Blog

Ibi Umukuru w’Igihugu yabigarutseho mu Ihuriro rya ‘Qatar Economic Forum’, ryagarutse ku ngingo zitandukanye, ziganisha ku miterere y’ubuyobozi mu bihe bizakurikira icyorezo cya Covid-19.

Perezida Kagame yabajijwe icyo atekereza ku ‘mbabazi’ Perezida Macron yasabiye mu ruzindiko rw’iminsi ibiri yagiriye mu Rwanda rwatangiye kuwa 27 Gicurasi uyu mwaka.

Muri urwo ruzindiko rw’amateka, Perezida Macron ‘yemeye uruhare’ igihugu cye cyagize mu mateka mabi ya Jenoside yakorewe Abatutsi mu 1994.

Icyo gihe yaragize ati “Kwemera aya mateka n’uruhare rwacu, ni ikimenyetso kidashidikanywaho. Tubikoze ku bushake, tubyikorera. Ni umwenda ku nzirakarengane nyuma y’igihe kirekire ducecetse. Ni impano ku bakiriho bagifite ububabare baramutse babitwemereye, twafatanya kubagabanyiriza umubabaro.”

Perezida Kagame yavuze ko muri rusange uruzindiko rwa Macron mu Rwanda rutari rugamije gusaba imbabazi gusa, ahubwo ko rwari rugamije “Kugaragaza ukuri” ku mateka yabaye mu Rwanda.

Yagize ati “Ibi byari ingenzi cyane bitari ukubera gusa imbabazi, ahubwo kubera [kugaragaza] ukuri kw’ibyabaye. Ku ruhande rw’ukuri, kwemera uru ruhare byari ingenzi cyane.”

Perezida Kagame yasobanuye ko impamvu kwemera uruhare rw’u Bufaransa muri Jenoside byari ingenzi cyane, ari uko bizarushaho kwemeza abantu ko Jenoside yakorewe Abatutsi yabayeho, bityo bigaca intege abagifite umugambi wo kuyihakana no kuyipfobya.

Yagize ati “Byari ingirakamaro kuko mu myaka yashize, twabonye ubwiyongere bwo guhakana no gupfobya Jenoside. Imvugo zitandukanye [kuri Jenoside] zaradutse, ubona ko zigamije kurema andi mateka. U Bufaransa bwabigizemo uruhar, ntekerezo kuba Macron yaremeye uruhare rw’u Bufaransa bifasha mu kugenzura ibi bikorwa bibi tumaze imyaka tubona.”

Perezida Kagame yavuze ko uko umubano w’u Bufaransa n’u Rwanda uzarushaho gutera imbere, bijyanye n’uku kuri kwagiye hanze, “twakwitega kubona ubufatanye” mu nzego zitandukanye, ashimangira ko u Rwanda rurajwe ishinga no kubaka umubano mwiza n’u Bufaransa aganisha impande zombi ku iterambere.

Ati “Twiteze kubona ishoramari rihuriweho mu ngeri z’ingenzi z’iterambere ry’u Rwanda kandi birangira bigiriye inyungu n’u Bufaransa. Ubufatanye ni ingenzi cyane, turashaka kubwubakiraho tugasiga aya mateka mabi yacu inyuma hanyuma tukareba imbere. Ibyo ni byo u Rwanda ruhanze amaso.”

Perezida Kagame yagarutse ku zindi ngingo zirimo ishoramari, avuga ko “Afurika ikeneye umutekano” kugira ngo abashoramari bagire icyizere cyo kuzana umutungo wabo muri Afurika.

Umukuru w’Igihugu kandi yavuze Amasezerano y’Isoko Rusange rya Afurika azafasha mu kuzamura umusaruro w’ubucuruzi imbere mu bihugu bya Afurika.

Perezida Kagame yavuze ko uruzindiko rwa Perezida Macron w’u Bufaransa mu Rwanda rwashimangiye ukuri kw’amateka ya Jenoside yakorewe Abatutsi mu 1994

Kuri uyu wa 22 Kemena 2021 nibwo urubanza rwa Idamange Iryamugwiza Yvonne ukurikiranyweho ibyaha birimo guteza imvururu cyangwa imidugararo muri rubanda rwasubukuwe nyuma y’uko ku wa 15 Kamena 2021 rwari rwasubitswe nyuma y’uko uyu mugore avuze ko agiye koga ariko urukiko rukamutegereza rukamubura.

Iburanisha ryatangiye ahagana saa Tatu. Ubushinjacyaha butangira busaba umwanya kugira ngo bugire icyifuzo bugeza ku Nteko iburanisha mbere y’uko urubanza rutangira.

Ubushinjacyaha bwavuze ko bwifuza ko urubanza rwa Idamange ruburanishirizwa mu muhezo rubishingiye ku mpamvu zitandukanye zirimo n’imiterere y’ibyaha Idamange aregwa.

Ubushinjacyaha bwakomeje buvuga ko kuburanisha Idamange mu ruhame byamubera urubuga rwo gukomeza kugaragaza imyitwarire idahwitse.

Buti “Ubushinjacyaha bufite impungenge ko iburanisha ry’uru rubanza mu ruhame ryabera Iryamugwiza Idamange yvonne urubuga rwo gukomeza ibikorwa bye byo gupfobya Jenoside, kwamamaza ibihuha ndetse no gukomeza icengezamatwara rye ryo kwangisha Leta abaturage ndetse n’ubuyobozi n’abayobozi.”

Bwasabye ko ku nyungu za rubanda Idamange yaburanishirizwa mu muhezo. Buti “Ku nyungu z’umutekano no kunyungu z’umudendezo wa rubanda dusanga uru rubanza rwaburanishirizwa mu muhezo mu rwego rwo kurengera uwo mudendezo w’abaturage n’umutekano w’abaturage ndetse no gukomeza gushimangira ubumwe bw’abaturage.”

Uruhande rwa Idamange ntirubikozwa

Idamange Iryamugwiza Yvonne ahawe umwanya ngo avuge ku cyifuzo cy’ubushinjacyaha, yavuze ko bidashoboka ko yaburanishirizwa mu muhezo kuko ngo ibyaha akurikiranyweho yabikoreye mu ruhame.

Ati “Kugira ngo urukiko rumpamagare mu ruhame runabigaragaze mu nyandiko ningera mu rukiko umushinjacyaha asabe ko mburanishwa mu muhezo ntabwo bibaho. Cyane cyane ko ibyaha muvuga ko nakoze bigaragara ko nabikoze mu ruhame kandi mwandeze mu ruhame. Ntabwo numva uburyo uyu munsi najya kuburana bakamburanishiriza mu muhezo.Ntabwo njye nakwemera kuburanishirizwa mu muhezo.”

Abunganizi ba Idamange bahawe umwanya bavuze ko icyifuzo cy’ubushinjacyaha kinyuranyije n’amategeko ngo kuko kuba urubanza rwaburanishirizwa mu muhezo bifatwaho icyemezo n’urukiko.

Abunganira Idamange bakomeje bavuga ko icyifuzo cy’ubushinjacyaha kitarimo ubunyamwuga ngo kuko cyaje gitunguranye.

Uhagarariye Ubushinjacyaha yongeye guhabwa umwanya avuga nta bunyamwuga buke buri mu busabe bwabo ngo kuko iki cyifuzo cy’uko uru rubanza rwaburanishirizwa mu muhezo bagishyize mu ikoranabuhanga ry’urukiko ku wa 21 Kamena 2021.

Ibi bisobanuro by’ubushinjacyaha ntibyakiriwe neza n’abunganira Idamange bavuze ko n’ubundi iki gihe ubushinjacyaha bwabishyiriyemo bwari bwatinze, bavuga ko kwemera icyifuzo cy’Ubushinjacyaha bishobora gutera ingaruka z’uko urubanza ruburanishwa mu buryo butandukanye n’uko rukwiye kuburanishwa.

Nyuma yo kumva impande zombi Inteko Iburanisha yafashe umwanya wo kwiherera kugira ngo ifate umwanzuro kuri iki cyifuzo cy’Ubushinjacyaha.

Inkuru irambuye irabageraho mukanya….

Mu gihe mu gihugu hakomeje kugaragara umubare munini w’abantu bandura Covid-19, hagenda hagaragara abantu bafashe ingo batuyemo bakazihindura utubari birinda ko bahanwa kuko tutigeze twemererwa gukora kuva yagera mu Rwanda muri Werurwe 2020.

Mu kiganiro Minisitiri Gatabazi yagiranye na RBA, yavuze ko ubu hagiye gukazwa ingamba n’ibihano ku bantu bahinduye ingo zabo utubari.

Yagize ati “Hari icyo dushaka kugarukaho n’abayobozi mu nzego z’ibanze babyumve n’izindi nzego dukorana, hari abantu bafashe ingo zabo bazihindura utubari ngo ntizafungwa, ubu tugiye kujya tuzifunga kugeza ubwo Covid-19 izaba irangiye. Icyo tubasaba nibirinde icyorezo kimeze nabi.”

Muri iki kiganiro Minisitiri w’Ubuzima Dr Daniel Ngamije yavuze ko nubwo mu Rwanda hataragaragara ubwoko bwa Covid-19 bumaze igihe bwumvikana mu Buhinde bwamaze no kugera mu bihugu byo mu karere, abanyarwanda badakwiye kwirara na gato kuko bwandura vuba kurusha ubwari busanzwe.

Yagize ati “Kugeza ubu mu Rwanda ubwoko bwagaragaye mu Buhinde ntabwo bwari bwagaragara. Abo twagiye tubona ni abagaragaweho ubw’iyabonetse mu Bwongereza na Afurika y’Epfo ariko na bo babaga bayikuye hanze. Icy’Ingezi dusaba abaturage ni ukutirara bakirinda kandi mwagiye mubibona aho twafataga ingamba mu byumweru nka bibiri cyangwa bitatu wasangaga Covid-19 itakihagaragara.”

Ubwiyongere bukabije bwa Civid-19 ni bwo bwatumye Inama y’Abaminisitiri idasanzwe yateranye kuri uyu wa Mbere tariki 21 Kamena 2021 yongera gusuzuma no gukaza ingamba ziyongera ku zari zafashwe mu minsi icyenda yayibanjirije maze ifata inshya zirimo ko ingendo hagati y’Intara n’Umujyi wa Kigali n’Uturere zibujijwe.

Mu mabwiriza mashya harimo ko ingendo zibujijwe guhera saa moya z’ijoro kugeza saa kumi za mu gitondo. Ibikorwa byose byemerewe gukomeza bizajya bifunga saa kumi n’ebyiri.

Ikindi kandi ni uko ingendo hagati y’Umujyi wa Kigali n’Intara ndetse n’ingendo hagati y’uturere tundi tw’igihugu zibujijwe keretse ku mpamvu za serivisi z’ubuzima cyangwa izindi z’ingenzi.

Minisitiri w’Ubutegetsi bw’Igihugu, Gatabazi Jean Marie Vianney, yatanze umuburo ko ingo zahinduwe utubari na zo zizajya zifungwa

BBC yatangaje ko iyo ndege ya Airbus A340 yari yarahimbwe “Flying Palace” kubera ukuntu imbere hayo hakoze bidasanzwe, yagejejwe ku Kibuga Mpuzamahanga cy’Indege cya Mitiga kiri hafi y’Umurwa Mukuru, Tripoli, kuri uyu wa 21 Kamena 2021.

Minisitiri w’Intebe uyoboye guverinoma iriho, Abdul Hamid Dbeibah, wari mu bagiye gutegereza iyo ndege, imaze kuhagera yavuze ko harakurikiraho kureba niba yakoreshwa n’inzego z’ubuyobozi cyangwa ikifashishwa mu nyungu za rubanda.

Yagize ati “Abanya-Libye ni bo bazafata umwanzuro w’icyo yakoreshwa.”

Flying Palace ya Gaddafi yafashwe n’Abarwanyi bamuhiritse ku butegetsi muri Kanama 2011 nyuma y’ukurasana gukomeye kwabereye ku Kibuga Mpuzamamahanga cy’Indege cya Tripoli.

Mu 2012 ni bwo yajyanywe i Perpignan mu Majyepfo y’u Bufaransa gusanwa kubera amasasu yari yarashwe. Sosiyete ya Sabena ni yo yayisannye.

Mu 2013 kuyisana no kuyisiga andi marangi byari byarangiye, ariko aho kugira ngo ijyanywe muri serivisi z’ubucuruzi ikomeza gukoreshwa na guverinoma ya Libye mu nyungu zayo bwite.

Ibibazo by’umutekano byakomeje kuba agatereranzamba muri icyo gihugu bituma iyo ndege yongera gusubizwa i Perpignan muri Werurwe 2014.

Ku wa 3 Gicurasi 2021 ni bwo yongeye kugaragara mu Kirere cy’agace Perpignan, inkuru zitangira gucicikana hibazwa igihe izasubirizwa muri Libye.

Icyo gihe CNN yatangaje ko iyo ndege bishoboka ko izahindurwa uko iteye imbere, ibirimo bidasanzwe bigakurwamo ikajya itwara abagenzi nk’izindi.

Muammar Gaddafi yaguze Flying Palace mu 2006, ayitangaho miliyoni 120$.

Minisitiri w’Intebe wa Libye, Abdul Hamid Dbeibah, ku Kibuga Mpuzamahanga cy’Indege cya Mitiga ubwo indege yari ategereje imaze kuhagera

Ubwo yari mu nama yakozwe ku buryo bw’ikoranabuhanga kuri uyu wa Mbere tariki 21 Kamena 2021, Ngozi yagize ati “Tumaze kubona ko kutagira ubushobozi bwo gukora inkingo hirya no hino, bitajyana no kuzibona ku rwego ziba zikeneweho cyane cyane mu gihe cy’icyorezo. Hakenewe inganda zikora inkingo mu Karere ndetse n’uburyo bukwiye bwo kuzikwirakwiza, kugira ngo bibe bitanga n’icyizere cyo kwitegura guhangana n’ibindi byorezo byabaho mu gihe kizaza”.

Perezida wa Repubulika Paul Kagame, agaruka kuri icyo cy’inganda zikora inkingo za Covid-19 muri Afurika, yavuze ko uwo mugabana ugomba kuba umufatanyabikorwa ungana n’abandi bose mu gukora inkingo, aho gutegereza iziturutse aho handi bazikorera.

Yavuze ko ubu Afurika irimo kugerageza gutangira kuzikora, gushaka abafatanyabikorwa bo gutangiza ibikorwa byo gukora inkingo, ko hari abafatanyabikorwa nk’Umuryango w’Ubumwe bw’ibihugu by’u Buranyi n’Ikigo mpuzamahanga mu by’imari bahari, ariko ngo hari n’abandi bafatanyabikorwa bashaka kuza gufatanya n’umugabane wa Afurika muri ibyo.

Mu gihe bizaba bikorwa, Perezida Paul Kagame ngo asanga Afurika izajya ibona inkingo ikeneye ku gihe, cyangwa se ikazibonera rimwe n’indi mu migabane yo ku isi. Yavuze ko ku Mugabane wa Afurika hari ahantu hatatu hazakorerwa izo nkingo za Covid-19, Harimo Afurika y’Epfo Senegal n’u Rwanda, kandi ibyo bihugu byatangiye kwitegura.

U Rwanda by’umwihariko muri urwo rwego, nk’uko Perezida Kagame yabivuze, ngo rwatangiye gukorana n’inganda zifite ikoranabuhanga rishya rikoreshwa mu bintu byinshi, nko mu buhinzi no bindi byorezo, ubu ngo u Rwanda rwamaze kuganira n’abafite iryo koranabuhanga.

U Rwanda ubu ngo rurimo kuganira n’abazatanga ubufasha bw’amafaranga ndetse ngo mu mezi makeya abantu bashobora kumva indi nkuru.

Laurent Gbagbo na Simone Gbagbo bagiye gutandukana

Umwunganizi mu mategeko wa Laurent Gbagbo wasohoye ayo makuru, yavuze ko hashize igihe kinini Simone Gbagbo yaranze gatanya mu buryo bw’ubwumvikane nk’uko umugabo we yabyifuzaga, ni ko guhitamo kubinyuza mu nzira y’imanza.

Umukambwe Gbagbo w’imwaka 76, ubwo yageraga ku kibuga cy’indege nyuma y’imyaka 10 atagera mu gihugu cye, yari kumwe n’umugore we muto bamaranye igihe kinini, Nady Bamba w’imyaka 46 wahoze ari umunyamakuru. Umugore we wa mbere, Simone Gbagbo yaje kumwakira hamwe n’abayoboke be, avugana gato n’umugabo we ahita yigendera, nk’uko bitangazwa na AFP.

Laurent Gbagbo yashakanye na Simone Gbagbo mu 1986 bakaba barabyaranye abana babiri b’abakobwa.

Laurent Gbagbo na Simone Gbagbo, bombi bafashwe mu 2011 bazira kwanga kwemera ko Alassane Ouattara yatsinze amatora ya Perezida wa Côte d’Ivoire, bikaba byaravuyemo imvururu zaguyemo abantu barenga 3,000 ari byo byatumye bombi bagezwa imbere y’ubutabera.

Laurent Gbagbo icyo gihe yajyanywe i La Haye na ho umugore we aburanishwa n’inkiko za Côte d’Ivoire, zikaba zaramukatiye gufungwa imyaka 20 muri 2015 ariko aza kurekurwa ku mbabazi za Perezida wa Repubulika muri 2018.

Minisitiri Gatabazi avuga ko ingo zahinduwe utubare ziza gufungwa

Ibyo Minisitiri Gatabazi yabigarutseho mu Kiganiro we na Minisitiri w’Ubuzima, Dr Daniel Ngamije bagiranye na Radio Rwanda kuri uyu wa Kabiri tariki 22 Kamena 2021, cyibanze ku myanzuro y’Inama y’Abaminisitiri yateranye ku wa 21 Kamena 2021, ifatirwamo ingamba nshya zo gukomeza guhangana na Covid-19.

Minisitiri Gatabazi yavuze ko hari abakora utubari mu ngo zabo bitwaza ko zo zitafungwa, ariko ngo na zo ziraza gufungwa.

Yagize ati “Hari abantu bakora utubari mu ngo zabo bitwaje ko tutazifunga, izo na zo turaza kuzifunga. Ndibutsa abayobozi mu nzego z’ibanze ko ibyo bagomba kubikurikirana, abahanwa bagahanwa kuko barenga ku mabwiriza aba yarashyizweho yo kwirinda Covid-19”.

Arongera ati “Abakora isubiracyaha, ni ukuvuga wa wundi ufungira inshuro imwe, ukamufungira kabiri ndetse na gatatu agakomeza gufungura, turateganya ko twajya tubafungira kugeza igihe Covid-19 izarangirira. Ubundi twabafungiraga ukwezi kumwe ariko nyuma y’amezi nk’atatu ukabona yongeye gukora ya makosa, ntabwo tuzakomeza gukina muri ubwo buryo, tuzajya tubafungira kugeza igihe Covid-19 izarangirira kandi ntabwo nzi ngo izahagaragara ryari”.

Akomeza asaba abayoboziu mu nzego z’ibanze ndetse na Polisi kubyumva, abasubira mu cyaha ko bagoma guhanwa mu buryo bwihanukiriye.

Minisitiri Ngamije yavuze ko imibare y’abandura irimo kuzamuka cyane ari yo mpamvu izo ngamba zifatwa, kandi ngo iyo zubahirijwe imibare ihita igabanuka.

Ati “Bigaragara ko abantu badohotse ku kwirinda bibwira ko icyorezo kigenda kirangira, kwiyongera kw’abandura byatangiye ku ya 4 Kamena 2021. Covid-19 yandura vuba, ariko iyo twubahirije amabwiriza yose ku murongo imibare ihita igabanuka bitarenze ibyumweru bitatu, buri wese rero afite uruhare mu gutuma ibintu bihinduka tugasubira mu buzima bwiza”.

Minisitiri Ngamije akomeza yibutsa abantu kureka kwirara n’ubwo baba barahawe doze zombi z’urukingo rwa Covid-19, kuko ngo gukingirwa bituma bataremba ariko bashobora kwndura kandi bakanduza abandi virusi y’icyo cyorezo.

Ubwinshi bw’abantu bagaragaye muri gare ya Nyabugogo burangana n’ubw’abasanzwe bajya mu minsi mikuru isoza umwaka cyangwa mu gihe abanyeshuri baba bagana ku mashuri.

Hari abavuga ko bashatse kugenda mbere y’uko gahunda ya “Guma mu Karere” itangira, bitewe n’uko imirimo bakora buri munsi ishingiye ku ngendo hagati y’Umujyi wa Kigali n’utundi turere.

Mugabo Fulgence avuga ko yaranguraga inkweto akajya kuzicururiza mu Ntara, akaba abona ko ubucuruzi bwe bugiye guhagarara kubera gahunda ya “Guma mu Karere”.

Mugabo yagize ati “Nsubiye iwacu i Rusizi ariko ndabona na byo bigoranye kuko imodoka zijyayo baratubwira ko ari amafaranga ibihumbi 10 uvuye i Kigali”.

Abazindutse barimo uwitwa Murekeyisoni Petronille wahageze saa kumi n’ebyiri za mu gitondo akaba ajya mu Ruhango, yavuze ko afite icyizere ko aza kurara iwabo.

Murekeyisoni yagize ati “Jyewe ndagerayo rwose kuko nazindutse kandi turimo guhabwa serivisi nziza, barimo kuduha amatike bakurikije uko twaje.”

Umukozi w’Ikigo gitwara abantu Iburasirazuba cyitwa Stella, yavuze ko bitewe n’uko abagenzi ari benshi, hari impungenge z’uko bamwe batari burare batashye.

Uyu mukozi wa Stella witwa Nadine yagize ati “Ntabwo abagenzi barangira uyu munsi, ni benshi, reba uriya murongo w’abajya i Rusizi imbere ya za Omega Express na Alfa, birarenze”.

Ikigo Horizon Express gitwara abagenzi mu Majyepfo kivuga ko cyatumije imodoka zose ziri mu Ntara kugira ngo kibashe gutwara abantu barimo kubyigana muri gare ya Nyabugogo.

Tuyishime Bosco ushinzwe kumenyekanisha ibikorwa muri icyo kigo avuga ko imodoka zajyaga zihaguruka buri minota 30, ariko ubu bashyizeho uburyo ziri buhaguruke buri minota 15.

Ibigo bitwara abagenzi bisaba inzego zibishinzwe kubongerera amasaha cyangwa undi munsi umwe kugira ngo bibashe gucyura abagenzi bose.

N’ubwo abashinzwe umutekano n’urubyiruko rwiswe ‘Youth Volunteers’ barimo gusaba abantu guhana intera mu rwego rwo kwirinda kwanduzanya Covid-19, ubwinshi bw’urujya n’uruza muri Nyabugogo ntabwo butuma ayo mabwiriza yubahirizwa.