Blog

Ibiro by’Umukuru w’Igihugu, Village Urugwiro, bibinyujije kuri Twitter byatangaje ko aba bayobozi bombi bafatiye ifunguro ry’umugoroba wo kuri uyu wa 17 Gicurasi 2021 hamwe, ryari ryateguwe n’umuryango wa Perezida Macron.

Umukuru w’Igihugu na Madamu we bari i Paris aho bitabiriye Inama Mpuzamahanga yiga kuri Sudani yabaye kuri uyu wa 17 Gicurasi, n’Ihuriro ryiga ku Iterambere ry’Ubukungu bwa Afurika rizaba ejo ku wa 18 Gicurasi 2021.

Mbere yo guhurira ku meza, aba bayobozi bombi babanje guhura mu masaha yashize, banagirana ibiganiro byihariye.

Umubano w’abakuru b’ibihugu uratanga icyizere cyo kuzahura imibanire y’u Bufaransa n’u Rwanda byamaze imyaka myinshi byishishanya mbere y’uko Perezida Macron agera ku butegetsi.

Perezida Macron ni we wa mbere washishikarije ko hakorwa ubushakashatsi bwagira icyo bwerekana ku mubano w’igihugu cye na guverinoma yateguye ikanashyira mu bikorwa Jenoside yakorewe Abatutsi mu 1994.

Ibyagaragajwe byashyizwe hanze ku wa 26 Werurwe uyu mwaka, aho raporo byamuritswemo yitiriwe Duclert yagaragaje ko bwagize “uruhare ruziguye kandi rutagereranywa”.

Ni intambwe yishimiwe n’Abarokotse Jenoside ndetse n’Abanyarwanda muri rusange.

Perezida Paul Kagame wari uherekejwe na Madamu ubwo yakirwaga na mugenzi we w’u Bufaransa, Emmanuel Macron n’umugore we Brigitte Macron

Perezida Paul Kagame na Madamu Jeannette Kagame bakiriwe na Perezida w’u Bufaransa, Emmanuel Macron n’umugore we Brigitte Macron

Umukuru w’Igihugu yabitangaje mu kiganiro yagiranye na France24, cyagarutse ku ngingo zitandukanye zirimo umubano w’u Rwanda n’u Bufaransa by’umwihariko uko yakiriye Raporo yacukumbuye uruhare rw’iki gihugu muri Jenoside yakorewe Abatutsi mu 1994 n’ibindi.

Perezida Kagame watangiye kuyobora u Rwanda mu 2000, yabajijwe icyo ateganya ku bijyanye no kuziyamamaza mu 2024 avuga ko Abanyarwanda aribo bafite amahitamo nubwo na we ashobora kubitekerezaho.

Yagize ati “Hejuru ya byose, nifuza ko Imana yakomeza kumpa ubuzima bwiza nk’umuntu. Ibindi bya politiki, Abanyarwanda bazahitamo ariko nanjye nshobora guhitamo.”

Umukuru w’Igihugu yavuze kandi ko kuba Abanyarwanda bashobora kumubwira ko bagikeneye ko abayobora bitabuza ko na we nk’umuntu ashobora gufata icye cyemezo.

Ati “N’ubwo Abanyarwanda bavuga bati oya, turacyagukeneye […] ni ikintu cy’ingenzi ariko nanjye nshobora kuvuga nti murabizi? Ndumva nshaka gukora ibindi.”

Nyuma y’ubusabe bw’Abanyarwanda bwo kuvugurura ingingo ya 101 y’Itegeko Nshinga, Perezida Kagame yemerewe kwiyamamaza kugeza mu 2035.

Ingingo ya 101 y’Itegeko Nshinga rya Repubulika y’u Rwanda, nyuma yo kuvugururwa ivuga ko ‘Perezida wa Repubulika atorerwa manda y’imyaka itanu. Ashobora kongera gutorerwa indi manda imwe.”

Riteganya ko Perezida Kagame nk’uwari ku butegetsi mu gihe iri Tegeko Nshinga rivuguruye ritangira gukurikizwa akomeza manda yatorewe.

Rikomeza rigira riti “Hatabangamiwe ibiteganywa mu ngingo ya 101 y’iri Tegeko Nshinga, hitawe ku busabe bw’Abanyarwanda bwabaye mbere y’uko iri Tegeko Nshinga rivuguruye ritangira gukurikizwa, bushingiye ku bibazo byihariye u Rwanda rwasigiwe n’amateka mabi rwanyuzemo n’inzira igihugu cyafashe yo kuyivanamo, ibimaze kugerwaho no kubaka umusingi w’iterambere rirambye; hashyizweho manda imwe y’imyaka irindwi ikurikira isozwa rya manda ivugwa mu gika cya mbere cy’iyi ngingo.”

Ni ukuvuga ko ibiteganywa mu ngingo ya 101 y’Itegeko Nshinga bizatangira gukurikizwa nyuma ya manda y’indi myaka irindwi.

Mu myaka ine ishize ya manda ya gatatu ya Perezida Kagame 2017-2024, u Rwanda rwakomeje kwimakaza imibereho myiza, umutekano w’Abanyarwanda ndetse igihugu gikomeje kugirirwa icyizere mu ruhando mpuzamahanga haba mu gusurwa muri gahunda ya Visit Rwanda, guhabwa kwakira inama zo ku rwego rwo hejuru, ruri no ku mwanya wa kabiri muri Afurika mu korohereza ishoramari.

Perezida Kagame yavuze ko amahitamo ku kongera kwiyamamaza kwe ari ay’Abanyarwanda ariko na we afite amahitamo ye nk’umuntu

Inama Mpuzamahanga yiga kuri Sudani yabereye i Paris mu Bufaransa, kuri uyu wa 17 Gicurasi 2021. Uretse abakuru b’ibihugu yanitabiriwe kandi n’abayobora ibigo by’imari muri Afurika.

Ibiro by’Umukuru w’Igihugu, Village Urugwiro, byatangaje kuri Twitter ko Perezida Kagame yahuye na mugenzi we w’u Bufaransa, Emmanuel Macron aho bombi bitabiriye iyi nama. Ntabwo hatangajwe ibikubiye mu byo abakuru b’ibihugu byombi baganiriye.

Ibiganiro hagati ya Perezida Kagame na mugenzi we Emmanuel Macron byabaye nyuma y’ukwezi hasohotse raporo ebyiri zacukumbuye uruhare rw’u Bufaransa muri Jenoside yakorewe Abatutsi mu 1994. Izi raporo zirimo iyashyizweho na Perezida Macron, yitiriwe Duclert ndetse n’iyashyizweho na Guverinoma y’u Rwanda yitiriwe ‘Muse’.

Izi raporo zombi icyo zahuriyeho ni uko u Bufaransa bwari buyobowe na François Mitterrand kuva mu myaka ya 1990 kugeza mu 1994, bwashyigikiye mu buryo bugaragara Leta yari iyobowe na Habyarimana Juvénal ari nayo yateguye inashyira mu bikorwa Jenoside yakorewe Abatutsi.

Perezida Kagame ari mu Bufaransa aho yitabiriye inama zirimo iyiga kuri Sudani n’ibibazo biri muri icyo gihugu. Iyi nama yabaye kuri uyu wa Mbere yigiwemo ingingo zitandukanye zirimo uburyo iki gihugu kiyobowe n’Uhagarariye Akanama ka Gisirikare, Abdel-Fattah Burhan na Minisitiri w’Intebe, Abdalla Hamdok cyabasha kwikura mu bibazo cyagize nyuma y’imvururu zakurikiye ihirikwa ku butegetsi rya Omar Al-Bashir mu 2019.

Muri iyi nama kandi harebewe hamwe icyakorwa kugira ngo iki gihugu cya Sudani kizabashe kwishyura imyenda kibereyemo u Bufaransa n’ibigo by’imari mpuzamahanga.

U Bufaransa bwahise butangaza ko buzaguriza Sudani miliyari 1.5 z’Amadorali ya Amerika mu gufasha iki gihugu kwishyura imyenda kibereyemo Ikigega Mpuzamahanga cy’Imari, IMF.

Umwenda Sudani ibereyemo Paris Club [irimo ibihugu byinshi bitanga inguzanyo], ukabakaba 38% by’umwenda wa miliyari $60 ifitiye abayigurije bo mu mahanga.

Minisitiri w’Intebe wa Sudani, Abdalla Hamdok, yabwiye abitabiriye iyi nama ko yizeye ko igihugu cye muri uyu mwaka gishobora kwishyura umwenda wa miliyari $60 ibashije kugira ayo ikurirwaho no kubona amasezerano y’ishoramari yava mu nama ya Paris.

Leta ya Sudani iri kugerageza kuzahura ubukungu bw’iki gihugu bwashegeshwe ahanini bitewe n’ibihano mu bijyanye n’ubukungu cyagiye gishyirirwaho n’ibihugu bikize. Ku rundi ruhande kandi iki gihugu kiracyafite ibibazo birimo kurangiza intambara n’imitwe yitwaje intwaro mu Burengerazuba mu gace ka Darfur ndetse no muri Leta z’Amajyepfo za South Kordofan na Blue Nile.

I Paris mu Bufaransa kandi kuri uyu wa Kabiri tariki 18 Gicurasi hateganyijwe inama y’Ihuriro ryiga ku Iterambere ry’Ubukungu bwa Afurika, izaba yiga ku gushakira hamwe uburyo bwafasha Afurika kuziba icyuho cya miliyari $300, mu bukungu bw’uyu mugabane nyuma y’ingaruka za Covid-19.

Perezida Kagame ni umwe mu bakuru b’ibihugu na za guverinoma bitabiriye inama yiga ku bibazo biri muri Sudani

Perezida Kagame na mugenzi we w’u Bufaransa, Emmanuel Macron bagiranye ibiganiro byihariye

Perezida Kagame ari i Paris mu Bufaransa aho uretse guhura na Macron hari inama ebyiri yitabiriye

Perezida Kagame aramukanya na mugenzi we w’u Bufaransa Emmanuel Macron wamwakiriye

Umukuru w’Igihugu yabigarutseho mu kiganiro yagiranye na France 24 na RFI aho ari mu Bufaransa mu ruzinduko rujyanye n’inama igamije kwiga ku bibazo by’umutekano muri Sudani n’iy’Ihuriro rigamije kwiga ku kuzahura ubukungu bwa Afurika bwazahajwe na Covid-19.

Perezida Kagame yavuze ko kuba u Rwanda rwafatanya na Repubulika Iharanira Demokarasi ya Congo mu bitero by’ingabo bihuriweho bigamije guhashya imitwe yitwaje intwaro mu Burasirazuba bw’iki gihugu, byaterwa n’imiterere y’ikibazo kandi ko impande zombi ziganiriye zishobora kubona igisubizo cyiza kandi kirambye.

Umukuru w’Igihugu yabajijwe icyo avuga ku bivugwa n’impuguke za Loni ko Ingabo z’u Rwanda ziri muri Repubulika Iharanira Demokarasi ya Congo, avuga ko ababivuga bakwiriye kwibaza ubundi impamvu rwakoherezayo ingabo.

Ati “Nakwifuje ko bajya kure y’ibyo bavuga, bakibaza ikibazo, ndavuga Loni impamvu u Rwanda rwajya muri RDC mu gihe aribo [Loni] babifite mu nshingano?”

Abajijwe niba yemera ko Ingabo z’u Rwanda ziri muri RDC, yasubije ati “Ndemera ko Loni ikora iyo raporo iri gutsindwa muri Congo, bari gutsindwa. Iyo tuza kuba turi yo, ntabwo tuba turi gutsindwa, ibyo ndabikwizeza, ntabwo twari kunanirwa gukemura ikibazo.”

Perezida Kagame yavuze ko hashize imyaka 24 Ingabo za Loni ziri muri RDC, ariko nta muntu n’umwe ujya ubaza icyo muri iyo myaka yose zimaze gukora, aho kuri we agaragaza ko ari “ugutsindwa gukomeye”.

Yagaragaje ko “Mapping Report” ari igikoresho cy’abumva ko habayeho Jenoside ebyiri

Tariki ya 1 Ukwakira 2010, Komisiyo ya Loni ishinzwe Uburenganzira bwa Muntu yari ikuriwe n’Umunyafurika y’Epfo, Navi Pillay, yashyize hanze imbanzirizamushinga ya raporo yiswe “Mapping Report”.

Ni raporo itaravuzweho rumwe ndetse yarakaje u Rwanda ku buryo bukomeye kugera n’aho rufata umwanzuro wo kuba rwakura cyangwa rukagabanya ingabo zarwo zari i Darfur muri Sudani rushingiye ku makuru y’ibinyoma yari ayikubiyemo.

Yavugaga ku byitwa ubwicanyi ndengakamere n’ihohoterwa ry’uburenganzira bw’ikiremwamuntu ryakorewe muri Repubulika Iharanira Demokarasi ya Congo ariko igashinja u Rwanda kubigiramo uruhare rukomeye.

Ikimara kujya hanze, u Rwanda rwagaragazaga ibimenyetso by’ingenzi byirengangijwe ubwo Ingabo z’u Rwanda zashinjwaga gukorera ibyaha ku butaka bwa RDC. Ni mu gihe rwo rwari rurangajwe imbere no gucyura no gusubiza mu buzima busanzwe impunzi miliyoni 1.5 zivuye mu yahoze ari Zaïre, izirenga miliyoni 1.7 zivuye mu Burundi, Tanzania na Uganda.

Rwerekanye ko uku gutahuka kw’izi mpunzi ari kimwe mu bintu bikomeye iyi raporo yirengangije, hakiyongeraho ukwirengagiza ukuri kwa nyako kw’ibyaberaga muri Congo, birimo ko abahoze mu ngabo za FAR hamwe n’Interahamwe bari bakomeje ibikorwa by’iterabwoba, kwica inzirakarengane z’abaturage no kugaba ibitero ku Rwanda.

Perezida Kagame muri iki kiganiro, yavuze ko Mapping Report yakunze kuba igikoresho cya Politiki y’abantu bo muri Repubulika Iharanira Demokarasi ya Congo n’abandi bo mu Karere barimo Denis Mukwege.

Guhera mu mwaka ushize, Mukwege ukomoka muri Repubulika ya Demokarasi ya Congo, yatangiye kuyifashisha avuga ko n’iyo ayivuzeho aterwa ubwoba kubera ibitekerezo bye ku ’bwicanyi’ bwabaye mu Burasirazuba bwa RDC.

Perezida Kagame yavuze ko Mukwege yitwaje igihembo cya Nobel yabonye, akaba igikoresho cy’abamubwira icyo agomba kuvuga, mu gihe hari n’izindi raporo zivuga ibitandukanye ko nta byaha byabaye mu Burasirazuba bwa Congo.

Ati “Ni imyumvire ya Jenoside ebyiri iba igarukwaho.”

Perezida Kagame yavuze ko yifuza ko Rusesabagina abona ubutabera buboneye

Perezida Kagame yabajijwe icyo avuga kuri Rusesabagina uri mu rukiko aburana ku byaha by’iterabwoba ariko akaba abihakana. Umukuru w’Igihugu yavuze ko Rusesabagina ataburana wenyine ndetse ko hari n’abo bareganwa bamushinja.

Ati “Sinzi impamvu abantu bavuga cyane, ari mu rukiko, ntabwo ahishwe ahantu. Ari mu rukiko nk’abandi benshi.”

Perezida Kagame yavuze ko atumva kandi ikibazo kiri mu kuvuga ko Rusesabagina yabeshywe kugira ngo azanwe mu Rwanda.

Ati “Bitwaye iki kubeshya umunyabyaha uri gushakisha? Iyo umubonye, nihe umushyira? Niba ari mu rukiko, ndakeka ibyo ntacyo bitwaye.”

Kuva Rusesabagina yatabwa muri yombi, ibihugu birimo u Bwongereza na Leta Zunze Ubumwe za Amerika byokeje u Rwanda igitutu bisaba ko yahabwa ubutabera buboneye; Perezida Kagame na we yashimangiye ko nawe aricyo asaba.

Ati “Ndashaka nanjye ubwanjye kubona ubutabera buciye mu mucyo, ni kuki mwumva ko ubutabera buboneye bugenewe abandi aho kuba twe? Kuki? Ni yo mpamvu abantu bisanga baguye muri ibi bintu bidafite agaciro, bikarangira babaye abantu baronda uruhu, ni nk’aho ikintu cyonyine giciye mu mucyo mu Rwanda cyangwa muri Afurika, kigomba kugenzurwa n’u Burayi, Leta Zunze Ubumwe za Amerika cyangwa se abandi. Si byo rwose.”

Yabajijwe no ku rupfu rwa Kizito Mihigo

Urupfu rwa Kizito Mihigo rwabaye muri Gashyantare 2020, uyu muhanzi yaguye muri kasho ya Polisi i Remera aho yari afungiye, aho bivugwa ko yiyahuje amashuka yaryamagaho.

Kuva icyo gihe imiryango mpuzamahanga yamaganye ibyatangajwe n’inzego z’u Rwanda, yitsa ku kuvuga ko ashobora kuba yarishwe aho kwiyahura.

Perezida Kagame yavuze ko impungenge ku rupfu nk’uru zikwiriye kubaho, ariko ko zishirira mu iperereza.

Ati “Impungenge zizabaho, ariko se ni inde wababwiye ko njye ntafite izo mpungenge njye ubwanjye? Ariko ibyo byose bisobanukira mu iperereza no mu rukiko.”

Yavuze ko nk’uko nta muntu ujya gukora iperereza ku byabereye mu Bufaransa avuye ahandi, ari nako bikwiriye kugenda ku Rwanda.

Perezida Kagame ubwo yakirwaga i Élysée na mugenzi we Emmanuel Macron / Ifoto: Village Urugwiro