Blog

Ni gahunda yatangijwe ku wa 2 Mata 2025, yaranzwe no gutoranya imishinga ibiri itanga icyizere yahize indi no gufungura icyumba bise 'Eureka Mu Rugo' kirimo ibikoresho bitandukanye bizifashishwa mu kubahugura.

Ku ikubitiro, ba nyiri iyi mishanga ibiri yatoranyijwe bagiye guhabwa amahugurwa azamara amezi atandatu bamenyerwa buri kimwe cyose. Nyuma y'ayo mezi bazaterwa inkunga yo kuyishyira mu bikorwa, banahuzwe n'abafatanyabikorwa batandukanye.

Umuyobozi muri AIMS, Dr. Charles Lebon Mberi Kimpolo, yavuze ko impamvu yo gushyiraho iyi gahunda yo guhugura ba rwiyemezamirimo bato ari uko bajyaga bakunda kubona urubyiruko rwinshi rufite imishinga itanga icyizere ariko rukabura ubumenyi n'ubushobozi bwo kugira ngo ishyirwe mu bikorwa.

Ati 'Abanyempano mu ikoranabuhanga n'ishoramari bakwiye kubona aho bakura ubumenyi no gushyira mu bikorwa ibitekerezo byabo, kuko Isi ya none isaba abantu bafite ubumenyi buhanitse kandi bashoboye kubukoresha mu bikorwa bifatika.'

Yakomeje agira ati 'Abashoramari bato bafite ubushobozi bwo guhindura ubukungu bw'igihugu, ariko bakeneye ubufasha mu ikoranabuhanga no mu bucuruzi, iterambere ryubakira ku bumenyi buhamye, ubushakashatsi bufite ireme n'udushya dufite aho dushingiye. Ni yo mpamvu twashyizeho uburyo bwo kubafasha.'

Umuhoza Lucie afatanyije na Jeannette Musabyimana bafite umunshinga witwa Girabumenyi AI, 'application' izafasha abanyeshuri kwiga neza mu ikorabuhanga, kurushaho kugabanya ubucucike no kungera ubumenyi mu ndimi kandi ikazajya iha raporo umurezi imwereka urugero rw'imyigire umunyeshuri arera agezeho.

Umuhoza yavuze ko aya mahirwe bahawe yo guhugurwa amezi atandatu, biteze ko bazayakuramo ubumenyi buhanitse buzatuma bashyira mu bikorwa umushinga wabo.

Umuyobozi mu Ishami ry'Umuryango w'Abibumbye ryita ku Iterambere (UNDP), Jennifer Louie, yavuze ko ari byiza kubona AIMS itanga amahirwe yo gukemura ibibazo urubyiruko ruhura na byo, kandi bifitiye inyungu umuryango Nyarwanda ndetse n'Isi muri rusange.

Ati 'Muri Afurika, dufite amahirwe menshi yo guhanga udushya, aho kureba ku cyuho dufite, tugomba kwibanda ku bisubizo bishoboka. Abanyeshuri ba AMES ntibiga gusa, ahubwo barategurirwa kuba abayobozi mu guhanga ibisubizo ku bibazo biriho uyu munsi.'

Yagaragaje ko AIMS atari ahantu ho kwigira siyansi gusa, ahubwo ari aho guhindura ibitekerezo mo ibisubizo bifatika, bagatekereza byagutse, bakarushaho kubyaza umusaruro aya mahirwe baba babonye.

AIMS ni ikigo cyatangiye gukorera mu Rwanda mu 2016 ku bufatanye bwa Guverinoma y'u Rwanda, gihita kiba icya gatanu gishinzwe binyuze muri AIMS Global Network nyuma y'ibyatangijwe muri Afurika y'Epfo, Sénégal, Ghana na Cameroun.

Kugeza ubu AIMS Rwanda imaze gushyira ku isoko ry'umurimo abanyeshuri barenga 410 bari kugira uruhare mu kubaka ubukungu bwa Afurika bushingiye ku bumenyi. 38% muri bo ni abagore cyangwa abakobwa.

Hari n’akanama nkemurampaka kifashishijwe mu guhitamo imishinga yahize indi

Dr. Charles Lebon Mberi Kimpolo yavuze ko ba rwiyemezamirimo bato bafite ubushobozi bwo guhindura ubukungu bw'igihugu, ariko bakeneye ubufasha mu ikoranabuhanga no mu bucuruzi

Umuyobozi mu Ishami ry'Umuryango w'Abibumbye ryita ku iterambere (UNDP), Jennifer Louie, yavuze ko ari byiza kubona AIMS itanga amahirwe yo gukemura ibibazo urubyiruko ruhura na byo

Ubwo Umuhoza Lucie yasobanuriraga abakemurampaka iby’umushinga we

Urubyiruko rufite imishinga ifite udushya rwari rwitabiriye kugira ngo rugaragaze ibikorwa byarwo

Umuhuzabikorwa w’Imishinga muri AIMS Rwanda, Molly Mutesi, ashyikiriza impamyabushobozi abitabiriye amarushanwa

Hafunguwe icyumba abahugurwa bazajya bigiramo cyane cyane ikoranabuhanga mu guhanga udushya. Cyafunguwe na Perezida wa AIMS Rwanda, Prof. Dr. Sam Yala

Abahize abandi mu kugira imishinga itanga icyizere bari kumwe n’abayobozi ba AIMS Rwanda

---

Source : http://igihe.com/amakuru/u-rwanda/article/ba-rwiyemezamirimo-b-urubyiruko-bashyiriweho-uburyo-buzabafasha-kongera

Uyu Mukuru w'Igihugu unayobora EAC, yagejeje iki cyifuzo ku Muyobozi Mukuru wa Loni, Antonio Guterres, mu kiganiro bagiranye ku murongo wa telefone ku wa 3 Mata 2025, cyibandaga ku butumwa bw'amahoro Abapolisi ba Kenya bari muri Haiti kuva mu mwaka ushize.

Yasobanuriye Guterres ingamba zafatiwe mu nama yahuje abakuru b'ibihugu bya EAC na SADC tariki ya 24 Werurwe, hifashishijwe ikoranabuhanga, zirimo iz'igihe gito, ikiringaniye n'ikirekire zafasha uburasirazuba bwa RDC n'akarere kubona amahoro.

Muri izi ngamba harimo izigenga uburyo bwo guhagarika imirwano n'ubushotoranyi mu Burasirazuba bwa RDC, korohereza ibikorwa by'ubutabazi n'ibiganiro hagati y'impande zose zifite uruhare mu ntambara yo muri iki gihugu.

Perezida Ruto yagize ati 'Nasabye Loni gushyigikira umuhate wa EAC na SADC mu gushyira mu bikorwa inzira iganisha uburasirazuba bwa Repubulika Iharanira Demokarasi ya Congo ku mahoro.'

Nk'uko yakomeje abisobanura, we na Guterres bagaragaje ko bashyigikiye ko akarere kabona amahoro n'umutekano, amakimbirane ibihugu byako bifitanye agakemuka mu buryo burambye.

Perezida Ruto yaganiriye na Guterres kuri telefone, amusaba gushyigikira gahunda ya EAC na SADC igamije kugarura amahoro mu karere

---

Source : http://igihe.com/amakuru/u-rwanda/article/perezida-ruto-yasabye-loni-gushyigikira-gahunda-ya-eac-na-sadc-yo-kugarura

Ku mugoroba w'amateka kuri Broadway, igikorwa cyo gutangiza ku mugaragaro umukino w'ikinamico 'Good Night, and Good Luck' cyabereye mu mujyi wa New York, gishimisha benshi, harimo n'ibyamamare bikomeye. Jennifer Lopez, Uma Thurman, ndetse n'abandi bantu b'ibikomerezwa, bari bitabiriye uyu muhango w'ibirori, berekana imideli igezweho ku itapi itukura.

Uyu mukino w'ikinamico ushingiye kuri filime yamamaye yo mu 2005, ikubiyemo inkuru y'ubutwari bw'umunyamakuru Edward R. Murrow, warwanyije ibikorwa by'akarengane n'igitugu mu itangazamakuru rya Leta Zunze Ubumwe za Amerika mu myaka ya za 1950. Kugezwa kuri Broadway nk'ikinamico, byatumye benshi bongera kwibuka amateka n'akamaro k'itangazamakuru ridatinya kuvuga ukuri.

Mu birori byabaye ku mugoroba wo gutangiza iyi kinamico, abitabiriye bashimye ubuhanga bw'abakinnyi ndetse n'uburyo inkuru iteye. Abakinnyi b'imena muri uyu mukino bagaragaje imikinire itangaje, byerekana ko Broadway ikomeje kuba isoko y'imikino y'ikirenga.

'Good Night, and Good Luck' ni umwe mu mikino yitezweho guhindura byinshi muri sinema n'ikinamico, by'umwihariko mu gutanga ubutumwa bukangurira itangazamakuru gukomeza kuba inkingi y'ukuri no kurengera ubwisanzure bwaryo.

Source : https://kasukumedia.com/good-night-and-good-luck-yatangirijwe-kuri-broadway-mu-mugoroba-wamateka/

Hari benshi mu bahanzi bagiye baririmba ku rupfu, bakabigaragaza nk'ikintu gikomeye ubwonko bw'umuntu butabasha gusobanukirwa. Bagaragaza ko ari cyo kibi kiruta ibindi byose umuntu ashobora guhura na cyo muri ubu buzima.

Urupfu ntirurobanura ku nshuti cyangwa abanzi, ntirugira imbabazi, rutwara uwo ukunda n'uwo udakunda. Ni ikibazo cy'igihe gusa!

Mu gitondo cyo kuri uyu wa Gatanu, tariki 4 Mata 2025, inkuru y'incamugongo yamenyekanye saa mbili, ivuga ko Alain Mukuralinda uzwi cyane nka Alain Muku, wari Umuvugizi Wungirije wa Guverinoma y'u Rwanda, yitabye Imana. Yapfiriye mu Bitaro byitiriwe Umwami Faisal, azize indwara y'umutima yari amaranye iminsi.

Uretse kuba yari umuyobozi ukomeye mu nzego za Leta, Alain Muku yari n'umunyamuziki w'inararibonye, wakunzwe cyane kubera indirimbo ze zifite ubutumwa bwubaka.

Yari umugabo wiyeguriye no guteza imbere impano z'abakiri bato, cyane cyane mu mikino. Yashinze ikipe y'abana bakinaga umupira w'amaguru, abatoza indangagaciro, ubumwe n'ubushobozi bwo guhatana.

Mu buhanzi, Alain Muku yakoze indirimbo zinyuranye zifasha abantu kwizihiza ibirori n'iminsi mikuru, ndetse anakorera ibihangano amakipe y'umupira. Yamamaye mu ndirimbo nka Tsinda Batsinde, Gloria, Musekeweya n'izindi zafashije abantu benshi mu bihe by'ibyishimo .

Yagize uruhare rukomeye mu guteza imbere abandi bahanzi Nyarwanda. Yashinze Label yise The Boss Papa, imwe mu zamenyekanye mu guteza imbere impano z'abahanzi.

Binyuze muri iyi Label, Alain Muku ni we wagaragaje impano y'umuhanzi Nsengiyumva François wamamaye nka Igisupusupu, ndetse ni nawe watumye Clarisse Karasira amenyekana ku rwego mpuzamahanga.

Urupfu rwe rusize icyuho gikomeye mu ruganda rw'imyidagaduro, muri Leta y'u Rwanda ndetse no mu mitima ya benshi bamukundaga, bamwubahaga kandi bamufataga nk'umuntu w'inyangamugayo.

Nubwo yitabye Imana, ibikorwa bye bizakomeza kumuhesha icyubahiro mu mateka y'u Rwanda. Alain Muku yari icyitegererezo ku rubyiruko, umurinzi w'umuco n'uwaharaniraga iterambere rirambye ry'igihugu binyuze mu buhanzi, ubuyobozi n'uruhare rwe mu mikino. Amahoro asesuye amubeho aho aruhukiye. Twihanganishije umuryango we, inshuti, n'abakunzi b'ibihangano bye.

Source : https://kasukumedia.com/inkuru-yincamugonngo-alain-mukuralinda-umuvugizi-wungirije-wa-guverinoma-yu-rwanda-yitabye-imana/

Kuri uyu wa Kane, Perezida wa Uganda, Yoweri Kaguta Museveni, yageze mu murwa mukuru wa Sudani y'Epfo, Juba, mu ruzinduko rufite intego yo kuganira ku mahoro n'umutekano muri iki gihugu gikomeje guhura n'ibibazo by'amakimbirane ya politiki.

Perezida Museveni yakiriwe ku kibuga cy'indege mpuzamahanga cya Juba na Perezida wa Sudani y'Epfo, Salva Kiir Mayardit.

Nyuma yo kwakirwa ku mugaragaro, aba bayobozi bombi bagiranye inama yihariye yibanze ku mutekano w'igihugu ndetse n'icyerekezo cy'ubufatanye hagati ya Uganda na Sudani y'Epfo.

Uruzinduko rwa Perezida Museveni ruje mu gihe Sudani y'Epfo ikomeje guhura n'ihungabana rya politiki rikurikiye ifatwa rya Riek Machar, umwe mu ba visi perezida b'iki gihugu, wafatiwe i Juba ahagana mu mpera z'ukwezi gushize.

Ibi byateje impaka ndende n'amakimbirane mu gihugu, byatumye abaturage batangira kugira impungenge ko hashobora kongera kubaho intambara hagati y'impande zishyamiranye.

Umutwe wa politiki uyobowe na Riek Machar wamaganye ubwo bufatwa, uvuga ko bunyuranyije n'amasezerano y'amahoro yasinywe mu mwaka wa 2018, amasezerano yari yaratanze icyizere cyo kugarura ituze n'umutekano nyuma y'intambara yari imaze imyaka isaga itanu.

Uwo mutwe wemeje ko ayo masezerano ari bwo buryo bwonyine bwo gukemura amakimbirane n'ubwumvikane buke mu gihugu.

Abaturage benshi baracyari mu bwigunge kubera uko ingabo za leta zifata abasirikare ba Riek Machar ndetse n'uko ibikorwa by'ubushotoranyi bikomeje kwiyongera mu bice bimwe na bimwe by'igihugu.

Bamwe mu bayobozi b'amadini n'imiryango itegamiye kuri leta basabye ko hakorwa ibiganiro bihamye hagati y'impande zose bireba kugira ngo habeho ubwiyunge nyabwo.

Uruzinduko rwa Perezida Museveni kandi rubaye mu gihe itsinda ry'abahuza b'umuryango w'Ubumwe bw'Afurika (AU) ruri i Juba mu rwego rwo kugenzura uko ibintu byifashe no gutanga inama ku cyakorwa mu rwego rwo gukumira intambara ishobora kongera kwaduka.

Perezida Museveni, nk'umwe mu bayobozi b'akarere bakunze kugira uruhare mu kunga ibihugu bikennye mu mutekano, aracyakomeje kuba igicumbi cy'ubuvugizi bw'amahoro mu karere k'Afurika y'Iburasirazuba. Ibi biganiro bigamije gushakira hamwe ibisubizo birambye ku bibazo bya Sudani y'Epfo, igihugu gifite umutungo kamere utubutse cyane cyane amavuta ya peteroli, ariko ukomeje kudindizwa n'amakimbirane ya politiki n'umutekano mucye.

Source : https://kasukumedia.com/perezida-museveni-yagiriye-uruzinduko-i-juba-mu-gihe-amakimbirane-akomeje-kwiyongera-muri-sudani-yepfo/

Mu gihe ingaruka z'izamuka ry'ibiciro ryatewe n'imisoro yashyizweho na Perezida wa Leta zunze ubumwe z'Amerika, Donald Trump, zikomeje kumvikana ku rwego mpuzamahanga, perezidansi ya Afurika y'Epfo yagaragaje impungenge zayo zikomeye. Izi mpinduka mu bucuruzi mpuzamahanga ziri kugira ingaruka zitari nke ku bijyanye no kohereza ibicuruzwa muri Amerika, igihugu gifatwa nk'umufatanyabikorwa w'ingenzi mu bucuruzi kuri Afurika y'Epfo.

Mu itangazo ryatanzwe na perezidansi ya Afurika y'Epfo, hagaragajwe ko nubwo iki gihugu gikomeje kwiyemeza kugirana umubano w'ubucuruzi wunguka hagati yacyo na Amerika, imisoro yashyizweho mu buryo butunguranye ari inzitizi ikomeye.

Bagize bati: 'Nubwo dukomeje kwiyemeza kugirana umubano w'ubucuruzi wunguka hagati y'Amerika, amahoro yashyizweho ku buryo bumwe kandi ahana ibihano birahangayikishije kandi bitubera inzitizi y'ubucuruzi no gutera imbere.'

Afurika y'Epfo yasabye ko hakorwa ibiganiro bigamije kuganira ku masezerano mashya y'ubucuruzi, agamije gukuraho inzitizi ziri mu bucuruzi hagati y'ibihugu byombi.

Ibi biganiro byitezweho gutuma ubucuruzi burambye bushingiye ku nyungu z'impande zombi bugerwaho, kandi bigafasha kugabanya ingaruka mbi ku bukungu bw'ibihugu biri mu nzira y'amajyambere.

Perezida Donald Trump aherutse gushyiraho igipimo cya 30 ku ijana cy'imisoro ku bicuruzwa biva mu bihugu bitandukanye, birimo n'ibyoherezwa na Afurika y'Epfo.

Iki gihugu ni icya kabiri mu bihugu byohereza byinshi muri Amerika, bikaba byaragize uruhare rukomeye mu bucuruzi bw'imbere mu gihugu, cyane cyane mu nganda n'ubuhinzi.

Xhanti Payi, umuhanga mu by'ubukungu muri Afurika y'Epfo, yagaragaje ko igihugu cye gifitanye umubano w'ubucuruzi ukomeye na Leta zunze ubumwe z'Amerika.

Yagize ati: 'Ni ku byo twita ibicuruzwa bikomeye — bikubiyemo ibintu nk'ibyuma. Noneho ibicuruzwa byoroshye, byaba nk'uko ubivuze, ibikomoka ku buhinzi, birimo citrusi, imizabibu n'ibindi byose.'

Yakomeje avuga ko Amerika yakiriye ibicuruzwa bifite agaciro k'arenga miliyari ebyiri z'amadolari y'Amerika bivuye muri Afurika y'Epfo, harimo ibinyabiziga n'ibice byabyo.

Aya ni amahirwe y'iterambere ku bukungu bw'iki gihugu, ariko ashobora guhungabanywa n'imisoro mishya. 'Izi zose rero ni imirenge ifite akamaro kanini muri Afurika y'Epfo, kandi izagira ingaruka.'

Payi yavuze ko ibihugu bito cyane ari byo bizibasirwa cyane n'aya mahoro ya Trump kuko bifite ubukungu butandukanye cyane n'ubw'Amerika, bityo bikaba bitorohereza kurwana ku nyungu zabyo. 'Afurika y'Epfo ifite itsinda ry'ibicuruzwa bitandukanye byoherezwa mu mahanga kandi ibyo bitandukanye mu bihugu bitandukanye.'

Ku wa Gatatu, amafaranga akoreshwa muri Afurika y'Epfo (Rand) yamanutse ku kigero cyo hasi mu mezi atatu ashize. Ibi byatewe n'impungenge ku izamuka ry'ibiciro n'ubwoba ko Ihuriro riharanira Demokarasi rishobora kuva mu buyobozi bwa guverinoma ihuriweho kubera kutumvikana ku ngengo y'imari y'umwaka wa 2025.

Ibi byongera umwuka mubi mu isoko ry'ivunjisha no ku ishoramari, bigatuma ubukungu burushaho kugorwa n'ibihe bikomeye.

Mu gihe ibihugu byinshi bikomeje gusaba ubufatanye bw'ubucuruzi bushingiye ku nyungu z'impande zombi, imikorere ya Trump iragenda ituma umubano n'ibihugu bikiri mu nzira y'amajyambere ujya mu kaga. Afurika y'Epfo isaba ko Amerika isubira ku meza y'ibiganiro igafatanya gushaka ibisubizo birambye bigamije iterambere rusange.

Source : https://kasukumedia.com/afurika-yepfo-yagaragaje-impungenge-zizamuka-ryibiciro-ryatewe-nimisoro-yashyizweho-na-donald-trump/

Umuzamu wa Real Madrid, Andriy Lunin, yakinnye imikino myinshi yo mu mezi ashize harimo n'iyo bahuragamo na Real Sociedad, ariko ubu ari mu bihe bitoroshye kubera imvune. Ku mukino wa nyuma bakinnye na Real Sociedad, Lunin yagize ikibazo cy'imitsi ya soleus (imitsi y'ukuguru hepfo) ku munota wa 50, bituma ava mu kibuga atishimye ndetse afite ububabare bukabije.

Abaganga ba Real Madrid batangaje ko iyo mvune ishobora kumushyira hanze byibura ibyumweru bine, ibintu bishobora kugira ingaruka ku mikino ikomeye ikipe ifite mu minsi iri imbere.

Kugeza ubu, Real Madrid iratekereza gukoresha inshinge zituma ububabare bugabanuka mu buryo bwihuse kugira ngo Lunin ashobore gukina umukino ukomeye bafite na Valencia.

Ariko nubwo iyi nzira ishobora gutuma ahagaragara, hari ibyago byinshi bishobora gukurikiraho nk'ugukomeza imvune cyangwa kuyigira mbi kurushaho.

Mu gihe Lunin yaba atabonetse, icyizere cyose gishyirwa kuri Thibaut Courtois uri mu nzira yo kugaruka. Abatoza ba Real Madrid barizera ko Courtois ashobora kugaruka ku gihe ngo akine umukino w'igikombe cya UEFA Champions League bazahuriramo na Arsenal.

Courtois amaze igihe kinini hanze nyuma yo kuvunika bikomeye mu 2023, ariko ubu imyitozo ye yagaragaje ko ashobora kuba yiteguye gutanga umusanzu we mu gihe ikipe imukeneye.

Mu gihe Real Madrid iri mu rugamba rwo gushaka ibikombe binyuranye, ikibazo cy'abazamu gishobora kuba ihurizo rikomeye, ariko ubuyobozi bw'ikipe ndetse n'abakunzi bayo baracyafite icyizere ko ikipe izashobora gutsinda ibi bibazo.

Source : https://kasukumedia.com/andriy-lunin-ashobora-kumara-ibyumweru-4-hanze-kubwimvune-real-madrid-ikomeje-gushakisha-ibisubizo/

“>‎Ibi yabigarutseho mu kiganiro kihariye yagiranye na InyaRwanda Tv. Uyu mukinnyi yavuze ko atameze neza ndetse ko iyo arebye ibyo yumvikanye n’ubuyobozi bwa Police FC ko azakora bimutera agahinda.

‎Ati: “Njyewe ku giti cyanjye ntabwo meze neza, nza ku byo numvikanye n'abayobozi buriya bijya binantera agahinda ibintu nemereye abayobozi cyangwa twavuganye nta na kimwe ndageraho nyine hari igihe mbireba nkumva muri njye nshitse intege ariko nakwizeza abakunzi ba Police FC ko ibya shampiyona byo twarabihebye tugiye kurwana ku gikombe cy'Amahoro ko twagitwara”. 

‎‎Yijeje abakunzi ba Police FC ko mu mwaka utaha w’imikino bazaba biteguye ndetse bakaba bazabaha ibyishimo.

‎‎Uyu mukinnyi yavuze ko adakwiye guhamagarwa mu ikipe y’Igihugu y’u Rwanda, Amavubi. ‎‎Ati”Ntabwo nari mbikwiye guhamagarwa mu ikipe y'igihugu ntabwo byari bikwiye ntabwo nari meze neza kandi buriya umutoza yari afite impamvu abikoze”.  

‎‎Byiringiro Lague yasobanuye iby’amadeni abereyemo abakinnyi bagenzi agira ati “: “‎Narabyumvise kuri Radio nabonye n'abantu bagiye babinyoherereza.

‎‎N'abantu bumva Radio rero sinzi ko ibyo bintu babyemeye. Niba koko Lague yaranze gukora imyitozo kubera amadeni y'abakinnyi bakinana sinzi niba barabyumvise bakumva ko ari ukuri, ubu wakanga gukora imyitozo kubera ideni ry'umukinnyi mukinana gute? Ntabimenyesheje ubuyobozi? Ntabwo bibaho”.

‎Yavuze ko uwavuze ko yanze gukora imyitozo kandi arwaye yamukinnye ku mubyimba. ‎‎Ati: “Umuntu wavuze ko nanze gukora imyitozo kubera abakinnyi mfitiye ideni kandi ndwaye yankinnye ku mubyimba. Nta muntu mfitiye ideni n'umwe. 

Ibyo ni ugushwanisha abantu ngaho ibaze aramutse atumye nshwana n'umuryango ibintu byose byagezemo ngo amadeni ibiki?. Urumva ni ukwangisha umuntu abantu no gusebanya kandi ataribyo, ahantu hose ndi kuhaca nihishe”.

Byiringiro Lague yavuze ko kugeza ubu nta kintu arakorera Police FC ndetse ko adakwiye no guhamagarwa mu ikipe y’Igihugu 

Source : https://inyarwanda.com/inkuru/154268/byiringiro-lague-yavuze-ko-adakwiye-guhamagarwa-mu-amavubi-anashyira-umucyo-ku-byamadeni-a-154268.html

Umwe muri urwo rubyiruko rukorera ubuhinzi muri ProDev Kayonza, waganiriye na RBA, yavuze ko ubu buhinzi bwamugejeje ku iterambere rigaragara dore ko n'ubuzima bwe bwahindutse.

Ati 'Kuva nabona akazi hano byampinduriye byinshi mu buzima, naguze ikibanza nkikuye muri aka kazi, naguze igare ngendaho kugira ngo mbashe kugera mu kazi, mbasha no kugura amatungo kugira ngo ejo hazaza ndebe ko ubuzima bwakomeza guhinduka.'

Urubyiruko rugera kuri 800 ni rwo rumaze guhabwa ikaze muri 'ProDev Kayonza', aho rukora mu buryo bwa nyakabyizi. Rukora imirimo irimo gusarura indabo, urusenda, ibigori, imbuto n'ibindi bihingwa byoherezwa hanze y'igihugu.

Umuyobozi wa ProDev Kayonza, Nshimiyimana Fidèle, yavuze ko gukoresha urubyiruko byongera umusaruro, kandi na rwo rukuramo ubumenyi.

Ati 'Baza bafite ubumenyi bavanye ku ishuri, ariko iyo bageze hano babona ibikoresho bakoresha. Dufata umwanya uhagije wo kubahugura ariko nyuma y'amezi atatu uba usanga ari umukozi ushoboye.'

Minisitiri w'Urubyiruko n'Iterambere ry'Ubuhanzi, Dr. Utumatwishima Jean Nepo Abdallah, yasabye ko umubare w'abahabwa akazi muri iki kigo wakwiyongera.

Ati 'Ni ahantu hagari hagaragaza ko urubyiruko rwinshi rufite akazi, kandi runishimiye icyo ruvanamo. Iyo ureba ubona ko rwiteguye no gukomeza gutera imbere.'

'Icyo twasabye ProDev ni uko bakora uko bashoboye bakongera umubare w'urubyiruko rukava kuri 800 rukagera nko ku 1500. Icyo gihe bazamura ibyo bakora, ndetse banazamura imirimo y'urubyiruko.'

Dr. Utumatwishima yashishikarije urubyiruko kwitabira umwuga w'ubuhinzi, kuko urenga kuba uwo guhinga ngo umuntu yihaze mu biribwa, ahubwo ukavamo n'ubucuruzi.

Urubyiruko rukora ubuhinzi muri ‘ProDev Kayonza’, rugaragaza ko uyu mwuga umaze kuruhindurira ubuzima

---

Source : http://igihe.com/amakuru/u-rwanda/article/kayonza-urubyiruko-rugera-kuri-800-rwayobotse-ubuhinzi-nk-inzira-yo-kurwanya

U Rwanda ruri ku mwanya wa mbere muri Afurika y'Iburasirazuba mu kurangwamo ruswa nke, n'uwa kane muri Afurika.

Gusa Raporo y'ibikorwa by'Ubushinjacyaha bw'u Rwanda ya 2023/2024, igaragaza ko hakiriwe ibirego 1070, birimo 473 byaregewe inkiko, na ho 467 birashyingurwa kuko byaburiwe ibimenyetso.

Mu ngendo Komisiyo ya Politiki n'Imiyoborere yakoreye mu turere dutandukanye igenzura ibikorwa by'inzego zegerejwe abaturage, Perezida wayo Senateri, Usta Kaitesi, yatangaje ko abaturage babona neza ko ruswa itangwa mu nzego zimwe zibegereye.

Ati 'Hari abazita ikiziriko, ubusanzwe muri gahunda ya Girinka nta muntu ugira ikiguzi atanga ariko kugira ngo hagire ubonamo amafaranga yifuza babyita ikiziriko. Ubwo umuntu agatanga ayo mafaranga azi ko akwiriye kuyatanga ariko ubusanzwe atakabaye ayatanga.'

'Iyo ari igihe cyo kugurisha ubutaka n'ibindi, baracyasaba inzoga z'abagabo kandi uko amategeko abiteganya mu byo kugurisha nta nzoga z'abagabo zakabayeho. Hari aho batubwiye ngo hari ako bita agapeti ka mudugudu, na ho abandi bakagira ibyo bita akantu.'

Senateri Kaitesi yavuze ko abantu bagiye bashyiraho uburyo butandukanye butuma bibonera indonke batakabaye babona.

Ati 'Banatubwiye ko habaho gusaba, gusezeranya cyangwa gukora imibonano mpuzabitsina kugira ngo umuntu abone cyangwa atange serivisi, gufata icyemezo hashingiwe ku kimenyane, kudasobanura inkomoko y'umutungo, gusonera binyuranye n'amategeko cyangwa kwiha inyungu zinyuranye n'amategeko.'

Abayobozi mu nzego z'ibanze barimo abigwizaho imirimo bagakora n'iyo badashinzwe kugira ngo bashobore kuyibyaza indonke.

Senateri Kaitesi ati 'Twese aho dutuye tugira ba mudugudu, ariko usanga mudugudu ari we uhagarariye urwego bivugwa ko hari ibikorwa byinshi asigaye akora yakabaye akorana na komite bigatuma asa nk'aho abaye kamara ariko ntagire n'umubuza iyo atangiye kurenza ibyo yakabaye atemerewe gukora.'

Senateri Uwizeyimana yagaragaje ko hari abaturage bafite umuco wo kutanyurwa n'imyanzuro ifatwa n'inzego z'ibanze n'iz'ubutabera ku buryo birangira batanze ruswa y'inka eshanu baburana ihene imwe.

Ati 'Yego hariho inzego usanga zinuba abaturage, akavuga ngo ni wowe ugarutse? Niba utagikemura kizakomeza kigaruke ariko ikigaragara ni ikintu kimeze nk'umuco wo kutanyurwa n'ibyemezo byafashwe, umuntu arashaka gukomeza guhanyanyaza bya bindi umuntu ashobora gutanga ruswa y'inka eshanu aburana ihene ariko akanga agatsinda.'

Abaturage bagaragaje ko kwimakaza ikoreshwa ry'ikoranabuhanga biri mu byakemura ikibazo cya ruswa mu nzego zegerejwe abaturaje.

Ubushakashatsi kuri Ruswa mu Rwanda [Rwanda Bribery Index: RBI] bwa 2024, bwagaragaje ko 92% y'abantu bakwa ruswa batajya bayatanga.

Ubushinjacyaha bw'u Rwanda bugaragaza ko bwakurikiranye abantu ibihumbi 11 bari bakurikiranyweho ibyaha bya ruswa mu myaka itanu ishize.

Senateri Usta Kaitesi (ibumoso) yavuze ko ruswa yitwa amazina menshi

Sena yiyemeje kuzakomeza gukurikirana ibibazo bya ruswa bigaragara mu nzego zegerejwe abaturage

---

Source : http://igihe.com/amakuru/u-rwanda/article/agapeti-ka-mudugudu-ikiziriko-na-ruswa-y-igitsina-ishusho-ya-ruswa-mu-nzego