Blog

Umudugudu w'Icyitegererezo wa Kinigi uzaba ufite ibikorwa remezo birimo ikigo nderabuzima, agakiriro, amashuri, isoko n'ibiraro byo kororeramo inkoko ibihumbi bitandatu abaturage bazorozwa ngo biteze imbere mu bukungu n'imibereho myiza. Kuri ubu imirimo yo kuwubaka bigeze ku kigero cya 63%.

Mu muhango w'ihererekanyabubasha hagati ya Minisitiri w'Ubutegetsi bw'Igihugu, Gatabazi Jean Marie Vianney wari Guverineri w'Intara y'Amajyaruguru na Nyirarugero Dancille wamusimbuye, wo ku wa 22 Werurwe 2021, Gatabazi yasabye ko mu byo Nyirarugero azitaho harimo gukurikirana no kwihutisha imirimo y'iyubakwa ry'uyu mudugudu.

Yagize ati 'Turi kwitegura kwizihiza isabukuru ya 27 u Rwanda rwibohoye, ku rwego rw'igihugu umunsi ukazabera mu Kinigi ahazatahwa umudugudu urimo kubakwa uzatuzwamo imiryango 144. Hari ibindi bikorwa biwushamikiyeho bizafasha abaturage guhindura ubuzima bwabo. Nyakubahwa Guverineri ni ugukomeza gukurikirana iyubakwa ry'uwo Mudugudu n'ibindi bikorwa remezo biwurimo.'

Guverineri w'Intara y'Amajyaruguru, Nyirarugero Dancille, ubwo yasuraga uyu Mudugudu w'Icyitegererezo wa Kinigi, ku wa 25 Werurwe 2021, akerekwa aho iyi mirimo igeze, yasabye ko yihutishwa kuko ibyateganyijwe byose bihari ngo wubakwe.

Yagize ati 'Urebye aho imirimo igeze harashimishije kuko ibisigaye byo byihuta kurusha ibisigaye, twabasabye ko n'ibisigaye byihutishwa bigakorwa bikanozwa neza hakiri kare.'

Mu bikorwa byo kubaka Umudugudu w'Icyitegererezo wa Kinigi, abaturage barenga 400 bahawe imirimo itandukanye ndetse banishimira iterambere begerejwe.

Ndayambaje Jean Claude yagize ati 'Mbere twumvaga tutazagerwaho n'iterambere kuko umuntu udasobanutse yitirirwaga Kinigi, twabonaga imidugudu ikomeye mu binyamakuru tukumva byaragenewe Kigali gusa. Ubu natwe tubonye umudugudu ukomeye ndetse uruta iyo twabonaga, twishimiye ko banaduhayemo imirimo tukabonamo amafaranga aduteza imbere.'

Nyiratebuka Angélique na we yagize ati 'Ibi ni umugisha tugize, ntabwo twakekaga ko hano iwacu muri Kinigi twabona inzu nziza nk'izi tugiye guturamo. Abenshi twabonye akazi, ubu iterambere ryacu rirazamuka umunsi ku wundi.'

Biteganyijwe ko Umudugudu w'Icyitegererezo wa Kinigi uzatahwa hizihizwa ibirori by'Umunsi Mukuru wo Kwibohora ku nshuro ya 27, uteganyijwe ku wa 4 Nyakanga 2021.

Mu Karere ka Musanze hari kubakwa Umudugudu w'Icyitegerezo uzatuzwamo imiryango irenga 140

Umudugudu w'Icyitegererezo wa Kinigi washyizwemo ibikorwa remezo birimo ikigo nderabuzima, agakiriro, amashuri, isoko n'ibiraro by’inkoko

Guverineri w'Intara y'Amajyaruguru, Nyirarugero Dancille, yasuye Umudugudu w'Icyitegererezo wa Kinigi ashima imirimo yo kubaka aho igeze

Umudugudu w'Icyitegererezo wa Kinigi uzatahwa hizihizwa ibirori by'Umunsi Mukuru wo Kwibohora ku nshuro ya 27

Uyu mudugudu uzaba ufite isoko rya kijyambere abawutuye bazajya bahahiramo

---

Source : http://igihe.com/amakuru/u-rwanda/article/musanze-hari-kubakwa-umudugudu-w-icyitegerezo-uzatuzwamo-imiryango-irenga-140

Ikipe yari ihagarariye u Rwanda mu irushanwa mpuzamahanga rikomatanyije imikino itatu ariyo gusiganwa ku maguru, gusiganwa ku igare ndetse no koga rizwi nka Triathlon yegukanye imidari ibiri mu bagabo ndetse n'umudali umwe mu bagore.

Muri iri rushanwa ryabaye muri iki cyumweru dosoje rikaba ryarabereye mu mujyi wa Bangui wo muri Santrafika, abakinnyi babiri mu bagabo aribo NIYIREBA Innocent ndetse na GASHAYIJA Jean Claude begukanye imidali, ni mu gihe Saidati Mutimukeye yegukanye umudali mu bagore.

Kwitwara neza kw'abakinnyi b'abanyarwanda mu mujyi wa Bangui, ngo kwaturutse ku gushyigikirwa bikomeye n'ingabo ndetse n'abapolisi b'u Rwanda baba muri Santrafrika nkuko twabitangarijwe na MBARAGA Alexis perezida w'ishyirahamwe nyarwanda ry'umukino wa Triathlon ari nawe wari uyoboye intumwa z'u Rwanda.

Usibye kuba aba bakinnyi batatu baregukanye iyo midali, ku rundi ruhande Perezida w'ishyirahamwe ry'umukino w'inyabutatu wa Thriathlon mu Rwanda, Alexis Mbaraga nawe yegukanye umwanya wa mbere mu basheshe akanguhe.

Iri rushanwa mpuzamahanga rya Triathlon ryasorejwe mu mujyi wa Bangui, ryari ryitabiriwe n'ibihugu birimo Santrafrika, u Rwanda, Tchad, Benin na Congo Brazzaville.

The post Abakinnyi batatu muri bane baserukiye u Rwanda mu irushanwa mpuzamahanga rya Triathlon ryaberaga I Bangui muri Santrafrika begukanye imidali appeared first on RUSHYASHYA.

Source : https://rushyashya.net/abakinnyi-batatu-muri-bane-baserukiye-u-rwanda-mu-irushanwa-mpuzamahanga-rya-triathlon-ryaberaga-i-bangui-muri-santrafrika-begukanye-imidali/

Amiral Didier Ignace Ratsiraka wabaye Perezida wa Madagascar mu gihe cy'imyaka irenga 20 yapfuye mu gitondo cyo kuri iki cyumweru Tariki 28 Werurwe 2021, nkuko byatangajwe na Perezida wa Madagascar, Rajoelina. Imvano y'uru rupfu ntabwo yahise itangazwa.

Mu butumwa bwo kuri Twitter, Perezida wa Madagascar Andry Rajoelina yavuze ko 'Abanya-Madagascar babuze umuntu wamenyekanye cyane mu gukunda igihugu'. Yihanganishije abo mu muryango we wa hafi no mu muryango mugari wa gisirikare, ndetse n'abaturage ba Madagascar.

Bwana Ratsiraka yageze ku butegetsi bwa mbere mu mwaka wa 1975 binyuze mu ihirikwa ry'ubutegetsi — akiri umusirikare muto wo mu barwanira mu mazi — kugeza mu 1993. Yongeye kubugarukaho kuva mu 1997 kugeza mu 2002.

Ubushyamirane na Ravalomanana

Akigera ku butegetsi yagendeye ku mahame ameze nko kureshyeshya abaturage ntihagire uruta undi mu mibereho. Yagiranye umubano wa hafi n'umutegetsi wa Koreya ya ruguru Kim Il-sung na Fidel Castro wa Cuba ndetse n'ubutegetsi bw'Uburusiya, nkuko bitangazwa n'ibiro ntaramakuru AFP.

Mu kwezi kwa mbere mu 2002, 'mayor' w'umurwa mukuru Antananarivo akaba na rwiyemezamirimo, Marc Ravalomanana, wari uhatanye na Ratsiraka, yohereje mu mihanda abamushyigikiye bavuga ko yatsinze amatora mu cyiciro cya mbere cy'amatora ya perezida yabaye mu kwezi kwa cumi na kabiri mu 2001.

Ravalomanana yanze gutegura icyiciro cya kabiri cy'amatora, mu gihe Ratsiraka yanze kwemera ko yatsinzwe, bituma igihugu kimara amezi arindwi mu bikorwa by'urugomo n'akajagari.

Iyo midugararo yaciyemo igihugu mo kabiri — imirwa mikuru ibiri, leta ebyiri, ndetse n'igisirikare cyacitsemo ibice — kugeza ubwo mu kwezi kwa kane mu 2002 Ravalomanana atangajwe ku mugaragaro ko ari we watsinze amatora. Arahizwa ku itariki ya 6 y'ukwezi kwa gatanu, Ratsiraka akomeza kutemera ibyavuye mu matora.

Mu kwezi kwa karindwi nkuko BBC ikomeza ibitangaza, Ratsiraka yahungiye mu Bufaransa aho yamaze imyaka 11, agaruka mu gihugu burundu mu 2013 — nyuma yuko mu 2011 yari yaje ariko akahamara ibyumweru gusa.
Mu 2003, Ratsiraka yari yakatiwe n'urukiko adahari igihano cy'imirimo y'ingufu, gufungwa imyaka itanu kubera gushyira mu kaga umutekano w'igihugu ndetse n'imyaka 10 kubera kunyereza umutungo wa leta. Ariko nyuma yuko Rajoelina ageze ku butegetsi, yaje kuvuga ko Bwana Ratsiraka yemerewe gutahuka mu mahoro.

Munyaneza Theogene / intyoza.com

Source : https://www.intyoza.com/uwabaye-perezida-wa-madagascar-yitabye-imana-ku-myaka-84-yamavuko/

Yitwa Corey Bennet akaba akomoka mu leta ya Indiana muri leta zunze ubumwe za America, uyu yavukanye uburwayi budapfa kubaho kenshi. Ubu burwayi bwitwa 'cleidocranial dysplasia' bukaba butuma umwana avuka adafite amagufa mu ntugu ze (collar bones).

Uretse ibi, ubu burwayi bushobora gutera n'ubundi bumuga burimo nko kuba umwana yavukana ubugufi budasanzwe, ashobora kandi kumera amenyo y'umurengera aruta ayasanzwe cyangwa se akaba yabura amenyo burundu ntazamere iryinyo na rimwe.

Ubu burwayi ntibupfa kubaho k'uburyo ubushakashatsi bugaragaza ko ku bana miliyoni bashobora kuvuka, umwana umwe ariwe ushobora kuvukana ubu burwayi. Kugeza ubu bizwiko abantu 1000 aribo bavukanye ubu burwayi mumibare izwi yanditse nkuko tubikesha urubuga 'rarediseases.org'

Uyu Corey rero yamenyekanye cyane k'urubuga rwa tiktok aho yakoze amashusho avuga ngo 'nzakoma amashyi nkoresheje intugu kugeza ubwo nzamenyekana ku isi hose' amwe mu mashusho yashyizeho agaragara ari gukoma amashyi akoresheje intugu ze vuba kandi cyane mbese ninkuko abantu bakoma amashyi bakoresheje ibiganza.

Bitewe nuko nta gufa na rimwe afite k'urutugu biramworohera cyane guhuriza intuguze mu gatuza ndetse n'ibintu byoroshye kuri we.

Abamukurikira bamubwiraga ku bwinshi ko ibyo akora bitangaje cyane. Corey yavuze ko kuva akiri umwana bakundaga kumusesereza cyane bamuziza ko ari mugufi, afite amenyo ateye nabi ndetse n'umutwe munini cyane, kuri we rero kuri ubu ngo yishimiye uko ateye bitewe nubwo yavukanye ubwo burwayi ngo bitamubuza gukora icyo ashaka.

Source : http://umuryango.rw/amakuru/mu-mahanga/article/umugabo-udafite-amagufa-y-urutugu-akomeje-gutangaza-abantu-kubera-ibyo-akora

Uyu mugore yabwiye abamukurikira kuri Tik Tok ko iminwa ye iruta kure cyane iy'umuntu wanditswe muri Guinness World Record ireshya na sentimetero hafi 10.

Uyu mugore yafunguye uru rubuga mu rwego rwo kwereka abantu ko azi kuririmba ariko byarangiye yigaruriye imitima ya benshi kubera iminwa ye minini.

Uyu mugore yavuze ko iyi minwa ye yanamuhesheje amafaranga menshi.

Ati 'TikTok ubusanzwe ihemba abantu bakora video zigakundwa bitewe n'umubare w'abazirebye uhembwa amafaranga kuva kuri 0.3 kugeza ku 1,000.

Ntabwo byakumvikana neza ariko amwe mu mashusho yanjye yagize miliyoni 50 y'abayarebye.Ukoze imibare neza ntabwo byaba biteye isoni kurira sandwich kuri camera.'

Uyu mugore yavuze ko nubwo umunwa we munini wamuhesheje umugati ariko agitangira yaterwaga ipfunwe n'ibitutsi abantu bamutukaga.

Source : http://umuryango.rw/amakuru/mu-mahanga/article/umugore-ufite-iminwa-minini-ku-isi-yaciye-ibintu-ku-isi-amafoto

Aya magambo kandi yagaragaye ku rubuga rwa Twitter rwa Perezida Museveni.

Perezida Museveni yashishikarije Abagande bari mu itsinda gukingirwa, kubikora mu cyiciro cya kabiri cya gahunda yo gukingira.

Ku ya 10 Werurwe, Uganda yatangije urukingo rwa Covid-19, mu bitaro by'igihugu bya Mulago i Kampala, nyuma yo guhabwa doze ibihumbi 864 muri gahunda ya Covax na doze 100.000 na guverinoma y'Ubuhinde zose hamwe zikaba 964.000.

Icyiciro cya mbere cyarimo abashinzwe ubuzima, abashinzwe umutekano, abarimu n'abanyamakuru.

Mbere, Perezida Museveni mu ijambo yagejeje ku batuye muri iki gihugu, yavuze ko akitonze kugira ngo azarebe urukingo azakingirwa bityo amaherezo ku munsi w'ejo nibwo yafashe icyemezo cyo kubona uru rukingo rwo mu bwoko bwa Astrazeneca.

Mu ijambo rye icyo gihe, Perezida Museveni yavuze ko “atarakingirwa kuko agishishoza kandi ko afite uburinzi buhagije mu mubiri”.

Icyakora, mu kwezi gushize hari amakuru yavugaga ko perezida na bagenzi be ba hafi bahawe izindi nkingo rwihishwa mbere yuko igihugu kibona inkingo zemewe, gusa Minisitiri Jane Aceng yarabihakanye.

Minisitiri w'ubuzima yasohoye itangazo nyuma y'ikinyamakuru Daily Monitor cyo muri iki gihugu n'ikinyamakuru cyo muri Amerika Wall Street gitangaje ayo makuru y'ibinyoma.

Twabibutsa kandi ko Minisitiri w'ubuzima wa Uganda, Jane Aceng, ari we muntu wa mbere wakiriye urwo rukingo anagira inama abantu gukingirwa kuko urukingo nta ngaruka mbi rufite.

Icyakora, habaye ukundi kutumvikana nyuma Minisitiri w'ubuzima wa Uganda, Jane Aceng, ashyira ahagaragara amashusho y'uko yahawe urukingo rwa corona nyuma y'abavugaga ko atakingiwe.

Icyo gihe abakoresha imbuga nkoranyambaga batangiye gukwirakwiza videwo yerekana minisitiri yazamuye ukuboko nk'aho yatewe inshinge, ariko urushinge ntirwinjira mu mubiri we.

Icyakora, nyuma byaje kuvugwa ko azasubira kwakira urukingo kubera ko abanditsi bamwe bavuze ko batashoboye gufotora urukingo rwe rwa mbere.

Nyuma, Dr. Aceng yashyize kuri Twitter videwo yerekana igihe urushinge rwinjiye mu kuboko maze avuga ko ari gushishikariza abantu “kureka gukwirakwiza amakuru y'ibinyoma”.

Source : http://umuryango.rw/amakuru/mu-mahanga/ubuzima/article/perezida-museveni-n-umufasha-we-bafashe-urukingo-rwa-covid-19-rwo-mu-bwoko-rwa

Nibyo koko, icyegeranyo cya 'Komisiyo Declert' cyambitse ubusa igihugu cy' Ubufaransa, kigaragaza mu buryo budasubirwaho uruhare rwacyo muri Jenoside yakorewe Abatutsi. Abafatanyabikorwa b'abajenosideri bashyizwe ku Karubanda, ndetse hanamaganwa abashinja ubwicanyi ingabo za FPR zahagaritse Jenoside, isi yose irebera.

Hagendewe ku nyandiko zibarirwa mu 8.000, nyuma y'imyaka 2, abanyamateka n'abanyamategeko bari bagize iyi Komisiyo basohoye icyegeranyo cy'impapuro 1.200, zishinja Perezida François Mitterrand n'ibyegera bye gushyigikira abajenosideri, haba mbere ya Jenoside yakorewe Abatutsi, mu gihe yakorwaga na nyuma yayo. Abakurikiranira hafi iki kibazo kimaze imyaka 27 kigibwaho impaka, bishimiye  ubutwari bwa Perezida w'Ubufaransa muri iki gihe, Emmanuel Macron, washyizeho iyi Komisiyo yigenga, bikagaragaza ubushake bwo gushyira ukuri ahabona, guha agaciro abakorewe Jenoside no kuzahura umubano hagati y'Ubufaransa n'uRwanda. Ibi byanashimangiwe na Leta y'uRwanda, isanga iyi ari intangiriro nziza y'urugendo rushya kandi rwiza mu mibanire y'ibihugu byombi.

Icyakora rero, nubwo iki cyegeranyo kidaca ku ruhande ibikorwa bigayitse by'abanyapolitiki barangajwe imbere na Perezida Mitterrand, birimo kwitiranya ikibazo cy'amoko n'intambara hagati ya FPR-Inkotanyi na Leta ya Yuvenali Habyarimana, bikaza gutuma Abatutsi bicwa kuko bafatwaga nk'abanzi b'u Rwanda, abasesenguzi basanga hari n'inenge muri iki cyegeranyo:

1. Komisiyo Declert yirinze gushinja Ubufaransa ubugambanyi mu gutegura umugambi wa Jenoside, ngo kuko nta kimenyetso gifatika yabonye. Aha harimo kwivuguruza kuko icyegeranyo ubwacyo kivuga ko Leta ya Miterrand yafashije ubutegetsi bwariho mu Rwanda, izi neza ko Habyarimana n'akazu ke bari mu bikorwa byo gutegura umushinga munini wo gutsemba Abatutsi, u Rwanda n'Ubufaransa byafataga nk'abanzi b'Igihugu. Inyandiko nyinshi zigaragaza ko uwari Ambasaderi w'Ubufaransa mu Rwanda atahwemye kubwira ba shebuja b'I Paris ko Interahamwe zitegurwa ngo zitsembe Abatutsi n'abadahuje imyumvire nazo, ndetse n'ingabo za Loni zari mu Rwanda nta munsi zitatabaje Akanama ka Loni gashinzwe Amahoro ku Isi, kandi uBufaransa ni umunyamuryango wako uhoraho. Ibi ni nko kwitabira inama z'ubukwe, ugatwerera, ukanabutaha, ariko ugahakana kuba waragize uruhare mu babuteguye.

2. Mu cyegeranyo cya 'Komisiyo Declert' ntaho bavuga operasiyo za gisirikari ingabo z'Abafaransa zoherejwemo mu Rwanda, nka 'Opération Noroît' na 'Opération Tuquoise' zose zaje gushyigikira ubutegetsi bwakoze Jenoside. Komisiyo ivuga ko itahawe impapuro zijyanye n'ibikorwa bya gisirikari by'Ubufaransa mu Rwanda. Aha, abakurikiraniye hafi imikorere y'iyi Komisiyo bavuga ko igice kirebana no gusesengura ubutumwa bwa gisirikari ingabo z'Ubufaransa zajemo mu Rwanda cyari cyashinzwe umugore witwa Julie d'Andurain waje kuva muri iyi Komisiyo, bimaze kugaragara ko abogamiye ku bajenosideri.

Aho aviriyemo rero, birakekwa ko nta wundi wahawe izi nshingano, cyangwa ibyo yari yakoze bikagirwa imfabusa kubera kubogama. Biranashoboka ariko ko kuvuga ku bikorwa bya gisirikari byaba byarirengagijwe nkana, hatinywa kuvuguruza ibinyoma byo gutagatifuza ibikorwa bya gisirikari Ubufaransa bwakoze mu Rwanda, nko kwemeza ko ''Opération Tuquoise''yari  mu bikorwa by'ubugiraneza! Nyamara uwitwa Guillaume Ancel wari muri iyo operasiyo yivugira ko ubutumwa bari bahawe ntaho buhuriye n'ubutabazi cyangwa ubugiraneza, ko ahubwo bwari bugamije gusubiza mu birindiro Leta n'ingabo zariho zitsindwa, byananirana abicanyi bagafashwa guhungira muri Zayire, ari nako byagenze.

Icyegeranyo ntigisesengura byimbitse imyitwarire ya  Christophe Mitterrand, umuhungu wa Perezida Mitterrand, wari ushinzwe by'umwihariko gutabara Leta y'abajenosideri. Abasirikari b'Abafaransa bagaragaye kuri za bariyeri basaba indangamuntu ngo Umututsi yicwe, ntacyo zivugwaho, abafashije Ex-Far ku rugamba  ku manywa y'ihangu, byarengejweho uruho rw'amazi, hirengagijwe ubuhamya bw'abasirikari b'Ubufaransa bivugira ko bagize uruhare muri ibyo bikorwa,nka Adjudant Chef Prungnaud na General Vallet.Bigaragara rero nk'aho iyi Komisiyo yari ishinzwe kureba amahano ya bamwe mu banyapolitiki gusa, naho aya gisirikari ntavugwe.Umugaba Mukuru w'Ingabo z'Ubufaransa muri iki gihe, François Lecointre, yari aherutse kwishongora , ubwo yavugaga ko 'ari ubusazi' gushinja izo ngabo uruhare mu byabaye mu Rwanda. Kuba yarabivuze n'icyegeranyo kitarasohoka, birerekana ko yari azi neza ibikubiyemo.

3.Iki cyegeranyo ntikivuga, ku buryo butarya iminwa, ko n'ubu hari          Abajenosideri bagikingiwe ikibaba n'Ubufaransa, bakaba bakomeje gupfobya no guhakana Jenoside yakorewe Abatutsi. Muri icyo gihugu hari Agatha Kanziga wagaragajwe nk'umwe mu bavurabwenge ba Jenoside. Uwo mugore-gito yimwe(bya nyirarureshwa) ubuhungiro mu Bufaransa ku buryo bwemewe n'amategeko, ariko icyo gihugu cyanze kumuburanisha cyangwa ngo kimwirukane, ajye aho ashobora gushyikirizwa ubucamanza. Muri make Ubufaransa ni indiri y'abajenosideri batabarika, nka Padiri Wensislas Munyeshyaka, Laurent Bucyibarura n'abandi ba ruharwa benshi cyane.

Nubwo koko iki cyegeranyo cya 'Komisiyo Declert' ari urufatiro rw'ukuri uri ku ruhare rw'Ubufaransa muri Jenoside yakorewe Abatutsi, ndetse bikaba bikwiye gushimirwa Perezida Emmanuel Macron, ntawabura kuvuga ko hari ibigikeneye kujya ahabona. Uru ni urufunguzo rw'ubundi bushakashatsi buzarushaho gushyira ibintu mu mucyo, ntihagire uzasigara ari'umutagatifu'kandi ari umugome mu bandi ukwiye kumenyekana. Ikindi iyi Komisiyo yaje itinze, kuko imyaka 27 yose ukuri kwarapfukiranywe yafashije abagome gukwirakwiza ingengabitekerezo ya Jenoside.

Icyo kwishimira gusa ni uko nta na rimwe gukora neza bijya bikererwa. Turizera ko  ibyiza biri imbere, nko kuburanisha umuntu wese watumye Ubufaransa bwijandika muri Jenoside, kandi iki gihugu kigafasha mu guta muri yombi abajenosideri, baba abari mu Bufaransa, baba n'abakihishahisha za Mayotte no mu bindi bihugu. Ni ngombwa kandi ko habaho ubutabera budacagase.Abajenosideri nibahanwa,  abahohotewe muri Jenoside bazagenerwe indishyi, kuko ihame ry'amategeko rivuga ko 'nta ndishyi, nta butabera'.

Ibindi nko kuzimya no gukoma mu nkokora abashyigikiye imitwe y'iterabwoba nka FDLR n'iyindi, tuzabyisabira Perezida Emmanuel Macron utegerejwe mu ruzinduko mu Rwanda mu minsi mike iri imbere.

 

 

 

 

 

 

 

 

 

 

 

The post Raporo ishinja Ubufaransa uruhare rutaziguye muri Jenoside yakorewe Abatutsi yakiriwe neza, ariko irimo inenge kuko hari ibyagizwe ubwiru appeared first on RUSHYASHYA.

Source : https://rushyashya.net/raporo-ishinja-ubufaransa-uruhare-rutaziguye-muri-jenoside-yakorewe-abatutsi-yakiriwe-neza-ariko-irimo-inenge-kuko-hari-ibyagizwe-ubwiru/

Source : http://www.ukwezi.rw/mu-rwanda/3/article/Nubwo-guhangana-na-COVID-bidutwara-igihe-kinini-dukwiye-no-gusengera-Igihugu-cyacu-Kagame