uzwi nka Mukonya yitabye Imana nyuma yo kugwa mu kibuga agonganye n'umunyezamu akamira ururimi.

Ni inkuru yamenyekanye ku gicamunsi cyo ku wa Gatandatu, tariki 6 Nyakanga 2024.

Amakuru avuga ko uyu mukinnyi yakinaga umupira bisanzwe i Mageragere agongana n'umunyezamu amira ururimi bagerageza kurugarura ariko biranga birangira yitabye Imana. Yahise yihutanwa CHUK ari naho yaje gushiriramo umwuka.

Mukonya yakinaga muri AS Kigali yagiyemo avuye muri Kiyovu Sports nubwo shampiyona ishize atabonye umwanya uhagije wo gukina.

  

Platini ari muri kiriya gihugu kuva ku wa 10 Ukuboza 2024, mu ruhererekane rw'ibitaramo ateganya kuhakorera yise 'Baba Experience.' Ni ibitaramo yatangirije mu Rwanda muri Gicurasi 2024, yifuza kubigeza no mu bihugu byo ku Isi.

Mu bijyanye no kubitegura ari gufashwa na Sosiyete ya The Mane Hub Entertainment y'umushoramari Mupenda Ramadhan wamamaye nka Bad Rama. Byatangiriye muri Arizona, ku wa 14 Ukuboza 2024, aho yataramiye muri imwe muri 'Club' ikomeye muri uriya mujyi.

Bad Rama yabwiye InyaRwanda ko iki gitaramo cyamufashe igihe mu bijyanye no kugitegura no kugishyira mu bikorwa, kandi 'Twabonye urukundo rwinshi, dufasha abahanzi bakizamuka kubona urubuga, no gushyira mu bikorwa inzozi zazo.'

Akomeza agira ati 'Byari byiza, n'abahanzi bakuru bari bahari. Ni ubwa mbere abantu bari babonye igitaramo kinini, bakabona abantu bari muri Amerika n'abavuye mu Rwanda bahuje urugwiro mu gitaramo kimwe.'

Yavuze ko muri iki gitaramo bahaye umwanya umuhanzi Shaffy amurikira abacyitabiriye indirimbo ye nshya yise 'Jumbe' aherutse gushyira ku isoko ndetse 'Twataramanye na Scillah hamwe na Emmy'.

Bad Rama yavuze ko mu bandi bantu bashyigikiye Platini muri iki gitaramo harimo n'umuhanzikazi Charly wo mu itsinda rya Charly&Nina.

Ati 'Navuga ko byagenze neza. Platini yaririmbye mu gihe cy'isaha imwe abantu banze ko agenda, mbese ava ku rubyiniro. Urabizi indirimbo afite n'amateka menshi aba afite. Harimo abakuru n'abana.

Abakuru bagasaba ko abaririmbira indirimbo nka 'Magorwa' za Dream Boys, abakiri bato bati urataririmbira 'Jeje', urumva ko byari byiza.'

Yavuze ko nyuma y'iki gitaramo, habaye na 'After Party' mu rwego rwo gufasha abakunzi ba Platini P gukomeza gusabana nawe. Ati 'Navuga ko ibintu byose byari bimeze neza cyane. Ndashimira abantu bose batangiranye nawe urugendo.'

Nyuma y’iki gitaramo, Platini ategerejwe mu gitaramo kizabera mu Mujyi wa Michigana ku wa 28 Ukuboza 20224. 

Ubwo yateguzaga iki gitaramo, uyu muhanzi yanagaragaje ko afite indirimbo nshya yise ‘2009’ ikubiyemo urugendo rw’umuziki we kuva ari kumwe na mugenzi we TMC muri Dream Boys, kugeza ubwo batandukanaga buri umwe agatangira gukora umuziki nk’umuhanzi wigenga. 

Platini yongeye gutaramira mu Mujyi wa Arizona binyuze mu ruhererekane rw’ibitaramo ‘Baba Experience’ yateguye 

Bad Rama [Uri iburyo] ari kumwe na Dj wacurangiye Platini muri iki gitaramo cyabanjirije ibindi azakorera hirya no hino muri Amerika 

Iki gitaramo cy’umuziki kitabiriwe n’abantu banyuranye, biganjemo urubyiruko n’abandi 

Platini yagaragaje ko nyuma y’iki gitaramo azataramira mu Mujyi wa Michigan

Platini yaririmbye yitaye cyane ku ndirimbo za Dream Boys kuva mu 2009, kugeza ku ndirimbo ze bwite yakoze nk’umuhanzi wigenga

Umuhanzi Shaffy ari kumwe na Emmy bafashije Platini gususurutsa abantu muri ibi bitaramo yateguye bizaba mu mpera z’uyu mwaka

Bad Rama yasobanuye ko iyi ‘Club’ Platini yataramiyemo, iri mu za mbere zikomeye muri Arizona

Iyi gahunda yatangiye mu 2019, nyuma y'uko u Rwanda rusinye n'u Burusiya amasezerano yo kubaka Ikigo cy'Ubushakashatsi ku ikoreshwa ry'ingufu za nucléaire.

Nyuma y'ibiganiro na Minisitiri w'Intebe Dr. Edouard Ngirente kuri uyu wa 17 Ukuboza 2024, bamwereka ibiri gukorwa ngo u Rwanda rube icyitegererezo mu kubyaza umusaruro ingufu za nucléaire muri Afurika, Minisitiri Dr. Gasore yabwiye itangazamakuru ko byifuzwa ko mu myaka 10 iri imbere hazaba hari uruganda rw'amashanyarazi akomoka kuri izi ngufu.

Yagaragaje ko inganda zibereye u Rwanda ari into [small modular reactors], harimo izikiri mu bushakashatsi n'izamaze kugera ku isoko ziri gucuruzwa.

Dr. Gasore yashimangiye ko hakiri gutegurwa iby'ibanze nk'amategeko n'amabwiriza ajyanye n'ibisabwa mpuzamahanga ariko hari n'Abanyarwanda bamaze kujya kubyigishwa.

Ati 'Mu rwego rwo kubaka ubushobozi mu byerekeye abakozi twatangiye mu 2019 ndetse kugeza ubu tumaze guhugura Abanyarwanda barenga 300 harimo n'abarangije amasomo. Twabohereje mu bihugu bitandukanye birimo u Burusiya, mu Burayi na Amerika bagiye kwiga by'umwihariko ibyerekeye ingufu za nucléaire kuko ni rwego rukenera ubumenyi n'ubuhanga buhanitse.'

U Rwanda kandi rwubatse imikoranire n'ibihugu bitandukanye byamaze gutangiza iyi gahunda ku buryo byarusangiza ubunararibonye muri uru rwego.

Afurika y'Epfo na Misiri ni bimwe mu bihugu bya Afurika byakoresheje ingufu za nucléaire kuva mu myaka yashize.

Afurika y'Epfo itunganya amashanyarazi akomoka ku ngufu za nucléaire angana na gigawatt 8.154 mu isaha (GWh), Koreya y'Epfo itunganya 171.640 GWh, na ho Amerika itunganya 779.186 GWh kandi izi ngufu ziri mu byabafashije kwihuta mu iterambere.

Minisitiri Dr. Gasore yagaragaje ko u Rwanda rutari rwatangira kubaka inganda zizatunganya amashanyarazi akomoka ku ngufu za nucléaire ariko hari ibyakozwe.

Ati 'Ntabwo twari twatangira imirimo yo kubaka, turacyatunganya iby'ibanze bikenewe nk'inyigo no gushyiraho amabwiriza ngengamikorere. Uru ni urwego rugira amabwiriza akomeye rero ugomba gushyiraho amategeko agenga izi ngufu, uko wakwirinda impanuka, gushyiraho ibigo, ni urugendo rurerure twatangiye kandi turi gufatanya n'abafatanyabikorwa by'umwihariko Urwego Mpuzamahanga rushinzwe Ingufu za nucléaire n'Urwego rw'Amerika rushinzwe ingufu za nucléaire.'

Ingufu za Nucléaire zishobora kwifashishwa mu bintu byinshi nko mu gutanga amashanyarazi, mu buvuzi cyane ubw'indwara zikomeye nka kanseri kuko imirasire yazo ari yo yifashishwa mu kuyishiririza, mu bijyanye n'umutekano kuko nko mu byuma bisaka ari zo zikoreshwa cyangwa se mu gukora intwaro.

Kugira ngo ingufu za nucléaire zitange amashanyarazi, hakoreshwa ubutare bwa Uranium. Ni ubutare ubusanzwe bunakoreshwa mu ikorwa ry'intwaro za kirimbuzi ari na yo mpamvu ahanini iyo umuntu yumvise ingufu za nucléaire abanza gutekereza ko zaba zigamije gukora intwaro.

Minisitiri Dr. Jimmy Gasore yagaragaje ko Abanyarwanda barenga 300 bamaze guhugurwa mu mikorere y’ingufu za nucléaire

Yabigarutseho mu muhango wo gufungura Ishuri ry'Ishami rya Loni ryita ku Buzima, OMS, ryafunguwe mu Bufaransa kuri uyu wa 17 Ukuboza 2024.

Ni ishuri ryashinzwe hagamijwe gufasha ibihugu binyamuryango bya Loni kuziba ibyuho bitandukanye biri mu nzego z'ubuzima, cyane cyane mu guteza imbere gahunda zo guhugura abakora kwa muganga hisunzwe ikoranabuhanga rigezweho.

Perezida Macron yagaragaje ko abantu bahawe ubumenyi ku buvuzi ariko inzego z'ubuvuzi bw'ibanze zitahawe umurongo mwiza ntacyo byatanga.

Ati 'Wahugura, ukongera ugahugura [abantu] ariko mu gihe imikorere y'inzego z'ubuvuzi bw'ibwanze ijegajega, zaribagiranye bizagorana guhangana n'indwara z'ibyorezo zituguranye. Mwarabibonye mu gihe cya COVID-19, ndashaka kongera kubereka akamaro kabyo kandi nkabibutsa ko biri mu ntego z'ibanze muri politike yacu.'

Yagaragaje ko u Rwanda rwafashe umwanya wo gukora ishoramari ry'igihe kirekire mu kunoza ubuvuzi kandi byatanze umusaruro.

Ati 'Urugero, u Rwanda ruyobowe na Paul Kagame rurabigaragaza. Rwakoze ishoramari ry'igihe kirambye hagamijwe kuvugurura no gukomeza inzego z'ubuvuzi bw'ibanze none biragaragara uko bigenda iyo bigeze ku gukingira abantu benshi icyarimwe, ubona akamaro k'ishoramari nk'iri.'

Mu minsi mike ishize kandi u Rwanda rwahanganye n'icyorezo cya Marburg mu mezi abiri gicika intege, kitabashije gusohoka mu gihugu.

Kugeza ubu mu Rwanda hari abajyama b'ubuzima barenga bihumbi 58 bashobora kuvura indwara zitandukanye abana n'abakuru, no gukurikirana ubuzima bw'umubyeyi utwite kugeza igihe agiye kubyara.

Hari kandi amavuriro y'ibanze azwi nka Health Post 1252, ibigo nderabuzima birenga 513 hirya no hino mu gihugu bitanga ubuvuzi ku bantu bashobora kuvurwa bataha cyangwa bacumbikirwa iminsi mike, mu gihe ibitaro bitanga ubuvuzi bwisumbuye burimo no kubaga birenga byo ku rwego rw'akarere ni 40, ibyo ku rwego rw'igihugu bikaba 52.

U Rwanda kandi rwiyemeje ko kugeza mu 2028 abaganga bazaba bamaze kwikuba kane hagamijwe kunoza ubuvuzi buhabwa abaturage.

Lors de l’inauguration du Campus de l’OMS à #Lyon, le Président @EmmanuelMacron a souligné l’importance de la santé primaire, citant le modèle exemplaire du #Rwanda sous le leadership du Président @PaulKagame : un investissement dans la durée pour consolider un système de santé… pic.twitter.com/oolo4rSwia

— François Nkulikiyimfura (@FNimfura) December 17, 2024

Perezida Emmanuel Macron yatanze urugero ku Rwanda rwashoye imari mu guteza imbere ubuvuzi bukaba bumaze kuba icyitegererezo mu guhangana n’ibyorezo

Ahagana saa 16h00 z'umugoroba z'iyi tariki 14 Ukuboza 2024, Minisitiri w'Ububanyi n'Amahanga w'u Rwanda, Olivier Nduhungirehe uwa RDC, Thérèse Kayikwamba Wagner na mugenzi wabo wa Angola nk'umuhuza, Tete António, binjiye mu cyumba cy'inama.

Ni inama yari ikomeye kuko yari igamije gushyira ku murongo ibigomba kuba bikubiye mu masezerano kugira ngo abakuru b'ibihugu bagere i Luanda, bayashyiraho umukono gusa.

Mu buryo bwihuse impande zombi zemeranyije ku ngingo zari zaraganiriyeho mbere zirimo uburyo bwo gusenya FDLR, no gukuraho ubwirinzi bw'u Rwanda, ariko bigeze hagati ibintu bisubira irudubi.

Iyi nama ya ba Minisitiri b'ububanyi n'amahanga b'u Rwanda, RDC na Angola yateranye habura umunsi umwe ngo Perezida Kagame na mugenzi we wa RDC, Felix Tshisekedi bahurire i Luanda, mu muhango wo gushyira umukono ku masezerano yari yitezweho guhosha umwuka mubi umaze igihe hagati y'impande zombi.

Ubwumvikane buke hagati y'intumwa za RDC n'u Rwanda bwavutse ubwo hari hagezweho ingingo ya M23, RDC irahira yivuye inyuma ko idashobora kuganira n'uyu mutwe kandi mbere yari yabyemeye.

Amakuru yizewe IGIHE ifite ni uko uruhande rw'u Rwanda ndetse na Angola yari muri iyi nama nk'umuhuza baguye mu kantu, bitewe n'uku kwisubiraho gutunguranye kwa RDC.

Ni impaka zamaze hafi amasaha icyenda, kuko byageze saa Saba z'Igicuku impande zombi zikiganira ariko biranga biba iby'ubusa.

Nyuma yo kubona ko ibi biganiro nta musaruro bitanze, intumwa z'u Rwanda zamenyesheje Umukuru w'Igihugu uko byagenze, hafatwa umwanzuro wo gusubika urugendo.

Uyu mwanzuro wafashwe kuko nta kindi abakuru b'ibihugu bari kuba bagiye gukora i Luanda, uretse gushyira umukono kuri aya masezerano, atari agishoboye gusinywa.

Intumwa za RDC na zo zamenyesheje Félix Antoine Tshisekedi uko byagenze, ndetse yerurirwa ko nta masezerano ari businywe kuko atumvikanyweho nk'uko biherutse kwemezwa na Kayikwamba.

Bitunguranye, ku Cyumweru tariki 15 Ukuboza, Tshisekedi we yahisemo gufata urugendo rujya Angola, ibintu benshi mu bakurikiranira hafi politiki y'Akarere bemeza ko byari bigamije kuza kwegeka ibibazo byose ku Rwanda, kandi koko ntibyatinze kuko RDC yatangiye kuvuga ko kutitabira kwa Perezida Kagame bigaragaza ubushake buke bw'u Rwanda mu gukemura ikibazo.

Ibiro bya Tshisekedi na Guverinoma ya RDC byasohoye amatangazo, bigerageza kwerekana ko yamenye ko atagihuye na Kagame ubwo yari yamaze kugera i Luanda, ariko ibi nta kuri kurimo.

RDC yahwitse amahanga?

Mu butumwa RDC yashyize hanze, yavuze ko itemeye ibikubiye mu masezerano, kuko intumwa zayo zageze i Luanda, u Rwanda ruhita ruzana ingingo y'uko iki gihugu kigomba kuganira na M23.

Minisitiri Kayikwamba yavuze ko badashobora kuganira na M23 kuko ari umutwe w'iterabwoba.

Ati 'Ntabwo tuzaganira n'umutwe w'iterabwoba nka M23. RDC yavuye kure. Byageze aho igihugu kiganira n'imitwe yifashisha urugomo n'imbaraga mu kubona umwanya muri politiki, kugira ngo igire ijambo muri politiki cyangwa igere ku mitungo, [ariko ubu] iyi paji yarafunzwe. Ni yo mpamvu bidakwiye.'

Uruhande rw'u Rwanda rwagaragaje ko ibivugwa na RDC ari ikinyoma cyambaye ubusa, kuko ibijyanye no kuganira na M23 iki gihugu cyari gisanzwe kibizi, ndetse abayobozi ba Congo bari bamaze kwemerera Angola ko biteguye kuganira na M23, ari nabyo byashingiweho hategurwa kubonana kwa Kagame na Tshisekedi.

Kuba RDC ikwiriye kuganira na M23 ni igitekerezo cyazanywe na Perezida wa Angola, João Manuel Gonçalves Lourenço nk'umuhuza.

Nyuma yo kuzanwa na Perezida Lourenço, u Rwanda rwacyakiranye yombi cyane ko rushimangira ko nta buryo rwabana neza na RDC iki kibazo kitabanje gukemurwa.

Rwagaragaje ko igihe cyose M23 izajya ibyuka, umubano warwo na RDC uzajya wongera kuzamba, ruhitamo ko impande zombi ziganira kugira ngo bitazongera guteza agatotsi mu mubano w'ibihugu byombi.

Uruhande rwa RDC rwemeye ko koko ruzaganira na M23, ndetse amakuru IGIHE ifite ni uko Minisitiri w'Ububanyi n'Amahanga wa Angola, yahamagaye Perezida Tshisekedi amubwira iby'iyi ngingo undi arabyemera.

Nyuma yo kubona ko impande zombi zibyemeranyaho, Angola yateguye amasezerano y'agateganyo, ku wa 11 Kanama 2024, ubwo Perezida Lourenço yitabiraga umuhango wo kurahira kwa Perezida Kagame, arayamushyikiriza, bucya anayaha mugenzi we wa RDC.

Kuva ku wa 31 Kanama kugeza ku wa 3 Nzeri 2024, Angola yakiriye abahagarariye M23, bari bayobowe n'Umunyamabanga Mukuru wayo, Benjamin Mbonimpa, bagaragaza ibyo bifuza.

Amakuru yizewe IGIHE ifite ni uko Angola yashimangiye ko 'ibyo M23 ishaka ari ibintu byoroshye'.

Iki kibazo cya M23 cyongeye kuganirwaho ku wa 26 Ugushyingo 2024 mu nama yabaye hifashishijwe Ikoranabuhanga. Yahuje Minisitiri w'Ububanyi n'Amahanga w'u Rwanda na bagenzi be ba RDC na Angola.

Icyo gihe u Rwanda rwasabwe kohereza inyandiko igaragaza uko rwifuza ko iki kibazo cyakemurwa.

Ku wa 27 Ugushyingo 2024, u Rwanda rwohereje inyandiko igaragaza ko mu masezerano hagomba kuba harimo ingingo ivuga ko 'Guverinoma ya RDC yemeye kugirana ibiganiro bya politiki na M23 hagamijwe gushaka igisubizo kirambye cy'amakimbirane, binyuze mu gukemura impamvu-muzi'.

Ku wa 28 Ugushyingo, Perezida wa Angola yashimangiye koko ko iyi ngingo ari ingenzi ku buryo ikwiriye kuguma mu masezerano. Yabimenyesheje u Rwanda na RDC.

Umunsi wakurikiyeho, tariki ya 29 Ugushyingo 2024, u Rwanda rwandikiye Angola ruyimenyesha ko iyi ngingo niba itari mu masezerano rutazayasinya.

Bukeye bwaho Angola yamenyesheje u Rwanda ko RDC yemeye kuganira na M23, ariko binyuze mu murongo w'ibiganiro bya Nairobi, ihita inatumira u Rwanda mu muhango wo gusinya amasezerano wari utegerejwe ku wa 15 Ukuboza 2024, ariko birangira RDC yisubiyeho.

Uku kwivuguruza kwa Leta ya RDC kongeye gushimangira ubushake buke bwayo mu gukemura ikibazo cy'umutekano muke kimaze igihe mu Burasirazuba, ndetse byongera gushyira mu rwijiji ahazaza h'umubano wayo n'u Rwanda.

Ku munota wa nyuma, intumwa z'u Rwanda n'iza RDC zananiwe kumvikana ku ngingo yo kuganira na M23

U Rwanda ruri mu bihugu bike bifite ubukungu butera imbere ku muvuduko wo hejuru, hakiyongeraho iterambere ry'inganda zirimo n'izikomeye zamaze gushinga imizi mu rw'imisozi igihumbi.

Ibi bituma hakenerwa amashanyarazi afite ingufu ku buryo inganda zibasha gutunganya imirimo yazo n'ibindi bikorwa bigakomeza ku muvuduko wifuzwa.

Umuyobozi w'Inama y'Ubutegetsi y'Ikigo Gishinzwe Ingufu za Atomike mu Rwanda (RAEB), akaba Umujyanama mu by'ingufu ndetse n'umunyamuryango w'akanama gashinzwe ingamba na gahunda muri Perezidansi ya Repubulika, Dr. Lassina Zerbo yagaragaje ko u Rwanda na Afurika bikeneye ingufu zihutisha iterambere ry'ubukungu n'imibereho myiza.

Ati 'Tuvuga amashanyarazi ariko hano icyo dukeneye cyane ni ingufu zihutisha iterambere ry'ubukungu n'imibereho myiza muri iki gihugu kandi ni byo Perezida Kagame yifuriza u Rwanda n'umugabane ku buryo u Rwanda rwaba icyitegererezo kuri iyi ngingo ku Mugabane wa Afurika.'

Dr. Zerbo yahamije ko igihugu kidafite amashanyarazi bisobanuye ko nta nganda zahaboneka, n'iterambere rikarushaho kudindira.

Ati 'Urebye ibigo by'ubucuruzi biri kuza gushora imari mu Rwanda uyu munsi bikenera ingufu z'amashanyarazi. Nta mashanyarazi nta nganda. Mu gihe ingufu zose mukoresha mu Rwanda ari iz'amashanyarazi, ntabwo haboneka ubushobozi bwo guha ingufu inganda. Tuzi ko mu myaka myinshi yashize hari sosiyete yashatse gushinga uruganda rw'ibirahuri kuko hano mufite ibikoresho by'ibanze ariko ntihari hari ingufu zo kuruhaza.'

Yongeyeho ati 'Icyo mukeneye ubu ni ukugira ikoranabuhanga rizana ikoreshwa ry'ingufu za nucléaire mu buryo butekanye ku bihugu byacu ku buryo byakorwa neza mu bihugu byacu.'

Minisitiri w'Ibikorwa remezo, Dr. Gasore Jimmy, yagaragaje ko mu biganiro by'iminsi ibiri barimo baganiriye ku hashobora kuva ishoramari ryatuma ingufu za nucléaire zibyazwa umusaruro mu bihugu bya Afurika.

Ati 'Twaganiriye ku mbogamizi zituma ibigo by'imari bititabira gutera inkunga imishinga y'ingufu za nucléaire, ese nk'Abanyafurika twakora iki ngo izo mbogamizi ziveho, cyane cyane ko ingufu za nucléaire ari ingufu zisukuye zidahumanya ikirere?”

Yongeyeho ati “Muri iki gihe rero turi kureba n'ihindagurika ry'ibihe, [izi ngunfu za nucléaire] zizadufasha cyane kubera ko mu myaka 25 iri imbere tuzaba dukeneye umuriro urenze inshuro 10 uwo dufite uyu munsi kandi tuzi imigezi dufite, tuzi ahandi twavana umuriro ko hadahagije ngo tubone uwo muriro, tukabona ko rero ingufu za nucléaire ari zimwe mu zizadufasha kwihaza mu ngufu mu myaka iri imbere.'

Yashimangiye ko igihugu cyifuza kuzaba gifite amashanyarazi akomoka ku ngufu za nucléaire mu myaka 10 iri imbere ariko byose bikajyana n'iterambere ry'ikoranabuhanga.

Ati 'Twifuza ko twaba tuzifite no mu myaka itarenze 10 iri imbere, ni yo ntego ariko harimo ibindi abantu bareba, ikoranabuhanga rigeze he? Kuko nk'inganda za nucléaire tubona zikwiriye igihugu ni inganda ntoya (small and medium reactor) hari izamaze kugera ku isoko mu rwego rw'ubucuruzi hari n'izikiri mu bushakashatsi ku buryo utakwizera ngo zizaba zabonetse ariko intego ni iy'uko mu myaka 10 iri imbere twaba tuzifite.'

Inganda zitunganya amashanyarazi akomoka ku ngufu za nucléaire zikora mu bihugu 32, zigatanga amashanyarazi arenga 10% by'amashanyarazi yose atunganywa mu Isi.

Nka Afurika y'Epfo itunganya amashanyarazi akomoka ku ngufu za nucléaire angana na gigawatt 8.154 mu isaha (GWh), Koreya y'Epfo itunganya 171.640 GWh, na ho Amerika itunganya 779.186 GWh kandi izi ngufu ziri mu byabafashije kwihuta mu iterambere.

Bamugaragarije ibiri gukorwa ngo Afurika ibashe kwihaza mu ngufu zizafasha mu iterambere ryihuse

Minisitiri w’Intebe Dr Ngirente yagaragarije abahanga mu by’ingufu za nucléaire ibyo Rwanda ruzikeneyeho

Dr Lassina Zerbo yagaragaje ko u Rwanda rukeneye ingufu zikomeye zituma inganda zikora ku bwinshi

Minisitiri Dr Jimmy Gasore yavuze ko ingufu za nucléaire zizafasha u Rwanda kubona amashanyarazi ruzakenera mu myaka 25 iri imbere

Minisitiri w’Intebe Dr Ngirente aganira na Dr. Lassina Zerbo

Amafoto: Kwizera Herve