Blog

Clotilde ni umwe mu babyeyi batuye muri aka gace ufite imyaka 42 y'amavuko, akaba yemeza ko kubyarira ku kigo nderabuzima cya Gashonyi mbere byari bigoye cyane ariko kuri ubu basigaye babyarira ahantu heza kandi nta mpungenge. Agira ati: 'Turashima World Vison yazanye hano inzu y'ababyeyi yo kubyariramo kuko yujuje isuku kandi iduha umutekano usesuye mbere byari bikaze”.

“Hambere ababyarira bamwe babyariraga iwabo, bigeze aho dukangurirwa kubyarira ku kigo nderabuzima cya Gashonyi, twahagera mu gihe cy'imvura cyane ko babonaga umuriro bifashishije imirasire y'izuba ubwo imvura yabaga igwa nijoro abaganga bakoreshaga itoroshi ngo batubyaze.'

Akomeza agira ati: 'Iki kigo cyadufashije tutarabona amashanyarazi, cyari gifite inyubako ntoya, kitagira amazi, iyo wazaga mu ijoro wabaga utizeye serivisi uhabwa kuko abaganga bakoreshaga itoroshi, haba mu kubyaza, haba mu gusuzuma ugasanga ababyeyi bamwe batahakunda, bagahitagamo gukora ibilometero bakajya ku bitaro bya Shyira na byo byari mu misozi ihanamye, abandi bakabyarira mu rugo kuko babonaga n'aho babyarira batahizeye.”

Abaganga bakora ku kigo nderabuzima cya Gashonyi mu Murenge wa Matyazo bavuga ko bashima kuba barahawe umuriro w'amashanyarazi, ukaba waratumye batandukana no kubyaza bamurikisha itoroshi ndetse ngo n'impungenge zo kubura ubuzima bwa bamwe mu babyeyi zaragabanyutse.

Ikigo nderabuzima cya Gashonyi giherereye mu misozi miremire ya Ngororero, kugira ngo ugere ku bitaro biri hafi bya Shyira mu Karere ka Nyabihu, bisaba kwambuka umugezi wa Mukungwa yihuza na Nyabarongo bikaba ikibazo kuyambuka igihe imvura yaguye, mu gihe n'umuhanda uba utameze neza.

Kuva abaturage babona ikigo nderabuzima cyubatswe na World Vision, kigakurikirwa no kubegereza amazi n'amashanyarazi, ubu bashima Leta y'u Rwanda n'umufatanyabikorwa wayo World Vision bashoboye kubakura mu bwigunge bakaba bahabwa serivisi nziza uko bayishaka.

Umuyobozi w'ikigo nderabuzima cya Gashonyi, Nzabahiranya Wilhelimine, ashima urwego ikigo Nderabuzima ayoboye rugezeho kuko ngo bavuye habi ubu bari ahantu heza.

Agira ati: “Mbere hano byari bigoye kuko twatangiye nta muriro, ubonetse kubera imiterere y'aho turi baduha imirasire y'izuba bivuze ko mu gihe cy'imvura twakoreshaga itoroshi mu gutanga serivisi z'ubuzima, ariko umufatanyabikorwa World Vison yaraje atwubakira inzu y'ababyeyi izana,tubona amashanyarazi ubu abaturage natwe twararuhutse. Usibye n'ibyo indwara z'abana zaragabanutse kuko twabonye amazi meza .”

Imibare itangwa n'ikigo nderabuzima cya Gashonyi igaragaza ko abagore babyarira kwa muganga bari kuri 50% ikigo nderabuzima kitarabuvururwa ngo gihabwe amashanyarazi, none ubu bageze kuri 85%. Nubwo ibijyanye n'umuriro n'amazi meza byakemutse ariko ngo baracyabangamiwe no kutagira umuhanda ubahuza n'ibitaro ukoze neza nubwo hari ikizere ko uzaboneka mu gihe cya vuba.

Umuyobozi w'Akarere ka Ngororero wungirije ushinzwe imibereho myiza y'abaturage Mukunduhirwe Benjamine avuga ko bashima umufatanyabikorwa World Vision wabafashije kubaka ibikorwa remezo bifasha abaturage kubona serivisi nziza.

Agira ati: “Badufashije mu kubaka ikigo nderabuzima cya Gashonyi, ariko banadufashije mu bindi bikorwa bifasha abaturage kugira imibereho myiza nko kubaka ibyumba by'amashuri tugabanya ubucucike, badufashije kubona intebe mu mashuri, bafasha Akarere kwegereza abaturage amazi meza dusezerera indwara zikomoka ku isuku nke, badufashije mu kubaka amasoko mato abaturage bashobora kugeza umusaruro ku isoko bihindura ubuzima bwabo.”

Jérôme Sezibera Ayingoma umukozi wa World Vision muri Ngororero avuga ko ibikorwa bakora bagamije guteza imbere imibereho y'umwana, cyane cyane abakomoka mu miryango ikennye.

Agira ati: “Muri aka karere twagize uruhare mu kuzamura imibereho myiza y'umwana n'umubyeyi kuva bamutwite,avutse no mu gihe cyo kwiga yigira ahantu heza, twubatse inzu y'ababyeyi igezweho ifite iby'ingenzi byose byafasha muri iyo serivisi, isuku kandi twageze no mu mashuri ku buryo isuku yaje imbere.'

Ubuyobozi bw'akarere ka Ngororero buvuga ko imikoranire n'abafatanyabikorwa izakomeza cyane ko bagifite byinshi byo gukora ngo umuturage agire aho ava n'aho ajya bazamura buri wese mu iterambere.

Source : https://inyarwanda.com/inkuru/106909/ngororero-akanyamuneza-ni-kose-ku-baturage-kubera-ko-kubyarira-mu-nzira-bimaze-kuba-amatek-106909.html

Umuyobozi w'Ikigo cy'Igihugu cyita ku Buzima (RBC), Dr Sabin Nsanzimana, aratangaza ko mu gihe kidatinze ikiguzi cyo kwipimisha Covid-19 kizagabanuka, ku buryo bworohereza buri wese, ibyitezweho no kongera umubare w'abipimisha icyo cyorezo bagamije kumenya uko bahagaze.

Uwo muyobozi atangaje ibyo mu gihe abantu hirya no hino bari bamaze iminsi bavuga ko ikiguzi cy'amafaranga ibihumbi 10 acibwa umuntu ukeneye kwipimisha Covid-19 gihanitse, ku buryo hari n'abajyaga bikekaho ibimenyetso byayo, bagatinda kugana inzego z'ubuzima, ngo basuzumwe hakiri kare, bikaba byanabaviramo kurembera mu ngo zabo.

Dr Nsanzimana mu kiganiro Ubyumva ute cyatambutse kuri Kt Radio ku wa Gatatu tariki 23 Kamena 2021, na we yahamije ko amafaranga ibihumbi 10 y'ikiguzi cyo kwipimisha Covid-19 ari menshi, akaba ari na yo mpamvu Leta imaze iminsi ikora inyigo, ndetse igirana ibiganiro n'abahanga mu gutunganya ibyo bipimo, kugira ngo harebwe uburyo kigabanyuka, mu rwego rwo korohereza abisuzumisha.

Yagize ati: 'Nababwira ko intambwe y'ingenzi iganisha ku kuba ikiguzi cyo kwipimisha Covid-19 cyagabanyuka isa n'iyarangiye. Leta irangije inyigo ndetse n'ibiganiro n'abakora biriya bipimo, kugira ngo harebwe uburyo haboneka igipimo gishobora kugabanya igiciro, kikaba cyajya nibura hagati y'amafaranga ibihumbi bitanu n'ibihumbi bitandatu'.

Yongera ati 'N'ubwo tutaratangira kubishyira mu bikorwa, nabizeza ko Leta imaze iminsi ibishyizemo ingufu, kandi twiteze ko nibishyirwa mu bikorwa umubare w'abipimisha Covid-19 uziyongera, bigafasha benshi kujya bamenya uko bahagaze'.

Dr Nsanzimana ntiyatangaje igihe nyacyo iyo gahunda izatangira gushyirwa mu bikorwa, gusa yizeza abanyarwanda ko ari mu gihe cya vuba. Yanongeyeho ko inzego zibifite mu nshingano zirimo kureba uko kwipimisha byahuzwa na serivisi z'ubwishingizi.

Kubahiriza amabwiriza yo kwirinda Covid-19 abantu bambara agapfukamunwa, bakaraba intoki n'amazi meza n'isabune, bahana intera n'izindi ngamba zo kwirinda iki cyorezo; buri bu muryo bwizewe kandi bworoshye butuma abantu babasha kwirinda Covid-19 nk'uko inzego z'ubuzima zakunze kubigaragaza.

Dr Nsanzimana ati 'Aho ni ho numva twanashyira ingufu nyinshi bitandukanye n'abibwira ko igihe bipimishije Covid-19 bibaha ubudahangarwa bwo kunyuranya na ya mabwiriza, bakigira nko mu tubari, kuramukanya n'abo bahuye na bo bose, gukuramo agapfukamunwa n'ibindi nk'ibyo. Mu gihe uzaba uyihaye ubwinjiriro, Covid-19 ntizareba ngo wipimishije, byanze bikunze uzayandura. Ni yo mpamvu dusanga abantu bakwiye gushyira imbaraga cyane mu bwirinzi, noneho n'icyo gipimo umuntu akaba yagifata igihe bibaye ngombwa'.

Kuva Leta y'u Rwanda yatangiza gahunda yo kwipimisha Covid-19 kuva muri Nyakanga 2020, aho ikiguzi ku wipimisha Covid-19 ku bushake, cyari gihagaze ku mafaranga y'u Rwanda 47.200; uko ingamba mu kwirinda iki cyorezo zagiye zoroshywa, ni na ko ikiguzi cyagabanyijwe kigezwa ku mafaranga ibihumbi 10 ari na ho gihagaze kugeza ubu, kandi abakenera iyo serivisi bayegerejwe hafi, aho ubu bayibonera mu mavuriro ya Leta n'ayigenga.

Source : https://impanuro.rw/2021/06/24/covid19-ikiguzi-cyo-kwipimisha-kigiye-kugabanuka/

Urwego rw'Igihugu rw'Ubugenzacyaha-RIB, rwasuye abaturage b'Umurenge wa Juru, Akarere ka Bugesera, baganirizwa ku mikorere n'imikoranire ya RIB n'abaturage, by'umwihariko uko barushaho gukumira no kurwanya ibyaha. Abaturage bavuga ko basobanukiwe cyane ibijyanye n'ihohoterwa rikorerwa abana, uko batanga ibirego n'amakuru ku wahohoteye umwana ndetse nuko bakwihutira kujyana uwahohotewe aho agomba kubonera ubufasha.

Kabera Enock, umuturage akaba n'ukuriye Abajyanama b'Ubuzima mu Murenge wa Juru, ahamya ko nk'abaturage hari byinshi bungukiye mu kuba RIB yarabasuye, ikabaganiriza ku mikorere n'imikoranire yayo n'Abaturage, ariko kandi ikanabaganiriza ku kwirinda no gukumira ibyaha bitandukanye harimo n'ihohoterwa rikorerwa abana.

Ati' Hari ibyo tutari tuzi ku byerekeranye n'ihohoterwa rikorerwa abana. Agashya rero twabonyemo ni uko twamaze kumenya ko gusambanya abana bidahera ku kwinjiza igitsina mu kindi, ahubwo ko hari ibikorwa bibanziriza icyo gikorwa, ariko nabyo bifatwa nko gusambanya abana'.

Muri zimwe mu ngero avuga yamenye, agira ati' Nko gukabakaba, gukoza umubiri ku mwana n'ubundi ugambiriye kurangiza, ubushake bw'umubiri wawe twasanze nabyo bifatwa nk'ubusambanyi(ihohoterwa) bukorerwa abana'.

Avuga kandi ko RIB yatumye bunguka ubumenyi bw'uko bajya batanga amakuru ku buryo n'ababyeyi b'abana bahohotewe cyangwa se ababifitemo inyungu batamenya uwatanze amakuru. Avuga ko RIB yabahaye nomero zo guhamagaraho zitishyurwa mu gihe bashaka gutanga amakuru. Ashimangira kandi ko basobanuriwe uko umwana wahohotewe yajyanwa muri Isange One Stop Centre, agafashwa byihuse ndetse akaba yarindwa indwara yakwandurira muri uko kumuhohotera ndetse n'inda ashobora guterwa. Asaba ko buri wese yaharanira kuba ijisho rya mugenzi we mu gukumira no guca burundu iki cyaha cyo guhohotera abana ndetse n'ibindi byaha muri rusange.

Thamani Triphine, Umuhuzabikorwa w'Inama y'Igihugu y'Abagore mu Murenge wa Juru, ahamya ko nyuma yo kuganirizwa na RIB yasanze ibyo yari azi ku ihohoterwa rikorerwa Abana ndetse n'ibindi byaha ari bike cyane.

Ati' Si ubwambere numvise yuko abana bahohoterwa, ariko numvise ko bifite intera ndende ku buryo ntatekerezaga! Ndabyumva rwose no mu makuru ndabyumva, yewe no mu Murenge njya byumva ariko noneho nkurikije n'imibare duhawe aha ngaha yo mu karere ka Bugesera, mbonye ari myinshi cyane! Ikigiye gukurikiraho ni ugushyiramo imbaraga nyinshi'. Asaba ko ababyeyi bafite abana barushaho kubitaho no kumenya abo babasigiye niba koko ari abo kwizerwa, ariko kandi akanabasaba kumenya gutanga amakuru no kwihutira kujyana umwana wahohotewe kwa muganga.

Dr. Murangira B. Thierry,  Umuvugizi w'Urwego rw'Igihugu rw'Ubugenzacyaha-RIB, avuga ko ibikorwa nk'ibi byo kwegereza uru rwego abaturage byakomwe mu nkokora n'icyorezo cya Covid-19, ariko ngo bizakomeza mu rwego rwo kurushaho kwegereza abaturage Serivise za RIB by'umwihariko ababa batuye kure ya Sitasiyo batabasha koroherwa no gutanga ibirego ku byaha baba bakorewe.

Akomeza avuga ko n'abayobozi b'inzego z'ibanze b'aho uru rwego rwa RIB rwasuye, ngo bashishikarizwa kugira uruhare rufatika mu kurwanya ibyaha by'umwihariko ibyo gusambanya abana, icuruzwa ry'abantu, ibyaha by'ihohoterwa bikorerwa mu ngo, icuruzwa ry'ibiyobyabwenge n'ibindi. Avuga kandi ko by'umwihariko, aba bayobozi b'inzego z'ibanze bahabwa umwanya wihariye bakaganirizwa ku ruhare rwabo mu gukumira no kurwanya ibyaha bishobora gukorerwa aho bayobora.

Rurangirwa Fred, Umunyamabanga Nshingwabikorwa w'Umurenge wa Juru avuga ko mu gusurwa na RIB babyishimiye cyane, ko kandi nabo bari batangiye ubukangurambaga bw'Ukwezi bugamije kugira Umudugudu utarangwamo icyaha.

Gitifu Rurangirwa, avuga ko mu bakunze kugaragara muri ibi byaha bitandukanye basabwa kurwanya barimo; abo bita ibihazi(abantu usanga kenshi barananiranye) ndetse n'abacuruza ibiyobyabwenge, hamwe n'abacuruza utubari mu buryo bunyuranije n'amategeko n'abandi.

Ashima umusanzu RIB yabateye mu kwegera no gusobanurira abaturage ububi bw'ibyaha, uko babirwanya ndetse nuko bajya batanga amakuru bagamije kubica burundu aho batuye. Ahamya ko hari byinshi bazageraho nyuma yo gusurwa n'uru rwego, kandi ko abaturage nabo ubwabo bitabiriye iki gikorwa babyumvise, bityo binyuze mu masibo bakazabasha gufatanya gukumira no kurwanya ibyaha.

Gahunda yo kwegera abaturage, ikorwa n'urwego rw'Igihugu rw'Ubugenzacyaha-RIB hifashishijwe imodoka zabugenewe zikora nka Sitasiyo z'Ubugenzacyaha zimukanwa( Mobike Station Van) ziba zirimo abakozi b'uru rwego kuva ku biro bikuru ndetse n'abo basanga mu karere bagiyemo. Ni igikorwa kandi ahanini kijyanwa mu baturage aho bategereye Sitasiyo za RIB, aho bakira ibibazo n'ibirego by'abaturage, bimwe bigakemurirwa aho, ibindi bakahava babihaye umurongo, ariko kandi n'ibikeneye gukorerwa Dosiye bigahita bikorwa hakanatangira iperereza kuri byo.

Munyaneza Theogene / intyoza.com

Source : https://www.intyoza.com/bugesera-rib-mu-baturage-bati-twamenye-kurushaho-ihohoterwa-rikorerwa-abana-ntaguceceka/

Uyu Musabyimana Gaspard w'imyaka 66, yavukiye muri Nyamugali, mu cyahoze ari Perefegitura ya Ruhengeri.

Mu gihe cy'ubutegetsi bw'Akazu ka Yuvenali Habyarimana, uyu Musabyimana Gaspard yavunaga umuheha akongezwa undi, dore ko yanategetse igihe kinini Urwego rw'Abinjira n'Abasohoka. Uru rwego rwari rwarapyinagaje Abanyarwanda, cyane cyane Abatutsi, kuko rwabimaga impapuro z'abajya mu mahanga ngo batajya kubonana na bene wabo bari impunzi mu bihugu binyuranye.

Musabyimana yabaye igikomerezwa, ahabwa imyanya y'ubutegetsi, amafaranga n'amashuri akomeye mu mahanga. Ikibabaje, aho kwitura Igihugu ineza, yagihembye kugihekura.

Aho amashyaka menshi aziye, Musabyimana Gaspard yabaye Interahamwe ikomeye muri MRND, akaba n'impuzamugambi ya CDR, dore ko aya mashyaka yombi mu by'ukuri yari impanga, zisangiye ingengabitekerezo ya Jenoside.

Yagaragaye kenshi muri za mitingi, anumvikana kuri RTLM no mu binyamakuru by'Interahamwe nka Kangura,yumvikanisha ko Inkotanyi ari abanyamahanga bateye uRwanda. Muri gacaca y'iwabo yarezwe kwicisha Abatutsi n'abandi yitaga 'ibyitso by'Inkotanyi', ndetse akagororera abicanyi ubwo babaga bavuye 'gukora'.

Aho agereye mu Bubiligi ari naho atuye ubu, ntiyashizwe kuko yakomeje kwandika ibitabo , akavugira ku maradiyo y'Interahamwe n'Ibigarasha, aharabika uRwanda. Akunze kumvikana asobanura ko nta Jenoside yakorewe Abatutsi yabaye, akagera n'aho agereka ubwicanyi ku bakorewe iyo Jenoside.

Musabyimana Gaspard ni umwe mu bakwirakwiza ibinyoma byanze gufata bya jenoside ngo yakorewe Abahutu muri Zayire, nk'uko yabifindafinze mu ngirwagitabo yise'L'APR et le les réfugiés rwandais au Zaïre.Un genocide nié'. Abahanga basomye iki gitabo kimwe n'ibindi yandika afatanyije n'abandi banzi b'uRwanda nk' Ababiligi Luc Marchal na Filipp Reyntjens, bakomeje kumwamagana, bamubuza kugoreka amateka azwi na buri wese, ariko yanze kuva ku izima.

Mu minsi ishize ariko ntiyarebanaga neza n'Interahamwe ngenzi ze, ubwo yahishuraga amafoto y'abo bari kumwe mu kiriyo cya Sylvestre Mudacumura waguye igihugu igicuri. Bene wabo ntibabyishimiye, baramurakarira kuko abo bafatanyabikorwa ba FDLR batifuzaga kumenyekana. Mu kubihohoraho rero, yarasaze arasizora, si ugutuka uRwanda n'abayobozi barwo yiva inyuma.

Nyamara se byamumariye iki, ko bitazamuhanagura amaraso y'inzirakarengane amujejeta ku biganza?
Ntibikiri igitangaza kubona abicanyi aribo bigize impirimbanyi z'uburenganzira bwa muntu, ariko niba nibura barekaga gutoneka imitima y'abo bagize imfubyi n'abapfakazi.

Musabyimana Gaspard yari akwiye gukomeza kwirira ibisabano ahabwa n'abamucumbikiye, akareka gukomeza kwishyira ku Karubanda. Turamwibutsa gusa ko icyaha cya jenoside kidasaza, amaherezo azibona mu maboko y'ubutabera.

The post Tumenye kandi twamagane MUSABYIMANA Gaspard, Interahamwe kabombo ikomeje ubugizi bwa nabi. appeared first on RUSHYASHYA.

Source : https://rushyashya.net/tumenye-kandi-twamagane-musabyimana-gaspard-interahamwe-kabombo-ikomeje-ubugizi-bwa-nabi/?utm_source=rss&utm_medium=rss&utm_campaign=tumenye-kandi-twamagane-musabyimana-gaspard-interahamwe-kabombo-ikomeje-ubugizi-bwa-nabi

Bruce Melodie mashusho y’indirimbo ye Katapila yari itegerejwe na benshi, yifashishije imodoka ya RITCO yigeze kumusaba ibisobanuro kubera ko yayivuze mu ndirimbo batabyumvikanye.

Muri Nyakanga 2020, Bruce Molodie yasohoye indirimbo ‘Saa Moya’ yakunzwe na benshi, hari aho yageraga akaririmba ngo “Sinkubipa ndagukereza nka RITCO izamuka Shyorongi”.

Ibi ntibyakiriwe neza n’iyi sosiyete itwara abagenzi ndetse baza kugirana ibiganiro n’uyu muhanzi n’ubwo aho byarangiye impande zombi zumvikanye ndetse zemeranya ko zazakorana mu minsi iri imbere.

Nyuma y’iminsi ateguza abantu indirimbo avuga ko izaba ari iy’impeshyi, Bruce Melodie yasohoye indirimbo ‘Katapila’.

Uyu muhanzi umenyereweho gukora indirimbo benshi bita ibishegu, n’ubundi iyi ndirimbo iraganisha ku rukundo rwo mu gitanda.

Hari aho uyu muhanzi avuga ngo “utumye mfata konjie, telefoni reka nshyiremo akadege.” Hari n’ahandi agira ati “utumye mfata icumbi kandi mfite akavumo kanjye, banza umfashe aka gakoti.”

Muri iyi ndirimbo yari itegerejwe na benshi, niho Bruce Melodie yahise agaragariza ko yatangiye gukorana na RITCO kuko mu mashusho yayo hagaragaramo imodoka yayo.

Bruce Melodie yashyize hanze indirimbo Katapila

Source : http://isimbi.rw/imyidagaduro/article/nyuma-yo-gushyamirana-na-ritco-bruce-melodie-yifashishije-imodoka-yayo-muri-katapila-iganisha-mu-rukundo-rwo-mu-gitanda

Mu ijoro ryo kuri uyu wa gatatu tariki ya 23 Kamena 2021 nibwo hasozwaga imikino ya nyuma yo mu matsinda atandukanye ku makipe yitabiriye imikino ya Euro 2021 ikomeje kubera mu bihugu bitandukanye ndetse rutahizamu wa Portugal yongera kubakaa amateka.

Mu mikino yaraye ibaye mu itsinda rya Gatanu, ikipe y'igihugu ya Esipanye yatsinze ikipe ya Slovakia ibitego 5 ku busa, muri iri tsinda kandi ikipe y'igihugu ya Suwede yatsinze Polonye ibitego 3 kuri 2.

Mu itsinda rya gatandatu ho habayemo kunganya kw'amakipe yose yakinnye, aha twavuga nka Portugal yanganyije n'ikipe y'igihugu y'u Bufaransa ibitego bibiri kuri bibiri, ni Portugal yatsindiwe na Cristiano Ronaldo, ku ruhande rw'u Bufaransa yo yatsindiwe na Karim Benzema ibitego byombi.

Gutsinda ibitego bibiri muri uyu mukino ku ruhande rwa Cristiano Ronaldo byatumye yuzuza ibitego 109 mu mikino 178 akaba yashyizeho agahigo gashya ko kuba ari we mukinnyi utsinze ibitego byinshi mu mikino mike, aha yakuyeho agahigo kari gafitwe na Ali Daei wabigezeho mu mikino 149.

Nyuma y'aamkipe 16 yamaze kubona itike yo gukomeza muri 1/8 cy'irangiza dore uko amakipe azahura:

Ku wa Gatandatu tariki ya 26 Kamena 2021

Pays de Galles vs Denmark (18:00)
U Butaliyani vs Autriche (21:00)

Ku Cyumweru tariki ya 27 Kamena 2021:

U Buholandi vs Repubulika ya Tchèque (18:00)
U Bubiligi vs Portugal (21:00)

Ku wa Mbere tariki ya 28 Kamena 2021

Croatia vs Espagne (18:00)
U Bufaransa vs u Busuwisi (21:00)

Ku wa Kabiri tariki ya 29 Kamena 2021

U Bwongereza vs u Budage (18:00)
Suède vs Ukraine (21:00)

The post Cristiano yongeye kwandika amateka mu mikino ya Euro ubwo yafashaga Portugal kugera muri 1/8, uko amakipe azahura. appeared first on RUSHYASHYA.

Source : https://rushyashya.net/cristiano-yongeye-kwandika-amateka-mu-mikino-ya-euro-ubwo-yafashaga-portugal-kugera-muri-1-8-uko-amakipe-azahura/?utm_source=rss&utm_medium=rss&utm_campaign=cristiano-yongeye-kwandika-amateka-mu-mikino-ya-euro-ubwo-yafashaga-portugal-kugera-muri-1-8-uko-amakipe-azahura

Kuri uyu wa 5 tariki 25 Kamena 2021 shampiyona y’icyiciro cya mbere iragera ku musozo ku makipe 8 ashaka igikombe cya shampiyona. Ni imikino igomba kubera isaha imwe kugira ngo bigende neza ku makipe 2 ashaka igikombe cya shampiyona yaba APR FC ndetse na As Kigali.

APR FC ni yo iri mu mwanya mwiza wo kwegukana igikombe cya shampiyona, aho iyoboye urutonde rwa shampiyona n’amanota 16 izigamye ibitego 14, irusha ibitego 4 As Kigali banganya amanota.

As Kigali niyo ihanganye na APR FC 

APR FC ntiratakaza umukino uyu mwaka aho yanganyije gusa na As Kigali banahanganiye igikombe. Ku munsi wa nyuma wa shampiyona, As Kigali izahura na Police FC, APR FC ihure na Rutsiro FC bazaba bakinnye bwa mbere mu mateka y’aya makipe mu mikino ya Shampiyona.

APR FC imaze gukina imikino 3 ya Gicuti na Rutsiro gusa yose irangira mu buryo bugoranye, kuko umukino wa mbere APR FC yatsinze Rutsiro igitego 1 ku busa, umukino wa 2 banganya 0-0 umukino wa 3 wabaye tariki 22 Mata ubera kuri sitade Amahoro i Remera, APR FC itsinda Rutsiro igitego 1 ku busa cyatsinzwe na Ruboneka Bosco ku munota wa 32.

APR FC ntakosa 

Bisengimana Justin si ubwa mbere yaba abangamiye APR FC kuko na 2019 yagize uruhare mu ibura ry’igikombe Kuri APR FC kuko yayitsinze ibitego 3-2 agitoza Sunrise FC. APR FC itakaje umukino wa Rutsiro FC cyangwa bakanganya, yabura igikombe cya Shampiyona, ndetse ikanabura itike ya CAF Champions League, n’agahigo ka Adil kagashyirwaho umutemeri baramutse batsinzwe.

Rutsiro iherutse kwisasira Rayon Sports 

APR FC vs Rutsiro FC ni umukino APR FC ihabwa amahirwe yo gutsinda ariko ushobora  kugira umwaka imfabusa kuri iyi kipe mu gihe As Kigali yatsinda Police FC, APR FC ntibone amanota atatu.

Source : https://inyarwanda.com/inkuru/106900/apr-fc-iri-mu-masaha-yo-kwitonda-ishobora-gutakaza-igikombe-ikisanga-muri-confederation-na-106900.html

Hari hashize iminsi itandatu indirimbo ‘Katapilla’ ya Bruce Melodie yamamazwa ndetse bikaba byari biteganyijwe ko ijya hanze uyu munsi kuwa Kane. Mu gitondo cyo kuri uyu wa Kane ni bwo yagiye hanze. Umujyanama wa Bruce Melodie, Lee Ndayisaba yabwiye InyaRwanda.com ko uyu muhanzi atari kuboneka ku murongo wa telefone kuko barangije akazi muri iki gitondo yirinda kugira byinshi avuga kuri iyi ndirimbo icyakora avuga ko bifuza ko yakwakirwa neza.

Yagize ati 'Iyo umuntu asohoye indirimbo icyo aba ayitezeho ni kimwe, icyo umuntu aba ayitezeho ni uko indirimbo yakirwa neza ni cyo kintu umuntu aba yifuza'. Mu minsi ishize ubwo Bruce Melodie yateguzaga abafana be indirimbo nshya, yavuze ko ari we muhanzi uryoshya impeshya bityo abasaba kumutoranyirizamo indirimbo imwe muri eshatu yababwiye amazina, maze iyo batoye akaba ariyo aheraho. Benshi bahurije kuri ‘Katapilla’, Bruce Melodie yubaha amahitamo yabo aba ariyo aheraho asohora.

Ndayisaba Lee [iburyo] umujyanama wa Bruce Melodie

Tariki 2 Kamena 2021 ni bwo Bruce Melodie yari yavuze ko mu gihe Album itararangira afite indirimbo 3 ziri tayari zirimo ‘Katapilla’, ‘Jioni’ na ‘Ndagatora’ maze asaba abakunzi be guhitamo iyo abanza gushyira hanze. Yaranditse ati “Mu gihe album itararangira kandi iyi summer ikeneye Anthem, mfite indirimbo eshatu ziri tayari mwihitiremo iyo tubanza; Jioni, Ndagatora na Caterpillar, twagiye”.

Bruce Melodie uherutse guhamiriza InyaRwanda.com ko ari we muhanzi uryoshya impeshyi, muri iyi ndirimbo ye nshya ‘Katapilla’ aba avuga uko inkumi yamutwaye uruhu n'uruhande ku buryo imusanga mu kazi agasaba abo bari kumwe umunota umwe bagahita bigendera bakagirana ibihe byiza iby’akazi akabyibagirwa agakuraho na telefone akagasubiraho bukeye bwaho.

Lee Ndayisaba yavuze ko ‘Katapilla’ ari yo ndirimbo abafana ba Bruce Melodie batoye cyane ari nayo mpamvu ariyo bahereyeho bashyira hanze. Mu isaha imwe ishize igiye hanze ubwo twakoraga iyi nkuru imaze kurebwa n'abarenga ibihumbi 14.

Bruce Melodie ahamya ko ari we muhanzi uryoshya impeshyi

REBA HANO INDIRIMBO KATAPILLA YA BRUCE MELODIE

Source : https://inyarwanda.com/inkuru/106897/katapilla-ya-bruce-melodie-yari-itegerejwe-na-benshi-yamaze-kugera-hanze-video-106897.html