Blog

Miss Nishimwe Naomie aritegura gutanga ikamba rya Miss Rwanda. Ni umwe muri ba Nyampinga b'u Rwanda bagaragaje kunyurwa n'indirimbo z'abahanzi nyarwanda, rimwe na rimwe akanyuzamo akagaragara yumva indirimbo z'abo mu mahanga.

Mu biganiro bitandukanye yagiye agirana n'itangazamakuru, uyu mukobwa yagiye agaragaza zimwe mu ndirimbo akunda n'abahanzi bo mu Rwanda. We n'ibisonga bye bagiye bagaragara baririmba basubiramo zimwe mu ndirimbo z'abahanzi bo mu mahanga.

Yabwiye INYARWANDA, ko mu mwaka 2020 warangiye yakunze indirimbo 13 zirimo iz'abahanzi nyarwanda 10 n'izindi eshatu z'abahanzi bo mu mahanga.

Mu ndirimbo 13 yagaragaje harimo indirimbo eshatu z'umuhanzi Bruce Melodie zirimo 'Saa Moya' yasohotse ku wa 23 Nyakanga 2020, imaze kurebwa n'abantu 2,627,348.

‘Henzapu' yasohotse ku wa 24 Gicurasi 2020 imaze kurebwa n'abantu 577,792 na 'Abu Dhabi' yasohoye ku wa 20 Ukwakira 2020 imaze kurebwa n'abantu 1,216,112.

Mu ndirimbo 13 kandi Nishimwe Naomie yagaragaje harimo eshatu z'abahanzi bo mu mahanga barimo Rotimi binyuze mu ndirimbo 'Love Somebody' yasohoye ku wa 30 Ukwakira 2020 imaze kurebwa n'abantu 4,751, 467.

Indirimbo 'Turn Up the Vibe' ya Ykee Bend na A Pass yasohotse ku wa 03 Gashyantare 2020 imaze kurebwa n'abantu 756,861 na 'One Man' ya Kidi na Adina yasohotse ku wa 12 Ugushyingo 2020, imaze kurebwa n'abantu 1,196,991.

Miss Nishimwe Naomie kandi yashyize ku rutonde rwe indirimbo 'Ntabwo yantegereza' y'umuhanzikazi Ariel Wayz yasohotse ku wa 24 Ukuboza 2020, imaze kurebwa n'abantu 35, 161.

Mu ndirimbo 13 Nishimwe Naomie yakunze harimo eshatu z’abahanzi bo mu mahanga

Urutonde rw'indirimbo 13 Miss Nishimwe Naomie yakunze mu 2020:

1.Mpa Formula ya Juno Kizigenza

2.Saa Moya ya Bruce Melodie

3.Ndaryohewe y'abahanzi b'ikiragano gishya

4.Igare ya Mico The Best

5.Do Me ya Marina, Mbanda na Queen Cha

6.Henzapu ya Bruce Melodie

7.One Man by Kidi na Adina

8.Turn Up the Vibe ya A Pass na Ykee Benda

9.Ntabwo yantegereza ya Ariel Wayz

10.Love Somebody ya Rotimi

11.Agafire ya Kenny Sol

12.Abu Dhabi ya Bruce Melodie

13.Micro ya Davis D

Nishimwe Naomie wabaye Miss Rwanda 2020 yagaragaje urutonde rw’indirimbo 13 yakunze mu 2020 zirimo eshatu za Bruce Melodie

Miss Nishimwe Naomie aritegura gutanga ikamba rya Miss Rwanda

KANDA HANO UREBE INDIRIMBO ‘ABU DHABI’ YA BRUCE MELODIE

KANDA HANO UREBE AMASHUSHO Y’INDIRIMBO ‘NTABWO YANTEGEREZA’ YA ARIEL WAYZ

Ushobora kuba ujya ugira akabazo gato, wenda nko kuribwa umutwe, ugahita utangira gutekereza ko ishobora kuba kanseri cyangwa ikindi kibazo gikomeye. Ikibazo cyose kikubayeho kijyanye n’umubiri ugahita wumva ibintu byacitse ukwiye kwihutira kwa muganga. Ibi nabyo ubwabyo ni indwara.

Ushobora kuba uzi umuntu ukunda kwa muganga cyane, agakomye kose akumva byacitse, yakumva aho ababara gato agatangira gutekereza indwara zikomeye. Iyi burya ni indwara, izwi nka hypochondria disease. Iyi ndwara ishobora kuba ikibazo gikomeye yaba kuyirwaye cyangwa se abahafi bamwegereye.

N’ubwo ari ibisanzwe kuba wahangayika igihe ufite ikibazo mu mubiri, gusa igihe uhangayika bidasanzwe, ku buryo bihungabanya ubuzima bwawe cyangwa se abahafi yawe, biba ari ikibazo gikomeye.

Indwara ya ‘Hypochondria’ irangwa n’iki?

Iyi ni indwara ibarizwa mu cyiciro cy’indwara zibasira imitekerereze aho usanga uyirwaye yibwira ko afite uburwayi kabone nubwo nta bimenyetso yaba agaragaza cyangwa se agaragaza duke.

Iyi ndwara yo gukunda kwa muganga 'hypochondria’ irangwa no guhangayika bidasanzwe n’ubwoba bukomeye bwo kurwara. Akenshi ikunze kuzanwa no guhangayika bidasanzwe (stress), abantu bakunze gufata imiti kenshi, cyangwa se abafite ibindi bibazo mu mitekerereze.

Urwaye hypochondria yakora iki?

Icya mbere ni ukubasha kumenya no kwakira ko ufite iki kibazo. Ibi bizagufasha kuba wabiganira n’abo wizeye (inshuti cyangwa umuryango). Ibi kandi bishobora kugufasha kumva ko ikibazo cyawe kidakomeye; bityo ukazajya ubasha kwihangana no kumva ko ibibazo byose biba bidakomeye nk’uko ubifata.

Ibyo ushobora gufasha ufite ubu burwayi;

Niba ari inshuti cyangwa uwo mu muryango wawe, uziho iki kibazo, ushobora kumufasha mu buryo bukurikira:

1.Gerageza kumushyigikira:Mwereke ko nta gikuba cyacitse, kandi umwereke uburyo uburwayi ari ibisanzwe.Ni ngombwa kumwereka ko muri kumwe, kandi umwumva, ariko ukirinda gushyigikira ibitekerezo bye cyane.

2.Gerageza kumuca ku kugira ubwoba bwinshi, guhora ashakisha ibitagenda nezandetse no gushakisha uburwayi ahatandukanye kuri murandasi (internet)

Ushobora kumurinda guhora ashakisaha aho ajya kwivuza, igihe atangiye kugaragaza utubazo nko kurwara umutwe, ukamushishikariza kunywa amazi, niba ataka umugongo mukaba mwakorana urugendo kugeza ikibazo cyorshye n’ibindi.

Muri macye n’ubwo ubu burwayi bw gukunda guhra kwa muganga bubaho, igihe cyose ubonye ikimenyetso cy’uburwayi, kikamara igihe ni ngombwa kwihutira kugana kwa muganga.

www.healthline.com, inyarwanda.com

[email protected]

Mu mpera z’Ugushyingo 2020, nibwo The Ben yafashe rutemikirere yerekeza muri Tanzania aho amakuru avuga ko yari yagiye muri gahunda zo gusura ibikorwa bya Onomo Hotel asanzwe abereye 'Brand Ambassador’.

Uyu muhanzi avuga ko uretse ibikorwa by’iyi hoteli yari yagiyemo yanahuriyeyo n’umuhanzikazi Rema Namakula wo mu gihugu cya Uganda wari kumwe na Nessim usanzwe amutunganyiriza indirimbo.

Aba bombi bahise bakora indirimbo bise 'This Is Love’ ndetse banafatira amashusho yayo mu gihugu cya Tanzania. Yagiye hanze ku wa 30 Ukuboza 2020.

Kugeza ubu 'This Is Love’ imaze kurebwa n’abagera ku bihumbi 327 mu gihe cy’Icyumweru kimwe imaze ku rukuta rwa YouTube.

Indirimbo The Ben aherutse guhuriramo na Rema

Ubwo The Ben yerekezaga muri Tanzania hari inkuru zavuzwe z’uko yaba yasanzeyo umukunzi we, Miss Uwicyeza Pamella nawe wari muri icyo gihugu yagiye mu biruhuko.

Uyu muhanzi avuga ko kuba umukunzi we yari afite iyo gahunda nawe agahita abona gahunda ijyanye n’akazi byamufashije kwifatanya nawe mu biruhuko cyane ko Miss Uwicyeza byavugwaga ko yajyanye na bamwe mubo mu muryango we.

The Ben wa 2021…

Abakurikranira hafi umuziki nyarwanda by’umwihariko abafana ba The Ben basanzwe bamumenyereye nk’umuhanzi ubaha indirimbo nyinshi kandi nziza haba mu buryo bw’amajwi ndetse n’amashusho.

Mu 2020, The Ben yakoze indirimbo ye imwe yitwa 'Kola’ nayo ariko isohoka mu buryo bw’amajwi gusa, bivuze ko uyu muhanzi nta ndirimbo y’amashusho yigeze akora mu mwaka ushize.

Ni ibintu asobanura ko byatewe n’impamvu zitandukanye zirimo kwita ku muryango we by’umwihariko murumuna we Green P nawe ukora umuziki wa Hip Hop.

Muri rusange mu ndirimbo The Ben yagaragayemo uretse 'Kola’ ye bwite izindi zose
Mu kiganiro na UKWEZI, yavuze ko uyu mwaka wa 2021, ateganya kuwuharira abakunzi b’umuziki we abaha indirimbo nziza kandi nyinshi.

Ati 'Umwaka ushize nabaye nk’uwuharira kwita ku muryango wanjye no kuruhuka ubwanjye, cyane ko n’ibihe byageze aho indege zigahagarara ariko uyu mwaka wa 2021 nkeka ko ugiye kuba mwiza.'

The Ben ntabwo yerura ngo agaragaze indirimbo azashyira hanze gusa hari amakuru yizewe y’uko hari indirimbo ateganya gushyira hanze ari we nyine ndetse n’izindi zirimo iyo yakoranye na Sauti Sol ndetse na Tiwa Savage. The Ben avuga ko 2020, yawuhariye kwita ku muryango no kuruhuka

Binyuze muri gahunda ya FIFA Forward, Ishyirahamwe ry'Umupira w'Amaguru ku Isi, rifasha amashyirahamwe arigize muri gahunda z'iterambere ndetse rikayegereza amashami afasha kwihutisha imishinga itandukanye.

FIFA yaherukaga gufungura ishami ryayo mu gihugu cya Ethiopia mu 2019.

Icyicaro kizashyirwa i Kigali ari icyaherukaga gufungurwa muri Ethiopia muri Gashyantare 2019, kikazajya cyifashishwa n'ibibugu byo muri Afurika y'Iburengerazuba n'iyo Hagati.

Uyu mushinga wa FIFA Forward watangiye mu 2016, mu bindi bihugu FIFA imaze gushyiramo ibyicaro harimo Ubuhinde, Nouvelle Zelande, Panama, Paraguay. Barbados na Leta Zunze Ubumwe z'Abarabu.

Perezida wa FIFA Gianni Infantino aheruka mu Rwanda mu 2018 aho yahuye na Perezida Paul Kagame

1. Inama y’Abaminisitiri yemeje imyanzuro y’Inama y’Abaminisitiri yateranye ku wa 14 Ukuboza 2020.

2. Nyuma yo kubona ko imibare y’abandura icyorezo cya COVID-19 ikomeje kwiyongera, aho icya kabiri cy’abamaze guhitanwa na cyo bapfuye mu gihe cy’ukwezi kumwe kwa 12, Inama y’Abaminisitiri yafashe ingamba zikurikira mu rwego rwo gukomeza kwirinda ko COVID-19 ikwirakwira mu Gihugu hose. Abantu barasabwa kugabanya ku buryo bushoboka impamvu zituma bahura kandi bagakora ingendo gusa mu gihe bikenewe.

Mu rwego rwo gukomeza gukumira ikwirakwira rya COVID-19, abaturage bose barongera kwibutswa ko ari ngombwa kubahiriza amabwiriza yo kwirinda COVID-19 harimo : gusiga intera hagati y’umuntu n’undi, kwambara agapfukamunwa neza no gukaraba intoki. Abatazabyubahiriza bazafatirwa ibihano.

Ingamba zikurikira zigomba guhita zishyirwa mu bikorwa guhera ku wa Kabiri, tariki Ira 5 Mutarama 2021, kandi zizongera kuvugururwa nyuma y’iminsi 15 hashingiwe ku isesengura ry’inzego z’ubuzima.

a) Ingendo zirabujijwe guhera saa mbiri z’ijoro (8:00 pm) kugeza saa kumi za mu gitondo (4:00 am).

b) Ibikorwa byose by’abikorera harimo iby’ubucuruzi, resitora, butiki, amasoko n’amaduka (malls and markets) bizajya bifunga saa kumi n’ebyiri za nimugoroba (6:00 pm).

c) Ingendo hagati y’Uturere dutandukanye tw’Igihugu no hagati y’Uturere n’Umujyi wa Kigali zirabujijwe, kereka ku mpamvu za serivisi z’ubuzima cyangwa izindi serivisi z’ingenzi. Icyakora imodoka zitwaye ibicuruzwa zemerewe kugenda mu Turere twose, ariko ntizitware abantu barenze babiri.

d) Ba mukerarugendo b’imbere mu Gihugu n’abavuye hanze bafite icyemezo cy’uko bipimishije COVID-19 bemerewe gukomeza ibikorwa byabo by’ubukerarugendo.

e) Ibikorwa by’Inzego za Leta n’abikorera bizakomeza, ariko buri rwego rurasabwa gukoresha abakozi batarenze 30% by’abakozi bose, abandi bakozi bagakorera mu rugo, ariko bakagenda basimburana.

f) Amateraniro rusange harimo imihango y’ubukwe ikorerwa mu nsengero, kwiyakira n’inama (meetings and conferences) birabujijwe.

g) Imyitozo ngororamubiri ikorerwa mu nyubako z’imyidagaduro (gyms) no kogera muri pisine (swimming pool) birabujijwe. Icyakora, abantu bacumbitse muri hoteli bemerewe gukora izo siporo zombi kuri hoteli bacumbitsemo, ariko berekanye ko bipimishije C OVID-19 .

h) Umubare w’abitabira ikiriyo ntugomba kurenza abantu 15 icyarimwe.

i) Imihango yo gushyingura ntigomba kurenza abantu 30.

3. Inama y’Abaminisitiri yemeje amasezerano hagati ya Guverinoma y’u Rwanda n’ishyirahamwe ry’umupira w’amaguru ku isi (FIFA), ayo masezerano yemerera FIFA kugira ikicaro mu Rwanda.

4. Inama y’Abaminisitiri yemeje imishinga y’amategeko ikurikira : • Umushinga w’itegeko ryemera kwemeza burundu amasezerano y’inguzanyo hagati ya Repubulika y’u Rwanda n’Ikigega Mpuzamahanga gishinzwe Iterambere ry’Ubuhinzi, yashyiriweho umukono i Kigali mu Rwanda n’i Roma mu Butaliyani, ku wa 10 Ukuboza 2020.

• Umushinga w’itegeko ryemera kwemeza burundu amasezerano hagati ya Repubulika y’u Rwanda n’Ikigega Mpuzamahanga gitsura Amajyambere, yerekeranye n’impano hamwe n’inguzanyo yo gushyigikira gahunda y’iterambere ry’umukozi n’iterambere rusange, yashyiriweho umukono i Kigali mu Rwanda ku wa 17 Ukuboza 2020.

• Umushinga w’itegeko ryemera kwemeza burundu amasezerano y’inguzanyo hagati ya Repubulika y’u Rwanda na Banki y’Umuryango w’Ubumwe bw’Uburayi y’Ishoramari, yerekeranye n’inguzanyo yo gukwirakwiza amashanyarazi mu Rwanda, yashyiriweho umukono i Kigali mu Rwanda no muri Luxembourg ku wa 23 Ukuboza 2020.

5. Inama y’Abaminisitiri yashyize Amb. Monique Mukaruliza ku mwanya wa Strategic Advisor muri Minisiteri y’Ububanyi n’Amahanga n’Ubutwererane.

Bikorewe i Kigali, ku wa 4 Mutarama 2021.

Minisitiri w’Intebe Dr Edouard Ngirente