Blog

Aramusubiza ati 'Ukundishe Uwiteka Imana yawe umutima wawe wose, n’ubugingo bwawe bwose, n’imbaraga zawe zose, n’ubwenge bwawe bwose, kandi ukunde na mugenzi wawe nk’uko wikunda.' Luka 10:27

Abantu benshi bavuga ko bakunda Imana, gusa sinzi niba bakundisha Imana umutima wose. Gukundishi Imana umutima wose, ni ukugira umutima wihariwe n’Imana yonyine. Ukwiye gukundisha Imana umutima wawe, ukayiramya yonyine udafite ibindi bintu uramya ku rugande.

Hari ibintu byinshi bishaka kutwigarurira: Iyo urebye ukuntu dukoresha amasaha 24, wahita ubona ko Imana tutayikundisha umutima wose. Rimwe na rimwe turabivuga ku munwa tukanabyigisha, tukanabiririmba, ariko iyo urebye ubuzima tubaho!, Ese mubyukuri ukundisha Imana umutima wose?

Ukwiye no gukundisha Imana ubwenge bwose: Ubwenge hari ubwa karemano, hari ubwo biga mu ishuri(Ubumenyi), ubwenge bwo kubaha Imana, n’ubw’impano. Ubwo bwenge bwose bukwiye kubaha Imana, nabwo ukabukundisha Imana.

Hanyuma imbaraga ziba mu gice kitwa umubiri.Wabishaka utabishaka uzasaza! Ni yo mpamvu ukwiye gukoresha imbaraga zawe zose mu bizatuma wibukwa neza, cyangwa gusiga umurage mwiza. Abantu bakazavuga ko ufite icyo wakoze, icyo wagezeho, ko imbaraga wazikoresheje mu bitari ukwikunda, ahubwo gukunda abandi.

Itegeko rya 2 ni ugukunda mugenzi wawe nk’uko wikunda. Gukunda mugenzi wawe nk’uko wikunda, ni uko ikintu cyose wumva bagukorera ukwiye kwiga kugikorera abandi, ibyo Yesu yavuze ngo 'Ibyo mushaka ko babagirira, abe ari byo mukorere abandi’. Rimwe na rimwe hari igihe twifuza ko: Batubwira neza, twambara neza, tuba heza, twubahwa, dutera imbere, ibyo bintu byose ni byiza. Ariko ukwiye gutekereza niba hari undi muntu wabikorewe, wabigizemo uruhare.

Mubyukuri, ubwenge ufite, imbaraga ufite, icyubahiro ufite, umutungo ufite, bikwiye kuba bifite icyo bimarira abandi bitari ukwizirikana. Mu isi Imana yatanze ubutunzi buhagije, ahubwo gusaranganya ni byo byatunaniye, ni yo mpamvu dukwiye kugerageza gukunda mugenzi wacu nk’uko twikunda. Ibyo wifuza ko abandi bagukorera abe ari byo ubakorera, ugerageze gukunda mugenzi wawe.

Ibi twese tubimenye: Abantu benshi barara bariye, abadafite aho kuba babona aho baba, tumenye ko ibyo dutunze tubitunze kubwacu no kubw’abandi abantu benshi bahumurizwa. Hari abantu benshi bakeneye ihumure ryawe, hari abantu benshi bakeneye kugirirwa neza nawe, cyane ko Yesu yavuze ngo’ Nari nshonje, nari umushyitsi, nari mfunzwe, nari ndwaye, nari nyotewe, muza kundeba. Uworoheje hanyuma y’abandi mwabikoreye, ni njye mwabikoreye’.

Turamutse tugize uwo mutima Ubwami bw’Imana bwaba bwubatswe neza, kandi twaba dusohoje amategeko y’Imana. Twibuke ko hari umunsi twese tuzahagarara imbere y’Imana, itubaze niba ibyo yaduhaye twarabikoresheje ku nyungu za benshi, cyangwa se niba twarabikoresheje mu kwikunda no kwizirikana. Inari njjye(Logique) akenshi ituma twikunda, tugakora ibihabanye n’amategeko y’Imana.

Twige gukunda abandi nk’uko twikunda bizatuma amategeko y’Imana yubahirizwa. Ibyo nta kindi bisaba, ni ukumenya gusa ko ari cyo waremewe.

Iyi nyigisho yateguwe, ikanatambutswa na Pasiteri Habyarimana Desire kuri Agakiza Tv wayireba hano.

Source: Agakiza Tv

[email protected]

Umukuru w'Igihugu yabigarutseho kuri uyu wa 8 Werurwe 2021, ubwo u Rwanda rwifatanyaga n'Isi kwizihiza Umunsi Mpuzamahanga w'Abagore wahawe insanganyamatsiko igira iti 'ChooseToChallenge' mu rurimi rw'Icyongereza bishatse kuvuga ugenekereje mu Kinyarwanda ngo 'HitamoGuhatana'.

Mu Rwanda wizihijwe mu nsanganyamatsiko igira iti “Munyarwandakazi ba ku ruhembe mu Isi yugarijwe na COVID-19”.

Mu butumwa yanyujije ku rukuta rwa Twitter, Perezida Kagame, yavuze ko Umunsi Mpuzamahanga w'Abagore wibutsa ko uburinganire butareba abagore gusa.

Yakomeje agira ati 'Nta terambere ryagerwaho hatabayeho uruhare rwa buri wese n'amahirwe angana. Buri wese muri twe afite umusanzu akwiye gutanga ngo ejo hazaza hazabe hazira ubusumbane n'iheza.'

Happy #IWD2021! Today is a reminder that gender equality is not just a women's issue. There can be no progress without equal participation and opportunity for all. Each one of us has a role to play to ensure gender disparity and exclusion has no place in our future.

— Paul Kagame (@PaulKagame) March 8, 2021

Umunsi Mpuzamahanga w'Abagore mu 2021, wabaye mu gihe Isi ihanganye n'icyorezo cya COVID-19, cyashegeshe bikomeye iterambere ry'abagore ndetse cyongera ibibazo bishingiye ku ihohoterwa ribakorerwa.

Kuva mu mwaka ushize, iki cyorezo cyashegeshe by'umwihariko ab'igitsina gore. Mu 2020, abagore b'Abanyafurika miliyoni eshatu bashakaga imirimo ntibayibonye ndetse abagera kuri miliyoni 1.3 bahagaritse gushaka akazi.

U Rwanda rushimirwa n'amahanga nk'igihugu cyagiye gishyiraho ingamba n'amategeko bigamije guteza imbere umugore no kumwubakira ubushobozi mu ngeri zose, gusa mu bijyanye n'abikorera birasa n'aho bitarumvikana neza nk'uko bimeze mu nzego za Leta.

Uretse kuba umugore yarahawe agaciro yari yarambuwe mu gufata ibyemezo, mu nzego z'ubuvuzi, uburezi, ubwubatsi n'ibindi, abagore bashishikarizwa kwihangira imirimo kugira ngo bigire kandi be gutegera amaboko iteka ku bagabo babo ahubwo bafatanye mu iterambere.

Ibi byose u Rwanda rwabigezeho mu gihe hirya no hino ku Isi bagishakisha icyakorwa ngo uburinganire n'ubwuzuzanye hagati y'umugabo n'umugore bigerweho.

Itegeko Nshinga rya Repubulika y'u Rwanda riteganya ko mu nzego z'ubuyobozi bwa Leta, abagore bagomba kuba nibura 30% cyangwa kuzamura.

Mu Rwanda, abagore bangana na 52% by'abaturage bose. Kuri ubu abagore bari mu Nteko Ishinga Amategeko bageze kuri 61.3%. mu gihe mu bagize Guverinoma, abagore ari 53%.

Umunsi Mpuzamahanga w'Umugore ku Isi wizihizwa buri tariki ya 8 Werurwe buri mwaka, watangiye kwizihizwa mu kinyejana cya 20, ubu ukaba wizihizwa mu bihugu hafi ya byose ku Isi n'u Rwanda rurimo. Kuri uyu munsi akenshi Isi yose izirikana ibyiza byinshi abagore bagezeho, n'akamaro kabo mu buzima bwa muntu.

Perezida Paul Kagame yagaragaje ko guharanira uburinganire bidakwiye guharirwa abagore gusa/ Ifoto: Village Urugwiro

Ibi byabaye kuri iki cyumweru tariki ya 7 Werurwe 2021 mu Kagari ka Juru mu Murenge wa Gahini. Amakuru avuga ko uyu mugore yakomokaga mu Murenge wa Murundi mu Kagari ka Ryamanyoni mu Mudugudu wa Kabingo.

Umunyamabanga Nshingwabikorwa w'Umurenge wa Gahini, Rukeribuga Joseph, yabwiye IGIHE ko uyu mugore yavuye iwabo agiye kwivuza ku muvuzi wa Kinyarwanda ukorera mu Murenge wa Gahini, akaba yaritabye Imana amaze kubonana n'uyu muvuzi.

Yagize ati 'Amakuru twamenye ni uko uyu mugore yari yaje kwivuza ku muvuzi wa Kinyarwanda witwa Ntawizerundi Benjamin. Yapfuye ataragera iwe, uwo muvuzi yaramutumiye basangira inzoga ahantu mu rundi rugo ntituzi niba yaramuhaye imiti, nyuma rero uwo mugore ari gutaha nibwo yitabye Imana.'

Gitifu yakomeje avuga ko uwo muvuzi wa Kinyarwanda adasanzwe azwi ngo kuko nta byangombwa afite, abo mu muryango wa nyakwigendera ngo bavuze ko icyatumye ajya kwivuza kwari ukuribwa umubiri wose yagize agakeka ko bamuroze niko guhitamo gushaka umuvuzi wa Kinyarwanda wamuha umuti.

Uyu muyobozi yasabye abaturage kujya bagana amavuriro azwi kuruta kwizera abavuzi ba Kinyarwanda.

Ati 'Abaturage twabasaba ko uwagira ikimenyetso cy'uko mu mubiri we hatameze neza yakwihutira kugana ibitaro cyangwa ikigo nderabuzima kimwegereye akareka kujya mu bavuzi ba Kinyarwanda kuko bamwe nta n'ibyangombwa banafite.'

Kuri ubu uyu muvuzi wa Kinyarwanda yatawe muri yombi kugira ngo akorweho iperereza mu gihe umurambo wa nyakwigendera wajyanwe ku Bitaro bya Gahini kugira ngo ukorerwe isuzuma harebwe icyamwishe.

Ibi bikorwa byabaye kuri uyu wa Mbere tariki ya 8 Werurwe 2021 ubwo hizihizwaga Umunsi Mpuzamahanga wahariwe abari n'abategarugori. Mu Karere ka Rwamagana uyu munsi wizihirijwe mu midugudu yose ahakozwe umuganda wo gusukura ingo zabo no gufasha abafite intege nke gusukura aho batuye.

Ku rwego rw'Akarere wizihirijwe mu Murenge wa Musha ahatanzwe inzu ebyiri ku miryango itishoboye, hanorozwa inka ku miryango ibiri y'abagore kugira ngo zibafashe mu rugamba rwo kwiteza imbere.

Niyoyita Chantal w'imyaka 34 avuga ko yabaga mu Mujyi wa Kigali, umugabo we aza gupfa ubuzima butangira gusharira, ngo yahise atangira kuba umuzunguzayi agafatwa inshuro nyinshi akajyanwa kwa Kabuga kugeza ubwo abana be batangiye kwandagara.

Ati 'Nyuma rero naje guhabwa inzu inaha nza kuhaba, ubu ndashima Imana ko mbayeho neza. Mbere nahoraga mu kabari none ubu mbayeho neza, ndi umu mama udashobora kubaza ibihumbi 20 Frw ngo mbibure, sinkishyura inzu Imana yangiriye Ubuntu. Umwana ararwara ku ishuri nkabasha kumwohereza amafaranga, arakenera amafaranga y'ibikoresho nkabasha kuyamuha.'

Yashimiye Umukuru w'Igihugu ku miyoborere myiza yahaye u Rwanda ari nayo yatumye ava mu buzima bubi yari amazemo imyaka myinshi kuri ubu akaba yabonye inzu yo kubamo n'abana be.

Mukanjishi Martha utuye mu Murenge wa Musha na we yavuze ko ari ibyishimo bikomeye cyane kubona yorozwa inka yari yaragambiriye kuzagura ariko ubushobozi bukamubana buke. Yagaragaje ko agiye kuyitaho cyane ku buryo mu minsi iri imbere na we azoroza abandi.

Ati 'Ngiye kuyorora neza, nyifate neza, izafashe umuryango wanjye, ifashe abana banjye kunywa amata kandi ninamara kororoka nzafasha bagenzi banjye kugira ngo twese tugire inka nkuko Umukuru w'Igihugu ahora abyifuza.'

Umuhuzabikorwa w'Inama y'Igihugu y'Abagore mu Karere ka Rwamagana, Musanabera Christine, avuga ko gutekereza koroza abagore bari mu cyiciro cya mbere cy'ubudehe no kubakira abatari bafite aho kuba byose bigamije iterambere ry'umuryango.

Yagize ati 'Ibi bikorwa twakoze ni ukugira ngo abari mu muryango babashe kurwanya indwara z'umwanda kandi bature heza, gutanga inka byo bigamije gukura abagore mu bukene kugira ngo batunge ifaranga, banywe amata, bisige amavuta base neza kandi tunarwanye imirire mibi.'

Yavuze ko icyo basaba ba mutima w'urugo ari ugusigasira ibyagezweho bakita ku miryango yabo bakaba bandebereho ku bana babo no muri rubanda muri rusange.

Umuyobozi w'Akarere ka Rwamagana wungirije ushinzwe Imibereho Myiza y'Abaturage, Mutoni Jeanne, yashimiye abafatanyabikorwa batandukanye bafashije ba mutima w'urugo kubakira iyi miryango, avuga ko abagore basabwa kuba ku isonga mu guteza imbere umuryango Nyarwanda.

Ati 'Nkuko tubizi umugore ni mutima w'urugo ni yo mpamvu twumva twamwifuriza kurinda urugo, kurinda umuryango no kurinda igihugu iki cyorezo cya COVID-19 kandi akanakomeza kuza imbere mu rugamba rw'iterambere ature ahantu heza kandi anabasha kunywa amata kugira ngo arwanye imirire mibi mu bana ndetse anabone ifumbire.'

Yasabye abahawe inka kuzifata neza bakazabasha koroza n'abandi baturage. Abahawe inzu bo basabwe kuzifata neza bakabungabunga imiryango yabo ibibazo baterwaga no kutagira aho kuba ntibizongere kugaragara.

Umunsi Mpuzamahanga wahariwe Abagore wizihijwe mu nsanganyamatsiko igira iti 'Munyarwandakazi ba ku ruhembe mu Isi yugarijwe na COVID-19.'

Aborojwe inka basabwe kuyifata neza

Abagore bo mu Karere ka Rwamagana bashyikirije inzu imiryango ibiri y'abagore batishoboye babarizwa mu cyiciro cya mbere

Mu rwego rwo kuzirikana umugore, Equity Bank Plc, yizihije uyu munsi igenera abakiliya bayo b'abagore impano zitandukanye z'agaciro ziherekejwe n'ururabo.

Ni ibikorwa byabereye mu gihugu hose aho Equity Bank Plc ifite amashami ndetse hari n'aho abayobozi bagiye gushimira abagore babasanze aho bakorera, ku masoko, aho batuye, muri restaurant, mu isoko, mu biro n'ahandi.

Usibye abakiliya bahawe impano, abayobozi b'abagabo muri Equity Bank bahaye abakozi b'abagore indabo n'izindi mpano zitandukanye mu kwifatanya kwizihiza uyu munsi.

Abakiliya ba Equity Bank bavuze ko bishimiye kuba banki yabo yabazirikanye kuri uyu munsi, bemeza ko ibi byishimo ari inyongera kuri serivisi nziza bahabwa.

Mahungu Betty usanzwe ufite Sosiyete ya GO TELL ifasha abantu gukora ingendo z'indege zifasha abantu gusura Israel, yavuze yishimiye kuba Equity Bank yazirikanye abagore ku munsi wabo.

Yavuze ko yahisemo kugana Equity bank kuko yita cyane ku bayigana ndetse igashyigikira ubucuruzi butaratera imbere.

Ati 'Nahisemo kugana Equity Bank kuko bita cyane ku bakiliya, bakabatega amatwi kandi bita cyane ku bucuruzi butaratera imbere. Navuga ko ariyo yonyine mu Karere k'Uburasirazuba, rero iyo uri muri ako karere, nta mpungenge uba ufite banki yizewe.'

Mahungu yavuze ko ari umwe mu bakiliya bamaze igihe bakorana na Equity Bank kuko yatangiye gukorana nayo mu 2013 ubwo yari muri Kenya kandi ko muri icyo gihe cyose yabonye impinduka nk'umugore witeje imbere .

Ati 'Ku giti cyanjye Equity Bank yanteje imbere. Natangiye ubucuruzi nkiri muto naka inguzanyo ya Miliyoni 1Ksh, nkanjye yari amafaranga menshi. Mu by'ukuri iyi banki iteza imbere cyane umugore kandi abagore benshi bakorana nayo bagiye batera imbere.'

Nyirumuringa Christine ushinzwe Ishami ry'Abagore muri Equity Bank yavuze ko mu rwego rwo gukomeza gushyigikira iterambere ry'umugore bashyizeho gahunda zitandukanye zibafasha gushyigikira imishinga mito n'iciriritse no kuborohereza kubona ingwate.

Ati 'Tuzi ko abagore benshi bagira imbogamizi zo kubona ingwate, rero iyo tubashyize mu matsinda bagira ubwishingizi magirirane. Muri ayo matsinda barishingirana, wagira ikibazo bakagufasha, ni yo mpamvu tubasaba kujya mu matsinda bita ibimina.'

'Usibye kubashyira mu matsinda, tubashyira mu cyo twita amahuriro (Clubs), abafasha kugenzura uburyo binjiza amafaranga n'uko bayasohora. Iyo twabashyize hamwe bidufasha kubakurikirana kandi bakagira uruhare mu kumenya amakuru.'

Yavuze ko abakiliya b'abagore bakorana na bo, bazashyirirwaho ingendoshuri zo mu mahanga kugira ngo bibafashe guhangana ku isoko mpuzamahanga.

Umuyobozi ushinzwe Ishami ry'Ubucuruzi muri Equity Bank Plc, Jean Claude Gaga, yavuze ko ubukungu bw'u Rwanda bwerekana ko abenshi mu bakora ubucuruzi buciriritse (MSME) budahabwa agaciro bukwiriye n'ibigo by'imari.

Yagize ati 'Ugiye mu gakiriro ka Gisozi, ukareba ibikorwa byaho uhita ubona ko hariya ariho umutima w'ubukungu. Usanga ibigo by'imari bitekereza kuri sosiyete zagutse. Nka Equity Bank twiyemeje gushyiraho uburyo bwo gushyigikira iyo mishinga mito n'iciriritse (MSME).''

Umuyobozi Mukuru wa Equity Bank Plc, Namara Hannington, yavuze ko atari ubwa mbere nka banki yifatanyije n'abagore kwizihiza Umunsi Mpuzamahanga wabo maze abasaba kutitinya.

Ati 'Abagore bagomba kutitinya, bagakomera kuko barashoboye kimwe na bagenzi babo b'abagabo. Equity Bank yishimiye gukomeza kubafasha mu rugendo rwose rw'iterambere.'

Equity Bank Rwanda yabonye ibyangombwa byo gukorera mu Rwanda mu 2011. Iheruka guhabwa igihembo n'Ikigo The Banker gikora ubusesenguzi kuri banki ku rwego rw'Isi nka nka banki y'Umwaka mu Rwanda mu 2020 'Bank of the Year of 2020'.

Ni igihembo Equity Bank Rwanda yahawe nyuma yo kwitwara neza mu mwaka w'imari wa 2019, aho yongereye 27% by'igishoro cyayo, kikagera kuri miliyari 36.2 Frw muri uwo mwaka kivuye kuri miliyari 28.6 Frw mu 2018.

Equity Bank Plc yageneye abakiliya bayo b'abagore impano ku Munsi Mpuzamahanga wabagenewe

Buri mukiliya wageze mu ishami rya Equity Bank yahawe indabo n’impano zitandukanye

Bahawe indabo ziherekejwe n’ubutumwa bwo kubifuriza ihirwe

Byari ibirori biteguye neza mu kwizihiza Umunsi Mpuzamahanga w’Abagore

Umuyobozi Mukuru wa Equity Bank Plc, Namara Hannington, yasabye abagore kutitinya

Umuyobozi ushinzwe Ishami ry'Ubucuruzi muri Equity Bank Plc, Jean Claude Gaga, yavuze biyemeje guteza imbere ubucuruzi buciriritse (MSME)

Uyu muryango uvuga ko nubwo hari byinshi byamaze kugerwaho mu Rwanda mu kubahiriza ihame ry'uburinganire, hari ahakigaragara icyuho cyane cyane mu nzego z'abikorera.

Hamwe mu ho uyu muryango ugaragaza nk'ahakiri umubare muto w'abagore n'abakobwa ni mu bucukuzi bw'amabuye y'agaciro, serivisi zo gutwara abantu n'ibintu ndetse no mu bwubatsi.

Imibare y'Ikigo cy'Igihugu cy'Ibarurishamibare yo mu 2018 igaragaza ko mu bucukuzi bw'amabuye y'agaciro na kariyeri harimo ab'igitsina gore bangana na 4,8%, mu bwubatsi harimo 14,6%, mu gutwara abantu n'ibintu hakabamo 3%.

Ibi byatumye Umuryango mpuzamahanga uharanira uburinganire n'iterambere ry'abari n'abategarugori, Plan International ishami ry'u Rwanda, usaba inzego zitandukanye guha abakobwa n'abagore amahirwe angana n'ayo baha abagabo mu mirimo yose no mu nzengo zose z'igihugu.

Umuyobozi wa Plan International Rwanda, Mutero William, yavuze ko Leta y'u Rwanda yashyize imbaraga mu gushyira abagore n'abakobwa mu nzego zifata ibyemezo ariko ko hakwiye kongerwa imbaraga no mu bigo by'abikorera.

Yagize ati 'Turashimira cyane Leta y'u Rwanda uburyo yashyize abagore mu myanya ifata ibyemezo, nko mu Nteko Nshinga Amategeko na Guverinoma, ndetse no mu zindi nzengo zikomeye za leta ubona ko hari izamuka.'

'Ariko hari ahakiri icyuho nko mu bucukuzi no mu yindi mirimo hakwiye impinduka kuko biragoye kubona igihugu gitera imbere nta ruhare rugaragara rw'umugore ruriho.'

Kuba hakiri imirimo itandukanye abagore bahezwamo bituma bahugira mu mirimo bakorera mu rugo itishyurwa bikaba byabadindiza mu iterambere.

Mutero yavuze ko iyi mirimo yo mu rugo ikorwa n'abagore itishyurwa ibadindiza mu iterambere ku buryo usanga batabasha kugira icyo binjiza mu rugo rwabo, ndetse ikaba yatuma n'iterambere ry'umwana w'umukobwa risigara inyuma.

Ati 'Kwirirwa mu mirimo yo mu rugo itishyurwa bibangamiye cyane iterambere ry'umugore kuko wa mwanya amara mu mirimo yakabaye ari gukora ikindi kimwinjiriza akiteza imbere n'umuryango we.'

'Abana b'abakobwa iyi mirimo bayidindiriramo kuko niba hakiri imyumvire ko umukobwa ajya mu mirimo umuhungu akajya kwiga, bizabadindiza mu myigire no mu iterambere ari naho bahura n'ibishuko by'ababatera inda.'

Umusanzu wa Plan International mu iterambere ry'umugore

Uyu muryango wageze mu Rwanda mu 2007 kuva icyo gihe kugeza ubu umaze gutanga umusanzu ugaragara mu iterambere ry'umugore n'umukobwa.

Uyu muryango ukorera mu turere twa Nyaruguru, Gatsibo, Bugesera n'inkambi z'impunzi ziri mu Rwanda ugamije iterambere ry'abana cyane cyane abakobwa.

Wagiye ukora ibikorwa bitandukanye birimo ibijyanye no guteza imbere uburezi, gutanga amahugurwa ku bagore.

Mu mwaka w'ingengo y'imari wa 2020/2021 uyu muryango wakoresheje miliyari 6 Frw mu bikorwa bigamije iterambere ry'abakobwa n'abagore.

Aya mafaranga yakoreshejwe mu kubaka amashuri nderabarezi n'ibigo mbonezamikurire bibasha kwakira abana b'abakobwa 9 856 hamwe n'abahungu 8 096, ndetse n'amashuri abanza ashobora kwakira abakobwa bangana na 9 994 hamwe n'abahungu 9 003.

Si ibi gusa kuko uyu muryango wagiye utanga amahugurwa ku bangavu ubigisha kurwanya ihohoterwa bakorerwa ndetse no gutinyuka imirimo itandukanye, aho hahuguwe abangavu 206 459.

Bamwe mu bagezweho n'ibi bikorwa bya Plan International, bavuga ko byabagiriye akamaro, bakemeza ko usibye kubakura mu bwigunge byatumye babasha no kwiteza imbere ubu bakaba ntacyo babuze.

Umuyobozi w'amatsinda yashyizweho na Plan International mu Karere ka Nyaruguru, Nyirahabineza Béatrice, yavuze ko amahugurwa yahawe n'uyu muryango yamufashije kugira ibyo ahindura mu rugo rwe.

Ati 'Uyu muryango waradufashije uduha amahugurwa ajyanye n'isuku no kwiteza imbere, ubu iwanjye hari isuku kandi nabashije no kujya mu matsinda yo kugurizanya mbasha gukora ubucuruzi bunteza imbere.'

Iri terambere ryageze no ku mukobwa w'imyaka 24, Mutesi Faith, wavuze ko yahuye na Plan International mu 2013 ikamufasha kwiga none ubu akaba atanga umusanzu mu kubaka igihugu abicishije mu mushinga wa Our City 2030 project.

Ati 'Plan International yandihiye amashuri ntari mfite ubushobozi bituma mbasha kwiga ndangiza kaminuza, ibi byatumye mbona ubushobozi bwo kuba umukorerabushake mu mushinga wo kubungabunga ibidukikije nkabasha gutanga umusanzu wanjye nk'umwana w'umukobwa.'

Iri terambere ririshimirwa mu gihe u Rwanda n'Isi muri rusange hari kwizihizwa umunsi mpuzamahanga wahariwe abagore uba buri mwaka tariki ya 8 Werurwe.

Plan International Rwanda yagaragaje ko hari inzego zimwe zikigaragaramo umubare muto w’abagore n’abakobwa

Umuyobozi wa Plan International Rwanda, Mutero William yashimye ibyakozwe na Leta mu gushyigikira uburinganire ariko agaragaza ko hari aho abagore bakiri bake