Webrwanda Backend

Blog

  • Bite bya Buteera Andrew wa APR FC umaze igihe urwaye? #rwanda #RwOT

    Ubuyobozi bwa APR FC buravuga ko umukinnyi wayo ukina mu kibuga hagati umaze igihe arwaye, Buteera Andrew arimo koroherwa ndetse abaganga bakomeje kumukurikirana.

    Buteera Andrew amaze igihe kinini arwaye, ni kuva mu Gushyingo 2020 ubwo iyi kipe yiteguraga umukino wa CAF Champions League na Gor Mahia.

    Umunyamabanga wa APR FC, Michel Masabo yabwiye ikinyamakuru ISIMBI ko uyu mukinnyi arimo akurikiranwa n’abaganga kandi arimo kugenda amera neza.

    Ati'Buteera ari mu maboko y’abaganga, baracyamukurikirana, abaganga bacu b’inzobere i Kanombe, araho arimo koroherwa.'

    Ku kijyanye n’indwara arwaye cyane ko benshi bakomeje kuyibazaho, Michel Masabo avuga ko byatangiye ari imvune yo mu ivi ariko ibirenzeho ntacyo yabitangazaho.

    Ati'ibintu byo kwa muganga, icyo arwaye ntabwo twe tubishyira kuri Radio cyangwa mu bitangazamakuru, biba ari ubuzima bwite bw’umuntu, niyo naba mbizi ntabwo nshobora kubivuga, iryo kosa ryaba rikomeye rwose. Yatangiye afite imvune mu ivi barayikurikirana n’ubu aracyari mu maboko yabo baramukurikirana umunsi ku munsi. Icyo tumwifuriza ni ugukira agatangira agakina umupira nk’abandi.'

    ISIMBI yagerageje kuvugana na Buteera Andrew ku burwayi bwe ariko ntibyakunda kuko uyu mukinnyi atiteguye kuba yagira icyo abitangazaho.

    Uburwayi bwa Buteera Andrew bwibajijweho byinshi ndetse bikavugwa ko ashobora kuba yaranarozwe, umunyamabanga w’iyi kipe akaba yavuze ko ibyo mu muryango wa APR FC batabitaho umwanya kuko amarozi batayemera.

    Buteera Andrew amaze igihe kinini arwaye

    Source : http://isimbi.rw/siporo/article/bite-bya-buteera-andrew-wa-apr-fc-umaze-igihe-urwaye

  • Umusore urangije kaminuza bamwanditseho ngo RIP bucyeye arapfa. – YEGOB #rwanda #RwOT

    Uyu musore wari ukiri muto ubwo yari ari mu birori byo gusoza amashuri ya kaminuza, umuntu batamenye yamwanditse mu mugongo ngo RIP (Uruhukire mu mahoro). Bidatinze ku munsi ukurikira uyu musore yakoze impanuka ndetse ahita ahasiga ubuzima.

    Ibi byatumye abantu babonye aya makuru basubiza amaso inyuma, ndetse bamwe baravuga bati burya mu gihe cyose waba uri mu birori, ujye wibuka ko uwabitashye wese atariko aba akwifuriza ineza. Ahubwo haba hari nabandi batakwifuza uri muzima, ninabyo byabaye kuri uyu musore rero kuko byagaragaye ko hari abarigeze bishimira ko asoje amashuri ya kaminuza.

    Mu by'ukuri kuba umusore wari usoje kaminuza nka gutyo ahitanwa n'impanuka muburyo butunguranye, gusa ibi byababaje benshi kurushaho kuko ibi byabaye hashize umunsi umwe gusa bamwanditseho ngo uruhukire mu mahoro, benshi bari kwibaza ukuntu bishobora guhurirana cyangwa niba ari urupfu rwari rwateguwe.

    Kenshi usanga mu birori benshi babyitabira baje kureba ibitameze neza kugira ngo bazabone uko bakuvuga nabi, ariko burya hari n'ababyitabira bagamije kukwambura ubuzima. Dukwiye kwitonda cyane cyane tukamenya neza abo turi gusangira mugihe twanezerewe mu birori bitandukanye yaba ibyo twateguye cyangwa ibyo twagiyemo by'abandi.

    Like this:

    Like Loading…

    Source : https://yegob.rw/umusore-urangije-kaminuza-bamwanditseho-ngo-rip-bucyeye-arapfa/

  • Umunyezamu wa Yanga yakingiye ikibaba Michael Sarpong #rwanda #RwOT

    Faroukh Shikhalo umunyezamu wa Yanga yo muri Tanzania avuga ko kuba Sarpong atarimo gutsinda atari umuswa ahubwo ari igitutu cyo gushaka ibitego kuko ngo mu myitozo ni we mukinnyi uba uhagaze neza.

    Muri Kanama 2020 ni bwo Michael Sarpong wari usoje amasezerano muri Rayon Sports yasinyiye Yanga yo muri Tanzania.

    Uyu rutahizamu w’umunya-Ghana akaba yaragiye muri iyi kipe yitezweho gukora ibitangaza ariko bikaba byaranze ndetse abafana bakaba baratangiye kumushyira ku gitutu ndetse bamwe bakavuga ko yabahombeye.

    Umunyezamu wa Yanga, Faroukh Shikhalo avuga ko ari umukinnyi mwiza ahubwo akeneye igihe cyo kugira ngo yisange mu ikipe atangire atsinde.

    Ati'iyo ari mu myitozo aba ari umukinnyi mwiza akora neza, agatsinda. Iyo ari mu kibuga aba afite igitutu cyo gutsinda ari nayo mpamvu ananirwa kwerekana icyo ashoboye. Ikibazo ni igihe, umunsi azatsinda azaba ari ibyishimo kuri we n’ikipe muri rusange.'

    Kugeza uyu munsi Yanga iyoboye urutonde rwa shampiyona muri Tanzania aho bamaze gukina imikino 21. Muri iyi mikino batsinzemo ibitego 34 harimo ibitego 4 bya Sarpong gusa, yatanze umupira umwe wavuyemo igitego ndetse anakorerwaho penaliti imwe. Ibi bitego akaba abinganya na myugariro w’iyi kipe akaba na kapiteni wayo, Lamine Moro.

    Sarpong ibitego byarabuze akomeje kujya ku gitutu

    Faroukh Shikhalo avuga ko Sarpong ari umukinnyi mwiza ukeneye igihe

    Source : http://isimbi.rw/siporo/article/umunyezamu-wa-yanga-yakingiye-ikibaba-michael-sarpong

  • Nigeria : Abakobwa 300 bari bashimuswe mu ishuri barekuwe ku neza #rwanda #RwOT

    Byemejwe na Guverineri w’iyi Ntara ya Zamfara, Bello Matawalle wavuze ko abarwanyi bari babashimuse babarekuye nyuma y’ubwumvikane bwabahuje n’ubuyobozi.

    Uyu muyobozi avuga ko ari we watangije inzira y’ibiganiro by’amahoro kugira ngo bariya barwanyi barekure bariya bakobwa.

    Yagize ati 'Nta ngurane yigeze yishyurwa umuntu uwo ari we wese. Nari nakomeje kuvuga ko nta muntu tugomba guha ikintu icyo ari cyo cyose.'

    Aba banyeshuri b’abakobwa bari bagizwe ingwate kuva ku wa Gatanu w’icyumweru gishize, bari bashimuwe n’abantu bitwaje intwaro baje barasa bakabakura mu nzu bararamo mu ishuri ryitwa Jangele riherereye muri iriya Ntara.

    Guverineri Bello Matawalle yavuze ko abakobwa bari basigaye bataraboneka ari 279 kandi ko bose barekuwe bameze neza ariko ko bajyanywe mu bitaro kugira ngo hasuzumwe niba ntabibazo by’imibiri bafite bitagaragara inyuma.

    Iriya Ntara ya Zamfara ni imwe mu zikunze kwibasirwa n’imitwe yitwaje intwaro ikunze gushimuta abantu kugira ngo bayihe amafaranga.

    UKWEZI.RW

    Source : http://www.ukwezi.rw/Mu-mahanga/Amakuru-anyuranye/article/Nigeria-Abakobwa-300-bari-bashimuswe-mu-ishuri-barekuwe-ku-neza

  • Ethiopia: Ubwicanyi ndengakamere bubera Tigray buhangayikishije Amerika #rwanda #RwOT

    Amerika yamaganye ubwicanyi ndengakamere bwatangajwe mu karere ka Tigray mu majyaruguru ya Ethiopia, isaba umuryango w'Ubumwe bw'Afurika (AU/UA) gufasha mu gucyemura 'ibintu bikomeje kumera nabi'.

    Anthony Blinken, umunyamabanga wa Leta y'Amerika, yagize ati: 'Duhangayikishijwe bikomeye n'amakuba akomeje kurushaho kwiyongera'.

    Raporo y'umuryango Amnesty International uharanira uburenganzira bwa muntu yavuze ko ibyaha byibasira inyoko muntu bishobora kuba byarakozwe. Abantu babarirwa mu magana barishwe naho abandi babarirwa mu bihumbi za mirongo bata ingo zabo mu mezi ane ashize.

    Imirwano yatangiye ku itariki ya 4 y'ukwezi kwa 11 mu 2020 ubwo leta ya Ethiopia yagabaga igitero cyo guhirika ishyaka rya Tigray People's Liberation Front (TPLF), nyuma yuko abarwanyi b'umutwe waryo bafashe ibigo bya gisirikare bya leta muri Tigray.

    Muri raporo yasohoye muri iki cyumweru gishize, Amnesty International yashinje abasirikare ba Eritrea bihana imbibi kwica abantu babarirwa mu magana bo mu mujyi wa kera wa Aksum, ku itariki ya 28 na 29 y'ukwezi kwa 11 mu mwaka wa 2020. Amnesty International yavuze ko uko kwica abantu benshi bishobora kuba icyaha cyibasira inyoko muntu.

    Minisitiri w'intebe wa Ethiopia Abiy Ahmed, wabonye igihembo cya Nobel cy'amahoro mu mwaka wa 2019, ku itariki ya 30 y'ukwezi kwa 11 yabwiye inteko ishingamategeko y'igihugu cye ko 'nta muturage n'umwe w'umusivile' wiciwe mu bikorwa by'ingabo za Ethiopia muri Tigray.

    Ariko ababibonye bavuze ukuntu kuri uwo munsi batangiye gushyingura imwe mu mirambo y'abaturage b'abasivile batitwaje intwaro bishwe n'abasirikare ba Eritrea — benshi muri bo bari abahungu n'abagabo barasiwe ku mihanda cyangwa mu bikorwa byo gusaka urugo ku rundi.

    Raporo ya Amnesty International igaragaza amashusho aboneka neza yafashwe n'icyogajuru ku itariki ya 13 y'ukwezi kwa 12, yerekana ubutaka buherutse gukorwamo bihuye neza n'imva zo mu gihe cya vuba aho zo ku nsengero ebyiri i Aksum, umujyi wa kera abakristu bo mu idini rya 'orthodoxe' bo muri Ethiopia bafata nk'utavogerwa.

    Uwabibonye yabwiye BBC dukesha iyi nkuru ukuntu imirambo yamaze iminsi mu mihanda itarashyingurwa, myinshi ikaribwa n'impyisi. Kuba itumanaho ryarahagaritswe muri Tigray kandi ahemewe kugerwa hakaba ari hacye, byatumye kumenya ibyahabereye mu mirwano bigenda buhoro.

    Ariko, Yemane G. Meskel, Minisitiri w'itangazamakuru wa Eritrea, yamaganye ibirego bikubiye muri raporo ya Amnesty International avuga ko 'bitumvikana' kandi ari 'ibihimbano'.

    Mu butumwa bwo kuri Twitter, yaciye amarenga ko ababibonye bavuzwe muri iyo raporo ari intagondwa zikorana n'ishyaka rya TPLF ryahoze riri ku butegetsi muri Tigray.

    Ariko akanama k'uburenganzira bwa muntu ka Ethiopia kavuze ko raporo ya Amnesty International ikwiye 'kwitabwaho bikomeye' kandi ko karimo gukora iperereza ku birego bikubiye muri iyo raporo.

    Ni iki kindi Blinken yavuze?

    Yashimye ko Leta ya Ethiopia yasezeranyije ko imiryango itanga imfashanyo izagera nta nkomyi muri Tigray, ndetse ashima no kuba leta yarasabye ubufasha mpuzamahanga mu maperereza ku ihonyorwa ry'uburenganzira bwa muntu.

    Yanasabye ko habaho 'ukuhava aka kanya' kw'ingabo za Eritrea n'indi mitwe y'abarwanyi yo mu karere, asaba umuryango wa AU n'ibihugu by'ibituranyi gufasha mu gucyemura ayo makuba. Ariko Ethiopia na Eritrea byombi byahakanye bivuga ko nta ngabo za Eritrea ziri muri Tigray.

    Nubwo Minisitiri w'intebe Abiy yatangaje intsinzi ubwo ingabo zishyigikiye leta zafataga umurwa mukuru Mekelle wa Tigray mu mpera y'ukwezi kwa 11, imirwano yarakomeje muri ako karere.

    Umutekano n'imibereho byarazahaye, hakaba hari amakuru avuga ko ibikorwa byo gufata ku ngufu abagore n'abakobwa byiyongereye.

    Mu cyumweru gishize, ishami ry'umuryango w'abibumbye ryita ku biribwa (PAM/WFP) ryatanze impuruza ko ricyeneye arenga miliyoni 100 z'amadolari y'Amerika kugira ngo rishobore kugabanya ibura rikomeye ry'iby'ibanze mu buzima muri Tigray.

    PAM yavuze ko abantu miliyoni 3 — hafi kimwe cya kabiri cy'abaturage ba Tigray — bacyeneye imfashanyo y'ibiribwa.

    Munyaneza Theogene / intyoza.com

    Source : https://www.intyoza.com/ethiopia-ubwicanyi-ndengakamere-bubera-tigray-buhangayikishije-amerika/

  • Kamonyi: Gutubura imbuto y'ibigori byagabanije iyatumizwaga hanze y'Igihugu #rwanda #RwOT

    Umuyobozi wa Sitasiyo ya RAB mu karere ka Muhanga, Ruhango na Kamonyi, avuga ko ku kigero cya 90%, u Rwanda rumaze kwihaza ku mbuto y'ibigori yatumizwaga hanze y'Igihugu. Abashakashatsi ba RAB, bamaze kubona imbuto 7 zituburirwa ku butaka bw'u Rwanda kandi buri imwe ishobora kwera hejuru ya Toni 7 kuri Hegitari. Ni imbuto zishobokanye n'ubutaka bw'ibice bitandukanye by'Igihugu.

    Kayumba John, umukozi wa Sitasiyo ya RAB ishinzwe akarere ka Muhanga, Ruhango na Kamonyi yabwiye intyoza.com ko u Rwanda rugeze ku kigero cya 90 % mu kwihaza ku mbuto y'ibigori, ko ndetse abahinzi batagihangayika mu gihe cy'ihinga nka mbere ubwo wasangaga kenshi imbuto itinda kubageraho kuko yatumizwaga hanze y'Igihugu.

    Avuga ko abashakashatsi ba RAB babonye imbuto z'ibigori zizewe ziri mu moko 7 zibereye ikirere cy'u Rwanda, imisozi miremire, imigufi n'iringaniye kandi zose zera neza mu gihe zahinzwe neza, zahingiwe igihe kandi ku ntera nziza, zahawe ifumbire y'imborera, zahawe imvaruganda kandi zarwanijweho indwara n'ibyonnyi.

    Mu karere ka Kamonyi, ubutubuzi bw'ibigori bukorerwa mu gishanga cya Rwabashyashya ku buso bugera kuri Hegitari 85 ndetse n'indi site ya Hegitari 140 iriho ibigori bishobora kujyanwa guhingwa mu majyaruguru y'u Rwanda.

    Kayumba, avuga ko gutubura izi mbuto z'ibigori bisaba ubwitonzi n'ubuhanga kuko ngo agakosa gato gashobora kwangiza byinshi. Avuga ko muri iki gihembwe cy'ihinga mu karere ka Kamonyi hatuburiwemo imbuto ebyiri arizo; RHM 1409 ihingwa mu misozi migufi n'iciriritse ndetse na RHM 1520 ihingwa mu misozi miremire.

    Kayumba John/RAB Stastion ya Muhanga, Ruhango na Kamonyi.

    Ku bijyanye n'imihingire y'ibigori, avuga ko nta mpinduka zidasanzwe zabaye uretse gusa mu bijyanye no kuba imbuto itagitumizwa hanze y'Igihugu, ibintu avuga ko byatumye abahinzi batakigira impungenge ku buziranenge bw'imbuto bahabwa kuko iba yatuburiwe ku butaka bw'u Rwanda, ikabikwa neza kandi ikabagereraho igihe.

    Dukuze Eugenie, Agoronome ufasha abahinzi mu kubakurikirana mu mihingire yabo ya buri munsi, avuga ko gutuburira imbuto mu Rwanda byazanye impinduka mu buhinzi kuko ngo mbere hari ubwo bateguraga imirima kare biteguye guhinga ariko ugasanga imbuto zitinze kubageraho kubera zavaga hanze, ibintu ngo byanatumaga umusaruro uba muke cyangwa se rimwe na rimwe ukabura kubera gutinda guhinga.

    Dukuze Eugenie, Agoronome ufasha abahinzi.

    Mukiza Justin, umuyobozi w'ishami ry'ubuhinzi n'ubworozi mu karere ka Kamonyi avuga ko ubutubuzi bw'imbuto y'ibigori bukorerwa mu gishanga cya Rwabashyashya ndetse n'icya Bishenyi bwatanze Toni zisaga 500 umwaka ushize wa 2021, akavuga ko kubera uyu mwaka ahatuburirwa hiyongereye bateganya ko n'umusaruro uzaba mwishi ku kigero kirenga toni 700.

    Imbuto ituburirwa ku buso bw'akarere ka Kamonyi, avuga ko intego ari uko ubuso bwiyongera bityo bagahaza abahinzi b'Intara yose y'Amajyepfo ndetse n'Igihugu muri rusange ku buryo buri muhinzi atagira ikibazo cyo kubona imbuto y'ibigori.

    Mu karere ka Kamonyi kugeza ubu hari ibishanga birenga 10 bihingwamo ibigori ku buso bunini. Zimwe mu mbogamizi abahinzi bahura nazo ngo ni ikirere, aho iyo kitameze neza bisaba abahinzi imbaraga nyinshi ndetse no kurwana n'ibyonnyi kuko nk'uko ari imbuto ngo bisaba kuyitaho cyane kugira ngo itange umusaruro ukwiye.

    Munyaneza Theogene / intyoza.com

    Source : https://www.intyoza.com/kamonyi-gutubura-imbuto-yibigori-byagabanije-iyatumizwaga-hanze-yigihugu/

  • Musanze: Isindwe ryatumye yica abantu babiri barimo n’uruhinja –

    Ibi byabaye ahagana saa tatu z’ijoro ryo ku Cyumweru tariki 28 Gashyantare 2021.

    Amakuru aturuka mu Karereka Musanze avuga ko uyu mugabo yari arimo gusangira inzoga na mugenzi we mu rugo rwahinduwe akabari nyuma baza gutaha ariko bagirana amakimbirane mu nzira ahita amutera icyuma arapfa.

    Uyu Mugabo nyuma yo kubona ko mugenzi yari amaze gutera icyuma ashizemo umwuka yahise ashaka kugikubita umugore bari kumwe wari uhetse umwana aramuhunga k’ubw’amahirwe make gifata umwana yari ahitse nawe ahita apfa.

    Meya w’Akarere ka Musanze, Nuwumuremyi Jeannine, yemereye IGIHE iby’aya makuru, avuga ko uyu mugabo yari yasinze ndetse ko agishakishwa.

    Ati “Abaturage babiri bashyamiranye umwe atera icyuma mugenzi we ahasiga ubuzima ariko nk’uko byavuzwe bari basinze bombi kuko byavugwaga ko bari bavuye mu kabari. Bari basangiye baza gutaha bafitanye amakimbirane menshi umwe nibwo yateye undi icyuma ahita yitaba Imana.”

    Yakomeje avuga ko uyu mugabo nyuma y’uko abonye ko yishe mugenzi we yashatse gutera icyuma n’umugore bari kumwe aramuhusha agitera umwana yari ahetse.

    Ati “Yabonye uwo mugore abona ko yamubonye sinzi niba twabyita nk’ubwoba, ahita ashaka kumutera na we icyuma undi asa nk’aho agihunze gifata umwana yari ahetse nawe aza gupfa.”

    Imirambo y’abishwe yajyanywe mu bitaro mu gihe ukekwaho ubwo bugizi bwa nabi agishakishwa.

  • Nyamasheke: Abakora muri VUP biguriye amatungo ya miliyoni 30 Frw –

    Ni abaturage 1061 bo mu Murenge wa Bushekeri, basanzwe bakora imirimo y’amaboko irimo gukora imihanda. Buri wese mu gihe cy’umwaka yizigamye ibihumbi 30 mu mafaranga ahembwa maze agura itungo yumva yakorora ku bushobozi bwe.

    Amatungo baguze yiganjemo cyane ingurube n’andi arimo ihene, intama n’inkoko. Ayo matungo bemeza ko azabafasha kuva mu cyiciro bajya mu cyisumbuyeho kandi akazababera imbarutso y’iterambere.

    Twagiramungu Naasson ati “Tugiye kuyorora adufashe gutera imbere ku buryo umusaruro wavuyemo uzajya uduha ifumbire, tugurishe ibibwana. Njyewe bizamfasha kuva mu cyiciro njye mu kindi.”

    Uzayisenga Jeannette yunzemo ati “Iyi gahunda izagira ahantu ituvana, nzajya nishyurira abanyeshuri ndetse mbone ifumbire. Ngiye kurifata neza ku buryo nzava mu cyiciro cya mbere.”

    Indemarugamba Felix yagize ati “Dukorera amafaranga atari menshi ariko akatugirira akamaro, ntabwo umuntu ukora muri VUP yari akwiye gutahira aho ngo ahere mu cya mbere, akwiriye kwiteza imbere akajya mu kindi cyiciro. Ngomba kurifata neza kuburyo nzabona ifumbire ndetse rikazangeza no ku nka.”

    Yvan Munezero, Umunyamabanga Nshingwabikorwa w’umurenge wa Bushekeri yavuze ko mu rwego rwo gucunga aya matungo kugira ngo azagere ku ntego, bagiranye amasezerano n’abayaguze kandi ashyirwa no mu bwishingizi kugira ngo irigize ikibazo rivuzwe.

    Ati “Bizamufasha kubona ubushobozi bimufashe kwikemura ibibazo adakomeje gutegereza Leta. Ubwishingizi bugiye kubafasha kugira ngo riramutse rigize ikibazo bahite bamwishyura irindi. Hariho komite ku rwego rw’umudugudu, akagari n’umurenge kandi buri tungo rifite nimero. Twanagiranye n’amasezerano kugira ngo hatazagira urigurisha.”

    Ni gahunda yatangiriye mu Murenge wa Macuba mu mpera z’umwaka wa 2020 aho abaturage bayise ‘Siganinogereze’.

    Minisitiri w’Ubutegetsi bw’Igihugu Prof. Shyaka Anastase mu mpera za 20202 ubwo aheruka gusuraga Akarere ka Nyamasheke, yashimye iyi gahunda maze asaba ko yagera no mu yindi Mirenge ndetse n’utundi turere two mu gihugu.

    Amatungo yashyizweho amaherena afite nimero kugira ngo akurikiranwe

  • Zimbabwe : Visi Perezida yeguye kubera ubusambanyi #rwanda #RwOT

    Uyu muyobozi mukuru muri Zimbabwe, yeguye asaba imbabazi abaturage kubera kiriya cyasha cyamugaragayeho kandi yari akwiye kubera urugero abandi.

    Kuva mu kwezi gushize, ibitangazamakuru binyuranye muri Zimbabwe byakunze kuvuga ku ngeso ya Kembo Mohadi y’ubusambanyi ndetse bimwe bishyira hanze amajwi yumvikanamo uyu mugabo asaba abagore benshi ko baryamana.

    We yakunze guhakana ibi birego akavuga ko ari ibihimbano kandi ko bishingiye kuri politiki, akavuga ko bigamije guhindanya isura ye mu gihugu.

    Uyu mugabo wanabaye umusirikare ukomeye, yarwaye intambara yo kubohora kiriya gihugu cya Zimbabwe.

    Kembo Mohadi yakoze imirimo itandukanye nko muri Minisiteri y’ingabo ku butegetsi bwa nyakwigendera Robert Mugabe.

    Uyu wari umwe muri babiri bungirije Perezida wa kiriya gihugu, muri 2017 ubwo Mugabe yahirikwaga ku butegetsi, Kembo Mohadi ni bwo yari yahawe kuba Visi Perezida.

    UKWEZI.RW

    Source : http://www.ukwezi.rw/Mu-mahanga/Politiki/article/Zimbabwe-Visi-Perezida-yeguye-kubera-ubusambanyi

  • Nicolas Sarkozy wahoze ari Perezida w'u Bufaransa yaciriwe gufungwa azira ruswa #rwanda #RwOT

    Uwahoze ayoboye igihugu cy'U Bufaransa Nicolas Sarkozy imbere y'ubutabera yaciriwe gufungwa imyaka itatu, ibiri muri iyo atari mu gihano ku cyaha cya ruswa. Niwe mu bahoze ari abakuru b'igihugu wa mbere uhawe igihano cyo gufungwa.

    Sarkozy, w'imyaka 66, yashinjwe icyaha cyo kugerageza guha Ruswa umucamanza mu kumwemerera akazi keza i Monaco nawe akamuha amakuru yerekeye amaperereza y'icyaha ku ishyaka rye rya Poritike.

    Uwo mucamanza, Gilbert Azibert, n'uwahoze ari umunyamategeko wa Sarkozy,Thierry Herzog, bahawe igihano nk'icyo.

    Sarkozy ashobora gukora icyo gihano ari iwe.

    Muri iyo ngingo y'urukiko, umucamanza w'i Paris yavuze ko Sarkozy ashobora kumara umwaka w'igihano i muhira, afite icyuma gifite ububasha bwo kwerekana aho ari, aho kujya gufungwa.

    Umwunganizi we mu mategeko yavuze ko azajurira. Sarkozy azakomeza kubaho yidegembya muri icyo gihe gishobora kumara imyaka.

    Muri urwo rwaciwe, umucamanza Christine Mée yagize ati uwo munyaporitike'yari azi ko ibyo arimo akora ari icyaha', yongeraho ati 'ibyo yakoze hamwe n'umunyamategeko we byahaye igihugu 'isura mbi cyane y'ubutabera'.

    Ibyo byaha byiswe gukoresha igihagararo no kumena amabanga y'akazi. Ni urubanza rukomeye cyane mu Bufaransa kuva harangiye intambara ya kabiri y'isi.

    Urundi rwonyine rusa narwo rwari rwarabaye n'urwo uwo Sarokozy yasimbuye, Jacques Chirac waciriwe gufungwa bitamushyira mu gihano cy'imyaka ibiri mu 2011 kubera imirimo itabaho igihe yari umukuru w'umujyi wa Paris. Chirac yapfuye mu 2019.

    Mu gihe Sarkozy yajurira agatsindwa, ashobora kumara umwaka i muhira afite icyuma cyerekana aho ari, aho kujya gufungwa. Byinshi mu birego bishingiye ku myitwarire y'uburyo yahawe amafaranga mu buryo bunyuranije n'amategeko yakoresheje mu kwiyamamariza kuba Perezida mu mwaka wa 2007.

    Sarkozy nkuko BBC ibitangaza, arindiriwe kandi n'urundi rubanza rutagize aho ruhuriye n'urwo, kuva tariki 17 z'ukwezi kwa gatatu gushyika 15 z'ukwa kane, rujyanye n'ikiswe ibya Bygmalion.

    Sarkozy ashinjwa ko yakoresheje amafaranga y'umurengera mu manyanga mu gihe cyo kwiyamamaza mu 2012. Yabaye umukuru w'igihugu kuva mu 2007, ariko mu 2012 ntiyasubira gutorwa. N'ubwo ahanganye n'ibyo bibazo by'ubutabera, Sarkozy n'ubu ni umwe mu banyapolitiki bakunzwe cyane b'aba conservateurs, mu gihe hasigaye umwaka ngo habe amatora y'umukuru w'igihugu.

    Munyaneza Theogene / intyoza.com

    Source : https://www.intyoza.com/nicolas-sarkozy-wahoze-ari-perezida-wu-bufaransa-yaciriwe-gufungwa-azira-ruswa/