Blog

Umutoza w’ikipe ya APR FC yavuze ko atazongera kuvugana n’itangazamakuru muri uyu mwaka w’imikino kubera ko yasanze ari ryo ryica umupira wo mu Rwanda.

Ibi Adil wari umaze iminsi atavugisha itangazamakuru yabitangaje nyuma y’umukino yaraye asezereyemo Marines FC muri 1/4 cy’igikombe cy’Amahoro 2022, ni nyuma yo kumutsinda 1-0 ariko akayisezerera ku giteranyo cy’ibitego 2-1.

Mu kiganiro n’itangazamakuru, yavuze ko yasanze itangazamakuru ari ryo ryishe umupira w’u Rwanda, ashimangira ko ari cyo kiganiro cya nyuma agiranye n’abanyamakuru muri uyu mwaka w’imikino.

Ati “hari hashize igihe ntavugana n’itangazamakuru, hari hashize igihe kinini, ndatekereza ko ari inshuro ya nyuma mvuganye n’itangazamakuru uyu mwaka w’imikino. Ndasobanura impamvu, nubaha amaradiyo yose, nubaha itangazamakuru ryose ryo mu Rwanda ariko nasanze ikibazo umupira w’amaguru wo mu Rwanda ufite, ni itangazamakuru.”

Uyu mutoza yavuze ko ntawashyize ubushake mu kwiga ngo amenye umupira ahubwo benshi babikora ku nyungu zabo bwite atari ku nyungu z’umupira ndetse bagahimba ibibazo bidahari.

Adil yari amaze iminsi yaririnze kuvugana n’itangazamakuru aho yatungaga agatoki bimwe mu bitangazamakuru kumusebya bityo akaba atavugana n’abandi abo bahari.

Erradi Adil Mohammed yinjiye muri APR FC muri 2019 ayifasha kwegukana shampiyona inshuro 2 zikurikiranya adatsinzwe, amakuru avuga ko ari umwaka we wa nyuma atazakomezanya n’iyi kipe umwaka utaha.

Adil yavuze ko atazongera kuvugana n’itangazamakuru uyu mwaka w’imikino

Saa kumi n’ebyiri z’umugoroba wo ku wa 3 Gicurasi 2022, nibwo umukobwa wa nyakwigendera witwa Nyiransabimana yavuye mu isoko ageze iwabo asanga harakinze, arakomanga abura umukingurira. Yafashe umwana amunyuza mu idirishya arakingura.

Uyu mukobwa yinjiye mu nzu asanga se amanitse mu kiziriko gikoze mu mugwegwe, yapfuye.

Byabereye mu mudugudu wa Nyagakomba, Akagari ka Kanunu, Umurenge wa Nyakabuye mu Karere ka Rusizi.

Umunyamabanga Nshingwabikorwa w’Umurenge wa Nyakabuye Ildephonse Ngamije, yavuze uyu muryango wigeze kuvugwamo amakimbirane ashingiye ku mutungo, umugore ashinja umugabo kudahahira urugo ariko nabyo ngo byasaga n’ibyahoshe kuko hari hashize imyaka 10 bibaye.

Ati 'Bamusanze mu mugozi, niba yimanitsemo cyangwa yamanitswemo, ibyo ni akazi ka RIB, dutegereje ikizava mu iperereza'.

Gitifu Ngamije yasabye kuzibukira kwiyambura ubuzima kabone n’iyo baba bugarijwe n’ibibazo bingana bite. Ati 'Ubutumwa duha abaturage ni ukurushaho gukunda ubuzima no kwikunda, kuko uko byagenda kose niyo yaba ari amakimbirane ntabwo yagakwiye gutuma umuntu yivutsa ubuzima kuko hari icyo atumvikanye na mugenzi we'.

Nyakwigendera yabanaga n’umugore we w’imyaka 74 n’umukobwa we Nyiransabimana n’umwuzukuru.

Ivomo:Igihe

Izi nzu zubatse mu Mudugudu wa Rubomborana, Akagari ka Cyugaro, Umurenge wa Ntarama mu Karere ka Bugesera mu Ntara y'Uburasirazuba. Ni iza Uwamurera Venancie na Célestin Karangwa, bombi barokotse Jenoside yakorewe Abatutsi.

Mu gutaha izi nzu zubatswe ziherekejwe n'ibikoni, ubwiherero n'ibindi nkenerwa nk'intebe zo muri ruganiriro, ibitanda n'imifariso, abazubakiwe bagaragaje amarangamutima kuko babaga mu nzu zimeze nabi.

Uwamurera Venancie wapfushije abana bane muri Jenoside yagaragazaga amarira ku maso.

Yavuze ko yishimiye iki gikorwa, gikomeye kuko yabaga mu nzu itameze neza ariko ubu akaba ari mu nziza kandi atanyagirwa nk'uko byari bimeze mbere.

Ati 'Ni amarira y'ibyishimo. Nishimiye igikorwa nk'iki Imana ikomeze kubampera umugisha. Mugende mubwire Kagame wahagaritse Jenoside nawe muti Imana iguhe umugisha.'

Mugenzi we Karangwa we yashimiye abateguye iki gikorwa. Ati 'Ndabashimiye kubera ibintu mwankoreye. Ikindi nongeraho ndashimira Inkotanyi zankuye mu rufunzo nari narapfuye ndazuka.'

Eugène Nyagahene washinze Télé 10, yateguye iki gikorwa mu magambo ye yavuze ko uretse gusana inzu z'abarokotse hakwiriye no gusana imitima yabo kuko yagizweho ingaruka zikomeye na Jenoside.

Ati 'Nagira ngo nibutse abari hano ko tutaje kwifotoza, turi kwibuka. Turubaka iki ? Ibyasenywe si inzu gusa turahera ku mitima y'abantu. Uyu munsi twabwira mukecuru ko tuje kumufata mu mugongo. Uyu munsi twasannye inzu yawe tugiye kureba ikindi dukora wibesheho ubeho neza kurushaho ubeho kugeza igihe uzasazira. Ibyatubayeho hari aho byaturutse, hari ubujiji, ubukene n'ibindi. Ibyo byose byahuye n'ubutegetsi bubi bibyara Jenoside.'

Nyagahene yabwiye Karangwa ko ubutumwa yageneye Inkotanyi burazigeraho nta kabuza. Yabwiye Umunyamabanga w'Umurenge wa Ntarama ko ubushobozi bwabaye buke kubera ibihe bitoroshye Isi imazemo iminsi bya COVID-19 ariko bateganya ibindi bikorwa byinshi mu murenge ayoboye.

Umunyamabanga w'Umurenge wa Ntarama, Uwamugira Martha yashimye iki gikorwa.

Ati 'Ndabashimira mu izina ry'Umurenge wa Ntarama. Aba babyeyi inzu babagamo ntizari zimeze neza. Mutubwira ko muzaza kwibuka no kuremera abarokotse byadukoze ku mutima. Navuga ngo Imana ibahe umugisha. Hano habaye Jenoside y'indengakamere cyane niyo mpamvu n'abaharokokeye bafite ubuhumya bukomeye. N'ubuyobozi bw'akarere buzi ibi bikorwa ndabizi ko nabo bazishimira ibyo mwakoze.'

Nyuma y'iki gikorwa hakurikiyeho gusura Urwibutso rwa Ntarama ndetse Tele10/DStv Rwanda igeza ku rwibutso inkunga yayo. Nyagahene yavuze ko guharanira ko ibyabaye bitazongera kubaho ukundi bigomba gukorwa n'Abanyarwanda ubwabo kuko abazungu byabananiye.

Imirimo yo kuvugurura izi nzu yakozwe na Tele10/DStv Rwanda

Abazubakiwe bahawe n’ubwiherero

Mbere y’uko izi nzu zisanwa zari zarangiritse cyane

Iyi nzu mbere yari ifite igikoni gishaje cyane

Amafaranga yo gusana izi nzu yatanzwe na Tele10 Group/DSTV Rwanda

Abakozi ba Tele10 group /DStv Rwanda bari baje gutaha izi nzu zavuguruwe

Izi nzu zavuguruwe zifite ibindi byangombwa birimo ubwiherero

Eugène Nyagahene washinze Télé 10 ahumuriza Karangwa bafashije kuvugurura inzu

Abaturanyi ba Uwamurera bari baje kwifatanya nawe bishimira iki gikorwa yakorewe

Basuye imva iruhukiyemo imibiri y’abazize Jenoside i Ntarama

Eugène Nyagahene n’umuryango we bashyira indabo ku mva iruhukiyemo imibiri y’Abatutsi bishwe muri Jenoside

Nyuma yo gusura urwibutso bafashe ifoto y’urwibutso

Uyu mukino wahuje amakipe bakunda kwita abavandimwe kubera umubano w’igihe kirekire usanzwe ubaranga, wabereye kuri Stade ya Kigali Nyamirambo.

Umukino ubanza wabereye mu karere ka Rubavu wari warangiye APR FC itsinze ibitego 2-0.

Iminota 45 y’igice cya mbere yarangiye amakipe yombi anganya 0-0, gusa Marines FC yagerageje kugera imbere y’izamu rya APR FC kenshi ndetse inarema uburyo butandukanye bw’ibitego kurusha APR FC.

APR FC nk’ikipe nkuru yageragezaga guhererekanya neza mu kibuga hagati ariko uburyo bwo gutsinda buba bucye.

Amakipe yombi yakomeje gukinira umupira mu kibuga hagati ariko Marines FC ikagaragaza itandukaniro hagati yayo na APR FC bita mukuru wayo.

Amakipe yombi yagiye kuruhuka anganya 0-0.

Marines FC yatangiye igice cya kabiri n’ubundi isatira izamu rya APR FC ndetse inayirusha kubonana neza mu kibuga hagati ari nako igerageza gushaka uburyo bwo gufungura amazamu.

Ku munota wa 65 ku ishoti rikomeye Mugiraneza Flodouard yafunguye amazamu atsindira Marines FC igitego cya mbere.

Marines FC yakomeje gukina neza igerageza gushaka igitego cya kabiri ariko amahirwe aba macye.

APR FC wabonaga idashaka gukina yitanga nkuko bisanzwe, ntiyabonye amahirwe menshi yo kugera imbere y’izamu rya Marines FC.

Iminota 90 isanzwe y’umukino yarangiye Marines FC iyoboye umukino ku ntsinzi y’igitego 1-0, umusifuzi yongeraho iminota 3.

Iminota 3 yongeweho nta mpinduka yigeze itanga, umukino urangira Marines FC itsinze APR FC igitego 1-0.

Marines FC yakoze amateka yo gutsinda APR FC kuko bidakunze kubaho (ni imbonekarimwe) nubwo bitayihaye amahirwe yo gukomeza muri 1/2.

Nubwo yatsinzwe, APR FC yakatishije iyike y’imikino ya 1/2 itsinze Marines FC ibitego 2-1 mu mikino yombi.

Muri 1/2 APR FC izahura na mucyeba Rayon Sports yasezereye Bugesera FC ku wa Kabiri iyitsinze ibitego 3-0.

APR FC yasezereye Marines FC mu gikombe cy’Amahoro iyitsinze ibitego 2-1 mu mikino yombi

APR FC yasanze Rayon Sports mu mukino w’abakeba no mu Rwanda

Umuvugizi w'Urwego rw'Igihugu rw'Ubugenzacyaha (RIB), Dr Murangira Thierry yabwiye INYARWANDA ko iperereza ry'ibanze ryagaragaje ibyaha bitatu (3) Ishimwe Dieudonné [Prince Kid] akurikiranyweho.

Ibyo byaha ni: Gukoresha imibonano mpuzabitsina ku gahato (rape) gihanishwa igihano cy'igifungo kiri hagati ya 10-15 hakiyongeraho n'Ihazabu y'amafaranga ari hagati ya 1-2M (1,000,000 Frw – 2,000,000 Frw).

2. Gusaba cyangwa gukora ishimishamubiri rishingiye ku gitsina (gihanishwa igihano cy'igifungo kiri hagati ya 5-7), hakiyongeraho n'Ihazabu y'amafaranga ari hagati ya miliyoni 1-2 Frw.

Guhoza undi ku nkeke bifitanye isano n'imibonano mpuzabitsina (gihanishwa igihano cy'igifungo kiri hagati ya 1-2, hakiyongeraho n'Ihazabu y'amafaranga ari hagati ya 100,000 Frw -200,000 Frw).

Akaba akekwa kuba yarabikoze mu bihe bitandukanye, abikorera bamwe mu bagiye bitabira irushanwa rya Miss Rwanda mu bihe bitandukanye.

Urwego rw'Igihugu rw'Ubugenzacyaha, rwasabye 'abantu kugendera kure ibi byaha', kuko ntawe uzihanganirwa igihe cyose azaba yagaragaweho ibi byaha'.

RIB yasabye kandi abantu bashobora kuba barakorewe Ihohoterwa nk’iryo rishingiye ku gitsina bakaba barabicecetse kubera gutinya, ko bakwegera RIB bagatanga ikirego.

Dr Murangira ati 'Ntabwo ibi byaha byashira ababikora badahanwe”.

RIB yihanangirije kandi abakoresha Imbuga nkoranyambaga (Social Media users) baha inkwenene, umuntu wese uba watanze ikirego cy'ihohoterwa yaba yarakorewe, nk’aho atashimiwe igikorwa cyiza nk’icyo cyo kudahishira icyaha cy'ubugome nk’icyo, ahubwo agahabwa 'inkwenene’.

Dr Murangira ati 'Ntabwo ari byo, ibi bintu bikwiriye gucika. Usibye no kuba ari n'imico mibi ni n'icyaha cyo kubangamira iperereza kandi gihanwa n'amategeko.'  

Ishimwe Dieudonne [Prince Kid] yatawe muri yombi ku wa 26 Mata 2022 

Mu buryo busa n’ubugoranye Real Madrid yatunguye Manchester City iyisezera muri ½ cya UEFA Champions League maze igera ku mukino wa nyuma aho izahura na Liverpool.

Umukino ubanza wari wabereye Etihad Stadium, Manchester City yari yatsinze Real Madrid ibitego 4-3, ikaba yasabwaga kunganya gusa mu mukino wo kwishyura kugira ngo igere ku mukino wa nyuma.

Iminota 20 ibanza y’umukino nta mahirwe akomeye yigeze aboneka ku mpande zombi, gusa amakipe yageragezaga gusatirana ariko ntareme amahirwe afatika.

Joao Cancelo wa Manchester City aba yaboneye ikipe ye igitego ku munota wa 21 ariko umupira awuteye unyura hanze gato y’izamu ryari ririnzwe na Courtois.

Manchester City wabonaga iri mu mukino kurusha Real Madrid, Phil Foden ku munota wa 40 yagerageje ishoti ariko Courtois ararifata.

Igice cya kabiri cy’umukino kigitangira, Vinicius Junior yahushije amahirwe akomeye yakabaye yahaye Real Madrid igitego.

Luca Modric yabonye amahirwe yo gufungura amazamu ku ruhande rwa Real Madrid ku munota wa 52 ariko ntibyakunda kuko yabangamiwe n’ubwugarizi. Real Madrid yakoze impinduka za mbere ku munota wa 68, Toni Kross aha umwanya Rodrygo ni mu gihe na Manchester City ku munota wa 72 De Bryune yahaye umwanya Gundogan.

Ku munota wa 74, Bernardo Silva yahaye umupira mwiza Ryad Mahrez na we utakoze ikosa maze yohereza umupira mu rushundura maze imibare ihita ikomerana Real Madrid.

Umutoza wa Real Madrid yahise akora impinduka Casemiro aha umwanya Marco Asensio ni nako Luka Modric yahaye umwanya Eduardo Camavinga.

Izi mpinduka zafashije Real Madrid, ishyira igitutu kuri Manchester yasaga niyarushijwe, gusa yanyuzaamo igasatira nko ku munota wa 87 Jack Grealish winjiye mu kiuga asimbura Gabriel Jesus yahushije uburyo bukomeye.

Real Madrid yaje kubona igitego cya mbere ku munota wa 90 gitsinzwe na Rodygo ku mupira yari ahawe na Karim Benzema.

Rodrygo wari winjiye mu kibuga asimbura Vinicus Junior yaje gutsinda igitego cya kabiri cya Real Madrid ku munota wa mbere w’inyongera, umukino warangiye ari 2-1, biba ibitego 5-5 mu mikino yombi biba ngombwa ko hitabazwa iminota 30 y’inyongera.

Ku munota wa 95, Karim Benzema yaje gutsindira Real Madrid igitego cya 5 kuri penaliti, ni nyuma y’ikosa Ruben Diaz yari amukoreye mu rubuga rw’amahina, umukino warangiye ari 3-1 biba 6-5 mu mikino yombi, Real Madrid igera ku mukino wa nyuma wa Champions League aho izahura na Liverpool yasezereye Villareal.

Ibyisimo bya City ntibyamaze kabiri

Rodrygo wababaje abakunzi ba Manchester City

Byari ibyishimo kuri Real Madrid

Bwana Elon Musk ni umugabo ufite imyaka igera kuri 50, akaba yaravukiye akanakurira muri Africa y’Epfo aza kuhava ubwo yigaga mu mwaka wa 1 wa Kaminuza. Kuri ubu ni we utunze amafaranga menshi ku Isi, akagira n’ibigo byinshi kandi bikomeye mu Isi mu ikoranabuhanga ari byo Tesla, Space X, The Boring Company na Twitter aheruka kugura.

Iyo uvuze Elon Musk, abahanga n’abacuruzi bumva umugabo w’agatangaza kandi ufite ubwenge n'ubukaka mu gucuruza ku rwego ruhanitse. Magingo aya, inkuru igezweho ku Isi ni umushinga uyu mugabo yatangije abantu benshi bavuga ko ari gukina, gusa bikaza kurangira awushyize mu bikorwa.

Umushinga wa Elon Musk wo kugura Twitter ubu urenda kugera ku iherezo ndetse uyu mugabo avuga ko mu gihe uyu mushinga uzaba urangiye azahita atangira guca amafaranga abacuruzi na Leta zizaba zikoresha urubuga rwa Twitter.

Ubwo Elon Musk yavuga ku gikorwa kizakurikiraho ubwo azaba amaze gukorana amasezerano yo kugura Twitter ku kayabo ka Miliyari $44, yavuze ko azahita akurikizaho guca amafaranga abakire n'abanya-politike bakoresha Twitter. Yavuze ko atazigera aca n’urumiya rubanda rugufi ahubwo ko bo bazakomeza gukoresha Twitter ku buntu nk’uko byari bisanzwe.

Mu magambo ye Elon Musk yagize ati: 'Gukoresha Twitter bizakomeza kuba ubuntu nk’uko byari bisanzwe ku bantu basanzwe, gusa bizaba ikiguzi ku bikorwa by'ubucuruzi ndetse n'ibya za Leta'

Elon Musk ni we muntu ukize kurusha abandi bose ku Isi 

Uyu musore w’imyaka 19 y’amavuko afite umubyeyi (Nkusi Flitz Emeran) wakiniye Amavubi mu myaka ya mbere y’ikinyejana cya 21.

Amakuru yo kongera amasezerano kwa Noam Emeran yatangarijwe ku rubuga ‘website’ rwa Manchester United, ubwo havugwaga abakinnyi bato bamaze kongerera amasezerano iyi kipe ikinira kuri Old Trafford.

Mu ntangiriro z’uyu mwaka w’imikino, ikipe ya Ipswich Town ikina muri Shampiyona y’icyiciro cya gatatu mu Bwongereza, yasabye Manchester United kuyitiza uyu mukinnyi, ariko bayima amatwi.

Mu biruhuko bya Shampiyona biheruka muri Mata 2022, Noam yahawe umwanya akorana imyitozo n’abo mu ikipe nkuru ya Manchester United yitwara neza, aho bivugwa ko ashobora kuzazamurwa mu ikipe nkuru muri 2023.

Ikinyamakuru ‘The Hard tackle’ giherutse kwandika ko amakipe ya Augsburg na Werder Bremen yo mu Budage yifuza gutizwa uyu rutahizamu wavukiye mu Bufaransa.

Noam Emeran

Uyu musore wambara Numero 57 yatangiriye ruhago mu ikipe y'abato ya FC Brussels mu Bubiligi aho ababyeyi be bari batuye mu buto bwe, aca muri L'Entente Sannois Saint-Gratie mbere yo kujya muri Amiens mu Bufaransa.

Muri 2019, Noam yari atarakinira ikipe nkuru ya Amiens ariko ntibyabujije Manchester United kumutera imboni igahita imusinyisha imyaka itatu, ari nayo amaze mu Bwongereza.

Uyu musore yakiniye ikipe y’ u Bufaransa mu batarengeje imyaka 16 muri 2017 ariko ntibikuraho ko afite uburenganzira kuko umubyeyi we (nyina) ari umunyarwandakazi byongeyeho ko na se yagize ubwenegihugu bw’ u Rwanda akanakirina Amavubi.