Blog

Nta muntu witabye Imana mu Rwanda kuri uyu munsi azize icyo cyorezo, abamaze kwitaba Imana mu Rwanda bazize Covid-19, bakaba ari 1433 nk’uko imibare yatangajwe ibigaragaza.

Umuvugizi wa Polisi wungirije, CSP Africa Sendahangarwa Apollo, yavuze ko abo bantu bafatiwe ku marembo bashaka kwinjira muri sitade ngo bakore ibizamini by’agateganyo byo gutwara ibinyabiziga.

Yagize ati 'Mbere y’uko abantu batangira gukora ibizamini abapolisi babanza kugenzura ibyangombwa by’abaje gukora ibizamini. Babonye bariya bantu baje gukora ikizamini ariko ubutumwa bwa RBC bugaragaza ko bipimishije Covid-19 ndetse ko ari bazima, ariko byagaragaye ko ubwo butumwa atari umwimerere, ahubwo ari ubuhimbano. Bamaze gufatwa bavuze ko batipimishije ahubwo bagahitamo guhimba ubutumwa bwa RBC.'

CSP Sendahangarwa yakomeje avuga ko abafashwe uko ari babiri baturutse mu Karere ka Gatsibo ariko uwo bafatanyije guhimba no kohererezanya ubu butumwa ntabwo biramenyekana neza aho atuye. Yakomeje akangurira abantu kubahiriza amabwiriza yo kwirinda Covid-19.

Yagize ati 'Turakomeza gukangurira abantu muri rusange ndetse n’abarimo gukora ibizamini byo gutwara ibinyabiziga ko bagomba kubahiriza amabwiriza yo kwirinda ikwirakwizwa rya Covid-19, kugira ngo birinde kandi barinde bagenzi babo. Guhimba ukanakoresha icyemezo icyo ari cyo cyose bihanwa nk’ibindi byaha byo gukora no gukoresha inyandiko mpimbano.'

Abafashwe bashyikirijwe Urwego rushinzwe ubugenzacyaha (RIB) rukorera muri sitasiyo ya Polisi ya Rwezamenyo, kugira ngo hatangire iperereza, nk’uko bigaragara ku rubuga rwa Internet rwa Polisi y’u Rwanda.

Itegeko no68/2018 ryo ku wa 30/08/2018 riteganya ibyaha n’ibihano muri rusange, Ingingo ya 276 ivuga ko umuntu wese uhimba cyangwa uhindura mu buryo ubwo ari bwo bwose inyandiko cyangwa ikindi kintu cyanditseho igitekerezo, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y’ingingo zayo, igitegetswe gukorwa cyangwa icyarangije kwemeranywa, aba akoze icyaha.

Umuntu wese, ku bw’uburiganya, wandika, wandikisha ibintu bidahuye n’ukuri cyangwa ukora imenyekanisha ritari ryo afatwa nk’uwakoze icyaha cyo gukora ibihimbano.

Iyo abihamijwe n’urukiko, ahanishwa igifungo kitari munsi y’imyaka itanu (5) ariko kitarenze imyaka irindwi (7) n’ihazabu y’Amafaranga y’u Rwanda atari munsi ya miliyoni eshatu (3.000.000 FRW) ariko atarenga miliyoni eshanu (5.000.000 FRW) cyangwa kimwe gusa muri ibyo bihano.

Umunyamabanga wa Leta Irere Claudette na Arthur Germond bashyize ibuye ry’ifatizo ahagiye kubakwa ibyumba by’amashuri 20 bizigirwamo amasomo ya Mechatronics

Umuhango wo gushyira ibuye ry’ifatizo ku nyubako z’iryo shami wabereye muri IPRC-Tumba tariki 24 Mutarama 2022, uyoborwa n’Umunyamabanga wa Leta Ushinzwe amashuri y’imyuga n’ikoranabuhanga Claudette Irere na Arthur GERMOND wari uhagarariye Ambasaderi w’u Bufaransa mu Rwanda muri uwo muhango.

Mutabazi Rita Clemence Umuyobozi wa IPRC-Tumba, yavuze ko kuba mu Rwanda by’umwihariko muri IPRC-Tumba hagiye gutangizwa iryo shami rishya bigiye kuba ipfundo ry’ubumenyi buhuza abiga mu mashami anyuranye arimo Electronics na Telecomunication, muri ikoranabuhanga rigezweho mu nganda, mu rwego rwo kuzamura ubumenyi bw’abana b’u Rwanda.

Yatanze urugero agira ati 'Niba ari uruganda rukora Fanta baba bakeneye gutambutsa amacupa akajya aho yogerezwa, akajya aho ashyirirwamo Fanta akagera aho apfundikirwa, akagira n’igihe ava aho apfundikirirwa ajya mu makaziye. Ku munyeshuri wize Mechatronics aba afite ubumenyingiro bumufasha kumenya uburyo icupa risukuye n’uburyo rijyamo Fanta kugera rigeze mu ikaziye kandi ibyo byose bigakorwa bitwaye imbaraga z’amaboko y’abantu, ahubwo hifashishijwe ubumenyi ngiro abantu baba barize'.

Ni inyubako igiye kubakwa mu gihe cy’amezi atandatu aho iryo shami rizatangirana n’abanyeshuri 50 mu mwaka wa mbere, ariko mu myaka ikurikira rikazajya ryakira abanyeshuri 100 bakazajya basoza bafite impamyabumenyi ya 'Advanced Diploma’ aho bazajya biga mu gihe cy’imyaka itatu.

Mu guhitamo abo banyeshuri bizashingira ku batsinze neza kurusha abandi, mu mashami ya siyanse n’amashami y’ubumenyingiro.

Baba abarimu baba n’abanyeshuri biga muri IPRC-Tumba, barahamya ko iryo shami rya Mechatronics rije kuba igisubizo mu kongera ubumenyi mu mashami anyuranye aboneka muri iryo shuri, aho bemeza ko ibyo bajyaga bakora bakoresheje imbaraga nyinshi bigiye kujya bikorwa hifashishijwe ikoranabuhanga rihanitse.

Hategekimana Jean Bosco umwe mu bafasha abanyeshuri mu bijyanye n’imenyerezamwuga (Pratique), wanagiye mu gihugu cy’u Bufaransa guhugurirwa imikorere y’ishami rya Mechatronics, yavuze ko ibibazo by’abakozi mu bijyanye n’inganda bigiye kuba amateka.

Ati 'Nkimara kumva ko ishami rya Mechatronics rije muri IPRC-Tumba narishimye cyane, twajyaga dukoresha izi mashini bikatuvuna cyane, ariko ubu bigiye kuba amateka aho bimwe bigiye kuzajya bikora bidasabye ko abantu babigiramo uruhare rusaba imbaraga'.

Arongera ati 'Hari ubwo gukoresha izi mashini mu bijyanye no gusudira byajyaga bituvuna cyane ugasanga uru kurwana n’iki, ariko ku ruhare rwanjye n’abanyeshuri nigisha byadushimishije cyane kuko muri iri shami ryaje, batubwiye ko bazajya badufasha baprograma imashini, ubwazo zikikoresha zigatanga umusaruro, ibyo bizafasha abanyeshuri tuzigisha mu bijyanye n’ubumenyi bwo gukora mu nganda'.

Ni umushinga watangiye nyuma y’uko Perezida w’u Bufaransa asura u Rwanda muri Gicurasi 2021, aho yanasuye ishuri rya IPRC-Tumba, yifuza kugira icyo akora kugira ngo ubumenyi buhanitse yasanze muri iryo shuri burusheho kwiyongera nk’uko Kigali Today yabitangarijwe na Arthur GERMOND wari uhagarariye Ambasaderi w’UBufaransa mu Rwanda muri uwo muhango.

Ati 'Umwaka ushize ubwo Perezida Emmanuel Macron yari mu Rwanda mu ruzinduko rw’akazi, yatekereje ku rubyiruko rwiga muri IPRCs, ashima ubumenyi bafite ariko yiha n’intego y’uko u Bufaransa bugomba kugira itafari bushyira ku burezi mu Rwanda mu rwego rw’iterambere ryisumbuye, hagamijwe kuzamura impano z’abanyeshuri mu guhanga ubumenyi bukenewe mu bukungu bw’ejo hazaza h’igihugu, ari naho yahereye asura IPRC-Tumba yifuza ko hari icyo Leta y’u Bufaransa yafasha iryo shuri, ari nayo mpamvu hashyizwe ibuye ry’ifatizo ku nyubako z’ishami rya Mechatronics'.

Muri urwo ruzinduko hanasinywe amasezerano y’imikoranire hagati y’Ikigo gishinzwe amashuri y’ubumenyingiro mu Rwanda (RP) na Kaminuza ya Paris, intego iba umushinga wo guhugura no kuzamura ubumenyi mu rubyiruko rwa Rulindo, binyuze muri IPRC-Tumba n’amashuri ane yisumbuye y’imyuga n’ubumenyingiro ya APEKI, Bushoki, Kinihira na Buyoga TVET Shools.

Mu byagarutsweho n’Umunyamabanga wa Leta ushinzwe amashuri y’imyuga n’ubumenyi ngiro muri MINEDUC, Claudette Irere, yavuze ko ibuye ry’ifatizo rishyizwe muri IPRC-Tumba ari gahunda itangijwe nk’igisubizo mu kongera andi masomo mashya muri iryo shuri.

Umunyamabanga wa Leta Claudette Irere ageza ijambo ku bitabiriye uwo muhango

Avuga ko mu mezi atandatu iryo shami rizaba ryatangira kwakira abanyeshuri biyongera kuri 668 biga muri iryo shuri mu mashami atandukanye, ashimangira ko inganda ari kimwe mubyo ibihugu bishyize imbere, aho mu Rwanda usanga abazikoramo biganjemo abanyamahanga, yizeza abanyarwanda ko mu kwezi kwa Nzeri 2022, iryo shami ritangira kwakira abanyeshuri mu rwego rwo kubaka abantu bashoboye bazifashisha mu nganda z’u Rwanda.

Ati 'Uyu munsi natwe turifuza ko nk’abigisha imyuga n’ubumenyingiro ku rwego rwa Kaminuza, natwe tugira ikintu batizo dushyira muri iyi segiteri y’inganda, kugira ngo nazo zizamuke n’abanyarwanda batangire kujya bazikoramo'.

Minisitiri arasaba abana biga mu mashuri yisumbuye, cyane cyane muri siyanse, gushyira imbaraga mu myigire yabo, bihatira gutsinda cyane kuko ari byo bizashingirwaho mu kwakira abana baziga muri iryo shami rishya rya Mechatronics.

Uwo mushinga ugiye gukorwa ku nkunga ya Leta y’u Bufaransa, uzatwara amafaranga y’u Rwanda agera kuri Miliyari umunani, aho inyubako ubwazo zizatwara agera kuri miliyari enye.

Ibyumba by’amashuri byatangiye kubakwa ni 20 n’ibyumba 8 bya laboratwari, ibi byumba bizakoreramo ishami rishya rya Mechatronics aho ryitezweho kongera abakozi bo mu nganda b’abanyarwanda.

Bafashe ifoto y’urwibutso

Asaph DFW yatangiye umurimo w’ivugabutumwa mu kuririmba mu mwaka wa 2018 itangijwe n’abaririmbyi 6, ariko yaje gutangizwa ku mugaragaro ubwo urusengero ibarizwamo narwo rwafungurwaga ku mugaragaro muri Gashyantare mu mwaka wa 2019. Ubu ikaba igizwe n’abaririmbyi 30. Kuyijyamo bisaba kuba uri umukristo wa Zion Temple, gusa ubuyobozi bw’iyi korali bwongeraho ko “urebye nta byinshi bisabwa kubera ari bwo dusa nk’aho tugitangira umurimo”.

Asaph DFW igiye gukora ibitaramo bizenguruka Amerika

Kuri ubu iyi korali ifite indirimbo nshya bise ‘Umwami w’Ubwiza’ (King of Glory) iri kuri Album yabo ya kabiri. Ni indirimbo irimo “ubutumwa bubwira abantu ko Imana ari yo nyir’ubwiza bwose ndetse ko iri hejuru ya byose no gukundisha abantu Imana kurushaho”. Iyi ndirimbo yasohokanye n’amashusho yayo, yakiriwe neza cyane dore ko mu masaha macye imaze kuri Youtube imaze kurebwa n’abarenga ibihumbi 17, ikaba imaze gutangwaho ibitekerezo birenga 70.

‘Mwami w’Ubwiza’ itangira umwe mu baririmbyi bayo aririmba ati “Mwami we wuzuye ubwiza nyemerera ngusingize, sinabikora nk’uko biri, uri hejuru cyane”, maze n’abandi bakaza kumwakira bagasubiramo ayo magambo. Bakomeza baririmbana bati “Wicaye ku ntebe y’ubwiza, ubwiza budafite akagero, abagerayo ku kuramya no abanyamahirwe, hari icyo ngusaba Mwami nyemerera mpore nkuramya nzanye ibinyuzuye umutima mvuge ibigwi byawe”.

Muri iyi ndirimbo y’iminota 8 n’amasegonda 22, hagaragaramo Diane Nyirashimwe [Diane Zebedayo] wamamaye muri Healing Worship Team na True Promises Ministries ariko akaba aherutse kujya gutura muri Amerika hamwe n’umuryango (umugabo we ndetse n’imfura yabo Keza). Ku munota wa 3 n’amasegonda 10 ni bwo Diane atangira kuririmba. Diane wahise ahabwa izina rishya akimara kugera muri iyi korali y’aba Zion Temple bo muri Amerika, muri iyi ndirimbo Mwami w’Ubwiza’ agaragara yambaye bitandukabye n’iy’abandi baririmbyi.

Diane yakiranywe yombi muri Asaph DFW

Muri bwa buryo bwe yihariye bwo gutera indirimbo aho atangira aririmbira hasi akaza kuzamura ijwi, akagenda arimanura akongera akarizamura, gutyo gutyo, Diane aragira ati “Uri uw’igitangaza Mana, ntawarondora ubwiza bwawe, urengeye uko tukuririmba, tuguhaye ishimwe”. Nyuma yo kuririmba inshuro ebyiri aya magambo ahita ayasubiranamo inshuro 2 n’abaririmbyi bose, bakongera bakaririmba bati ‘Wicaye mu ntebe y’ubwiza, ubwiza bufadute akagero, abagerayo kukuramya ni abanyamahirwe, hari icyo ngusaba Mwami nyemerera mpore nkuramya,..”.

Uko Diane yahawe izina rishya akigera muri Zion Temple Dallas/Fortworth

Diane Zebedayo, ubu asigaye yitwa Deborah nyuma y’uko yinjiye muri Asaph DFW. Ni izina yiswe na Apostle Dr Paul Gitwaza Umuyobozi Mukuru wa Zion Temple. Esther Mugunga Umwanditsi wa Asaph DFW yabwiye InyaRwanda.com ko bishimiye cyane kwakira Diane kuko ari imbaraga korali yungutse. Ati “Naho uburyo twakiriye Diane ubu witwa Deborah, byari ibyishimo byinshi cyane birumvikana ko ari n’imbaraga twungutse zikomeye muri twe”.

Pastor Jacques Bagaza umwe mu babarizwa muri iyi korali akaba n’umwe mu bashumba ba Zion Temple Dallas yadutangarije ko Deborah ari izina Diane Zebedayo yiswe na Apostle Dr Gitwaza bitewe n’ubusobanuro bw’izina Diane dore ko yari ikigirwamana cyasengwaga muri Efeso. Ubu (Diane) ni Deborah. Ni Apostle Gitwaza warihinduye kubera ubusobanuro bwa Diane, yamwise Deborah. Diane yari Imana y'ingore yasengwa ga Muri Efeso”. 

Yakomeje ati “Kandi ni yo mpamvu (Diane Zebedayo) atakomeza kwitwa uko, izina rigira imbaraga ku muntu abandi bati ‘izina ni we muntu’. Ni yo mpanvu ubu yitwa Deborah umugore wabaye Intwarikazi mu gihe Israel yananiwe ku rugamba aba ari we uhaguruka ararwana ahesha Israel agaciro, uwo ni we Deborah”. Igitabo cy’Abacamanza 4:4-10 hagaragaza ko Deborah yaranzwe n’ubutwari ndetse agashishikariz abandi gukora ibyo Uwiteka ashaka. Ni umwe mu bahimbye banaririmba indirimbo ivuga uko urugamba Imana yafashishemo Abisirayeli gutsinda rwagenze.

Esther Muganga yahishuriye InyaRwanda.com ko Asaph DFW igiye gukora ibitaramo byo kuzenguruka Leta Zunze Ubumwe za Amerika muri uyu mwaka wa 2022, ati “Ku byerekeranye n’imishinga dufite uyu mwaka ni myinshi kuko dufite gukora Tour mu ma state amwe ya hano USA agera kuri 4 dukorerayo ibitaramo byo kwamamaza ubwami bw'Imana. Guhera mu kwa 5 tuzatangira ibyo bikorwa ndetse n’igikorwa twise ngarukamwaka cyo gukora Concert ya Live Recording ubwo tuzaba turi gukora Album ya 3 urebye ni ibyo dufite gukora muri uyu mwaka”.

Diane hamwe n’imfura ye. Diane akimara kugera muri Amerika yahinduriwe izina ubu yitwa Deborah

REBA HANO INDIRIMBO NSHYA ‘MWAMI W’UBWIZA’ YA ASAPH DFW

ANDI MAFOTO YA KORALI ASAPH DFW YA ZION TEMPLE DALLAS

Asaph DFW yateguje ibitaramo bikomeye muri uyu mwaka

Minisitiri Bamporiki aha impamyabushobozi umwe mu bagorowe

Servilien Bizimana, umuhuzabikorwa w’icyo kigo, avuga ko kuri abo 899, abagera kuri 349 bari barabaswe n’urumogi, 182 ari abasinzi naho 83 bakaba baranywaga heroine abandi bita mugo, kikaba ngo ari ikiyobyabwenge kirimo kugenda cyiyongera mu Rwanda kuko mbere bakiraga bakeya bagikoresha.

Hari na 260 bavangaga byibura ubwoko bubiri bw’ibiyobyabwenge ndetse na 25 banywaga ibindi biyobyabwenge nka kole, tineli na lisansi.

Imvano yo kunywa ibiyobyabwenge kandi ngo ahanini ni amakimbirane mu miryango, gatanya ku babyeyi zituma abana babura aho berekera no guta ishuri.

Abo bose ikigo cyabafashije mu buryo bwo kuganirizwa, ahanini bakaganirizwa mu matsinda (group therapy) cyane ko bitabwagaho n’abaganga mu by’imitekerereze (psychotelapist) batanu, ndetse n’abarimu batanu, gusa.

Abarimu bari bafite banabatoje indangagaciro z’umuco nyarwanda harimo ubunyangamugayo no gukunda igihugu, ndetse n’umwuga w’ububaji n’uwo gukora amatara (electricity), ku buryo hari 217 bahawe impamyabushobozi mu bubaji, 260 bahabwa iz’uko bize gukora amatara.

Icyakora hari na 249 batari barigeze bagera mu ishuri bigishijwe gusoma no kwandika ndetse no kubara, na 173 bahawe ubujyanama kuko ari bwo bari bakeneye nyuma y’uko hari n’ibindi bigo ngororamuco bari baragororewemo ariko ntibabashe kureka ibiyobyabwenge.

Umunyamabanga wa Leta muri Minisiteri y’umuco, Edouard Bampoliki, yabasabye kuzarenga ibyabaciye intege bigatuma baneshwa bakagwa mu biyobyabwenge, ahubwo bagaharanira gutera imbere no guteza imbere igihugu cyabo.

Yagize ati “Murabe abataneshwa. Mwaraneshejwe ariko ntimuzongere kuneshwa ukundi.”

Umunyamabanga wa Leta muri Minisiteri y’ubutegetsi bw’igihugu, Assoumpta Ingabire, we yababwiye ko abo basanze hari ukuntu babafata, ku buryo hari n’abatazemera ko bakize, hanyuma abasaba kuzakomera ku cyemezo cyo kureka ibiyobyabwenge.

Yagize ati “Buri wese mu buzima hari aho agera agatsikira, ariko icyubaka umuntu ni ukwanga guheranwa.”

Yunzemo ati “Kuki ibibazo byo mu muryango byaguherana? Aho mugiye ibibazo ntibyashize, n’abo mwasangiraga baracyahari. Ariko muzabe abadaheranwa!”

Abagorowe batahanye umugambi wo kuzibumbira mu makoperative bagakora bakiteza imbere, n’ibiyobyabwenge bakabireka burundu, nk’uko byavuzwe na Felix Kirezi, mu mwanya wa bose.

Yagize ati “Twaje hano ku bw’imigenzereze mibi yari ibangamiye umuryango nyarwanda. Ibiyobyabwenge nta cyiza twabikuyemo. Twiyemeje kuzishyira hamwe tugakora ibiduteza imbere, kandi tuzajya dutanga ubuhamya ku bubi bw’ibiyobyabwenge, kugira ngo n’abandi batazabigwamo.”

Ikigo ngororamuco cya Nyamagabe kimaze kugorora abasore n’abagabo 3104, habariyemo na 899 basezerewe kuri uyu wa 25 Mutarama 2022.

Ikigo ngororamuco cya Nyamagabe

Aba mbere cyabakiriye tariki 18 Kamena 2019, cyakira abandi muri Kamena 2020. Abasezerewe kuri uyu wa 25 Mutarama ni ab’icyiciro cya gatatu bakiriwe tariki 15 Mutarama 2021.

Kuri uyu wa Kabiri tariki ya 25 Mutarama 2022, uyu myugariro wa Chelsea kuri ubu uherereye ku ivuko muri Sierra Leone, yasangije abamukurikira ku mbuga nkoranyambaga ze amashusho y'uburyo budasanzwe yakiriwe n'abaturage ba Sierra Leone, maze arenzaho amagambo yo kubashimira byimazeyo.

Yagize ati'Mbuze icyo kuvuga, aba baturage ntibasanzwe! Mbikuye ku ndiba y'umutima mbashimiye uburyo mwanyakiriye, Imana ibahe umugisha'.

Kuri uyu wa mbere tariki ya 24 Mutarama, nibwo Rudiger yafashe rutemikirere ava mu Bwongereza yerekeza muri Sierra Leone.

Mu ifoto yasangije abamukurikira ku mbuga nkoranyambaga, yavuze ko agiye mu biruhuko muri Sierra Leone ndetse agiye kuhatangiza umuryango witwa 'Antonio Rüdiger Foundation for Sierra Leone'.

Uyu myugariro wa Chelsea ni umwe mu bagaragaje ko bashyigikiye ikipe ya Sierra Leone mu mikino y'igikombe cya Afurika 'CAN 2021'.

Rudiger ni umwe mu bafatiye runini Chelsea by’umwihariko ubwugarizi bwayo

CP Bruce Munyambo yabwiye aba bantu 1,585 biganjemo urubyiruko ko igihe bamaze bahugurirwa kureka imyitwarire ibangamye ndetse bakigishwa imyuga itandukanye gikwiye kubabera impinduka mu mitekerereze iboneye no mu iterambere aho guhora mu makosa.

Yagize ati 'Igihe mwataye mu myitwarire mibi irimo no gukoresha ibiyobyabwenge kirahagije, ntabwo dukeneye na rimwe kuzongera kugira uwo tubona mu myitwarire mibi. Guhora mwishinja ko muri abanyamakosa mubisige inyuma, muyoboke inzira yo gukora ibyiza kugira ngo bisibe ya makosa yose mwakoze bityo yibagirane.”

CP Munyambo yavuze ko Polisi izashyigikira ibikorwa byabo igihe bakwibumbira hamwe bagashyira mu bikorwa ibyo bize.

Ati “Nimusubira mu buzima busanzwe, turabasaba kubyaza umusaruro amasomo atandukanye mwigiye hano kandi nimwishyira hamwe ibikorwa byanyu bizahabwa inkunga kugira ngo mukomeze gutera imbere aho kugira uruhare mu biteza umutekano muke.”

Umuyobozi w’Akarere ka Rutsiro, Madamu Murekatete Triphose, yasabye ubuyobozi bw’inzego z’ibanze gukurikirana imishinga y’abava kugororerwa Iwawa kugira ngo idahomba kuko kenshi iyo ihombye abayikoraga bongera gusubira mu ngeso mbi ziteza umutekano muke bityo amahugurwa bahawe akaba abaye impfabusa.

Ati “Ubuyobozi bw’inzego z’ibanze icyo tugomba gukora ni ugukurikirana bihoraho imishinga ikorwa n’urubyiruko rwanyuze hano Iwawa kugira ngo badahomba bagasubira muri ya migirire mibi baba barahozemo mbere yo kugororwa.'

Uyu muyobozi yavuze ko umuryango ufite uruhare rwo kwimakaza indangagaciro n’imyitwarire myiza kandi bakayitoza abana kuko ngo byagaragaye ko abenshi mu bana bishora mu bikorwa biteza umutekano muke ari abaturuka mu miryango igirana amakimbirane.

Shema Frank w’imyaka 30, akaba ari umwe mu bahugurirwa Iwawa, avuga ko yicuza igihe n’amafaranga yataye akoresha ibiyobyabwenge kandi cyakabaye ari cyo gihe cyo kwita ku mugore we n’abana babiri. Yashimangiye ko nasubira mu buzima busanzwe azabyaza umusaruro uhagije umwuga w’ubudozi yigira Iwawa.

Yagize ati 'Narahuguwe bihagije bituma nicuza igihe nataye mu biyobyabwenge kandi nari kugikoresha nshakira imibereho myiza umuryango wanjye. Ibyo nigiye hano ngomba kubibyaza umusaruro nkakuramo icyo cyuho nagize n’ubwo bizantwara imbaraga nyinshi ariko ngomba kubikora, umuryango wanjye ukambona nk’umugabo wahindutse.”

Uru rubyiruko kandi rwanakanguriwe gukumira no kurwanya ibyaha batangira amakuru ku gihe. Nyuma y’ibiganiro hanabaye umukino w’umupira w’amaguru na Volleyball aho ikipe ya Polisi ikina mu cyiciro cya kabiri (Interfoce FC) yatsinze urubyiruko rurimo guhugurirwa Iwawa ibitego 4 kuri 2 inahabwa igikombe. Mu mukino w’amaboko (Volleyball) ikipe ya Rutsiro Volleyball yatsinze urubyiruko rwa Iwawa amaseti 3 kuri 1. Uru rubyiruko ruri Iwawa rwanahawe ibikoresho bya siporo birimo inkweto,imyenda n’imipira yo gukina.

Kuva muri 2010 ikigo ngororamuco cya Iwawa kimaze guhugura urubyiruko rusaga ibihumbi 27 bakoraga ibikorwa bibangamira umutekano n’ituze by’abaturage. Abarimo guhugurwa kuri iyi nshuro ni icyiciro cya 22 kigizwe n’abantu 1585 biganjemo urubyiruko.

Ni inkuru dukesha Polisi y’u Rwanda

Mu itangazo ryashyizweho umukono n’Umunyamabanga wa FERWAFA, Henry Muhire, iryo shyiraharahamwe ryavuze ko imikino yo kwishyura ya shampiyona y’icyiciro cya mbere mu Rwana mu mupira w’amaguru ndetse na shampiyona y’icyiciro cya kabiri izatangira ku itariki 12 Gashyantare 2022.

Iryo tangazo rikomeza rivuga ko ingengabihe y’uko imikino izakinwa, amakipe azayimenyeshwa mu gihe cya vuba.

Shampiyona y’icyiciro cya mbere mu Rwanda igeze ku munsi wa 14 mu gihe umunsi wa 15 ariwo wa nyuma w’imikino ibanza uzakinwa guhera tariki 27 Mutarama 2022 ugasozwa tariki 28 Mutarama 2022, uretse ikipe ya APR FC, Mukura VS na Rutsiro zifite imikino y’ibirarane mu gihe ku cyiciro cya kabiri imikino igeze ku munsi wa 12 w’imikino ibanza aho hasigaye umunsi umwe wa shampiyona.

Umukuru w’Igihugu yabitangaje ubwo yafunguraga ku mugaragaro ihuriro nyafurika ngarukamwaka ry’abagaba bakuru b’ingabo zirwanira mu kirere (AACS), kuri uyu wa Kabiri tariki 25 Mutarama 2022 ririmo kubera i Kigali guhera tariki 24 kugera tariki 28 Mutarama 2022, ku nshuro yaryo ya 11.

Ni ihuriro ririmo kuba ku bufatanye bw’ingabo zirwanira mu kirere za Leta zunze ubumwe za Amerika hamwe n’iz’u Rwanda, rikaba rihuriyemo ibihugu 30 byo muri Afurika hamwe n’abagaba bakuru b’ingabo zirwanira mu kirere 32.

Afungura ku mugaragaro iyi nama, Perezida Paul Kagame, yavuze ko ingendo z’indege ari ikintu gikomeye mu bijyanye no kubungabunga amahoro n’umutekano ku mugabane by’umwihariko mu bikorwa byo kugarura amahoro ariko kandi ngo ubushobozi bwabyo buracyari buke.

Ati 'Ubushobozi buke mu bijyanye n’indege butuma ingabo za Afurika zirwanira mu kirere zidatabara mu buryo bwihuse ahagaragaye ibibazo by’umutekano, byinshi mu bibazo by’umutekano bigenda bigaragara muri Afurika ni ibyambukiranya imipaka, kandi nta gihugu cyihagije ku buryo cyabisubiza cyonyine'.

Akomeza agira ati 'Tugomba rero gushyira imbere ubufatanye kubera ko gukorera hamwe byafasha ingabo za Afurika zirwanira mu kirere kubona uburenganzira mu ngendo z’ikirere z’abantu n’ibintu, ikindi kandi byanafasha kubona amahirwe y’amahugurwa yihariye ku batwara indege n’abo bafatanya, icya nyuma ubufatanye bwatuma havugururwa ibikorwa remezo byo mu kirere, birimo kugenzura ikirere hamwe n’itumanaho ryifashishwa mu kirere no ku butaka'.

Mu gusoza, Umukuru w’igihugu yavuze ko umugabo umwe adashobora kwigira ariko kandi ngo abishyize hamwe ntakibananira, ku buryo yizeye ko iyi nama ibizigirwamo bizatuma n’ibihugu bitarinjira mu muryango w’ingabo za Afurika zirwanira mu kirere bizatuma na byo byinjiramo.

Umuyobozi w’ingabo za Amerika zirwanira mu kirere ku mugabane w’u Burayi na Afurika, Gen. Jeffrey L. Harrigian, yavuze ko kubaka ubufatanye ari urugendo kandi rukorerwa mu bikorwa bimeze nk’ibyo bahuriyemo.

Ati 'Amahirwe nk’aya atuma turushaho gushimangira no kubaka umubano n’ubufatanye bwacu, bigatuma turushaho kwizerana no kwigirira icyizere mu ngabo zacu, ndabizi ko nitwishyira hamwe tugafatanya kuzana amahoro n’umutekano ku mugabane tubikoreye hamwe, iyi nama izaduha amahirwe yo gukorana no gushakira hamwe ibisubizo by’ibibazo by’ingezi bitwugarije'.

Umugaba Mukuru w’Ingabo z’u Rwanda zirwanira mu kirere, Lt Gen. Jean-Jacques Mupenzi, ari na we uyoboye umuryango w’ingabo za Afurika zirwanira mu kirere (AACS), yavuze ko iyi nama izabafasha mu kungurana ibitekerezo no gusangira ubunararibonye mu bijyanye n’ingendo z’indege ariko kandi ngo bazanungukiramo ibindi byinshi.

Ati 'Nyuma y’iyi nama twiteze ko tuzungukiramo umubano ukomeye w’ingabo za Afurika zirwanira mu kirere ari na ko dukomeza uwari usanzwe, ariko kandi tunarebere hamwe inzira zifatika zakemurirwamo ibibazo byo mu karere ndetse n’iby’umugabane'.

Iri huriro ngarukamwaka n’ubwo ririmo kuba ku nshuro yaryo ya 11 ariko Umuryango w’Ingabo za Afurika zirwanira mu Kirere (AACS), watangiye mu mwaka wa 2015 mu gihe u Rwanda rwabaye umunyamuryango muri 2017.

Kureba andi mafoto menshi, kanda HANO