Blog

Barifuza kubona imbuto nziza ya maracuja n’ibinyomobo

Abo bahinzi bavuga ko ku mababi hazaho udukoko hanyuma akihina, bigatuma hatazaho imbuto ngo zere. Ibi ngo byabashubije inyuma, bituma icyizere cy’ubukire babonaga imbere yabo kiyoyoka.

Nk’uwari umuhinzi wa marakuja, Martin Manimpaye, utuye mu Mudugudu wa Giseke, avuga ko batangira kuzihinga muri 2006 na 2007 bezaga cyane, ku buryo bagurishaga ahantu hatandukanye bakabona n’amafaranga ahagije, ngo yari yaranahagaritse kujya gukora mu cyayi.

Agira ati 'Icyo gihe nezaga ibiro 300 mu cyumweru, ariko ubu narabiretse kubera indwara yadutse, igakunja amababi. Nsigaye ngenda ntera avoka'.

Anasobanura ko maracuja iyo zakunze zera cyane, ku buryo igiti kimwe gisarurwaho ikilo buri cyumweru. Ibi ngo biterwa n’uko ubusanzwe buri kibabi hera urubuto.

Uwitwa Vincent Ndagijimana baturanye, na we ngo wazihingaga cyane, agira ati 'Zampaga amafaranga menshi kuko buri cyumweru nasaruraga. Nigeze no kwandika amafaranga ninjiza, mbona zampaye ibihumbi 200 mu cyumweru, kandi aho nari nahinze hari hatoya. Umuntu ahinze hanini zikanamukundira yagura na ka moto.'

Aba bahinzi bavuga ko abagoronome bababwiye ko iyi ndwara yateye muri marakuja iterwa na virus, kandi ko byakemurwa n’uko babona imbuto nziza bahawe na RAB.

Icyakora Dr Assinapol Ndereyimana, ukuriye gahunda y’ubushakashatsi ku bihingwa by’imbuto n’imboga muri RAB, we avuga ko n’ubwo n’imbuto nziza iba ikenewe, kurwara kwa marakuja ahanini guturuka k’uho zahinzwe no ku buryo zitaweho.

Agira ati 'Bisaba ko niba umuhinzi afite imbuto nzima twamuhaye cyangwa twamurangiye aho twizeye, ayihinga mu murima zidaherukamo, kandi ntazegereze umurima urimo izishaje. Igihe yamaze gutera akabonamo igiti kirwaye, agomba kugikuramo kugira ngo kitanduza ibisigaye, mbese nk’uko umuntu urwaye covid ashyirwa mu kato kugira ngo atanduza abandi.'

Asobanura ko umurima wahinzwemo marakuja zongera guhingwamo hirengejwe byibura igihembwe cy’ihinga, kandi ko birinda kuzegereza umurima urimo izishaje wazanduza, kuko gusaza guturuka ku ndwara ziba zirimo, naho ubundi igiti cya marakuja ngo cyamara n’imyaka itanu.

Yongeraho ko marakuja zinagomba guterwa imiti yo kwica udusimba tuzizamo kuko ari two dukwirakwiza virus, kandi no mu gihe cyo kuzicira icyuma cyifashishwa kigahanagurwa hifashishijwe Jik mbere yo kugikoresha ku kindi giti.

Ati 'Ikindi gituma umusaruro ubura burundu, ni uko usanga ibihingwa bititaweho: batabiha ifumbire ikwiye n’amazi akwiye, zafatwa gato zigahita ziremba.'

Naho ku bijyanye n’ibinyomoro, Dr Ndereyimana avuga ko birwara kubera kubihingana n’ibihingwa byo mu bwoko bumwe na byo, bita ibisantobo, urugero nk’ibirayi, inyanya, intoryi n’urusenda, bituma byanduzanya kuko birwara indwara zimwe.

Mu kubirinda indwara bisaba ko byitabwaho nk’uko yabivuze kuri maracuja, ariko byo ngo bisaba kwirenza ibihembwe bitatu by’ihinga mbere yo kongera kubihinga mu murima byahozemo.

Ikindi abantu bagomba kwitondera ngo ni ikijyanye no kwishakira imbuto, aho usanga umuntu afata nka marakuja cyangwa ibinyomoro yejeje cyangwa yakuye mu isoko, akaba ari byo akuraho imbuto, nyamara hari igihe bishobora kuba birwaye.

Umuti kuri iki kibazo wo ngo ni ukubegera bakabaha imbuto, cyangwa bakabarangira aho bayigira hizewe.

Hyundai na Kia basabye ba nyir’imodoka batuye muri Leta Zunze Ubumwe za America gukura imodoka zabo muri parikingi nini kubera iyo nenge ishobora guteza ibyago kuri benshi. Aya masosiyete yaburiye abatunze imodoka ziyinga 500.000, nyuma y’iki kibazo cyagaragaye muri ‘system’ z’imodoka. Byavuzwe ko ibinyabiziga bifite iyi nenge bishobora gufata umuriro mu gice cya moteri mu gihe icyo ari cyo cyose.

Hyundai yabwiraga abatunze imodoka za; Santa Fe SUVs 2016-18, Santa FE Sport 2017-18, Santa Fe XL 2019 na Tucson SUVs 2014-15, mu gihe Kia yo yaburiye abatunze imodoka za; Sedan 2016-18 K900 na Sportage SUV’s 2014-16. Muri rusange, Kia yaburiye imodoka 126.747 mu gihe Hyundai yabwiraga abatunze imodoka zigera kuri 357.830.

Abatuye muri Leta Zunze Ubumwe za Amerika basabwe kujyana imodoka zabo ku bacuruzi, kugira ngo bagenzure niba imodoka zabo zifite ubwirinzi buhagije ku buryo zitafatwa n’umuriro ku buryo bworoshye. Uruganda rwa Hyundai rufite inyungu n’imigabane muri Kia, aho ibigo byombi binasangiye ubwubatsi mu buryo butandukanye.

Source: CNN

Ni ngombwa ko ibigori biba byumye neza kugira ngo bisarurwe

Uku kwezi kwa Gashyantare henshi mu Karere ka Nyagatare na Gatsibo abahinzi b’ibigori batangiye gusarura.

Kagwa Evalde avuga ko kugira ngo umuhinzi amenye ko ibigori bye byumye, bikwiye gusarurwa, ari uko biba bimaze kugira ibara rya kaki kandi bicuramye.

Avuga ko umuhinzi akwiye gusarura ari uko yiteguye amahema yo kwanikaho, ndetse n’imifuka yo guhunikamo.

Ati 'Amaze kubona ko ibigori byacuramye ashaka amashitingi yo kwanikaho ku buryo ibigori bidahura n’igitaka cyangwa bikajyamo amazi bikazana uruhumbu, kuko ari uburozi none akaba yiteguye imifuka ku buryo iyo bimaze kuma neza, abivungura agahunika agategereza isoko.'

Ariko nanone ngo hari ubundi buryo umuhinzi yafata neza umusaruro w’ibigori, yikoreye ubwanikiro byoroheje.

Agira ati 'Icyo dukangurira abahinzi nanone ni ukwikorera ubwanikiro bworoheje bashinga ibiti bagasharikaho ibigori bikumiraho, bakabona guhunika byagejeje ubwume bwemewe.'

Avuga ko ibigori bisaruwe bitumye kenshi bikunze kugira ikibazo cy’uruhumbu kandi rukaba ari uburozi.

Yashishikarije abahinzi kujya bategereza isoko ryemewe ku baguzi b’imyaka bemewe, aho kugurisha umusaruro wabo abamamyi babahenda.

Yongeraho ko mu rwego rwo gufata neza umusaruro, mu Karere ka Nyagatare hamaze kubakwa ubwanikiro bw’ibigori 160, ndetse hakaba hateganywa no kubakwa ubundi.

I Ryabega mu Karere ka Nyagatare na Kiramuruzi mu Karere ka Gatsibo, ubu hari imashini zumisha umusaruro w’ibigori kandi zikaba zinimuka, zikaba zakorera ahandi hari umusaruro mwinshi.

Kagwa arasaba ba rwiyemezamirimo gushora imari mu kugura imashini zumisha umusaruro, kuko batahomba, cyane ko abazikenera ari benshi n’ubwo hari izaguzwe na Leta.

N’ubwo nta mibare irakorwa kuko isarura aribwo rigitangira, RAB Sitasiyo ya Nyagatare ivuga ko umusaruro w’ibigori w’iki gihembwe cy’ihinga 2022 A, uzaba mucye ugereranyije n’uwajyaga uboneka mu myaka yabanje, kubera ikibazo cy’izuba ryinshi muri imwe mu mirenge y’uturere twa Nyagatare na Gatsibo.

Gusa nanone ngo nta nzara cyangwa amapfa bizagaragara kuko abahinzi batarumbije burundu.

Umutoza wa Rayon Sports, Jorge Paixão yavuze ko impamvu Kwizera Olivier ataragaraye mu mikino ibiri ya gicuti bakinnye byatewe n’imvune, yongera gushimangira ko mu ikipe hazajya hakina uwakoze imyitozo.

Jorge Paixão yageze muri Rayon Sports mu ntangiriro z’icyumweu gishize akaba amaze gukina imikino 2 ya gicuti, uwo banganyijemo na Police FC ndetse n’uwo baraye batsinzemo Nyanza FC 2-0.

Ni imikino 2 yose itaragaragayemo umunyezamu Kwizera Olivier, Paixão akaba yabwiye itangazamakuru ko impamvu ari uko uyu munyezamu ari bwo agitangira imyitozo nyuma y’iminsi afite ikibazo cy’imvune, ngo yagombaga gukoresha abakora imyitozo kandi niko bizahora.

Ati 'Olivier [Kwizera] yatangiye imyitozo ejo kubera imvune, nari mfite abanyezamu bakora buri munsi, mu ikipe yanjye hazajya hakina uwakoze imyitozo muri icyo cyumweru, niba hari umukinnyi ufite ikibazo, niba atakoze imyitozo ntazakina, ikindi mu ikipe yanjye abakinnyi bose barangana nta musitari urimo, umusitari muri Rayon Sports ari hano (yerekana ikirango cy’ikipe), sinjye ntabwo ari n’umukinnyi.'

Kwizera Olivier watangiye imyitozo ku munsi w’ejo hashize akaba yari yagiriye ikibazo cy’imvune mu myitozo ya mbere y’umutoza Jorge Paixão yakoresheje tariki ya 2 Gaashyantare 2022.

Kwizera Olivier amaze iminsi afite ikibazo cy’imvune

Umutoza wa Rayon Sports ahamya ko uzajya akora imyitozo ari we uzajya ukina

Intambwe yagiye iterwa ni ndende kuko ubu umubare w’ingo zifite amashanyarazi wikubye hafi inshuro 6 mu myaka 10 gusa. Imibare yerekana ko umwaka wa 2021 warangiye ingo zifite amashanyarazi mu Rwanda zisaga 68.2% kandi uyu mubare ukomeje kugenda wiyongera.

Ron Weiss, Umuyobozi Mukuru wa REG, avuga ko iyi gahunda igamije guteza imbere ubukungu bw’Igihugu, ku buryo nta muntu uzakenera gushinga uruganda cyangwa kwihangira imirimo ngo abangamirwe no kutagira amashanyarazi.

Ati: 'Mu kuvugurura iyi gahunda twibanze cyane ahantu hari ibikorwa by’ubukungu nk’inganda, amasoko n’udukiriro ndetse n’ibigo bitanga serivisi z’ibanze nk’ibitaro, amashuri, ibiro by’ubuyobozi n’ibindi. Ibi byose ni inshingano zacu kubigezaho amashanyarazi kandi hakorwa ibishoboka byose ngo imiyoboro ihagezwe'.

Ron Weiss, Umuyobozi Mukuru wa REG

Ron Weiss avuga ko ibindi byagendeweho ngo hongerwe umubare w’ingo zizagezwaho amashanyarazi afatiye ku muyoboro rusange harimo no kuba isanzwe itari kure cyane y’imiyoboro yubatswe cyangwa irimo kubakwa, kuba ituwe cyane, ndetse no kuba abaturage bayituye badatatanye cyane ahubwo batuye begeranye.

Ati : 'Buriya gutura abantu batatanye cyane bihombya Igihugu kuko gishora byinshi kibagezaho ibikorwa remezo. Nkatwe usanga ipoto imwe yagombaga guha amashanyarazi nk’ingo 5 iyahaye urugo rumwe gusa, urumva ko buri rugo ruzakenera ipoto yarwo bikongera ikiguzi cyo kuyakwirakwiza.'

Amashanyarazi akomoka ku mirasire y’izuba na yo ni ingenzi mu gufasha ahataragera afatiye ku muyoboro rusange

Weiss avuga ko abatuye ahatazagezwa imiyoboro na bo bashonje bahishiwe kuko bashyiriweho uburyo buborohereza kubona amashanyarazi adafatiye ku muyoboro rusange.

Ati: 'Hari umushinga ufasha abifuza kugura ibikoresho bitanga amashanyarazi akomoka ku mirasire y’izuba ukabunganira ku giciro hagendewe ku bushobozi bwabo. Abo mu cyiciro cya mbere cy’ubudehe bahabwa nkunganire igera kuri 90% bakiyishyurira gusa 10%, abo mu cyiciro cya kabiri bahabwa nkunganire ya 70% by’ikiguzi bakiyishyurira gusa 30%, naho abo mu cyiciro cya gatatu, bunganirwa 45% bakiyishyurira 55% by’ikiguzi'.

Yavuze ko REG yagiranye amasezerano y’imikoranire n’ibigo bitandukanye mu Rwanda bicuruza ibikoresho bitanga aya mashanyarazi akomoka ku mirasire y’izuba, bikaba ari na byo bizajya bigurisha ibi bikoresho ku bifuza guhabwa aya mashanyarazi.

Ibi babigarutseho tariki 08 Gashyantare 2022 mu muhango wo gutaha ku mugaragaro umuyoboro w’amazi meza begerejwe. Uwo muyoboro ugizwe n’ivomo rusange ryegerejwe abaturage bakaba barivomaho bishyuye ijerekani amafaranga 20 y’u Rwanda. Hari kandi n’igice cy’uwo muyoboro ujyana amazi ku kigo cy’amashuri abanza cya Kagomasi.

Umunyamabanga Nshingwabikorwa w’Umurenge wa Gashora, Rurangirwa Fred, yashimiye ubuyobozi bw’Akarere kubera ubuvugizi babakoreye kugira ngo babashe kubona ayo mazi akazafasha abaturage basaga 1,100 batuye mu midugudu ibiri begerejwe iryo vomo rusange.

Uwitwa Edouard Murwanashyaka ni we uzayacunga, akaba ari na we watanze ubutaka bwubatswemo iryo vomo ku buntu ariko na we akazajya afata amafaranga 12 kuri 20 azajya yishyurwa kuri buri jerekani, ndetse akazajya yita ku isuku y’iryo vomo rusange.

Ubwinshi bw’abaturage bahise bazana amajerikani menshi kuvoma kuri ayo mazi ndetse bagatangira kuyavoma bishyuye, bugaragaza uko amazi meza yari akenewe muri ako gace.

Abaturage bishimiye kwegerezwa ayo mazi kuko ijerekani y’amazi ngo bari basanzwe bayigura hagati y’amafaranga ijana na magana abiri ndetse bagakora urugendo rw’isaha kugira ngo babashe kuyageza mu rugo.

Bavuga kandi ko isuku yabagoraga, bakanarwara bitewe no gukoresha amazi yanduye, abanyeshuri bagakererwa kujya ku ishuri kubera ko byabatwaraga umwanya munini mu gitondo babanza kujya gushaka amazi.

Umuryango 'Istiqama Rwanda’ ni wo watanze inkunga ya miliyoni icumi z’amafaranga y’u Rwanda yubatswemo ibyo bikorwa byo kwegereza amazi meza abaturage. Said Bin Ahmed ALHATTALI uyobora uwo muryango yavuze ko intego z’umushinga wabo ari ukongera uburyo burambye bwo gutanga amazi hagamijwe guteza imbere umuco w’isuku n’isukura mu cyaro.

Said Bin Ahmed ALHATTALI uyobora umuryango Istiqama Rwanda watanze aya mazi yavuze ko bishimiye kugera kuri iki gikorwa

Yagize ati 'Amazi meza asobanura ubuzima bwiza. Biranshimishije cyane kubona uyu mushinga Allah (Imana) adushoboje kuwugeraho, mu rwego rwo kugeza amazi meza ku muryango nyarwanda. Turizera ko ibi bikorwa remezo bizakoreshwa neza kandi ku buryo burambye, bikazagira uruhare mu guteza imbere imibereho myiza y’abaturage ndetse n’Igihugu muri rusange.'

Ubuyobozi bw’Umurenge wa Gashora buvuga ko muri uwo murenge haboneka amavomo 24 hakaba n’andi atanu Umurenge uteganya kubaka vuba hamwe n’abafatanyabikorwa, yose hamwe akazaba ari amavomo 29.

Umuyobozi w’Akarere ka Bugesera, Richard Mutabazi, yashimiye umushinga 'Istiqama Rwanda’ wabafashije kugeza amazi ku baturage.

Umuyobozi w’Akarere ka Bugesera, Richard Mutabazi, yashimiye ababateye inkunga, asaba abaturage gufata neza ibikorwa remezo bagezwaho

Ati 'Twubatse inganda z’amazi za Kanyonyomba na Kanzenze dufatanyije na WASAC, ariko dusigarana ikibazo cyo kuyageza ku baturage. Twigiriye inama yo gushaka abafatanyabikorwa, tujya gushaka uyu mushinga tubiganiraho, barabyemera, batangirira hano. Nagira ngo rero tubashimire kuko ni wo mushinga wa mbere dukoranye muri ubwo buryo, kandi murabona ko wagenze neza.'

Umushinga wa Istiqama ukomoka muri Oman ariko ukaba ukorera no mu bindi bihugu, aho wibanda ku bikorwa byo gufasha abaturage mu iterambere. Mu Karere, bakorera mu Rwanda, mu Burundi no muri Repubulika Iharanira Demokarasi ya Congo.

Ibikorwa nk’ibi byo kwegereza amazi meza babikoze no mu Murenge wa Kigali mu Kagari ka Mwendo mu Karere ka Nyarugenge mu Mujyi wa Kigali. Barateganya no kubigeza ku bandi mu rwego rwo kuborohereza urugendo rurerure bakora bajya gushaka amazi.

Umuyobozi w’Akarere ka Bugesera avuga ko ubu muri ako Karere abagerwaho n’amazi meza hafi yabo ari 62%, intego ikaba ari uko abaturage bose azaba yabagezeho muri 2024, nk’uko biri muri gahunda Igihugu cyihaye yo kugeza amazi meza ku baturage bose bitarenze umwaka wa 2024.

Mu gihe ariko abo baturage bo mu Bugesera bishimira ko ikibazo cy’amazi kigenda gikemuka, basaba ko bafashwa no kubona amashanyarazi kuko muri ako gace bigaragara ko atarahagera. Ubuyobozi bubizeza ko ikibazo cy’amashanyarazi na cyo kizwi kandi ko kizagenda gikemurwa na yo akazabageraho, dore ko na byo biri mu ntego Igihugu cyihaye yo kugeza amashanyarazi ku baturage bose bitarenze umwaka wa 2024.

Bacinye akadiho bishimira ko begerejwe amazi

Imirimo yo kubaka Urwibutso rwa Musanze irimo kugana ku musozo kuko igeze kuri 95% ishyirwa mu bikorwa

Uru rwibutso rwa Musanze, ruri kubakwa ahahoze ari Cour d’Appel Ruhengeri (Urukiko rw’Ubujurire rwa Ruhengeri), rwiciwemo Abatutsi basaga 800, bari bahahungiye mu gihe cya Jenoside, bizezwa kuhabonera umutekano.

Hamza Iddi, umwe mu bafite ababo bazize Jenoside, yagize ati 'Hari hashize igihe kirekire dusaba ko hubakwa Urwibutso, ruhesha ishema n’agaciro abacu bazize Jenoside yakorewe Abatutsi. Uyu munsi turishimira ko imirimo yo kurwubaka irimo gukorwa, ndetse ikaba irimo kugana ku musozo, ku buryo twizeye neza ko mu gihe cya vuba, imibiri y’abacu izaba iruhukiye ahantu heza'.

Urwibutso rwa Musanze nirwuzura, ruzashyingurwamo imibiri y’abatutsi biciwe muri Cour d’Appel Ruhengeri tariki 15 Mata 1994, bishwe n’Interahamwe zakoresheje amasasu, grenade n’intwaro gakondo, ku itegeko ryari ryatanzwe n’uwari Sous-Prefet Nzanana. Imirambo y’abahiciwe yarakuwemo ijugunywa mu cyobo, cyari cyaracukuwe muri metero nke uhavuye, ari naho haje guhinduka Urwibutso rwa Muhoza.

Imirimo isigaye ni iyo kuhakora amasuku

Nyirasafari Sawiya, agira ati 'Aho imibiri y’abacu yari iri, natwe ubwacu ntitwaryamaga ngo dusinzire, kuko ubwo bari bamaze kujugunywa muri icyo cyobo, babatwikiriyeho itaka, hamwe na hamwe bakarenzaho sima. Gusa wabonaga ko ntacyo bitanga ku mutekano w’imibiri y’abacu, kuko hari n’ibyaridukaga, bikaba ngombwa ko dukuramo imibiri, tukajya kuyitunganya, tukayishyira ku Murenge wa Muhoza, kuko nta hantu twari dufite ho tuyishyingura'.

Akomeza agira ati 'Kuba uru rwibutso rwa Musanze rushya rugiye kuzura, turiruhutsa intimba n’agahinda twari tumaranye imyaka ikabakaba 28, k’abacu badashyinguye mu cyubahiro; kuko bari bafi kuzashyingurwa ahantu hatekanye, kandi haboneye'.

Abarokotse Jenoside yakorewe Abatutsi bo mu Karere ka Musanze, bashimira Leta yumvise ubusabe bwabo bw’uko icyahoze ari Cour d’Appel Ruhengeri, hatunganywa hagahinduka Urwibutso; dore mbere hatarafatwa iki cyemezo, n’ubundi hakoreshwaga mu kuhaburanishiriza imanza, bigasengura imitima y’abafite ababo baburiye ubuzima muri iyo nzu bari bahungiyemo bizeye kuyiboneramo ubutabera.

Imirimo yo kubaka uru rwibutso rushya iri kugana ku musozo, kuko rugeze ku kigero kiri hejuru ya 95%. Umuyobozi w’Akarere ka Musanze Ramuli Janvier, ahamya ko ruzaba ruri ku rwego rw’izindi nzibutso zo hirya no hino mu gihugu.

Yagize ati 'Ni Urwibutso ruri ku rwego rumwe n’izindi nzibutso ziri hirya no hino mu gihugu, kuko ibice birugize haba imva izashyingurwamo imibiri, ahazashyirwa ibimenyetso bifasha abarugana gusobanukirwa amateka ya Jenoside yakorewe abatutsi mu 1994, ahagenewe kwakirira abagize ihungabana n’ibindi bice bitandukanye, byose byarateganyijwe, kandi igisigaye ngo urwibutso rurangire kubakwa, urebye ni uturimo twa nyuma tw’amasuku turimo gukorwa, ku buryo muri Mata 2022, uru rwibutso ruzaba rwatangiye gukoreshwa'.

Igishushanyo mbonera kigaragaza imiterere y’inyubako n’ibice bizaba bigize uru rwibutso

Uyu muyobozi, aboneraho gushima ubutwari abarokotse Jenoside bakomeje kugaragaza, muri iyi myaka ikabakaba 28 yari ishize, ababo biciwe mu cyahoze ari Cour d’Appel Ruhengeri, shyinguwe mu buryo butabahesheje icyubahiro.

Avuga ko ubwo habonetse Urwibutso rushya, uretse kuba ruzashyingurwamo imibiri mu buryo buyihesha icyubahiro, abaturage bakwiye no kuzajya barusura kenshi, kugira ngo barusheho gusobanurirwa amateka ya mbere, mu gihe cya Jenoside yakorewe Abatutsi na nyuma yaho, kugira ngo bibafashe kumenya ingaruka zayo no guharanira gukumira ingengabitekerezo ya Jenoside.

Ruzuzura rutwaye Miliyoni zikabakaba 600 z’Amafaranga y’u Rwanda, rukaba ruri kubakwa na Reserve Force, aho imirimo yatangiye muri Gicurasi umwaka ushize.