Abinyujije ku mbuga nkoranyambaga ze, yasangije abamukurikira ifoto ari kumwe na Minisitiri w'Ububanyi n'Amahanga n'Ubutwererane, agaragaza ko ari umugisha kuba yakiriwe.

Ati 'Ku gicamunsi cya none tariki 25 Nyakanga 2025, natewe iteka no kwakirwa na Minisitiri w'Ububanyi n'Amahanga n'Ubutwererane, Ambasaderi Olivier Nduhungirehe, inshuti y'urubyiruko na gakondo yacu iwacu n'iyo.'

Uyu muhanzi yahuye Minisitiri Nduhungirehe mu gihe ari umwe mu bayobozi yifuza ko bazitabira igitaramo cye.

Sentore asobanura ko indirimbo 'Uwangabiye' yitiriye album, yakomotse kuri Sekuru Sentore Athanase. Ngo n'ubwo yari yayikoreye ababyeyi be na Sekuru, yavuze ko yari yanayikoreye Perezida Paul Kagame yita 'Umugoboka Rugamba'.

Lionel Sentore azamurikira iyi album ye, mu gitaramo kizaba ku wa 27 Nyakanga 2025 muri Kigali Conference and Exhibition Village ahazwi nka Camp Kigali, aho azahuriramo n'abarimo Massamba Intore, Ruti Joel, Jules Sentore n'Itorero Ishyaka ry'Intore.

Iyi album ye ya mbere kuva yatangira umuziki, yise 'Uwangabiye' iriho indirimbo 12.

Kwinjira mu gitaramo cya Lionel Sentore ni ibihumbi 10 Frw mu myanya isanzwe, mu gice cya 'Premium' ni ukwishyura ibihumbi 20 Frw; ni mu gihe mu myanya ya VIP umuntu umwe yishyura ibihumbi 35 Frw, na ho ku meza ya VIP ni ukwishyura ibihumbi 200 Frw. Harimo n'itike ya 'Corporate Table' igura ibihumbi 500 Frw.

Imiryango y'ahazabera igitaramo cye izafungurwa guhera saa kumi n'imwe z'umugoroba, igitaramo nyir'izina gitangire Saa Moya z'umugoroba. Kugura itike ni ukunyura kuri *662*700*1473#.

Uretse ibyumba by'amashuri muri aka Karere hakenewe kubakwa ubwiherero bushya 2,741, bukeneye ingengo y'imari y'arenga miliyari 2,7 Frw.

Ibi ni bimwe mu bikorwa byifuzwa n'aka Karere muri uyu mwaka w'ingengo y'imari ya 2025/2026 bitarabonerwa ubushobozi bwo kubikora.

Umuyobozi w'Akarere ka Rubavu, Mulindwa Prosper yabigarutseho ku wa 25 Nyakanga 2025, mu nama n'abagize ihuriro ry'abafatanyabikorwa mu iterambere, DJAF Icyerekezo Rubavu.

Ati 'Ibyumba by'amashuri byigiramo abanyeshuri benshi bisobanuye ko hakirimo ubucucike, bikeneye kujyanana n'ubwiherero ndetse n'intebe abana bicaraho, bwiyongera cyane mu Mirenge igenda itera imbere buri munsi, ari yo mpamvu abafatanyabikorwa turi kubasaba kudufasha kugaragaza uruhare rwabo, kandi na Leta uko ubushobozi bugenda buboneka hari ibyo ikora.'

Meya Mulindwa ubwo yagaragazaga ishusho rusange yagaragaje ko ibyumba by'amashuri y'inshuke byujuje ibisabwa (ECD) bikenewe muri buri kagari ari 79 bikeneye ingengo y'imari y'arenga miliyari 4,7 Frw, aho buri cyumba kiba gifite ibyumba bitatu byigirwamo, igikoni, ubwiherero n'ibindi bikoresho nkenerwa.

Mu gihe ibyumba by'amashuri abanza n'ayisumbuye bikenewe muri aka Karere ari 1.281 kugira ngo ubucucike buhinduke umugani, bikeneye ingengo y'imari ya miliyari 19,2 Frw.

Meya Mulindwa yakomoje ku kuba aka Karere kakira abaturage benshi baje kubyaza umusaruro amahirwe gafite, by'umwihariko mu Mirenge ya Nyamyumba, Rubavu na Nyakiliba nka hamwe mu higanje ubucucuike mu mashuri.

Mu kugabanya ubucucike mu mashuri bukabije, mu 2021 mu karere ka Rubavu, hubatswe ibyumba by'amashuri bishya 1.015 birimo 871 bitageretse na 144 biri mu nyubako 18 zigeretse inshuro imwe na 23 biri mu nyubako zigeretse kabiri.

Bamwe mu bagize DJAF Icyerekezo Rubavu babwiwe ko mu Karere hakenewe ibyumba by’amashuri bishya birenga 1300 mu kugabanya ubucucike mu mashuri

Ababaruramari baturuka mu bigo bitandukanye bari bamaze iminsi itatu muri aya mahugurwa yatangiye ku wa 23 Nyakanga 2025, arangira ku wa 25 Nyakanga 2025, akaba yari afite insanganyamatsiko igira iti 'Kongera gutekereza ku ngamba zigendanye n'imisoro hagamijwe kwihutisha iterambere kuri bose.'

Yitabiriwe n'ingeri zitandukanye ziturutse mu bigo bya Leta, ibyigenga ndetse n'imiryango itari iya Leta.

Bamwe mu bitabiriye aya mahugurwa bavuga ko ari ingenzi cyane kuko yabafashije guhuriza hamwe ubumenyi ku misoro mishya iheruka gushyirwaho.

Umuyobozi ushinzwe Imari mu Kigo gishinzwe isoko ry'imari n'imigabane (RSE), Uwase Rutera Liliane, yavuze ko binyuze muri aya mahugurwa bize byinshi bijyanye n'imisoro kandi bigiye kubafasha gutangira kubishyira mu bikorwa.

Ati 'Bagiye batwereka impamvu hari impinduka zabaye mu misoro kandi byadufashije kuzabishyira mu bikorwa kurusha umuntu uzabyumva ari mu kazi ataramenye impamvu byashyizweho.'

Yakomeje avuga ko bahuguwe uburyo bashobora kuzajya basorera ku gihe kugira ngo bajye babasha kwirinda ibihano kubera gutinda kubishyira mu bikorwa.

Kayitare Theoneste, umugenzuzi w'umutungo mu kigo gikora ibishushanyo mbonera by'inyubako, Gasabo 3D, yasobanuye ko ari ingenzi kuba aya mahugurwa yarateguriwe abashinzwe gucunga imari mu bigo kubera ko bizafasha kumenya byinshi kuri yo.

Ati 'Twaje mu buryo bwo kugira ngo twihugure mu bijyanye n'imisoro by'umwihariko mu minsi ishize hari amategeko ajyanye n'imisoro yashyizweho rero hari hakenewe amahugurwa ku bantu bakora mu bijyanye no gucunga imari kugira ngo bizadufashe gukomeza gucungira imari ibigo byacu ndetse tunateze imbere igihugu cyacu.'

Yakomeje ashimira ICPAR yateguye aya mahugurwa kubera ko bizabafasha gucungira imari neza ikigo cyabo.

Ati 'Ibi bizadufasha kugira ngo twongere twiyibutse aho imisoro igeze bityo dukomeze gutanga umusanzu ku bigo tuba dukorera ndetse no mu gihugu muri rusange.'

Umuyobozi Mukuru wa ICPAR, Amin Miramago, yagaragarije abitabiriye aya mahugurwa ko bakwiriye kwifashisha ibyo bigishijwe bakaba bagira inama nziza abasora bakorera.

Ati 'Umusaruro tubitezeho ni uko bakomeza kugira inama nziza abasoreshwa ndetse no gukomeza kurushaho kunoza imirimo bakora.'

Yakomeje agaragaza ko zimwe mu ngingo zindi baganiriyeho no gusobanurira ababaruramari impinduka ziherutse kugaragara mu ngengo y'imari ndetse n'imisoro yashyiriwe ku bicuruzwa bimwe na bimwe bitabagaho imisoro.

Ati 'Zimwe mu ngingo zitandukanye twaganiriyeho harimo ingengo y'imari ya Leta ndetse tunarebera hamwe impinduka zagiye ziba mu misoro itandukanye ndetse n'uburyo imisoro ibarwa no kuganira ku mbogamizi bahuye na zo umwaka ushize ku buryo muri uyu mwaka hari impinduka zishobora kubaho.'

Aya mahugurwa ategurwa n'Urugaga rw'Ababaruramari b' Umwuga mu Rwanda ,ICPAR (Institute of Certified Public Accountants of Rwanda), ku bufatanye n'Ikigo cy'Igihugu cy'Imisoro n'Amahoro, RRA, abaye ku nshuro ya 14.

Umuyobozi Mukuru wa ICPAR, Amin Miramago yagaragarije abitabiriye aya mahugurwa ko bakwiriye kwifashisha ibyo bigishijwe bakaba bagira inama nziza abasoreshwa bakorera

Komiseri wungirije Ushinzwe Serivisi z'Abasora n'Itumanaho, Uwitonze Jean Paulin yabwiye abitabiriye aya mahugurwa ko bakwiriye kubyaza umusaruro ibyo bize

Abitabiriye aya mahugurwa biyemeje gukomeza guteza imbere umwuga w’ababaruramari

Perezida wa ICPAR, Obadiah Biraro yabwiye abitabiriye aya mahugurwa ko bazungukiramo ubumenyi ku bigendanye n’imisoro birimo kwishyurira ku gihe

Umuyobozi Mukuru wa ICPAR, Amin Miramago na Obadiah Biraro, bitabiriye umuhango wo gusoza amahugurwa

Abarenga 160 bahuguwe muri iyi minsi itatu

Imparata ni abaturage bakora ubucukuzi bw'amabuye y'agaciro butemewe butemewe n'amategeko, bakunze gucukura mu birombe byemewe ariko bakabikora mu buryo butemewe, banagaragara mu bucukuzi hirya no hino mu mirima y'abaturage aho bangiza imyaka y'abaturage, amashyamba n'ibindi bikorwaremezo ku hantu hose baketse amabuye y'agaciro.

Agace ka Rwinkwavu ni kamwe mu twavumbuwemo amabuye y'agaciro mu myaka myinshi ishize aho hanakunze kugaragara abaturage benshi bacukura amabuye y'agaciro mu buryo butemewe.

Abaganiriye na IGIHE bavuze ko abo bantu babateje ibibazo byinshi birimo inzara ituruka ku kubarandurira imyaka kuko baba bahaketse amabuye y'agaciro.

Pontien Habyarimana utuye mu Kagari ka Gihinga mu Murenge wa Rwinkwavu, avuga ko imyubati iri mu murima we iri kurandurwa nyuma y'aho Imparata zihaketse amabuye y'agaciro

Ati 'Iyo ugiyeyo nta kintu na kimwe wabavugaho, uba ntinya kugera mu murima wanjye, n'iyo ngiyeyo nta kintu mvuga kuko wibeshye ukavuga bagukubita. Turasaba ubuyobozi kubaturwanyiriza kuko ni ibintu bikabije cyane, iyo umuntu akuranduriye imyaka yari kuzagutunga ejo hazaza aba ari inzara ashaka kuguteza.''

Itegekaharinde Soline na we avuga ko ikibazo cy'Imparata kibakomereye cyane bitewe n'urugomo babakorera, yaba aho batuye cyangwa se n'abo basanze mu mirima.

Yagize ati 'Kubera baba bateye hejuru ubutaka usanga nta kintu cyapfa kuhera, akenshi usanga ari na bo baduteza inzara kubera kuturandurira imyaka, turasaba ko imbaraga zirwanya imparata ziyongera.''

Ndamage Wenzislass utuye mu Mudugudu wa Rubirizi mu Kagari ka Gihinga, yagize ati ' Birabangamye cyane nk'iyo mu murima wawe hari harimo imyumbati, ibishyimbo cyangwa indi myaka bakayirandura kandi yari kuzagutungira umuryango, urumva ko baba bagusubije inyuma.''

Umuyobozi w'Urwego rw'Ubugenzacyaha (RIB) mu Ntara y'Iburasirazuba, Rutaro Hubert, yasabye abaturage gutinyuka bakarega abakora ubu bucukuzi mu nzego za Leta kuko benshi bishora muri ubu bucukuzi ari abana babo, abagabo babo n'abavandimwe babo.

Ati 'Ubutumwa tubaha nibacire birarura, kujya gucukura bitemewe bitera ibibazo byinshi. Ubikora ashobora kuhasiga ubuzima, ashobora kuhahurira n'ibihano bikomeye bimukururira kuba umutungo we washorwa mu manza. Ababagurira na bo turabaha ubutumwa bw'uko abazajya bafatwa bazajya babihanirwa kandi cyane.''

Mu myaka itatu ishize mu turere twa Rulindo, Gakenke, Nyanza, Muhanga na Kamonyi, Gatsibo na Kayonza hagaragaye ibyaha bigeze kuri 226 byo kwangiriza ibidukikije.

Mu 2022 utwo turere twose twagaragayemo ibyaha byo kwangiza ibidukikije 86 bigeze mu 2023 biba 65 naho mu wa 2024 biba 75.

Uturere twa Kamonyi na Rulindo ni two dufite imibare iri hejuru kuko muri ibyo byaha 226 twihariyemo ibigera ku 117.

Mu myaka itatu ishize mu turere turindwi hagaragayemo ibyaha bigeze kuri 226 byo kwangiriza ibidukikije

TRIBE hub ni umushinga wamuritswe ku wa 25 Nyakanga 2025, ugamije kwagura ibikorwa bya RBC, aho uzibanda mu gukora ubushakashatsi, kwita kundwara zandura n'izitandura, ndetse n'ibyorezo.

Ni umushinga watewe inkunga n'Umuryango w'Ubumwe bw'u Burayi.

Umuyobozi mukuru wa RBC, Prof. Claude Mambo Muvunyi, yavuze ko aya ari amahirwe babonye yo gukomeza kuzamura ubushobozi bw'iki kigo ndetse na gahunda z'ubuzima mu Rwanda no muri Afurika.

Yagize ati 'Uyu mushinga uje kudufasha kongera imbaraga mu bice bitandukanye, uzadufasha mu buryo dukurikirana indwara, uko tuzirwanya, uburyo bwo kubika amakuru mu buryo bw'ikoranabuhanga ndetse no gukora ubushakashatsi.'

Akomeza avuga ko uyu mushinga kandi uzabafasha guhugura abantu batandukanye ku buryo bwo gukoresha amakuru yavuye mu bushakashatsi kugira ngo igihe haza indwara y'icyorezo bashobore guhangana nacyo.

Ati 'Uyu mushinga kandi uzadufasha guhugura abantu ku buryo twakwifashisha amakuru dufite mu guhangana n'ibyorezo bishobora kuza n'ibindi bibazo by'ubuzima bituruka ku mihindagurikire y'ikirere, ariko noneho no kumenya neza ko buri wese afite ubuzima bwiza ndetse yitabwaho ku rwego rwo hejuru.'

Umuyobozi ushinzwe Imishinga ijyanye n'ubuzima muri EU, Maria Masereka Christiansen, yavuze ko impamvu bahisemo gukorana n'u Rwanda muri uyu mushinga ari uko ruri mu bihugu by'Afurika bigaragaza impinduka mu bijyanye n'ubuzima no kwita ku ndwara zitandukanye.

Akomeza avuga ko gukorana n'u Rwanda bizarushaho gufasha Afurika muri rusange kuko muri uyu mushinga harimo no gufasha ibindi bihugu kwita kuri serivisi z'ubuzima.

Yagize ati 'U Rwanda ruhagaze neza mu gukora ubushakashatsi ariko ruracyafite ikibazo mu gukoresha ubwo bushakashatsi mu gushyiraho ibisubizo birambye. TRIBE Hub izafasha u Rwanda mu gukemura ibyo bibazo, ubundi bibere urugero rwiza ibindi bihugu mu Karere ndetse no muri Afurika.'

TRIBE Hub ni umushinga uzamara imyaka itatu, hagati 2025 na 2028 aho byitezwe ko uzafasha n'ibindi bihugu 10, birimo u Rwanda, u Burundi, Guinea, Guinea Conakry, Chad n'ibindi.

Abayobozi baganira ku buryo uyu mushinga uzafasha Afurika ndetse n’u Rwanda by’umwihariko

TRIBE Hub ni umushinga uzamara imyaka itatu watewe inkunga n’Umuryango w’Ubumwe bw’u Burayi

TRIBE Hub ni umushinga uzafasha RBC mu konoza no kwagura ibikorwa byayo bo kwita ku buzima

Umuyobozi mukuru wa RBC, Prof. Claude Mambo Muvunyi, yavuze ko uyu mushinga uzabafasha mu bushakashatsi ku buryo bwo kurwanya ibyorezo

Umuyobozi ushinzwe Imishinga ijyanye n'ubuzima muri EU, Maria Masereka Christiansen, yavuze ko TRIBE Hub igiye gufasha RBC mu kurushaho gukora ubushakashatsi

RBC yahawe arenga miliyari 7 yo gukoresha mu mushinga wa TRIBE Hub ugamije kwagura ibikorwa bya RBC

Ni umuhango wabaye ku wabaye ku wa 25 Nyakanga 2025, witabirwa n'abaminisitiri batandukanye barimo uw'Imari n'Igenamigambi, uw'Ibikorwaremezo, uw'Ubutabera na Minisitiri mu Biro bya Minisitiri w'Intebe.

Minisitiri Dr. Justin Nsengiyumva, yashimiye Perezida Kagame wamuhaye inshingano zo kumufasha kugeza ku Banyarwanda gahunda n'ibyiza yabemereye cyane cyane mu gushyira mu bikorwa gahunda y'Igihugu yo kwihutisha iterambere.

Ati 'Mu Banyarwanda barenga miliyoni 14 kugira ngo ampitemo ni umugisha ntabona uko nsobanura. Ni ibintu bitangaje nkwiye gukora uko nshoboye kose atazigera atekereza impamvu yanshyizeho. Mfite ubushake kugira ngo mufashe kugera ku byo yemereye Igihugu.

Yashimiye na Dr Ngirente wari umaze imyaka hafi umunani muri izi nshingano ku ruhare rwe mu gutekereza Igihugu, agaragaza ko na we azagerageza guteza imbere abaturage uko azashobora.

Ati 'Bizangora kugera ikirenge mu cyawe kuko urakomeye cyane, wakoze ibintu biremereye cyane, ariko nzagerageza Imana izabimfashemo, inkweto usize kugira ngo nzegeremo ikirenge, ngomba gukora cyane. Nditeguye kandi nizeye ko nzabigeraho.'

Minisitiri Dr Nsengiyumva yavuze ko kuba mu biro bya Minisitiri w'Intebe, ari amahirwe akomeye, icyakora agaragaza ko biba bisaba gukora cyane no kurusha abandi, bakabazwa inshingano no kurusha abandi bose bayoboye.

Ati 'Iyo tubwira abantu ngo bakore neza tugomba gukora neza kubarusha, iyo tubaza abandi inshingano tugomba kuzibazwa kurushaho. Izo nshingano dufite zigomba kudutera imbaraga tukamenya ko ibyo dukoze tugomba kubikora neza kurusha abandi. Tugatanga urugero rwiza, bakavuga bati abo mu IBiro bya Minisitiri w'Intebe bari kutubaza ibi ariko na bo babikora neza kurusha.'

Minisitiri Dr Nsengiyumva yagarutse ku ijambo rya Perezida Kagame agaragaza ko buri wese akwiriye gutekereza ku Rwanda mbere y'ibindi, kugira ngo u Rwanda rugere ku iterambere ryifuzwa.

Ati 'Dukeneye gushyira mu bikorwa amategeko n'amabwiriza ateza imbere Abanyarwanda. Icyateza imbere u Rwanda bwa mbere ni cyo nzitaho. Ikitazabateza imbere ntabwo tuzacyitaho. Nta mwanya wo guta dukomba gukora cyane.
Minisitiri Dr Nsengiyumva ko ibyo byose azabigeraho afashijwe na n'abakozi bagenzi be, abasaba kujya mu ngamba vuba, kugira ngo bahindure ubuzima bw'Abaturage, politiki zose zihari zitange umusaruro, ufasha mu guteza imbere abaturage by'igihe kirekire.

Yasabye abayobozi bazakorana agaragaza ko niba bashaka guteza imbere u Rwanda bagomba gutekereza cyane, bagahindura imyumvire, u Rwanda rukaza imbere y'ibindi byose.

Ati 'Icyo nzakora ni ugutekereza u Rwanda mbere ibindi byose bizaze nyuma. Abayobozi bose, abaminisitiri n'abandi […] tugomba kwihuta, nta mwanya wo gutakaza, tugomba gukora.'

Dr. Ngirente wasimbuwe mu nshingano zo kuba Minisitiri w'Intebe, yashimiye Umukuru w'Igihugu wamuhaye inshingano mu myaka umunani ishize.

Ati 'Yampaye inshingano nzifashwamo namwe muri hano. Iyo mutahaba ntabwo twari kubigeraho. Zari inshingano nakoze mfatanyije namwe, kuko si yari njye gusa, hari n'inzego zitandukanye nka za misiteri n'ibindi bigo.'

Yagaragaje ko Minisitiri w'Intebe n'abo bafatanya baba bagomba guhuza ibikorwa mu nzego zose, kugira u Rwanda rugere ku majyambere rwifuza. N

Ati 'Muracyari bato mureke dukore twihute kuko twasigaye inyuma ku Isi. Turacyafite urugendo cyane. Ni inshingano nakoze mfatanyije namwe, dufatanya n'izindi nzego.'

Dr Ngirente yashimiye Perezida Kagame wahaye inshingano Dr Nsengiyumva, agaragaza ko mu byo haye mugenzi we umusimbuye ari NST2 kugira ngo u Rwanda rutere imbere.

Ati 'Hari gahunda Umukuru w'Igihugu yemereye abaturage mu myaka itanu iri imbere. Ni ryo hererekanyabubasha duhaye Minisitiri w'Intebe kugira ngo ayikomerezeho kugira ngo dufashe Umukuru w'Igihugu kugera ku ntego. Abanyarwanda twese dusabwa gukorera igihugu cyacu.'

Yashimiye abayobozi batandukanye bakoranye, barimo na Minisitiri mu Biro bya Minisitiri w'Intebe, Ines Mpambara n'abandi agaragaza ko umunsi ku wundi yamuhoraga hafi, bibukiranya inshingano bafite zo guteza imbere Abanyarwanda.

Ati 'Yanteraga imbaraga, yakoze akazi keza cyane ku buryo buri munsi nabonaga ubutumwa bwe. Umusanzu wanjye nzakomeza kuwutanga, dukore inshingano zacu igihugu cyacu kiradutegereje. Mureke tugere kuri NST2, nanjye nzaba mpari nk'umuturage, tubigereho, tubishyire mu mibare ihuye mbese bibe bibarika kuko ibitabarika biragorana kubivuga.'

Ku wa 23 Nyakanga 2025 ni bwo Perezida Kagame yagize Dr. Justin Nsengiyumva Minisitiri w'Intebe. Yari asanzwe ari Visi Guverineri wa Banki Nkuru y'Igihugu.

Dr. Justin Nsengiyumva yagizwe Minisitiri w'Intebe asimbuye Dr. Edouard Ngirente wari umaze muri izi nshingano imyaka irindwi n'amezi 10.

Minisitiri Dr Nsengiyumva ni uwa karindwi kuva mu 1994, nyuma ya Faustin Twagiramungu, Pierre-Célestin Rwigema, Bernard Makuza, Pierre-Damien Habumuremyi, Anastase Murekezi na Dr. Édouard Ngirente asimbuye wari wari kuri izi nshingano kuva mu 2017.

Dr Nsengiyumva yari asanzwe ari Visi Guverineri wa Banki Nkuru y'Igihugu, umwanya yagiyeho ku wa 25 Gashyantare 2025. Asimbuye Dr Edouard Ngirente wari kuri izi nshingano kuva mu 2017.

Mbere yaho, yabaye Umunyamabanga uhoraho muri Minisiteri y'Uburezi kuva muri Werurwe 2008 kugeza mu Ugushyingo 2008.

Mbere yaho yari Umunyamabanga Uhoraho muri Minisiteri y'Ubucuruzi n'Inganda, kuva muri Kamena 2005 kugeza muri Werurwe 2008.

Yakoze mu zindi nshingano yinshi mu mahanga cyane cyane mu Bwongereza aho yakoze mu nzego za Leta y'iki gihugu n'imiryango mpuzamahanga ihakorera.

Yaraminuje cyane kuko afite impamyabumenyi y'ikirenga mu bukungu yakuye muri Kaminuza ya Leicester kuva mu 2011 kugeza mu 2015.

Ni umuhanga mu by'ubukungu kuko ubwo yari mu cyiciro cya kabiri cya kaminuza mu bijyanye n'ayo masomo yari mu cyiciro cy'abagize amanota ya mbere (First-Class).

Icyo gihe yigaga muri Kaminuza ya Nairobi muri Kenya ndetse anagira ayo manota ya mbere ubwo yari asoje amasomo y'icyiciro cya kabiri cya kaminuza mu bucuruzi. Yigaga muri Catholic University of Eastern Africa yo muri Kenya.

Dr. Ngirente yabaye Minisitiri w'Intebe ku wa 30 Kanama 2017 kugeza ku wa 23 Nyakanga 2025.

Guverinoma ya Dr. Ngirente yatangiranye Minisiteri 20 ariko yasoje igizwe na minisiteri 21; minisiteri ebyiri zakuweho, hashingwa imwe, mu gihe indi imwe yagaruweho.

Afite impamyabumenyi y'icyiciro cya gatatu cya Kaminuza mu Ibarurishamibare n'ibijyanye n'Imari yakuye muri Université Catholique de Louvain yo mu Bubiligi.

Yabaye Umuyobozi w'Igenamigambi muri Minisiteri y'Imari n'Igenamigambi mbere yo kugirwa Umujyanama mu by'Ubukungu muri MINECOFIN, maze Inama y'Abaminisitiri yateranye ku wa 30 Werurwe 2011 muri Village Urugwiro iyobowe na Perezida Kagame, imwemerera guhagarika akazi mu gihe kitazwi.

Dr. Ngirente kuva mu 2014 yabaye Umujyanama w'Umuyobozi Mukuru wa Banki y'isi i Washington muri Leta Zunze Ubumwe za Amerika.

Mu 2016 yabaye Umujyanama Mukuru mu by'Ubukungu mu buyobozi bukuru bwa Banki y'isi uhagarariye ibihugu 22 birimo n'u Rwanda.

Minisitiri w’Intebe, Dr Justin Nsengiyumva yavuze ko ikizateza u Rwanda imbere ari cyo azitaho kurusha ibindi

Dr Ngirente yagaragaje ko azakomeza kugira uruhare mu iterambere ry’igihugu

Minisitiri w’Intebe, Dr Justin Nsengiyumva ahererekanya ububasha na Dr Ngirente Edouard asimbuye

Minisitiri w’Intebe mushya, Dr Justin Nsengiyumva asinya ku nyandiko y’ihererekanyabubasha

Dr Ngirente Edouard (iburyo) asinya ku nyandiko y’ihererekanyabubasha

Abakozi bo mu Biro bya Minisitiri w’Intebe basezeye kuri Dr Edouard Ngirente ucyuye igihe

Minisitiri w’Ubutabera, Dr Ugirashebuja Emmanuel (ibumoso) na Minisitiri w’Ibikorwaremezo, Dr Jimmy Gasore bitabiriye umuhango w’ihererekanyabubasha hagati ya Minisitiri w’Intebe mushya n’ucyuye igihe

Minisitiri w’Intebe mushya, Dr Justin Nsengiyumva ari kumwe na Dr Edouard Ngirente asimbuye kuri uyu mwanya

Minisitiri w’Intebe, Dr Justin Nsengiyumva yavuze ko ikizateza u Rwanda imbere ari cyo azitaho kurusha ibindi

Dr Edouard Ngirente yahawe impano n’abakora mu Biro bya Minisitiri w’Intebe

Ubwo Perezida Paul Kagame yagezaga ijambo ku bitabiriye ibirori byo kwakira indahira z'abagize guverinoma bashya, yagaragaje ko ashimira cyane Dr. Ngirente Edouard.

Ati 'Ndabanza mpere ku gushimira byimazeyo, Minisitiri ucyuye igihe, Minisitiri w'Intebe Ngirente, mbanze mushimire akazi keza n'imyaka yari amaze agakora.'

Yakomeje ati 'Twakoranaga neza, ku buryo najyaga mutera [ubuse]. Nkahera ku izina rye ngo Ngirente? Nanjye nti 'Ba Minisitiri w'Intebe, ugire utyo!' Hanyuma agahera aho abigira atyo nyine. Ndagushimira cyane rero, kandi ndagira ngo byumvikane ko abahinduriwe imirimo n'abatahawe indi buriya irahari, irabategereje. Birahinduka gusa ariko ntabwo birangirira aho ngaho ni ko bikwiriye kumvikana.'

Perezida Kagame yavuze ko Abanyarwanda bifuzwa mu nzego zitandukanye mu gukorera Igihugu, ari na yo mpamvu impinduka mu buyobozi zizahoraho.

Dr. Ngirente yabaye Minisitiri w'Intebe wa gatandatu kuva u Rwanda rubohowe hakanahagarikwa Jenoside yakorewe Abatutsi mu 1994.

Yabaye umwe mu bayobozi barahiye nyuma y'amatora ya Perezida wa Repubulika yo mu mwaka wa 2017. Yahawe izo nshingano avuye muri Banki y'Isi aho yari Umujyanama w'Umuyobozi Mukuru wayo.

Mu butumwa yatanze yifashishije urubuga rwe rwa X, yashimye Umukuru w'Igihugu ku cyizere yari yaramugiriye cyo kuyobora Guverinoma.

Ati 'Ndabashimiye byimazeyo Nyakubahwa Perezida wa Repubulika Paul Kagame, ku cyizere mwangiriye mukampa inshingano zo kuba Minisitiri w'Intebe mu myaka umunani ishize. Ni urugendo nungukiyemo byinshi.'

Yarakomeje ati “Nyakubahwa Perezida wa Repubulika, mbashimiye aya mahirwe mwampaye yo gukorera Igihugu cyacu no kuba mwarambaye hafi mukanshyigikira muri urwo rugendo. Mwambereye icyitegererezo. Nzahora iteka nterwa ishema n'icyo cyizere mwangiriye.”

Abanyarwanda nabo bashimiye Dr. Ngirente ubwitange yagize mu gukorera u Rwanda mu myaka umunani amaze kuri izi nshingano kuko hagaragaye impinduka nyinshi kandi nziza mu buzima bw'Igihugu.

Dr. Ngirente yakoze n'izindi nshingano zitandukanye mu Rwanda mbere yo kujya muri Banki y'Isi, zirimo kuba Umuyobozi Mukuru ushinzwe Igenamigambi n'Ubushakashatsi mu Iterambere ry'Igihugu muri Minisiteri y'Imari n'Igenamigambi (MINECOFIN).

Yanabaye Umwarimu Mukuru muri Kaminuza Nkuru y'u Rwanda kugeza mu mwaka wa 2010 ubwo yagirwaga Umuyobozi w'Ishami rishinzwe Ubukungu bushingiye ku Buhinzi muri yo.

Ubwo yahabwaga inshingano muri Banki y'Isi, Dr. Ngirente yatanze umusanzu ukomeye mu bushakashatsi bwakozwe mu bukungu, yandika byinshi ku masoko yo mu Karere ndetse n'ingorane z'ubukungu yibanda ku Rwanda.

Afite impamyabumenyi y'Ikirenga (PhD) mu bukungu yakuye muri Kaminuza ya Louvain mu Bubiligi, impamyabumenyi y'icyiciro cya gatatu cya kaminuza (MCs) mu bukungu bushingiye ku buhinzi yakuye muri iyo kaminuza, indi y'icyo cyiciro (MA) mu bijyanye no gukumira ingorane z'ubukungu yakuye muri Kaminuza ya Saint Louis i Brussels mu Bubiligi.

Indi nkuru wasoma: https://igihe.com/amakuru/u-rwanda/article/wari-umukozi-uhamye-kandi-w-umuhanga-amashimwe-y-abanyarwanda-kuri-dr-edouard

https://igihe.com/amakuru/u-rwanda/article/ni-urugendo-nungukiyemo-byinshi-dr-ngirente-wari-minisitiri-w-intebe

Dr. Ngirente yashimiwe ku mirimo yakoze nka Minisitiri w’Intebe

Perezida Kagame yashimiye Dr. Ngirente Edouard wari ugiye kumara imyaka umunani ari Minisitiri w'Intebe

Yabigarutseho nyuma yo kwakira indahiro za Minisitiri w'Intebe mushya, Dr. Justin Nsengiyumva n'abandi bagize guverinoma nshya mu muhango wabaye ku wa 25 Nyakanga 2025.

Yavuze ko ako Abanyafurika bakwiriye kwishakamo ibisubizo aho guhora bateze amaboko.

Ati 'Dufite inshingano. Kuki tutabyanga. Kuki mubura kubyamagana cyangwa ngo mugaragaze ibibazo mugomba kugaragaza haba kuri mwe bwa mbere no ku bw'abandi? Ntabwo ngomba gutongana na we ngo kuko umpa amasomo, ntinenze ubwanjye ku kuba mbyumva nkagendera ku byo umbwira.'

Perezida Kagame yavuze ko hari ubwo abantu bumva ko bagiye gukora ibikwiriye kubera ko hari abandi babibategetse, nyamara atari byo.

Ati 'Banyarwanda, namwe Banyafurika mushobora kuba mufite ibibazo, byo kwemera ibyo mukabikora imyaka n'imyaka. Ibyo bigaragaza uburyo mushyira mu bikorwa inshingano zanyu. Ni nk'aho muzikorera abandi batari mwe n'abaturage banyu.'

Umukuru w'Igihugu yagaragaje ko muri iyi Si imaze gutera imbere abantu badakwiriye kurwana n'ibintu byose buri munsi, ahubwo bahitamo intambara barwana.

Ati “Ugomba guhitamo icyo urwanira, hari intambara ugomba kurwana, keretse udafite intego, udafite impamvu ishingiye ku nshingano ufite n'icyo wowe ubwawe wigomwa.'

Yavuze ko imyumvire igomba guhinduka, agaragaza ko Abanyarwanda cyangwa Abanyafurika bagomba kuba abo bari bo mu myaka 100 cyangwa 50 ishize.

Ati 'Iyo ndebye iyi guverinoma n'izabanje cyane n'iheruka, ndakeka ari njye ukuze muri guverinoma, abandi mufite mu myaka 30, 40. Hari impamvu yabyo, yo kuvuga ngo mwe abakiri bato, muzaba muri iyi Si nk'uko twe abakuru twayikuriyemo ntiduhindure byinshi byari ngombwa?'

'Ntabwo mushobora kubibona mwe ubwanyu, abantu mwize, mwagenze amahanga, muzi amateka y'aho muvuye, muzi ibi byose ndi kuvuga, hanyuma mukitwara nk'aho ntacyabaye?'

Perezida Kagame kandi yavuze ko Abanyarwanda bagomba kwigenzura, bakiyizera ndetse bakamenya ko bagomba kugira icyo bakora na cyane ko bafite ubushobozi bwo kurwana intambara bahisemo bifashishije ibitekerezo, indangagaciro n'ibindi.

Ati 'Mufite byose kugira ngo murwane izo ntambara. Ese mukeneye iki? Ni uwuhe muti mushaka? Nyuma mugomba kwinenga, ariko mukamenya n'icyo mwinengera. Ntabwo mugomba guhora musabiriza buri munsi, kuba umuntu uhora ubwirizwa icyo gukora buri munsi. Ntabwo mubona ko bidakwiriye?'

Umukuru w'Igihugu yagaragaje ko guha ababyiruka uburere ari kimwe ariko uko babukoresha bikaba ikindi. Yerekanye ko uburere butangwa kugira ngo bukoreshwe ibyiza, yibutsa ko nta muntu waremye undi kuko ibintu ari magirirane.

Ati 'Ntabwo ari ukubivuga gusa dukwiriye no kubishingiraho ibikorwa dukora hanyuma tukabona ibivuye muri ibyo bikorwa.'

Ku wa 23 Nyakanga 2025 ni bwo Perezida Kagame yagize Dr. Justin Nsengiyumva Minisitiri w'Intebe. Yari asanzwe ari Visi Guverineri wa Banki Nkuru y'Igihugu.

Perezida Kagame yagaragaje ko Abanyarwanda n'Abanyafurika badakwiriye guhora basabiriza

Abagize guverinoma nshya barahiriye gutangira inshingano