Webrwanda Backend

Blog

  • Abitegura gukora ubukwe vuba aha bararanye inkweto – YEGOB #rwanda #RwOT

    Abafite ubukwe muri uku kwezi kwa Kanama 2021 ndetse n'abategura aho imihango y'ubukwe ibera bararanye inkweto.

    Ni nyuma yuko imyanzuro y'inama y'abaminisitiri yo ku munsi w'ejo tariki ya 11 Kanama 2021 yaraye isohotse harimo ingingo ivuga ko imihango y'ubukwe irimo gusaba ndetse n'ishyingirwa mu nsengero no mu mategeko yemerewe kwitabirwa n'abantu batarenze 50. Iyo byabereye ahantu hasanzwe hemerewe gukorerwa ibirori ntibagomba kurenga 30% by'ubushobozi bwo kwakira abantu bw'aho bateraniye kandi abitabiriye ibi birori bagomba kwerekana ko bipimishije covid-19 mu masaha 72 mbere y'ibyo bikorwa.

    Ingingo ya n ireba imihango y'ubukwe harimo gusaba n'ishyingirwa rikorewe imbere y'ubuyobozi bwa Leta

    Iyi nkuru nziza yakiranywe ibyishimo byinshi n'abafite ubukwe vuba aha ndetse n'abategura aho imihango y'ubukwe ibera.

    Source : https://yegob.rw/abitegura-gukora-ubukwe-vuba-aha-bararanye-inkweto/

  • Myugariro wa Rayon Sports n'umugore we bari mu byishimo byinshi . – YEGOB #rwanda #RwOT

    Myugariro w'ibumoso Muvandimwe Jean Marie Vianey 'Kurzawa' uheruka gusinyira ikipe ya Rayon Sports, n'umugore we bari mu byishimo byinshi nyuma yo kwibaruka imfura yabo nyuma y'ukwezi kumwe barushinze.

    Muvandimwe yemeje aya makuru binyuze muri Status yashyize ku mbuga nkoranyambaga ze.Nko ku rubuga rwa Facebook, uyu mugabo ukomoka mu karere ka Gisagara yashyizeho amafoto arimo iya madamu we akuriwe n'indi acigatiye uruhinja yari yibarutse.

    Uyu musore yavuze ko yasabye Imana kumuha ubuzima bwuzuyemo urukundo n'ibyishimo, na yo imwoherereza umwana w'umuhungu.
    Mu kwezi gushize kwa Nyakanga ni bwo Muvandimwe n'umugore we Rurangwa Umwari Soleil barushinze, Mbere yo kwibaruka imfura yabo kuri uyu wa Gatatu.

    Source : https://yegob.rw/myugariro-wa-rayon-sports-numugore-we-bari-mu-byishimo-byinshi/

  • Kicukiro: Rutunga Venant yemereye Urukiko ko yazanye abajandarume muri ISAR Rubona #rwanda #RwOT

    Ubwo yatangiraga kuburana bwa mbere kuri uyu wa kabiri ku ifungwa n'ifungurwa ry'agateganyo, Rutunga yasabye ko yaburanishirizwa ku rukiko kuko kuburanira kuri Skype bigorana kandi n'ibyuma bikaba bikunda gupfa.

    Rutunga yanavuze ko yifuza kuburanira mu rukiko kubera ko uburemere bw'ibyaha aregwa bya Jenoside yakorewe Abatutsi.

    Umucamanza yahise asubika iburanisha ategeka ko Rutunga agomba kuzanwa ku rukiko akaba ariho aburanira.

    Saa tatu zuzuye zo kuri uyu wa Kane nibwo inteko y'umucamanza umwe n'umwanditsi w'urukiko binjiye mu cyumba cy'iburanisha mu gihe Rutunga yari kumwe n'umunyamategeko we Me Sebaziga.

    Ubushinjacyaha bwari buhagarariwe n'abashinjacyaha babiri ku rukiko hari abanyamakuru benshi harimo n'abanyamakuru mpuzamahanga.

    Umucamanza yatangiye asoma umwirondoro wa Venant Rutunga,hanyuma yemera ko ari uwe hanyuma amwibutsa ko acyekwaho gukora icyaha cya Jenoside.

    Umucamnza yatangiye aha umwanya abaregwa ngo bagire icyo bavuga ku bijyanye n'icyaha cya Jenoside Rutunga acyekwaho, Me Sebaziga Sophonie yatangiye atanga inzitizi ku rubanza ari kuburana.

    Yagize ati “Nk'uko mubibona, uwo nunganira afungiye muri Gereza ya Nyarugenge kandi nta mpuzankano ziranga infungwa zo mu Rwanda yambaye.”

    Me Sebaziga yavuze ko Rutunga Venant afungiye aho adakwiye gufungirwa,ati”Umukiriya wange afunzwe mu buryo bunyuranije n'amatege.”

    Me Sebaziga yavuze ko muri Dosiye bafite irimo ko Rutunga yari yarakatiwe n'inkiko Gacaca agahabwa igihano cya burundu.

    Uyu munyamategeko ati “Umukiriya wange niba ari uko bimeze,yakagombye gufungirwa muri Gereza nko kurangiza igihano ariko adasubizwa mu inkiko kuburana.

    Umucamanza yabajije Rutunga niba azi ko yari yarakatiwe n'inkiko Gacaca mu Rwanda, amusubiza ati “ibyo bintu bya Gacaca ntabyo nzi, n'ibintu bafindafinze ntazi aho byavuye.”

    Urukiko rwahaye umwanya Ubushinjacyaha ngo busobanure impamvu Rutunga afungiye muri Gereza ya Nyarugenge, Ubushinjacyaha bwavuze ko nubwo afungiye muri Gereza ya Nyarugenge adafunganwe n'abandi.

    Rutunga yabwiye Urukiko ko abazwa bwa mbere yahawe imyenda y'imfungwa n'abagororwa akaza kuyakwa nyuma batazi impamvu bayimwatse.

    Ubushinjacyaha bwemeje ko Rutunga ari ahantu heza hatandukanye n'ahafungirwa abandi bafungwa hateganijwe kuva na mbere y'uko Rutunga aza.

    Ubushinjacyaha bwahise bubwira urukiko ko bataje kuburana aho Rutunga afungiye ko ahubwo baje gusaba urukiko ko Rutunga afungwa iminsi 30 y'agateganyo muri Gereza mu gihe Ipereza rigikomeje.

    Me Sebaziga yahise abwira urukiko ko nta heza ho muri Gereza ko nubwo wafungirwa muri Hotel ariko ufunzwe nta kiza kiba kirimo.

    Rutunga yahise yaka ijambo avuga ko ibyavuzwe n'ubushinjacyaha bwabeshye kuko azanwa mu Rwanda yahawe impuzankano y'abafungwa bo mu Rwanda ikabanza no kwanga kumukwira hanyuma ubuyobozi bwa Gereza bukamubwira ko buzamudodeshereza indi nyuma yo ku mupima.

    Rutunga ati “Nyuma nibwo bambwiye ko imyenda y'abafungwa idakenewe.”

    Umucamanza yahise avuga ko ibyagaragajwe n'uruhande ruregwa ndetse n'ibyavuzwe n'ubushinjacyaha byose bizasuzumwa mu cyemezo cy'urukiko ahita ategeka ko iburanisha rikomeza,

    Ubushinjacyaha bwavuze ko Venant Rutunga yicishije abakozi b'Abatutsi bakoranaga mu gihe cya Jenoside muri ISAR Rubona,barimo Epaphrodite Kalisa na George Ndamage.Aba bishwe ku mabwiriza ya Rutunga Venant bo n'abatutsi bagera ku bihumbi 2000 bari bahungiye muri ISAR.

    Ubushinjacyaha bwasobanuye ko bishwe biturutse ku bajandarume bahurujwe na Rutunga Venant ubwe.

    Ubushinjacyaha buti “turasabira Dr Rutunga gufungirwa muri gereza by'agateganyo iminsi 30 kugira ngo dukomeze iperereza tunashake n'abandi batangabuhamya bagaragaza uruhare Dr Rutunga yagize muri Jenoside.”

    Dr Rutunga Venant yahise yemerera Urukiko ko koko yagiye I Butare guhuruza abajandarume kuko ikigo yari ayoboye cyari cyatewe n'abantu bari bavuye mu ma komine atandukanye.

    Umucamanza yahise abaza Dr Rutunga niba azi Uwitwa Epaphrodite Kalisa na Ndamage George,Ubushinjacyaha bwavuze ko bishwe ku mabwiriza ye.

    Rutunga yahise asubiza ko abo bagabo abazi ko kandi koko bari abakozi ba ISAR Rubona ko ariko ibyo ubushinjacyaha bwavuze ko bishwe ku mabwiriza ye bwabeshye kuko ababishe bahari kandi banabifungiwe.

    Dr Rutunga ati “Keretse niba barabafunguye ngo bazaze kunshinja wenda.”

    Ubushinjacyaha mu kwerekana imikorere y'icyaha cya Jenoside Dr Rutunga acyekwaho, bwavuze ko nyuma yo kuvumbura abo bakozi b'abatutsi bishwe bavumbuwe n'abajandarume ku mabwirizwa ye,ngo uyu Dr Rutunga yahise ahemba abishe Epaphrodite Kalisa na Ndamage George abaha inka ipima ibiri 400 nk'igihembo cy'igikorwa bari bamaze gukora.

    Dr Rutunga Venant yahise abwira urukiko ko ibyo gutanga inka y'abamaze kwicwa nabyo bitabayeho kuko n'ikimenyimenyi Ubushinjacyaha bunavuze ibiro inka yari ifite yahembwe abicanyi.

    Rutunga ati “Nyakubahwa iyo nka yagiye gutangwa ibanza gupimwa ibiro?.”

    Umucamanza yahaye umwanya abaregwa ngo bagire icyo bavuga ku busabe bw'ubushinjacyaha bwo gufungwa muri Gereza iminsi 30 y'agateganyo.

    Dr Rutunga Venant yahise abwira umucamanza ko ibyo ubushinjacyaha bwavuze ntacyo yabivugaho kuko byose biri mu mwanzuro Urukiko rufite.

    Me Sebaziga Sophonie yahise abwira urukiko ko ibyasabwe n'ubushinjacyaha bidakwiye guhabwa ishingiro kuko uwo yunganira atatoroka ubutabera .

    Me Sebaziga yanavuze ko uwo yunganira nta binyenyetso yasibanganya mu gihe yaba arekuwe.Ati “Venant ntabwo yasibanganya ibimenyetso adafite.”

    Me Sebaziga yasabye Urukiko ko uwo yunganira yarekurwa by'agateganyo ahubwo urukiko rugategeka ibyo Rutunga yazajya yubahiriza nk'uko biteganywa n'amategeko.

    Umucamanza yahaye umwanya Ubushinjacyaha ngo bugire icyo bwongeraho ku byasabwe n'abaregwa, buvuga ko Dr Rutunga Venant nta kuntu yarekurwa by'agateganyo n'abantu yasize yoretse mu Rwanda n'Ubuholandi yahungiyemo aribwo bwamufashe bukamushyikiriza inzego z'ubutabera z'u Rwanda.

    Ubushinjacyaha buti “Turagira ngo twibutse ko ibyakorewe byose Rutunga Venant byubahirije amategeko kuko yabarijwe ku gihe n'ubugenzacyaha, n'ubushinjacyaha bumubariza ku gihe kugeza hatangiye inzira zo kumuburanisha ifungwa n'ifungurwa ry'agateganyo.Nta tegeko nari rimwe ryigeze ryicwa ibyakozwe byose bikurikije amategeko.”

    Umucamanza yumvishe impande zombi apfundikira iburanisha ategeka ko uru rubanza ku ifunga n'ifungurwa icyemezo cy'urukiko kizasomwa kuwa 17 Kanama 2021 Saa munani z'igicamunsi.

    Kuwa 26 Nyakanga 2021 nibwo Ubushinjacyaha bwatangaje ko Ubuholande bwohereje Venant Rutunga, Ucyekwaho icyaha cya Jenoside yakorewe Abatutsi 1994.

    Umwirondoro wa Venant Rutunga umwerekana nk'umuntu ukomoka mu cyahoze ari Peregitura ya,Ruhengeri Komine Gakenke ubu ni mu Karere ka Gakenke.

    Venant Rutunga mbere ya Jenoside yakorewe Abatutsi 1994, yari umuyobozi w'ikigo cy'ubushakashatsi mu by'ubuhinzi cya ISAR Rubona,uyu munsi ni mu Karere ka Huye.Mbere ya Jenoside yakorewe Abatutsi 1994 hari muri Komine Ruhashya.

    Aha muri ISAR Rubona ni naho bicyekwa ko ariho yakoreye Jenoside.

    Venant Rutunga yatawe muri yombi muri 2019 afungirwa mu Buholandi aho yafashwe yari ahamaze imyaka isaga 10.Yafashwe kuko hari hashize igihe ashyiriweho impapuro zimuta muri yombi n'ubushinjacyaha bw'u Rwanda.


    Source : https://umuryango.rw/amakuru/mu-rwanda/ubutabera/article/kicukiro-inkiko-gacaca-kuba-zarankatiye-ntabyo-nzi-rutunga

  • Riderman yerekanye isura y’impanga aherutse kwibaruka, ahishura n’amazina yazo #rwanda #RwOT

    Gatsinzi Emery wamamaye nka Riderman mu muziki, yerekanye isura y’impanga ze aherutse kwibaruka mu mezi abiri ashize.

    Mu mpera za Kamena nibwo Riderman yahishuye ko we n’umugore we Agasaro Nadia Farid tariki ya 14 Kamena 2021 bibarutse impanga z’abakobwa.

    Nyuma y’amezi abiri, uyu muraperi akaba yagagaragaje isura y’impanga zabo n’amazina babise, aho umwe yitwa Kamba undi akitwa Randa.

    Abinyujije kuri Instagram yashyizeho ifoto yabo iherekezwa n’amagambo agira ati “Abamalayika, Kamba na Randa.”

    Riderman ubwo yatangazaga inkuru nziza ko yibarutse impanga, yagize ati 'Mu buzima tugira inzozi tukifuza kuzigeraho, gusa hari n’ibitangaza Imana idukorera bigasa no kuzikabya nyamara ari ubuntu bw’Imana burenze ukwifuza kwacu, tariki ya 13 Kamena naryamye ndi umubyeyi w’umwana umwe w’umuhungu, tariki ya 14 Kamena mbyuka ndi umubyeyi w’abana batatu.'

    Yakomeje avuga ko atigeze na rimwe arota ari umubyeyi w’impanga ariko akaba ashimira Imana ko yabahaye abakobwa babiri beza.

    Ati 'Sinigeze na rimwe ndota ndi umubyeyi w’impanga, ariko Imana yangize we. Yaguye umuryango wacu, iduha abakobwa babiri beza kandi ndayishimira cyane.'

    Uyu muryango ufite abana batatu kuko wari usanzwe ufite umwana w’umuhungu witwa Rusangiza Eltad wavutse mu Kuboza 2015 ari na wo mwaka bakozemo ubukwe.

    Kamba na Randa, impanga za Nadia Agasaro na Riderman

    Riderman na Nadia Agasaro baheruka kwibaruka impanga

    Source : http://isimbi.rw/imyidagaduro/article/riderman-yerekanye-isura-y-impanga-aherutse-kwibaruka-ahishura-n-amazina-yazo

  • Ikorere umusaraba wawe! #rwanda #RwOT

    “Abwira bose ati 'Umuntu nashaka kunkurikira niyiyange, yikorere umusaraba we iminsi yose ankurikire, kuko ushaka kurengera ubugingo bwe azabubura, ariko utita ku bugingo bwe ku bwanjye ni we uzabukiza. 'Luka 9:23-24

    Aya ni amabwiriza asobanutse Yesu yaduhaye ku byo tugomba gukora, niba koko dushaka kumukurikira no kuba abigishwa be. Ariko se mu byukuri bisobanura iki “kwikorera umusaraba wanjye?”

    Duhereye kuri ibi, dushobora gusobanukirwa ko “Kwikorera umusaraba wanjye” ari ngombwa kugira ngo mbe umwigishwa wa Yesu, kandi bigomba kubaho buri munsi.

    Abantu ba mbere batumvira amategeko y’Imana, bazwi “Nk’abaguye”, kubera ko bari bafite “umubiri”, bituma barwanya Imana. Abantu bose barazwe uyu mubiri, kandi ugira ingaruka ku bitekerezo byacu, amagambo n’ibikorwa byacu.

    Uko wakwikorera umusaraba wawe, ni uko waha ubuzima bwawe Yesu ukiyemeza kureka gukora icyaha, no gukora ibyo nshaka, hanyuma utangire gukorera Imana. Hakanira kamere yawe ibyo ikwifuzamo, urwanye n’irari n’ibyifuzo bibi biva mu mubiri wawe byose.

    Kuba nahindura ibitekerezo byanjye bishya, ntabwo bivuze ko kamere yanjye yahindutse. Nahise mbona ko irari ryanjye rikiri rizima cyane, kandi ndacyageragezwa, iyi niyo mpamvu nkeneye kwikorera umusaraba wanjye buri munsi.

    Umusaraba wari uburyo busanzwe bwo guhanwa bwakoreshwaga n’abaroma bategekaga mu gihe cya Yesu. Nta muntu washoboraga kumanikwa ku musaraba ngo abeho. Nyuma yo kubabazwa igihe runaka, amaherezo birangira apfuye.

    None kwikorera umusaraba wanjye mu byukuri bivuze iki? “Kwikorera umusaraba wanjye” ni kintu kigomba kubaho mu bitekerezo byanjye. Iyo ibitekerezo bidashimisha Imana bije muri njye, ndabihakanira kandi “nkabica, nkabibamba” ku musaraba w’imbere muri njye .”Hanyuma rero noneho kwikorera umusaraba wanjye, ukuvuga “Oya!” ku bushake bwanjye, nkarwanya ukwifuza uko ari ko kose iyo ngeragejwe.

    Kamere irababara iyo mpakanye ibitekerezo by’icyaha nsanzwe nkunda gutekereza kuko binyuranyije n’ubushake bwImana. Nyamara ibyo bimpaho mu gihe mba nifuza gukora ibishimisha Imana. “Kwikorera umusaraba wanjye” bitera imibabaro kumubiri wanjye, kuko nywima icyo ushaka. Bibiliya yita ibi 'kubabaza kamere,' kandi Intumwa Petero yaranditse ati: “Nuko ubwo Kristo yababarijwe mu mubiri mube ari ko namwe mwambara uwo mutima we nk’intwaro, kuko ubabarizwa mu mubiri aba amaze kureka ibyaha”1 Petero 4:1

    Umwuka Wera ampa imbaraga zo gukomeza kubamba kamere yanjye ku musaraba, gukomeza kuvuga ngo 'Oya!' ku byo umubiri wanjye unsaba, kugeza irari ripfuye. Nibwo mba mbohowe rwose ingoyi z’icyaha.

    Nk’umuntu, umubiri wanjye wuzuye ukwikunda. Niyo mpamvu Yesu avuga ko ngomba kwiyanga no kwikorera umusaraba wanjye kandi buri munsi mu buzima bwanjye bwose. Uko mpora nikorera uyu musaraba wanjye umunsi kumunsi, buhoro buhoro, nzatsinda icyaha kandi nzasa na Yesu. Ubuzima buzagenda burushaho kuba bwiza mu gihe ntakitwara nk’uko nabimenyereye.

    Bible words explained: Take up your cross

    Source: Activechristianity.org

    [email protected]

    Source : https://agakiza.org/Ikorere-umusaraba-wawe.html

  • France: Sewabo wa Emmanuel Abayisenga ati: 'Ishyano yararikoze, ahasigaye ni ah'ubutabera' #rwanda #RwOT

    Ku wa mbere, Abayisenga yishyikirije polisi mu burengerazuba bw'Ubufaransa avuga ko yishe umupadiri witwa Olivier Maire wa paruwasi ya Nantes, impamvu zabimuteye ntiziramenyekana.

    Nyuma, mu bitangazamakuru no ku mbuga nkoranyambaga havuzwe amakuru menshi kuri Abayisenga no ku muryango we.

    Joseph Murasampongo utuye mu Bubiligi avuga ko ari murumuna wa se, yabwiye BBC ko ibi ari byo byatumye asohora itangazo kuko “nabonaga ko hari byinshi bari kwibeshyaho”.

    Kuri bimwe mu byavuzwe ahakana, agira ati: “We ku bimureba, ntabwo yigeze aba 'enfant soldat' [abazwi nka 'kadogo'] muri [ingabo za] FPR.”

    Ikinyamakuru La Croix cya kiriziya gatolika mu Bufaransa cyatangaje ko se wa Emmanuel Abayisenga yishwe mu buryo butazwi neza nyuma yo gukatirwa n'inkiko Gacaca ahamijwe uruhare muri jenoside.

    Murasampongo avuga ko uwo mukuru we Aloys Ndabakenga (se wa Abayisenga) atigeze aburanishwa cyangwa ngo akatirwe n'inkiko Gacaca.

    Ati: “Ntabwo ari ukuri, nta kintu cya Gacaca yigeze ajyamo, nta 'dossier' yigeze agira kugeza igihe yitabiye Imana, abavuga ibyo sinzi aho babivana.”

    Ahakana kandi ko nta bandi ba sewabo wa Abayisenge bakatiwe cyangwa bafunzwe mu Rwanda.

    Murasampongo avuga ko kuva Abayisenga yagera mu Bufaransa batigeze bavugana, ati: “…mbese nta byo gusabana byari bihari.”

    Avuga ko yumvise ko ubu yajyanywe mu bitaro bivura indwara zo mu mutwe kuko bari bazi ko asanzwe agira ibyo bibazo.

    Abajijwe niba hari icyo bagiye gukora, ati: “Nta cyo twakora, ishyano yararikoze, ahasigaye ubu ikibazo kiri mu maboko y'ubutabera, ni ugutegereza uko bizagenda.”

    BBC

    Source : https://umuryango.rw/amakuru/mu-mahanga/ubuzima/article/france-sewabo-wa-emmanuel-abayisenga-ati-ishyano-yararikoze-ahasigaye-ni-ah

  • Inzitizi n’ibihombo mu ishyirwa mu bikorwa ry’integanyanyigisho ishingiye ku bushobozi mu mashuri – #rwanda #RwOT

    Mu 2015 Minisiteri y’Uburezi binyuze mu kigo cy’igihugu gishinzwe guteza imbere uburezi (REB), yahinduye integanyanyigisho ishingiye ku bumenyi bw’umunyeshuri yagenderwagaho (Knowledge Based Curriculum: KBC) isimbuzwa igamije guha abanyeshuri ubushobozi (Competence Based Curriculum: CBC) uhereye mu cyiciro cy’incuke ukageza mu cy’ayisumbuye.

    Hashingiwe ku mwanzuro wa 13 w’Inama y’Umushyikirano yabaye mu 2015, wasabaga guteza imbere ururimi rw’Ikinyarwanda n’indangagaciro z’umuco nyarwanda mu mashuri yose, REB yashyizeho amabwiriza avuguruye agenga uko imfashanyagisho yagombaga gushyirwa mu bikorwa.

    Ayo mabwiriza yashyizweho umukono na Gasana Janvier wari Umuyobozi Mukuru wa REB icyo gihe, ku wa 8 Werurwe 2016, yagenaga ko Ururimi rwigishwamo ari Ikinyarwanda mu cyiciro cy’amashuri y’incuke; Ikinyarwanda kikigishwa nk’ururimi binyuze mu nkuru zisomwa na mwarimu, imivugo n’indirimbo hatezwa imbere ubushobozi bwo kumva, kuvuga no kwandika bibategura gukurikira integanyanyigisho y’Ikinyarwanda mu masomo yo mu mwaka wa mbere.

    Inyigisho zose uretse Icyongereza zagombaga gutangwa mu Kinyarwanda mu myaka yose y’icyiciro cya mbere cy’abanza.Ikinyarwanda cyari kigenewe amasomo umunani mu cyiciro cya mbere n’ane mu cyiciro cya kabiri mu cyumweru, n’ibindi.

    Aya mabwiriza kandi yavugaga ko integanyanyigisho ishingiye ku bushobozi izagenda isimbura isanzwe ku buryo byagombaga kugeza mu 2018 imaze kugera mu myaka yose, kuva mu cyiciro cy’incuke, icy’abanza n’ayisumbuye.

    Nyamara muri Kanama 2020 guverinoma y’u Rwanda yafashe umwanzuro ko amasomo yose azajya yigishwa mu Cyongereza kuva mu mwaka wa mbere kugeza mu wa gatandatu w’amashuri abanza.

    Ni mu gihe REB yari yaramaze guha isoko sosiyete Printex ryo gucapa ibitabo bingana na 1.036.000 by’imibare byo mu mwaka wa kabiri n’uwa gatatu w’amashuri abanza byari byanditse mu Kinyarwanda.

    Ibi bitabo [by’imfashanyigisho] byagombaga kwifashishwa mu ishyirwa mu bikora rya CBC, byari byaramaze kwishyurwa 1.871.888. 752 Frw bivuze cyabaye igihombo kuko byahise bita agaciro.

    Ikindi ikigo REB cyihaye gahunda yo gukwiza mu mashuri ibitabo byandikiwe imbere mu gihugu, yatangijwe mu 2017. Ibitabo byandikiwe mu gihugu byagombaga gutangira gukoreshwa mu ntangiriro z’umwaka w’amashuri wa 2018.

    Nyamara Umugenzuzi w’Imari ya Leta mu 2020 yagaragaje ko kugeza mu Ukwakira 2020 byari bitaracapwa ngo bigezwe mu mashuri mu gihe iyi nteganyanyigisho nshya yari yaratangijwe mu 2015.

    Mu Ukwakira 2020, mu mashuri 38 yasuwe hirya no hino mu gihugu, 14 byagaragaye ko yari ataragezwamo igitabo na kimwe mu by’amasomo yigishwa.

    Umugenzuzi w’Imari ya Leta yavuze ko ibi bigira ingaruka ku ireme ry’uburezi n’uburyo abanyeshuri bitwara mu bizamini bikaba biteye impungenge ko bizatuma intego za CBC zitagerwaho.

    Amasomo ateganyijwe mu cyiciro cya mbere cy’amashuri abanza ni Ikinyarwanda, Icyongereza, Imibare, amasomo mbonezamubano n’ubumenyi mu by’iyobokamana, ubumenyi n’ikoranabuhanga riciriritse, ubuhanzi n’ubugeni, igororangingo na siporo.

    Ikoranabuhanga rya ‘e-solution system’ ryaraguzwe ribura umumaro

    Ni ikoranabuhanga ryari rigenewe gahunda ya mudasobwa imwe ku mwana (One Laptop per Child) ngo izi mudasobwa zibashe kwakira amasomo y’Imibare, Icyongereza na Siyansi ku banyeshuri biga kuva mu mwaka wa kane kugeza mu wa gatandatu w’amashuri abanza.

    Muri Nzeri 2015, REB yasinyanye amasezerano na sosiyete Hicommands PVT Ltd, afite agaciro ka 1.084.963.955 Frw yagombaga gutanga serivisi za e-solution system. Amasezerano yagombaga kumara iminsi 120 y’akazi, ni ukuvuga amezi ane.

    Impungenge zishingiye ku kuba yarashyizweho umukono mu cyiciro cya nyuma cy’integanyanyigisho ishingiye ku bumenyi (KBC) yendaga kubererekera inshya (CBC).

    Ni ukuvuga ko iri koranabuhanga ryahise rita agaciro kuko ritari rigikenewe nyamara REB yaramaze kwishyura 99% by’agaciro k’amasezerano yarigengaga.

    Integanyanyigisho ishingiye ku bushobozi bw’umunyeshuri (CBC), igena ko abanyeshuri bigira mu matsinda

    source : https://ift.tt/3gg07Wn

  • Didier Bizimana watoje APR FC yanyomoje uwamubitse – #rwanda #RwOT

    Ku wa 11 Kanama 2021 ni bwo umuntu witwa Muhoza Aline abinyujije kuri Facebook yashyize hanze ubutumwa buvuga ko se yitabye Imana. Ubu butumwa bwari buherekejwe n’ifoto ya Didier Bizimana.

    Yagize ati “ Papa ugiye nkigukeneye, gusa Imana ikwakire mu bayo.”

    Ibi byatumye IGIHE ihamagara Bizimana Didier kuri telefone ye ngendanwa, aritaba na we yemeza ko iyo nkuru yayimenye ndetse anashimangira ko byamubabaje.

    Yagize ati “Nanjye ni umuntu w’inshuti yanjye wanyandikiye kuri WhatsApp ndamusubiza ahita ambaza ngo ni Didier turi kuvugana ndemera, yahise ampamagara arambwira ngo hari umuntu yabonye yiyita ko ndi papa we avuga ko napfuye ngo kandi nduhuke neza ngo ngiye bakinkeneye.”

    Yavuze ko acyumva iyo nkuru byamutunguye cyane ndetse biranamubabaza.

    Ati “Nanjye byambabaje cyane kuko nahise nibaza ngo iyo mba mfite umurwayi mu bitaro akabyumva yari guhita apfa. Ariko nabibajije umuntu wo kuri RIB ambwira ko ari ba batekamutwe bagenda biyitirira abantu bashaka kwiba abantu”

    Yaboneyeho gusaba abantu batandukanye kutajya bifuriza abantu ibibi kuko ibintu byose bikorwa n’Uwiteka.

    Bizimana Didier, ni umugabo w’abana batandatu wakiniye APR FC imyaka 12 ayivamo ajya muri Kiyovu Sports nyuma yerekeza muri Mukura, aha akaba ariho yarangirije ibijyanye no gukina umupira w’amaguru atangira urugendo rwo gutoza.

    Didier Bizimana watoje APR FC yanyomoje aya makuru yavugaga ko yitabye Imana

    source : https://ift.tt/3CGBGuu

  • Venant Rutunga woherejwe n’u Buholandi yatangiye kuburanishwa ku byaha bya Jenoside – #rwanda #RwOT

    Rutunga yaburanye ku ifungwa n’ifungurwa ry’agateganyo, nyuma y’uko kuri uyu wa Kabiri urubanza rwe rwari rwasubitswe kuko uregwa yashakaga kuburana imbonakubone aho kwifashisha ikoranabuhanga.

    Venant Rutunga yahoze ari umuyobozi mu kigo cy’ubushakashatsi mu by’ubuhinzi, ISAR Rubona, mbere ya Jenoside, uyu munsi ni mu Karere ka Huye.

    Muri icyo kigo bivugwa ko mu 1994 abatutsi barenga 1000 bari barahahungiye ari we wahamagaye Interahamwe bakahabicira.

    Ahagana saa tatu zuzuye kuri uyu wa Kane nibwo inteko y’umucamanza umwe n’umwanditsi w’urukiko yinjiye mu cyumba cy’iburanisha. Rutunga yunganiwe mu mategeko na Me Sebaziga Sophonie mu gihe Ubushinjacyaha bwari buhagarariwe n’abashinjacyaha babiri.

    Umucamanza yatangiye asoma umwirondoro wa Venant Rutunga, uregwa yemera ko umwirondoro ari uwe. Umucamanza yamwibukije ko akekwaho gukora icyaha cya Jenoside.

    Umucamanza yatangiye aha umwanya abaregwa ngo bagire icyo bavuga ku bijyanye n’icyaha cya Jenoside Rutunga acyekwaho maze Sebaziga Sophonie ahita ahera ku nzitizi mu rubanza ari kuburana.

    Yavuze ko uwo yunganira afunzwe binyuranyije n’amategeko kuko afungiye muri Gereza ya Nyarugenge, yakabaye afungiye mu bugenzacyaha kuko atarakatirwa by’agateganyo.

    Me Sebaziga kandi yavuze ko muri dosiye y’uwo yunganira, harimo amakuru y’uko yakatiwe n’Inkiko Gacaca igifungo cya burundu, bityo ko yakabaye ajya kurangiza igihano yakatiwe aho gusubizwa mu nkiko.

    Umucamanza yahaye umwanya Rutunga ngo agire icyo avuga ku gihano yahawe n’Inkiko Gacaca niba akizi, undi asubiza ko ntabyo azi.

    Ubushinjacyaha bwasobanuye impamvu Rutunga adafungiye muri Gereza ya Nyarugenge ahubwo ahacumbikiwe kandi biri mu masezerano Leta y’u Rwanda yagiranye n’urukiko mpuzamahanga mpanabyaha rwashyiriweho u Rwanda (ICTR).

    Bwavuze ko hari n’abandi bagiye boherezwa n’ibihugu by’amahanga bagacumbikirwa muri ubwo buryo. Ikindi ngo aho afungiye afashwe neza.

    Ku wa 26 Nyakanga 2021 nibwo ubutabera bw’u Buholandi bwohereje Venant Rutunga mu Rwanda. Venant Rutunga yatawe muri yombi mu 2019 afungirwa mu Buholandi aho yafashwe yari ahamaze imyaka isaga 10.

    Ubwo Rutunga yari ageze ku rukiko rw’ibanze rwa Kicukiro

    Akigera mu cyumba cy’iburanisha, Rutunga yakuweho amapingu

    Aha Rutunga yaganiraga n’umunyamategeko we mbere yo gutangira iburanisha

    Amafoto: Nkundineza Jean Paul

    source : https://ift.tt/2U9AwX0

  • Abanyamerika bagiye gutangira kwiga muri Kaminuza y’u Rwanda – #rwanda #RwOT

    Ibi byagarutsweho ubwo itsinda ry’abayobozi muri Kaminuza ya Kent basozaga urugendo rwabo rw’ibyumweru bibiri mu Rwanda, bagaragarizaga Ambasaderi wa Amerika mu Rwanda Peter Vrooman ibikubiye mu masezerano bagiye kugirana na Kaminuza y’u Rwanda (UR).

    Bimwe mu bikubiye muri ayo masezerano harimo guhererekanya abanyeshuri hagati ya Kaminuza zombi, aho Abanyarwanda bazajya boherezwayo ndetse n’Abanyamerika bakajya mu Rwanda kuhavoma ubumenyi.

    Umwe mu bayobozi ba Kaminuza ya Kent ushinzwe Uburezi Mpuzamahanga, Dr Marcello Fantoni yavuze ko biteguye gutangira kohereza abanyeshuri mu Rwanda kandi ko biteze uburezi bufite ireme bazahakura.

    Yagize ati “Turifuza kugira ikigo aha ngaha twizeye ko Kaminuza izabyemeza kandi tuzagira gahunda y’uko abanyeshuri bacu bazajya boherezwa mu Rwanda, baje kuvoma ubumenyi no kwiga amateka y’iki gihugu. Kuri ubu imibare iragoye guhita umuntu ayivuga ariko twifuza gutangira mu mpeshyi ya 2022. Dusigaje kwicara tukaganira na Leta Zunze Ubumwe za Amerika.”

    “ Twifuza kohereza nibura abanyeshuri hagati ya 20-50 ku mwaka. Twamaze kuvugana n’ubuyobozi gushyiraho gahunda yo kwiga mu mpeshyi by’umwihariko ku banyeshuri bacu kandi barabyemeye.”

    Yavuze ko nta mpungenge bafite ku bumenyi abanyeshuri bavuye muri Amerika bazakura muri Kaminuza y’u Rwanda.

    Ati “ Twizeye ko bazigishwa neza n’abarimu bo muri Kaminuza y’u Rwanda kandi tuzahitamo amasomo bashobora kutwigisha ariko tuzibanda cyane ku mateka y’imbere mu gihugu. Twifuza ko babona igihugu kandi bakakigiraho bakumva uko ubuzima bumeze. Nizera ko kuba mukuru muri Amerika ari inshingano zo kumenya n’ubuzima bw’ab’ahandi.”

    Umuyobozi wungirije ushinzwe ubushakashatsi n’imyigire muri Kaminuza y’u Rwanda, Prof. Nosa Egiebor, yabwiye IGIHE ko Kaminuza y’u Rwanda yiteguye kwakira abanyeshuri baturutse muri Amerika no kubaha ubumenyi buhagije.

    Ati “Turiteguye neza. Ndabizi ibyo abantu batekereza kumva ngo umunyeshuri wo muri Amerika yaje kwiga mu Rwanda kandi Kaminuza y’u Rwanda iri kwitegura kubakira ndetse tuzakora ibishoboka byose. Icya mbere dufite ikirere kiberere kwiga n’ubushakashatsi kandi na Leta y’u Rwanda iri kudufasha cyane. Aya ni andi mahirwe akomeye tubonye y’imikoranire.”

    Ambasaderi wa Leta Zunze Ubumwe za Amerika mu Rwanda, Peter Vrooman, yavuze ko nka Ambasade bazatanga umusanzu wo kuba umuhuza hagati ya Kaminuza zombi binyuze mu gufasha abanyeshuri boherezwa na zo.

    Yagize ati “Ubufatanye hagati ya Kaminuza zombi ni kimwe muri byinshi dukorana. Ni urugero rwiza, njyewe nka Ambasaderi natera inkunga. Icyo rero tuzakora nka ambasade ni ukuba ikiraro cyo gufasha ibigo byombi guhuza umurongo. Dusanzwe dufite n’izindi gahunda zitandukanye bityo dushobora no gutanga buruse ku banyeshuri b’impande zombi. Tuzafasha abanyeshuri bavuye mu Rwanda bagiye muri Amerika kandi kimwe n’abo Kent State izohereza bifuza kwigira mu bihugu by’amahanga nk’u Rwanda.”

    Kaminuza ya Kent n’iy’u Rwanda bigiye kugirana amasezerano anyuranye agamije guteza imbere ireme ry’uburezi mu Rwanda, harimo gutangiza amasomo mashya, kongera imbaraga mu masomo yari isanzwe ahari no gufatanya mu bushakashatsi.

    Pr Lyambabaje Alezandre yasabye ko ayo masezerano yashyirwamo imbaraga akava mu mpapuro

    Umuyobozi wungirije ushinzwe ubushakashatsi n’imyigire muri Kaminuza y’u Rwanda, Prof. Nosa Egiebor yavuze ko Kaminuza y’u Rwanda yiteguye kwakira abanyeshuri b’Abanyamerika

    Ambasaderi Peter Vrooman yavuze ko biteguye kuba ikiraro gihuza Kaminuza Zombi

    Bagaragaje ko mu gihe bamaze mu Rwanda bamaze kubona ko UR yafasha abanyeshuri babo kumenya amateka y’u Rwanda

    Kaminuza y’u Rwanda yageneye impano Amabasaderi Peter Vrooman

    Kaminuza zombi zigiye kugirana amasezerano agamije guteza imbere uburezi mu Rwanda

    Amafoto: Ntabareshya Jean de Dieu

    source : https://ift.tt/3m13bZU