Blog

Ni uruganda rufite abakozi 1.000 barimo 90% b'abagore, na ho abarenga 95% bakaba mu cyiciro cy'urubyiruko.

Pink Mango yatangiriye i Lasne mu Bubiligi, mu 2011, itangijwe na Maryse Mbonyumutwa. Yari agamije gufasha abakiliya kubona imyenda ihendutse kandi igezweho.

Mu 2019 Maryse Mbonyumutwa yifatanyije n'Umushinwa bagura uruganda rwitwaga C and H bahindura izina riba C and Pink Mango, bakora imyenda ijya muri Amerika n'i Burayi.

Icyakora kuko bari bafite intumbero zitandukanye, Umushinwa agamije ubucuruzi undi ashaka guteza imbere Abanyarwanda, baratandukanye mu 2022 Maryse Mbonyumutwa atangira Pink Mango Asantii Rwanda Ltd.

Ni uruganda rukorera mu cyanya cyahariwe inganda giherereye i Masoro, aho rufite ibice bibiri, kimwe kizwi nka 'La Manufacture' gikora imyenda myinshi yibanda ku y'imbeho n'ikindi kizwi nka 'L'Atelier' gikora imyenda yisumbuyeho mu biciro aho ushobora kubona ikoti rimwe rigura ibihumbi 800 Frw.

Rufite abakozi bafite ubunararibonye burenga imyaka 25, bakava mu bihigu bimenyereweho gukora imyenda cyane igezweho nk'u Butaliyani, u Bushinwa, Bangladesh, Sri Lanka, Ethiopia n'ahandi.

Pink Mango Asantii Rwanda Ltd ifite imashini zidoda zigera kuri 900 zo mu bwoko butandukanye.

Ifite intego ko mu myaka mike iri imbere izaba yakubye gatatu ubushobozi haba mu byo ikora no mu bakozi bakagera ku 3000.

Umuyobozi wa Pink Mango Asantii Rwanda Ltd, Ndemezo Dennis ati 'Twibanda ku gukora amakoti y'imbeho. Dukorana n'ibigo bitandukanye byo mu mahanga. Turashaka kubakira ubushobozi abakozi bacu b'Abanyarwanda ku buryo basimbura n'abo banyamahanga.'

Mu bahawe akazi harimo Tuyishime Fabrice ushinzwe ibijyane no gukora imyenda (production manager). Amaze imyaka hafi icyenda mu mwuga.

Ati 'Natangiye ntera ipasi. Nyuma y'amezi atatu banyigisha no kudoda nkoresheje imashini zitandukanye. Nyuma nagizwe umuyobozi ugenzura imikorere y'abakozi 40, nyuma nyobora abakozi 400 none ubu ndi umuyobozi ushinzwe gukurikirana ibijyanye no gukora imyenda mu ruganda rwose.'

Tuyishime Fabrice mu bakozi ba Pink Mango Asantii Rwanda Ltd bagiye guhaha ubumenyi mu Bushinwa

Ni ibintu ahuje na mugenzi we witwa Umutesi Latifah, ushinzwe ubugenzuzi bw'imyenda. Uyu aba areba ko buri mwenda wakozwe hashingiye ku byifuzo by'abakiliya ndetse nta makosa y'umwuga arimo.

Ati 'Ninjiye ntazi kudoda ubu ndi umuyobozi. Uretse ubumenyi nungutse n'ubuzima bwanjye bwagiye buzamuka umunsi ku wundi, imibereho iba myiza.'

Ikoti ry'ibihumbi 800 Frw?

Uretse gukora amakoti y'imbeho menshi ajyanwa mu Burayi no muri Amerika n'indi myenda itandukanye, muri Pink Mango Asantii Rwanda Ltd hakorerwa imyenda yisumbuye kuri iyo haba mu giciro, n'uburyo ikozwemo.

Uru ruganda rukorana na 'brands' zitandukanye zizwi mu bijyanye n'imyambaro. Imirimo ikorerwa mu gice cyarwo kizwi nka 'L'Atelier'.

Rukora imyenda ya 'brand' izwi nka Asantii. Ni imyenda iba igezweho, nk'ikoti rimwe rishobora kugura ibihumbi 800 Frw.

Rukorana n'abahanzi b'imideli batandukanye bo muri Afurika, hagamijwe kwimakaza ubucuruzi buhuriweho muri Afurika.

Batangiye gukorana n'ibigo bitandukanye by'imideli (fashion houses) byo muri Ghana no muri Nigeria, intumbero ikaba gukorera isoko ryose rya Afurika.

Ku munsi iki gice gikora imyenda igera ku 100 ikorwa n'abarenga 80. Ntabwo ari mike kuko ari imwe iba isaba kwitonderwa byisumbuyeho kuko na yo iba yihagazeho mu bijyanye n'igiciro, nawe utekereze ikoti ry'ibihumbi 500 Frw, 700 Frw cyangwa 800 Frw wakumva uburyo ryitabwaho.

Umwe mu bakozi bakorera muri L'Atelier, ushinzwe ibijyanye no guteza imbere ibicuruzwa, Umuhoza Ange Sybile, yavuze ko bashaka gufasha Abanyafurika batumiza imyenda mu bihugu nk'u Bushinwa, u Butaliyani, Turikiya n'ahandi, kuyibona mu Rwanda.

Ati 'Ubu dukorana n'abahanga mu guhanga imideli batandukanye. Dufite Abanyafurika baza gukoresha imyenda hano ndetse n'abo mu Burayi twatangiye kuvugana. Dukora imyenda ushobora kubonana 'brands' nka Dior, Yves Saint Laurent n'izindi zikomeye mu Isi.'

Muhoza yavuze ko umwenda uba ufite igiciro, bijyanye n'ibikoresho bigezweho bakoresha nka coton iri ku rugero rwa 100%, abadozi bafite ubumenyi buri ku rwego mpuzamahanga, na bo tukabaha amahugurwa menshi.'

Imyenda ikorerwa muri uru ruganda mu gice cya 'L'Atelier', usanga yaragizwemo uruhare n'abo mu bihugu bitandukanye nk'igitambaro cyayo cyarakorewe nko muri Burkina Faso, uhanga uko umwenda uzamera, akaba ari uwo muri Tanzania, umwenda ugateranyirizwa mu Rwanda.

Igice cya Pink Mango Asantii Rwanda Ltd kizwi nka L'Atelier gifite abakozi barenga 80

Kalimpinya Queen ushinzwe guhuza uru ruganda n'abakiliya yavuze ko azenguruka ibihugu byinshi, nko mu Budage, u Bufaransa, u Butaliyani, n'ahandi akorana n'inzu zicuruza imyenda kugira ngo babone icyashara.

Iyo bumvikanye icyo kigo gitanga ibyo cyifuza ku mwenda, ubundi bakagikorera ingano yose gishaka.

Ati 'Dukorana n'ibigo nka Springfield yo muri Espagne, ibigo nka Teddy Smith cyo mu Bufaransa n'ibindi byinshi. Iyo tumaze kwemeranya n'umukiliya tumusaba ko twakora byibuze imyenda guhera byibuze kuri kontineri.'

Kuba uruganda ruzirikana ubushobozi bw'abari n'abategarugori rukabaha akazi, rukabubakira ubushobozi mu nzego zitandukanye, biri mu bishimisha uyu mukobwa, bikaba akarusho guteza imbere gahunda ya 'Made In Rwanda'.

Ati 'Ejobundi duherutse kujya muri Espagne, turi kugenda mu muhanda mpindukiye mbona umuntu wambaye ikoti twakoze. Nahise ngira amatsiko musaba ko nareba, aranyemera ndebye nsanga handitseho Made in Rwanda. Ni ikintu utabasha kwiyumvisha, aho imyenda ikorwa n'Abanyarwanda isigaye yambarwa n'Abanyaburayi.'

Ubufatanye na SUMEC iri mu za mbere zikomeye muri Aziya

Mu gukomeza kubakira ubushobozi abakozi barwo, Pink Mango Asantii Rwanda Ltd yohereje abakozi mu Bushinwa mu ruganda rukora imyenda rwa SUMEC Textile & Light Industry Co. Ltd ruherereye mu Mujyi wa Nanjing mu Ntara ya Jiangsu mu Burasirazuba bw'u Bushinwa.

Rwashinzwe mu 1996 rufite ubushobozi bwo gukora imyenda igera kuri miliyoni 630 ku mwaka ikorwa n'abakozi barenga ibihumbi 13. Ni uruganda rufite amashami mu bihugu birenga 11.

Tuyishime wagiye mu rugendoshuri mu Bushinwa, yagaragaje ko azahakura ubumenyi butandukanye burimo no kureba uburyo abakozi bake batanga umusaruro mwinshi hisunzwe ikoranabuhanga ndetse bigakorwa mu gihe gito.

Ati 'Nzabanza ndebe uburyo bakora mbihuze n'umusaruro batanga kugira ngo natwe tuzamure umusaruro w'uruganda rwacu.'

Mutesi na we bajyanye yagize ati 'Ngiye kureba ibintu byinshi bakoresha ntaramenya bijyanye n'ishami nkoreramo nanjye nzaze mbyigishe abo nyobora.'

Mu buryo bwo gufasha abakozi gutanga umusaruro, Pink Mango Asantii Rwanda Ltd yashyizeho n'irerero rigezweho kuva ku mezi abiri kugeza ku myaka itandatu. Abana bashakiwe umwarimu, biga mu buryo bugezwego bakagaburirwa indyo yuzuye kandi bagahabwa uburezi bubafasha.

Pink Mango Asantii Rwanda Ltd ni uruganda rukora imyenda, imyinshi yoherezwa mu mahanga

Umuyobozi Mukuru wa Pink Mango Asantii Rwanda Ltd, Dennis Ndemezo yavuze ko bafite imashini zidoda zirenga 900

Umuyobozi Mukuru ushinzwe ibijyanye n'ikorwa ry'imyenda muri Pink Mango Asantii Rwanda Ltd, Zang Jiahui, yagaragaje ko SUMEC Textile & Light Industry Co. Ltd yo mu Bushinwa, ari uruganda rwiza rwafasha mu gutanga ubumenyi ku zikizamuka

Umutesi Latifa aba agomba kureba buri mwenda wose ko uri gukorwa neza

Umutesi Latifa ni umuyobozi ushinzwe ibijyanye n’ubugenzuzi bw’ubwiza bw’imyenda muri Pink Mango Asantii Rwanda Ltd

Umuyobozi Mukuru ushinzwe ibijyanye n’ikorwa ry’imyenda muri Pink Mango Asantii Rwanda Ltd, Zang Jiahui, yerekera umukozi uko imirimo ikorwa

Abakozi b’Uruganda rwa Pink Mango Asantii Rwanda Ltd bagiye mu Bushinwa kwigira ku ruganda rwa SUMEC Textile & Light Industry Co. Ltd

Uruganda rwa Pink Mango Asantii Rwanda Ltd ruherereye i Masoro mu cyanya cyahariwe inganda

Abakozi ba Pink Mango Asantii Rwanda Ltd bagaburirwa ku kazi

Umuyobozi wa Pink Mango Asantii Rwanda Ltd, Dennis Ndemezo yagaragaje ko igice kinini cy’abakozi babo ari abari n’abategarugori

95% by’imyenda ikorwa na Pink Mango Asantii Rwanda Ltd yoherezwa mu mahanga

Pink Mango Asantii Rwanda Ltd ikora amakoti y’ab’ingeri zose. Abagore, abagabo, abana n’abakuru

Rimwe mu makoti y’imbeho akorwa na Pink Mango Asantii Rwanda Ltd

Kalimpinya Queen ni we ushinzwe abakiliya muri Pink Mango Asantii Rwanda Ltd

Umuyobozi wa Pink Mango Asantii Rwanda Ltd, Ndemezo Dennis

Abana bo mu irerero rya Pink Mango Asantii Rwanda Ltd. Ni abana b’abakora muri uru ruganda rukora imyenda

Pink Mango Asantii Rwanda Ltd yashyiriyeho abana b’abakozi bayo irerero rigezweho

Pink Mango Asantii Rwanda Ltd ikora imyenda irenga ibihumbi 10 ku munsi

Iyi myenda yagizwemo uruhare n’abo muri RDC, u Rwanda, Madagascar, Tanzania na Ghana

Iri koti rigura ibihumbi 800 Frw

Umuhoza ni imwe mu bareberera bya hafi imyenda ikorerwa mu gice cya Pink Mango Asantii Rwanda Ltd kizwi nka L'Atelier

Pink Mango Asantii Rwanda Ltd ifite abakozi bafite ubumenyi bubabashishisha gukora imyenda yakwambarwa n’umuntu uwo ari we wese bijyanye n’urwego rwe

Imyenda yo muri L'Atelier iba ikoranywe ubuhanga buhanitse

Ku kwezi muri L'Atelier hakorwa imyenda irenga 100

Uruganda rwa Pink Mango Asantii Rwanda Ltd rufite abakozi bagera ku 1000

Hafi 90% by’abakozi ba Pink Mango Asantii Rwanda Ltd ni abagore

Imbere muri L'Atelier ahakorerwa imyenda yihagazeho

Iyi myenda iba yakozweho n’abahanga mu by’imideli batandukanye bo muri Afurika

Abakozi ba Pink Mango Asantii Rwanda Ltd bakorera mu gice kizwi nka L'Atelier

Abakozi ba Pink Mango Asantii Rwanda Ltd bageze mu Bushinwa. Aha bari gutambagizwa uruganda rwa SUMEC Textile & Light Industry Co. Ltd ruri mu za mbere zikomeye muri Aziya

Umutesi Latifa ari kumwe na bagenzi be bo muri SUMEC Textile & Light Industry Co. Ltd

Amafoto: Habyarimana Raoul

Uyu muryango wasuye ibice bitandukanye bigize Urwibutso rwa Jenoside rwa Kigali, banasobanurirwa amateka yagejeje kuri Jenoside yakorewe Abatutsi kugeza ihagaritswe.

Uwashinze uyu muryango akaba n'Umujyanama Mukuru, Mugisha Jean Marie, yagaragaje ko kwibuka Jenoside yakorewe Abatutsi ari inshingano za buri Munyarwanda, kubera ko ari ubwo buryo bwo kwiga amateka no guha icyubahiro Abatutsi bishwe muri Jenoside.

Yagize ati 'Kwibuka ni inshingano za buri muturarwanda wese akaba ari yo mpamvu twaje kugira ngo twunamire abacu bishwe muri Jenoside yakorewe Abatutsi.'

Akomeza agira ati 'Tuba tugamije kugira ngo dutekereze kuri aya mateka y'urwangano n'ubugome twashowemo na Leta mbi n'ubutugetsi bubi, bwatumye Abanyarwanda bamarana aho Abatutsi benshi bahasize ubuzima.'

Yakomeje asaba abagize uyu muryango gukomeza gusura uru rwibutso kugira ngo barusheho kumenya amateka bityo bajye babasha gusobanurira abakiri bato amateka y'ibyabaye.

Ati 'Mukwiriye gusura uru rwibutso kugira ngo murusheho kumenya amateka mu rwego rwo kugira ngo mubone icyo muzabwira abakiri bato.'

Umuyobozi wa FAA Rwanda, Kimenyi Damien, yavuze ko iki gikorwa cyo gusura urwibutso cyabafashije gukomeza kuzirikana inzirakarengane zishwe muri Jenoside yakorewe Abatutsi.

Yagize ati 'Nk'Abanyarwanda ni ngombwa ko tuzirikana inzirakarengane zishwe muri Jenoside yakorewe Abatutsi, yatwaye ubuzima bw'abarenga miliyoni.'

Famille des Amis Adultes Rwanda ni umuryango washinzwe mu 2023, kugeza ubu ifite abanyamuryango barenga 400.

Abanyamuryango ba Famille des Amis Adultes Rwanda bagize umwanya wo gusobanurirwa amateka ya Jenoside yakorewe Abatutsi mu 1994

Abanyamuryango ba Famille des Amis Adultes Rwanda bagize umwanya wo kunamira Abatutsi bashyinguye mu rwibutso rwa Jenoside rwa Kigali ruri ku Gisozi

Ni igikorwa gitegurwa mu rwego rwo gushimira abakozi ku bw'umurava n'imbaraga bashyira mu kazi. Byabereye mu birori byabaye mu byiciro bibiri, aho muri Hoteli Marriott ya Kigali byizihijwe kuva ku itariki ya 26-30 Gicurasi 2025 naho muri Four Points By Sheraton Kigali biba kuva ku itariki 2-6 Kamena 2025.

Buri munsi waranzwe n'ibikorwa bishimishije byo gushimira abakozi no kubaka umuco w'ubufatanye n'ubumwe.

Umuyobozi w'izo hoteli zombi, Aditya Chacko yabwiye aba bakozi ko bazirikana agaciro kabo mu bikorwa bya hoteli kuko badahari nta na kimwe cyashoboka.

Umuyobozi Mukuru w'Ikigo Marriott International Inc kibarizwamo ayo mahoteli, Tony Capuano, yavuze ko gusabana n'abakozi mu mahoteli y'icyo kigo ku Isi hose bihoraho mu rwego rwo kwishimana no kugaragaza ko babaha agaciro.

Ati 'Ku Isi hose abantu bacu turahura tugasangira ibihe byiza nk'ibi byo gusabana namwe, ibyo kugira icyo dutanga ku muryango mugari cyangwa twishimira ibyo twagezeho. Ingufu zubaka muduha no gukorana hagati yanyu n'intego z'amahoteli yacu ni byo bituma abakiliya batugana bakomeza kuhagirira ibihe bitibagirana.'

Iki cyumweru cyatangiranye n'umunsi wo kwiyitaho wiswe 'TakeCare Day', wibanze ku buzima n'imibereho myiza y'abakozi. Kuri uwo munsi, abayobozi basangiye amafunguro n'abakozi, banabashimira ibyo bagezeho.

Bukeye bwaho, umunsi wa kabiri wari wiswe 'Spirit to Serve Day' aho wahujwe na gahunda yiswe 'Serve 360' ishishikariza abakora muri Marriott International Inc gukora ibikorwa byo guteza imbere imibereho myiza y'umuryango mugari.

Kuri uwo munsi, abakozi ba Hoteli Marriott ya Kigali basuye Urugo Mbonezamikurire i Mageragere na ho aba Four Points by Sheraton basura ururi i Batsinda, batera inkunga gahunda ya UNICEF y'Igi Rimwe kuri buri Mwana.

Umunsi wakurikiyeho wahariwe Umuco n'Ubumwe aho wagarukaga ku bufatanye n'ubwuzuzanye biranga abakozi b'izo hoteli nubwo bakomoka mu mico itandukanye.

Abo bakozi bigabanyijemo amatsinda ashingiye ku mico itandukanye baturukamo, bambara imyambaro gakondo, babyina banaririmba muri gakondo banasangira ibiryo gakondo bagamije kwerekana ubwiza bw'imico itandukanye bafite kandi ko bubateye ishema.

Umunsi wakurikiyeho wari uwo kurushanwa, aho waranzwe no kurushanwa mu kwidagadura n'imikino.

Hakinwe volleyball ndetse banarushanwa kwerekana impano zirimo kuririmba, kubyina, imivugo n'ubugeni.

Umunsi wa gatanu ari na wo wa nyuma, abakora muri Hoteli Marriott ya Kigali bawizihirije kuri Malaika Garden naho abo muri Four Points by Sheraton bawizihiriza muri Kigali Universe.

Waranzwe n'imyidagaduro inyuranye irimo umuziki, urwenya, gusabana mu buryo bunyuranye, gutanga ibihembo ku bakozi n'ibindi byose bitari ukwishimira icyo cyumweru gusa, ahubwo no kwishimana muri rusange nk'abakozi ba Marriott International Inc.

Wari umunsi w’ibyishimo ku bayobozi n’abakozi

Abakozi bari babukereye

Bagize umwanya wo kuririmba no kubyina

Bagize umwanya wo gukina imikino itandukanye irimo volleyball

Habayeho n’umwanya wo gusangira mu rwego rwo kwishimira ibyagezweho

Habayeho umwanya wo kwidagadura mu buryo bwimbitse

Abakozi n’abayobozi bagize umwanya wo kwishimira ibyagezweho

Abakozi bari bambaye imyambaro igaragaza imico y’ibihugu bakomokamo

Abakozi ba Hoteli Marriot ya Kigali bafashe ifoto y’urwibutso

Abafite impano mu mikino itandukanye bagize umwanya wo kwerekana impano zabo

Aba bakozi bagize umwanya wo gusangiza abandi umuco wabo

Abakozi ba Hoteli Marriot ya Kigali bari bafite akanyamuneza

Ibyo yabigarutseho ku wa 10 Kamena 2025, mu gikorwa cyo kwibuka ku nshuro ya 31 Jenoside yakorewe Abatutsi cyari cyateguwe n'Impuzamiryango ya Rwanda Peace Partnership igizwe na Never Again Rwanda, Aegis Trust na Interpeace.

Minisitiri Dr. Bizimana yavuze ko imiryango itegamiye kuri leta yaba iyo mu Rwanda na mpuzamahanga kuva mu ikorwa rya Jenoside yakorewe Abatutsi na nyuma yayo itabaye nshyashya kuko bamwe mu bayibagamo na bo bari bafite ingengabitekerezo y'urwango.

Yatanze urugero ubwo mu gihe cya Jenoside yakorewe Abatutsi, i Bruxelles mu Bubiligi ku wa 21-22 Gicurasi 1994 habereye inama yarimo Abanyarwanda n'abanyamahanga bakoreye ONG mu Rwanda, bakora inama igamije kwiga ku byaberaga mu Rwanda n'icyakorwa.

Banzuye ko ibyabaga atari Jenoside ngo ahubwo ari intambara hagati y'ingabo za Leta na FPR Inkotanyi zikora ubwicanyi ku buryo bungana ndetse ko igikwiye gukorwa ari uko zombi zikwiye kuyihagarika.

Minisitiri Dr. Bizimana yagarutse ku rubyiruko rurimo abakomoka ku bakoze Jenoside yakorewe Abatutsi, biganje i Burayi bashinga imiryango igamije gutwikira ibyo ababyeyi babo basize bakoze mu Rwanda.

Ati 'Nka Jambo ASBL igizwe n'abana bakomoka ku bakoze Jenoside. […]. Bashaka uko babeshya ko habayeho Jenoside ebyiri, ko ubuyobozi bw'u Rwanda ari bubi na bwo bwica kugira ngo babashe guhisha ibyaha bya ba se.'

Yavuze ko bakoresha n'andi mayeri yo gushinga ONG bavuga ko zirengera Uburenganzira bwa Muntu bigatuma abaterankunga bazishimira ariko batazi imigambi y'abazishinze.

Yakomeje ati 'Badukanye noneho n'indi mvugo yo kubeshya ko barokotse Jenoside. Hari uwitwa Gatebuke Claude na mushiki we Gatebuke Alice baba muri Amerika bashinzeyo ONG yitwa AGLAN babeshya ko barokotse Jenoside.'

Yakomeje avuga ko ayo ari andi mayeri y'abashaka gupfobya Jenoside yakorewe Abatutsi kuko iyo biyise abarokotse Jenoside bituma abanyamahanga babagirira impuhwe bakabatega amatwi bakeka ko ari byo koko kandi ari ibinyoma.

Dr. Bizimana yavuze ko we ubwe yikoreye igenzura amenya ko ba Gatebuke bombi bavuka mu Karere ka Rutsiro ahahoze ari Komini Kayove ariko asanga mu muryango wabo nta mututsi wigeze abamo.

Minisitiri w'Ubumwe bw'Abanyarwanda n'Inshingano Mboneragihugu, Dr. Bizimana Jean Damascène yakebuye urubyiruko ruba mu mahanga rubeshya ko rwarokotse Jenoside yakorewe Abatutsi

Aba basore berekanywe kuri uyu wa 11 Kamena 2025, ku cyicaro cya Polisi mu Ntara y'Iburasirazuba. Batawe muri yombi ku wa Kabiri, nyuma yo guhigishwa uruhindu.

Bari bamaze imyaka itatu bakora ubu bujura, aho umukuru muri bo afite imyaka 26 na ho umuto akagira imyaka 19.

Umuvugizi wa Polisi y'u Rwanda mu Ntara y'Iburasirazuba, SP Twagirayezu Hamduni, yavuze ko aba basore batanu bari bafite itsinda ry'abantu batandatu bakoraga ibikorwa by'ubujura n'urugomo mu turere twa Gatsibo na Kayonza.

Yavuze ko babiri muri bo bavukana, undi akaba mubyara wabo ndetse n'abaturanyi babo babiri. Umwe muri bo ngo yatorokeye mu gihugu cya Uganda, aracyari gushakishwa.

Ati 'Bari bafite ibikorwa byo gutega abantu bakabambura kandi barabyiyemerera, babikoreraga hafi y'Akarere ka Kayonza aho bavuga ko babikoze inshuro eshanu, babikorera aho bita kwa Fururu inshuro eshanu no ku muhanda ujya i Ngoma no ku badivantisite ku muhanda ujya i Nyagatare.''

SP Twizeyimana yavuze ko ibi bikorwa byose babikoraga biyoberanyije bambaye impuzankano z'Abanyerondo n'intwaro gakondo zirimo imihoro, amapiki ndetse n'amabuye yo gutera abantu babaga baje gutabara.

Yavuze ko nk'uko babyiyemerera bagize uruhare mu bujura bwabaye mu Murenge wa Kiramuruzi tariki ya 22 Mata 2025 aho batoboye inzu ebyiri bahiba telefoni umunani na radiyo. Tariki 3 Gicurasi 2025 bibye mu Murenge wa Gahini ahazwi nka Video aho batwaye telefoni 150, mudasobwa banakomeretsa ushinzwe umutekano.

Ahandi hantu bibye telefoni 500 bamennye inzu, biba miliyoni 8 Frw banakomeretsa umuturage wari uje gutabara. Mu ntangiriro za Gicurasi bongeye kwiba kuri MTN Rwanda ishami rya Kayonza aho bahibye miliyoni 8 Frw banaterura umutamenwa wari urimo miliyoni 15 Frw banakomeretsa abaturage.

SP Twizeyimana yavuze ko baburira abantu bose bishora mu bikorwa bitemewe n'amategeko ko nta mahirwe bafite biturutse ku bufatanye bw'abaturage n'inzego z'umutekano abibutsa ko bazajya bafatwa bakabihanirwa.

Ati 'Ubutumwa duha abaturage twabashimira ku makuru bakomeje kuduha tukaburizamo abagizi ba nabi n'abanyabyaha, turakangurira abijandika mu bikorwa binyuranyije n'amategeko kubireka. Polisi turahari kandi ntabwo tuzabihanganira na rimwe abantu nibayoboke gukora imirimo inyuranye bave mu bujura.''

Ubu, aba basore bose uko ari batanu bahise bashyikirizwa Ubugenzacyaha kugira ngo bakorweho iperereza bazanagezwe mu nkiko.

Aba basore bari bamaze kwiba henshi muri Kayonza

Umuvugizi wa Polisi y'u Rwanda mu Ntara y'Iburasirazuba, SP Twagirayezu Hamduni, yavuze ko aba basore batanu bari bafite itsinda ry'abantu batandatu barimo abafitanye isano

Ubwo butumwa yabutangiye ku Rwibutso rwa Jenoside yakorewe Abatutsi rwa Kigali ku Gisozi ku mugoroba wo ku wa 10 Kamena 2025, mu gikorwa cyo kwibuka ku nshuro ya 31 Jenoside yakorewe Abatutsi.

Ni igikorwa cyari cyateguwe n'impuzamiryango yitwa Rwanda 'Peace Partnership' igizwe n'imiryango itatu itari iya Leta, iharanira kubaka amahoro, ari yo Inter Peace, Aegis Trust na Never Again Rwanda.

Cyabimburiwe no gusura ingoro y'amateka y'urugamba rwo guhagarika Jenoside iri mu Ngoro y'Inteko Ishinga Amategeko, nyuma gikomereza ku Rwibutso rwa Jenoside rwa Kigali.

Minisitiri Dr. Bizimana yabibukije ko u Rwanda ari igihugu gifite amateka yihariye by'umwihariko aya Jenoside ku buryo abafatanyabikorwa b'igihugu bakwiye kuyubaha.

Yanenze imwe mu miryango nterankunga idafata ibyo kwibuka Jenoside yakorewe Abatutsi nk'ikintu cy'ingenzi gikwiye kwitabwaho.

Ati 'Amateka y'u Rwanda yavuye kure kandi ntabwo ukuri kwayo mukwiye gutinya kukubakiraho […] Ndabivuga mbitsidagira kuko abaterankunga bafite umutima mwiza rwose ariko bashaka gusimbuka icyiciro cy'ukuri cyo kwibuka. Bashaka ko duhita tujya mu bikorwa byo kwiyunga kuko iyo Leta ishyizeho gahunda yo kwiyunga abaterankunga baza bihuta ariko waba ari umushinga wo kwibuka cyangwa uburezi bujyana na byo bagasubira inyuma.'

Dr. Bizimana yavuze ko ibyo ari nko gushaka gusimbuka igice cy'ingenzi kuko ubwiyunge butabaho budahereye mu mizi.

Ati 'Hari ukwiyunga kubera ko habayeho Jenoside kandi kugira ngo habeho ubwiyunge nyabwo binyura mu kuri. Ni ukuri kw'ibimenyetso by'amateka birimo no kwibuka ariko abaterankunga bacu ntabwo babikunda. N'iyo tuvuze ko dufite umushinga ujya kwigisha indangagaciro z'umuco nyarwanda kuko Jenoside yashobotse kuko zasenywe, na byo baratubwira ngo ni politiki. Ariko se ubundi politiki nziza yigisha itwaye iki?.'

Umuyobozi w'Umuryango Inter Peace mu Rwanda, Kayitare Frank, mu izina ry'iyo miryango itatu yahuje imbaraga, yavuze ko gufatanya nk'abigisha gahunda zo kubiba amahoro, bigamije kubafasha na bo kwiyubakamo amahoro.

Ati 'Abakora muri iyi miryango twashakaga ko basubiza amaso inyuma ntibibande gusa kuri gahunda dufasha abandi. Na bo ni Abanyarwanda duhuje amateka bamwe babonye Jenoside n'abavutse nyuma yayo. Twashakaga ko bafata umwanya wo kureba ibyo birirwa bafasha umuryango nyarwanda ngo babitekerezeho'

Kayitare yongeyeho ko ubudaheranwa mu Rwanda buri ku kigero cyiza mu muryango mugari ariko byagera ku muntu ku giti cye bikaba ku kigero cyo hasi ku buryo hakwiye gahunda nyinshi zifasha abantu kudaheranwa n'ibikomere ku giti cyabo.

Minisitiri Dr. Bizimana yanenze bamwe mu baterankunga b'u Rwanda badashyigikira ibijyanye no kwibuka Jenoside yakorewe Abatutsi

Umuyobozi w’Umuryango Inter Peace mu Rwanda, Kayitre Frank, ashyira ururabo ku mva

Zihinjishi Monique yatanze ubuhamya bw’inzira y’umusaraba yanyuzemo ngo arokoke Jenoside yakorewe Abatutsi

Bacanye urumuri rw’icyizere

Nyuma y’igikorwa cyo kwibuka bafashe ifoto y’urwibutso

Babanje gusura ingoro y’amateka y’urugamba rwo guhagarika Jenoside iri mu Ngoro y’Inteko Ishinga Amategeko

Raporo ya State of the Global Workplace igaragaza ko abakozi bangana na 21% ku Isi ari bo gusa bagira umwete mu kazi bakora, 62% ntibakiyumvamo, mu gihe 17% ari ba terera iyo.

Ibi umuhanga mu bijyanye n'imiyoborere mu bucuruzi, Matthew Mathison, mu kinyamakuru Enterprenuer yavuze ko bidaterwa n'ikibazo cy'imishahara cyangwa umutekano mu kazi, ahubwo biterwa n'ubusobanuro akazi gafite ku muntu.

Akomeza avuga ko abakozi benshi baba bashaka aho bumva ko bafite icyo bamaze n'aho akazi kabo gafite umumaro.

Yagize ati '50% by'abakozi baba bari gushaka akandi kazi, akazi gafite icyo gasobanuye mu buzima bwabo ndetse n'ibigo bakorera.'

Mathison kandi yavuze ko abakoresha benshi batekereza ko bereka abakozi babo intego, nyamara nyuma y'inama n'imihigo bumvikanyeho abakozi ntibongera kubona ba bayobozi babo mu bikorwa bya buri munsi mu kazi, ahubwo bongera kubabona babazwa aho ibyo bumvikanye bigeze, imyitwarire n'ibindi.

Mathison avuga ko ibyo bitera abakozi kudakunda akazi kabo, icyakora avuga ko n'abayobozi benshi bayobora ibigo nta mahugurwa cyangwa ubumenyi buhagije mu bijyanye no kuyobora abakozi baba bafite.

Yagize ati 'Ubushakashatsi bwa Gallup bwerekana ko 70% byo kugira ngo abakozi bishimire akazi biterwa n'umuyobozi, nyamara benshi muri abo bayobozi nta mahugurwa ahagije baba barahawe. Iyo umuyobozi adasobanukiwe neza intego y'akazi, n'abo ayobora ntibayisobanukirwa.'

Mathison yagaragaje ko gukundisha abakozi umurimo bitagoye kuko hari abandi bayobozi babikoze. Yavuze ko nk'umuyobozi, ukwiye kujya unyuzamo ukaganira n'abakozi bawe bitari ibijyanye n'akazi gusa, ahubwo n'ubuzima busanzwe kuko ari byo bituma bakwiyumvamo.

Akomeza avuga ko nyuma y'ibyo ukwiye kubereka akamaro k'imirimo bakora ndetse ukabibashimira, kuko ari bwo bazakora bafite intego kuko bazaba bazi icyo bari gukorera.

Agaragaza ko abakoresha cyangwa abayobozi babashije gukora ibyo ari bo bafite abakozi bishimiye akazi bakora kandi batanga umusaruro ufatika kuko bakora nk'abikorera.

Abayobozi ntabwo basabwa ibya mirenge kugira ngo bakundishe abakozi babo akazi, basabwa gusa kugirana umubano uhamye n'abakozi, ndetse bakabereka akamaro k'imirimo bakora, ubundi ibigo byabo bigatera imbere.

17% by’abakozi bakora akazi batiyumvamo na busa

Kuganira n’abakozi bizatuma bakwiyumbamo, ndetse bibakundishe imirimo bakora

Ibi byatangajwe ubwo hatangizwaga imurikabikorwa ry'iminsi ibiri ry'abafatanyabikorwa b'Akarere ka Kayonza 87, na bo biyemeje kugira uruhare muri iki gikorwa.

Umuyobozi w'Akarere ka Kayonza, Nyemazi John Bosco, yavuze ko kubaka no kuvugurura izi nzu z'abatishoboye batangiye kubifatanya n'abafatanyabikorwa aho bamwe bemeye amabati, abatanze amafaranga ndetse n'abemeye kuzajya bubaka inzu mu rwego rwo kwihutisha iki gikorwa.

Ati 'Twabaruye abaturage bagera kuri 249 badafite aho kuba ndetse n'inzu zigera kuri 371 zo kuvugurura. Ubu rero turimo gufatanya n'abaturage mu kureba ko twakubakira bariya baturage batishoboye.''

Umuyobozi w'abafatanyabikorwa mu iterambere mu Karere ka Kayonza, Gahigana Sam, yavuze ko muri iyi ngengo y'imari ya 2024/2025 bashoye arenga miliyari 7 Frw mu guteza imbere imibereho myiza y'abaturage.

Yavuze ko hari abafatanyabikorwa bishyurira abana amashuri, abigisha abaturage ubuhinzi n'ubworozi, abafasha mu buvuzi n'ibindi bikorwa bitandukanye bigamije kuzamura imibereho myiza y'abaturage.

SOS Rwanda nk'umwe mu bafatanyabikorwa, yahise itanga amabati 900 ku baturage batishoboye kugira ngo azabafashe mu kuvugurura inzu zabo.

Umuganwa Claudine utuye mu Murenge wa Gahini wahawe amabati 20 nyuma y'uko yari abayeho asembera, yavuze ko bigiye kumufasha mu kubona aho aba akareka gusembera.

Yagize ati 'Kubaho usembera, ufite abana batatu byari umutwaro unkomereye cyane, ubu rero bampaye amabati kandi ubuyobozi bwanambwiye ko buzamfasha mu kubaka, ndabashimiye cyane kuko bigiye kumfasha mu kwikura mu cyiciro cy'ubukene.''

Rwubahuka Sylvain ufite abana umunani we yagize ati 'Kuba nahawe amabati nabyishimiye cyane, nari ndi mu nzu ntoya kandi ishaje cyane ariko ndashimira ubuyobozi bwabonye ko nkeneye isakaro rishya, ubu nanjye ibindi birimo guhoma inzu yanjye ndabyikorera.''

Guverineri w'Intara y'Iburasirazuba, Pudence Rubingisa, yashimiye abafatanyabikorwa ku ruhare rwabo mu guteza imbere imibereho myiza y'abaturage cyane cyane mu guhanga imirimo mu rubyiruko, abasaba kandi gukomeza kwegera abaturage no kubafasha kwikura mu bukene.

Abafatanyabikorwa b’Akarere ka Kayonza bashimiwe ku ruhare bagira mu kuzamura imibereho myiza y’abaturage

Guverineri w’Intara y’Iburasirazuba, Pudence Rubingisa, yashimiye abafatanyabikorwa ba Kayonza

Bamwe mu baturage bahawe amabati