Blog

1. Inama y’Abaminisitiri yemeje imyanzuro y’Inama y’Abaminisitiri yateranye ku wa 14 Ukuboza 2020.

2. Nyuma yo kubona ko imibare y’abandura icyorezo cya COVID-19 ikomeje kwiyongera, aho icya kabiri cy’abamaze guhitanwa na cyo bapfuye mu gihe cy’ukwezi kumwe kwa 12, Inama y’Abaminisitiri yafashe ingamba zikurikira mu rwego rwo gukomeza kwirinda ko COVID-19 ikwirakwira mu Gihugu hose. Abantu barasabwa kugabanya ku buryo bushoboka impamvu zituma bahura kandi bagakora ingendo gusa mu gihe bikenewe.

Mu rwego rwo gukomeza gukumira ikwirakwira rya COVID-19, abaturage bose barongera kwibutswa ko ari ngombwa kubahiriza amabwiriza yo kwirinda COVID-19 harimo: gusiga intera hagati y’umuntu n’undi, kwambara agapfukamunwa neza no gukaraba intoki. Abatazabyubahiriza bazafatirwa ibihano.

Ingamba zikurikira zigomba guhita zishyirwa mu bikorwa guhera ku wa Kabiri, tariki Ira 5 Mutarama 2021, kandi zizongera kuvugururwa nyuma y’iminsi 15 hashingiwe ku isesengura ry’inzego z’ubuzima.

a) Ingendo zirabujijwe guhera saa mbiri z’ijoro (8:00 pm) kugeza saa kumi za mu gitondo (4:00 am).

b) Ibikorwa byose by’abikorera harimo iby’ubucuruzi, resitora, butiki, amasoko n’amaduka (malls and markets) bizajya bifunga saa kumi n’ebyiri za nimugoroba (6:00 pm).

c) Ingendo hagati y’Uturere dutandukanye tw’Igihugu no hagati y’Uturere n’Umujyi wa Kigali zirabujijwe, kereka ku mpamvu za serivisi z’ubuzima cyangwa izindi serivisi z’ingenzi. Icyakora imodoka zitwaye ibicuruzwa zemerewe kugenda mu Turere twose, ariko ntizitware abantu barenze babiri.

d) Ba mukerarugendo b’imbere mu Gihugu n’abavuye hanze bafite icyemezo cy’uko bipimishije COVID-19 bemerewe gukomeza ibikorwa byabo by’ubukerarugendo.

e) Ibikorwa by’Inzego za Leta n’abikorera bizakomeza, ariko buri rwego rurasabwa gukoresha abakozi batarenze 30% by’abakozi bose, abandi bakozi bagakorera mu rugo, ariko bakagenda basimburana.

f) Amateraniro rusange harimo imihango y’ubukwe ikorerwa mu nsengero, kwiyakira n’inama (meetings and conferences) birabujijwe.

g) Imyitozo ngororamubiri ikorerwa mu nyubako z’imyidagaduro (gyms) no kogera muri pisine (swimming pool) birabujijwe. Icyakora, abantu bacumbitse muri hoteli bemerewe gukora izo siporo zombi kuri hoteli bacumbitsemo, ariko berekanye ko bipimishije C OVID-19 .

h) Umubare w’abitabira ikiriyo ntugomba kurenza abantu 15 icyarimwe.

i) Imihango yo gushyingura ntigomba kurenza abantu 30.

3. Inama y’Abaminisitiri yemeje amasezerano hagati ya Guverinoma y’u Rwanda n’ishyirahamwe ry’umupira w’amaguru ku isi (FIFA), ayo masezerano yemerera FIFA kugira ikicaro mu Rwanda.

4. Inama y’Abaminisitiri yemeje imishinga y’amategeko ikurikira: • Umushinga w’itegeko ryemera kwemeza burundu amasezerano y’inguzanyo hagati ya Repubulika y’u Rwanda n’Ikigega Mpuzamahanga gishinzwe Iterambere ry’Ubuhinzi, yashyiriweho umukono i Kigali mu Rwanda n’i Roma mu Butaliyani, ku wa 10 Ukuboza 2020.

• Umushinga w’itegeko ryemera kwemeza burundu amasezerano hagati ya Repubulika y’u Rwanda n’Ikigega Mpuzamahanga gitsura Amajyambere, yerekeranye n’impano hamwe n’inguzanyo yo gushyigikira gahunda y’iterambere ry’umukozi n’iterambere rusange, yashyiriweho umukono i Kigali mu Rwanda ku wa 17 Ukuboza 2020.

• Umushinga w’itegeko ryemera kwemeza burundu amasezerano y’inguzanyo hagati ya Repubulika y’u Rwanda na Banki y’Umuryango w’Ubumwe bw’Uburayi y’Ishoramari, yerekeranye n’inguzanyo yo gukwirakwiza amashanyarazi mu Rwanda, yashyiriweho umukono i Kigali mu Rwanda no muri Luxembourg ku wa 23 Ukuboza 2020.

5. Inama y’Abaminisitiri yashyize Amb. Monique Mukaruliza ku mwanya wa Strategic Advisor muri Minisiteri y’Ububanyi n’Amahanga n’Ubutwererane.

Bikorewe i Kigali, ku wa 4 Mutarama 2021.

Minisitiri w’Intebe Dr Edouard Ngirente

Abishwe na COVID-19 ku wa Mbere ni abagabo batatu b’imyaka 82, 73 na 43 n’umugore w’imyaka 68 bitabye Imana bari i Kigali.

Abo bantu bane bahise buzuza umubare w’abantu 105 bamaze kwicwa n’iki cyorezo kuva cyagera mu Rwanda muri Werurwe 2020.

Minisiteri y’Ubuzima kandi yatangaje ko ku wa Mbere mu Rwanda habonetse abantu bashya 172 banduye COVID-19, naho abandi 64 mu bari barwaye bakize.

Abo barwayi bashya 172 babonetse mu bipimo 2,251 bakaba barimo ababonetse i Kigali: 146, Rubavu: 7, Kayonza: 6, Rusizi: 3, Nyamasheke: 2, Nyamagabe: 1, Huye: 1, Muhanga: 1, Ruhango: 1, Gisagara: 1, Bugesera: 1, Musanze: 1, Kirehe: 1.

Kugeza ku wa Mbere, mu Rwanda abari bamaze kwandura icyo cyorezo ni 8,848 muri bo abamaze gukira ni 6,816 naho abakivurwa ni 1927.

Imibare itangwa n’Ishami ry’Umuryango w’Abibumbye ryita ku Buzima (OMS) igaragaza ko umuntu umwe kuri batatu afite ibibazo by’uburwayi bwo mu mutwe kandi kubera ingaruka za COVID-19 zirimo guhatirwa kuguma mu rugo, kubura imirimo no kwigunga iyi mibare ishobora kwiyongera.

Ku barokotse Jenoside yakorewe Abatutsi mu Rwanda, basanzwe bifitiye ibibazo by’ibikomere bya Jenoside yakorewe Abatutsi 1994, Guma mu Rugo no Kwigunga (kutajya aho abandi bari) kubera COVID-19 byabongereye ibikomere.

Ubushakashatsi ku buzima bwo mu mutwe bwakozwe mu Rwanda mu mwaka wa 2018 bwagaragaje ishusho y’ubwiyongere bw’indwara zitandukanye zo mu mutwe haba mu baturage rusange ndetse no mu barokotse Jenoside.

Ubwiyongere bukomeye mu kwiheba bwari kuri 12% mu baturage rusange na 35% mu barokotse Jenoside, mu gihe ihungabana ryari kuri 3,6% mu baturage rusange na 29.7% mu barokotse Jenoside.

Ubushakashatsi bwagaragaje ko abarokotse Jenoside bakunze kugirwaho ingaruka n’ibibazo by’ingutu bahuye na byo mu gihe cya Jenoside.

Ibyavuye mu bushakashatsi bigaragaza ko bamwe bagifite ubwoba bukabije, abandi bakumva ko bari bonyine kabone n’ubwo baba bari kumwe n’imiryango yabo, hari ababura ibitotsi, kubabara umutwe bikabije no kurota inzozi mbi.

Bitandukanye n’urubyiruko rwarokotse Jenoside, abarokotse bageze mu zabuku bavuga ko bagize ingaruka zikomeye ku ngamba zo kwirinda COVID-19 kubera ihagarikwa ry’ibikorwa bimwe na bimwe mu gihe urubyiruko rwahugiye kuri internet.

Mu gukemura iki kibazo cy’ubwigunge ku barokotse Jenoside bakuze, umuryango w’urubyiruko rw’abanyeshuri barokotse Jenoside GAERG, ubinyujije mu mushinga wa Imbuto Foundation w’umufasha wa Perezida Jeannette Kagame ushyigikira abarokotse Jenoside wabahuje n’umuryango Azahar na wo uteza imbere umuco w’amahoro binyuze muri Yoga mu rwego rwo gufasha abarokotse bageze mu zabukuru gukira ibikomere.

Ku isaha ya saa cyenda z’igicamunsi, kuwa 02 Mutarama 2012, umusaza Thomas Twizerimana w’imyaka 61 y’amavuko, umwe muri 65 barokotse Jenoside bari mu itsinda ryo gufasha abafite ihungabana binyuze muri Yoga, yicaye ategereje ko n’abandi baza mu biganiro biba kabiri mu cyumweru mu kigo cya Aheza giherereye mu Kagari ka Cyugaro, Umurenge wa Ntarama mu Karere ka Bugesera.

Twizerimana wahoze akora mu by’ibarurishamibare waretse akazi kubera ihungabana rikabije, usa n’ufite intege nke mbere yo gutangira Yoga, asobanura ko uretse kugira indwara zidakira, kwigunga no kuba wenyine, mu gihe cyo kwirinda COVID-19 byiyongereye ku mbaraga z’umubiri nke asanganywe ndetse n’ihahamuka.

Ati “Ntibiba byoroshye guhora urwaye no kuba wenyine kuko bituma wongera gutekereza kuri Jenoside, ni yo mpamvu nitabira Yoga kugira ngo mpure n’abandi ni yo mpamvu ntashobora kubura hano.”

Mu minota mike, Emmanuel Manirarora, umwarimu wa Yoga, yaje kuza ahasanga Twizerimana hamwe n’abandi bakuze 14 b’abagore n’abagabo barokotse Jenoside bambaye udupfukamunwa kandi benshi muri bo bari hejuru y’imyaka 50 ariko batarengeje 80.

Mu rwego rwo kwirinda COVID-19, iri tsinda ryicaye munsi y’igiti mu mahumbezi aturuka mu biyaga n’imigezi bikikije Akarere ka Bugesera bibashyira mu buryo bwiza bwo gukurikirana imyitozo ya Yoga.

Mu minota 30, Manirarora ukiri muto yatangije imyitozo ya Yoga ku nsanganyamatsiko yo “Gushimira” abasobanurira ari na ko bakora imyitozo ngororamubiri. Amaboko hasi, hejuru ari na ko bahumekera hejuru.

Ni imyitozo imara iminota 15 ariko ifite icyo ihindura ku bayitabiriye n’ubwo usanga bamwe mu basaza n’abakecuru bayinubira cyane igihe cyo kunama no kunamuka ndetse no kuzamura amaboko no kuyamanura.

Twizerimana ati “Ku myaka yacu bisa n’aho bibabaza igihe wigorora wumva amagambo akurema avugwa n’utuyobora numva ingingo zimwe zirekuye. Numva nisanzuye kandi ubutaha sinshobora kubura.”

Ubwo Twizerimana yabwiraga Josephine Mukarugwiza w’imyaka 58 ufite ikibazo gikomeye cy’umugongo kugerageza Yoga, yamusubije ko abageze mu zabukuru bakora Yoga ari ukubura icyo bakora cyangwa baba bariye ibiryo byinshi bagira ngo bagabanye ibiro.

Icyakora ubu Mukarugwiza amaze kwitabira Yoga inshuro eshatu. Mukarugwiza mbere wasekaga abakora iyi siporo, ubu abona Yoga ari siporo ngororamubiri nziza ndetse kuyitabira byamuruhuye ibibazo by’ububabare bw’umugongo.

Agira ati “Uburyo aba basore batuyobora igihe cy’isomo ni nk’ibitangaza, ubu numva ingingo zanjye zimaze kumera neza.”

N’ubwo abakuze badashobora gutandukanya Yoga n’imyitozo ngororamubiri, Aimée Josiane Umulisa, umuhanga mu by’imitekerereze muri GAERG mu kigo cyita ku barwayi cya Aheza, yavuze ko guhurira hamwe no gusangira ubunararibonye bwabo ari urufunguzo rwo gukira haba ku mubiri n’ihungabana.

Kubera izi nyungu, Umulisa avuga ko guhera muri Mutarama 2021, bateganya guhugura urubyiruko 200 kwigisha Yoga na bo bakazigisha abandi aho kwiyandikisha ubu bifunguye ku babishaka.

Umulisa agira ati “Abigisha bakiri bato bazabasha gutoza abandi babe benshi bityo bagere ku baturage benshi barokotse Jenoside kugira ngo babashe gukora imyitozo yo gukiza binyuze muri Yoga.”