Blog

Iri rushanwa yasize atangije rya Miss Career Africa rihuza abakobwa bo muri Afurika, ntabwo rigendera ku bwiza ahubwo rireba umushinga w'umukobwa, kuko icyo rigamije ni uguteza imbere igitsinagore kurusha ibindi byose.

Iri rushanwa riba nyuma y'imyaka ibiri, muri uyu mwaka ryabereye mu Rwanda ryegukanwa n'Umunya-Zimbabwe Natasha Dlamini mu Ugushyingo 2020.

Frank Rubaduka wari ufite imyaka 28 yashyinguwe kuri uyu wa Gatandatu tariki 2 Ukuboza 2021, ku ivuko ry'iwabo i Kabarore mu karere ka Gatsibo mu Ntara y'Uburasirazuba. Ni umuhango wakozwe hakurikizwa ingamba zo kwirinda COVID-19, cyane ko witabiriwe n'abantu bake abandi bakawukurikira kuri Youtube.

Mbere yo kumushyingura hari hamaze iminsi haba ibikorwa bitandukanye bijyanye n'ikiriyo cye ndetse icya nyuma cyabaye ku wa 1 Mutarama 2021.

Uko Frank Rubaduka yahoramye

Frank Rubaduka yari yagiye mu Bugesera ku kiyaga cya Cyohoha mu kiruhuko no gusura ubutaka yari ahafite ndetse n'amatungo ye yari ahorororewe.
Nyuma yaje guhamagara inshuti ye yitwa Alexander Ndamukunda ayibwira ko ayishaka, iyi nshuti yabanje kubura ariko ku wundi munsi[ku wa Gatandatu] imusangayo, ku kiyaga cya Cyohoha.

Icyo gihe, Alexander Ndamukunda avuga ko ku mugoroba Frank Rubaduka yamubwiye amabanga y'ubuzima bwe akomeye harimo imishinga yagezeho n'iyo atekereza gukora, ahazaza h'ubuzima bwe mu bijyanye no kwagura umuryango, kugura ubwato bwo kugendamo mu mazi, kubaka inzu n'indi mishinga migari yari afite.

Uyu musore avuga ko we na Rubaduka ku Cyumweru tariki 27 Ukuboza 2020, babyutse bajya gushakisha ubutaka kuri Cyohoha, bigeze ku gicamunsi Frank amusaba ko bajya koga mu mazi ariko Alexander amubwira ko bose batazi koga bityo ko batakagiye mu mazi kandi bose batazi koga.

Ngo Frank yabonye abana bato bari hafi aho ku kiyaga barimo boga abasaba kumwigisha we na Alexander, bituma nawe yinjira mu mazi. Frank yabwiraga Alexander ko adakwiye gutinya, kuko hari byinshi bagiye bakora bagerageza none bakaba barabigezeho kandi neza.

Ndamukunda avuga ko yibukije mugenzi we ko hari igihe nawe amazi yari agiye kumutwara ariko Frank akomeza kumusaba ko bagerageza bakamenya koga. Yavuze ko babanje kogera ku nkombe z'amazi, bagenda bicuma imbere kugeza ubwo Frank ageze ahantu harehare atangira gucubira ntiyongera kumubona.

Yavuze ko we n'abana babiri bari bari kumwe bagerageje kumutabara ariko biranga. Avuga ko yahise ava mu mazi n'abana bajya gutabaza abari ku gasozi binjira mu mazi, umwe muri bo avuga ko yamukandagiye bamukuramo ariko yamaze gupfa.

Rubaduka yakunze umukobwa ananirwa kubimubwira

Umwe mu nshuti za Frank Rubaduka yabwiye IGIHE ko mugenzi we yari afite umukobwa yakunze, ariko akaba ababajwe no kuba apfuye atabimubwiye.

Ati 'Nta mukunzi yagiraga ariko hari umukobwa yari yarakunze tubizi, ariko yarananiwe kubimubwira. Ni kimwe mu bintu byambabaje nkimara kumenya iby'urupfu rwe.'

N'ubwo byari bimeze gutyo ariko, mu mugoroba wo kumusezera bwa nyuma, Alexander Ndamukunda yavuze ko Frank yari yamaze kwemeza igihe azakorera ubukwe.

Ati 'Yambwiye iby'urushako rwe uburyo abiteganyagamo. Ambwira itariki yumva azakoreraho ubukwe bwe yari amaze kuyihitamo. We n'inshuti yacu bari barabiganiriyeho bati twemeze itariki tuyisengere. Tariki 27 yumvaga ari bwo azakora ubukwe, ku wa 27 Ukuboza aba ari bwo apfa.'

Rubaduka Frank yamenyekanye cyane mu kiganiro 'Decide X Show' cyatambukaga kuri TV1. Yatsindiye amadorali ibihumbi 150 kuri Grant & Investment muri Australia ahita akora imishinga irimo Miss Career Africa, HireHerApp, All Trust, Tarama, Guza capital, Tanga na DecideX group.

Kuva mu 2013 kugeza mu 2020, imyigishirize n'amahugurwa yatanzwe na Rubaduka Frank yageze ku bantu barenga miliyoni ebyiri, binyuze mu biganiro yakoraga kuri televiziyo n'inama yagiraga ibigo by'amashuri yisumbuye na Kaminuza birenga 120.
Yavukiye muri Uganda umuryango we utahuka mu Rwanda nyuma y'uko Ingabo zari iza RPA zihagaritse Jenoside yakorewe Abatutsi muri Mata 1994.

Yakuriye mu cyaro arerwa na Se nyuma y'uko nyina umubyara yitabye Imana mu gihe yari afite imyaka itatu y'amavuko.

Ubuhanga bwe mu byo guhanga imirimo; gushaka amikoro no gutanga ubutumwa byatumye yemererwa gukorera mu bihugu 12.

Muri uyu mwaka Rubaduka yanditse igitabo kigaragaza amakosa yakoze mu buzima ariko aticuza. Iki gitabo yacyise '100 mistakes I don't regret'. Apfuye kandi nta kwezi gushize afatanyije na mugenzi we Niyitanga J. Eric bashyize hanze igitabo bise 'The 4 Genius Windows'' cyangwa se 'Amadirishya 4 y'ubuhanga'.

Abo bakoranaga muri Miss Career Africa ntabwo biyumvishaga ko mugenzi wabo yitabye Imana

Buri wese wafataga ijambo yavugaga Frank nk’umuntu wakundaga Imana kandi akanakoresha imbaraga ze zose mu kazi gasanzwe yakoraga

Byari amarira n’agahinda

Dr Fidele Rubagumbya Mukuru wa Frank ubanza ibumuso hamwe n’umugore we mu muhango wo gushyingura Frank Rubaduka

Dr Fidele Rubagumbya Mukuru wa Frank ubanza ibumuso avuga kuri murumuna we witabye Imana

Frank Rubaduka yababaje benshi

Frank Rubaduka yitabye Imana nyuma yo kurohama muri Cyohoha

Imodoka yari irimo umurambo wa Frank Rubaduka

Umurambo wa Frank Rubaduka ukurwa mu modoka

Rubaduka yavugiwe amasengesho ya nyuma

Rubaduka Frank yari aherutse kwandika ibitabo bitandukanye

Mu itangazo Meteo Rwanda yashyize hanze yagaragaje ko muri Mutarama na Gashyantare 2021 hateganyijwe kugwa imvura iringaniye muri rusange ariko hakagira uturere tugusha imvura nke kurusha utundi hashingiwe ku miterere yatwo.

Rigira riti 'Hashingiwe ku ishusho y'imigwire y'imvura mu gihe kirekire, mu gihe cy'aya mezi abiri mu Rwanda hagwa imvura iringaniye iri hagati ya milimetero 50 na 350.'

Iyi mvura izaboneka izaturuka ku buhehere ahanini bugaragara mu Karere ka Afurika y'Iburasirazuba ari nako u Rwanda ruherereyemo ndetse n'imiterere karemano y'uturere tw'imisozi n'amashyamba ahaboneka.

Mu turere tuzagusha imvura nyinshi kurusha utundi harimo Nyamasheke, igice kinini cya Rusizi ndetse n'amajyepfo y'uburengerazuba bwa Nyamagabe. Ibi bice bizagusha imvura iri hagati ya milimetero 250 na 300.

Igice gisigaye cy'Akarere ka Nyamagabe, mu Karere ka Nyaruguru na Huye, igice kinini cy'Akarere ka Karongi, amajyepfo ya Rutsiro ndetse no mu gice cy'amajyepfo y'uburengerazuba bwa Rusizi na Ngororero hazagwa imvura iri hagati ya milimetero 200 na 250.

Imvura iri hagati ya milimetero 150 na milimetero 200 iteganyijwe mu Ntara y'Amajyaruguru mu turere twa Musanze, Burera, Gicumbi, Gakenke na Rulindo, Intara y'Uburengerazuba mu turere twa Rubavu, Nyabihu, Ngororero n'amajyaruguru ya Rutsiro.

Iyi mvura kandi izagwa muri Gisagara, Nyanza, Ruhango, Muhanga, Kamonyi, Nyarugenge, gasabo, Kicukiro, mu burasirazuba bw'Akarere ka Huye na Nyaruguru, amajyaruguru ya Bugesera na Ngoma ndetse no mu majyepfo ya Rwamagana.

Ibice bya Nyagatare, Gatsibo, Kayonza, amajyaruguru ya Rwamagana, amajyepfo ya Bugesera na Ngoma n'igice kinini cya Kirehe bizagwisha imvura iri hagati ya milimetero 100 na 150.

Amajyepfo y'Akarere ka Kirehe icyo gice cy'igihugu kizagwisha imvura nke aho, izaba iri hagati ya milimetero 50 na 100.

Muri Mutarama na Gashyantare hirya no hino mu gihugu hazagwa imvura iringaniye

Umuyobozi wungirije wa APR FC, Maj. Gen. Mubaraka Muganga avuga ko mbere y’uko Rushehshangoga ahagarika gukina umupira w’amaguru yamusezeye ndetse nawe akamugira inama yo kubanza kumva ibyifuzo bya benshi akabona gufata umwanzuro kuko ari umukinnyi igihugu kigikeneye.

Tariki ya 27 Ukuboza 2020, nibwo Rusheshangoga yasezeye bagenzi bakinanaga muri AS Kigali ababwira ko ahagaritse gukina umupira w’amaguru, akaba yarahise yerekeza muri Amerika aho yasanze umuryango we.

Mbere yo gutangaza uyu mwanzuro yafashe, uyu mukinnyi mu bo yasezeye harimo na Maj. Gen. Mubaraka Muganga wabaye umuyobozi we mu myaka 6 yakiniye APR FC.

Maj. Gen. Mubaraka Muganga avuga ko Michel yamusezeye ariko amusaba ko yabanza akumva ubusabe bwa benshi akabona gufata umwanzuro we byaba ngombwa akanisubiraho kuko ari umukinnyi ugikewe utari ukwiriye gusezera ku myaka 26.

Ati' Twababajwe rero no kumva ko yasezeye ku mupira w’amaguru mu myaka yari agezemo yo kwitwara neza kurushaho ndetse no kubera urugero rwiza abakiri bato. Ajya kugenda yansezeyeho musaba ko yafata umwanya akumva ibyifuzo bya benshi akisubiraho kuko ari umukinnyi udasanzwe, umupira w’amaguru w’u Rwanda uracyamukeneye, imyaka 26 ku mukinnyi aba agisigaje nk’indi myaka 10 imbere ye cyane iyo yifata neza nka Rusheshangoga.'

Akomeza avuga ko atari ibyo kwishimirirwa kubura umukinnyi nka Rusheshangoga ku myaka 26 atari ikibazo cy’imvune cyangwa se indi impamvu yo mu kibuga yatuma ahagarika gukina.

Yemeza ko ari umukinnyi w’impano idasanzwe witwaye neza mu ikipe y’igihugu y’abatarengeje imyaka 17 yakinnye igikomeza cy’Isi cya 2011 muri Mexique, yitwara neza mu Isonga ari nabyo byatumye APR FC imubenguka ikamugura ikajya kumwubakiriho muri 2012 ubwo yari itangiye gukinisha abana b’abanyarwanda gusa.

Ati' Rusheshangoga ni umukinnyi w’umunyarwanda ufite impano idasanzwe, twamumenye ari muri Isonga FC tumuzana muri APR FC ngo adufashe igihe twatangiraga politiki nshya yo gukinisha abana b’abanyarwanda muri 2012 kuko twabonaga ko bashoboye.'

Michel Rusheshangoga yavuye mu Isonga FC muri 2012 yerekeza muri APR FC yakiniye imyaka 5 ayivamo muri 2017 yerekeza muri Singida United, yayikiniye umwaka umwe agaruka mu Rwanda kuva 2018-2019 akinira APR FC, yayivuyemo yerekeza muri AS Kigali ari nayo yasorejemo gukina umupira w’amaguru.

Afande Mubaraka Muganga yasabye Rusheshangoga ko yakwisubiraho

Yakinnye igikombe cy’Isi cy’abatarengeje imyaka 17 muri Mexique 2011, aha yari ahanganiye umupira na Raheem Sterling wa Manchester City

Ni umukinnyi wanabaye kapiteni wa APR FC

Ni umukinnyi wagiye ufasha ikipe ya APR FC aho imukeneye