Blog

Hari ubwo usanga abantu bamwe amaso atukuye cyane, nyamara ku bandi ugasanga ni umweru. Hari n’abandi kandi bahora bifuza icyabafasha kutagira amaso atukura. Niba wifuza guhorana amaso meza y’umweru hari uburyo butagoranye bwabigufashamo.

Ryama amasaha umunani buri joro

Kutabona igihe gihagije cya gusinzira ni kimwe mu bituma amaso atukura cyane. Niba wumva unaniwe, waguye agacuho k’umunsi, amaso yawe atukuye yatewe nuko utasinziriye bihagije. Abantu bakuru bisaba ko baryama amasaha hagati y’arindwi n’icyenda buri joro, gusa kuri bamwe ari munsi yayo ashobora kuba ahagije kuri bo bitewe n’imiterere y’umubiri.

Kura imyanda yose mu maso

N’utuntu duto cyane, nk’umukungugu, twagiye mu maso tuba dushobora kwangiza imitsi yo mu maso. Niba wumva utokowe, ntubyiringire, kuko ibi biba bishobora kwanduza agace k’ijisho kitwa Cornea. Ahubwo, ikiza ni ukoza ijisho ryawe. Ijisho waryoza ushyira ugitonyanga cy’amazi mujisho ukanuye, mu gihe kimaze kujyamo ugahumbaguza cyane kandi byihuse. Kugira kandi ribe ryacya neza cyane, ushobora gukoresha ikiganza ukarifungura mu gihe igitonyanga gitambukamo.

Ushobora kandi no gukoresha amazi, ugakaraba bisanzwe mu maso ukoresheje amazi meza, kandi amaso afunguye. Ibi bituma amazi anyura mu maso akahoza, cyangwa, ushobora gukoresha n’ibikoresho byabugenewe mukoza amaso. Mu gihe mu jisho harimo imyanda, bishobora kuguteza ikibazo yaba guhumbya cyangwa gufungura amaso.

Ruhuka kureba TV no kureba muri mudasobwa

Nubwo waba waryamye igihe kirekire bihagije, ariko ushobora gukomeza kuba ufite amaso atukuye kubera umara igihe kirekire uri kureba TV, cyangwa uri gukoresha mudasobwa. Ibi biterwa nuko abantu iyo bari kureba TV, cyangwa bari gukoresha mudasobwa bahumbya gacye bishoboka.

Ubushakashatsi bugaragazako byibura wagakwiye gufata 15 yo kuruhuka buri masaha 2 kandi ugafata akaruhuko k’amasegonda 30 mu minota 15 mu gihe waba uri gukoresha mudasobwa cyangwa uri kureba TV. Mu gihe uri gufata aka karuhuko, gerageza urebe ahantu kure urebeye nko mu idirishya cyangwa n’ifoto iri ahitaruye mu cyumba uri gukoreramo.

Ambara sunglasses (Ray Ban)

Ubushakashatsi buvugako kuba uri kuzuba igihe kirekire cyangwa mu muyaga bishobora gutuma amaso atukura. Mu gihe waba wambaye RayBan mu kurinda ko amaso yakira urumuri rukabije, mu gihe uri hanze, byagufasha kurinda amaso kuba yakubitwa n’umuyaga cyangwa yagirwaho na UV light zishobora kuyananiza. Kwambara sunglasses ni ingenzi mu kwirinda ko amaso atukura. Urumuri rwinshi rw’izuba rushobora guteza ibibao ku mikorere y’ijisho, bikaba byatuma ritukura cyane.

Reka itabi kandi wirinde kuba ahantu hari imyotsi yaryo

Kunywa itabi ni kimwe ubiteza ugutukura kw’amaso. Niba unywa itabi, geregeza bishoboka kurireka kandi wirindi ahantu hari imyotsi yaryo cyangwa aho bari kurinywera. Uretse kuba byagufasha kurinda amaso yawe gutukura, kuva ku itabi bifitiye umubiri ibyiza byinshi cyane.

Ntugakoreshe bikabije imiti yo guhindura amaso imyeru

Iyi miti ni ubryo bwihuse bwafasha kugira ngo amaso ahite ahinduka imweru mugihe gito, gusa kuyikoresha bishobora gutuma ikibao gikomera kurusha kucyoroshya. Iyi miti ikoreshwa iba irimo Vasocontrictors bikaba bimwe mu byegeranya udutsi dutwara amaraso mumaso.

Iyo uyikoresheje cyane, umubiri wubaka uburyo bwo kujya urwanya iyo miti, ibi bigatuma amaso aba imituku cyane birenze. Mu gihe ugiye kugura iyi miti mu kugufasha guhindura amaso imyeru, ugomba kwirinda yo yaba ifite bimwe muri ibi bikurikira: Ephedrine hydrochloride, Naphazoline hydrochloride, Phenylephrine hydrochloride na Tetrahydrozoline hydrochloride.

Source:wwwalaboutvision.com, inyarwanda.com

[email protected]

Iby’izi ndirimbo Ngombwa Timothée w’imyaka 74 y’amavuko yabigarutseho aganira na RBA. Ijwi rye kuri iyi ngingo ry’umvikanye mu kiganiro ZOOM IN ndetse n’icyitwa SAMEDI DETANTE cyo kuri uyu wa Gatandutu tariki 23 Mutarama 2021. Indirimbo “Uwera” twumva mu matorero atandukanye, yasobanuye ibyayo avuga ko yayihimbiye umukunzi we wari umuzungukazi.

Ngombwa yavuze ko Masamba ari mu biyitiriye indirimbo yahimbye

Ngombwa yagize ati “Yari umuzungu hahahahh, yari metisi. Yari mwiza cyane naramukundaga cyane kurusha abandi”. Iyindi yagarutseho ni iyitwa “Ziravumera”. Yashinje umuhanzi Intore Masamba kuyiyitirira akayigira iye kandi nyamara ari igihangano cye.

Yagize ati “N’iyanjye nabibigishaga turi inkotanyi hariya, we akaza kuzicuruza akazigira ize, akanazihimba ntabitinye akandikaho ngo from Masamba, abantu bose barabizi bazabikubwira bati kariya gasaza kararenganye, bafite za merisedesi njye ntagira n’igikwasi”.

Ngombwa yakomeje asobanura igihe yayihimbiye avuga ko byari mu 1993 ubwo biteguraga gutaha bava ahitwa i Mbarara muri Uganda. Yari mu bari bari ku rugamba rwo kubohora igihugu cy’u Rwanda. Yakomeje avuga ko kuyihimba ngo byatewe ahanini n’uko inka zo mu Rwanda nazo zatahaga ziva mu mahanga.

Yunzemo avuga ko izo nka zageraga mu Rwanda zikarisha umukenke zitaherukaga akoresha amagambo ari muri iyi ndirimbo ati “Nibyo navugaga by’umukenke uzikesha ntuzikebanye ntizari ziwuzi ariko ziryamamo zanga no kubyuka”.

Umunyamakuru yamubajije impamvu iyi ndirimbo itamumenyekanyeho, avuga ko we atahise aza mu Rwanda abandi bakayiyitirira kuko yari yarakoze impanuka. Yagize ati “Nagize impanuka ndavunika nari naranayigishije ariko nsigara mu bitaro mu 1994 bafata u Rwanda njye nari i Kampala”.

Uyu musaza ufite imyaka 74 akomoka mu rukiga mu yahoze ari Perefegitura ya Byumba, ubu ni mu Ntara y’Amajyaruguru mu karere ka Gicumbi. Se yari umutware ndetse byamuhesheje amahirwe yo gutaramira umwami Mutara wa gatatu Rudahigwa n’abandi bana bo mu rungano rwe.

Kuri Yubile ya Mutarag wa gatutu Rudahigwa yabereye i Kigali niwe wari uyoboye abana bataramye icyo gihe kuko yari azi kuririmba. Yatangiye ubuhanzi gakondo kera, indirimbo ye ya mbere, yayihimbye hagati yo mu 1958 na 1959. Iyi ndirimbo yari ijyanye n’umupira w’amaguru. Iri mu zatumye yigirira icyizere mu buhanzi kuko yamuhesheje kuzenguruka hirya no hino mu gihugu ahabaga hakinnye amakipe akomeye.

Yatumye yambuka Nyabarongo ku nshuro ya mbere akiri umwana muto ari umunyeshuri nk’umuhanzi ukomeye ufite indirimbo isusurutsa abafana. Icyo gihe ngo babaga bamujyanye ngo ajye gufana za Kabgayi n’ahandi.

Ni iki Masamba yavuze ku byo ashinjwa n’uyu musaza?

Mu kiganiro na inyaRwanda.com twabanje kubaza Masamba Intore niba uyu musaza amuzi, avuga ko amuzi kandi ari umuhanga ndetse yongeraho ko yigishijwe na Se nyakwigendera Sentore. Yabihamije yemera ko indirimbo “Ziravumera” ari iy’uyu musaza, agira ati “Ziravumera ni indirimbo ye ijana ku ijana, yayihimbiye i Bugande muri cya gihe dukotana gutaha”.

Yakomeje avuga ko yayihaye Indahemuka iri rikaba ryari itorero ry’umuryango wa FPR Inkotanyi ryifashishwaga mu bukangurambaga, no mu gihe cyo kumenyakanisha umuryango no gutera morari abari ku rugamba rwo kubohora igihugu. Yavuze ko icyo gihe buri wese yatangaga uko yifite nk’uko hari abatanze inka n’ibindi umuhanzi nawe ngo yashoboraga gutanga igihangano cye.

Ngo ni muri urwo rwego uyu musaza yatanzemo indirimbo “Ziravumera” akayiha iri torero ry’umuryango. Yabisobanuye neza ati “Twagiye kumureba arwaye atwigisha iriya Ziravumera hanyuma muri za Tourne twagiye dukora twarayikoreshaga”. Yavuze ko nyuma yo gutsinda urugamba yakomeje kujya ayiririmbana n’itorero nyuma ageze aho ayikora mu buryo bunoze muri studio.

Icyakora nyuma y’ibi yahakanye ko atigeze ayiyitirira, ati “Sinigeze na rimwe nyiyitirira narayiririmbye kuko yari indirimbo twaririmbaga nk’uko hari n’izindi za kera ndirimba umuntu wese yashoboraga kuririmba”. Yongeyeho ko yayikoze muri studio kugira ngo itazapfa ubusa abantu bumvise bayiririmba ngo bajye bayumva mu byuma icuranze neza.

N’ikimenyimenyi yavuze ko atigeze ayishyira kuri shene ye ya Youtube. Yagize ati “Abantu barayumvaga, bayikunda bakagenda bayishyiraho ariko njyewe ntabwo natinyuka kuyishyira kuri shene yanjye”.

Yakomeje avuga ko uyu musaza ayishatse yanyura mu nzira nyazo ziboneye akabisaba kuko mu by’ukuri yayihaye itorero Indahemuka cyo kimwe n’abandi bahanzi bagiye bayiha ibihangano byabo nka Sentore na Jeanne Karigirwa warihaye indirimbo ye yiwa “Gira ubuntu”. Abenshi iyi bazi ko ari iya Cecile Kayirebwa.

Ngombwa wari kumwe na Masamba ku rugamba rwo kubohora igihugu yamushinje kwiyitirira indirimbo ye “Ziravumera”

Ushobora kuba uri muri kimwe cya kabiri cy'urukundo ariko ukaba uri mu ntambara n'umuntu, kandi iyo ntambara ikaba ikomeye cyane kuri wowe, ndetse ukaba ubona pe ubishoboye kuyirwana kuko uzi kwihagararaho, uzi kwirengagiza, uzi kwirwanaho mbese muri make uzi no kwangiza imitima y'abandi binyuze muri ubwo buhanga wifitemo.

Ahari utekereza ko ibyo byose urimo kubikora kandi hafi ya byose warabirangije ariko aho wabikoreye, uwo muntu ntabwo yari yakurambirwa ngo ahitemo kugenda cyangwa kukwibagirwa. Nta n’ubwo yari yaguha agahenge na gato wenda bitewe n'uko yatengushywe. Ntabwo yiha umwanya ngo abone ko hari ibitagenda neza mu mu bano wanyu. Oyaa! We ikimurimo ni ukukurwanirira kandi bitari mu ntambwe imwe yoroshye. Aragukunda kandi nawe urabizi cyane.

Uzi ko atajya agira ubwoba bwo kukubwira icyo usobanuye kuri we. Nawe urareba ugasanga ntabwo ari uwo mukwiranye, uramwitegereza ugasanga imico ye ntiwayishobora, wareba ugasanga wenda ibyo akora ntibihagijhe. Abahanga mu rukundo bavuga ko urukundo rurenze ibyo tubonesha amaso, kuba ari mwiza, kuba azi kuvuga neza ijambo 'Ndagukunda' Shelton yavuze ko bidahagije na gato;

Ndetse ko amarangamutima y'uko abayeho adakwiriye kuba imbarutso yo kumuha ubuzima bwawe bw'ejo ahubwo ibyo we yigomwa kubwawe bizakwerekako azatanga ubuzima bwe ku bw'ibyishimo byawe ubwo muzaba muri munsi y'igisenge kimwe. Aha niho ugera ugasanga ntabwo arakwemeza bigatuma ubura impamvu n'imwe yo kumukunda. Umuntu uri mu rukundo nawe ntabwo azigera ahagarika kugukunda uko byagenda kose, azahora arwana ngo akugereho ukwiriye guha agaciro ibyo twavuze haraguru.

Abahungu (Abagabo) hafi ya bose muri kamere yabo harimo gukurikira cyangwa kwiruka ku gitsina gore. Gusa nk'uko tubizi ikintu cyose gihabwa agaciro iyo nyiri kukigeraho byamusabye imbaraga nyinshi, umuhate n'umwanya. Ikintu cyakuvunnye ucyitaho. Urugero: Reba mu byo utunze nawe, ese ni iki gifite agaciro gakomeye? Ese ni icyo watoraguye ahantu wigendera cyangwa ni icyo waguze wumva ugikeneye kandi ukigomwa amafaranga wari bukoreshe n'ibindi? Igisubizo ni wowe ugifite. 

Niyo mpamvu rero umuhungu ugukunda koko kandi by'ukuri azakora iyo bwabaga ngo abone ijambo ryawe, urukundo n'umwanya byawe. Azakina udukino twawe umuhozamo ntabwo azarambirwa. Iteka uzibuke ko abagabo bakunda gushyira ibibazo byose mu biganza byabo iyo bigeze mu rukundo ku muntu bakunda.

Ntabwo bakunda kwicara ngo urukundo rubizanire, umugabo w'ukuri, yiruka ku kintu ashaka iyo bigeze ku byerekeye umutima. Ibi ni nako byahoze, abagabo haba urukundo uwo bashaka bakaba banabapfira. Kuba akwirukaho ntibivuze ko ari uko abandi babuze cyangwa atababona ni uko ari wowe ashaka.

Niba umugabo atagushaka rero azashaka impamvu, azakubwira ko hari ibintu ari kwitaho akubwire ko afite akazi kenshi adahari. Wowe nujya no kumukunda mbese ugashaka kumwiyegereza wowe ubwawe, hari ubwo azakureka kubera impamvu ye bwite ariko ntuzatinda kubona ko ari wowe koko wamusabye urukundo.'

Iyo urukundo rw'ukuri rukugezeho urabimenya ukanarubona ukiga kutarusubiza inyuma'. Aya ni amagambo yavuzwe n'umujyanama mu mibanire Shelton muri Rehabilitation nk'intero yihaye mu myaka myinshi ishize.

Muri iyi nkuru niwisangamo ntutekereze ko tukuzi cyangwa hari aho twumvise ibyawe. Iyi nkuru ishingiye ku bitekerezo by'umunyamakuru wayanditse hifashishijwe ubutumwa bw'umuhanga mu mibereho ya muntu Trent Shelton mu ntero ye yise Rehabilitation. Nunyurwa n'ibirimo usige igitekerezo cyangwa inama ushaka kugisha.

Mu gihe habura amasaha make ngo u Rwanda rukine umukino usoza itsinda C muri CHAN 2020 irimo kubera muri Cameroun bamwe mu siporutifu barimo abayobozi b’amakipe, abatoza bifurije Amavubi intsinzi.

Uyu munsi Amavubi aremenya niba akomeza muri ¼ cya CHAN cyangwa niba ari bugaruke atarenze itsinda.

Ibyifuzo by’abanyarwanda batandukanye ni uko iyi kipe yagera muri ¼ cy’iri rushanwa icyiciro baheruka muri 2016 ubwo irushanwa ryaberaga mu Rwanda.

Umuyobozi wa APR FC, Maj. Gen. yasabye abakinnyi kumvira inama z’abatoza kuko ari rwo rufunguzo rwo gutsinda uyu mukino.

Ati'Amavubi Stars, umuryango wa APR FC n’abanyarwanda muri rusange, tubifurije intsinzi mu mukino wacu na Togo. Nimukotane, umukino wa nyuma muwugire uyu, buri wese yumvire inama z’abatoza kandi mushyire hamwe iminota yose mu kibuga niryo banga.'

Good luck @AmavubiStars @FERWAFA pic.twitter.com/8H4suUeUIp

— APR FC OFFICIAL (@aprfcofficial3) January 26, 2021

Umuyobozi wa Kiyovu Sports, Mvukiyehe Juvenal ati'Umuryango wa Kiyovu Sports urifuriza ikipe y’igihugu Amavubi intsinzi mu mukino uduhuza na Togo. Abanyarwanda twse tubari inyuma.'

Umuryango wa Kiyovu Sports wifurije ikipe y’igihugu @AmavubiStars intsinzi. @FERWAFA #Tubadwinge #CHAN2020 pic.twitter.com/YzGRHyNbfx

— Kiyovu Sports (@SCKiyovuSports) January 26, 2021

Jimmy Mulisa umutoza wanakiniye ikipe y’igihugu yifuruje intsinzi Amavubi avuga ko ibyo bakzoe ku mukino wa Uganda byari igice cy’ibyo bashoboye bityo abanyarwanda bose babafatiye iry’uburyo.

#CHANRWATOG Our halfbacks can win this game for us👌🏿We saw a glimpse of this against UG…Good luck Amavubi 🙏

— Jimmy mulisa (@jimbomulisa) January 26, 2021

Umutoza Didier Bizimana wakiniye u Rwanda muri CECAFA 1997, na we yifruje Amavubi intsinzi aho avuga ko gusatira izamu ari byo bishobora kubageza muri ¼ cya CHAN 2020.

Gusatira izamu nibyo biri butugeze muri ¼: Didier Bizimana https://t.co/u19PGUHf67 @FERWAFA pic.twitter.com/1WQUVlt9zb

— APR FC OFFICIAL (@aprfcofficial3) January 26, 2021

Amavubi arasabwa gutsinda uyu mukino wa Togo uri bube saa 21h kugira ngo agere muri ¼ cya CHAN 2020. Mu itsinda C Maroc ifite amanota 4, Togo 3, u Rwanda 2 ni mu gihe Uganda ifite 1.

Amavubi arakina umukino wo gupfa no gukira

Amaso y’abanyarwanda bayahanze kuri televiziyo, amatwi kuri radiyo ni mu gihe umutima wabo uri muri Cameroun, bafite amatsiko yo kumenya niba Amavubi adwinga Togo akagera muri 1/4 cya CHAN 2020.

Nyuma y’imikino 2 yo mu itsinda C u Rwanda rwasoje ruyinganyije yose 0-0( Uganda na Maroc) uyu munsi arakina na Togo umukino usoza imikino y’itsinda.

Ni umukino wishiraniro cyangwa uwite uwo gupfa no gukira kuko u Rwanda nta kosa rugomba gukora kuko gutsinda niyo mahirwe yonyine yatuma Amavubi agera muri 1/4, ni mu gihe Togo isabwa kunganya gusa.

Imikino ibiri yatambutse ntabwo Amavubi yabashije kugira igitego itsnda gusa nayo ntabwo yigeze atsindwa.

Ni umukino Abanyarwanda benshi basabye umutoza Mashami niba abaye abumva uyu munsi saa 21h yakina umukino wo gusatira kuko nta kintu aramira, akabereka ko uko azi kugarira no gusatira yabishibora.

Ku munsi w’ejo mu kiganiro n’itangazamakuru, Mashami yavuze ko ubu nta mahitamo afite uretse gutsinda Togo.

Ati“Nta kintu kinini umuntu yavuga kuri uyu mukino w’ejo ngira ngo ubusobanuro bwawo bwo burahari, birasobanutse ko nta yandi mahitamo dufite ni ukuwinjiramo nta kintu dusize inyuma.'

Abakinnyi b’Amavubi uretse Nsabimana Eric Zidane na Iradukunda Jean Bertrand bafite imvune abandi bose bameze neza.

Muri 11 bashobora kubanzamo ntibarimo rutahizamu Sugira Ernest wakinnye umukino wa Maroc, ni mu gihe Byiringiro Lague utaragaragaye mu mikino ibiri itambutse ashobora kubanza mu kibuga, akaba ari bube akina umukino we wa mbere muri CHAN 2020.

11 b’Amavubi bashobora kubanzamo

Kwizera Olivier, Omborenga Fitina, Imanishimwe Emmanuel Mangwende, Manzi Thierry, Mutsinzi Ange Jimmy, Niyonzima Olivier Seif, Kalisa Rashid, Hakizimana Muhadjiri, Byiringiro Lague, Nshuti Dominique Savio na Jacques Tuyisenge

Lague araba akina umukino we wa mbere

Sugira Ernest ntari muri 11 bashobora kubanzamo

Abagore bahoze bakundana na Diamond, Zari Hassan na Hamisa Mobetto basubije abafana nyuma y’ibibazo babajije bamaze kubona ko Tanasha yashyiriye Diamond umuhungu we.

Kuva muri Werurwe 2020 Diamond na Tanasha Donna batandukanye ntibacanaga uwaka, ni kenshi Tanasha yagiye yumvikana avuga imyitwarire mibi ya Diamond.

Mu mpera z’icyumweru gishize nibwo uyu mugore uba Kenya yageze Dar es Salaam ashyiriye Diamond umuhungu we, Naseeb Jr ndetse bigaragara bari kumwe bishimye.

Akaba yaramushyiriye umwana we nyuma y’uko umwaka ushize mu Gushyingo, Zari Hassan na we yari yamushyiriye abana be babyaranye.

Zari yabajijwe n’umwe mu bafaba be ikintu atekereza ku kuba Tanasha yarashyiriye Diamond umwana, maze asubiza ko bakwiye kureba ibibareba. Ati'urakoze kuri ibyo bihuba, reka nkubwize ukuri, jya ureba ibikureba, umugabo se nta bandi bana afite?'

Mobetto abafana be bakaba na we bamubwiye ko ashatse yaba yitegura kuzajyana umuhungu Dylan akamarana igihe na se.

Umwe mu bafana witwa Amina Moha yabajije Hamisa Mobetto igihe we azatwarira umwana kwa se maze amusubiza ati'ubwoko bwaruzuye(umuryango waruzuye).'

Mobetto yasubije iki gisubizo asa n’ushotora nyina wa Diamond wamubwiye ko ubwoko bwuzuye cyangwa umuryango wuzuye nta wundi muntu bakeneye, ni mu gihe Mobetto yavugaga ko bakwiye gukoresha DNA.

Diamond kugeza ubu afite abana 4, babiri yabyaranye na Zari Hassan, uwo yabyaranye na Hamissa Mobetto n’uwo yabyaranye na Tanasha Donna.

Diamond ameze neza n’umuhungu we

Mobetto ngo umuryango wo kwa Diamond waruzuye

Zari yabasabye kumenya ibyabo

Ibinyujije ku rubuga rwa Facebook, Leta ya kiriya gihugu ivuga ko ingabo z’u Rwanda zifatanyije n’iz’u Burusiya ziri mu butumwa bw’amahoro kimwe n’ingabo za kiriya gihugu bishe ziriya nyeshyamba mu gitero cyabereye ahitwa Boyali.

Umuvugizi wa Leta ya kirya gihugu Ange Maxime Kazagui yavuze ko urugamba rwo guhashya ziriya nyeshyamba rwatumye bigarurira umujyi wa Boda uri mu bilometero 124 uvuye mu murwa mukuru wa Bangui.

Uyu muvugizi wa Leta ya Centrafrique avuga ko kiriya gitero cyagabwe n’ingabo zayo zifatanyije n’iz’u Rwanda n’iz’u Burusiya nta musirikare wok u ruhande rwabo wahasize ubuzima.

Muri kiriya gihugu kirimo imitwe yitwaje intwaro, imirwano yakajije umurego mu mpera z’umwaka ushize ubwo amatora y’Umukuru w’Igihugu yari yegereje, imirwano yari igamije kuyaburizamo.

Icyo gihe ibihugu by’u Rwanda n’u Burusiya byohereje abasirikare kubungabunga umutekano no gufasha kiriya gihugu kunyura mu matora, ndetse intego y’izi ngabo yagezweho kuko amatora yarangiye.

Ingabo z’u Rwanda ziri muri kiriya gihugu zishimirwa umuhate n’umurava n’ubunyamwuga zigaragaza mu kazi kazijyanye dore ko ari zo zikomeje gutanga imbaraga nyinshi mu gutuma ziriya nyeshyamba zidakandagira mu murwa mukuru wa Bangui.

UKWEZI.RW

Uyu mugabo washinze impuzamashyaka MRCD ushinjwa gutera inkunga umutwe wa FLN wagabye ibitero mu Majyepfo y’u Rwanda bigahitana abaturage, uyu munsi yagombaga gutangira kuburana mu mizi.

Uru rubanza rwagombaga gutangira kuburanishwa n’Urugereko Rwihariye rw’Urukiko Rukuru ruburanisha ibyaha Mpuzamahanga n’ibyambukiranya imipaka, rwajemo inzitizi zatanzwe n’abaregwa.

Abaregwa bagombaga kuburana hifashishijwe ikoranabuhanga ry’iya kure, bavuze ko bifuza kuburanishwa n’Urukiko rw’Ikirenge rusumba izindi nkiko mu Rwanda kandi bakaburana imbonankubone n’abacamanza n’Ubushinjacyaha aho kwifashisha iri koranabuhanga.

Uru rugereko rwari rwanatangiye kuburanisha Nsabimana Calliexte wari wariyise Majoro Sankara, rwahise rusubika uru rubanza kubera izi nzitizi, rukazasubukurwa tariki 17 Gashyantare 2021.

Me Gatera Gashabana wunganira Paul Rusesabagina aherutse kwandikira uru rugereko arumenyesha ko Umukiliya we afunzwe nabi kuko yimwe uburenganzira yemererwa n’amategeko.

Uyu munyamategeko uzwi mu manza zikomeye mu Rwanda, yari yanasabye ruriya rukiko gutegeka ko Umukiliya we afungurwa nk’indishyi yo kumuhungabanyiriza uburenganzira.

UKWEZI.RW