Webrwanda Backend

Blog

  • Uburanga bw’abakobwa 9 barimo n’ufite ubumuga bwo kutavuga bazahagararira Intara y’Amagepfo muri Miss Rwanda (AMAFOTO) #rwanda #RwOT

    Ijonjora ryo gutoranya abakobwa bazaserukira Intara y’Amajyepfo ryabereye kuri Credo Hotel mu Karere ka Huye, ryasize habonetse abandi bakobwa 9 binjiye muri Miss Rwanda 2022 barimo na Uwimana Jeannette ufite ubumuga bwo kutavuga.

    Ni ijonjora ryazanye umwihariko muri iri rushanwa mu myaka myinshi rimaze. Uwimana Jeannette yabimburiye abandi bafite ubumuga bwo kutavuga kugerageza amahirwe ye muri Miss Rwanda.

    Uyu mukobwa yageze imbere y’Akanama Nkemurampaka aherekejwe n’umusemuzi wamufashaga kuganira na bo.

    Abajijwe impamvu yitabiriye iri rushanwa yagize ati 'Impamvu naje mu irushanwa rya Miss Rwanda nagiraga ngo mbone urubuga bwo gushishikariza abana bafite ubumuga gutinyuka bakitabira aya marushanwa.'

    Abagize Akanama Nkemurampaka bashingiye ku bisubizo n’imishinga y’abakobwa 9 barimo n’uyu, babahaye karibu mu cyiciro gikurikira.

    Intara y’Amajyepfo yari yabonye umubare uri hejuru w’abitabiriye ijonjora nk’uko byagiye bigaragara no mu zindi Ntara zabanje Amajyaruguru n’Uburengerazuba. Abakobwa 48 ni bo bari bahawe itara ry’icyatsi kugira ngo bahatanire imyanya yo kuyiserukira nyuma yo kuzuza ibisabwa byose harimo kwerekana icyemezo cy’uko nta bwandu bwa COVID-19 n’icyemezo cyo gukingirwa.

    Urugendo rwo gushaka uzegukana ikamba rya Miss Rwanda 2022 ruzakomereza ku Ntara y’Uburasirazuba mu Mujyi wa Kayonza kuri iki Cyumweru tariki 6 Gashyantare 2022.

    Urutonde rw’abakobwa icyenda babonye itike yo guhagararira Intara y’Amajyepfo muri Miss Rwanda 2022:

    Yasubizaga akoresheje ibimenyetso

    Uwimana Jeannette [40]

    Tanganyika Elisabeth [No 1]

    Ashimwe Michelle [No 32]

    Kamikazi Queen Roxanne [No 13]

    Ikirezi Hapiness [No 3]

    Ruzindana Belyse [No 31]

    Ituze Ange Melissa [No 14]

    Irakoze Sabrine Hyguette [No 34]

    Keza Melissa [No 24]

    Abakobwa uko ari 9 bakomeje mu kindi cyiciro

    Source : http://isimbi.rw/imyidagaduro/article/uburanga-bw-abakobwa-9-barimo-n-ufite-ubumuga-bwo-kutavuga-bazahagararira-intara-y-amagepfo-muri-miss-rwanda-amafoto

  • Umuramyi ‘La vie Ishimwe Yabaragiye Zachee’ y… – #rwanda #RwOT

    La vie Ishimwe Yabaragiye Zachee uzwi nka Lavie ni umusore utuye ku Gisozi mu Mujyi wa Kigali, akaba asengera mu Itorero rya ADEPR. Ubwo yasobanuraga izina rye, yavuze ko La vie Ishimwe ari yo mazina ye bwite hakiyongeraho ‘Yabaragiye’ izina rya Se ndetse na ‘Zachee’ izina rya Sekuru. ‘Lavie’ ni ryo zina yahisemo gukoresha mu muziki. Kuririmba yabitangiye cyera akiri umwana muto kuko yakuriye mu Ishuri ryo ku Cyumweru (Sunday School), aza gukomereza muri korali. 

    Ejobundi tariki 02 Gashyantare 2022 ni bwo yashyize hanze indirimbo ye ya mbere yitwa ‘Ntuhemuka’. Mu muziki yinjiyemo nk’umuhanzi wigenga, yavuze ko ashyize imbere “kuririmba nibanda ku butumwa bwiza (Gospel)”. Ni indirimbo aririmbamo ati “Mwami Yesu Mwami w’Intama ni wowe wenyine niringiye, uri umugabo urinda ijambo wavuze ukarisohoza, sinzakuvaho. Nzaguhanga amaso, ntegereje nizeye icyo wavuganye nanjye. Igihe byari bikomeye wambereye ubwihisho Mwami, urinda intambwe zanjye amajya n’amaza”.

    Mu kiganiro na InyaRwanda.com, Lavie yadutangarije ko iyi ndirimbo ye imwinjije mu muziki mu buryo bweruye irimo ubutumwa buhumuriza abantu, bubabwira ko Imana yabanye nabo mu bihe byashize yiteguye kubakorera n’ibisigaye kuko itajya ihemuka. Ati “Indirimbo yitwa ‘Ntuhemuka’ nashakaga kongera guhumuriza abantu mbibutsa ko mu gihe byari bikomeye yabatabaye, ubu atari bwo ibaretse, bayitegereze bizeye kuko idahemuka n’ibisigaye izabikora”. Yavuze ko intego ye mu muziki ari ukwagura ubwami bw’Imana no guhumuriza imitima y’abantu.

    Lavie yashyize hanze indirimbo yise ‘Ntuhemuka’

    Lavie avuga ko icyifuzo afite gikomeye muri uyu mwaka ari uko yazawurangiza Album ye ya mbere iri hanze. Ati “Nifuza kurangiza umwaka nsoje album yanjye ya mbere”. Yavuze ko yahisemo gukora Gospel kuko “Impamvu nyamukuru nk’uko Bible ibivuga nkwiye gukora umurimo w’Uwantumye hakiri ku manywa, nasobanukiwe uwo ndiwe mfata icyemezo cyo gukoresha itaranto nahawe”.

    Yavuze ko mu muziki usingiza Imana akunda cyane umuhanzi Israel Mbonyi, ndetse ngo bimukundiye bagakorana indirimbo ni ikintu cyamushimisha cyane nk’uko yabyitangarije muri aya magambo; “Nkunda Mbonyi Israel, kuko muri speech ze n’indirimboze bitanga ihumure  bigasana imitima”. Lavie yasabye abaramyi bagenzi be “gushyira imbere Kristo muri byose, gusoma Bible, no gusenga kuko ni ryo shingiro rivubura kw’ibihangano. Icyo nabasaba (abaramyi) ni ugushyira hamwe kuko dutandukanye n’abandi twe, Umwanzi dufite ni umwe ni Satani”.

    Lavie yifuza ko umwaka wa 2022 wazarangira nawe yarasoje gutunganya Album ye ya mbere

    REBA HANO INDIRIMBO ‘NTUHEMUKA’ YA LAVIE FT DAVID

    Source : https://inyarwanda.com/inkuru/114194/umuramyi-la-vie-ishimwe-yabaragiye-zachee-yasohoye-indirimbo-ntuhemuka-yibutsa-abantu-ko-i-114194.html

  • Rayon Sports yaguye miswi na Police FC #rwanda #RwOT

    Mu mukino wa gicuti, Rayon Sports yanganyije na Police FC igitego kimwe kuri kimwe.}

    Wari umukino wa gicuti wabereye kuri Stade Regional i Nyamirambo, wateguwe mu rwego rwo gufasha amakipe yombi kwitegura imikino yo kwishyura ya shampiyona ya 2021-22 izatangira tariki ya 12 Gashyantare 2022.

    Wari umukino wa mbere w’umutoza Jorge Paixão uheruka guhabwa inshingano zo gutoza Rayon Sports , wagombaga kumufasha kureba ikipe ye neza.

    Mu bakinnyi bashya Rayon Sports yaguze, Bukuru Christophe na Musa Esenu nibo umutoza yari yagiriye icyizere cyo kubanza mu kibuga.

    Hakiri kare ku munota 6, rutahizamu w’umugande, Musa Esenu yafunguye amazamu ku ruhande Rayon Sports.

    Binyuze mu bakinnyi barimo Kevin Muhire na Manace Mutatu bagerageje kurema uburyo bwinshi bw’ibitego ariko kuyabyaza umusaruro biragorana.

    Police FC yagerageje kwishyura iki gitego ariko amakipe yombi ajya kuruhuka ari 1-0.

    Mu gice cya kabiri Rayon Sports yashyizemo indi kipe irimo Ishimwe Kevin na rutahizamu w’umunya-Cameroun, Mael Dinjeke baheruka gusinyira iyi kipe.

    Police FC nayo yagiye ikora impinduka zimwe na zimwe, Zidane, Abouba Sibomana (uheruka gusinyira iyi kipe), Ndayishimiye Eric Bakame na Iyabivuze Ose binjiyemo havamo Omar Moussa, Papy, Danny Usengimana na Rwabugiri Umar.

    Police FC yakinnye ishaka kwishyura igitego na Rayon Sports ishaka icya kabiri, Prince winjiye asimbura Mico wagize ikibazo cy’imvune, ku munota wa 74 yateye ishoti rikomeye ariko Bakame arikuramo.

    Ku munota wa 83, Police FC yishyuye iki gitego gitsinzwe na Ose ku mupira yari ahawe na Jean Paul winjiye mu kibuga asimbura Dominique.

    Ku munota wa 88, Ishimwe Kevin yahaye umupira mwiza Dinjeke Mael ariko ateye mu izamu unyura hanze yaryo. Umukino warangiye ari 1-1.

    Ba kapiteni n’abasifuzi mbere y’umukino

    Kevin Muhire ashaka uko acikana umupira Radu

    Esenu yishimira igitego yatsindiye Rayon Sports

    Perezida wa Rayon Sports, Uwayezu Jean Fidele akurikiranye umukino

    Source : http://isimbi.rw/siporo/article/rayon-sports-yaguye-miswi-na-police-fc

  • Perezida Macky Sall yasimbuye Félix Tshisekedi ku buyobozi bwa Afurika yunze Ubumwe #Rwanda #RwOT via @kigalitoday #rwanda #RwOT

    Perezida Macky Sall na Félix Tshisekedi bahererekenyije ububasha

    Perezida Macky Sall na Félix Tshisekedi bahererekenyije ububasha

    Perezida Macky Sall asimbuye kuri uwo mwanya Félix Antoine Tshisekedi Tshilombo, Perezida wa Repubulika Iharanira Demokarasi ya Kongo (DRC), wasoje manda ye nka Perezida wa Afurika yunze Ubumwe, yari yagiyeho mu mwaka wa 2021 asimbuye Perezida wa Afurika y’Epfo, Cyril Ramaphosa.

    Uyu muhango ukaba wabereye imbere ya Perezida wa Komisiyo ya Afurika yunze Ubumwe (AUC), Moussa Faki Mahamat, n’Umuyobozi wungirije wa komisiyo, Dr. Monique Nsanzabaganwa.

    Perezida ucyuye igihe Tshisekedi, yifurije Macky Sall umusimbuye kuzagira ishya n’ihirwe mu nshingano agiye gukomeza, aboneraho no gushimira abakuru b’ibihugu na za Guverinoma bakomeje kumushyigikira muri iki gihe yari amaze ayoboye AU.

    Perezida Macky Sall, Umuyobozi mushya wa AU

    Perezida Macky Sall, Umuyobozi mushya wa AU

    Yavuze ko cyari igihe gikomeye kubera icyorezo cya Covid-19, yanagaragaje ko hari byinshi byakozwe, birimo kongerera ubushobozi no guteza imbere umugore n’urubyiruko, kuzamura demokarasi n’imiyoborere myiza, muri gahunda z’iterambere ziteganyijwe mu cyerekezo 2063.

    Mu ijambo rye, Perezida Macky Sall yavuze ko ashimira icyizere yagaragarijwe nk’umuyobozi w’Umuryango mu mwaka uri imbere, ndetse ashimira uwo asimbuye ku mirimo myiza yakoze.

    Ati 'Ndashimira wowe kandi ndabizeza ko twiyemeje gufatanya n’ibihugu byose bigize uyu muryango, mu kurangiza inshingano zacu'.

    Yagaragaje ko n’ubwo hari ibyakozwe, ariko nanone bafite akazi kabategereje karimo ibibazo bikomeje kuba byinshi kandi by’ingutu, cyane cyane mu rwego rw’amahoro n’umutekano, kurwanya iterabwoba, kurengera ibidukikije, ubuzima ndetse n’iterambere ry’ubukungu n’imibereho myiza y’abaturage, n’ikibazo giteje inkeke cya kudeta zikomeje kwiyongera ku mugabane wa Afurika.

    Iyo nama y’Inteko ya Afurika yunze Ubumwe ikaba yateranye ifite insanganyamatsiko igira iti: 'Gushimangira imbaraga mu mirire no kwihaza mu biribwa ku mugabane wa Afurika: Gushimangira gahunda z’ubuhinzi n’ubworozi, Ubuzima n’Imibereho Myiza y’Abaturage mu kwihutisha iterambere ry’abantu n’iry’ubukungu'.

    Iyo nama yateranye mu gihe hizihizwa imyaka 20 ishize icyitwaga Umuryango w’Ubumwe bwa Afurika (OUA), gisimbuwe na Afurika yunze Ubumwe (AU).

    Source : https://www.kigalitoday.com/amakuru/mu-mahanga/article/perezida-macky-sall-yasimbuye-felix-tshisekedi-ku-buyobozi-bwa-afurika-yunze-ubumwe

  • Amajyaruguru: Polisi iraburira abamotari bahisha Pulake za moto bagamije kwishora mu byaha #Rwanda #RwOT via @kigalitoday #rwanda #RwOT

    Bamwe mu bamotari banenga bagenzi babo bakora amanyanga yo guhisha pulake no kuzihindura

    Bamwe mu bamotari banenga bagenzi babo bakora amanyanga yo guhisha pulake no kuzihindura

    Abahindura pulake za moto ngo bakoresha amayeri yo kuzisiga ibyondo, cyangwa bagasiba inyuguti cyangwa imibare yazo, bakoresheje utwomekano twa pulasitiki tuzwi nka 'sparadra’.

    Umuyobozi w’abamotari mu Karere ka Gakenke, Musengo Ladislas, nk’umwe mu bazi neza imiterere y’iki kibazo, avuga ko bikorwa mu buryo butandukanye.

    Agira ati 'Abo bamotari bakora amanyanga yo guhindura pulake za moto, bakoresha uburyo butandukanye. Hari nk’ufata pulake ya moto ye, wenda hari nk’umubare cyangwa inyuguti byoroshye guhindura, urugero niba mu nyuguti ziyanditseho harimo L; afata ka sparadra, akakomeka ku karongo k’iyo nyuguti ya L ko hasi gatambitse, bikagaragara ko ari I'.

    Ati 'Yaba ari nk’umubare gatatu, agashaka irangi rijyanye n’ibara ry’uwo mubare, akawugira umunani. Iyo yabikoze gutyo, yikorera amakosa uko yiboneye ntacyo yikanga, urugero niba anyuze nko kuri camera afite umuvuduko mwinshi, ihita ibona ya mibare n’inyuguti yahinduye, ikaba ariyo yandikira, noneho bikajya kuri wa mu motari wundi ufite pulake igizwe n’imibare ya nyayo uwo munyamanyanga w’umumotari aba yiyitiriye'.

    Yongera ati: 'Biba binashoboka ko uwo muntu yakora amanyanga yibereye nk’i Kigali, cyangwa nka za Rusizi, hakandikirwa umumotari uri nk’i Burera cyangwa Karongi, nyamara nta makosa yakoze. Nk’ubu hari umumotari nyobora ukorera mu Gakenke wandikiwe, bigera ubwo ageza muri contrevation z’ibihumbi 250, biturutse ku munyamanyanga wari wahinduye zimwe mu nyuguti za moto ye muri ubwo buryo. Twaje kugenzura dusanga ari uwo muri Kigali'.

    Muberuka Safari, Umuyobozi w’Ihuriro ry’Abamotari (Union) mu Turere twa Musanze, Burera na Gakenke, avuga ko mu gihe batahuye umumotari wakoze amanyanga nk’ayo, bihutira gufata ikinyabiziga cye, kigashyikirizwa Polisi, na we akabiryozwa.

    Ni mu gihe uwarenganyijwe na we iyo amenyekanye, ubuyobozi bwa Koperative abarizwamo, bufatanya na Polisi, hagakorwa igenzura akarenganurwa.

    Bene nk’abo ba motari, usibye kwitwikira ayo manyanga, bakaba barenza umuvuduko ugenwe, ngo usanga ari na bo batwara magendu, ibiyobyabwenge, cyangwa bagatwaza abajura ibyo bibye, kurenza amasaha agenwe yo kuba bageze mu ngo zabo, ibintu bakora ntacyo bikanga kuko baba bazi neza ko bigoranye kubatahura.

    SP Akex Ndayisenga, Umuhuzabikorwa w’ibikorwa bya Polisi n’abaturage mu Ntara y’Amajyaruguru, avuga ko umumotari akwiye kuba inyangamugayo.

    Ati 'Icya mbere ni ukumenya ko ufatiwe mu cyaha nk’icyo abihanirwa n’amategeko. Ikindi ni uko abamotari bakwiye kurangwa n’indangagaciro z’ubunyarwanda no gukunda igihugu. Bakwiye kuba barwanya ikintu cyose gihungabanya umutekano, cyangwa ikidindiza iterambere'.

    Umwuga wo gutwara abagenzi kuri moto ufatwa nk

    Umwuga wo gutwara abagenzi kuri moto ufatwa nk’ufatiye igihugu runini kuko utunze benshi

    Ati 'Tubasaba kujya bihutira gutanga amakuru y’ababikora byihuse, kugira ngo badakomeza kubasiga icyasha. Umwuga w’ubumotari ufatwa nk’ufatiye runini igihugu kuko utunze benshi. Ni ngombwa rero ko abawukora, mbere na mbere birinda amakosa ayo ari yo yose yangiza isura y’umwuga wabo, bagashyira imbere imyitwarire n’imikorere ituma bawukora neza'.

    Polisi y’u Rwanda ikorera mu Ntara y’Amajyaruguru, igaragaza ko kugeza ubu moto umunani, ari zo zimaze gufatwa pulake zazo zasizwe ibyondo, ziyongeraho moto eshatu na zo zafashwe nyuma y’uko bigaragaye ko imibare imwe n’imwe n’inyuguti za pulake zazo bazisibye.

    Source : https://www.kigalitoday.com/amakuru/amakuru-mu-rwanda/article/amajyaruguru-polisi-iraburira-abamotari-bahisha-pulake-za-moto-bagamije-kwishora-mu-byaha

  • Abakozi ba BK bashinjwa kuyihombya n'abo bahaye inguzanyo baburanye ubujurire bwari bumaze inshuro 8 busubikwa #rwanda #RwOT

    Abakozi ba BK batatu'' muri batandatu bakatiwe n'urukiko rwisumbuye rwa Gasabo batangiye kuburana ubujurire bwabo mu rukiko rukuru nyuma y'umwaka bakatiwe.Bose basabye urukiko kubarekura.

    Aba bakozi ba BK harimo uwahoze akuriye ishami rya BK Kimironko n'uwari ukuriye inguzanyo muri iryo shami,n'umuyobozi wari ukuriye umushinga wiswe ZAMUKA-MUGORE mu gihugu hose.

    Bafunzwe muri Nzeri 2019 bafatanwa n'abandi bantu 12 bari mu bahawe inguzanyo y'umushinga wa Banki ya Kigali wiswe ZAMUKA-MUGORE.

    Abaregwa bose uko bari 15 Ubushinjacyaha bwari bubakurikiranyeho ibyaha bifitanye isano n'ibyaha bimunga ubukungu bw'igihugu,harimo icyaha cyo gukora no gukoresha inyandiko mpimbano n'icyaha cyo kunyereza umutungo wa Banki ya Kigali (BK) usaga Miliyoni 778,002,947Frw.

    Abaregwa bose kuva batangira kuburana mu rukiko rwisumbuye rwa Gasabo baburanye bahakana ibyaya byose by'ubushinjacyaha,basaba urukiko kubarekura kuko ikirego cy'ubushinjacyaha nta shingiro gifite kuko nta bimenyetso beretse urukiko bibahamya icyaha.

    Abaregwa babwiye urukiko ko nta gihombo BK yatejwe n'inguzanyo yahaye bamwe mu bagore bakoraga ubucuruzi buciriritse mu cyo BK yise ZAMUKA-MUGORE.

    Banki ya Kigali iri muri uru rubanza iregera indishyi zisaga Miliyoni 950,713,521Frw z'igihombo yise ko yatejwe n'abahoze ari abakozi bayo ubwo hatangwaga inguzanyo za BK m umushinga wa ZAMUKA-MUGORE BK Ihagarariwe na Me Rutagengwa Jean Damascene.

    Muri Gashyantare 2021 Urukiko rwisumbuye rwa Gasabo rwakatiye abantu batandatu harimo batatu bahoze ari abakozi ba Banki ya Kigali ibihano bitandukanye abakozi ba BK bakatiwe imyaka 6 n'ihazabu ya Miliyoni 15,000,000Frw.

    Naho uwitwa Uwizeye Merthe Petite,Uzamushaka Mediatrice na Mulinda Elie bo urukiko rubahanisha igihano cy'igifungo cy'imyaka 5 n'ihazabu ya Miliyoni 1,500,000Frw kuri buri wese.

    Icyenda muri 15 baregwaga n'ubushinjacyaha mu rukiko rwisumbuye rwa Gasabo bagizwe abere n'urukiko ruhita rutegeka ko barekurwa uwo mwanya,

    Muri icyenda baburanaga harimo batanu baburanaga badafunze harimo na Uwizeye Marthe Petite nawe waburanaga adafunze ariko we urukiko rukaba rwamuhamije ibyaha ruranamukatira'.

    Abakatiwe n'urukiko bamaze imyaka ibiri n'igice bafungiwe muri Gereza ya Nyarugenge izwi nka Mageragere.

    Urikiko nyuma yo kurekura bamwe abandi rukabakatira abakatiwe bahise bajuririra urukiko Rukuru kuko batanyunzwe n'icyemezo cy'urukiko rwisumbuye rwa Gasabo.
    Ubushinjacyaha ntabwo bwigeze bujuririra icyemezo cy'urukiko''.

    Uru rubanza mbere y'uko rutangira kuburanishwa ubujurire bwarwo rwasubitswe inshuro umunani mu bihe bitandukanye''.

    Rwagiye rusibikwa kubera impamvu z'urukiko ahandi rwasubitswe biturutse ku kibazo cy'icyorezo cya Covid-19 hari n'ubwo rwasubitswe biturutse k'umucamanza basanze afitanye isano rya hafi na Ndabaramiye Jimmy wahoze akuriye umushinga wa BK wiswe ZAMUKA-MUGORE.

    iri subikwa rya hato na hato bamwe mu miryango y'abaregwa ndetse n'abaregwa ubwabo bagiye baryinubira bakavuga ko Ubutabera butinze birangira butakiri ubutabera''.

    Ubwo Urubanza rw'ubujurire rwatangiraga kuburanishwa kuri uyu wa 04 Gashyantare 2021 Abacungagereza bari bazanye ababuranyi bafunze babakuye muri Gereza ya Nyarugenge.

    Saa tatu za mu gitondo nibwo inteko y'abacamanza batatu n'umwanditsi w'urukiko yatangiye kuburanisha uru rubanza.

    Ubushinjacyaha bwari buhagarariwe n'abashinjacyaha babiri''

    Abaregwa bagaragaye mu rukiko bose bunganiwe n'abanyamategeko bagera ku icyenda''.

    Umucamanza yavuze ko kubera igihe uru rubanza rwari rumaze rutaburanishwa ko kuri iyi nshuro rugomba gupfundikirwa buri muburanyi n'abamwunganira bakazajya bafata isaha yo gutanga impamvu z'ubujurire bwabo kuko umwanzuro uba washyizwe muri Systeme kandi nawo witabwaho mu gufata icyemezo cy'urukiko'.'

    Ubushinjacyaha bwasabye urukiko ko mu batangira bagaragaza impamvu z'abo z'ubujurire bwabo hatangira kumvwa Bagambiki Robert kuko ariwe wari ushinzwe kwakira dosiye mu mushinga wa ZAMUKA-MUGORE wa BK.

    Bagambiki Robert yakatiwe n'urukiko rwisumbuye rwa Gasabo igihano cy'igifungo cy'imyaka itandatu n'ihazabu ya Miliyoni 150,000,000Frw ahamijwe Icyaha cyo kwakira Ruswa n'icyaha cyo guhimba no gukoresha inyandiko mpimbano.

    Bagambiki Robert yatangiye yerekana impamvu zikomeye zatumye ajururira urukiko rukuru, Bagambiki yari yunganiwe na Me Ngarambe Raphael na Me Mukamazimpaka Hillaria.

    Bagambiki Robert yabwiye urukiko rukuru ko urukiko rwisumbuye rwa Gasabo rwakoze amakosa rukamuhamya icyaha kitabayeho atigeze anabazwa mu nzego zose yanyuzemo haba mu bugenzacyaha mu Bushinjacyaha ndetse no mu rukiko.

    Ubwo yatangiraga kuburana mu mizi'' Bagambiki ati “nyakubahwa bacamanza nahamijwe icyaha cya Ruswa kandi ntacyo nigenze ndegwa.''

    Bagambiki Robert yabwiye urukiko ko yahamijwe n'urukiko icyaha cy'inyandiko mpimbano ariko nubwo yakiburaye mu rukiko ko atacyemera kuko nta cyabayeho.

    Bagambiki yavuze ko nta dosiye yagenzuye irimo inyandiko mpimbano kuko n'abahawe inguzanyo bose bamaze kuzishyura abandi n'ubu bakizishyura nk'uko amategeko abiteganya.

    Me Ngarambe Raphael umwunganira mu mategeko yasabye urukiko rukuru ko rwakora nk'urukiko rukuru rugaha umukiriya we ubutabera kuko urukiko rwisumbuye rwa Gasabo rwirengagije ibisobanuro byose Bagambiki yaruhaye anarwereka ibimenyetso,

    Me Ngarambe ati rwabirenzeho ruramukatira rumuhamya n'icyaha atigeze aburana''

    Uyu munyamategeko yavuze ko BK yihutiye gufungisha abakozi bayo itabanje kubakorera igenzura ngo imenya neza koko niba baba barateje igihombo.

    Me Ngarambe Raphael yasabye urukiko rukuru ko ibyavuzwe n'umukiriya we nirubibona ukundi Bagambiki Robert yazahanishwa igihano cyo gutanga ihazabu ya Miliyoni 3 cyangwa agahanishwa igihano gisubitse nkuko ingingo ya 239 ibiteganya.

    Me Ngarambe ati iyi ngingo iteganya ko umuntu wahamijwe icyaha n'urukiko cyo gukoresha inyandiko mpimbano bimwe mu bihano biteganijwe muri iyo ngingo harimo gutanga ihazabu ya Miliyoni 3Frw cyangwa gusubikirwa igihano cyangwa se akaba yahanishwa igifungo bitewe n'uko umucamanza abibona.

    Me Ngaramba yavuze ko ibyo avuga atari ibintu bishya kuko hari imanza nyinshi zimaze gufatwaho umwanzuro n'umucamanza agategeka ko uregwa ahanishwa gutanga amande cyangwa se agahanishwa ihabwa igihano gisubitse kuko byose biteganwa n'amategeko mu bushishozi bw'urukiko

    Nyagasaza Natacha wahoze akuriye ishami rya BK ya Kimironko niwe wakurikiyeho.Yakatiwe n'urukiko rw'isumbuye rwa Gasabo igifungo cy'imyaka 6 n'ihazabu ya Miliyoni 15,000,000Frw ahamijwe icyaha cyo kwakira Ruswa n'icyaha cyo guhimba no gukoresha inyandiko mpimbano.

    Nyagasaza Natacha yabwiye urukiko rukuru ko kuva yatangira kuburana mu rukiko rwisumbuye rwa Gasabo atigeze yemera ibyaha by'ubushinjacyaha harimo icyaha cyo gukora no gukoresha inyandiko mpimbano no guhombya umutungo wa BK .

    Nyagasaza Natacha yabwiye urukiko ko we nk'umuyobozi w'ishami rya BK ya Kimironko atarafite mu ishingano zo kugenzura uwo mushinga wa ZAMUKA-MUGORE kuko wari umushinga wagutse wa BK utararebaga ishami rya Kimirinko gusa.

    Nyagasaza Natacha yabwiye urukiko ko usibye BK yabigirizaho nkana ikabafungisha,muri Rapport yakozwe na BK igaragaza uko umushinga wa ZAMUKA-MUGORE wagenze muri gahunda yo gutanga inguzanyo no kuzishyura.BK yemeje ko umushinga wagenze neza ku gipimo cya 92%.

    Nyagasaza Natacha akibaza aho icyo gihombo cya Miliyoni zisaga 778,002,947Frw cyavuye kandi na BK yiyemerera ko nta gihombo yagize.

    Nyagasaza Natacha yasoje asaba urukiko rukuru ko mugihe ruzaba rwiherereye rwazamurekura agasanga umuryango we rugatesha agaciro icyemezo cy'urukiko rwisumbuye rwa Gasabo kuko rwagifashe rwirengagije ibimenyetso byose n'impamvu zose yatanze ngo arekurwe.

    Me Gilbert Ndayamabaje na Me Umulisa Alice bunganira Nyagasaza Natacha babwiye urukiko ko umukiriya bunganira nk'uko yaburanye ahakana ibyaha byose akurikiranyweho n'ubushinjacyaha, ntabwo yagiye kure y'uko yireguye ku rwego rwa mbere.

    Aba banyamategeko bati turasaba ko mu bushinshozi bwanyu mwarekura uwo twunganira kuko yafunzwe na munyumvishirize gusa naho ubundi nta cyaha yakoze cyakagombye kuba cyatuma afungwa imyaka itandatu yose''

    Ndabaramiye Jimmy wahoze akuriye umushinga wa ZAMUKA-MUGORE,Urukiko rwisumbuye rwa Gasabo rwamuhanishije igihano cy'igifungo cy'imyaka 6 n'ihazabu ya Miliyoni 15,000,000Frw rumuhamije icyaha cya ruswa n'icyaha cyo guhimba no gukoresha inyandiko mpimbano

    Ndabaramiye Jimmy yabwiye urukiko rukuru ko ubushinjacyaha bwashingiye ku bintu bitandukanye ariko budafite ibimenyetso bimuhamya icyaha.

    Ndayambaje Jimmy avuga ko Ubushinjacyaha buvuga ko ariwe muyobozi mukuru w'umushinga wa ZAMUKA-MUGORE akaba ariwe wemezaga bwa nyuma abantu bose bakaga inguzanyo ya BK.

    Ndayambaje yavuze ko Ubushinjacyaha bwavuze ko yafashe icyemezo agaha abantu basaga 137 Miliyoni 516,537,666Frw akavuga ko Ubushinjacyaha bwavuze ko inyandiko zatumye ayo mafaranga asohoka zari inyandiko mpimbano''.

    Ndayamabaje Jimmy avuga ko ibyavuzwe n'ubushinjacyaha ahubwo aribyo bitavugisha ukuri kuko nta bimenyetso butanga bwereka urukiko ko koko yaba yarateje igihombo Banki ya Kigali'.

    Ndayamabaje Jimmy yavuze ko nta gihombo yateje BK gikomoka ku mushinga wa ZAMUKA-MUGORE kuko na BK ubwayo muri Raporo yakoze muri 2019, yavuze ko nta gihombo cyabayeho.

    Ndabaramiye Jimmy ufite abanyamategeko batatu barimo Me Gakunzi Musore Valery, Me Ruramira Zebedee Bizimana na Me Serugo Jean Baptiste,basabye ko uwo bunganira yarekurwa n'urukiko agasubizwa mu buzima busanzwe
    Kuko uwo mushinga wa ZAMUKA-MUGORE n'uyu munsi ukora kandi ukora neza.''

    Hakurikiyeho Uzamumushaka Mediatrice wahoze akora ubucuruzi buciriritse bw'ibikoresho by'ubwubatsi nawe yakatiwe n'urukiko rwisumbuye rwa Gasabo igihano cy'igifungo cy'imyaka 5 n'amezi atatu n'ihazabu ya Miliyini 1,500,000Frw'' rumuhamije icyaha cy'ubufatanyacyaha ku cyaha cyo guhimba no gukoresha inyandiko mpimbano n'icyaha cyo gutanga Ruswa.

    Uzamushaka Mediatrice niwe wakurikiye yabwiye urukiko ko atumva impamvu yahaniwe icyaha atakoze kitanabayeho kuko inguzanyo zose yahawe na BK yafunzwe yaramaze kwishyura umwenda wose yari abereyemo Banki ya Kigali,''

    Uzamushaka Mediatrice yemereye urukiko ko yatse ibyangombwa abakozi be akajya kubakira inguzanyo muri BK kuko umushinga wa ZAMUKA-MUGORE utasabaga inguzanyo BK ikamuguriza Miliyoni 15,000,000 Frw icyo gihe ko ariko nazo yafunzwe yaramaze kuzishyura'.

    Uzamushaka yabajije urukiko rukuru impamvu urukiko rwisumbuye rwa Gasabo rwamwigirijeho nkana rukamukatira kandi hari umwe mu bo bari bafunganwe baregwaga ibyaha bimwe byo kwakira inguzanyo urukiko rwarekuye,ariko we rugakomeza rukamufunga kandi yaramaze kwishyura umwenda wa BK.

    Uzamushaka Mediatrice ati “nagize amahirwe nza imbere yanyu mundenganure mbone ubutabera kuko abantu barareshya imbere y'amategeko.''

    Uzamushaka yavuze ko uwitwa Agnuska Joyanna nawe yahawe inguzanyo zirimo n'abandi yari yazakiye,ariko urukiko rwamurekuye rushingiye ko yari yaramaze kwishyura umwenda wose''.

    Uzamushaka ati Ba nyakubahwa bacamanza murabona ntararenganye koko? Nge nazize iki?ndasaba ko mu bushishozi bwanyu mwazandenganura mu gihe muzaba mwiherereye kuko maze igihe kinini mfunze kandi nazize amaherere?.

    Mulinda Elie niwe wakurikiyeho nawe urukiko rwisumbuye rwa Gasabo rwamukatiye imyaka itanu n'amezi atatu n'ihazabu ya Miliyoni 1,500,000Frw kubera icyaha cyo gutanga Ruswa'',

    Mulinda Elie yabwiye urukiko rukuru ko yarujemo aje gusaba imbabazi kuko ari umwe mu bafashije ubushinjacyaha mu kumenya uko umugambi wo kugusha mu gihombo umushinga wa ZAMUKA-MUGORE wagenze.

    Mulinda yasabye urukiko ko rwamurekura kuko igihe amaze afunze gihagije asaba ko nirwiherera rwazamurekura''.

    Uwizeye Marthe Petite niwe wasoje iburanisha ninawe uburana adafunze kuko yarekuwe n'urukiko rwibanze rwa Gasabo mu gihe cy'ifunga n'ifungurwa ry'agateganyo agasaba gukurikiranwa adafunze urukiko rurabimwemerera.

    Uyu nawe urukiko rwisumbuye rwa Gasabo rwamuhamije icyaha cyo gutanga Ruswa rumuhanisha igihano cy'igifungo cy'imyaka itanu n'amezi atatu n'ihazabu ya Miliyoni 1,500,000Frw.

    Uwizeye yabwiye urukiko ko nta Ruswa yatanze ngo abone inguzanyo kuko n'inguzanyo yahawe ya Miliyoni 5,000,000Frw yamaze kuyishyura.

    Uwizeye Marthe Petite yasabye urukiko ko rwazagengura umwanzuro yakoze rukawugenderaho rukamugira umwere ku byaha yahamijwe n'urukiko rwisumbuye rwa Gasabo.

    Banki ya Kigali yahawe ijambo ngo igire icyo ivuga ku bujurire bwatanzwe n'abakatiwe Me Rutagengwa Jean Damascene abwira urukiko ko indishyi batse abaregwa kuva mu rukiko rwisumbuye rwa Gasabo ko ntacyahindutse.

    Uyu munyamategeko wa BK yabwiye urukiko ko indishyi BK isaba zireba gusa abahoze ari abakozi bayo kuko aribo bayiteje igihombo.

    Me Rutagengwa yavuze ko abandi indishyi zitabareba ko igihombo BK yatejwe gikwiye kwirengerwa na Ndabaramiye Jimmy Nyagasaza Natacha na Bagambiki Robert ati “abandi ntacyo tubasaba rwose.”

    Umucamanza yabajije Me Rutagengwa Jean Damascene indishyi BK yaka umubare wazo uyu munyamategeko ati “BK isaba ko yahabwa indishyi no gusubizwa amafaranga yose yatanzwe mu mushinga wari wariswe ZAMUKA-MUGORE angana na Miriyoni 778,002,947Frw.

    Me Rutagengwa kandi yasabye urukiko ko abahoze ari abakozi ba BK bafatanya kwishyura amafaranga angana na Miriyoni 564,364,620Frw y'abantu bahawe inguzanyo bakoresheje inyandiko mpImbano mu bihe bitandukanye.

    BK yasabye indishyi z'akababaro zingana na Miriyoni 950,713,521Frw kuko BK yashowe mu manza zitari ngombwa zirimo n'igihembo cya Avoka.

    Ubushinjacyaha n'ubwo butajuriye bwabwiye urukiko ko abo bwafunze bahoze ari abakozi ba Banki ya Kigali bahaga abantu inguzanyo ingana na Miliyoni 5,000,000Frw barangiza bakaka indonke abo bahaye inguzanyo iri hagati y'ibihimbi magana Atanu na Miliyoni imwe.

    Ibyavuzwe n'ubushinjacyaha byamaganiwe kure n'abaregwa babusaba kwereka urukiko ibimenyetso simusiga cyangwa se kwerekana uwo Ubushinjacyaha bwafatiye mu cyuho.

    Nyuma y'uburanisha ryamaze amasaha umunani rikarangwa n'impaka hagati y'ubushinjacyaha,BK iregera indishyi, ndetse n'abaregwa''.

    Umucamanza yapfundikiye iburanisha ategeka ko abavuye muri Gereza basubizwa aho bafungiye avuga ko uru rubanza ruzasomwa kuwa 03 Werurwe 2022 Saa munani z'igicamunsi.”

    Icyumba cy'urukiko cyari kirimo bamwe mumiryango y'abaregwa

    Abaregwa bamaze imyaka ibiri n'igice bafunze.''

    Imiterere y'icyibazo cy'aba bakozi ba BK n'abandi bantu cyatumye bose bisanga imbere y'ubutabera kubera umushinga wa ZAMUKA-MUGORE wa BK.

    Muri Kanama 2018 Banki ya Kigali izwi nka (BK) yatangije umushinga wo gutanga inguzanyo mu bagore bakoraga ubucuruzi buciriritse, icyo gihe umushinga wiswe ZAMUKA-MUGORE.Uwo mushinga watangiriye mu mashami ya BK yayo harimo Ishami rya BK Kimironko ,Muhanga, ishami rya BK Bugesera n'ashami rya BK rikorera kw'isoko rya Nyarugenge.''

    Umugore wabaga akora ubucuruzi bucirirtse yasabwaga kuzuza ibisabwa hatarimo gutanga ingwate agahabwa inguzanyo ingana na Miliyoni 5,000,000Frw ikindi n'uko bitari ngombwa ko abo bagore baba basanzwe babitsa muri BK ariko nanone byasabaga kuba byibura ufite Konti kugira ngo amafaranga uzahabwa azanyuzwe kuri Konti yawe.

    Ikindi n'uko iyi nguzanyo uwayihabwaga wese yasabwaga kuyishyura mu gihe kitarenze imyaka ibiri akungukira BK 18% yayo yahawe.

    Kugira ngo inguzanyo itangwe,umukozi ushinzwe inguzanyo n'umukozi wa BK ukuriye amwe mu mashami yavuzwe haruguru babanzaga gusura uwasabye inguzanyo kugira ngo harebwe koko niba ari umucuruzi.

    Inguzanyo zose zatanzwe muri icyo gihe zingana na Miliyari 1,8Frw.

    Ubushinjacyaha bwo bwaburanye buvuga ko ayo mafaranga yose yatanzwe mu buryo budasobanutse, bituma abari abayobozi muri BK ishami rya Kimironko n'uwari uhagarariye umushinga wa ZAMUKA-MUGORE batangira gukurikiranwa muri Nzeri 2019.

    Abafunzwe babwiye urukiko ko bafashwe mu buryo bunyuranije n'amategeko ko n'izo nzira zidasobanutse.Ubushinjacyaha byavuzwe ko bwabeshye urukiko kuko butatanze ibimenyetso bifatika cyangwa ngo bube bwarafatiye mu cyuho uwo bucyekaho icyaha cya ruswa.

    Mbere y'urubanza, Umunyamakuru afotora abafungwa kuko Urwego rwigihugu rushinzwe imfungwa n'abagororwa RCS rutababwiye ko bari bufotorerwe mu rukiko'.

    N'impaka zamaze iminota 20 mbere y'uko iburanisha ritangira abacungagereza banze ko ababuranyi bafotorwa.

    Umucamanza yabifasheho icyemezo avuga ko Umunyamakuru yatse Urukiko uburenganzira bwo gufotora ababuranyi ko kandi urukiko rw'abimwemereye''.

    Umucamanza yavuze ko mu ingingo ya 71 ijyanye no kubona amakuru mu nkiko, iteganya ko Umunyamakuru ushaka gufata amafoto n'amashusho yandikira Perezida w'urukiko mu gihe kitarenze amasaha 48 ko aribyo byakozwe n'umunyamakuru nawe ahabwa uburenganzira bwo gukora akazi ke n'urukiko rugakora akazi karwo.

    Umucamanza yabajije ababuranyi niba hari uwo bibangamiye Ndabaramiye Jimmy avuga ko niba gufata amafoto biri mu nyungu rusange ko nta kibazo bafite ko ku bwabo banifuza ko ibyabo bijya hanze bikamenyekana bakazabona ubutabera mu mucyo nta karengane kabayemo ako ariko kose.

    Ubundi itegeko ntabwo ryemera ko hari umuntu uwo ariwe wese winjirana imbuda mu rukiko yaba n'abacungagereza bategetswe kurindira abafungwa inyuma y'icyumba cy'urukiko.

    Itegeko ryo kubona amakuru kandi riteganya ko Umunyamakuru asaba uburenganzira urukiko aho kubusaba Urwego rw'amagereza mu Rwanda RCS.

    Si ubwa mbere Abacungagereza bitambika itangazamakuru mu gufotora abafungwa urukiko rwatanze uburengazira bwo kubafotora.



    AMAFOTO: JEAN PAUL NKUNDINEZA

    Source : https://umuryango.rw/amakuru/mu-rwanda/ubutabera/article/abakozi-ba-bk-bashinjwa-kuyihombya-n-abo-bahaye-inguzanyo-baburanye-ubujurire

  • Umugore wa nyakwigendera DJ Miller yashyize hanze ifoto y'umwana babyaranye abafana bagaragaza imbamutima zabo (amafoto) – YEGOB #rwanda #RwOT

    Mu ifoto yashyizwe hanze na Hope Igihozo, umufasha wa nyakwigendera Deejay Miler, Karuranga Virgile  igaragaza umwana babyaranye mbere y'uko nyakwigendera Virgil yitaba Imana yazamuye imbamutima z'abakunzi b'uyu muryango.

     

    Ku rukuta rwe rwa Instagram, Hope Igihozo yabajije abamukurikira uwo babona muri iyo foto, abafana bandika ubutumwa bwinshi butandukanye burimo amarangamutima menshi :

    Source : https://yegob.rw/umugore-wa-nyakwigendera-dj-miller-yashyize-hanze-ifoto-yumwana-babyaranye-abafana-bagaragaza-imbamutima-zabo-amafoto/

  • Ukuri ni ukuhe ku kuba Aba- Islamu batarya ingurube? #rwanda #RwOT

    Imwe mu mirongo ya Qoran igaragaza ko ingurube iziririjwe igaragara mu gice cya mbere umurongo 173( surat ya 1:173) aho Imana igira iti: 'Mu by'ukuri ibyo yabaziririje ni icyapfuye, amaraso, inyama y'ingurube n'icyo bavugiyeho izina ritari iry'Imana'

    Mu gice ya 6 umurongo w'145 (Surat ya 6:125) aho Imana igira iti: 'Vuga uti: ntacyo mbona mu byo nahishuriwe kucyo umuntu arya uretse kuba ari icyipfushije cyangwa amaraso cyangwa inyama y'ingurube, mu by'ukuri yo ni umwanda…'

    Kuziririza inyama y'ingurube nk'ikiribwa bifite amateka maremare agera mu myaka ibihumbi n'ibihumbi ishize, inyama y'ingurube yari kimwe mu biribwa byari biziririjwe mu idini y'abayahudi ku gihe cy'amategeko ya Musa/ Mose.

    Mu ivanjili ya Yezu Kristo ingurube yagereranijwe n'abanyabyaha kandi mu nkuru zitandukanye, ingurube yagiye ivugwa nk'ikintu satani yigaragarizamo.

    Uretse ibi bifite aho bihuriye n'amadini yemera Imana, hari n'abandi benshi badashingira ku myemerere banga kurya inyama y'ingurube ahubwo bagashingira ku ngaruka mbi iyi nyama igira ku mubiri wa muntu.

    Mu bihugu bya kiyislamu, bitewe n'uko islamu iziririza ingurube, inyama yayo ntikoreshwa bityo n'ibijyanye n'ingaruka yagira ku buzima ntibivugweho cyane ariko mu bihugu bimwe na bimwe bitari ibya kiislamu nk'u Burayi na Amerika n'ahandi, abantu ntibabujijwe kurya inyama y'iyo nyamanswa, hamwe n'ibyo ariko abantu bamwe birinda kurya iyo nyama ndetse muri bimwe mu bihugu nko mu duce tumwe na tumwe mu Burusiya batanze itegeko ryo kudakoresha inyama y'ingurube bitewe n'uburwayi bukomoka ku gukoresha iyo nyama [Trichinella spiralis] bwagaragaye cyane muri utwo duce.

    Amategeko arebana n'ingurube muri Islamu

    1. Kurya ingurube biraziririjwe kandi ni icyaha,
    2. Kunywa amata y'ingurube ni ikizira,
    3. Ingurube iba imusozi[itaba mu mazi] ni inyamanswa yanduye kandi idateze gusukurwa
    4. Iyo ingurube iririye mu gikoresho cyangwa ikakirigataho, icyo gikoresho kirandura kugisukura bisaba kucyogesha amazi inshuro ndwi.
    5. Kugura no kugurisha ingurube ntibyemewe [kuko ubwayo ni umwanda].

    Impamvu yo kutaribwa kw'inyama y'ingurube no kuba ingurube ari umwanda bishobora gusobanurwa mu buryo bubiri:

    1.Ingaruka mbi ku bijyanye na roho n'ubuzima bwo mutwe nk'uko bivugwa na bamwe mu basobanuzi ba Quran, ingurube ni inyamanswa yanduye ndetse yewe no kuri babandi bakunda inyama yayo usanga bagira ibimenyetso byo kubura ishyaka n'umwete mu byo bakora.

    Ndetse byanemejwe n'abahanga ko uretse ingaruka ku bijyanye na roho, ingaruka zayo zigaragara no kubijyanye n'imibonano mpuzabitsina. Umwe mu banditsi yaranditse ati 'ingurube ni inyamanswa itagira umwete, iyo yimya ishimishwa n'uko izindi ngurube z'ingabo ziyibona iri muri icyo gikorwa kandi uwariye inyama zayo bimuviramo kugira imyitwarire nk'iyo.

    Ikindi kandi kugira ishyaka n'umwete ni ikintu cy'ingenzi cyane muri islamu kandi ishyaka n'umwete mu kugana ku mukiro w'iteka ugana Imana wahoze ari umugenzo w'intumwa, abahanuzi n'abakunzi b'Imana.'

    1. Ingaruka mbi ku buzima zikomoka ku gukoresha inyama z'ingurube, na zo zikaba zigabaninemo ibice bibiri:

    — Mu mara y'ingurube habamo inzoka yitwa Coli Balantidium, umuntu wayirwaye arangwa no kwituma amaraso.

    Jaundice cyangwa se Vail desease ni infection ishobora guterwa n'amazi yandujwe n'inkari z'ingurube, imbwa n'imbeba ariko hari ubwoko bwayo bwa 'Romana' buterwa n'ingurube gusa.

    Ingurube ni inzira yo kwanduza umuntu Entamoeba histolytica, ikaba ari inzoka yo mu bwoko bwa amibe. Erysipeloid ni ubwandu bw'uruhu rw'umuntu butuma uruhu rutukura rukokera kandi rukababuka bigatera ububabare bukabije, imwe mu nyamanswa zikwirakwiza udukoko dutera ubu bwandu ni ingurube.

    Urugero rw'ibinure na acide urique bigaragara mu nyama y'ingurube biri hejuru cyane ku buryo byorohereza uburwayi butandukanye kwibasira umubiri, muri bwo twavuga nko kubuza amaraso gutembera neza mu mubiri, kubabara mu mahuriro y'ingingo ndetse n'ubundi burozi ku mubiri.

    Ingurube ntitinya kurya ibintu byanduye yewe kugeza no ku mwanda wayo, ibyo bituma mu nda yayo haba indiri y'udukoko twinshi twanduza uburwayi butandukanye kandi tugakwirakwira mu maraso n'inyama byayo.

    Birashoboka ko ari yo mpamvu amategeko ya islamu avuga ko igikoresho ingurube yaririyemo cyangwa yarigaseho kigomba kozwa n'amazi meza inshuro zirindwi kugirango bizere ko nta mwanda ukomoka ku ngurube ukirangwa kuri icyo gikoresho. Bityo kuba bakoresha amazi inshuro ebyiri cyangwa imwe bikaba bidahagije gukuraho uwo mwanda.

    — Uburwayi buterwa gusa no kurya inyama y'ingurube ubwabyo Taenia Solium ni inzoka ipima hagati ya cm2 na cm3, amagi yayo aboneka mu mikaya no mu bwonko bw'ingurube, umuntu yandura iyo nzoka binyuze mu kurya inyama y'ingurube, abarwayi b'iyi nzoka bakunze kugaragara cyane mu bihugu bikoresha inyama y'ingurube.

    Ladrerie 'maladie du porc' ni indi ndwara iterwa no gukoresha inyama y'ingurube zakuriyemo amagi ya Taenia solium, iboneka cyane mu bantu bakunze kurya inyama y'ingurube ariko ntushoborakuyibona mu duce dutuwe n'abayahudi cyangwa abaislamu baziririza kurya iyo nyama.

    Trichinella Spiralis ni ubundi bwoko bw'inzoka yo munda ipima uburebure buri hagati ya mm3 na mm5 ikaba yandura umuntu arya inyama y'ingurube idatetse cyangwa idahiye neza.

    Iyo imaze kwinjira mu mubiri w'umuntu itangira gutera amagi mu mikaya umuntu agacika intege, akababara kandi akananirwa guhumeka, kuvuga no gukanjakanja ibyo kurya, kandi kugeza ubu ubuvuzi bw'iki kibazo ntiburaboneka.

    Inyama y'ingurube iremerera igogora bikananiza igifu ku buryo bukomeye, bitewe n'inyama y'ingurube kandi rimwe na rimwe bituma mu mubiri hakorwa uburozi bushobora kwica, ibi bikaba bizwi nka 'Botulisme.'

    Musinga C.

     

    The post Ukuri ni ukuhe ku kuba Aba- Islamu batarya ingurube? appeared first on IRIBA NEWS.

    Source : https://iribanews.rw/2022/02/05/ukuri-ni-ukuhe-ku-kuba-aba-islamu-batarya-ingurube/

  • Salma Mukansanga yatangaje umukinnyi wa hano mu Rwanda wigeze kumwita 'Cherie' mu kibuga/Umva uko byagenze – YEGOB #rwanda #RwOT

    Umunyarwandakazi Mukansanga Salima Rhadia wabaye umusifuzi w'igitsina gore wayoboye umukino mu irushanwa rya CAN rimaze imyaka 64 rikinirwa ku mugabane w'Afurika yahishuye ko hari igihe iyo yasifuye imikino y'abagabo, abakinnyi bamwe bakunda kumukubaganira bitewe nuko ari umukobwa.

    Ubwo yari mu kiganiro na Radio B&B FM Umwezi, uyu mukobwa yabajijwe niba ibivugwa yuko umukinnyi Sefu yaba yarigeze kumubwira ati 'Cherie ko urimo kudusifurira nabi' byaba ari ukuri.

    Reba amashusho wumve uko yashubije.

     

    Source : https://yegob.rw/salma-mukansanga-yatangaje-umukinnyi-wa-hano-mu-rwanda-wigeze-kumwita-cherie-mu-kibuga-umva-uko-byagenze/

  • Nyagatare : Pasiteri arashinjwa kwica ubukwe bwaburaga amasaha make #rwanda #RwOT

    Ubukwe bw’abo bageni bwari buteganyijwe kuri uyu wa Gatandatu tariki ya 05 Gashyantare 2022, nyuma yo kwemeranya kubana nk’umugore n’umugabo tariki ya 13 Mutarama 2022, babihamya imbere y’amategeko.

    Umusore avuga ko ejo ku wa Gatanu tariki ya 04 Gashyantare 2022 aribwo Pasiteri yamubwiye ko atiteguye kubasezeranya.

    Ati “Ejo nibwo bampamagaye bambwira ko Pasiteri atadusezeranya, ngo umukobwa ni umukirisitu cyane, niba hari inenge yambonyeho ko ari na we twagendanaga buri gihe mu gusaba, kuki atabuhagaritse mbere hose.”

    Avuga ko yifuza umugore we basezeranye mu mategeko cyangwa bakamusubiza ibye ako kanya.

    Agira ati “Bazindutse badutumaho ngo umukobwa yabuze ariko sibyo ni inama za Pasiteri. Ubu tugiyeyo turamenya uko bigenda, ariko ibyoroshye bampe umugore wanjye kuko ndamukunda kandi niba banze, bansubize ibyo maze gutanga byose batanduhije.”

    Pasiteri akimara kwanga kubasezeranya, bari bahisemo kwishakira undi ku ruhande ariko nabyo iwabo w’umukobwa barabyanga, nyamara mbere bari babyemeranyijeho.

    Umwe mu baherekeje uwo musore gusaba, avuga ko umuryango w’umukobwa wabahemukiye kuko warenze ku masezerano bagiranye.

    Ati “Ibi niba atari ubusambo ni uguta umuco, twarumvikanye, turabakwera, batera intambwe abana barasezerana none ngo umukobwa ntawe ? Ni uguta umuco ahubwo ibi bizagarukira hehe koko !”

    Umuryango w’umuhungu werekeje aho wasabye umugeni (kurongora), n’ubwo wari wamaze kubwirwa ko umukobwa adahari. Kigali Today dukesha iyi nkuru
    ivuga ko igishaka uko yavugana na Pasiteri uvugwaho kuba nyirabayazana w’iki kibazo.

    Source : http://www.ukwezi.rw/1-1/24/article/Nyagatare-Pasiteri-arashinjwa-kwica-ubukwe-bwaburaga-amasaha-make