Blog

Uramutse ufite amafaranga muri BPR kugeza ubu ibyakujyanayo byaba ari bike cyangwa ari ntabyo, kuko serivisi wifuza ushobora kuzihabwa ako kanya ukanze muri telefone *150#, cyangwa ugashyira (download) muri telefone ikoranabuhanga (app) ukura muri Play Store (ku bantu bafite smart phone).

Iyo umaze kwinjira muri BPR ukoresheje uburyo bumwe muri ubwo bwombi (USSD ituma ukanda *150# cyangwa App), ushobora gufunguza konti utiriwe ujya kuri banki, ndetse ugahita wiyandikisha kugira ngo ujye ukoresha ubwo buryo bwa Mobile Banking.

Ushobora no kureba amafaranga ufite kuri konti yawe uko angana, bakanaguha raporo ngufi cyangwa irambuye, ushobora kwiyoherereza amafaranga uyakura kuri konti imwe uyohereza ku yindi hagati ya BPR na BPR cyangwa hagati ya BPR n’andi mabanki, ndetse ukayavana kuri BPR uyohereza kuri Mobile Money/Airtel Money.

Umuntu ukoresha Mobile Banking ya BPR abasha kubitsa no kubikuza amafaranga ku mashini zitwa ATM nta karita yo kubikuza afite, aho akanda muri telefone bakamuha imibare yandika muri iyo mashini igahita isohora amafaranga.

Iri koranabuhanga rya telefone kandi rifasha umuntu kwishyura imisoro yose ya Rwanda Revenue Authority, kwishyura amafaranga y’ishuri, kwishyura ifatabuguzi rya televiziyo (Star Times na DSTV na Canal+) ndetse no kuzigama muri Ejo Heza.

Ni ikoranabuhanga rifasha kandi kwishyura no kugura amazi n’amashanyarazi, hamwe no kugura amayinite ya MTN na Airtel. Rinafasha gusaba no kwishyura agatabo ka sheki n’ikarita ya ATM yo kubikuza (Debit Card).

Mu byiza umuntu yungukira mu gukoresha Mobile Banking ya BPR, hari ukuba bimurinda kujya gutonda umurongo muri banki, guhabwa serivisi nta kiguzi ndetse no kugira ikoranabuhanga ririnda umutekano w’urikoresha.

Banki y’Abaturage ikomeza ivuga ko muri serivisi zitangwa nta kiguzi gisabwe harimo iyo kuvana amafaranga kuri konti yo muri BPR uyashyira ku yindi yo muri BPR, kuyakura kuri konti muri BPR ayohereza kuri Mobile Money na Airtel Money.

Izindi serivisi zitishyurwa zirimo iyo kugura amayinite yo guhamagara, kwishyura ifatabuguzi rya televiziyo, kwishyura umuriro n’ibindi.

Banki y’Abaturage ishima uburyo abakiriya bayo bitabiriye gukoresha ikoranabuhanga cyane cyane mu gihe cya Covid-19, igasaba ko bakomeza kugira uwo muco.

Nteziryayo na Mugiraneza bakekwaho gushaka guha umuturage impapuro bazise amadolari (Ifoto:RNP)

Ku rubuga rwa Polisi bavuga ko Umuvugizi wa Polisi mu Ntara y’Amajyepfo, Superintendent of Police (SP) Theobald Kanamugire, yavuze ko bariya bagabo bari bafite inoti ijana z’amadorali imwe ifite agaciro k’idorali rimwe, bayahereyeho bashaka kwambura umuturage wo mu Karere ka Huye mu Murenge wa Ngoma mu Kagari ka Butare, bamubwira ko bagiye kumuvunjira akabaha amanyarwanda yari avuye kubikuza muri banki.

SP Kanamugire yagize ati “Bariya bagabo bari biriwe hafi y’imwe muri banki zo mu Mujyi wa Huye, babonye umuturage abikuje amafaranga y’u Rwanda menshi baramukurikira bamwumvisha ko abaha amafaranga avuye kubikuza bakamuha amadorali bafite, ubwo bamwerekaga inoti nzima z’amadorali bari bafite bakamubwira ko ari ibihumbi 20 by’amadolari ya Amerika”.

SP Kanamugire akomeza avuga ko umuturage yumvise igiciro bashaka kumuvunjiraho yahise agira amakenga ko bashaka kumwambura, yashatse uko atanga amakuru ari na bwo bahise bafatwa.

Ati “Bamubwiraga ko idolari rimwe barimuvunjira ku mafaranga y’u Rwanda 600 ariko bakaza kugira indi nyungu nkeya bamusigiramo. Umuturage yahise yibuka ko idolari rya Amerika rimwe ririmo kuvunjwa amanyarwanda arenga 900. Yahise agira amakenga ko bashaka kumwambura ababwira ko agiye kwitaba abayobozi be kuri telefoni naho yari agiye guhamagara Polisi”.

Umuvugizi wa Polisi akomeza avuga ko umuturage akimara guhamagara Polisi, abapolisi bahise bahagera basanga barimo guciririkanya uko bamuvunjira, uwitwa Mugiraneza yari arimo kumuha ibahasha irimo impapuro zikase neza nk ‘amadolari ndetse inyuma y’iyo bahasha bari bometseho inoti imwe y’ijana y’amadorali ya Amarika mu rwego rwo kumwizeza ko n’imbere harimo amadorali mazima kuko bari banabanje kumwereka inoti 100 z’amadorali ya Amerika nzima.

SP Kanamugire yashimiye uriya muturage kuba yagize impungenge akihutira gutanga amakuru bariya bagabo bagafatwa. Yasabye n’abandi baturage kujya bagira amakenga ku bantu babizeza ibitangaza kandi bakihutira gutanga amakuru mu rwego rwo gukumira icyaha kitaraba.

Abafashwe bahise bashyikirizwa urwego rushinzwe ubugenzacyaha (RIB) rukorera muri sitasiyo ya Polisi ya Ngoma kugira ngo hakorwe iperereza.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 174 ivuga ko umuntu wese wihesha umutungo w’undi, imari ye yose cyangwa igice cyayo mu buryo bw’uburiganya yiyitiriye izina ritari ryo cyangwa umurimo adafitiye ububasha cyangwa akizeza icyiza cyangwa agatinyisha ko hari ikibi kizaba, aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka ibiri ariko kitarenze imyaka itatu n’ihazabu y’amafaranga y’u Rwanda atari munsi ya miliyoni eshatu ariko atarenze miliyoni eshanu.

Munyagishari yari yicaye mu cyumba cya gereza i Mageragere, kirimo ikoranabuhanga rituma arebana kandi yumvana n’abacamanza, ubushinjacyaha hamwe n’umwunganira, bo bari bicaye mu cyumba cy’iburanisha cy’Urukiko rw’Ubujurire ruri ku Kimihurura i Kigali.

Umucamanza yabanje kubaza Bernard Munyagishari niba arimo kumva neza ibivugirwa mu cyumba cy’iburanisha, we avuga ko arimo kumva neza ariko ku ruhande rw’urukiko amajwi ntabwo yumvikanaga neza bigatuma bamusubirishamo.

Umwunganizi wa Munyagishari, Me Shoshi Bizimana Jean Claude yakomeje agaragaza imbogamizi y’uko kutaba hamwe n’umukiriya we bituma kwisobanura bishobora kuzamo imbogamizi.

Me Bizimana yagize ati “biratugora kumvikana na we, bizasaba ko we aza hano cyangwa jyewe nkamusangayo”.

Urukiko rwamaze kwihererera rwagarutse rutangaza ko urubanza rwimuriwe ku itariki 17 Ugushyingo 2020 saa tatu za mu gitondo, kandi Munyagishari akazaba ari kumwe n’umwunganira.

Bernard Munyagishari wayoboye MRND ku Gisenyi, aregwa guha amabwiriza urubyiruko rw’Interahamwe yo kwica Abatutsi, ndetse no kubashakira imihoro n’amagerenade byo gukora ubwo bwicanyi.

Icyaha cyo guhohotera abagore no kubasambanya yabanje kuregwa urukiko rwakimuhanaguyeho.

Ubwo Urukiko Rukuru rwari rumaze kumukatira igifungo cya burundu muri 2017, Munyagishari yahise ajuririra mu Rukiko rw’Ikirenga (kuko urw’ubujurire rutari rwagashyizweho), akaba yaravugaga ko yahawe abunganizi atemera kandi ko ibyaha aregwa byari bigikeneye gukorwaho iperereza.

Nyuma yaho ariko Munyagishari yaje kubwira Ubushinjacyaha ko azaburana yemera icyaha, ubu akaba arimo gusaba kugabanyirizwa igihano.

Humanity and Inclusion irimo kugirana ibiganiro n’inshuti z’umuryango kugira ngo abana bahohoterwa bitabweho aho gutuma bagira ihungabana

Abitangaje mu gihe inshuti z’umuryango zivuga ko hari ababyeyi bananirwa kwakira ibyabaye ku bana babo bigatuma bamwe babirukana, nyamara ari bwo bakabaye bitabwaho bagatozwa kwitegura kuba ababyeyi.

Inshuti y’umuryango mu murenge wa Rwempasha, Akarere ka Nyagatare Mohamed Kamanzi, avuga ko abana bavuka ku bana b’abangavu batewe inda bakunze kutandikwa mu bitabo by’irangamimerere, ahanini kubera ihungabana ba nyina baterwa no kutihanganirwa n’imiryango bakomokamo.

Avuga ko impamvu imiryango y’abo bana itabyakira ibiterwa ahanini n’icyo bari bateze muri abo bana kidindiye.

Agira ati “Ababyeyi bamwe ntibakira kuba abana babo batwaye inda kubera ibyo bari babitezemo nko kwiga ndetse no gushyingirwa akamuhesha ishema nk’umubyeyi. Bituma bamwe babirukana bafite n’inda ugasanga bamwe bagiye kuzikuramo, hari abo zihitana. Mbese usanga aba bana bahozwa ku nkeke ari na yo mpamvu batandikisha abo babyaye mu bitabo by’irangamimerere”.

Umuhuzabikorwa wungirije w’Inama y’Igihugu y’Abagore mu Karere ka Nyagatare Mutegwaraba Egidia, avuga ko umwana watewe inda aba afite ihungabana bitewe ahanini n’ihohoterwa yakorewe kandi rishobora kumugiraho ingaruka mbi mu buzima bwe bwose.

Avuga ko igihe umwana ahuye n’icyo kibazo aba akwiye kwegerwa agategurwa kuba umubyeyi no kwita ku mwana azabyara.

Furere Wellars avuga ko umwana watewe inda aba agifite uburenganzira ndetse n’agaciro mu muryango bityo agomba kwitabwaho

Ati “Dushishikariza ababyeyi kwegera abana batewe inda, bafashwe ku ngufu, bakabaganiriza bakabategura kuba ababyeyi, uko azafata umwana azabyara, uko azamwandikisha mu bitabo by’irangamimerere, urabona aba akiri umwana, ubwenge bwe buba butarakira ko agiye kuba umubyeyi”.

Umuhuzabikorwa w’umushinga wo kurwanya ihohoterwa rishingiye ku gitsina mu Mpuzamiryango Pro-Femmes Twese Hamwe, Furere Wellars, avuga ko ku bufatanye na Minisiteri y’Uburinganire n’Iterambere ry’Umuryango (MIGEPROF), barimo gutegura inyandiko igaragaza uko umwana wahohotewe agaterwa inda agomba gufatwa mu muryango.

Avuga ko umwana watewe inda afite uburenganzira ndetse n’agaciro mu muryango bityo adakwiye gutereranwa.

Agira ati “Umwana watewe inda aba akiri umuntu afite uburenganzira n’agaciro mu muryango, ikindi turabegeranya tukabibutsa uburenganzira bwabo kugira ngo batongera gushukwa bagaterwa inda”.

Furere Wellars asaba imiryango y’abana bahohotewe bagaterwa inda kubitaho, kugira ngo na bo biyakire bityo babashe no kwandikisha abana mu irangamimerere.

Avuga ko kwandikisha umwana mu irangamimerere bitagombera ababyeyi bombi ahubwo n’umwangavu wamubyaye yamwandikisha cyane ko se aba ataramwemera cyangwa yarahunze cyangwa akurikiranwa mu mategeko.

Ibiganiro bigamije kurinda abana ihohoterwa no kubamenyesha uburenganzira bwabo birimo guhabwa abafite aho bahuriye no kurinda abana ihohoterwa mu karere ka Nyagatare harimo n’inshuti z’umuryango, bikaba bitangwa ku bufatanye bwa Pro-Femmes Twese Hamwe ndetse n’umuryango ‘Humanity and Inclusion’.