Blog

Iyi mirwano y’uyu mwana na se yabaye ku itariki 26 Gashyantare 2021. Uwo musore yashyamiranye na se biturutse ku makimbirane ashingiye ku mitungo bari bafitanye aho yamushinjaga ko nta murage yamuhaye mu gihe yari yarawuhaye bakuru be.

Izo ntonganya ni zo zabyaye imirwano yatumye bombi bakomeretsanya, binabaviramo kujyanwa kwa muganga ariko umubyeyi aza kwitaba Imana kubera ibikomere.

Nyuma yo kumenya ko se yashizemo umwuka, uwo musore yasimbutse urukuta rw’Ikigo Nderabuzima cya Musango yari arwariyemo na we yiyahurira hafi yacyo.

Umunyamabanga Nshingwabikorwa w’Umurenge wa Mutuntu, Nsengiyumva Songa, yabwiye IGIHE ko uwo mubyeyi yapfiriye mu Bitaro bya Kaminuza bya Kigali, CHUK, aho yari yohereje kuvurirwa.

Yagize ati “Ni byo yishe se, amaze kumenya ko yapfuye yahise asimbuka ibitaro aho yari yarwariye kuko bari bakomerekezanyije na we mu minota 20 yahise yiyahura akoresheje ishuka yo mu Kigo Nderabuzima yari yajyanye.”

Yongeyeho ko umuzamu w’Ikigo Nderabuzima cya Musango ni we watanze amakuru ko uwo musore yasimbutse urukuta rwacyo.

Ati “Umuzamu ni we wambwiye ko yasimbutse bishobora kuba yari amaze kumenya ko se yapfuye noneho ahita ajya kwiyahura kuko nyuma y’iminota 20 abantu bahise bavuga ko hari umuturage wiyahuye dusanga ni we.’’

Nsengiyumva yasabye abaturage kujya barangiriza ibibazo byabo mu masibo, byabananira bakabigeza ku kagari cyangwa ku murenge aho kugira ngo bitutumbe bibe byanavamo urupfu.

Umurambo w’uwo musore, abakozi b’Urwego rw’Igihugu rw’Ubugenzacyaha, RIB, bahise bawujyana mu Bitaro bya Kibuye kugira ngo hasuzumwe icyamwishe.

Mu itangazo RCS yashyize kuri Twitter kuri uyu wa Kabiri tariki 2 Werurwe 2021, yanditse iti “Kuri gereza ya Rusizi, umugororwa witwa Masengesho Daniel yagerageje gutoroka mu ijoro, abonywe n’abacungagereza arenga ku byo bamubwiye araraswa bimuviramo urupfu.”

At Rusizi Prison, a detainee named Masengesho Daniel attempted to escape at night, unfortunately the deceased resisted to the Prison guards on duty and this prompted his shooting resulting into his death.

— RCS Rwanda (@RCS_Rwanda) March 2, 2021

Amakuru yizewe IGIHE yamenye ni uko ku isaha ya saa 19:47 z’umugoroba wo ku wa 24 Gashyantare 2021 ari bwo Masengesho yabonywe n’abacungagereza arimo kurira urupangu ashaka gutoroka, babanza kurasa hejuru ariko yanga gusubira inyuma, birangira bamurashe.

Masengesho yari yarakatiwe igifungo cy’imyaka ine, yarashwe agerageza gutoroka Gereza ya Rusizi iherereye ku musozi urebana na Repubulika Iharanira Demokarasi ya Congo mu Mujyi wa Bukavu.

Ikibazo cy’ikoreshwa ry’ingufu z’umurengera mu nzego z’umutekano cyagarutsweho kenshi n’inzego zitandukanye mu mwaka ushize, ubwo hagiye humvikana impfu z’abaturage barwanyaga inzego z’umutekano, bikarangira barashwe bagapfa.

Ubwo yari mu kiganiro na RBA muri Nzeri 2020, Perezida wa Repubulika, Paul Kagame, yabajijwe n’umwe mu bari bagikurikiye ku kibazo cy’ingufu z’umurengera abapolisi bari bamaze iminsi bakoresha bigahitana ubuzima bw’abaturage, yizeza ko bizakemuka kandi “ababikoze bakabiryozwa”.

Yagize ati “Ndi kubikurikirana, navuganye n’ubuyobozi bwa Polisi y’Igihugu, ndatekereza ko tugiye kubona impinduka, ntabwo izo ngufu z’umurengera zikenewe. Kabone n’iyo uwo muntu yaba ari umunyabyaha ruharwa, polisi yahawe imyitozo y’uko yitwara idakoresheje imbaraga z’umurengera.”

Icyo gihe umuvugizi wa Polisi, CP John Bosco Kabera, yatangaje ko hari abapolisi bari gukurikiranwa kubera kugendera muri uwo mujyo.

Ijambo ry’Umukuru w’Igihugu ryahinduye byinshi mu buryo bugaragara kuko nyuma y’aho nta zindi mpfu za hato na hato ziturutse ku ngufu z’umurengera za polisi zongeye kugaragara.

Ku rundi ruhande ariko si abapolisi babwirwaga gusa, kuko n’izindi nzego z’umutekano zifite aho zihurira n’abaturage zirimo na RCS birazireba.

Ifoto yakoreshejwe hejuru igaragaza amarembo ya Gereza ya Rusizi

Mu butumwa MINAGRI yatanze ku wa 1 Werurwe 2021 bujyanye n’ igihembwe cy’ihinga cy’Itumba cya 2021B gitangiye, yavuze ko icy’Umuhindo cya 2021A cyabonetsemo umusaruro mwiza.

Ubwo butumwa bukomeza buti “Turashimira imbaraga abahinzi n’aborozi babishyizemo zatumye igihugu kigira umusaruro mwiza w’igihembwe cy’Umuhindo dusoje. Abahinzi bumvise neza ubutumwa bwa MINAGRI bwo kongera umusaruro kugira ngo igihugu kibashe guhangana n’ingaruka z’icyorezo [cya Coronavirus].”

MINAGRI yasobanuye ko ubuso bwari buteganyijwe guhingwa bwahinzwe 100% kandi ikoreshwa ry’inyongeramusaruro rikiyongera ku buryo bushimishije, aho ikoreshwa ry’ifumbire ryazamutseho 46.3% ugereranyije n’Umuhindo w’umwaka ushize.

Yibukije ko igihembwe gishya gisanze u Rwanda n’Isi muri rusange bigihanganye na Coronavirus n’ingaruka zayo, iboneraho gusaba “ubufatanye” abahinzi n’aborozi, inzego z’ibanze, n’abandi bafatanyabikorwa bose mu iterambere ry’ubuhinzi n’ubworozi.

MINAGRI yasabye inzego zavuzwe haruguru gukomeza imirimo y’ubuhinzi n’ubworozi hubahirizwa amabwiriza y’inzego z’ubuzima yo kwirinda COVID-19.

Yabasabye kongera ubuso buhingwa mu buryo buhuje, hahingwa ibihingwa byatoranyijwe bihakwiriye kandi hagendewe ku bujyanama butangwa n’inzego zishinzwe ubuhinzi zibegereye.

Hari kandi guhinga ubuso bwose buhingwa ntihagire ubutaka busigara budahinzwe haba i musozi, mu bishanga no mu nkuka zabyo, mu duhaga, no mu mibande.

Izo nzego zanasabwe kurwanya isuri hatunganywa imirwanyasuri, haterwa ubwatsi ku miringoti, hacibwa ibyobo bifata amazi aho bikenewe hose, kandi hasiburwa imigende y’amazi mu bishanga mu rwego rwo kugabanya ubukana bw’imyuzure yitezwe muri iri tumba.

Ubufatanye bunakenewe mu gutegura imirima hakiri kare no gutera imbuto ku gihe hakurikijwe uko imvura izaboneka hirya no hino mu gihugu nk’uko bigaragazwa n’amakuru y’iteganyagihe, kugira ngo ibihingwa bizabashe kubona amazi ahagije.

Aho isarura ry’ibigori ryatinze, abahinzi barakangurirwa guhungura amababi bagategura ubutaka, bagatera imbuto basimburanya ibihingwa nk’uko byateganyijwe, bityo bakazasarura ibigori indi myaka yaratewe.

Basabwe gukomeza kwitabira gahunda yo gukoresha imashini zihinga hagamijwe kwihutisha imirimo y’ihinga kugira ngo abahinzi be gucikanwa n’igihembwe cy’ihinga.

Ni ngombwa kwitabira kurushaho ikoreshwa ry’inyongeramusaruro (ifumbire mvaruganda, ifumbire y’imborera, ishwagara, n’imbuto z’indobanure). Ku bw’ibyo, abahinzi bose barasabwa gukomeza kwiyandikisha muri “Smart Nkunganire System” nk’uburyo bwemewe muri gahunda yo kubona inyongeramusaruro zunganiwe na Leta.

MINAGRI yasabye kwitabira kurushaho gahunda yo kuhira imyaka binyuze muri gahunda ya Nkunganire aho bishoboka hose no gufata neza amazi y’imvura uko bishoboka kose akazakoreshwa mu kuhira imyaka igihe imvura yaba icitse kare.

Ubufatanye bukenewe mu kurwanya indwara n’ibyonnyi bikunze guteza abahinzi igihombo, bitabira gutera imbuto nziza, basimburanya ibihingwa mu mirima aho gusubizamo ibihasaruwe mu gihembwe gishize, bubahiriza ibipimo batereraho imbuto kandi banakoresha imiti yabugenewe.

Barasabwa gukora ubukangurambaga mu gukingira amatungo indwara zikunze kuyibasira cyane cyane mu gihe cy’imvura nyinshi, ahegereye imigezi n’ibishanga.

Hakenewe kandi kurushaho kwitabira gahunda y’ubwishingizi bw’ibihingwa n’amatungo kuri Nkunganire ya Leta nk’uburyo bufasha abahinzi n’aborozi guhangana n’ingaruka z’imihindagurikire y’ikirere.

Abahinzi basabwe gutera ubwatsi bwo kugaburira amatungo no gutegura kare uburyo bwo kubuhunika.

MINAGRI yasabye gukomeza kwitabira ibikorwa byo gufata neza umusaruro w’ibigori, abahinzi basarurira mu bwanikiro bwubatswe, bubaka ubw’igihe gito basaruriramo, kugira ngo umusaruro w’igihembwe cya 2021A uzabone isoko ryizewe kandi banitegure ku gihe ibikorwa by’isarura ry’igihembwe cy’ihinga cya 2021B.

Izo nzego na none zasabwe kuzategura kare ubuhumbikiro bw’imirama y’imboga kugira ngo imbuto zazo zizaterwa mu gihembwe gikurikira zizabonekere ku gihe.

Ubutumwa bwa MINAGRI bwatanzwe mu gihe urwego rw’ubuhinzi ruri mu zihanzwe amaso cyane muri ibi bihe ubukungu bw’Isi bwazahajwe n’icyorezo cya Coronavirus.

Minisitiri w’Ubuhinzi n’Ubworozi, Dr Mukeshimana Geraldine, asaba abahinzi n’aborozi ubufatanye mu gihembwe gitangiye cya 2021B

Uwo muryango umaze imyaka isaga 30 usubukuye ibikorwa nyuma yo kubihagarika mu 1970 kubera imitegekere ya Perezida Idi Amin wari ayoboye Uganda yari iwuhuriyemo na Kenya na Tanzaniya, hari ibyo wagezeho birimo guhuza za gasutamo nyuma yo kwiyungwaho n’u Rwanda, u Burundi na Sudani y’Epfo.

Umudepite mu Nteko Ishinga Amategeko ya EAC y’uwo muryango (EALA), Gasinzigwa Oda, ubwo yari mu kiganiro “Imboni” cya Televiziyo y’u Rwanda yavuze ko hari intambwe nziza yatewe mu byiciro bimwe, ariko ko hari n’ibindi bigikenewemo ingufu.

Depite Gasinzigwa yavuze ko Itegeko nshinga rya EAC rikubiyemo ibigamije gushyigikira ubukungu birimo guhuza za gasutamo, gushyiraho isoko rusange, no gushyiraho ifaranga rimwe rikoreshwa mu bihugu binyamuryango.

Yakomeje ati “Aho tugeze usanga guhuza za gasutamo bigenda bigerwaho aho hahujwe amategeko agenga imisoro, ibiro [by’imisoro] 15 biri ku mipaka [y’ibihugu] birakora neza.”

Yasobanuye ko ari ibintu byoroheje gusangizanya amakuru no kumenyekanisha ibicuruzwa mu gihe bivanwa mu gihugu kimwe bijyanwa mu kindi.

Uretse guhuza za gasutamo byagezweho, uwo mudepite yavuze ko ibindi bizashyigikira ubukungu bw’uwo muryango bikiri mu nzira, aho bimwe biri mu ntangiriro.

Ati “Icyiciro turimo ni icy’isoko rusange kandi nacyo twifuza ko cyagenda neza. Ibijyanye n’amategeko y’ifaranga rimwe nabyo hari amategeko amaze gushyirwaho ariko turacyari muri urwo rugendo.”

Impirimbanyi iharanira Kwihesha Agaciro kwa Afurika (Panafricaniste) akaba n’umucuruzi, Shyaka Michael Nyarwaya, yavuze ko amateka y’imibereho ya EAC yagize uruhare mu kuba iterambere ryayo rigenda buhoro.

Ati “Ubundi iyo baba barawugezemo mu 1967 bose, imyaka 54 bari kuba bageze ku bintu bikomeye. Kubera ko bamaze imyaka 20 badakora (1970-1990), ubona ari ikintu cyo kubaka urugendo.”

Ni mu gihe umunyamategeko akaba n’Umusesenguzi mu bya Politiki, Me Gasominari Jean Baptiste, we asanga kuba intego za EAC zigenda buhoro biterwa n’impamvu zirimo kuba ibihugu byose bidafite imbaduko imwe, aho usanga “bidahuriza ku mugambi”.

Yagize ati “Hari ubwo usanga ibihugu bimwe bifite imyumvire itari yagera ku rwego rumwe n’urw’imyumvire y’ibindi. Hari bimwe usanga byarateye intambwe igaragara mu mitekerereze, ibindi ugasanga bikiri inyuma, bikaba byaremeye kwifatanya n’ibindi ariko mu by’ukuri bitari byiteguye.”

Aho uwo munyamategeko yatanze urugero rw’igitekerezo cyazanywe muri uwo muryango cy’uko hajya habaho urujya n’uruza hifashishijwe indangamuntu zo mu bihugu nta pasiporo, byashyigikiwe n’ibihugu bitatu gusa ari byo u Rwanda, Kenya na Uganda, “ibindi ntibirabyemera.”

Ati “Ariko twizera ko uko bazagenda babona ko birimo inyungu bazabyemera.”

  Hari ibikeneye kunozwa muri EAC

Mu myaka mike ishize hagiye humvikana ibibazo by’umutekano muke ku baturage b’ibihugu bimwe bakorera mu bindi kandi byose ari ibinyamuryango bya EAC. Ibyo byateje umwijyane hagati y’ibyo bihugu byitanaga ba mwana bituma umubano wabyo uzamo agatotsi.

Depite Gasinzigwa yavuze ko inyungu z’umuryango zigomba gupimirwa ku baturage, bityo ko hagomba kubaho ubushake bwa politiki mu gushyira mu bikorwa ibyo ibihugu binyamuryango bisabwa, hitabwa ku nyungu zabo.

Nihitabwa ku nyungu z’umuturage bizatuma abakorera mu bindi bihugu badahutazwa, ibihugu bishyire hamwe maze iterambere ry’umuryango rigerweho.

Yakomeje ati “Ntabwo biba byumvikana mu gihe ubona inyungu z’abaturage, ukaba waragiye mu muryango ari wowe ubyifuje nta gahato ukemera gufatanya n’ibindi bihugu ndetse n’inyungu zikaba zigaragara. […]Ibyo waba ufite byose bigaruka ha handi kuri rya soko rimwe. Niba u Rwanda rufite miliyoni zirenga 12 z’abaturage, nta gihugu gishobora kuvuga ngo nta nyungu gifite mu gucuruzanya n’u Rwanda kuko ni isoko.”

Yavuze ko amahoro n’umutekano ku baturage ari byo bigomba kwimirizwa imbere muri EAC kugira ngo babashe kwisanga mu bihugu binyamuryango byose.

Depite Gasinzigwa kandi asanga hagikenewe intambwe mu ishyirwa mu bikorwa ry’ibyo ibihugu binyamuryango byiyemeje, kwegera abaturage no kongerera ingufu abikorera.

Izo mpuguke zagaragaje ko hakenewe imiyoborere myiza imbere mu bihugu bigize uyu muryango, kugira ngo byubake neza politiki y’ubufatanye mu bayobozi babyo bashobore gusenyera umugozi umwe, kuko imishinga y’uwo muryango idindizwa akenshi n’abayobozi b’ibihugu bamwe batayishyigikira.

Agerageje kubishyira mu rwego rw’amategeko, Me Gasominari yavuze ko ikintu cya mbere kiranga amasezerano ari ubushake bw’abayakorana, bityo ko hakenewe kwigisha abantu “ikibazo cy’imyumvire” kikabanza kuvaho.

Ati “Iyo bigitangira haba hari n’urwikekwe abantu bataramenya niba bazakorana n’abandi [neza] cyangwa niba basangiye icyerekezo.”

Uwo munyamategeko yavuze kandi ko hakenewe ubushake bwo gushyira mu bikorwa ibyo amategeko y’uwo muryango ateganya, kuko iyo butagaragara bigorana ko intego zigerwaho.

Kugeza ubu EAC igizwe n’u Rwanda, u Burundi, Uganda, Kenya, Tanzania na Sudani y’Epfo. RDC na Somalia nabyo byatanze icyifuzo cyo kwinjizwa mu muryango ariko ntibirasubizwa.

Uwo muryango ufite isoko ry’abasaga miliyoni 170, inzobere zisanga hari intambwe umaze kugeraho ugereranyije n’indi miryango ndetse n’igihe umaze ushinzwe. Mu gihe ibyo bihugu bizaba byemerewe kuba ibinyamuryango, isoko rizaguka rigere ku basaga miliyoni 300, abacuruzi begere inyanja zambukirizwaho ibicuruzwa ndetse n’umutungo kamere ubirimo ufashe ibindi biri mu muryango.

Depite Gasinzigwa Oda asanga hagikenewe intambwe mu ishyirwa mu bikorwa ry’ibyo ibihugu binyamuryango bya EAC byiyemeje, kwegera abaturage no kongerera ingufu abikorera