Blog

Amarushanwa yo kumurika imishinga y'ikoranabuhanga rikoresha robots na AI ku banyeshuri bo mu mashuri yisumbuye yabereye i Kigali ku 2 Werurwe 2025.

Ayo marushanwa ngarukamwaka ategurwa n'Ikigo cy'Igihugu gishinzwe Uburezi bw'Ibanze (REB) ku bufatanye n'izindi nzego, aho yitabiriwe n'ibigo by'amashuri yisumbuye 25 byo mu Rwanda biturutse muri buri ntara, ndetse n'ibigo bitanu byatsinze mu bindi byiciro, hakiyongeraho n'ibigo bitatu byo muri Nigeria.

Imishinga yahatanaga yari mu byiciro bibiri harimo icy'umushinga mwiza mu gukoresha AI n'umushinga mwiza mu gukoresha AI by'umwihariko mu kubaka imashini za robots.

Ikindi gihembo cyari icy'umushinga mwiza wa AI mu kubaka robots ku bigo byaturutse mu mahanga.

Buri kigo cy'ishuri mu byitabiriye cyari gihagarariwe n'abanyeshuri 10 ndetse buri wese muri bo yahawe umudari w'ishimwe.

Ku bigo byatsinze by'umwihariko, buri mwana yahawe mudasobwa ndetse no kuzakomeza mu yandi marushanwa azabera mu mahanga.

Ishuri rya Groupe Scolaires Officiel de Butare ryabaye irya mbere mu mushinga mwiza wa robots rizahagarira u Rwanda mu yandi marushanwa azabera muri Amerika naho Ecole des Sciences Byimana ryabaye irya mbere mu mushinga mwiza wa AI rizahagararira u Rwanda mu yandi marushanwa azabera mu Busuwisi.

Ni mu gihe ikigo cy'ishuri cya Qeens College cyo muri Nigeria cyatsinze ku rwego mpuzamahanga mu kumurika robots na cyo kizitabira ayo marushanwa azabera muri Amerika.

Minisitiri w'Uburezi, Nsengimana Joseph yavuze ko ayo marushanwa ari kugirira abana akamaro kuko ari uburyo bwo gushyira mu ngiro ibyigwa mu masomo ajyanye na mudasobwa azwi nka 'coding'.

Yagize ati 'Umusaruro urabona ko ari mwinshi kuko abana basigaye bitabira ari benshi kandi bagashishikarira amasomo ya 'coding' ari benshi, bikabafasha kumeya ibyo bize. Turashaka kureba uburyo amashuri menshi ashobora kubyitabira.'

Minisitiri Nsengimana yongeyeho ko bari gushaka abafatanyabikorwa bafasha kongera ibikoresho mu mashuri menshi ku buryo yose yitabira aya marushanwa kandi hagashyirwa imbaraga mu masomo ya coding.

Umushinga wa Groupe Scolaire officiel de Butare watsinze ujyanye na robot yajya munsi y'amazi y'inyanja hakunze kuba hari ibyago byinshi, igakurura amakuru atandukanye, kuko kugeza ubu Isi izi 20% gusa ku bijyanye n'inyanja.

Ni mu gihe umushinga wa AI wa Ecole des Sciences Byimana ujyanye no gukoresha ikoranabuhanga rishyirwa muri telefone igendanwa rigafasha abahinzi kumenya indwara ibihingwa byabo birwaye kandi bakamenya ibyerekeye iteganyagihe bitabagoye.

Ibigo by’amashuri bitandukanye byamuritse imishinga y’ikoranabuhanga rikoresha ‘robot’ na AI

Imishinga y’aba banyeshuri ibafasha gushyira mu bikorwa ibyo biga

Minisitiri Joseph Nsengimana yavuze ko bagiye gushyira ingufu mu mashuri adafite ibikoresho na yo akazajya yitabira amarushanwa

Abanyeshuri bafite imishinga yatsinze bose bahawe mudasobwa

Mu bitabiriye iyo nama harimo abantu 51 baturutse muri Leta Zunze Ubumwe za Amerika, 40 baturutse muri Afurika y'Epfo, 20 baturutse mu Buhinde, 29 bo mu Bwongereza, 309 bo muri Kenya, 160 bo mu Rwanda, 74 bo muri Ethiopia, 42 bo muri Nigeria na 50 bo muri Uganda.

Hari kandi 24 bo muri Zambia, 25 bo muri Tanzania, 30 bo muri Malawi, 18 bo muri Ghana, 12 bo muri Canada n'abandi batandukanye.

Umuyobozi Mukuru wa AMREF Health Africa, ari nayo yateguye iyo nama ibereye mu Rwanda ku nshuro ya gatatu, Dr. Githinji Gitahi, yashimye uko u Rwanda rufite umutekano usesuye.

Yabishingiye ku kuba ku mugoroba wo ku Cyumweru tariki ya 2 Werurwe 2025, abitabiriye iyo nama bose barakoze urugendo rugamije impinduka 'Walk for Change' mu masaha y'ijoro mu mihanda yo mu Mujyi wa Kigali kandi ntihagire ikibahungabanya.

Ati 'Ubutumwa bukomeye bwo mu ijoro ryakeye ni uburyo umutekano ari ikintu cy'ingenzi ku buzima bw'abaturage. Ntabwo ari ibihugu byinshi ushobora kugenda nijoro kandi utekanye.'

Yongeyeho ati 'Ubwo iyo udashobora kugenda utekanye nijoro biba bivuze ko utagenda. Rero turashimira Guverinoma y'u Rwanda ku bw'umutekano kandi guteza imbere umutekano mu mujyi bifasha abaturage kubaho ubuzima bwiza.'

Yavuze ko umutekano ari ikintu gikomeye azatahana ndetse yemeza ko iyo uhari n'ubuzima bw'abaturage bugenda neza, aho abifuza serivisi z'ubuzima bashobora kugera ku bigo by'ubuvuzi mu buryo bworoshye kandi mu mutekano.

Ati 'Kugeza ubu kuri njyewe ni ubutumwa bukomeye kwiye kujyana, kandi ntekereza ko turamutse tugize umutekano utagamije gusa kuruhuka no kwinezeza ahubwo unareba ku bagore bajyanwa kubyara nijoro, abana bakabashaka kujya ku mashuri no gutanga mu ngo zabo amahoro, ni igice cy'ingenzi ku rwego rwacu rw'ubuzima.'

Abitabiriye iyi nama bagize umwanya wo gukora siporo aho bari bihaye umukoro w'uko buri wese agenda nibura intambwe ibihumbi 10 nubwo bose batabashije kwesa uwo muhigo.

Uretse abari bataragera mu Rwanda batitabiriye iyo siporo rusange, abarenga 600 bahageze mbere barayitabiriye ndetse banishimira ubwiza bwa Kigali.

Minisitiri w'Ubuzima w'u Rwanda, Dr. Sabin Nsanzimana, yashimye abitabiriye iyi nama mpuzamahanga iri kubera i Kigali ku nshuro ya gatatu, ashimangira ko u Rwanda rwiteguye kurushaho gutegura no kwakira neza inama mpuzamahanga nk'izo.

Ati 'Twishimiye cyane nk'igihugu kwakira iyi nama y'ingenzi ku nshuro ya gatatu, kandi twifuza gukomeza kuba igicumbi cya AHAIC, igicumbi cy'urwego rw'ubuzima no kurushoramo imari.'

Yakomeje asaba abateraniye muri iyo nama kurebera hamwe uko umugabane wa Afurika wateza imbere urwego rw'ubuvuzi bivuye mu bushobozi bw'abawutuye ndetse no kwishakamo ibisubizo.

Iyi nama iteganyijwe kuba guhera ku wa 2-5 Werurwe 2025, yahuje abantu barenga 1400 ikaba izatangirwamo ibiganiro n'abarenga 200 bo mu nzego zitandukanye zifite aho zihuriye n'ubuzima ndetse n'abo mu nzego zifata ibyemezo.

Umuyobozi Mukuru wa AMREF Health Africa, ari nayo yateguye iyo nama, Dr. Githinji Gitahi, yashimye uko u Rwanda rufite umutekano usesuye.

Minisitiri w'Ubuzima w'u Rwanda, Dr. Sabin Nsanzimana, yashimye abitabiriye iyo nama mpuzamahanga

Mbere yo gutangira siporo babanje gufata amafoto y’urwibutso n’abayobozi batandukanye

Iyo nama yitabiriwe n’ibihugu binyuranye

Abitabiriye inama ya AHAIC bari kugenda mu mihanda ya Kigali

Morale yari yose ku bakunda siporo

Bashimye uko bagendaga nijoro muri Kigali itekanye

Bagaragaje ko atari ibihugu byinshi umuntu ashobora kugenda nijoro atekanye

Ibyishimo byari byose ku bitabiriye inama ya AHAIC ibereye mu Rwanda ku nshuro ya gatatu

Bagize n’umwanya wo gukora siporo ku babishoboye

Kuva ubwo umutwe wa M23 wigariraga Umujyi wa Goma na Bukavu, Repubulika Iharanira Demokarasi ya Congo yakajije umurego mu icengezamatwara no gusabira u Rwanda ibihano ndetse ibihugu by'inkoramutima zayo nk'u Bubiligi bwihutira gushyira igitutu ku Rwanda burukangisha ibihano.

Perezida w'Ishyaka PS Imberakuri, Depite Mukabunani Christine, yabwiye RBA ko abagize imitwe ya politike bagomba kurangwa no gushyira hamwe bakarwanira inyungu z'u Rwanda kurenza n'abo mu bindi bihugu.

Ati 'Abanyamahanga baza baducaho kuko baba bazi ko ari ishyaka ritavuga rumwe n'ubutegetsi baba bazi ko urabeshyera igihugu cyawe, baba bazi ko uravuga n'ibidahari. Dukwiye kugaragara nk'abanyembaraga kandi bakunda igihugu cyabo, kuko n'abandi barwanira igihugu cyabo.'

Yongeyeho ati 'Ngira ngo mwumvise muri Afurika y'Epfo ukuntu imitwe ya politike yashyize hamwe harimo n'utavuga rumwe n'ubutegetsi uyobowe na Julius Malema bose baba bashyize hamwe bashakisha icyateza imbere igihugu cyabo. Natwe rero ni uko tugomba kubigenza ndetse tukanarushaho, twe dufite n'ubunararibonye mu bibazo bikomeye cyane igihugu cyacu cyaciyemo, tugomba rero guhaguruka tugahagarara.'

Perezida w'Umutwe Uharanira Ubumwe bw'Abanyarwanda na Demokarasi, UDPR, Depite Pie Nizeyimana yahamije ko ubumwe bw'Abanyarwanda ari bwo buzatuma igihugu gikomeza kubaho.

Yagize ati 'Ubumwe bwacu nibwo buzatuma tubasha kubaho mu myaka iri imbere. Niba hari abantu bamwe na bamwe bashobora kuba batatira ubumwe bw'Abanyarwanda bakiyunga kuri Wazalendo turakora iki nk'abagize imitwe ya politike kugira ngo tubashe kuganiriza abayoboke bacu badakomeza kujya muri izo ngengabitekerezo zisubiza ubumwe bwacu inyuma?'

Umuvugizi w'Ihuriro nyunguranabitekerezo ry'imitwe ya politiki yemewe mu Rwanda, Nkubana Alphonse, yavuze ko intego bafite ari ugushyira hamwe bakamagana umuntu wese uzashyigikira ibikorwa bigamije kuvogera ubusugire bw'igihugu muri rusange.

Ati 'Nta na rimwe tuzemera ko u Rwanda ruvogerwa cyangwa se rubeshyerwa, twifuza ko Congo yahagarika kubeshyera igihugu cyacu.'

Umunyamabanga wa Leta muri Minisiteri y'Ububanyi n'Amahanga n'Ubutwererane ushinzwe ubufatanye n'Akarere, Gen (Rtd) James Kabarebe mu kiganiro aherutse kugirana n'ihuriro ry'imitwe ya politike yemewe mu Rwanda, yaberetse ko kumva kimwe ikibazo ari intwaro ikomeye yageza ku ntsinzi.

Yagize ati 'Intwaro ya mbere igihugu kiba gifite ni ukuba abaturage bacyo n'abayobozi bafite imyumvire imwe ku kibazo, iyo abantu babyumvise kimwe bagashyira hamwe iyo ni intwaro ikomeye cyane, ibindi byose byo kurwana urwo rugamba birashakwa.'

Ihuriro ry'Igihugu Nyunguranabitekerezo ry'Imitwe ya Politike riherutse kwamagana ibihugu birimo RDC kubera ubufatanye bwayo na FDLR yasize ikoze Jenoside yakorewe Abatutsi mu Rwanda, ingabo z'Abarundi, abacanshuro b'Abanyaburayi na SAMIRDC bahuje umugambi na Perezida Tshisekedi wo gutera u Rwanda no gukuraho ubutegetsi bwarwo.

U Rwanda ruhamya ko mu iyo hataba ubwirinzi ku mipaka yarwo ibisasu byarashwe i Rubavu ku wa 26 na 27 Mutarama 2025 byari kugira ingaruka zikomeye cyane kurusha uko byagenze.

Depite Mukabunani asanga abagize imitwe ya politike bose bagomba gufatanya mu rugamba rwo kurwanya abasebya

Iyi ndirimbo nshya yise 'Ndahiriwe' yitiriye album ye nshya, yayishyize ahagaragara kuri uyu wa Mbere tariki 3 Werurwe 2025.

Ni indirimbo ikubiyemo ubutumwa bw'uko umuntu wese wamenye Yesu akamwakira nk'umwami n'umukiza, aba ari umunyemehirwe kuko aba afite ubuzima bw'ubu n'ubw'igihe kizaza.

Aganira na InyaRwanda, Bosco Nshuti yavuze ko iyi ndirimbo ye nshya 'Itangira ari inkuru mvuga ngo numvise uhamagara n'ijwi ry'urukundo rirenga ryiteguye kuruhura uryitaba wese maze kuryumva ndyumvana imbaraga nyinshi nditaba, nkasoza mvuga ngo warakoze kunkunda Yesu warakoze.'

Iyi ndirimbo yayihaye izina rya album ya kane “Ndahiriwe” azamurikira gitaramo cy'amateka yitiriye ibitaramo azajya akora byose, aho yabyise “Unconditional Love” (Urukundo Rudafite Icyo Rushingiyeho). Iki gitaramo kigiye kuba ku nshuro ya kabiri, kizaba tariki 13/07/2025.

Ni Album izaba yiyongereye ku zindi eshatu zakunzwe cyane ari zo “Ibyo Ntunze”, “Umutima” na “Ni Muri Yesu”. Uyu muhanzi arateganya kuzenguruka Isi amenyekanisha iyi Album ye nshya.

Mu kiganiro InyaRwanda, Bosco Nshuti yavuze ko iki gitaramo agiye gukorera mu Rwanda cyavuye ku Mana aho yamusabye kubwira amahanga urukundo rwayo. Ati: “Imana yanshyize ku mutima kubwira abantu urukundo yakunze ahari mu isi.”

Avuga ko ishusho y’igitaramo cye yateguje Abanyarwanda ni uko “abantu bose bazacyitabira bazunguka kumenya Yesu Kristo n’urukundo Imana yakunze abari mu isi bose ntawe ikuyemo”.

Uyu muhanzi uri kwizihiza imyaka 10 amaze mu muziki dore ko yawunjiyemo mu 2015, avuga ko hari abantu benshi bashyize itafari ku muziki we, gusa abo yashimiye abavuze mu mazina ni Producer Bruce Higiro “yankoreye indirimbo ya mbere ku buntu”.

Ku bijyanye no kuba indirimbo ze nyinshi zigaruka ku musaraba, uyu muramyi utajya yicisha irungu abakunzi be yagize ati “Yesu Kristo niwe ukwiriye kuvugwa ahantu hose ni we butumwa bwiza bwuzuye ni we rukundo, ni we byiringiro, ni we mbabazi”.

Umwaka ushize ubwo yaganiraga na InyaRwanda, Bosco Nshuti uri mu baramyi bakora cyane mu Rwanda, yavuze ko bigoye gusobanura aho akura imbaraga zibimushoboza, ahubwo ashima Imana ko ibyo akora hari umusaruro ufatika bitanga.

Ati: 'Bisa nk’ibigoye gusubiza, gusa mu by’ukuri nishimira ko ibyo nkora hari aho bikura abantu mu buryo bw’umwuka no mu mubiri bikabafasha kandi nanjye Imana yaranyaguye nukuri.'

Bosco Nshuti si inkandagirabitabo kuko afite impamyabumenyi y’icyiciro cya kabiri cya kaminuza muri ‘Accounting’, ariko akaba yarahamagariwe kuba umuramyi binyuze mu ndirimbo aho abikora nk’umuhamagaro kandi n’ivugabutumwa bwiza bwa Yesu Kristo.

Uyu muramyi yatangiye kuririmba cyera akiri muto, ahera mu makorali ariko by'umwihariko atangira kuririmba ku giti cye mu 2015. Akunzwe mu ndirimbo zirimo “Ibyo Ntunze”, “Umutima”, “Utuma nishima”, “Ngoswe n’ingabo”, “Uranyumva”, “Ntacyantandukanya”, “Nzamuzura”, “Ni wowe”, “Dushimire”, “Isaha y’Imana” na “Ni muri Yesu” n’izindi.

Amaze gukorera mu Rwanda ibitaramo bitatu bikomeye mu mateka y’urugendo rw’umuziki amazemo imyaka 9. Igitaramo cya mbere yise “Ibyo Ntunze Live Concert' cyabaye tariki 28 Gicurasi 2017 kuri ADEPR Kumukenke, kimutera imbaraga yo gukora cyane kuko nyuma y’umwaka umwe gusa yahise akora ikindi cya kabiri.

Icyo gitaramo cya kabiri cyabaye tariki 02/09/2018 muri Kigali Serena Hotel, kiririmbamo abaramyi b’amazina aremereye. Icyo gitaramo nacyo cyiswe “Ibyo Ntuze Live Concert”, ni cyo cya mbere cyishyuza Bosco Nshuti yari akoze, kikaba n’imfura mu bitaramo byishyuza by’abahanzi bo muri ADEPR.

Ikindi yakoze ni icyo yise ‘Unconditional Love Live Concert” cyabaye kuwa 30 z’ukwa 10 2022 muri Camp Kigali. Yagikoze habura iminsi 19 ngo ashyingiranywe n’umukunzi we Tumushime Vanessa kuko bakoze ubukwe kuwa 11 Ugushyingo 2022. Muri iki gitaramo Bosco Nshuti yaratunguranye yereka abakunzi be inshuti ye bitegura kurushinga.

Bosco Nshuti yashyize hanze amashusho y’indirimbo yitiriye album ye ya kane

Ni igitaramo azakora mu gihe yizihiza imyaka 10 amaze mu muziki

“>Nyura hano urebe indirimbo nshya ya Bosco Nshuti yise “Ndahiriwe” 

“>

Iri serukiramuco 'Festival Panafricain du Cinéma et de la Télévision de Ouagadougou (FESPACO)' ryabaga ku nshuro ya 29 ryabaye kuva ku wa 26 Gashyantare 2025 risozwa mu ijoro ryo kuri iki Cyumweru tariki 2 Werurwe 2025. 

Ryahuje abahanga mu bya Sinema barenga 2,000 baturutse mu bihugu 53. Muri iri serukiramuco, habaye amarushanwa atandukanye aho filime 235 zahataniye ibihembo mu byiciro bitandukanye. 

Ku wa Gatandatu tariki 1 Werurwe 2025, hatanzwe igihembo kiruta ibindi mu bitangwa muri iri serukiramuco, cyahawe Dani Kouyaté, usanzwe ari Umuyobozi wa Filime muri Burkina Faso.

Uyu mugabo yegukanye igihembo kizwi nka 'Yennenga Golden Stallion / l’Étalon de Yennenga' abikesha filime ye yise 'Katanga: The Dance of the Scorpions.'

Ibi byabaye nyuma y'imyaka 28 yari ishize, Burikina Faso itegereje gutsindira iri shimwe rikomeye nk’uko byatangajwe n'ibiro bya Perezida wa Burkina Faso, Captain Ibrahim Traoré ndetse ni na we washyikirije iki gihembo Dani Kouyaté.

Itangazo rya Perezidansi y'iki gihugu rigira riti 'Dani Kouyaté yatsindiye igihembo gikuru cya 'l’Étalon de Yennenga' muri FESPACO ya 29 kubera filime ye Katanga: The Dance of the Scorpions,”

Iri tangazo rikomeza risobanura ko 'Kouyaté yatuye iki gihembo ingabo z'igihugu n'abaturage bose ba Burkina Faso.'

Iki gihembo ni icya gatatu Burikina Faso itwaye muri iri serukiramuco, giheruka gutsindirwa mu 1997. Kijyana n'igihembo cy'amafaranga angana na Miliyoni 20 z'ama CFA (akabakaba $31,720).

Perezida wa Burkina Faso,Capt.Ibrahim Traoré, ni we wari umuyobozi mukuru w'iki gikorwa cyo gusoza FESPACO 2025. Icyo gikorwa cyitabiriwe kandi na Minisitiri w'Intebe wa Burkina Faso ndetse n'uwa Tchad.

Ibihembo byinshi byatanzwe ku bahanga muri Sinema bitabiriye iyi FESPACO yari ifite insanganyamatsiko igira iti 'Sinema z'Afurika n'Ubwenegihugu bw'Umuco.'

Igihugu cya Tchad cyari cyatumiwe nk'umushyitsi w'icyubahiro nk’uko byatangajwe na Perezidansi ya Burkina Faso.

Filime Katanga: The Dance of the Scorpions ya Dani Kouyaté, ni yo yatwaye igihembo gikuru cya FESPACO 2025. Iyi filime ivuga ku ngingo z’ingenzi zirimo ubutabera, kwiyunga no kwibuka, kandi yakiriwe neza cyane kubera uburyo yanditswe (Screenplay), uko yayobowe (Direction) n'uburyo abakinnyi bayo bashimishije benshi (Acting).

Nyuma yo gutwara igihembo, Dani Kouyaté yavuze amagambo akomeye agira ati 'Ubuyobozi ni ubushobozi bwo gukurikira intego yawe nubwo haba hari inzitizi, kandi ukaba watinyura abandi.” 

Perezida wa Burkina Faso Ibrahim Traoré ubwe yahaye amashimwe uyu muyobozi wa Filime kubera iyi ntsinzi ikomeye.

Iki ni igihembo cya Gatatu Kouyaté yegukanye muri iri serukiramuco, bikomeza kumushyira mu banyafurika bafite amateka akomeye muri sinema.

Mu myaka yashize, abandi batsindiye iki gihembo barimo Idrissa Ouédraogo (1991) na Gaston Kaboré (1997). Mu 2019, umunyarwanda Joël Karekezi na we yari yatwaye iki gihembo abikesha filime ye 'Mercy of the Jungle'.

Abanyarwanda banyuranye umucyo muri iri serukiramuco rya Fespaco:

Filime mbarankuru ya Kivu Ruhorahoza yitwa 'Les Murmures' yegukanye umwanya wa gatatu mu cyiciro cya filime ngufi mbarankuru (Short Documentary Film) muri iri serukiramuco.

Iyi filime ya Ruhorahoza yahawe igihembo cyitwa 'Poulain de Bronze Court Métrage Documentaire' gihabwa filime ngufi mbarankuru yitwaye neza kurusha izindi.

‘Les Murmures’ ivuga ku buzima bw'umufungwa uri kwitegura kongera kwinjira mu muryango nyuma yo kurangiza igihano cye.

Kivu Ruhorahoza, ufite imyaka 43, ni umwe mu batunganya filime (Filmmaker), umuyobozi wa filime (Director), umwanditsi wa filime (Screenwriter) numuyobozi w'ibikorwa (Producer) bazwi cyane ku rwego mpuzamahanga. Iyi ntsinzi yongeye kumwemeza nk'umwe mu banyempano bakomeye muri Sinema nyarwanda.

Muri iri serukiramuco, hari izindi filime nyarwanda zigaragaje neza. 'The Briade' filime ya Myriam Uwiragiye Birara, yegukanye igihembo cyihariye cyitwa Prix Spécial UNFPA gitangwa n'ishami ry'Umuryango w'Abibumbye ryita ku mibereho myiza y'abaturage (UNFPA).

Hari kandi filime Augure, irimo umukinnyi w'umunyarwandakazi Umuhire Eliane, na yo yabonye ishimwe.Yanditswe kandi iyoborwa n'umunye-Congo, Baloji Tshiani.

Izindi filime nyarwanda zari mu marushanwa ariko ntizabashije gutsindira ibihembo ni: 'DIDY' ya Gaël Kamilindi, 'Phiona, La Fille De Madrid' ya Mutiganda Wa Nkunda, 'Minimals in a Titanic World' ya Philbert Aimé Mbabazi Sharangabo, 'Relative' ya Deus Dedit Sangwa

Muri iri serukiramuco, filime yagarutsweho ni 'Fight Like a Girl' ya Matthew Leutwyler. Yahawe ishimwe ryihariye.

Iyi filime irimo umukinnyi wa filime ukomeye wo muri Afurika y’Epfo, Ama Qamata, uzwi muri filime Blood & Water ya Netflix.

Muri iyi filime, harimo n'abanyarwanda barimo Mazimpaka Jones Kennedy, Arthur Nkusi, Malaika Uwamahoro, Simon Rwema, Bahari Ruth, na Aline Amike.

    

Umunya-Burkina Faso Dany Kouyaté niwe wegukanye igihembo gikuru cy'iserukiramuco rya FESPACO, Étalon de Yennenga, kubera filime ye yo mu 2024 yitwa Katanga, La Danse Des Scorpions. Igihembo yagishyikirijwe na Perezida Ibrahim Traoré

 Filime ya Ruhorahoza yahawe igihembo cyitwa Poulain de Bronze Court Métrage Documentaire, gihabwa filime ngufi mbarankuru yitwaye neza kurusha izindi

Filime 'The Briade' ya Myriam Uwiragiye Birara yegukanye igihembo cyihariye cyitwa Prix Spécial UNFPA gitangwa n'ishami ry'Umuryango w'Abibumbye ryita ku mibereho myiza y'abaturage (UNFPA) 

Yagihawe ku wa Gatanu tariki 28 Gashyantare 2025 agihawe n'Ishyirahamwe ry'urubyiruko ruhurira mu mikino inyuranye rizwi nka 'AJSC Association Des Jeunes Sportifs Culture', basanzwe batanga ibihembo mu mikino itandukanye, ndetse bahemba na 'Federation' z'imbere mu gihugu no hanze y'Igihugu. 

Abategura ibi bihembo bagera no mu byiciro by'ubuhanzi, aho buri mwaka banatanga igikombe ku banyarwenya bahiga abandi, cyangwa se umunyarwenya ku giti cye. Kuri iyi nshuro bahisemo Kigingi, nyuma y'ibikorwa binyuranye bakoze. 

Umwe mu bategura ibi bihembo, yasobanuye ko Kigingi bamuhaye igikombe cy'umunyarwenya wahize abandi mu Burundi mu 2024 (Best Comedy of the year) 'Dushingiye ku bitaramo bitandukanye yakoze mu Burayi, muri Amerika, Canada n'ahandi.'

Ati 'Nta munyarwenya n'umwe wo mu Burundi wari wagakoze ibi bitaramo. Rero, nta n'umwe bari bahanganye. 

Tumaze kureba ibikorwa bye mu 2024, twasanze nta wundi muntu wanamushyikira cyangwa se ngo amwegere, ni uko rero twamushyikirije igihembo cye.'

Kingi yabwiye InyaRwanda ko iki gikombe cyamuhaye imbaraga zo gukomeza kurushaho mu rugendo rwe rwo gutera urwenya, ariko kandi ashima buri wese wagize uruhare mu bitaramo yagiye atumirwamo byabereye hirya no hino ku Isi.

Kigingi ni umunyarwenya w’umurundi wamenyekanye cyane mu karere k’Afurika y’Iburasirazuba. Azwiho ubuhanga mu gusetsa, akaba yaragiye atumirwa mu bitaramo bitandukanye mu bihugu byo muri aka karere.

Mu mwaka wa 2021, Kigingi yasabye anakwa umunyarwandakazi witwa Marina Mataratara, mu muhango wabereye i Kigali. Nyuma y’igihe gito, ku wa 8 Mutarama 2022, basezeranye imbere y’Imana, biyemeza kubana akaramata.

Kigingi yagiye agaragara mu bitaramo bitandukanye n’abanyarwenya bo mu karere, harimo n’igitaramo cya 'Gen-z Comedy” gitegurwa na Fally Merci.

Kigingi akomeje kuba umwe mu banyarwenya bakomeye mu karere, ashimirwa ubuhanga bwe mu gusetsa no guteza imbere urwenya mu Burundi no mu bihugu bihana imbibi.

Hari amakuru avuga ko Kigingi azaba ari mu Rwanda, tariki 27 Werurwe 2025 mu gitaramo cya Gen-z Comedy kizabera muri Camp Kigali hizihizwa imyaka 3 y'ibi bitaramo.

Ni igitaramo kizahuriza hamwe abanyarwenya bo muri 'Comedy Store' yo muri Uganda ya Alex Muhangi, abanyarwenya b'i Kigali bo muri Gen-Z Comedy, ndetse n'abanyarwenya bo mu Burundi barangajwe imbere na Kigingi.

Muri ariya matariki, Kigingi azaba ari mu Rwanda mu bikorwa bishamikiye ku birori by'ubukwe, ndetse anitezwe muri Gen-Z Comedy hatagize igihinduka.

Mu kiganiro na InyaRwanda, Kigingi yavuze ati 'Gahunda rero turi kuyitegura na Fally Merci wa Gen-Z Comedy, turebe inzira twabiha. Ntekereza ko nta gihindutse nshobora kuza.'

Umunyarwenya Kigingi yahawe igikombe nk'umunyarwenya wahize abandi mu Burundi mu 2024, bitewe n'ibitaramo yakoreye hirya no hino ku Isi 

Kigingi yahawe iki gikombe mu gihe hari amakuru avuga ko ari mu bazatarama mu gitaramo cya Gen-Z Comedy, kizaba ku wa 27 Weruwe 2025 muri Camp Kigali 

Kigingi yagaragaje ko yakozwe ku mutima n'igihembo yagenewe, ashima abaterankunga n'abandi bose bamushyigikiye mu rugendo rwe rw'urwenya 

Kigingi afatwa nk’umwe mu banyarwenya bakomeye mu Burundi, babashije kurenza inganzo yabo imipaka 

Igitaramo cya Gen-Z Comedy cyo ku wa 27 Werurwe 2025, kizaba hizihizwa imyaka itatu y’ibi bitaramo

Ni gahunda yatangijwe ku 1 Werurwe 2025 ku batuye muri Komine ya Mingala hagamijwe kugeza ku baturage serivise z'ubuvuzi zisumbuye no gukemura ibibazo bikomeye by'ubuzima byugarije ako gace.

Iki gikorwa cyateguwe n'itsinda ry'Ingabo z'Abaganga (RWAMED X), bavuye abaturage indwara zirimo malaria, izo mu mara, iz'uruhu, gusuzuma indwara z'abagore n'abakobwa ku bo mu bice by'icyaro n'izindi.

Ubutumwa bwanyujijwe ku rubuga rwa Minisiteri y'Ingabo bugaragaza ko bitewe n'indwara zo mu kanwa zigaragara cyane muri aka gace, hatanzwe ubuvuzi ku ndwara zitandukanye z'amenyo zirimo amenyo yatobaguritse (caries), indwara zifata ishinya, ndetse n'izindi zibasira mu kanwa zose.

Banasuzumwe indwara zitandura nk'umuvuduko w'amaraso na diabète, hagamijwe gufasha abaturage kumenya uko bahagaze n'uko bafata neza ubuzima bwabo, bakirinda indwara.

Abasirikare b'u Rwanda bavuye ku buntu abagera kuri 435 muri Centrafrique

Abaturage bapimwe n’indwara zitandura zirimo n’umuvuduko w’amaraso

Ibi bikorwa byerekana ubufatanye hagati y’Ingabo z’u Rwanda n’abaturage