Blog

Kuva mu 2015 itsinda ry'abasirikare b'u Burundi ryagerageza guhirika ubutegetsi bwa Pierre Nkurunziza wayoboraga icyo gihugu ariko uwo mugambi ukaburizwamo, Leta y'u Burundi yakunze kumvikana yikoma u Rwanda irushinja gucumbikira abacuze uyu mugambi nubwo narwo rutahwemye kugaragaza ko abo rufite ari impunzi z'Abarundi.

Mu kiganiro n'abanyamakuru cyabaye mu kwezi gushize Umuvugizi w'Ibiro bya Perezida mu Burundi, Jean Claude Karerwa, yumvikanye avuga ko bazakomeza gusaba amahanga gushyira igitutu ku Rwanda kugira ngo rutange abo bantu bushinja gushaka guhirika ubutegetsi bwa Pierre Nkurunziza.

Ati “Ubutabera nicyo kintu cyonyine kizazana ubumwe mu Barundi, kandi abateguye umugambi kubera ko ibyaha byakorewe mu Burundi, bigakorerwa Abarundi, ubutabera bw'u Burundi bukwiye kubikurikirana […] icyo dusaba ni uguhamagarira amahanga gushyira igitutu ku Rwanda ngo rwubahe amategeko mpuzamahanga.”

Nubwo nta makuru ajyanye n'amazina y'aba bantu, Leta y'u Burundi iherutse gushyikiriza iy'u Rwanda urutonde rw'aba bantu ishaka ko iyishyikiriza. Kuri Leta y'u Burundi ivuga ko gushyikirizwa aba bantu ari kimwe mu bizatuma umubano w'ibihugu byombi wongera kumera neza.

Aganira na The EastAfrican, Umunyamabanga wa Leta muri Minisiteri y'Ububanyi n'Amahanga n'Ubutwererane ushinzwe Umuryango wa Afurika y'Iburasirazuba, Prof Nshuti Manasseh, yavuze ko u Rwanda rudashobora gutanga aba bantu kuko baje nk'impunzi kandi bakaba barinzwe n'amategeko mpuzamahanga.

Ati “Abitwa ko bacuze umugambi wo guhirika ubutegetsi baje mu Rwanda nk'impunzi kandi tugengwa n'amategeko mpuzamahanga mu bijyanye no guhererekanya impunzi. Ku bw'ibyo u Rwanda ntirushobora kubatanga, twaba tunyuranyije n'amategeko mpuzamahanga.''

Yakomeje asaba Leta y'u Burundi kureka kugira aba bantu urwitwazo. Ati “Ndatekereza ko u Burundi budakwiye gukoresha uru rwitwazo rw'impunzi. Nabo bafite impunzi zacu ariko ntitubasaba kuzigarura. Nta Guverinoma n'imwe ifite ububasha bwo gukora ibyo cyereka umuntu atari impunzi ahubwo ari umunyabyaha.''

Nshuti Manasseh yakomeje avuga ko u Rwanda ruri kureba aho abo bantu bazajyanwa aho kubasubiza mu Burundi.

Ati “Icyo dushaka gukora ni ukubahereza ikindi gihugu aho bashobora kujya kure y'u Burundi. Ariko n'ibi bitaraba, aba bantu si ikibazo ku Burundi, ntibari gukoresha u Rwanda nk'ahantu bashobora guterera u Burundi baturutse.''

Mu Ugushyingo nibwo Leta y'u Burundi yafashe icyemezo cyo kugurisha mu cyamunara imitungo y'abo ishinja gushaka guhira ubutegetsi.

Mu byatejwe cyamunara kuva ku wa Gatatu tariki 11 Ugushyingo kugeza ku wa 14 Ugushyingo nk'amatariki yashyizweho na Minisiteri y'Ubutabera mu Burundi, harimo ibikoresho by'amoko yose guhera ku biryamirwa, imiguru y'inkweto, imyenda, za frigo, matelas, za radiyo, televiziyo, intebe za pulasitiki, kugeza ku modoka na za moto nk'uko Jeune Afrique yabitangaje.

Mu mitungo yagurishijwe, ba nyirayo barimo Général Herménegilde Nimenya, Marguerite Barankitse uyobora Maison Shalom, Onésime Nduwimana wahoze ari Umuvugizi w'Ishyaka CNDD-FDD na Léonidas Hatungimana wabaye Umuvugizi wa Perezida Pierre Nkurunziza.

Ikinyamakuru Iwacu cyo mu Burundi cyatangaje ko mu birego byamenyekanye, nta na hamwe ayo mazina abiri ya nyuma yari yarigeze atungutswa.

Mu bandi harimo Bernard Busokoza wabaye Visi Perezida w'u Burundi na Alexis Sinduhije wigeze kwiyamamariza kuyobora icyo gihugu.

Igurishwa ry'imitungo y'abo bantu muri rusange bagera muri 30 kandi ryanakoze ku mitungo y'abasirikare icyenda barimo abafunzwe nka General Godefroid Niyombare wahoze ari Umugaba Mukuru w'Ingabo na General Cyrille Ndayirukiye wabaye Minisitiri w'Ingabo.

Umubano w'u Rwanda n'u Burundi uragana he?

Kuva abasirikare bashaka guhirika Ubutegetsi bwa Pierre Nkurunziza Leta y'u Burundi yarushijeho kwikoma iy'u Rwanda itangira kurutwerera kuba inyuma y'imitwe yitwaje intwaro yagiye igaba ibitero mu Burundi, bwo bukavuga ko 'bwatewe n'u Rwanda.'

Ibi birego by'u Burundi byagiye bigaragazwa inshuro nyinshi nk'ibidafite ishingiro ndetse na Domitien Ndayizeye wabaye Perezida w'u Burundi muri Gashyantare 2020 yumvikanye anenga ubutegetsi bw'igihugu cye kubera uburyo bwifata mu kibazo bufitanye n'u Rwanda, bugakomeza kuvuga ko rubushotora aho gukemura ibibazo bufite.

Yagize ati 'Ikibabaje ni uburyo abayobozi bariho uyu munsi bafata ikibazo dufitanye n'umuturanyi wacu wo mu Majyaruguru y'Akanyaru. Usanga bihuta cyane. Reba nk'uburyo urubyiruko rwo mu Ishyaka CNDD-FDD ruba ruri mu mihanda rutera hejuru mu mvugo zamagana u Rwanda cyangwa abarwanashyaka b'ubutegetsi bigaragambiriza ku mupaka w'u Burundi n'u Rwanda. Ibi bintu ntabwo bihesha icyubahiro igihugu cyacu na gato ahubwo bigaragaza ikibazo gihari.'

Gusa nubwo bimeze gutya ubuyobozi bw'u Rwanda ntibuhwema kugaragaza ko hari igihe kizagera umubano w'ibi bihugu by'ibituranyi ugasubira kuba mwiza nk'uko wahoze.

Mu Ukwakira ubwo Minisitiri w'Ububanyi n'Amahanga w'u Rwanda, Dr Vincent Biruta, yahuraga na mugenzi we w'u Burundi, Amb. Albert Shingiro, nyuma y'ibiganiro bagiranye yatangaje ko baganiriye byinshi mu byatuma umubano wongera kuba mwiza hagati y'ibihugu byombi.

Minisitiri Dr Biruta yavuze ko baganiriye ku byatumye umubano w'ibihugu byombi wangirika cyane mu 2015, hemezwa gukora ibishoboka mu gusubiranya umubano, ari nayo mpamvu yemeye ubutumire bw'uruzinduko mu Burundi.

Yakomeje ati “Twiyemeje gukomeza gukora ibishoboka byose kugira ngo umubano hagati y'ibihugu byacu ube waba mwiza, ari nayo mpamvu nemeye n'ubutumire bwa mugenzi wanjye bwo kuzagirira uruzinduko mu gihugu cy'u Burundi, ku matariki tuzumvikanaho.”

Icyizere cy'uko umubano uzasubira uko wahoze giherutse kugaragazwa kandi na Perezida Kagame ubwo yagezaga ku Banyarwanda ijambo rikubiyemo uko ishusho y'igihugu ihagaze.

Muri iri jambo yavuze ku wa 21 Ukuboza 2020 yagaragaje ibijyanye n'uko umutekano n'ububanyi n'amahanga bihagaze yemeza ko u Rwanda rwafatanyije n'ibihugu kugerageza gukemura ibibazo by'umutekano muke mu karere ndetse ko rugikomeza gufatanya n'abaturanyi.

Perezida Kagame yavuze ko hari ibitaragenda neza mu bubanyi n'amahanga birimo n'umubano n'u Burundi ariko agaragaza ko amaherezo 'bizabonerwa umuti'.

Umunyamabanga wa Leta muri Minisiteri y'Ububanyi n'Amahanga n'Ubutwererane ushinzwe Umuryango wa Afurika y'Iburasirazuba, Prof Nshuti Manasseh, yavuze ko nta buryo u Rwanda rwashyikiriza u Burundi abo bushinja gushaka guhirika ubutegetsi kandi bari mu gihugu nk’impunzi

Nimushimire Uwiteka ko ari mwiza kuko imbabazi ze zihoraho iteka ryose. Zaburi136: 1

Iyo urebye inkomoka y’iyi zaburi , ni zaburi yibutsaga abisiraheli imyaka 430 bamaze mu buretwa. Wakumva ko ntacyo gushima Imana kirimo kuko barapfuye, baratotejwe birasa neza n’ibyatubayeho uyu mwaka cyangwa ibyakubayeho mu buzima ariko Abisiraheli bo bashimaga Imana kubw’imbaraga zayo zabakuye muri Egiputa kandi bayishimiraga kubwo kubatekerezaho ikabana nabo.

Mu kiganiro 'Ubutumwa bukiza’ Pasiteri Habyarimana Desire aragaruka ku bintu 7 dukwiye gushimira Imana mu gihe dusoza umwaka wa 2020 twinjira muri 2021.

Iyo umuntu afite ibyifuzwa byinshi mu buzima, iyo Imana ikemuye kimwe uhita ubona hakiri ibindi byinshi ariko ibyo gushimira Imana birahari. Imana ikwiye guhora ishimwa no mu gihe ibyo twifuza bitagenze nkuko twabishakaga. Dukwiye gushima Imana kubera ibi bintu 7

Agakiza

Agakiza ni ikintu kitagurwa amafaranga, utaha umwana wawe, umugore wawe, umugabo wawe cyangwa umuntu ukunda. Agakiza gatangwa n’Imana, kuba warakijijwe warakiriye Yesu nk’Umwami n’Umukiza urabyumva wakize kurimbuka by’iteka, wakize urubanza ruzacirwa abanyabyaha, wakize guhora ufite umutima ugucira urubanza.

Agakiza ni ikintu umuntu atabona uko asobanura ariko mwibuke ko twari twarakatiwe urubanza rwo gupfa aho Bibiliya ivuga ngo 'Ibihembo by’ibyaha ni urupfu ariko impano y’Imana ni ubugingo buhoraho. Iyo umuntu araho agenda ntabwo yakumva ko hari igihe azajya mu rubanza ariko icyaha kizashyirisha umuntu mu rubanza uko biri kose. Ku bakijijwe impamvu ya mbere yo gushimira Imana ni agakiza.

Ku batarakizwa gushima Imana ni iby’ingenzi kuba wumva ijambo ry’Imana mu bwisanzure, ushobora gukoresha amahitamo yawe ukakira ako gakiza nabyo ni ubundi buntu. Mwibuke ko hari ibindi bihugu niyo batekereje ko ushobora kuba umukristo gusa bakakubona wenda wifatanyije nabo ushobora kubizira. Ikizira cyo ni ugutunga Bibiliya yera

Menya ibyo agakiza kuzuye gakiza https://www.agakiza.org/Agakiza-kuzuye-kagizwe-n-ibiki.html

Imigisha Imana yaduhaye

Iyo tuvuze imigisha tumaze igihe abantu baratakaje akazi abandi barabaye abashomeri , abandi bashonje, abandi barahuye n’ibibazo bitandukanye wakumva ko nta cyo gushimira Imana gihari, Erega no kuba uhumeka ni umugisha. Kuba korona virusi yarishe ibihumbi ku isi wowe ugasigara uri muzima naryo ni ishimwe rikomeye.

Iyo tuvuze imigisha ntabwo tuyibara mu bifatika gusa ubu ugiye kwa muganga ukabona umwuka abantu bahumeka uburyo uhenda nibwo wamenya agaciro ko kuba uhumeka ukabishimira Imana.

Imigisha yo mu gakiza k’Imana kubwo ubuntu twarayihawe, kandi yaduhaye isoko y’imigisha kuko yaduhaye Kristo ni we mugisha mukuru. Hari amahirwe ufite abandi bantu badafite, hari abantu basenga kugira ngo babe bamera nkuko umeze ibyo nabyo ukwiye kubishimira Iman.

Erega no kuba uri umushomeri udafite akazi ukwiye kuyishimira, no kuba mu gihe cya guma mu rugo inzara itarakwishe ngo upfe nabyo ukwiye kubishimira Imana. Usubije amaso inyuma wasanga hari imigisha Imana yaguhaye.

Intambara Imana iturwanira

Imana iturwanira intambara cyane pe!, wari uzi ko uwo mwanya urimo mu kazi hari abantu bawifuza, Kuba ugihembwa ukwezi gushize na byo ari umugisha?. Ukwiye gushima Imana kubw’imbabazi zayo ko ihora ikurwanira intambara. Kuba barakuroze ntupfe nabyo ni ubuntu bw’Imana.

Rimwe na rimwe hari igihe twifuza kubaho ubuzima butarimo Imana, kuba ufite akabati karimo imyenda, ufite akazi mu buzima bigenda ukaba wumva Imana atayikeneye cyane. Ariko abanyuze mu bibazo bikomeye bahuye n’imitego ya Satani Imana ikabarwanira intambara ibi barabyumva.

Dushima kuko ari cyo twaremewe

Mu bintu Imana itakora ni ukwishima yo ubwayo. Mubyo Imana yaturemeye ni ukuyishima waba wabyaye cyangwa utabyaye, waba wungutse cyangwa wahombye, waba wageze ku ntego z’ubuzima cyangwa utazigezeho, waba wateye imbere cyangwa utateye imbere.

Haba hari uburwayi cyangwa uri muzima, waba uri mu bitaro cyangwa uri iwawe mu rugo, waba ufunzwe cyangwa uri ahandi Imana yakuremeye kuyishimira, uri ikiremwa cyaremewe gushimira Imana.

Hari ubwo Satani aturiganya ntitwumve ko aricyo twaremewe. Niba ikirahure cyararemewe kunywa amazi ni cyo cyaremewe, niba itasi yararemewe kunywa icyayi ni cyo yaremewe. Niba imeza yarakorewe kugira ngo abantu bayirireho cyangwa se bayishyire mu biro uhita ubona ko ari cyo yaremewe.

Imbabazi Imana ihora itugirira

Subiza amaso inyuma urebe amakosa wakoze umwaka wose. Nagira ngo nkwibutse ko uri umunyantege nke nubwo nawe ubizi kuko hari ingeso uzi zakunaniye ugerageza ugasenga, ukatura, ukiyiriza ugakora ibishoboka byose ariko ugahora urwana na zo. Gukizwa ni ugutsindishirizwa ariko nyuma yo gutsindishirizwa duhora turwana no guhinduka ku ngeso kugira ngo duse na Kristo Yesu.

Dukwiye gushima Imana kubw’imbabazi ihora itugirira kubw’ibyaha dukora n’amakosa dukora. Uhereye kuri Adamu umuntu wa kamere yaratsinzwe, muri Kristo Yesu honyine niho dushobora gutsindira. Yewe Imana ihora itugirira imbabazi, buri munsi iratubabarira. Icyaha ntabwo ari igikorwa cyakozwe gusa ahubwo ni igitekerezo( icyo wamaze gutekereza).

Fata igihe wisubiremo utekereze amakosa wakoze uyu mwaka wose usabe Imana imbabazi kandi yiteguye kukubabarira.

Dushima Imana kubera ibitangaza byayo

'Nimushime ikora ibitangaza yonyine kuko imbabazi zayo zihoraho iteka ryose' Zaburi 136: 4

Imana ikora ibitangaza yonyine. Imana yabambye ijuru nta muyedi uyifashije kandi rikaba ritatugwira nta nkigi rigira. Abisiraheli mu butayu uzi ko akenda bambitse umwana yavutse yakuraga n’agakanzu kagakura?, uzi ko agakweto bambitse umwana yavutse yakuraga n’agakweto kagakura?. Mu myaka mirongo ine ntibigeze bahindura imyenda nta nubwo bigeze bahindura inkweto kubw’imbabazi zayo zihoraho ibihe bidashira.

Abenshi babaye mu buhungiro imyaka mirono itatu batanafashwe n’eza, kubw’imbabazi z’Imana zibagarura mu gihugu cyabo. Abandi banyuze muri Jenocide yakorewe abatutsi miliyoni irapfa ubuntu bw’Imana bubabeshaho, izo ni imbabazi zayo. Hari ubwo waba nta kazi ufite ariko ubuntu bw’Imana bukagutunga.

Kuba Imana yaratugize abageni ba Krisito Yesu

Ibyiringiro by’abizera, ibyiringiro by’itorero ni ukuzabona Yesu ahagaze ku bicu. Ikintu gikwiye gutuma duhora dushima Imana ni uko umunsi umwe Yesu azatwara itorero tukaruhuka imibabaro yose yo mu isi.

Imana iguhishurire niba izina ryawe ryanditswe mu gitabo cy’ubugingo, fata akanya usubize amaso inyuma urebe ibyo wakiraniwemo, gira icyo uvugana n’Imana uyisabe imbabazi. Twibuke ko nubwo turangaye impanda yo izavuga. Yesu azagaruka gutwara abizera.

Ikibazo, ese azasanga uri maso?, ubuzima bwawe burakangutse, ese nta mpamvu yaba yaragusubije inyuma ukumvu utari hafi y’Imana?.

Umva hano inyigisho yose: Ibintu 7 dukwiriye gushimira Imana mu kurangiza umwaka wa 2020

Source: Agakiza Tv

[email protected]

Ni mu muhango wabaye kuri uyu wa 30 Ukuboza 2020, aho witabiriwe n'abayobozi batandukanye ariko bake bitewe no kubahiriza amabwiriza yo kwirinda icyorezo cya Coronavirus.

Uru rugomero rwitezweho kongera ingufu z'amashanyarazi mu baturage no kongera ibikorwa remezo bikoreshwa nayo, bityo bikazazamura iterambere ry'abaturage muri rusange.

RMT Energy development Ltd ishamikiye kuri Sosiyete isanzwe ikora mu buhinzi bw'icyayi ikanatunganya umusaruro wacyo (Rwanda Mountain Tea), ariko bakibanda mu bikorwa birimo no kubaka ingomero zitanga ingufu z'amashanyarazi, aho uru rugomero rwa Giciye ya III rwuzuye rutwaye akabakaba miliyoni 38$.

Abaturiye urwo rugomero bavuze ko bishimiye kubona amashanyarazi hafi yabo, kuko azaba umusemburo w'iterambere ryabo ndetse bakaba baratangiye kuyabyaza umusaruro kuko banabonyemo akazi mu gihe cyo kurwubaka.

Mutuyimana Gaudence yagize ati “Uru rugomero rwatubereye igisubizo rugitangira kubakwa, nahabonye akazi ubu mfite abana batandatu bose biga neza, nkabambika [kandi] nkabagaburira neza. Naguze amatungo magufi n'umurima wo guhingamo, ibyiza by'uru rugomero biracyaza kuko twiteguye kuva mu kizima tugacana [ndetse] tugakora n'indi mirimo iduteza imbere”.

Nsabimana Onesphore na we yavuze uru rugomero rwamuhinduriye ubuzima ati “Kuva natangira gukora muri uru rugomero maze kugura inka ebyiri, naguze imirima ubu mpinga mu kwanjye ntakwatisha, nubatse neza n'amazi meza ndayafite kandi byose mbikesha akazi nkora aha, ikindi ubu turi kuva mu mubare w'abataka amashanyarazi kuko azahita atugeraho tukava mu kizima”.

Umuyobozi Ushinzwe guhuza Ibikorwa by'Ubwubatsi bw'Urugomero rwa Giciye III muri RMT Energy Development ltd, akaba n'Umuyobozi Mukuru wa Rwanda Mountain Tea Ltd, Kabeja Alain, yashimiye by'umwihariko Leta y'u Rwanda itanga amahirwe ku bashoramari mu bikorwa By'iterambere, akavuga ko biteguye kuyabyaza umusaruro.

Yagize ati “Mbere ya byose turashima Leta y'u Rwanda irangajwe imbere na Nyakubahwa Perezida wa Repeburika, uha amahirwe abashoramari mu gushora imari mu bintu bitandukanye, natwe twishimiye ayo mahirwe twahawe ndetse twiteguye kuyabyaza umusaruro kuko iyo umuntu ashoye aba ashaka n'inyungu, ariko bikajyana n'iterambere ry'umuturage duhereye ku bahabonye akazi”.

Umuyobozi Mukuru wa Sosiyete y'u Rwanda Ishinzwe Ingufu (REG), Ron Weiss, nawe yavuze ko uru rugomero ari inyunganizi ikomeye izabafasha igihugu kugeza amashanyarazi ku baturage bose mu mwaka wa 2024, ndese bikazagabanya igiciro cy'umuriro w'amashanyarazi muri rusange.

Guverineri w'Intara y' Uburengerazuba, Munyantwari Alphonse, yavuze ko kugira urugomero nk'uru mu ntara ayoboye ari ikimenyetso cy'ubudasa n'iterambere ry'abanyarwanda, ashimira RMT Energy yagize uruhare mu iyubakwa ry'uru rugomero anabizeza ubufatanye buhoraho, ndetse anavuga ko abaturiye uru rugomero bari mu ba mbere bazahabwa kuri aya mashanyarazi.

Yagize ati “Mbere twajyaga gutaha urugomero rufite nka Megawatt ebyiri, tugahura twumva ari ibintu bitangaje, rimwe na rimwe atari n'iz'abanyarwanda. Kugira urugomero nk'uru bigaragaza iterambere Abanyarwanda bamaze kugeraho, turashima umufatanyabikorwa wabigizemo uruhare RMT Energy, dusanzwe tunagirana ubundi bufatanye nko mu nganda zitunganya umusaruro w'icyayi, ikindi ntitwifuza ko abaturage cyane abaturiye aha babura amashanyarazi, ibyo biri mu nshingano zacu mu kubikurikirana bakawuhabwa”.

Uru rugomero rw'amashanyarazi rwa Giciye ya III rwatangiye kubakwa muri Werurwe 2019, rwuzura mu mezi 24 ariko rwuzuye mu mezi 18 gusa. RMT Energy izarukoresha mu gihe cy'imyaka 25 mbere yo kurwegurira leta nk'uko amasezerano y'impande zombi abivuga.

Uru rugomero rwa Giciye ya III rwuzuye ruje rusanga izindi ngomero enye zose zubatswe na RMT Energy development ltd zirimo Giciye I na Giciye II zifatiye ku mugezi wa Giciye mu Karere ka Nyabihu, ndetse n'izindi ziri mu Karere ka Burera na Rubavu, aho zose uko ari eshanu zifite ubushobozi bwo gutanga Megawatt 20 z'amashanyarazi.

Abayobozi barimo n’uwa REG, Ron Weiss, bafunguye uru rugomero ku mugaragaro

Abitabiriye uyu muhango bubahirije amabwiriza yo kwirinda ikwirakwira rya Coronavirus

Abayobozi batambagijwe uru rugomero berekwa ibikoresho bishya ruzakoresha

Uru rugomero rufite ubushobozi bwo gutanga Megawatt 9,8 z’amashanyarazi

Abaturage baturiye uru rugomero bishimiye iki gikorwa, bavuga ko bizabateza imbere

Aba baturage babwiwe ko ari bo ba mbere bazungukira kuri uru rugomero

Uru rugomero rwuzuye rutwaye miliyoni 38$

Uyu mwaka wa 2020 na mbere yaho hari amafoto ya Nyakubahwa Paul Kagame na  Madamu we Jeannette Kagame, yagiye agera hanze bamwe akabageraho abandi akabacika. InyaRwanda, yakwegeranirije amafoto menshi watunga mbere y’uko uyu mwaka wa 2020 urangira  dore ko ubura amasaha make cyane ngo tuwusoze.

Muri aya mafoto harimo ayerekana urukundo rudasanzwe bombi bakundana nk’icyitegererezo cyiza ku baturarwanda n’abanyamahanga batari bake, ayerekana ubwitange n’urukundo bakunda abanyarwanda, akanyamuneza, gukunda siporo n’ibindi. Ni amafoto yagiye afatwa mu bihe bitandukanye yaba mu 2020 na mbere yaho, akaba afite umwihariko w’uko yakunzwe cyane.

Ku mbuga nkoranyambaga benshi kwerekana amarangamutima yabo kuri Perezida Paul Kagame ndetse hari n’abahamya ko nta gushidikanya ari we mu Perezida ukunzwe cyane muri Afrika, ibitumwa bamwe bamwita Perezida wa Afrika. Perezida Kagame na Jeannette Kagame, bakunze gukangurira abanyarwanda gukundana no gufashanya, gukora cyane hahangwa imirimo no gukora Siporo ngororamubiri nka kimwe mu bituma umuntu amererwa neza akarwanya gusaza imburagihe. 

Perezida Kagame kandi akunda imikino itandukanye nko gukina Tennis, no gushyigikira cyane umupira w’amaguru, uw’amaboko cyane Basketball akunda kugaragara ku bibuga byayo areba imikino y’amakipe, cyane cyane ibera muri Kigali Arena inyubako nshya ikunze kuberamo ibikorwa bikomeye by’imyidagaduro.

AMWE MU MAFOTO YA PEREZIDA KAGAME NA MADAMU JEANNETTE KAGAME YAKUNZWE N’ABATARI BAKE

Perezida Kagame benshi bamufata nka Perezida wa Afrika yose

Imvura n’izuba ntibibuza Perezida Kagame gukora no kwitabira ibikorwa bifitiye akamaro abanyarwanda

Perezida Kagame ateruye umwuzukuru we

Perezida Kagame na Madamu Jeannette Kagame bakunda cyane gukora siporo

Uyu munyarwanda waguye muri iyi mpanuka yitwa Kayiranga Saïdi, yari umuganga ucisha abantu mu cyuma (radiography) yari mu ikipe y’Abaganga itanga ubufasha mu buvuzi muri Croix Rouge.

Bivugwa ko yabanje gukora muri radiography mu Bitaro byitiriwe Umwami Fayisali i Kigali ; ageze aho ajya gukorera muri Legacy Clinic i Kigali.

Ngo yabaga mu itsinda ry’Abaganga ba Croix Rouge rikorera muri Afghanistan akaba yarafashe indege aje mu Biruhuko bisoza umwaka, 'iraswa' igeze ku kibuga k’indege mu Mugi wa Aden mu Majyepfo ya Yemen.

Umwe mu bahafi bakora akazi kamwe, yabwiye Umuseke ko murumuna wa Kayiranga Saïdi ari we wamubwiye inkuru ibabaje y’urupfu rwa mukuru we.
Amakuru avuga ko uyu Kayiranga yari umugabo wubatse ufite umugore n’umwana umwe.

Kiriya gitero cyahitanye abantu 22 abandi 50 barakomereka nk’uko inzego z’ubuyobozi bwumugi wa Aden zabyemeje.

Humvikanye ikintu cyaturitse ubwo indege itwaye Abagize Guverinoma yari ivuye muri Arabia Saoudite ibajyanye i Aden.

Abakozi bashinzwe ubutabazi n’Abayobozi bari hamwe muri iriya ndege ariko Minisitiri w’Intebe, Maeen Abdulmalik Saeed yavuze ko abagize Guverinoma bameze neza.

Minisitiri ushinzwe Itumanaho yashinje inyeshyamba z’aba-Houthi zishyigikiwe na Iran kugaba kiriya gitero.

Komite Mpuzamahanga ya Croix Rouge (ICRC) yavuze ko muri iki gitero cyagabwe ku wa Gatatu umwe mu banyamuryango bayo cyahitanye, babiri baburiwe irengero n’abandi batatu bakomeretse.

Kuri Twitter banditse ngo 'Abakozi bacu bari ku kibuga k’indege bari kumwe n’abandi basivile. Uyu ni umunsi ubabaje kuri twe no ku baturage ba Yemen.'

Hari urubuga rwa Internet muri Yemen rwavuze ko mu bapfuye harimo Minisitiri w’Umurimo wungirije, Yasmin al-Awadhi, na Minisitiri wa Siporo wungirije witwa, Moneer al-Wajeeh naho Minisitiri wungirije ushinzwe Ubwikorezi, Nasser Sharif ari mu bakomeretse.