Webrwanda Backend

Blog

  • Abanduye Covid-19 mu Rwanda bamaze kurenga ibihumbi 10,ihitana 128 #rwanda #RwOT

    Abahitanwe na Covid-19 mu Rwanda n'abagabo 3 barimo babiri b'imyaka 50 na 65 bo mu mujyi wa Kigali n'umwe w'imyaka 90 I Huye.

    Abanduye bashya uko ari 172 babonetse I Kigali: 88, Huye: 33, Rwamagana: 15, Gicumbi: 12, Musanze: 6, Rubavu: 4, Nyagatare: 3, Muhanga: 3, Nyamasheke: 3, Burera: 2, Rusizi: 1, Karongi: 1, Gakenke: 1.

    Umubare w'abamaze gukira Covid-19 bose mu Rwanda ni 6,974 nyuma yo gupimwa bagasangwa nta bwandu bagifite mu gihe 3,020 bakirwaye aho bakiri kwitabwaho.

    Ibimenyetso bya Covid-19 birimo inkorora, ibicurane, guhumeka bigoranye n'umuriro. Yandura binyuze mu matembabuzi aturuka mu myanya y'ubuhumekero.

    Abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n'amazi n'isabune, kwirinda imihuro itari ngombwa no kwambara udupfukamunwa n'amazuru mu gihe umuntu avuye mu rugo cyangwa ahuye n'abantu benshi.

    Polisi y'u Rwanda yaburiye abarwaye Coronavirus bakurikiranwa n'inzego z'ubuzima bari mu ngo zabo, ariko ugasanga bitwara nk'abashaka kurenga ku mabwiriza yo kwirinda icyorezo cya Coronavirus ku buryo bashobora no kucyanduza abandi.

    Ikigo cy'Igihugu cy'Ubuzima, RBC, cyatangije gahunda yo kuvurira abarwaye Coronavirus mu ngo zabo hifashishijwe ikoranabuhanga, ndetse magingo aya abarwayi 2 800 bari kwitabwaho hifashishijwe ubu buryo.

    Umuvugizi wa Polisi y'u Rwanda, CP John Bosco Kabera, yabwiye Radio Rwanda ko igihe umuntu yasanzwemo Coronavirus agasabwa kuvurirwa iwabo ariko akarenga akajya mu ruhame kandi abizi ko arwaye, aba akoze icyaha gihanirwa n'amategeko aho kuba amakosa asanzwe.

    Yagize ati 'Ubundi byatangiye ari uko umuntu atinya Coronavirus akavuga ati 'nayirwaye, reka ngume aha ndebe ko nanakira'. Urumva rero mu gihe wamaze gutinyuka ku buryo wayitera n'abandi. Turagira ngo tubihanangirize babyumve, niba usanganywe Coronavirus ntujye mu bitaro, Urwego rubishinzwe rukakubwira ko ugomba kujya iwawe ukaharwarira cyangwa se ukahaguma, ntabwo ugomba kuharenga.'

    Yakomeje agira ati 'Turagira ngo rero tuvuge ko nta mpamvu y'uko wafatwa nk'aho washatse gutera abandi Coronavirus kugeza ubwo amategeko azagukurikirana. Urumva noneho biba byabaye icyaha ntabwo ari amakosa asanzwe cyangwa amakosa y'amande asanzwe.'

    Umuyobozi Mukuru w'Ikigo cy'Igihugu cy'Ubuzima (RBC), Dr Sabin Nsanzimana, yavuze ko hari abarwariye mu ngo usanga bahirahira bakajya hanze kandi babizi ko barwaye, avuga n'ubwo umuntu yaba yumva atarembye ariko kujya mu bandi bishobora kubakururira ibyago byo kwandura Coronavirus bishobora no kubahitana.

    Yagize ati 'Abantu nk'abo barahari ariko si benshi. Izo ngero twatangiye kuzibona ndetse turakorana na Polisi, abo bigaragayeho hari amategeko abahana, ariko twe nk'abantu bareba iby'ubuzima, twifuza ko umuntu wumva arwaye asabwa kuguma mu rugo. N'ubwo nta bimenyetso ashobora kugaragaza, ashobora kwanduza abantu benshi.'

    Akomeza agira ati 'Niba twamumenye nagume mu rugo, si umwanya wo kuduca inyuma asa nk'aho ari twe yihisha; abaganga cyangwa polisi.'

    Yongeye kwibutsa abantu ko mu gihe umuntu agize uruhare mu gukwirakwiza icyorezo cya Coronavirus, aba ari kugira uruhare mu burwayi bw'abandi bashobora no kuzitaba Imana.

    Source : http://umuryango.rw/amakuru/mu-rwanda/ubuzima/article/abanduye-covid-19-mu-rwanda-bamaze-kurenga-ibihumbi-10-ihitana-128

  • Dore impamvu zitera abantu kurota bivugisha nijoro basinziriye – YEGOB #rwanda #RwOT

    Kuvuga umuntu asinziriye ni ibintu biba kubantu hafi ya bose kandi ibi biba nyir'ubwite atabizi, kugeza ubu ubushakashatsi bwerekanye ko abantu bangana na 66% baba byibuze barigeze kurota bavuga (kuvuga basinziriye). Gusa abahanga bemeza ko ibi nubwo biba kubantu benshi ngo nta ngaruka bigira ku buzima bw'umuntu ndetse nta n'ubuvuzi na bumwe bikeneye. Icyakora mu gihe uraranye n'umuntu biramubangamira kuko akenshi bimubuza gusinzira.

    Ese mu by'ukuri n'iki gituma umuntu arota ari gusakuza?

    Inkomoko

    Kugeza ubu abahanga ntibaratangaza ikintu nyakuri gituma umuntu arota avuga ariko nanone hari ubushakashatsi bwagaragaje ko ibi bishobora kuba uruhererekane mu miryango, niba biba ku mugabo ugasanga n'umwana abyaye bimubaho. Ubushakashatsi bwakorewe mu gihugu cya Finland bwagaragaje ko impanga zifite iki kibazo cyo kuvuga zisinziriye akenshi usanga zishobora no kugira ikibazo cyo kurara bagenda mu gihe basinziriye. Bigaragazwa ko kandi ababyeyi bagira ikibazo cyo kuvuga basinziriye nabo babyara abana bafite icyo kibazo.

    1.Imiti itandukanye umuntu afata

    Hari imiti inyuranye umuntu afata ikagira ingaruka ku misinzirire y'uwayifashe. Mwene iyi miti akenshi usanga yaciye intege imikaya igize umubiri, ari nabyo bituma umuntu ashobora kuvugavuga mugihe asinziriye.

    2.Ibibazo binyuranye umuntu asanganywe.

    Yaba kurara umuntu agenda kandi asinziriye, kurota inzozi mbi, ndetse no kwivugisha umuntu asinziriye, ibi byose ngo bifitanye isano, hari abantu usanga rero ibi ari ibibazo umuntu yifitiye mugihe cy'ubuzima bwe bwose.

    3.Kuryama umuntu atinze (kuryama igihe gito)

    Si buri gihe ibi bishobora kuba ariko burya nk'abanyeshuri barara biga cyangwa se abantu bafite ibintu bibahuza bigatuma bataryama igihe gihagije usanga abo bahura n'ikibazo cyo kwivugisha basinziriye.

    Ese ni gute wabirwanya?

    Kugeza ubu nta muti ufatika uzwi wakoreshwa mu kurwanya kurara umuntu avuga. Icyakora abahanga bavuga ko guhindura imyitwarire imwe n'imwe byafasha mu guhangana no kurara umuntu avuga.

    Bimwe muribyo harimo kwirinda kurya ibiryo byinshi mu ijoro, harimo kandi kuryama ku buriri butunganyije neza ndetse n'imisego.
    Ugomba kwirinda kunywa amakawa mu gihe cy'ijoro. Ukwiye kandi gushyiraho igihe gihoraho cyo kuryama buri munsi kandi ukaryama igihe gihagije.

    Like this:

    Like Loading…

    Source : https://yegob.rw/dore-impamvu-zitera-abantu-kurota-bivugisha-nijoro-basinziriye/

  • Centrafrique: Umusirikare w'u Rwanda wo mu ngabo za UN yaguye mu mirwano n'inyeshyamba #rwanda #RwOT

    Itangazo ry'umuvugizi w'ubu butumwa bitwa MINUSCA rivuga ko igitero cyabaye kuri uyu wagatatu cyasubijwe inyuma n'ubufatanye bw'izi ngabo za UN hamwe n'iza leta.

    Ni ubwa mbere muri iki gihugu hiciwe umusirikare w'u Rwanda kuva hakongerwa ingabo za MINUSCA, u Rwanda n'Uburusiya nabyo bikoherezayo ingabo ubwo amatora yari yegereje mu kwezi gushize.

    MINUSCA ivuga ko inyeshyamba zateye nazo zahatakarije abantu abandi bagafatwa, ivuga kandi ko umusirikare umwe uri muri ubu butumwa bwa UN yakomekeye mu mirwano.

    Igitero cyo kuri uyu wa gatatu cyagabwe n'inyeshyamba zishyize hamwe za anti-Balaka, UPC, 3R na MPC, zishyigikiwe n'uwahoze ari perezida w'iki gihugu François Bozizé, nk'uko MINUSCA ibivuga.

    Mu mpera z'ukwezi gushize abasirikare batatu b'u Burundi bari muri ubu butumwa bwa MINUSCA bishwe n'inyeshyamba mu mirwano n'inyeshyamba ahitwa Dékoa kari mu ntara ya Kémo.

    Ibintu byarushijeho kumera nabi muri iki gihugu mbere gato y'amatora yabaye mu kwezi gushize, Faustin-Archange Touadéra niwe wayatsinze ku majwi 54%.

    François Bozizé yangiwe kwiyamamaza muri aya matora, yafashije imitwe y'inyeshyamba iri kugaba ibitero ahatandukanye mu gihugu kuva mbere y'ayo matora.

    Mbere y'ayo matora ibihugu by'Uburusiya n'u Rwanda byohereje abasirikare amagana kurengera ubutegetsi bwa Touadera, biyongera ku bariyo mu butumwa bwa MONUSCO.

    Nta mahoro arambye kuva ku bwigenge

    Centrafrique ntabwo yagize amahoro arambye kuva mu myaka ya 1960 yabona ubwigenge.

    Mu 2013 yaguye mu kaga ubwo inyeshyamba z'Abayisilamu zitwa Seleka zafataga ubutegetsi zihiritse Bozize mu gihugu gituwe ahanini n'Abakiristu.

    Itsinda ry'inyeshyamba ziyise anti-balaka zahagurukiye kurwanya Seleka.

    Ku gitutu cy'amahanga, mu 2014 Seleka yahaye ubutegetsi guverinoma y'inzibacyuho, gusa ubwicanyi bwarakomeje mu gihugu nubwo hari ingabo za ONU n'iz'Ubufaransa.

    Amatariki y'ingenzi mu mateka ya Centrafrique:

    1880 – Ubufaransa bwafashe aka gace, buhagira akarere kabwo k'ubucuruzi.

    1960 – Iki gihugu cyabonye ubwigenge, David Dacko aba perezida, ashyiraho ubutegetsi bw'ishyaka rimwe.

    1965 – Dacko yahiritswe ku butegetsi n'umukuru w'ingabo, Jean-Bedel Bokassa, wahise yiyita umwami w'abami “w'Ubwami bwa Africa yo hagati”.

    1979 – Bokassa yahiritswe ku butegetsi n'abashyigikiwe n'ingabo z'Ubufaransa.

    1981 – Umukuru w'ingabo Andre Kolingba yafashe ubutegetsi.

    1993 – Ange-Felix Patasse yatsinze amatora, arangiza ubutegetsi bw'abasirikare bw'imyaka 12.

    2003 – Uwari ukuriye ingabo Francois Bozize yashinze inyeshyamba maze afata ubutegetsi ku ngufu.

    2009 – Ingabo za leta ye zahanganye n'inyeshyamba. UN yemeza kohereza ingabo zayo zo kugarura amahoro.

    2012 Ugushyingo – Umutwe w'inyeshyamba wa Seleka vuba vuba wafashe amajyaruguru n'ibice byo hagati mu gihugu, amaherezo n'umurwa mukuru, Bozize arahunga.

    2013 – Ubwicanyi bukomeye mu gihe abarwanyi bishingikirije ku madini ya Isilamu n'Abakiristu bashyamiranye.

    2014 – Michel Djotodia – wari uyoboye Seleka yahiritse Bozize – yavuye ku butegetsi. Catherine Samba-Panza ashyirwa ku butegetsi bw'inzibacyuho.

    2015 – Referendumu ku mpinduka mu itegekoshinga, yakurikiwe n'amatora ya mbere y'umukuru w'igihugu.

    2016 – Amatora y'umukuru w'igihugu, intsinzi yegukanywe na Touadera, wahoze ari minisitiri w'intebe kubwa Bozize.

    BBC

    Source : http://umuryango.rw/amakuru/mu-mahanga/umutekano/article/centrafrique-umusirikare-w-u-rwanda-wo-mu-ngabo-za-un-yaguye-mu-mirwano-n

  • Kamonyi: Bamwe mu bakozi b'ibiro by'ubutaka bimaze iminsi mu bibazo bahinduriwe imirimo #rwanda #RwOT

    Mu gitondo cy'uyu wa 13 Mutarama 2021 nibwo bamwe mu bakozi bakora mu biro bishinzwe ubutaka( One Stop Centre ) bahinduriwe imirimo. Umwe mu bahakora yongererewe inshingano, babiri bashyirwa mu zindi serivise. Iri shami ry'ubutaka riherutse gutangazwa ko ariryo ryabaye iryanyuma mu gihugu, ariko kandi abaturage n'izindi nzego bamaze igihe bijujutira imikorere mibi cyane cyane mu itangwa ry'ibyangombwa byo kubaka.

    Tuyizere Thaddee, umuyobozi w'agateganyo w'akarere ka Kamonyi yabwiye intyoza.com ko guhindurirwa imirimo kw'aba bakozi ari mu rwego rwo kurushyiramo amaraso mashya, ariko kandi bikaba bifitanye isano n'ibibazo byagiye bitera abaturage kutishimira serivise zihatangirwa.

    Abakozi bakuwe muri ibi biro bagahindurirwa serivise ni; Musengarurema Cyriaque wari ushinzwe gutanga ibyangombwa, akaba yashinzwe iby'amakoperative n'iterambere ry'umurimo. Undi ni Gahungu Oswald wari ushinzwe ubugenzuzi( inspection muri one stop centre) yashinzwe gukurikirana inyubako z'amashuri, mu gihe Nshuti Egide wari ushinzwe gukurikirana iyubakwa ry'ibyumba by'amashuri ariwe waje gushingwa ubugenzuzi mu myubakire muri iri shami, naho Nzabahimana James uhassanzwe yongerewe inshingano, aho kuzo asanganwe hiyongereyeho gutanga ibyangombwa byo kubaka.

    Meya Tuyizere avuga kuri iri hindurwa ry'aba bakozi yagize ati ' Mubyukuri ni ukongeramo amaraso mashya no kugira ngo turebe ko imitangire ya Serivise yarushaho kunoga'.

    Kuba ibyabaye haba hari aho bihurira n'ibyo abaturage bakomeje kwijujutira ku bijyanye na serivise mbi n'imikorere idahwitse yagiye ishavuza benshi, Tuyizere yagize ati ' Mubyukuri hari ibyo abaturage baba bavuga, natwe ubwo rero turareba ngo ese niba kanaka bavuga ko iyi serivise atayirimo neza, ese uwashyiramo undi ntiyabikora neza kumurusha!'?.

    Meya Tuyizere, avuga ko nk'ubuyobozi bw'akarere bakomeje gushaka uko bakongerera ibi biro by'ubutaka abakozi kuko ngo bagereranije serivise zihasabwa, abakozi baho ngo baracyari bake kuko ngo hari n'abagiye bavamo mu bihe byashize ariko bakaba batarasimbuwe.

    Soma hano inkuru bijyanye;Kamonyi: Ibiro by'ubutaka (One Stop Centre) byegukanye umwanya wa nyuma mu gihugu

    Munyaneza Theogene / intyoza.com

    Source : http://www.intyoza.com/kamonyi-bamwe-mu-bakozi-bibiro-byubutaka-bimaze-iminsi-mu-bibazo-bahinduriwe-imirimo/

  • Haruna na Yanga begukanye igikombe batsinze Simba SC ya Kagere utahiriwe na penaliti #rwanda #RwOT

    Yanga ikinamo kapiteni w’Amavubi Haruna Niyonzima yegukanye igikombe cya Mapinduzi Cup batsinze Simba SC ya Kagere kuri penaliti 4-3, ni nyuma y’uko amakipe yombi yari yanganyije 0-0.

    Uyu munsi nibwo hari habaye umukino wa nyuma wa Mapinduzi Cup, igikombe cyarimo gikinirwa muri Zanzibar.

    Yanga yari yageze ku mukino wa nyuma isezereye Azam FC muri 1/2, yahuye na Simba SC yahageze isezereye Namungo.

    Umukino uhuza Simba SC na Yanga ni umukino uba ukomeye cyane kuko ari amakipe y’abakeba, umukino waherukaga kubahuza ni uwo muri shampiyona warangiye amakipe yombi anganya 1-1.

    Kuri iyi nshuro hari hitezwe kumenya ikipe iri bwegukanye iki gikombe, hibazwa niba Simba SC iri butsindirwe ku mukino wa nyuma inshuro 2 zikurikiranya kuko umwaka ushize Mtibwa Sugar yabatsinze 1-0 ibatwara igikombe.

    Ni umukino wakinwe n’abakinnyi bombi b’abanyarwanda yaba ku ruhande rwa Simba SC, Meddie Kagere yari ahari no ku ruhande rwa Yanga, Niyonzima Haruna yari ahabaye, ndetse aba bakinnyi nibo bari ba kapiteni kuri uyu mukino, bakinnye iminota 90.

    Aya makipe yaherukaga guhurira ku mukino wa nyuma wa Mapinduzi Cup muri 2011, Simba SC niyo yegukanye igikombe itsinze Yanga 2-0.

    Amakipe yombi yagiye abona amahirwe ariko ntibabasha kuyabyaza umusaruro umukino urangira ari 0-0, bihita biba ngombwa ko bitabaza penaliti.

    Kagere Meddie utari wagize umukino mubi, utanamenyereweho guhusha penaliti ntiyahiriwe n’iy’uyu munsi kuko yayihushije, yayiteye ikubita umutambiko w’izamu, undi mukinnyi wa Simba SC wayihushije ni Joash Onyango, myugariro na we wari witwaye neza kuri uyu mukino. Francis Kahata, Chris Mugalu na Gadiel Michael bazinjije.

    Ku ruhande rwa Yanga, Mukoko Tonombe ni we wayihushije ni mu gihe Kisinda Tuisila, Abdul Hadji 'Ninja’, Zawadi Mauya na Saido Ntibazonkiza bazinjije.

    Yanga iki kikaba ari igikombe cya 2 cya Mapinduzi Cup begukanye mu mateka yabo, baherukaga icyo begukanye muri 2004 batsinze Mtibwa Sugar ku mukino wa nyuma 2-1.

    Meddie Kagere ntiyahiriwe n’uyu munsi

    Haruna Niyonzima umwe mu bakinnyi bafashije Yanga cyane muri iki gikombe

    Haruna Niyonzima ashaka kuzibira Gadiel Michael wa Simba SC

    Saido Ntibazonkiza yateye penaliti ya nyuma yahesheje Yanga igikombe

    Sarpong(ibumoso) Saido Ntibazonkiza(hagati) na Waziri Junior(iburyo) bishimira igikombe cyabo cya mbere muri Yanga

    Source : http://isimbi.rw/siporo/article/haruna-na-yanga-begukanye-igikombe-batsinze-simba-sc-ya-kagere-utahiriwe-na-penaliti

  • Coronavirus: Imibare y'abanduye iki cyorezo yongeye gutumbagira, 3 kirabahitana #rwanda #RwOT

    Imbonerahamwe y'imibare itangazwa na Minisiteri y'ubuzima kucyorezo cya Covid-19 uko kiriwe cyifashe mu masaha 24 y'uyu wa 13 Mutarama 2021, igaragaza ko abantu 3 bahitanwe n'iki cyorezo mu gihe abantu 172 ibipimo byerekanye ko bacyanduye.

    Dore uko iyi mbonerahamwe igaragaza ishusho rusange mu mibare;

    Munyaneza Theogene / intyoza.com

    Source : http://www.intyoza.com/coronavirus-imibare-yabanduye-iki-cyorezo-yongeye-gutumbagira-3-kirabahitana/

  • Amwe mu mayeri umukobwa w'Umunyafurika yakoresha akigarurira umutima w'umuzungu ushaka kumutereta. – YEGOB #rwanda #RwOT

    Muri iyi minsi usanga abakobwa bafite uburanga bo muri Afurika bifuza gushakana n'abagabo b'abazungu baba bafite agatubutse ku buryo usanga bigoye kumenya uburyo umukobwa yakoresha mu gukurura umuzungu bakibanira akaramata. Iyi nkuru iragaruka ku mayeri ashobora gukoreshwa niba ushaka guteretwa n'umuzungu.

    1.Twafatanya mu bucuruzi

    Umukobwa w'umunyafurika irindi banga yakoresha mu kureshya umuzungu ni ukumusaba ko bafatanya gukora ubucuruzi runaka. Abazungu benshi iyo bahuye n'abakobwa bafite imbata za bizinesi bifuza gukorana na bo bikazarangira babagize abagore kuko baba barahuje.

    2.Kubwira umuzungu mukundana ko wakuyemo inda

    Gukuramo inda mu gihe cy'amezi atatu abanza warasamye inda y'uwo mukunda bishobora kumubabaza ariko na none akagira icyemezo afata gishobora kuganisha ku byifuzo byawe. Akenshi iyo ubwiye uwo mukundana ko wagize ibyago ugakuramo inda nta kindi akora kitari ukuguhumuriza ndetse akaba yakwemera ibyo umusaba byose kuko aba azi ko wababaye kandi agomba kuguhora hafi.

    3.Uzangire umugore

    Akenshi iyo umukobwa asabye uwo bakundana ko yamubera umufasha biragora kubihakana n'ubwo kubivuga bisaba imyaka myinshi ariko iyo umukobwa atoboye akabibwira umuzungu nta kabuza arabyemera akamushaka kuko aba abona ko amukunda by'ukuri.

    Kugira ngo umuzungu yemere ko muzabana bisaba imyaka myinshi no kwihangana cyane. Hari n'igihe umuzungu abanza akagusaba ko mwabyarana umwana umwe cyangwa se babiri kugira ngo yemere ko mwabana.

    4.Kubwira umuzungu mukundana ko umutwitiye umwana

    Umukobwa wirabura mu gihe afite umusore w'umuzungu bakundana ashobora kumutega inda, akamubwira ko amutwitiye umwana kabone n'ubwo yaba amubeshya. Bishobora kumuha amahirwe yo gushakwa na wa muzungu kandi nta gahunda yari ihari. Umukobwa icyo asabwa ni ukwihererana umuzungu basanzwe bakundana akumubwira ati 'Mukunzi ndatwite'.

    Aya magambo umukobwa azayabwira umukunzi we nyuma y'igihe kinini bakundana ndetse bananyuzamo bakaryamana. Umuzungu iyo yumvise ko umukunzi we amutwitiye nta kindi akora usibye guhita yemera ko babana nk'umugore n'umugabo cyangwa se akamuha amafaranga yo gukuramo inda. Aha rero umukobwa asabwa kureba kure agahakana yivuye inyuma ko adashobora kwihekura.

     

    Niba ushaka umukunzi kanda kuri iyi link ukurikize ibisabwa:http://yegob.rw/dating

    Like this:

    Like Loading…

    Source : https://yegob.rw/amwe-mu-mayeri-umukobwa-wumunyafurika-yakoresha-akigarurira-umutima-wumuzungu-ushaka-kumutereta/

  • Umuhanzi Emmy yambitse impeta umukunzi we mu birori bakoze bonyine [AMAFOTO] #rwanda #RwOT

    Umuhanzi Emmy usanzwe akorera umuziki muri Leta Zunze Ubumwe za Amerika ari naho atuye, yatangaje ko yambitse impeta umukunzi we Umuhoza Joyce bamaze igihe bakundana amusaba ko yamubera umufasha.

    Uyu muhanzi wamenyekanye ku ndirimbo nka subiza, Uranyuze, Kuki, Ibyo bavuga, Ese urinde,ntari umuntu n'izindi,yambitse impeta uyu mukunzi we bamaze igihe bakundana.

    Mu butumwa yanditse ku mbuga nkoranyambaga ze nyuma yo kwambika Joyce impeta,Emmy yagize ati “Naguhisemo kandi nzahora nguhitamo buri gihe.Intera ni igipimo cyiza kigaragaza kure cyane urukundo rwagera…Nishimiye ko nyuma tubashije kubigeraho.Warakoze cyane kunyizera.Ndagukunda Hoza.”

    Amakuru avuga ko Kuri uyu wa Kabiri tariki 12 Mutarama 2021 aribwo Emmy yateye ivi asaba umukunzi we ko yamwemerera bakarushinga undi amusubiza ngo “yego”.





    Source : http://umuryango.rw/imyidagaduro/umuziki/article/umuhanzi-emmy-yambitse-impeta-umukunzi-we-mu-birori-bakoze-bonyine-amafoto

  • Mbigenze nte?: Uyu mugore arifuza inama zanyu urugo rugiye kumunanira! #rwanda #RwOT

    Hashize imyaka 10 dushakanye n’umugabo wanjye tubanye mu mahoro. Nyuma y’umwaka umwe gusa twabyaye umwana w’umuhungu nyuma y’aho aza kwitaba Imana.Nyuma y’imyaka 3 umugabo wanjye yaje kwadukana umuco wo kujya muri za Sauna avuga ko ituma aruhuka agasohora imyanda mu mubiri.

    Twakomeje gutegereza umwana turamubura tuza kujya inama yo kujya kwipimisha muri CHUK baza gusanga intanga z’umugabo zarangiritse kubera ubushyuhe. Bamuhaye ibinini byo kunywa arabinywa ariko nyuma yanga ko dusubira kwisuzumisha ngo turebe ko yakize.

    Muri iyi minsi amereye nabi avuga ko arinjye utabyara kuko yizeye ko imiti bamuhaye yamukijije kandi atarasubiye muri controle. Ikindi kandi muganga yamubwiye kuba ahagaritse sauna ariko yaranze.

    Abantu batandukanye bambwiye ko nkwiye kumubwira agahagarika sauna ariko yaranze kandi bambwiye ko ariyo yaba yarangije intanga ze. Ari gushaka kunyirukana ngo azane undi mugore ubyara kuko avuga ko ntakibyara bitewe no guhangayika bigatuma mba numye iyo dukoze imibonano mpuzabitsina. Mungire inama y’icyo nakora kuko umugabo wanjye ndacyamukunze.'

    Igisubizo:

    Muri iki gihe hagenda haduka ibintu byinshi bitari bimenyerewe cyane, bimwe bikagenda bigira ingaruka ku mibereho y’abantu. Usanga abantu bagenda bahura n’uburwayi butandukanye kubera ko rimwe na rimwe bagiye barya ibiribwa byavuye mu nganda ndetse no gukoresha ikoranabuhanga.

    Ubushakashatsi bwashyizwe ahagaragara, bugaragaza ko ku bantu babana byemewe n’amategeko bagera ku kigero cya 15% bagira ibibazo byo kubura urubyaro kubera ko usanga intanga z’abagabo zarangirijwe no gukoresha ibintu bizangiza.

    Ibi bibazo bigenda biba imbogamizi, byatumye abashakashatsi bo muri kaminuza zitandukanye bagaragaza ibi bintu 5 bigira uruhare mu kwangiza intanga z’abagabo.

    1. Kunywa ibiyobyabwenge

    Ku bantu basanzwe batumura ku gatabi, usanga bafite ingorane nyinshi zo kwangirika k’umubiri ariko abanywa ibiyobyabwenge cyane cyane Marjuana bo ni akarusho kuko bituma intanga zabo zangirika.

    Nk’uko abashakashatsi bo muri Kaminuza ya Buffalo babigaragaje, mu ntanga zakorewe ubushakashatsi ku bagabo bafashe kuri Marjuana, byagaragaye ko intanga zabo ziba zifite ingufu nkeya ku buryo kubyara biba ari ikibazo.

    2. Gukoresha mudasobwa uyiteretse ku bibero

    Akenshi usanga abantu bafata za mudasobwa zabo bakazishyira ku bibero byabo bumva ko ntacyo bitwaye ariko mu bushakashatsi bwakozwe byagaragaye ko ibi byangiza intanga. Abahanga bakaba bakomeza batanga inama ko biba byiza gukoresha imashini uyiteretse ku meza cyangwa ku ntebe zabugenewe.

    3. Kujya muri Sauna

    Abantu benshi bajya muri Sauna kugira ngo bananure imitsi ndetse babashe kugabanya ibinure mu mubiri. Abashakashasi bo muri kaminuza ya Podova yo mu Butaliyani bagaragaje ko ibi nabyo ari bimwe mu byangiza intanga z’abagabo kuko ahantu usanga hakorerwa sauna, akenshi haba hashyushye kandi ngo kwegereza udusabo tw’intanga ahantu hashyushye si byiza kuko bituma zicika intege maze kubyara bikaba ingorane.

    4. Gukora imirimo itera umunaniro ukabije

    Muri ubu bushakashatsi bwakozwe, byemejwe ko umunaniro ari imwe mu mpamvu zatuma umuntu agira ibibazo mu kubyara, kuko umunaniro ukabije ugira ingaruka mu kwangirika kw’intanga zigatakaza ingufu. Ibingibi byagaragajwe n’abashakashatsi bo muri Kaminuza ya Califonia Davis kandi bagashishikariza abantu kujya bafata umwanya wo kuruhuka mu buryo bwo kurinda amagara yabo kuko araseseka ntayorwe.

    5. Kurya inyama zanyuze mu nganda

    Usanga abantu benshi bakunda ibintu byanyuze mu nganda, nyamara akenshi usanga atari byiza ku mubiri. Ku bagabo ho ni ingorane zikomeye cyane kuko inyama zaciye mu nganda zigira uruhare rukomeye mu kuba zatuma urubyaro rubura mu muryango kubera ko umugabo aba atakibasha kugira intanga zatanga umwana.

    Mu bushakashatsi bwakozwe, byagaragaye ko abagabo bakunda izi nyama usanga nabo bagira ikibazo mu kubona urubyaro. N’ubwo bibabera imbogamizi, ngo ku birira amafi bo nta ngorane nk’izi bagira ariyo mpamvu bashishikariza abagabo kurya amafi kurusha uko barya inyama zivuye mu nganda.

    Ibindi bishobora gutuma abagabo baba ingumba.

    Ibintu bishobora gutuma umugabo aba ingumba bigenda bitandukana bitewe n’uko umugabo yakuze mu bugimbi bwe, indwara yagiye arwara mu buto bwe cyane cyane indwara y’iseru , nimba yarigeze kubagwa, akazi uwo mugabo akora cyane cyane abakora akazi gatuma bahora ahantu hashyushye cyane, ahantu hari imirasire ihumanya, cyangwa iyindi myuka cyangwa ibindi bintu bihumanya.

    Ibindi bishobora gutera ubugumba umugabo harimo kunywa inzoga cyangwa itabi ubumuga bwo mu mutwe bwaba ari ubugaragara inyuma cyangwa se ubundi budapfa kuboneka urebeye umuntu inyuma(trouble psychologique).

    Ubu bumuga bushobora gutuma adashobora gukora imibonano mpuza bitsina neza ndetse rimwe na rimwe bikaba byamunanira burundu.

    Hari ibimenyetso bimwe na bimwe bigaragaza ko umugabo afite imisemburo ngabo micye (testerones) : Nko kutagira amoya ku mubiri, cyangwa kugira amatako arimo ibinure byinshi.

    Igikunze gutuma abagabo baba ingumba ni ukugira intangangabo zitujuje ubuziranenge. Ibyo akenshi abantu barabivukana, ugasanga imiyoboro imwe n’imwe y’intanga itari mizima rimwe na rimwe udusabo tw’intanga ngabo ntitumanuke ngo tujye aho twagenewe kujya tukigumira hejuru cyangwa twamanuka , aho tuvuye ntihifunge , tugahora tuzamuka ndetse ibyo bigatuma tudakura neza cyangwa ngo dukore intanga ngabo nzima.

    Dore zimwe mu ndwara zifata intanga ngabo zigatuma umugabo atabyara

    Azoospermie : Kutagira intanga ngabo mu masohoro
    Oligospermie : Umubare w’intanga ngabo uri munsi ya miliyoni 30/ml ;
    Asthénospermie : Intangangabo zidafite umuvuduko uhagije
    Tératospermie : Umubare w’intanga ngabo zifite imiterere itari yo aba ari munini cyane

    Iyo umugabo afite ibyo bimenyetso 3 bya nyuma icyarimwe, amahirwe ye yo kubyara aba ari macye cyane, n’ubwo rimwe na rimwe ashobora kubyara, ariko aba ari nk’impanuka.

    Source : https://www.imirasire.rw/?Mbigenze-nte-Uyu-mugore-arifuza-inama-zanyu-urugo-rugiye-kumunanira

  • COVID-19 itumye amarushanwa y’igikombe cy’Intwari cya 2021 mu mikino itandukanye akurwaho #rwanda #RwOT

    Kuva mu 2017, mu Rwanda hatangiye gukinwa amarushanwa atandukanye yitiriwe Intwari z’Igihugu akenshi aba mu mpera za Mutarama, agasozwa tariki ya 1 Gashyantare.

    Umuyobozi w’Ishami ry’Ubushakashatsi mu Rwego rushinzwe Intwari z’Igihugu, Imidali n’Impeta by’Ishimwe (CHENO), Rwaka Nicolas, yavuze ko uyu mwaka nta marushanwa y’imikino azaba kubera icyorezo cya COVID-19.

    Yagize ati 'Uyu mwaka nta mikino izaba kubera icyorezo cya COVID-19, ahubwo hateguwe amarushanwa y’indirimbo n’imivugo bisingiza Intwari z’u Rwanda bikanamamaza indangagaciro z’umuco w’ubutwari azitabirwa n’abantu batandukanye babyifuza. Hazaba kandi igitaramo kizaca kuri Televiziyo Rwanda tariki ya 31 Mutarama”.

    Mu mwaka ushize wa 2020, iri rushanwa ry’Ubutwari ryakinwe mu mikino itandukanye irimo Sitting Volleyball, Amagare, Handball, Volleyball, Basketball n’Umupira w’Amaguru.

    Umwaka wa 2021 watangiye nta marushanwa akinwa mu Rwanda kubera COVID-19, ni nyuma y’uko Shampiyona y’Igihugu y’umupira w’amaguru yari yatangiye mu Ukuboza 2020, yahagaritswe igeze ku munsi wa gatatu ubwo haboneka ubwandu bw’iki cyorezo mu makipe amwe n’amwe.

    Kwakira indirimbo n’imivugo bizarushanwa uyu mwaka, byatangiye tariki ya 11 kugeza ku ya 25 Mutarama, umunsi umwe mbere y’uko hatangira gukorwa isesengura ryabyo.

    Indirimbo n’imivugo itatu bya mbere bizatangazwa ku wa 29 Mutarama mu gihe abatsinze bazahembwa ku wa 31 Mutarama 2021.

    Source : https://www.imirasire.rw/?COVID-19-itumye-amarushanwa-y-igikombe-cy-Intwari-cya-2021-mu-mikino