Blog

Abaturage bafite icyo kibazo ni abo mu Mudugudu wa Gako mu Kagari ka Buhoro, bityo bagasaba ubuyobozi kubegereza amazi meza nk'igisubizo kirambye.

Babwiye TV1 ko icyo kidendezi kirekamo ayo mazi ari icyacukuwemo itaka ryakoreshwaga ubwo hubakwaga imihanda ya kaburimbo mu Mujyi wa Ruhango.

Umwe ati 'Iyo dukeneye amazi yo kunywa bidusaba gukora urugendo tukajya mu Murenge wa Byimana mu Kagari ka Ntenyo ahazwi nko mu Rukiriza niho dukura amazi meza. Tunywa amazi ashoka mu mugende aba yavuye muri kiriya cyuzi kuko iyo cyuzuye amazi amanuka kandi hapfiramo abantu.'

Abo baturage bakomeza bavuga ko kuba bavoma ayo mazi mabi ari ukubura uko bagira kuko nta handi ho kuvoma bafite hafi yabo.

Ati 'Koperative yacukuye ikirombe kinini yanga kugisiba ku buryo iyo imvura iguye amazi aza akuzuramo agahita amanuka akaba ariyo tuvoma. Ubwo urumva tunywa amazi mabi tugatekesha amazi mabi.'

Icyo bose bahurizaho ni ugusaba ubuyobozi kubegereza amazi meza bakareka kuvoma ayo mu kidendezi kuko yatangiye kubatera indwara.

Ati 'Turasaba Leta kugira ngo idufashe tubone amazi meza. Ingaruka bitugiraho ni uko abana barwara amibe natwe tukarwara inzoka, ugasanga abantu ntabwo bameze neza.'

Umuyobozi w'Akarere ka Ruhango, Habarurema Valens, yabwiye IGIHE ko kuri icyo kidendezi bashyizeho icyapa gisaba abantu kwirinda kukijyamo no kuhegera kandi ko umuntu wapfiriyemo by'impanuka ari umwe naho undi akaba yariyahuyemo abishaka.

Yavuze ko kuba abaturage bavoma amazi aturuka muri icyo kidendezi ubuyobozi busanzwe bubizi, ariko icyo batazi neza ni ukuba bayavoma bagiye kuyanywa cyangwa kuyatekesha.

Ati 'Niba bayavoma bajya kuyatekesha cyangwa kuyakoresha indi mirimo ntabwo tubizi, ariko bayavomye bajya kuyakoresha indi mirimo nko kubumba amatafari byaba ari ibisanzwe.'

Habarurema yakomeje avuga ko kuba kariya gace katagira amazi meza ari ikibazo kizwi n'ubuyobozi ariko hari kubakwa umuyoboro w'amazi ku buryo mu gihe kitarenze ukwezi kumwe bazaba begerejwe amazi meza.

Ati 'Turimo turahubaka umuyoboro hafi yaho cyane, aho abaturage bazafatiraho haba mu Kagari ka Tambwe haba mu Kagari ka Buhoro (aho icyo kidendezi kiri); mu gihe gito abaturage barabona amazi nko mu gihe cy'ukwezi uwo muyoboro uraba utangiye gukora.'

Yasabye abaturage kwitwararika muri iki gihe bakirinda kwegera icyo kidendezi nk'uko bashobora kwirinda izindi mpanuka.

Ati 'Twashyizeho itangazo rwose risomeka ryanditse mu Kinyarwanda turabasaba ngo baryiteho, nk'uko umuntu yaca ku mugezi uwo ari wo wose cyangwa ku bindi bikorwa bishobora kumutera impanuka akabyirinda, turabasaba kuhitondera nti bajye bahegera.'

Yavuze ko bateganya gusiba icyo kidendezi ku bufatanye n'abantu basanzwe bakuramo ibikoresho by'ubwubatsi, asaba abaturage guharanira kurinda ubuzima bwabo icyabwangiza cyose, abibutsa ko amazi y'imvura atemba hasi cyangwa andi mazi mabi ashobora gukoreshwa indi mirimo nko kubaka no kuhira ariko atari ayo gutekesha cyangwa kunyobwa.

Imibare itangwa n'ubuyobozi bw'Akarere ka Ruhango yerekana ko abaturage bamaze kwegerezwa amazi meza bari kuri 65%.

Hari abaturage bo mu Karere ka Ruhango babangamiwe no kuvoma amazi mabi yo mu kidendezi kimaze gupfiramo abantu babiri

Aya mazi aba yanduye cyane ku buryo ashobora gutera ibibazo abayatekesha bakanayanywa

Iki kidendezi kirekamo amazi ni icyacukuwemo itaka ryakoreshwaga ubwo hubakwaga imihanda ya kaburimbo mu Mujyi wa Ruhango

Muri iki kidendezi hamaze gupfiramo abantu babiri

Uyu mukinnyi w’igikundiro ufite amateka akomeye ku Isi, yaranzwe n’ubuzima bushaririye bwatumye aba uwo ariwe magingo aya nubwo ahora ababazwa no kuba yarahiriwe n’ubuzima Se umubyara atakibarizwa ku Isi y’abazima, gusa yishimira ko isezerano yamuhaye yarigize impamba imufasha gucuma iminsi.

Ubuzima Cristiano yabayemo ndetse akuriramo, bwamuhaye imyitwarire itandukanye n”iyabandi amaze kwamamara ndetse no kugira ubutunzi buhambaye.

Tariki ya 05 Gashyantare 1985, i Madeira nibwo Jose Dinis Aveiro wakoraga akazi gasanzwe nyuma waje kuba umusirikare w’igihugu na Maria Dolores dos Santos Aveiro bibarutse umwana w’umuhungu, bamwita ‘Cristiano Ronaldo Aveiro dos Santos’.

Uyu mwana w’umuhungu wavukiye mu gace ka Funchal mu kirwa cya Madeira mu muryango utari wifashije, yarerewe mu gace ka Santo Antonio nako gaherereye mu kirwa cya Madeira muri Portugal.

Se umubyara Dinis Aveiro, yakoraga mu busitani ndetse rimwe na rimwe agatwaza imyenda amakipe y’abato agiye mu myitozo gusa yakundaga agasembuye cyane, mu gihe nyina Dolores Aveiro yakoraga akazi ko guteka.

Cristiano yakuriye mu muryango mugari, urimo abavandimwe be barimo mukuru we Hugo, bashiki be babiri bakuru, Katia na Elma ndetse na nyirakuru yakundaga wakomokaga mu birwa bya Cape Vert, Isabel da Piedade.

Cristiano yatangiye umwuga wo gukina ruhago mu 1992, atangirira mu gakipe kitwa Andorinha aho yamaze imyaka 3 mbere yo kwerekeza muri C.D National yavuye yerekeza mu ikipe yo mu cyiciro cya mbere yitwa Sporting Clube de Portugal, icyo gihe akaba yari afite imyaka 11 gusa, aho yamaze imyaka itandatu mbere y'uko atangira gusinya amasezerano ye ya mbere mu 2002.

Mu mpera z'umwaka wa 2003, Cristiano yabengutswe n’umutoza Sir Alex Ferguson watozaga Manchester United, birangira ayerekejemo aguzwe miliyoni 15 z'amayero, akigeramo yafashije iyi kipe kwegukana igikombe cya FA ndetse ahita ahamagarwa bwa mbere mu ikipe ye y'igihugu ya Portugal yiteguraga imikino y’igikombe cya Euro 2004.

Hamwe n'ikipe ye ya Manchester United yegukanye igikombe cy'amakipe yabaye ayambere iwayo ku mugabane w'u Burayi (UEFA Champions Ligue) cya 2007-2008, irushanwa ryarangiye yigaragaje ku rwego rutangaje cyane ndetse ahita anegukana umupira wa zahabu (Ballon d'Or 2008) nk'umukinnyi witwaye neza kurusha abandi ku nshuro ya mbere, nyuma yo gusoza ku mwanya wa kabiri mu 2007, akongera akagaruka mu 2009, 2011 na 2012 akurikiye Lionel Messi.

Mu mwaka wa 2009, yabaye umukinnyi wa mbere waguzwe amafaranga menshi mu mateka ubwo yerekezaga mu ikipe ya Real Madrid atanzweho akayabo ka 94.000.000 z'ama Euros. Cristiano Ronaldo niwe winjizaga agatubutse, kuko yabonaga arenga miliyari (1.000.000.000 Euros) ku mwaka.

Mu myaka 9 yamaze i Santiago Bernabeu, Cristiano yahasize amateka n’uduhigo bizagorana kudukuraho, kuko yegukanye ibikombe bya UEFA Champions League 4, ibikombe by’Isi 3 na La Liga 2, anegukana imipira ya zahabu (Ballon d’Or) 4.

Niwe rutahizamu w’ibihe byose watsindiye ibitego byinshi Real Madrid mu mateka, 450 mu mikino 438 yakinnye mu marushanwa atandukanye.

Uyu mukinnyi uri mu bafite amafaranga menshi ku Isi, mu 2018 yerekeje mu Butaliyani muri Juventus, aguzwe Miliyoni 100 z’ama-Euros.

Mu myaka irenga ibiri amaze i Turin, yakiniye iyi kipe imikino 110, amaze kuyitsindira ibitego 85, akaba amaze kuyifasha gutwara ibikombe bibiri bya shampiyona ya Serie A ndetse na Supercoppa Italiana ebyiri.

Mu ikipe y'igihugu ya Portugal, Cristiano yatangiye kuyikinira mu mwaka wa 2003, kugeza ubu amaze kuyikinira imikino 164, amaze gutsinda ibitego 99.

Cristiano aherutse guhembwa nk’umukinnyi w’ikinyejana, wigaragaje kurusha abandi.

Ubu Cristiano niwe mukinnyi wa mbere ku Isi ufite ibitego byinshi mu mateka ya ruhago kuko yujuje ibitego 760.

Cristiano w’imyaka 35 y’amavuko, afite abana bane barimo batatu yabyaranye n’umukunzi we babana Georgina Rodriguez, barimo Eva, Matteo na Alana Martina ndetse na Cristiano Jr.

Bimwe mu byihariye ku buzima bwa Cristiano Ronaldo:

1. Yiswe Ronaldo kubera Perezida wa Amerika Ronald Regan

Izina Ronaldo ni izina rimenyerewe mu mupira w' amaguru ariko iry'uyu mu Portugal we ririhariye kuko yiswe iri zina bitewe n'uko ise wa Cristiano Ronaldo yakundaga cyane uwari Perezida wa Amerika Ronald Regan byatumye afata izina Ronald yongeraho inyuguti ya 'o' kugira ngo rihinduke izina ry'igiportigal 'Ronaldo.' Ubundi amazina ye nyakuri ni Cristiano Ronaldo Dos Santos Aveiro.

2. Nta tatuwaje(Tattoos) wamubonaho ku mubiri cyangwa se yamujya ku mubiri

Abantu benshi bazwi ku Isi (stars), ndetse n'urubyiruko muri iyi minsi usanga bakunda kwishushanyaho, niyo ugiye mu mupira w'amaguru usanga abenshi barishyishijeho tattoo, gusa uyu mukinnyi we siko bimeze kuko nta n'imwe wamubonaho. Impamvu ni uko ngo umuntu washyizeho tatuwaje amaraso ye aba yanduye ku buryo atatanga amaraso kandi we ayatanga amaraso kabiri mu mwaka.

3. Cristiano Ronaldo ntashobora gukoresha ibiyobyabwenge

Nyuma y'uko se umubyara, Jose Dinis Aveiro, yitabye Imana muri 2005 ku myaka 52 ahanini azize ingaruka z'ibiyobyabwenge byinshi yakoresheje, Cristiano wari ufite imyaka 20, yahise azinukwa ibiyobyabwenge n'ibisanabyo.

4. Yavuye mu ishuri afite imyaka 14, azira gukubita umwalimu

Ku myaka 14 y'amavuko, Cristiano Ronaldo yavuye mu ishuri, hari nyuma y'uko yari ajugunye intebe ku mwarimu wamwigishaga avuga ko yamusuzuguye, byamuviriyemo kwirukanwa mu ishuri, nyina afata umwanzuro w'uko atazongera kwiga ukundi ahubwo ko imbaraga ze n'umtima we agomba kubishyira ku mupira w'amaguru, ibintu byaje no kumuhira akaba ari uwo ariwe uyu munsi.

5. Nyina yashatse gukuramo inda igihe yari atwite Cristiano.

Ni kenshi umubyeyi cyangwa umukowa atwita bitewe n'igihe arimo akumva yakuramo inda, ndetse benshi baranabikora, ibi nibyo byabaye kuri Maria Dolores dos Santos Aveiro ari we mama wa Cristiano. Yagerageje gukuramo inda yari kuzabyara Cristiano izina ririmo gutigisa Isi, ahanini yari abitewe n'ibibazo, gusa ntibyaye Imana yakinze akaboko.

Kuba nyina yaragerageje kumuvutsa ubuzima, Cristiano yatangarije itangazamakuru ko nta kibazo na kimwe afitanye na nyina kerekeranye no kuba yarashatse gukuramo inda ahubwo ko yamaze kumubababrira.

6.Yinjiza agatubutse kurusha Perezida wa Amerika

Ronaldo ku cyumweru abona amapawundi arenga ibihumbi ibuhumbi 274 (£274,000) ni ukuvuga agera ku bihumbi 390 by'amadorari($390,000).

N'ubwo bitemewe kuvuga umushahara w'umuperezida ku mbuga nk'izi cyane cyane mu itangazamakuru, icyo wamenya n'uko ayo Perezida w'Amerika ahembwa ari munsi y'aya.

Mu gihe Umujyi wa Kigali uri muri gahunda ya Guma mu rugo, abaturage bacye basaba impushya kubera impamvu zumvikana bararuhabwa ariko kubona uburyo bwo kugenda ntibyoroshye, kuko nta moto yemerewe gutwara abagenzi ndetse nta n’imodoka zitwara abagenzi mu buryo bwa rusange.

Umusore wagenderaga ku mbago azamuka ku Muhima yerekeza mu mujyi wa Kigali rwagati, bigaragara ko yashakaga kugera kwa muganga ariko adafite ubundi buryo yabigenza, yagobotswe n’abapolisi bamuciyeho bakamugirira impuhwe, bakamushyira mu modoka yabo y’akazi bakamugeza kwa muganga.

Aya mafoto arashimangira uburyo abatabasha kubona imodoka zabo bwite cyangwa badafite ubushobozi bwo gutega imodoka nto zikora Taxi (Taxi Voiture) batoroherwa n’ingendo igihe bagize impamvu yumvikana ituma bagenda, kuko n’ubwo hari imodoka zashyizweho zifasha abarwayi atari buri wese zitwara. Aya mafoto kandi yongeye gushimangira uburyo Polisi y’u Rwanda iha agaciro abaturage ikanagaragaza ibikorwa by’ubumuntu muri rubanda.

Biragoye kumva ko umuntu yagira amahoro mu gihe kigoye ariko ibidashobokera abantu ku Mana birashoboka. Yesu ni urugero rwiza rutwereka ko umuntu yagira amahoro mu gihe abantu babona ko bidashoboka ndetse babona ko bapfuye.
Iyo dusomye Mariko: 4: 35-41 tuhasanga inkuru igaragaza Yesu n’abigishwa be bari mu bwato ishuheri ibasanga mu Nyanja barahangayika babona ko bapfuye nta gisigaye, bamukangura bavuga ngo mbese ntacyo bikubwiye kuba tugiye gupfa, ariko Yesu yari asinziriye nubwo byari bimeze gutyo.

Birashoboka kugira amahoro mu gihe cy’ishuheri umuntu akaryama agasinzira. Nubwo abantu bose babona ko nta kindi gishoboka uretse urupfu ariko Yesu we aba abona ubuzima.

Iyo dusomye mu gitabo cy’Ibyakozwe n’intumwa: 12: 1 tuhasanga indi nkuru y’uburyo Herode yashatse kwica Petero, nyuma yuko yari amaze kwicisha Yakobo akabona ko anejeje Abayuda ashaka no kwiyongeza na Petero. Ariko ab’Itorero bagira umwete wo gusengero Petero.

Ku umurongo wa 6 'Herode araye ari bumusohore, iryo joro Petero yari asinziriye hagati y’abasirikare babiri, aboheshejwe iminyururu ibiri, abarinzi nabo bari ku rugi barinda inzu y’imbohe.'

Ntabwo byumvikana uburyo umuntu wari bubyuke yicwa aboheshejwe iminyururu, araye mu nzu y’imbohe aryama agasinzira kuburyo marayika yaje kumukangura akananirwa kuva mu bitotsi akarinda ubwo agera hanze akamenya ko Atari mu bitotsi.

Umurongo wa 11 'Petero agaruye umutima aribwira ati 'Noneho menye by’ukuri yuko Umwami Imana yatumye marayika wayo ikankura mu maboko ya Herode ikankiza ibyo ubwoko bw’Abayuda bwatekerezaga byose.'

Abantu batekereza ko amahoro azanwa n’uko umuntu ubuzima bwe bugenda nkuko yifuza, arya ibyo ashaka kurya, yivuriza aho ashaka kwivuriza, yambara ibyo ashaka kwambara, yishyurira umwana aho yifuza n’ibindi ariko ibyo ntabwo bitanga amahoro kuko hari ababifite babuze amahoro, amahoro aturuka ku kwakira Yesu akakubera Umwami n’umukiza w’ubugingo bwawe.

Ku bizera Yesu bagira amahoro nubwo ubuzima butagenda uko babyifuza, mu bihe banyura mu buzima bushaririye bagira amahoro ndetse bagira amahoro n’imbere y’urupfu kuko umuririmbyi yaravuze ngo kubaho ni Kristo no Gupfa ni inyungu ku Mukirisito wese w’ukuri.

Hari imirongo tubona mu Ijambo ry’Imana yadukomeza mu gihe tunyura mu bihe bigoye tukagira amahoro

Abaroma: 15: 13 'Imana nyir’ibyiringiro ibuzuze umunezero wose n’amahoro biheshwa no kwizera, kugira ngo murusheho kwiringira mubiheshejwe n’imbaraga z’Umwuka Wera'.

Abaroma: 16: 20 'Imana nyir’amahoro izamenagura Satani munsi y’ibirenge byanyu bidatinze. Ubuntu bw’Umwami wacu Yesu Kristo bubane namwe.'

Yohana: 16: 33 'Ibyo mbibabwiriye kugira ngo mugire amahoro muri jye. Mu isi mugira umubabaro, ariko nimuhumure nanesheje isi.'

Efeso: 6: 13-16 'Nuko rero mutware intwaro zose z’Imana, kugira ngo mubashe gukomera ku munsi mubi, kandi murangije byose mubashe guhagarara mudatsinzwe. Muhagarare mushikamye mukenyeye ukuri, mwambaye gukiranuka nk’icyuma gikingira igituza, mukwese inkweto ari zo butumwa bwiza bw’amahoro bubiteguza, kandi ikigeretse kuri byose mutware kwizera nk’ingabo, ari ko muzashoboza kuzimya imyambi ya wa mubi yose yaka umuriro.'

2 Tesaronika: 3: 16 'Nuko rero Umwami wacu ajye abaha amahoro iteka ryose mu buryo bwose. Umwami abane namwe mwese.'

Malachie

Umuhanzi ukomeye wo mu kinyejana cya 17 Rembrandt ubuhanga bwe mu bugeni bwatumye isi yose yumvikana kumugira intwari idasanzwe ya gikristo kuko yagize uruhare runini mu kumenyekanisha Bibiliya akoresheje gushushanya inkuru ziyirimo.

Rembrandt Harmenszoon van Rijn yavutse Kuwa 15 Nyakanga mu 1606 mu mujyi wa Leyden muri Pays-Bas (Netherlands). Yakuze yibanda kuri Bibiliya, bityo ibihangano bye byabaga bishingiye ku Ijambo ry’Imana.

Mu gihe cye cy’ubugimbi, Rembrandt yerekanye impano idasanzwe y’ubugeni. Yatangiye umwuga wo gushushanya amashusho kandi yahise amenyekana cyane mu gukora amashusho kuko we yabonaga ibirenze ibintu bifatika ku bijyanye n’imiterere.Iyi mpano ye yo gushushanya yagiriye benshi umumaro ndetse ibakundisha Bibiliya.

Mu 1634, Rembrandt yashakanye na Saskia van Uylenburgh. Nubwo abana batatu muri bane babyaye bapfuye bakiri bato, Rembrandt yakomeje guteza imbere ubuhanga bwe bwo gushushanya. Yashinzwe ku mugaragaroitsindary’abakorerabushake mu bijyanye no gushushanya, yasohoye igihangano yise ‘The Night Watch’ ishusho itangaje cyane y’imyumvire idasanzwe yakoze ku mitima ya benshi.

Mu 1642, ibintu byose byarahindutse. Kubw’ibyago Saskia yapfuye nyuma yo gutwita inda ya kane. Nyuma y’urupfu rwe, Rembrandt ntiyifuzaga gushaka undi mugore. Ariko bitunguranye yaje kwisanga mu rukundo rutamuguye neza ku buryo byageze aho bagera mu nkiko. Muri macye urwo rukundo ntirwamuhiriye.

Nyuma y’igihe kirekire Rembrandt yaje gushyingiranwa n’umugore witwa Hendrickje Stoffels. Rembrandt yakomeje gukora ibishushanyo, akenshi nyaburanga ariko cyane yibanda ku nsanganyamatsiko za Bibiliya. Kandi Rembrandt mu miterere ye ntiyagaragaje gusa amashusho ya Bibiliya, ahubwo yararetse Bibiliya iravuga.

Rembrandt Harmenszoon van Rijn yakoze ibihangano byinshi bishingiye ku nkuru zo muri Bibiliya harimo 'La Résurrection de Lazare' bisobanuye 'Umuzuko wa Lazaro', 'Le Christ dans la Tempête sur la mer de Galilée' bisobanuye ngo 'Kristo mu nkubi y’umuyaga ku nyanja ya Galilaya' 'Le Sacrifice d’Isaac' Bisobanuye 'Igitambo cya Isaka' 'Le Christ et la femme adultère' bisobanuye ngo 'Kristo n’umugore w’umusambanyi', 'The Hundred Guilder Print' Inkuru ivuga ku Butumwa Bwiza buboneka muri Matayo igice cya 19. Ni inkuru ivuga ku ntambara hagati y’umwijima n’umucyo.

Mu 1657, ubukene bwatumye Rembrandt ateza cyamunara ibintu byinshi yari afite ndetse yimukira mu nzu yoroheje. Hendrickje yapfuye mu 1663 naho Rembrandt apfa mu 1669, asize umukobwa we n’amagana y’ibihangano bye. Yashyinguwe nk’umukene, ariko impano ye idasanzwe yamenyekanye nyuma ndetse igirira isi umumaro ukomeye.

Dore bimwe mu bihangano bya Rembrandt:
'Le Christ dans la Tempête sur la mer de Galilée' 'Kristo mu nkubi y’umuyaga ku nyanja ya Galilaya'

Le Sacrifice d’Isaac' 'Igitambo cya Isaka'

'Le Christ et la femme adultère' 'Kristo n’umugore w’umusambanyi'

Ese ni iki twakwigira kuri Rembrandt? Ntabwo ari ubuhanga bwe gusa, ahubwo mu buhanzi bwe harimo ivugabutumwa ryo ku rwego rwo hejuru. Reka turebere hamwe ibintu by’ingenzi byadufasha.

1.Rembrandt atwereka agaciro ka muntu. Rembrandt yakundaga abantu. Mu bantu bose yashushanyije harimo na we ubwe, tubona gushimishwa n’uko bari detse n’abo ari bo nk’abantu. Umuntu wese, yaba umuntu mukuru cyangwa muto mu mashusho ye, agaragazwa n’ukuri. Mu bikorwa bye byose, Rembrandts aratwibutsa ko buri wese muri twe afite agaciro kuko twaremwe mu ishusho yImana.

2.Rembrandt atwereka imiterere y’umuntu. Bumwe mu buhanga bwaranze Rembrandt kwari ugushushanya amashusho igice kimwe kigizwe n’umucyo naho ikindi gice kigizwe n’umwijima. Mu ukora ibi mbibona nk’aho Rembrandt afata Bibiliya nk’uko abantu turi. Ku ruhande rumwe, twaremewe mu ishusho yImana, nyamara twese turi abantu bari mu gicucu cy’icyaha cyagwiririye isi. Ubuhanzi bwa Rembrandt bwerekana abantu uko bameze: Beza ariko bafite inenge.

3.Rembrandt atwereka amateka ya Bibiliya. Rembrandt yari umuhanzi ushingiye kuri Bibiliya ku buryo kimwe cya gatatu cyibihangano bye bishingiye kuri Bibiliya. Kuri Rembrandt Bibiliya yari inkuru yukuri; y’ibyabaye kandi bibaho kubantu nyabo. Kugira ngo yongere ukuri kw’amashusho ye ya Bibiliya, Rembrandt yagishije inama abarabi (rabbis) b’Abayahudi. Bemeranywa ko Bibiliya itari amateka gusa ahubwo nayo ifite akamaro.

4. Rembrandt atwereka ubuntu (grace). Rembrandt yashyize mu bikorwa icyo Bibiliya ivuga we ubwe. Imwe mu mashusho ye ya nyuma ni 'Kugaruka k’Umwana w’ikirara' aho tubona umuhungu muto mu Butumwa Bwiza bwanditswe na Luka:15 yakiriwe asubira mu rugo maze se aramwishimira, mu kimenyetso cy’ubwiyunge no kwemerwa, yamurambitseho ibiganza abikoranye urukundo.Muri iyo nkuru Rembrandt yerekanye neza; ubuzima bwe bw’umuvurungano bwerekanye ko akeneye gushaka no guhabwa ubuntu na Yesu Umukiza wacu.

Muri macye uyu mugabo Rembrandt yasize umurage mwiza mu batuye isi kuko bungukiye byinshi bigendanye n’ubuzima bwa gikristo mu nyigisho ze, akoresheje ubwenge karemano Imana yamuhaye abinyuza mu bihangano bye.

Source: www.christiantoday.com

[email protected]