Blog

Ni umunsi wizihizwa buri wa 21 Kanama hagamijwe ubukangurambaga ku kwihangira umurimo, guhanga udushya n’imiyoborere mu Isi yose ari nako hashimirwa imishinga igitangira.

Uwo munsi kandi ni amahirwe yo gukora isuzuma kuri gahunda zitandukanye zashyiriweho gushyigikira ba rwiyemezamirimo ndetse no kubongerera ingufu bakarushaho kugagaragaza umusanzu wabo mu ngeri zitandukanye.

African Management Institute (AMI) ni kimwe mu bigo bitera ingabo mu bitugu ba rwiyemezamirimo bafite intumbero nziza bagatera imbere, binyuze mu mahugurwa bahabwa no gufashwa gushyira mu ngiro ibyo bahugurwa.

Gifasha ba rwiyemezamirimo kibaha ibikoresho batangiza imishinga yabo, kigafasha ibigo guhugura abakozi babyo, kikanagira gahunda zo gutegura urubyiruko rugiye kwihangira imirimo.

Amasomo ya AMI atangwa mu buryo bw’iya kure n’ubw’imbona nkubone, aho abantu bashobora guhurira hamwe cyane cyane nko mu bihe byo kwimenyereza no gushyira mu ngiro ibyo biga, gusa muri ibi bihe bya COVID-19, byose birakorerwa ku ikoranabuhanga ku Mugabane wose.

AMI yakoranye n’imishinga ndetse n’ibigo bitandukanye ishyigikira ba nyirayo ngo bayubake neza kandi bayizamure muri Afurika. Iyo irimo Uber,Nestle,Radisson Blu,Mastercard Foundation,USAID,Shell Foundation na Equity Bank.

Yahuguye abarenga 30.000 mu bihugu birenga 30, ikaba imaze kugira Ibiro i Nairobi muri Kenya, i Kigali mu Rwanda n’i Johannesburg muri Afurika y’Epfo.

Mu Rwanda, hari igisekuru gishya cya ba rwiyemezamirimo b’abagore bagenda bagura imbibi,bubaka inganda bagahanga imirimo.

Batanu muri bo basangije abandi ibibatera ingufu zo gukora cyane ndetse batanga inama kuri bagenzi babo by’umwihariko abahuye n’ingaruka za COVID-19 zikibazonga.

Igiraneza Pacifique ufite iduka muri Kicukiro, yagize ati “Ntugahagarare. Kandi niba utaranatangira umushinga wawe neza, tangiza ibyo ufite uzagenda ukura buhoro buhoro.”

Umutesi Vanessa ufite sosiyete ya Isaro Ltd muri Nyarugenge, yabwiye ba rwiyemezamirimo ko igifite agaciro ari ibitekerezo bafite mu mutwe, bityo ko ahazaza heza hazava mu gukora cyane.

Ati “Ntugakomeze kwicara utinya gutangiza umushinga. Icy’ingenzi ni igitekerezo wifitemo;kora cyane kugira ngo ugere ku ntego zawe ndetse wiyubakire ahazaza heza.”

Umwali Nadine ukorera ubworozi bw’inkoko i Nyamagabe, amaze kwiteza imbere ku buryo hari abaza kumwigiraho bitewe n’ akamaro umushinga we ugirira umuryango n’igihugu muri rusange.

Yagize ati “Ni byiza kwikorera. Gutangira umushinga ntibisaba igishoro gihambaye. Icyo ukeneye ni igitekerezo gifite ireme gusa.”

Umwali yavuze ko ari ingenzi kwitabira amahugurwa n’andi masomo atandukanye yigisha ibirebana n’imishinga kuko ba rwiyemezamirimo bahigira byinshi.

Ishimwe Valentine uranguza imyenda muri Nyarugenge yishimira ko ubu abasha kwizigama ndetse akaba azabasha gushora imari no mu yindi mishinga mu bihe bizaza.

Yagize ati “Ntugacike intege mu gihe umushinga wawe utagenda neza, ni bumwe mu buryo bwo guhangana. Umushinga umeze nk’ubuzima bwacu bwa buri munsi, ushobora kwishima none ejo ukababara. Ku bw’ibyo rero tugomba kwihangana kandi tugakora cyane.”

Mukandayambaje Claudine ufite umushinga wo gukora kopi z’inyandiko i Karongi, yagize ati “Ntugahagarike na rimwe n’aho waba wahuye n’igihombo. Uko ni ko imishinga imera.”

Kuva COVID-19 yugariza Isi, AMI yibanze ku gushyigikira imishinga mito n’iciriritse yongerera ba nyirayo ubumenyi mu buryo bw’imikorere hagamijwe kubarinda gufunga imiryango.

Ku wifuza kwifatanya na AMI gushyigikira ba rwiyemezamirimo bisaba ibintu bike cyane.

Niba ufite umushinga muto cyangwa ucirirtse wakwiga ku bijyanye na gahunda y’umwiherero utuma imishinga ikomeza gukora no mu bihe bigoye ndetse n’igamije gutuma umushinga ukomera kurushaho kugira ngo urinde ukuramba k’uwawe n’iterambere ryawo ryihuse, binyuze mu bumenyi bw’ibanze ku mishinga uhabwa.

Ubaye warigeze kwitabira gahunda za AMI cyangwa uri kuzitabira ubu ngubu, wakwegera ba rwiyemezamirimo bandi ukabasangiza iyi nkuru ndetse ukabakangurira gutera intambwe ibafasha kugera ku bumenyi bw’ iterambere ry’imishinga yabo.

Ku bigo n’imiryango ishaka kugera ku mishinga myinshi, mwakohereza ubutumwa kuri [email protected] .

N’ahandi hose ku mbuga nkoranyambaga ushaka AMI urayihasanga haba kuri Twitter, Facebook,na Instagram ukaba wamenya amakuru yayo agezweho byoroshye.

Igiraneza Pacifique ufite iduka muri Kicukiro, yavuze ko biba byiza iyo umuntu atangiriye kuri duke afite

Mukandayambaje Claudine ufite umushinga wo gukora kopi z’inyandiko i Karongi yasabye abantu kudacika intege

Umwali Nadine akorera ubworozi bw’inkoko i Nyamagabe

Ishimwe Valentine uranguza imyenda muri Nyarugenge yishimira ko ubu abasha kwizigama

Umutesi Vanessa ufite sosiyete ya Isaro Ltd muri Nyarugenge, yabwiye ba rwiyemezamirimo ko igifite agaciro ari ibitekerezo bafite mu mutwe

Kuri uyu wa Mbere, tariki ya 8 Ugushyingo 2021, ni bwo u Rwanda n’u Bushinwa byizihije isabukuru y’imyaka 50 y’umubano wabyo. Ibi birori byabereye muri Ambasade y’u Bushinwa mu Rwanda mu Mujyi wa Kigali rwagati.

Ambasaderi w’u Bushinwa mu Rwanda, Rao Hongwei, yavuze ko mu myaka 50 ishize, umubano w’ibihugu byombi warushijeho gushinga imizi kubera ubwubahane.

Yagize ati “Imikoranire yacu mu bucuruzi n’ubukungu yarushijeho kuba myiza. U Bushinwa bwishimiye kuba umufatanyabikorwa wa mbere w’u Rwanda mu bijyanye n’ubucuruzi ndetse no kubaka ibikorwa by’imishinga itandukanye.’’

Mu 2020, ubucuruzi bw’u Rwanda n’u Bushinwa bwageze kuri miliyoni 321$ nubwo byari mu bihe bya COVID-19.

Ambasaderi Rangwei yavuze ko ubucuti bw’u Rwanda n’u Bushinwa atari impanuka kuko bwagezweho kubera ibikorwa byashyizwemo imbaraga.

Ati “Uyu mwaka wahuriranye n’isabukuru y’imyaka 100 ishize Ishyaka rya Communist Party rishinzwe. Mu myaka yahise, Communist Party na RPF zasangiye ubunararibonye ku bijyanye n’imiyoborere.’’

Ubwo yari mu ruzinduko rwe muri Nyakanga 2018, Perezida Xi Jinping, yasuye u Rwanda mu rugendo rwasize hasinywe amasezerano 15 arimo ubucuruzi bwo kuri internet, ibikorwaremezo no gutoza abanyempano.

Yakomeje ati “Ibigo byo mu Bushinwa biri gutoza urubyiruko rw’u Rwanda ubumenyi mu bijyanye n’ikoranabuhanga rya mudasobwa n’ubucuruzi bwo kuri internet. Mu kwezi gushize hasinywe amazezerano ashyiraho Huawei ICT Academy, azafasha Huawei guhugura no gutanga impamyabushobozi kuri kaminuza zo mu Rwanda.’’

Ambasaderi Hongwei yagaragaje ko ibihugu byombi byakoranye mu nzego zitandukanye.

Ati “Abanyarwanda benshi bahawe buruse zo kwiga mu Bushinwa buri mwaka. Abashinwa benshi batangiye kwiga byinshi ku Rwanda no kuza hano kwirebera ibyiza birurimo n’ishoramari.’’

Mbere ya COVID-19 yagaragaye mu Bushinwa mu mpera za 2019, abanyeshuri b’Abanyarwanda bagera ku 1600 bigaga muri iki gihugu. Kuva mu 1976, u Bushinwa bwatangaga buruse ku Banyarwanda ndetse mu myaka ishize, abagera ku 100 babyungukiyemo.

Mu buzima nibura kuva mu 1982, u Bushinwa bwohereje mu Rwanda abaganga 258 bahageze mu matsinda 21, bavura abaturage 700.000 barimo 37.500 babazwe.

Iki gihugu kandi kirateganya kuvugurura Ibitaro bya Masaka cyagize uruhare mu kubaka ndetse n’ibya Kibungo byaguwe ku nkunga y’u Bushinwa mu 1992.

  U Rwanda rwijeje gukomeza gukorana n’u Bushinwa mu ngezi zitandukanye

Minisitiri w’Ububanyi n’Amahanga w’u Rwanda, Dr Vincent Biruta, yashimye imyaka 50 y’umubano w’ibihugu byombi n’uruhare rw’u Bushinwa mu mishinga iteza urwa Gasabo imbere.

Yagize ati “Kuva ku wa 12 Ugushyingo 1971 ndetse na nyuma ya Jenoside yakorewe Abatutsi, twakoranye bya hafi mu kubaka umubano ushingiye kuri politiki n’imibereho myiza y’abaturage.’’

U Bushinwa buri ku isonga mu bihugu bishora imari mu Rwanda, ndetse ishoramari ryabwo rimaze gufasha mu ihangwa ry’imirimo itandukanye.

Minisitiri Dr Biruta yavuze ko umubano hagati y’ibihugu byombi wakomeje kuba mwiza mu nzego zose.

Ati “Ibi birori ni umwanya udasanzwe wo kuzirikana ibyo twagezeho mu myaka 50 ishize. [….] Ndizeza ko igihugu cyacu na guverinoma yanyu bizakomeza gukorana mu kunoza umubano n’imikoranire bishingiye ku isanzweho.’’

Yashimye ko iki gihugu cyafashije u Rwanda mu bihe bya COVID-19 aho cyaruhaye dose z’inkingo 500.000 zo mu bwoko bwa Sinopharm.

Ati “Inkingo zafashije kandi zizakomeza gufasha mu rugamba rwacu rwo guhangana n’icyorezo cya COVID-19.’’

U Rwanda n’u Bushinwa bifatanya mu mishinga y’ishoramari, ibikorwaremezo, ikoranabuhanga, ubucukuzi bw’amabuye y’agaciro, ubwikorezi bwo mu kirere, uburezi, kubaka ubushobozi, ubuzima, ubucuruzi, ubukerarugendo, ubuhinzi, umutekano n’indi iteza urwa Gasabo imbere.

Mu mwaka ushize wa 2020, u Bushinwa bwohereje mu Rwanda ibicuruzwa bifite agaciro ka miliyoni 282$ mu gihe ibyo u Rwanda rwoherejeyo bingana na miliyoni 38,7$. Ishoramari ryabwo ryageze kuri miliyoni 23,16$ rivuye kuri miliyoni 17$ yo mu 2019.

Imibare yo mu 2020 yerekana ko muri uwo mwaka ingano y’ibikorwa byashibutse ku ishoramari ry’u Bushinwa ringana na miliyoni 191$.

Mu bijyanye n’ibikorwaremezo, u Bushinwa ni bwo bwatanze inkunga nini mu kubaka imihanda myinshi mu Rwanda; bwafashije igihugu mu iyubakwa ry’ingana na 70% by’iyo gifite.

Mu birori byo kwishimira imyaka 50 y’umubano w’ibihugu byombi, hanatangajwe abatsinze mu Irushanwa ry’amafoto ryateguwe na Ambasade y’u Bushinwa mu Rwanda mu kwishimira igihe gishize ibihugu byombi bikorana.

Ambasaderi w’u Bushinwa mu Rwanda, Rao Hongwei na Minisitiri w’Ububanyi n’Amahanga w’u Rwanda, Dr Vincent Biruta ni bo bari abashyitsi bakuru mu birori byo kwizihiza imyaka 50 y’umubano w’ibihugu byombi

Byitabiriwe n’abantu bake hubahirizwa amabwiriza yo kwirinda COVID-19

Bake mu Bashinwa baba mu Rwanda ni bo bitabiriye ibi birori

Abayobozi batandukanye ubwo haririmbwaga indirimbo zubahiriza ibihugu byombi

Ambasaderi w’u Bushinwa mu Rwanda, Rao Rangwei, yavuze ko ubucuti bw’ibihugu byombi bwagezweho kubera ibikorwa byashyizwemo imbaraga

Minisitiri w’Ububanyi n’Amahanga w’u Rwanda, Dr Vincent Biruta, yavuze ko ari ingenzi kubakira ku mubano w’ibihugu byombi n’abayobozi babyo

Ambasaderi w’u Bushinwa mu Rwanda, Rao Hongwei na Minisitiri w’Ububanyi n’Amahanga w’u Rwanda, Dr Vincent Biruta bakora ikimenyetso cyo gusangira mu kwishimira umubano umaze imyaka 50 ushinze imizi

Abatsinze mu marushanwa atandukanye batangarijwe muri iki gikorwa

Muri ibi birori hatangarijwemo abatsinze mu marushanwa yo kwishimira umubano w’imyaka 50 y’u Rwanda n’u Bushinwa

Ambasaderi w’u Bushinwa mu Rwanda, Rao Hongwei, asuhuzanya na Minisitiri w’Ububanyi n’Amahanga w’u Rwanda, Dr Vincent Biruta nk’ikimenyetso cy’umubano w’ibihugu byombi

Ambasaderi w’u Bushinwa mu Rwanda, Rao Hongwei na Minisitiri w’Ububanyi n’Amahanga w’u Rwanda, Dr Vincent Biruta bafata ifoto y’urwibutso

Amafoto: Igirubuntu Jean Darcy

Ni ibikoresho byatanzwe kuri uyu wa Mbere, tariki ya 8 Ugushyingo 2021, mu Kagari ka Kintambwe ku Kiyaga cya Rweru.

Uyu muhango wabanjirijwe n’ibiganiro byitabiriwe n’ubuyobozi bw’Akarere ka Bugesera ndetse n’ubwa Komini Busoni iherereye mu Ntara ya Kirundo.

Nyuma y’ibiganiro ubuyobozi bwa Bugesera bwashyikirije abo mu Burundi ibikoresho bitandukanye birimo ubwato gakondo 22, ingashya 31, imitego 23 n’ibindi byafatanywe abarobyi b’Abarundi barimo kuroba mu Kiyaga cya Rweru barenze imbibi z’igihugu cyabo.

Umuyobozi wa Komini Busoni, Nsavyimana Dismas, yishimiye iki gikorwa avuga ko ari umusaruro w’ibiganiro biherutse guhuza ba Guverineri b’Intara ku mpande zombie.

Yijeje ubufatanye mu gukomeza kwigisha abaturage amategeko agenga umupaka no guhana abawukoresha mu buryo bunyuranyije n’amategeko.

Umuyobozi w’Agateganyo w’Akarere ka Bugesera, Mugiraneza David, yavuze ko impande zombi zumvikanye gufatanya mu gihe hari umuturage bigaragaye ko yarengereye imbibi zigakorana mu buryo bworoshye.

Ati “Ikindi baremera ko abantu babo barengereye bakoze amakosa bakemera ko bagomba kubigisha nkuko twagiranye ibiganiro. Icyo twemeranyijwe rero ni uko hano hagati mu kiyaga mu gihe umuntu yafashwe yarenze imbibi yaba Umunyarwanda cyangwa Umurundi dukwiriye guhamagara Marine yaho, ubu bahanye nimero bazajya baganira bakagaragarizanya uburyo abaturage barengereye tugafatanya mu gukemura icyo kibazo.”

Umuyobozi wa Koperative y’Abakorera Uburobyi muri Rweru, Niyonzima Vincent, yavuze ko yishimiye kuba ibihugu byombi biri kuzahura umubano umaze iminsi urimo agatotsi.

Yavuze ko mbere nk’abaturage bahahiranaga ku myaka bamwe badafite ariko ngo kuri ubu hashize imyaka myinshi bidakorwa ariko ngo bafite icyizere ko imibanire izongera ikagenda neza.

Ibiganiro byahuje impande zombi byasojwe haba ubusabane bw’abayobozi bari bahagarariye uturere duhana imbibi, ibi bikaba bibaye nyuma yaho ku wa 25 Ukwakira 2021 ba Guverineri b’Intara y’Iburasirazuba, Amajyepfo ndetse n’abo mu Ntara ya Kirundo na Muyinga ku ruhande rw’u Burundi bagiranye ibiganiro bigamije kunoza umubano w’ibihugu byombi.

Bakaba bariyemeje kujya bahura nibura inshuro imwe mu gihembwe mu rwego rwo kurebera hamwe uko umubano wifashe ku mpande z’ibihugu byombi no gukemura bimwe mu bibazo biba bihari.

Iki gikorwa cyabaye hubahirizwa ingamba zo kwirinda ikwirakwira rya COVID-19

Impande zombi zemeranyije guhana amakuru mu gihe hari abaturage bakoze ibinyuranye n’amategeko birimo kurenga imbibi

Ibikoresho bitandukanye byafatanywe abarobyi bo mu Burundi bageze mu mazi y’u Rwanda

Akarere ka Bugesera kashyikirije u Burundi ibikoresho byafatiwe mu Kiyaga cya Rweru birimo imitego 23, amato gakondo 22, ingashya n’ibindi byafatanywe abarobyi b’Abarundi barimo kuroba barenze imbibi

Muri ibi bikoresho byafashwe harimo ubwato bwa gakondo 22

Aya mahugurwa yatangiye ku wa Mbere tariki 8 Ugushyingo 2021 akazasozwa ku wa 19 Ugushyingo 2021 yitabiriwe n’abasirikare bakuru 20 b’u Rwanda; agamije kubongerera ubumenyi n’ubushobozi bizatuma baba abatoza mu bya gisirikare b’izindi ndorerezi z’Umuryango w’Abibumbye zikunze gukenerwa mu bikorwa byo kubungabunga amahoro ku Isi.

Umuyobozi w’Ikigo cy’Igihugu cy’Amahoro, Rtd Col Jill Rutaremara, yasabye abayitabiriye kurushaho gukarishya ubumenyi bari bafite bakahungukira ubundi kuko bagiye kuba abatoza no gusangiza abandi ubumenyi bafite bagamije gusenyera umugozi umwe.

Yagize ati “Aya mahugurwa yagenewe abatoza bazatoza izindi ndorerezi mu bya gisirikare z’Umuryango b’Abibumbye. Icyo tubasaba ni ukumva neza aya masomo bagiye guhabwa kuko azabongerera ubumenyi ariko nabo bagasangizanya ubumenyi bafite kuko basanzwe ari indorerezi hari aho babikoze henshi, icyo bagiye guhabwa ni ubumenyi n’ubushobozi bwo kuba na bo bagiye kuba abatoza.”

Uwari uhagarariye Ikigo cy’Abongereza giteza imbere Amahoro, Ishami rya Afurika, British Peace Support Team Africa, Lt Col Mike Lynskey, avuga ko bahisemo gufatanya n’u Rwanda mu gushyigikira ibikorwa byo kubungabunga amahoro ku Isi.

Yagize ati “Dusanzwe dufasha kubaka ubushobozi bw’ingabo muri Afurika by’umwihariko u Rwanda kubera imikoranire myiza dufitanye. Ubu turi kubaka ubushobozi bw’aba basirikare bakuru ngo bashobore kugira ubumenyi buhagije kandi bazabusangiza n’abandi, twaboherereje impuguke zirabigisha kandi tuzakomeza gufatanya.”

Bamwe mu bitabiriye aya mahugurwa bemeza ko agiye kubabera umwanya wo kurushaho gusobanukirwa n’ibyo bakora kandi ko ari n’igihe kiza cyo guhuza ubumenyi no kubusangira bagamije kuba abanyamwuga nyabo mu byo bakora.

Lt Col Bwenge Jimmy ni umwe muri bo yagize ati “Turi hano ngo twongererwe ubumenyi n’ubwo twari dusanzwe tubikora ariko ubu bwo ni umwanya mwiza ngo duhuze ubumenyi kandi turizera ko ubwo tuzakura hano tuzabusangiza abandi kugira ngo tugire abandi benshi bafite ubumenyi mu byo kuba indorerezi.”

Maj Mary Kazarwa yavuze ko ibyo bazakura muri aya mahugurwa byinshi kandi ko na bo bazabyigisha abandi bagamije ko ibikorwa byo kuba indorerezi mu by’umutekano bitanga umusaruro.

Yagize ati “Muri aya mahugurwa tugiye kwigiramo byinshi kuko turi gutozwa kuzaba abatoza, ubwo tuzaba tuvuye hano tuzatoza n’abandi kugira ngo ibikorwa byo kuba indorerezi mu byo kubungabunga amahoro bigerweho.’’

Aya mahugurwa y’abatoza b’indorerezi mu bikorwa by’Umuryango w’Abibumbye byo kubungabunga amahoro ku Isi ari kubera mu Kigo cy’Igihugu cy’Amahoro kiri i Nyakinama. Yateguwe na Minisiteri y’Ingabo ku bufatanye na British Peace Support Team Africa BPST-A, yitabiriwe n’abasirikare bakuru kuva ku bafite ipeti rya ‘Captain’ kugeza ku bafite irya Lieutenant Colonel 20 ba RDF bazayamaramo ibyumweru bibiri.

Abasirikare bakuru 20 ba RDF mu bitabiriye amahugurwa y’indorerezi za Loni yatangijwe i Musanze

Nyuma hafashwe ifoto y’urwibutso

Ni umushinga watangijwe ku wa Mbere, tariki ya 8 Ugushyingo 2021, mu Karere ka Nyagatare mu Murenge wa Rwimiyaga. Uzakorera mu Mirenge ya Nyagatare, Mimuri, Rwimiyaga yo mu Karere ka Nyagatare hakaniyongeraho Umurenge wa Nyamugali wo mu Karere ka Kirehe.

Bamwe mu baturage bo mu Karere ka Nyagatare bavuze ko bishimiye uyu mushinga ngo kuko ugiye kubafasha mu kubungabunga ubutaka bwabo bwendaga gutwarwa n’isuri.

Bintunimana Emmanuel utuye mu Kagari ka Gacundezi ya 2 yavuze ko bishimiye guhabwa ibiti bivangwa n’imyaka ngo kuko bigiye kubafasha kuzana umuyaga mwiza kandi bikanabaha inkwi.

Yagize ati “Icyiza na none cyo gutera ibiti, iyo gikuze ntubura inkwi n’urubaho urubonamo, akarusho noneho gitanga umwuka mwiza mu rugo na ya mvura yajyaga iducika kubera kutagira ibiti ntizongera kuducika kuko turi kubitera ku bwinshi.”

Yakomeje avuga ko kuri ubu bafite icyizere cyo gutera ibiti byinshi mu mirima yabo ngo kuko bari guhabwa ibifite gikurikirana bitandukanye na mbere aho Leta yabahaga ibiti bitajyanye n’ubutaka bwabo.

Mpumuje Faustin ufite ubutaka burenga hegitari imwe we yavuze ko umuswa uri mu byatumye batabasha gutera ibiti ngo bifate, yavuze ko ubutaka bwabo bukunze kurangwamo umuswa mwinshi ari nawo urya ibiti batera bikananirwa kuzamuka.

Ati “Ubu rero noneho dufite icyizere ko bizafata kuko twahawe abakozi bazadukurikirana aho bigaragaye ko hari umuswa bakadufasha kuwurwanya bakoresheje imiti gakondo n’indi bazazana.”

Mukambaraga Athanasie we yavuze ko bagiye bagira imishinga myinshi ibaha ibiti bakanabitera ariko ngo kimwe mu bituma bidakura ngo bigere hejuru harimo umuswa ukunze kubirya n’inka za bamwe mu baturage bazishora mu mirima y’abandi baturage mu masaha y’ijoro.

Umukozi w’Umuryango Nyarwanda uharanira Iterambere ry’Icyaro, RWARRI, Udahogora Madeleine, ari nawo uri gukora ubukangurambaga, yavuze ko mu myaka ine bazamara bafasha abaturage gutera ibiti mu Turere twa Nyagatare na Kirehe, bafite intego zo gusubiza uburanga utu turere.

Ati “Igice cya mbere kizafata hegitari 500 muri Nyagatare na hegitari 500 muri Kirehe. Muri iki gice hahoze ari muri Pariki y’Akagera none habaye nk’ubutayu kubera abantu bahatuye ibiti barabitema batangira no kubura imvura. Ubu rero tuzahatera ibiti bivangwa n’imyaka, ku nkengero z’imihanda n’ibiti by’imbuto.”

Ku kijyanye n’ibindi biterwa bikaribwa n’imiswa yavuze ko bafite abakozi benshi babihuguriwe ku buryo bitezweho gufasha abaturage mu kurwanya iyi miswa ikunze kurya ibiti.

Udahogora yavuze ko hazakoresha uburyo bwa gakondo mu kuyirwanya byakwanga hagakoreshwa n’indi miti isanzwe.

Umuyobozi w’Agateganyo w’Akarere ka Nyagatare, Hategekimana Fred, yavuze ko ibiti byose bizaterwa yaba ibizaterwa ku mihanda n’ibizaterwa mu mirima y’abaturage bizakurikiranwa na buri muturage ngo kuko babanje kubaganiriza no kubigisha ibyiza byabo.

Ati “Buri gihe cy’imvura wasangaga dukunze guhura n’umuyaga bitewe n’uko dufite ibiti bike bidahagije ugasanga duhura n’ibiza, ibisenge bikaguruka inzu nazo zigasenyuka ariko nibamara gutera ibiti biradufasha cyane; icya kabiri biradufasha mu kubona inkwi n’imvura ugereranyije n’iyo tubona ubu ubona ko ikiri nke cyane.”

Yakomeje asaba abaturage gufata neza ibiti bahawe ngo kuko ari amahirwe baba babonye kuko igihugu kiba cyatekereje kikabona cyabunganira mu kubona ibiti.

Byitezwe ko uyu mushinga uzasiga hegitari ibihumbi 25 zibungabunzwe, uri gushyirwa mu bikorwa n’Ikigo cy’Igihugu gishinzwe Amashyamba ku bufatanye n’Ikigo Mpuzamahanga cyita ku kubungabunga Ibidukikije, IUCN na RWARRI.

Uyu mushinga uzasiga hegitari ibihumbi 25 zibungabunzwe

Abaturage bo mu turere twa Nyagatare na Kirehe bishimiye uyu mushinga wo kubaha ibiti

Hatangijwe umushinga witezweho kubungabunga hegitari 25.000 mu Burasirazuba

Uyu mushinga uzamara imyaka ine

Ibi aba bayobozi babitangaje nyuma y’aho bigaragaye ko muri iyi Ntara by’umwihariko mu Karere ka Karongi, Rubavu na Rutsiro hari abanze kwikingiza COVID-19.

Umushumba w’Ururembo rwa Rubavu muri ADEPR, Pasiteri Uwambaje Emmanuel, yavuze ko abantu banga kwikingiza COVID-19 ari intama zabo zayobye kuko Bibiliya ntaho ibuza abantu kwirinda ibyorezo.

Ati “Abantu bafite imyumvire yo kutemera kwikingiza ni ubuyobe kandi akenshi umuntu wayobye arihuta. Bibiliya ntaho ibuza kwikingiza, ahubwo mu gitabo cy’Abalewi, hari igihe uwitwa Miriyamu yigeze kwandura ibibembe Imana itegeka ko bamujyana inyuma y’ingando akazagaruka ari uko yakize kandi abatambyi babishinzwe bakemeza ko yakize.”

Akomeza avuga ko abantu banga kwikingiza COVID-19 bitwaje iyobokamana babikora ku giti cyabo ngo nta dini ribibashyigikiyemo kuko abayobozi b’amadini bikingije ku mugaragaro.

Ati “Gusa ubuyobe bafite bwitirirwa twe, birasaba ko tubasanga kuko n’iyo bayobye bakajya mu bindi byaha tubasanga iyo bari. Zari intama zacu none zarazimiye tugomba kujya kubashaka tubereka ko ari ubuyobe barimo kandi bazatwemera, bazatwumvira nubwo bigoye.”

Mu Karere ka Karongi mu Mirenge ya Ruganda, Mubuga na Gishyita ni ho hagaragaye abantu babuza abandi kwikingiza. Mu Murenge wa Ruganda ni ho hagaragaye bwa mbere inyandiko zakwirakwijwe n’umuntu utazwi zibuza abantu kwikingiza COVID-19.

Umunyamabanga Nshingwabikorwa w’Umurenge wa Mubuga, Nsanzabaganwa Vedaste, yavuze ko bakoze ibarura basanga hari abantu 231 bavuga ko badashaka kwikingiza COVID-19 kubera imyemerere yabo nyuma y’aho izo nyandiko zikwirakwijwe.

Mu Murenge wa Gishyita hagaragaye umubare munini w’abaturage banze gufata urukiko rwa COVID-19 ahabaruwe abagera kuri 431 nk’uko byatangajwe na Gitifu wawo.

Ati “Bavuga ko batazikingiza COVID-19 kuko urukingo baruhawe bakivuka, bavuga ko bafite urukingo rwa Yesu, niko bitwaza, navuga ko abo bantu banga no kwambara agapfukamunwa, gusa kubera ubukangurambaga bukorwa n’inzego zinyuranye hari abagenda bagaruka.”

Minisitiri w’Ubuzima, Dr Ngamije Daniel, yavuze ko nta mpamvu ikwiye gutuma abantu banga kwikingiza COVID-19 kuko abantu bahawe inkingo z’iki cyorezo nta wagize ikibazo.

Yavuze ko kwikingiza ari inshingano z’umuntu ngo kudakingirwa ni ukubangamira uburenganzira bw’abantu bakuri hafi kuko ushobora kubanduza iki cyorezo hakaba n’abashobora gupfa.

Ati “Icyo gihe uburenganzira bwawe buba butangiye kuba ikibazo ku burenganzira bw’abandi. Aha rero by’umwihariko muri Karongi, aba bantu bakwirakwiza amakuru adafite ishingiro turashaka kubamagana. Tubamenyesha ko batazihanganirwa kuko ntidushaka ko badusubiza mu bihe tuvuyemo bigoye by’abarwayi benshi bajyaga kwa muganga harimo n’abapfuye, ibihe bidusubiza muri Guma mu Rugo kandi ubuzima bwari butangiye gusubira ku murongo.”

Intara y’Iburengerazuba iza ku mwanya wa kabiri nyuma y’Umujyi wa Kigali mu kubona inkingo za Covid-19 aho yabonye dose 1.044.261 z’urukingo rwa mbere, 81% byazo byamaze gutangwa naho 19% ni zo ziri gutangwa ku rubyiruko n’ibindi byiciro bitandukanye, ku rwa kabiri iyi ntara yabonye inkingo 283.865 muri zo 278.400 zamaze gutangwa zingana na 98,2 %.

Abaturage bitabiriye igikorwa cyo gutanga inkingo za Covid-19 mu Murenge wa Murambi mu Karere ka Karongi