Blog

Myugariro mpuzamahanga w’umunyarwanda ukinira ikipe ya Urartu FC muri Armenia, Niriarike Salomon yamaze kongera amasezerano muri iyi kipe.

Muri Gashyantare uyu mwaka nibwo uyu mukinnyi ukina mu mutima w’ubwugarizi yatandukanye na FC Pyunik nayo yo muri iki gihugu ahita asinyira Urartu FC umwaka n’igice.

Amakuru avuga ko ubwo yasinyiraga iyi kipe nta mafaranga yahawe ahubwo bemeranyijwe umushahara, hanyuma y’amezi 6 yabona ikipe imwifuza akaba yakwigendera nta yandi mananiza ndetse na Urartu FC yaba ikimukeneye ikamugura maze uwo mwaka basinyanye akaba ari bwo utangira kugira agaciro.

Uyu myugariro wari mu biganiro n’amakipe yo muri Leta Zunze Ubumwe z’Abarabu, ikipe ye yamaze gutangaza ko yamaze kongera amasezerano.

Ibinyujije ku mbuga nkoranyambaga z’iyi kipe, yagize iti”myugariro n’ikipe bamaze kongera amasezerano.”

Ubwo ISIMBI yageragezaga kuvuga n’uyu mukinnyi, yavuze ko hari ibyo ahuguyemo k’uburyo bitamworohera gutangaza byinshi kuri iri sinya rye ariko yemeza ko koko yamaze kongera amasezerano.

Uyu myugariro ari mu Bubiligi aho ari kumwe n’umuryango we. Mu mezi 6 amaze muri iyi kipe yayifashije kurangiza k’umwanya wa 2 muri shampiyona babona itike yo kuzakina ijonjora rya UEFA Europa Conference League.

Nirisarike Salomon yamaze kongera amasezerano muri Urartu FC

Kale ni imboga ziboneka mu moko anyuranye, hari izifite ibibabi bikunjakunje, ibisa na mauve, ndetse n’izifite ibibabi birambuye neza. Gusa zose zihuza intungamubiri.

Zimwe mu mboga zihariye kandi zifite intungamubiri nyinshi ni imboga zo mu bwoko bw’amashu abenshi bamenyereye ku izina rya 'sukuma wiki' ariko zikaba zitwa 'Kale'.

Abantu benshi ubu bamaze gusobanukirwa ko kurya imboga ari ingenzi ku buzima dore ko zuzuye intungamubiri nyinshi nka za vitamin n’imyunyungugu inyuranye.

Nyamara burya nkuko no mu bantu bavukana bagira ibyo batandukaniraho byaba mu mico cyangwa imiterere niko no mu mboga bimeze aho buri bwoko, buba bufite umwihariko wabwo haba mu ntungamubiri no mu byo zimarira umubiri wacu.

Kurwanya kubyimbirwa

Kuba zikungahaye kuri ibi binure bya omega-3 na omega-6 ari byo bifatanyiriza hamwe bikabyara vitamin F, bituma ziba imboga nziza kuri ibi byo kubyimbura.

Nubwo ibinure bya omega-6 byonyine bishobora kuba byatera kubyimbirwa, ariko kuko izi mboga zinafite ibinure bya omega-3 birwanya kubyimbirwa bituma ziba imboga nziza mu kurwanya kubyimbirwa by’umwihariko ku bantu barya ibiryo byo mu nganda kimwe n’ibyatekeshejwe amavuta ya canola kuko harimo ibinure bya omega-6

Kurwanya ibyatera uburozi mu mubiri

Izi mboga za Kale zikungahaye kuri vitamin C na beta-carotene (ihindukamo vitamin A iyo igeze mu mubiri) zikaba ingenzi mu kurwanya ingaruka zaterwa n’ibisigazwa byatera indwara mu mubiri. Ibyo birimo uburozi cyangwa ubumara buba mu byo turya, umwuka duhumeka n’amazi tunywa. Ibi bikaba ari isoko y’indwara zinyuranye zirimo iz’umutima na za kanseri ndetse n’indwara z’amaso

Kurya izi mboga rero bikaba birwanya ibi byose kimwe n’indwara yo gususumira n’iyo kwibagirwa bikunze gufata abageze mu zabukuru

Gusukura

Akandi kamaro k’ingenzi k’izi mboga za sukumawiki ni uko kuzikoresha bifasha mu gusukura umubiri.

Ibi biterwa nuko izi mboga zikungahaye kuri isothiocyanates zikaba zituruka kuri glucosinolate zikaba zizwiho gusukura umubiri ku rwego rwo hejuru.

Imyanda n’uburozi biri mu isanzure nk’ibyo kurya byo mu nganda, ibihumanya ikirere, imiti yica udukoko n’imiti y’abantu igenda itakara hirya no hino nibyo byongera imyanda n’uburozi mu mubiri byose bikaba byongera ibyago byo kurwara

Ibi rero biba bigomba gukurwa mu mubiri. Ubwa mbere bikurwamo hakoreshejwe ibirwanya uburozi n’imyanda nyuma hagakoreshwa gusukura umubiri.

Gusa aha bisaba gukoresha izi mboga ukizisoroma kuko uko zitinda niko glucosinolates zigenda zigabanyuka ni nayo mapmvu Atari byiza kuzumisha cyangwa kuzibika igihe kinini muri firigo.

Gufasha umutima

Abahanga mu mirire bemeza ko imboga zose zifite ibara ryijimye cyane ziba zishobora gusukura umubiri zikanakuramo uburozi zikanawurinda kubyimbirwa

Ibi rero byose nibyo bituma izi mboga ziba nziza mu gufasha mu mikorere y’umutima

By’umwihariko kuba zikungahaye kuri vitamin K na E bituma ziba nziza mu mikorere yose y’umutima. Ndetse zinafasha mu kugabanya igipimo cya cholesterol mbi aho zituma cholesterol nziza yiyongera ku gipimo cya 27%

Gukura k’ubwonko ku mwana

Nkuko imboga zose muri rusange zizwiho kurwanya kanseri, kale nayo irwanya kanseri kandi ikayibuza gukura.

Ibi biterwa nuko izi mboga zikize kuri glucosinolates. Izi rero uko uhekenya izi mboga zigenda zihindurwamo ibinyabutabire binyuranye birwanya kanseri muri byo twavuga:indoles, thiocyanatess na isothiocyanates. Bikaba birwanya by’umwihariko kanseri y’uruhago, iy’amabere, iy’amara, iy’umwijima, iy’ibihaha n’iy’igifu.

Kureba neza

Izi mboga kandi zifasha amaso gukora neza. Kuriya zijimye biterwa nuko zikungahaye kuri lutein na zeaxanthin bizwiho kurinda amaso kangirika, kuzaho igihu no gusaza.

Si ibyo gusa kuko binarinda ingaruka ziterwa n’imirasire mibi y’izuba zishobora kwangiza amaso.

Kandi kuba zirimo vitamin A bituma ziba imboga nziza mu kurinda ubuhumyi bw’amaso cyane cyane ubuza nijoro.

Icyitonderwa

Izi mboga zikize cyane kuri vitamini K (ku gipimo kirenga 600% y’icyenewe ku munsi). Ibi bituma kuzirya mu gihe ufite ikibazo cy’amaraso adatembera neza cyane cyane nk’abatuye ahantu hakonja cyane atari byiza kuko bishobora gutuma amaraso afatana ntatembere neza.

Kuko zirimo soufre, ni byiza kuzirya zitetse cyane kugirango igabanyuke. Niba ushaka kuzirya nka salade, wakoresha nkeya nabwo gacye mu cyumweru

Ku barwaye umwingo ntibyemewe kurya izi mboga.

srce: umutihealth.net

[email protected]

Umuyobozi wa APR FC, Lt Gen Mubarakh Muganga avuga ko iyi kipe y’ingabo z’igihugu aho gutakaza ikinyabupfura(discipline), batakaza igikombe, ni nyuma y’imyitwarire mibi yaranze Niyonzima Olivier Seif byatumye adakina umukino wa Police FC.

Ku wa Gatandatu nibwo inkuru yamenyekanye ko Niyonzima Olivier yasohotse umwihirero wa APR FC nta ruhushya, agarukamo yasinze bahita bamusaba gusubira mu rugo iwe.

Icyo gihe umunyamabanga wa APR FC yemereye ISIMBI ko ari byo ndetse uyu musore yanditse asaba imbabazi kubera amakosa yakoze.

Abantu benshi batanganjwe n’uburyo iyi kipe yahagaritse uyu mukinnyi ngenderwaho kandi bafite umukino na Police FC(wabaye ejo hashize ku cyumweru bawutsinda 3-0).

Mu butumwa yageneye itangazamakuru yanyujije kuri Radio Flash na Radio 10, umuyobozi wa APR FC yavuze ko nk’ikipe ya gisirikare ikintu cya mbere kibaranga ari ikinyabupfura k’uburyo aho kukibura bakwemera n’igikombe kikagenda.

Yagize ati'Twibutsa kenshi abakozi n’abakinnyi ba APR FC ko ari ikipe y’Ingabo z’Igihugu (RDF) bityo basabwa kurangwa na discipline(ikinyabupfura) mbere y’ibindi byose. Aho Ikipe y’Ingabo itandukanira n’izindi ni uko bibaye ngombwa twakwemera gutakaza Igikombe ariko tudatakaje discipline.'

Yakomeje avuga ko umukino w’iyi kipe ushingira ku bakinnyi nk’ikipe udashingira k’umuntu ku giti cye cyane ko hari n’abakinnyi benshi batandukanye ariko ikipe igakomeza kwitwara neza.

Ati'Nsoze mvuga ko APR FC umukino wayo ushingira ku bakinnyi bose nk’ikipe ntabwo ari k’umukinnyi runaka. Sinifuje kujya mu mazina y’abakinnyi twatandukanye vuba aha, ariko ikipe ikomeza gutsinda. N’umukino twaraye dukinnye Seif atarimo umwanya we nta cyuho wagaragayemo.”

Kuri iki kibazo kandi hahise havuka n’ikindi cy’uko uyu mukinnyi yaba afitanye ibibazo n’umutoza Adil Erradi ndetse na Mupenzi Eto’o ushinzwe kugurira iyi kipe abakinnyi aho ngo yabwiye uyu mukinnyi ko azahabwa amafaranga make ubwo azaba agiye kongererwa amasezerano cyane ko ari ku mpera z’amasezerano ye.

Uyu mukinnyi ngo ntabwo yishimiye amafaranga yabwiwe azahabwa ndetse ngo ni nabyo byatumye atangira kwigumura ku ikipe.

Kuri iyi ngingo yagize ati”Numvise muteguza abumva radio yanyu ko ngo hari ahamaze iminsi hari bombori bombori none ngo yimukiye Shyorongi muri APR, ndagira ngo mbamenyeshe ko iyo nkuru atari yo(aha yavugaga radio Flash FM). Nsabe ko muntumikira;”

'Mwageze n’aho muvuga ko ngo uwo mwuka mubi uri hagati y’umutoza Adil, Team Scout Eto’o n’umukinnyi Seif? Ibyo muvuga si ko bimeze. Ikibazo kibaye kimwe n’ibindi byavuka bikurikiranwa kandi bigakemurwa na management n’ubuyobozi bwa APR. Ikibazo cya Olivier Seif yatorotse umwiherero turabimenya tumufatira ibihano.'

Yasabye itangazamakuru kuvuga ibitagenda neza muri ruhago y’u Rwanda mu buryo bw’ubaka, abakinnyi bakora nabi bakabagira inama nzima.

Niyonzima Olivier Seif yahagaritswe kubera gutoroka umwiherero

Lt Gen Mubarakh Muganga avuga ko aho kugira ngo APR FC itakaze ikinyabupfura yatakaza igikombe

Melyse Irankunda umurundikazi ubarizwa mu gihugu cya Suede, yaranzwe no kujarajara aho yafatanyaga gutambira Imana no kurara mu tubyiniro atambira umwami w’umwijima. Yabaye akazuyazi igihe kinini, ariko Uwiteka yaje kumusanga amwemeza iby’ibyaha bye, arihana amesa kamwe ndetse ahabwa ubutumwa agomba kugeza ku batuye isi.

Mubyukuri abantu benshi bari mu gihirahiro kuko ikirenge kimwe kiri kwa Satani naho ikindi kirenge kiri ku Mana. Ni muri urwo rwego Irankunda Melyse agiye kudusangiza ubuhamya bw’ibyamubayeho aho yakezaga abami babiri.

Ati: 'Nakuriye mu muryango udakijijwe, ngeze mu gihe cy’ubwangavu (adolescence) nashatse kujya gusengera mu bakizwa, ariko ari ukugendera mu kigare kuko nta rusengero na rumwe rw’iwacu i Burundi ntagezemo (Eglise Vivante n’ahandi henshi). Ubwo buzima nabubayemo kugeza igihe mviriye i Burundi nkajya muri Suede ndetse naho ngezeyo narabikomeje.

Numvaga kujya mu nzu y’Imana binejeje ariko ntacyo nahakuraga kuko navaga mu rusengero kuramya Imana ngahita njya mu kabyiniro (boite de nuit) akabyiniro kari kamboshye cyane. Icyakora Imana yari yarantoranyije kandi yari izi ko igihe runaka izankoresha. Yarandetse nca muri ubwo buzima kugira ngo ubuhamya bwanjye buzafashe benshi.

Nzi imirimo yawe, yuko udakonje kandi ntubire. Iyaba wari ukonje cyangwa wari ubize! Nuko rero kuko uri akazuyazi udakonje ntubire, ngiye kukuruka (Ibyahishuwe 3:15, 16). Njyewe nari akazuyazi kuko navaga gutambira Umwami w’abami nkarara ntambira umwami w’umwijima, ariko maze kugera muri Suede Imana yarandutse kuko bitewe no kudatinya icyaha nakundanye n’umuntu birangira ntwite. Mubyukuri ariko Imana yanyatse amahoro yo mu mutima, mbura umunzero kandi ndi ahantu dufite inzu yacu, akazi keza n’ibindi byose.

Imana yanyatse umunezero kugira ngo ibanze inshishe mu ishuri impindure. Ikimara kunduka na ka kaguru kari mu nzu y’Imana nagakuyemo ntangira gukora ibindi byaha bidasanzwe harimo no kunywa inzoga kugira ngo nshake ikintu cyangarurira umunezero sinawubona'.

Imana kuko yari imufiteho umugambi yaramurwaniriye, ndetse imuha agakiza nk’uko Melyse abisobanura

Ati: 'Igihe kimwe Imana yantumyeho umukozi wayo ambwira amagambo akurikira:

Imana yakunyeretse ndi ku musozi mbona isura yawe irambwira ngo nkubwire ngo va muri ibyo bintu urimo, wowe uri umukozi wayo iragushaka. Akimara kumbwira ibyo byose numvise ubwoba mu mutima numva n’ijwi rimbaza ngo Melyse nk’ubu upfuye ikibanza cyawe ni ikihe hagati y’umuriro n’ijuru? Njyewe sinri nzi uko Imana ivuga ariko nahise ngira ubwoba ndavuga ngo Mana ndashaka ijuru. Ijwi ryagarutse mu mutima rimbwira ngo niba ushaka ijuru rikorere.

Icyo gihe sinasubiye kureba inyuma nahise ngira ubwoba cyane bw’uko napfa nkajya mu muriro. Aho ni ho nari ntangiye urugendo rwo guhinduka kuko igitambaro cyari ku maso yanjye cyari kivuyeho ntangira kugira inyota yo gusoma Ijambo ry’Imana no kuyishakana umwete. Imana nayo yambereye umubyeyi iranyiyereka kuko uko naryamaga ni ko numvaga Imana inganiriza. Mu matorero yose nagendagamo nari naranze umubatizo, ariko nkimara guhinduka nahise nashaka kubatizwa kugira ngo mbabarirwe ibyaha byanjye mbe icyaremwe gishya.

Ku itariki ya 1 Kamena 2016 ni ho nakiriye umubatizo. Kuva icyo gihe Imana nayibonye ukundi kuntu kuko napfaga gusinzira gato nkumva ijwi ry’Imana. Mu kwezi kwa 10 mu 2016 twagize amasengesho ya nijoro twitegura Noheri maze umukozi w’Imana afata abantu icumi ngirirwa ubuntu bwo kubamo kuko nari nunamye numva bari kunkomanga. Tukimara kugera imbere yaratubwiye ngo umuntu wese asabe icyo ashaka. Angezeho numvise ijwi rinzamutsemo ndatura ngo nshaka unkoreshe, nshaka unkoreshe. Nahise nikubita hasi banshubije kwicara narushye.

Kuva icyo gihe Imana yatangiye kunyiyereka ku buryo budasanzwe naba ndi nko mu modoka nkumva Ijambo ry’Imana riraje. Mbese aho nabaga ndi hose numvaga insanganyamatsiko ije. Iyo Imana yangendereraga amarira yarazaga nkibaza icyo abantu bibaza ko nabaye.

Byageze aho Imana intumaho umukozi w’Imana ambwira ko ubuhamya bwanjye bugiye gukiza benshi. Imana yampaye ubutumwa buvuga ngo abantu biyambure igikote cy’umukara (le menteau noire) kandi bwahinduye benshi. Yanyerekaga abantu batatu: Umuntu wambaye ikoti ry’umukara hose, ikanyereka n’undi wambaye ikoti ry’umukara ku rutugu rumwe, ikanyereka n’undi iryo koti ry’umukara riri hasi, ariko Imana ikambwira ngo nibande kuwambaye umukara igihande kimwe ngo kuko uwo muntu ari akazuyazi (ari mu nzu y’Imana ariko byamunaniye kwinjiramo burundu).

Ubwo buhamya bwanjye rero yavugaga naje gutahura ko ari bwa buzima nari mbayemo aho nabaga ndi mu nzu y’Imana ariko ndi no mu busambanyi n’ibindi byaha bitandukanye. Imana rero yarambwiye ngo nibande ku muntu wambaye igikoti uruhande rumwe kuko we aba ari hagati, yabwiwe Yesu ndetse azi icyaha, ariko abirengaho agakora ibyaha kandi yarabwiwe Ijambo ry’Imana. Naho umuntu wambaye igikote hose aba afite aho abarizwa ni kwa Satani, ashobora kuba atarumva Ijambo ry’Imana. Yarantumye ngo uwo wataye igikoti hasi nakomeze urugendo rwe akomeze gukiranukira Imana, ariko akomeze gusenga kuko abadayimoni bo baba bagerageza kongera kumwambika icyo gikote'.

Asoza ubuhamya bwe, Irankunda Melyse arashima Imana ko yamuhaye agakiza ikamuvana mu buzima bwo kuba akazuyazi, Si ibyo gusa, ahubwo arashima Imana ko yamuhaye umwanya wo gutanga ubu buhamya kuko yawuutegereje igihe kinini ariko Imana ikamubwira ko igihe cye kitaragera. Yagerageje kwicira inzira biranga, ariko iyo isaha y’Imana igeze byose biratungana. Aboneraho kandi guhwitura abantu b’akazuyazi cyangwa bakorera Imana na Satani icyarimwe ko bakwiriye guhindukira bagasanga Yesu akabaha agakiza bakaba abaragwa mu bwami bw’Imana.

Source:Himbaza tv

[email protected]

.

Iyi foto ya Shaddyboo ari kumwe n’Umunyarwenya wo muri Mali witwa Mohamed Nantoume uzwi nka Grand M bari kumwe bambaye imyenda y’umutuku bigaragaza ko uyu Munyarwandakazi yishimye.

Ni ifoto yashyize kuri Twitter arangije ashyiraho amagambo mu cyongereza agira ati 'My Crush (cyangwa se uwo nifuje kubona).

Ubusanzwe iri jambo mu Rwanda rikunze gukoreshwa iyo umuntu ashaka kugaragaza ko hari umuntu warashe umutima we akaba yaramukunze.

Bamwe mu batanze ibitekerezo kuri iriya foto, bavuze ko uyu mukobwa akomeje kwamamara kubera guhura n’ibyamamare nk’ibi.

UKWEZI.RW

Ibisigaye bene Data, iby’ukuri byose, ibyo kubahwa byose, ibyo gukiranuka byose, ibiboneye byose, iby’igikundiro byose n’ibishimwa byose, nihaba hariho ingeso nziza kandi hakabaho ishimwe abe ari byo mwibwira. Abafilipi 4:8

Imana yaduhamagariye gukora ibintu bifite ubwiza. Inyigisho za Yesu aho zatandukaniraga n’abafarisayo ni uko bo bakoraga ibintu byiza ariko by’inyuma bidahereye imbere mu mutima.

Yesu rero yaduhamagariye kugira ubwiza buhereye imbere mu mutima bukagera n’inyuma, ibi bishatse kuvuga ko iyo urebye ubwiza bw’ihema inyuma ntiryari rishimishije cyane ariko imbere ryarimo zahabu, warahageraga ugatangara. Abafarisayo bo barebaga ko wambaye imyenda 5, ko wiyirije 2 mu cyumweru…, bakareba ko wubahirije amategeko ariko imbere mu mutima hatitaweho. Niyo mpamvu Yesu yabarebye akabagaya akabwira abigishwa ngo 'Gukiranuka kwanyu nikutaruta ukw’Abafarisayo n’Abanditsi ntimuzinjira mu bwami bw’Imana.

Kugeza uyu munsi, aha niho inyigisho z’amatorero n’amadini amwe namwe zitandukanira n’inyigisho za Yesu, kuko mu matorero abantu bareba ko wubahiriza gahunda, ko utanga kimwe mu icumi…, ariko kuko badafite ubushobozi bwo kureba imbere mu mutima rimwe na rimwe ibyo by’inyuma birabemeza. Yesu we kugira ngo akwemere abanza kureba uko utunganye imbere mu mutima. Ihema rero ryagombaga kuba rifite ubwiza imbere, n’umutambyi yagombaga kuba yambaye neza kuva imbere kugeza inyuma. Na Mose nawe muribuka ageze ku musozi, yamanukanye ubwiza butuma badashobora gutinyuka kumureba.

Nagira ngo mbabwire ko Imana yifuza ko twiga gukorera mu bwiza, kandi ibintu bishimishije bifite umwuzuro uhagije. Iyo ubwiza bwahereye inyuma akenshi ntibushobora kugera imbere, ariko iyo bwahereye mu mwuka, mu bugingo n’inyuma mu mubiri birushaho kuba byiza.

Iyo ibintu bikozwe neza abantu barabimenya: Iyo korari ihagaze ku ruhimbi iririmba, abantu bamenya ko ifite ubwiza bw’Imana, iyo umuntu arimo arigisha ijambo ry’Imana ari ku ruhimbi iteraniro rimenya ko hariho ubwiza bw’Imana. Niyo ari ibintu bisanzwe gusa inyuma imbere nta mpinduka, nabwo abantu barabimenya. Dukwiye kwiga gukorera ibintu mu bwiza bwabyo, niba ari ukuririmba, gusenga, na ya mirimo mito mito nko ku rusenhero nayo ukwiye kuyikora wayisengeye kugira ngo ibe ifite ubwiza bw’Imana buyiherekeje. Bibiliya iravuga ngo 'Umukiranutsi ibyo azakora byose bizamubera byiza! Dukwiye kubahisha Imana ubwenge bwacu, imirimo yacu ya buri munsi, ibintu byose ukora ukabikora bifite ubwiza bw’Imana bubiherekeje.

Nagirango nkubaze: Imirimo ukora, serivise utanga ya buri munsi aho ucururiza, ku ishuri aho wiga, mu kazi k’umutekano ukora, mu gufasha abaturage mu buzima bwa buri munsi, abantu bakubonana ubwiza bw’Imana? Iyo bakubonye babona ukora ibintu mu bwiza bwabyo ukabikora ku kigero kiri hejuru? Ese uzi ko aho hantu uhagarariye ubwami bw’Imana?

Bibiliya yatubwiye ngo 'Iby’ukuri byose’, ntuzakore ikintu gihabanye n’ukuri kandi ukore ibyo kubahwa umuntu wese yareba nubwo ataba azi ko ukijijwe(uri umurokore) akvuga ati ibi bintu biyobowe n’izindi mbaraga tutazi. Ibyo kandi ukabikorera mu gukiranuka, hari ubwo abantu bakiranirwa ku tuntu duto umuntu akebeshya.

Hari ubwo abantu bigishwa ko imirimo y’Imana ikorerw mu rusengero, ariko ahantu hose Imana yagushyize ushobora kuhahagarariza ubwami bw’Imana: Imana ifite inyota y’abantu baba bafite icyubahiro bakaba bahagarariye ubwami bw’Imana,

Imana ifite inyota y’abantu baba abacuruzi bakuru bakaba bahagarariye ubwami bw’Imana. Umwanya wose Imana izagushyiramo, aho izagutuza hose Imana yifuza ko uba uhagarariye ubwami bw’Imana. Iby’igikundiro, iby’icyubahiro byose, niba hari ugushimwa Imana ikwiye guhabwa icyubahiro.

Pastor Desire niwe watambukije iyi nyigisho mu kiganiro 'Ubutumwa bukiza’, kuri agakiza Tv

[email protected]

Iki cyifuzo bagitanze ubwo abayobozi b'Akarere ka Huye n'inama njyanama y'aka karere basuraga imirenge itandukanye bagenzura uko imihigo ishyirwa mu bikorwa n'inyungu bizanira abaturage.

Bamwe mu bivuriza kuri Poste de Santé ya Kimirehe iherereye mu Murenge wa Rusatira, babwiye aba bayobozi ko bishimira kuba batagikora urugendo rurerure bajya gushaka serivisi z'ubuvuzi.

Uwihoreye Théodomire ati 'Guturuka aho dutuye kugera i Rusatira ni kure ni nk'amasaha abiri cyangwa atatu n'amaguru, kujya kwivurizayo byaratugoraga umuntu akagerayo yarembye. Iri vuriro batwegereje ridufitiye akamaro kuko twivuriza hafi.'

Mu byifuzo byabo basaba ko serivisi bahabwa ku manywa bajya bazihabwa na nijoro kugira ngo urwaye avurwe atararemba.

Umuhoza Devotha ati 'Bakora ku manywa gusa nimugoroba bagahita bataha, umuntu iyo arwaye nijoro ntabwo yabona uko yivuza. Twifuza ko na nijoro bajya bavura.'

Umuforomo kuri Poste de Santé ya Kimirehe, Mukabarisa Marcelle yavuze ko na bo byabashimisha bashyiriweho uburyo bwo kunoza serivisi baha ababagana bakajya babavura na nijoro.

Ati 'Birumvikana ko iyo umuntu aje hano nijoro agasanga twafunze aba abangamiwe. Bibaye ngombwa ikabaho [serivisi yo kuvura nijoro] byanshimisha kuko aba baturage niba nshinzwe kubafasha na nijoro byaba byiza tugiye tubavura.'

Umuyobozi w'Akarere ka Huye, Sebutege Ange, yavuze ko imikorere ya Poste de Santé igengwa na Minisiteri y'ubuzima kandi batarazemerera gukora nijoro, yemeza ko mu gihe bagitegereje ko hatangwa amabwiriza mashya bari gukora ibishoboka kugira ngo ibigo nderabuzima byose bihabwe imbangukiragutabara zajya kuzana umuntu wese warwara nijoro.

Ati 'Ahubwo icyo turimo gukora ni uguha ibigo nderabuzima imbangukiragutabara ku buryo umuturage ufite ubwisungane mu kwivuza yaba yagize ikibazo cyo kwivuza muri ya masaha bigoranye, yamufata ikamujyana kwivuza byoroshye.'

Kugeza ubu mu Karere ka Huye hari postes de santé 30 ariko intego ni uko hazubakwa izindi 15. Buri mwaka zishyirwa mu ngengo y'imari bijyanye n'ubushobozi buhari. Muri uyu mwaka hamaze kubakwa ebyiri.

Mu Karere ka Huye hari imbangukiragutabara zirindwi, ariko ubuyobozi buvuga ko zidahagije, bityo uko ubushobozi bubonetse hazajya hagurwa izindi ku buryo buri kigo nderabuzima kizagira iyacyo mu rwego rwo guha abaturage serivisi nziza z'ubuzima.

Abivuriza kuri Postes de Santé bifuza ko zibaha serivisi na nijoro

Umuyobozi w'Akarere ka Huye, Sebutege Ange, aganira na bamwe mu baje kwivuriza kuri Poste de Santé ya Kimirehe

Umuforomo kuri Poste de Santé ya Kimirehe, Mukabarisa Marcelle, yavuze ko nabo byabashimisha bashyiriweho uburyo bwo kunoza serivisi baha ababagana bakajya babavura na nijoro

Umuyobozi w'Akarere ka Huye, Sebutege Ange yavuze ko bari gukora ibishoboka kugira ngo ibigo nderabuzima byose bihabwe imbangukiragutabara zajya kuzana umuntu wese warwara nijoro

[email protected]