Blog

Ubu butumwa bwatangiwe muri Kaminuza Yigenga ya Kigali, ULK, ubwo uyu muryango wa POWERrHer Rwanda wari wahagiriye uruzinduko.

Uru ruzinduko rwari rugamije kugirana ibiganiro n'abakobwa biga mu Ishami ry'Amashanyarazi nyuma hanatangizwa ku mugaragaro club y'uyu muryango izajya ikorerwamo ibikorwa bitandukanye bigamije guteza imbere umwana w'umukobwa cyane cyane abiga ibijyanye n'ingufu.

POWERHer Rwanda ni umuryango ugamije gushishikariza abagore n'abakobwa kwinjira mu bijyanye n'imyuga n'ubumenyingiro mu birebana n'ingufu n'amashanyarazi.

Zimwe mu ntego zawo harimo kuzamura umubare w'abagore n'abakobwa bakiri mu mashuri yo hasi kugira ngo bazamuke bafite ubumenyi bubinjiza ku isoko ry'umurimo cyane cyane mu rwego rw'ingufu mu kuzamura ubwuzuzanye n'uburinganire.

Ni muri urwo rwego ku wa Kane, ku wa 2 Kamena 2022, abagize uyu muryango basobanuriye aba banyeshuri akamaro kawo bagaragarizwa n'ibyo waje gukemura.

Abanyeshuri bagaragaje ibyishimo, bavuga ko kubona hari abaharanira iterambere ryabo ari iby'agaciro bityo na bo bakwiye kubyaza umusaruro aya mahirwe.

Umunyeshuri mu Mwaka wa Mbere muri ULK, Ingabire Alice, wanatorewe guhagararira Club nshya ya POWERHer Rwanda yavuze ko ibi ari izindi mbaraga zituma umwana w'umukobwa yigirira icyizere.

Yavuze ko hakiri abakobwa batiyizera hakaba n'ibyo bahezwamo ariko hamwe n'uyu muryango hari icyizere cyo kubihindura.

Yashimangiye ko aya mahirwe beretswe bagomba kuyabyaza umusaruro, bakihesha ishema kuko hari uwababonyemo ubushobozi.

Umuyobozi Mukuru wungirije w'Umuryango POWERHer Rwanda, Mutoni Apophia, yasabye abandi bakobwa bari hanze bafite ubushobozi ariko bakiburira icyizere kwitinyuka kuko bigaragara ko uruhare rwabo ari ingirakamaro mu bice bitandukanye.

Yagize ati 'Kubera icyuho cy'abagore cyagaragaraga mu bice binyuranye byatumye uyu muryango ubaho kugira ngo uzibe icyo cyuho. Mu gihe gito turashima intambwe tumaze gutera tunashishikariza abakobwa bose gukora ibyo biyumvamo yewe na bya bindi babwirwa ko badashoboye kuko bigenda bigaragara ko hari ababikora kuruta abandi.'

Usibye kuba uyu muryango ufasha kurema icyizere mu bakobwa biga mu mashuri y'imyuga n'ubumenyingiro cyane abiga iby'ingufu n'amashanyarazi unabafasha gukora imenyerezamwuga no kuborohereza kwinjira ku isoko ry'umurimo, aho kugeza ubu bamaze gufasha abakobwa barenga 300 gukora imenyerezamwuga.

Umuyobozi Mukuru w'Ishami ry'Imyuga n'Ubumenyingiro muri ULK Polytechnique, Dr Sumbili Djuma, yavuze ko kuba umubare w'abakobwa biga amasomo y'imyuga n'ubumenyingiro ugeze kuri 40% muri ULK ari ikimenyetso kigaragaza ko byinshi biri guhinduka.

Abakobwa basabwe gutinyura bagenzi babo na bo bakayoboka amasomo y'iby'ingufu n'amashanyarazi

Ibi biganiro byitabiriwe n’abakobwa batandukanye biga ibijyanye n’amashanyarazi muri ULK

Hatowe abazahagararira abandi muri Club ya PowerHer Rwanda muri ULK

Abasanzwe ari abanyamuryango ba PowerHer Rwanda bishimiye kwakira abandi bashya

Umuyobozi Mukuru w'Ishami ry'Imyuga n'Ubumenyingiro muri ULK Polytechnique, Dr Sumbili Djuma, yizeye ko umubare w’abakobwa biga imyuga n’ubumenyingiro uzazamuka

Umuyobozi Mukuru wungirije w' Umuryango POWERHer Rwanda, Mutoni Apophia, yasabye abakobwa kwitinyuka

Amafoto: Shumbusho Djasiri

Twese tugira uburyo twumvamo kandi twasobanuramo urukundo, ariko se mu by'ukuri ni iki kiba kirimo kuba mu bwonko bwacu iyo dukunze?

Kandi ni gute tumenya gutandukanya urukundo nyarwo no kwimara ipfa ry'imibonano mpuzabitsina?

Urukundo ni iki?

Hari ubushakashatsi bwa gihanga ku buvuzi bwo mu mutwe bwakozwe ku bufatanye na Open University.

Kuri uyu wa Gatanu tariki 3 Kamena 2022, urukiko rwisumbuye rwa Nyarugenge rwemeje ko Ishimwe Dieudonne ukurikiranyweho ibyaha bishingiye ku ihohotera rishingiye ku gitsina afungwa by’agateganyo, bityo akazaburana mu mizi afunzwe.

Muri uku gusomwa k’urubanza, Ishimwe Dieudonne ntiyagaragaye imbere y’abacamanza, ahubwo hari Me Nyembo Honorine umwunganira mu mategeko.

Ku ya 13 Gicurasi 2022 ni bwo Prince Kid yaburanye bwa mbere ku ifungwa n’ifungurwa ry’agateganyo ku bw’ibyaha bitatu yaregwaga ari byo; Gukoresha undi imibonano mpuzabitsina ku gahato, ishimishamubiri rishingiye ku gitsina no guhoza undi ku nkeke bifitanye isano n’imibonano mpuzabitsina.

Icyo gihe, urukiko rw’ibanze rwa Kicukiro rwemeje ko Ishimwe Dieudonne, afungwa iminsi 30 y’agateganyo, byatumye atanga ubujurire bwe mu rukiko rwisumbuye rwa Nyarugenge ari narwo rwasomye urubanza rw’ubujurire uyu munsi.

Uyu munsi, urukiko rwisumbuye rwa Nyarugenge ntirwanyuranyije n’uko urukiko rw’ibanze rwari rwavuze ko hari impamvu zikomeye zituma Ishimwe Dieudonne akekwaho ibyaha by’ishimishamubiri rishingiye ku gitsina no guhoza undi ku nkeke bifitanye isano n’imibonano mpuzabitsina.

Ku bw’ibyo, urukiko rwisumbuye rwa Nyarugenge rwemeje ko ubujurire bwa Ishimwe Dieudonne ‘Prince Kid’ nta shingiro bufite, bityo agomba gufungwa iminsi 30 y’agateganyo, akazaburana urubanza mu mizi afunzwe.

Prince Kid yatsinzwe urubanza rw’ubujurire

Prince Kid ni we wateguraga irushanwa rya Miss Rwanda

Umunyamakuru w’Ibiro ntaramakuru bya Nigeria (NAN) wasuye ahabereye iyi mpanuka ikomeye avuga ko aka gace byabereyemo ka Karshen-Kwalta gatuwe cyane, byatumye Gaze imwe yangiriza igice kinini cy’amazu y’ubucuruzi..

Inkuru ya NAN ivuga ko ibi byabaye ahagana i Saa mbili z’umugoroba wo ku ya 2 Kamena 2022, aho Gaze yaturitse igahita ifatisha umuriro ku bindi bucuruzwa mu iduka, bigatuma umuriro ugera no ku baturanyi.

Malam Abubakar wari ahabereye iyi mpanuka abireba n’amaso, yavuze ko abantu benshi bahise bajyanwa mu bitaro bambaye ubusa, bafite uruhu rwahiye.

Malam yavuze ko abantu barenga 10 bahuye n'iki kibazo, cyane cyane abari mu iduka ryaturikiyemo Gaze ndetse n'abaturage batuye hafi yaryo.

Umuyobozi w’ikigo cya Leta gishinzwe kuzimya umuriro muri Kano, Bwana Saminu Yusif, yemeje ibyabaye abwira ikinyamakuru AllAfrica ko abantu 20 bakomerekeye muri iyi mpanuka ariko bose bararokowe ari bazima, bakaba bari kwitabwaho n’abaganga.

Bwana Yusif yavuze ko ibyabaye bivugwa ko byatewe n'umuriro wavuye mu mbabura y’umugabo ukaranga no akanagurishiriza amafi hafi y'iduka rya gaze ryabereyemo iri sanganya.

Umwanzuro wasomwe kuri uyu wa Gatanu, tariki ya 3 Kamena 2022. Uregwa ntiyari mu cyumba cy’Urukiko Rwisumbuye ruherereye i Nyamirambo.

Prince Kid akurikiranyweho ibyaha by’ihohotera rishingiye ku gitsina bikekwa ko yakoreye bamwe mu bakobwa bitabiriye irushanwa rya Miss Rwanda yari amaze igihe ategura.

Ashinjwa ibyaha bibiri birimo gusaba cyangwa gukoresha ishimishamubiri rishingiye ku gitsina no guhoza undi ku nkeke bifitanye isano n’imibonano mpuzabitsina.

Urukiko rw’Ibanze rwa Kicukiro rwategetse ko akurikiranwa afunze rwamuhanaguyeho icyaha cyo gukoresha undi imibonano ku gahato, kuko nta kimenyetso byari bihari by’uko yasambanyije umukobwa witabiriye Miss Rwanda cyangwa yaramunyweshejwe inzoga ku gahato.

Akimara gukatirwa, yahise ajurira, urubanza rutangira kuburanishwa n’Urukiko Rwisumbuye.

Umucamanza mu Rwisumbuye ubwo yasomaga umwanzuro ku bujurire bwa Prince Kid yavuze ko akomeza gufungwa mu gihe iperereza ku byaha aregwa rigikomeje.

Yavuze ko uwo mwanzuro ushingiye ku mutekano w’abatangabuhamya no kuba uregwa afunguwe ashobora kubangamira iperereza hashingiwe ku kuba yari umuntu ukomeye kandi abakobwa yarabagiriye umumaro binyuze muri Rwanda Inspiration Back Up yateguraga Miss Rwanda.

Imiterere y’urubanza rw’ubujurire rwabereye mu muhezo

Ku wa 26 Gicurasi 2022 ni bwo Prince Kid yitabye Urukiko Rwisumbuye rwa Nyarugenge mu rubanza yaburanagamo ubujurire ku ifungwa n’ifungurwa ry’agateganyo.

Mu mwambaro uranga imfungwa, Prince Kid urubanza rwe rwahise rwongera gushyirwa mu muhezo ku mpamvu zihuye n’izatumye iburanisha ryo mu Rukiko rw’Ibanze rwa Kicukiro naryo rishyirwa mu muhezo.

Icyo gihe iburanisha rigitangira, Ubushinjacyaha bwahise busaba ko urubanza rubera mu muhezo nk’uko bwari bwabisabye no mu rukiko rwabanje.

Bwavuze ko ari uburyo bwo kurinda umutekano w’abatangabuhamya no gusigasira umuco mbonezabupfura.

Ishimwe n’umwunganira mu mategeko basabye umucanza ko urubanza rwaburanishirizwa mu ruhame ndetse rukazanahasomerwa.

Nyuma yo kumva impande zombie, Perezida w’Urukiko yafashe icyemezo cyo kuburanishiriza urubanza rwa Ishimwe mu muhezo ndetse we n’umwunganira mu mategeko Me Nyembo Emeline batangira gusobanura ingingo zabo uko ari eshanu bashingiragaho bajuririra icyemezo cy’Urukiko rw’Ibanze rwa Kicukiro.

Nubwo batanze ingingo eshanu ariko zose zisa n’izikubiye kuri ebyiri zishingiye ku kuba Me Nyembo n’uwo yunganira batumva impamvu urukiko rwategetse ko afungwa by’agateganyo kandi bumva ko nta mpamvu zikomeye zihari zashingirwaho hemezwa ko ibyaha akurikiranyweho yabikoze ndetse no kuba umucamanza atarigeze agaragaza ko ataha agaciro ingwate yari yatanzwe na Prince Kid kugira ngo akurikiranywe ari hanze.

Mu rubanza, Ubushinjacyaha bwavugaga ko Ishimwe washinze Rwanda Inspiration Back Up yari yahawe gutegura Miss Rwanda, ashingiye ku bubasha ahabwa bwo kuba ari umuyobozi yegereye abakobwa batandukanye bitabiraga iryo rushanwa akabasambanya.

Mu iburana rye mu Rukiko rw’Ibanze rwa Kicukiro yagaragaje ko ibyo byaha byose ari ibyo bashaka kumugerekaho kuko nta kimenyetso kigaragaza ko yabikoze.

Urukiko Rwisumbuye rwa Nyarugenge rwasesenguye ingingo zatanzwe na Ishimwe ajuririra icyemezo cy’Urukiko rw’Ibanze rwa Kicukiro hagamijwe kumenya koko niba nta mpamvu zikomeye zatuma akekwaho ibyaha akurikiranyweho.

Me Nyembo yagaragaje ko mu rukiko rwabanje hatabayeho kugaragaza koko uburyo icyaha cy’ishimishamubiri cyakozwe bityo nta mpamvu zikomeye zatuma ukekwa akurikiranwa afunzwe hagendewe gusa ku buhamya bw’umwe mu bakobwa uvuga ko yamusambanyaga amwizeza kumufasha no kumugeza kure mu irushanwa.

Ubushinjacyaha buvuga ko kuba yarasambanyaga uwo mukobwa kugira ngo azamubonere umwanya mwiza bihagije kugira ngo akurikiranywe naho ibyo kuba avuga ko atari mu kanama nkemurampaka ku buryo yagira iyo amufasha nta shingiro bikwiye guhabwa.

Urukiko Rwisumbuye rusanga ibyo umutangabuhamya yavuze bitari bikwiye gushingirwaho ngo kuko birashoboka ko abantu babana kandi bafitanye urwango bigatuma yabimushinja.

Urukiko rusanga iyo yaba impamvu ituma akekwaho koko ariko itaba ikomeye, ibyo bivuze ko kuba impamvu yaba idakomeye urukiko rwanzuye ko ingingo ya Me Nyembo n’uwo bunganira ifite ishingiro.

Ingingo ya kabiri Prince Kid n’umwunganira we bagaragaje ni ukuba urukiko rwarashingiye ku ijambo 'Happiness’ ryumvikanye mu kiganiro bivugwa ko Prince Kid yagiranye n’umwe mu bakobwa bitabiriye irushanwa byashingirwaho bifatwa nko gusaba ruswa ishingiye ku gitsina kuko ntaho byumvikana mu magambo bakoresheje.

Me Nyembo yagaragaje ko muri 'Happiness’ nta kintu cyo gusambanya uwo mukobwa kigaragaramo ndetse n’ushinjwa na we ashobora gutangaza ko ibyavugwagwa bihabanye n’ukuri.

Umushinjacyaha we yavuze ko kuba icyaha cya ruswa gisaba uyitanga n’uyakwa guhisha amakuru bidatangaje kuba bakoresha ijambo 'Happiness’ mu kuyishakira izina nkuko hari abashobora kuyita andi mazina nka Fanta, amazi n’andi.

Urukiko Rwisumbuye rwasobanuye ko ijambo 'Happiness’ rigoye gusobanukirwa bityo utashobora gusobanukirwa n’impamvu, rwanzura ko rusanga rifatwa nk’impamvu ikomeye ituma hakekwa ko yakoze icyaha cyo kwaka ruswa ishingiye ku gitsina.

Ku birebana n’inyandiko yagaragajwe yanditswe n’uwo mukobwa y’uko Ishimwe atigeze amufata ku ngufu, Ubushinjacyaha bwagaragaje ko imushinjura itahabwa agaciro kuko ikiri gukorwaho iperereza.

Ku birebana no guhoza undi ku nkeke ngo hagendewe ku butumwa, umwe mu bakobwa bitabiriye irushanwa rya Miss Rwanda 2022 ubwo yari yasohokanye na Ishimwe Dieudonné ngo yamwandikiye ubugira buti 'Nonese Kid twaryamana bikavaho ?'

Nyembo yavuze ibyo bitafatwa ko guhoza undi ku nkeke kuko bitagaragaza koko uwo mukobwa yigeze yiyama Prince Kid.

Ishimwe Dieudonné we yavuze ibyo byari byaturutse ahanini ku kiganiro yari yakoranye na Voice of America aza kwifashisha Prince Kid arabimufasha hanyuma nyuma aza kumwemerera kumusohokana.

Mu iburana yavuze ko nubwo bivugwa ko byabereye muri hotel barimo, kuba nta camera y’aho baraye igaragaza amashusho ari gukomangira uwo mukobwa ngo amusabe ko baryamana bidakwiye kwitwa ko yamuhohoteye cyangwa yamuhojeje ku nkeke.

Ubushinjacyaha buvuga ko bushingiye ku gukomera kwa Ishimwe bitari korohera uwo mukobwa byatumye atabasha kumwiyama icyakora yabimenyesheje mugenzi we muri iryo joro ngo amubwire isanganya yahuye na ryo ariko kuko hari mu ijoro ntiyabasha kumusubiza.

Urukiko rusobanura ko ibisobanuro bya Me Nyembo byumvikana ariko bikaba bigomba kuzatangwa mu rubanza mu mizi.

Umucamanza yavuze ko urukiko rushingiye ku butumwa Prince Kid yahawe, kuba koko abo bombi bari kumwe muri hotel mu Ntara y’Iburengerazuba no kuba muri iryo joro yarandikiye mugenzi we amumenyesha ibyamubayeho koko iyo mpamvu ikomeye yatuma akurikiranwaho icyaha.

Ingingo ya 83 y’itegeko ryerekeye imiburanishirize y’imanza nshinjabyaha igaragaza ko hashobora gutangwa ingwate ku ifungwa n’ifungurwa ry’agateganyo ku byaha byose kandi ishobora kuba amafaranga, umutungo utimukanwa cyangwa kwishingirwa n’undi muntu.

Muri uru rubanza ariko Ubushinjacyaha bwagaragaje ko ingwate itakemezwa mu gihe hatagaragazwa agaciro kayo, ariko bunagaragaza ko bitewe n’imiterere yarwo idakwiye kwemerwa hanagendewe ku miterere y’ikirego ngo kuko uregwa ashobora kubangamira iperereza mu gihe yarekurwa.

Urukiko Rwisumbuye narwo rusanga, umucamanza ashobora kumufungura by’agateganyo cyane ko ingwate yatanzwe ihagije kuko Ishimwe yari yatanze inzu n’imodoka nk’ingwate kugira ngo arekurwe akurikiranwe ari hanze.

Gusa urukiko ruvuga ko hashingiwe ku miterere y’urubanza na cyane ko iyo ingingo igena iby’ingwate itanga n’ubwinyangamburiro bw’umucamanza bityo ko iyo ngwate itashingirwaho.

Urukiko Rwisumbuye rwa Nyarugenge rwahise rutegeka ko Ishimwe Dieudonné akomeza gufungwa iminsi 30 ngo kubera umutekano w’abatangabuhamya kandi ngo aramutse afunguwe ashobora kubangamira iperereza cyane ko abakobwa bitabiriye Miss Rwanda ngo yabagiriye umumaro ubwo yayoboraga Rwanda Inspiration Back Up.

Kugeza ubu Ishimwe afungiye muri Gereza ya Nyarugenge iri i Mageragere kuva ku wa 16 Gicurasi 2022, uwo munsi ni bwo Urukiko rw’Ibanze rwa Kicukiro rwategetse ko afungwa iminsi 30 y’agateganyo.

Ibya Miss Muheto na Prince Kid muri hotel barayemo i Gisenyi n’ibya HAPPINESS byagarutsweho murukiko

Ikigo gishinzwe gufata amakarita n'ibipimo bijyanye n'umutungo kamere (RCMRD), kirimo guhugura abanyeshuri ba Kaminuza y'u Rwanda, ku gukoresha ubumenyi n'ikoranabuhanga rimaze kugerwaho mu byo biga kugira ngo bazabyifashishe igihe bazaba bageze mu kazi.

Umuyobozi wa RCMRD, Dr Emmanuel Nkurunziza, yasobanuye ko ubufatanye bagiranye na Kaminuza y'u Rwanda buzatuma bahugura abanyeshuri bibanda ku ikoranabuhanga rikoreshwa mu bumenyi bw'Isi kuko ari icyiciro kirimo guhinduka cyane bityo bikaba bisaba ko abakiri bato bahabwa ubumenyi bugezweho.

Yavuze ko ikirenze ari uko ubumenyi butangwa mu ishuri abanyeshuri bakwiye kubukoresha mu guhindura no guteza imbere inzego zirimo ubuhinzi n'izindi.

Ati “Ubundi abantu bigaga gupima ubutaka no gushushanya amakarita ariko uyu munsi turabereka ko ntacyo bimaze utabitwaye mu nzego runaka nk'ubuhinzi, ibidukikije, amashyamba, amazi. Ibyo bipimo ntacyo byaba bivuze utarebye aho ugiye kubikoresha”.

Muri aya mahugurwa y'iminsi itatu abera mu kigo cy'ubushakashatsi mu ikoranabuhanga rishingiye ku bumenyi bw'Isi cya Kaminuza y'u Rwanda, hari impuguke za RCMRD mu nzego zitandukanye zirimo guhuzwa n'aba banyeshuri kugira ngo bababere nk'abajyanama babereka ibishoboka, banabafashe kuzagera ku byo bakora bifitiye abantu akamaro kandi bibyara inyungu.

Dr Nkurunziza ati “Turashaka gukuramo icyuho gihari aho abakoresha bavuga ko kaminuza zisohora abanyeshuri badafite ubumenyi bukenewe. Turashaka kubereka ibikenewe hanze n'ibikoresho bihari kugira ngo mu masomo ahari bongeremo no gutegurira umunyeshuri akazi azakora nasohoka”.

Ni gahunda yahawe izina rya 'KUZA' bivuze kuzamura umwana kugira ngo azagere ku ndoto afite. Binyuze mu cyitwa Geo Hub [ahantu ibitekerezo bigirwa inama kugira ngo bikure bivemo ikintu cyaba nk'ubucuruzi cyangwa cyakemura ibibazo], RCMRD buri mwaka itegura irushanwa ku bantu bafite ibitekerezo byafasha abantu, utsinze agahabwa ibihumbi 30$.

Ibisubizo mu buhinzi, ibiza, ubumenyi bw'ikirere ndetse n'abakora amakarita y'ibiri ku butaka ni ibitekerezo byakirwa.

Umuyobozi w'ikigo cy'ubushakashatsi mu ikoranabuhanga rishingiye ku bumenyi bw'Isi, Prof Gaspard Rwanyiziri, yavuze ko abanyeshuri bakeneye cyane aya mahugurwa kuko uretse ibyo babigisha, bakeneye no kubona ubundi bumenyi bw'abandi bantu.

Kaminuza y'u Rwanda binyuze mu kigo cy'ubushakashatsi mu ikoranabuhanga rishingiye ku bumenyi bw'Isi basinyanye amasezerano y'imyaka itanu azafasha abanyeshuri bamenya ibibera ahandi n'ikoranabuhanga rigezweho.

RCMRD ni ikigo kimaze imyaka 47 gishinzwe. Mu Rwanda gikorana na Minisiteri y'ubuhinzi mu gukurikirana umusaruro w'ibihingwa, amashuri mu gushishikariza abana bakiri mu mashuri mato kwiga inyigisho za siyansi, ikigo gishinzwe ubutaka mu bijyanye no gukora amakarita ajyanye n'imiterere y'ubutaka mu gihugu ndetse na Meteo Rwanda.

Umuyobozi wa RCMRD, Dr Nkurunziza asobanurira abanyeshuri umusaruro bazakura muri aya mahugurwa

Aba banyeshuri barimo guhugurwa ku kubyaza umusaruro amakuru atangwa n’ibyogajuru

Kuri uyu wa Kane tariki 2 Kamena 2022, ni bwo Minisitiri Helena ari kumwe n'itsinda bazanye mu Rwanda mu ruzinduko rw'akazi rugamije gukomeza umubano hagati y'ibihugu byombi, basuye icyicaro cya RFL giherereye Kacyiru.

Ni nyuma y'uko kuri uyu wa Kabiri, basuye Urwibutso rwa Jenoside rwa Kigali ruherereye ku Gisozi, mu rwego rwo kwiga amateka yagejeje u Rwanda mu icuraburindi rya Jenoside yakorewe Abatutsi mu mwaka w'1994.

Iri tsinda riyobowe na Minisitiri Helena ryashyize indabo ku mva zishyinguyemo Abatutsi, ndetse bunamira inzirakarengane zishyinguye muri uru rwibutso.

Helena Mateus Kida ni Minisitiri w'Ubutabera wa Repubulika ya Mozambique kuva muri Mutarama 2020. Yabonye izuba ku wa 12 Ukwakira 1971, avukira mu gace ka Metangula mu Ntara ya Niassa.

Afite Impamyabumenyi y'icyiciro cya Gatatu cya Kaminuza mu mategeko yakuye muri Federal University of Bahia-UFBA yo muri Salvador mu gihugu cya Brazil.

Uyu mugore wabaye umucamanza mu Rukiko rukuru rwa Boane muri Mozambique, yasobanuriwe amavu n'amavuko ya Laboratwari y’u Rwanda y’Ibimenyetso bya Gihanga byifashishwa mu butabera (RFL), serivisi itanga, ibikorwa mu kumenyekanisha ibyo bakora, guhugura abakozi, urugendo rw'iterambere rw'iki kigo ruhanzwe amaso n'ibindi.

Yabwiwe ko RFL ari ikigo cya Leta gifite ubuzima gatozi, ubwigenge n'ubwisanzure mu miyoborere, mu micungire y'umutungo n'abakozi byayo n'ibindi.

Yabwiwe kandi ko RFL ifite inshingano zo gukusanya, gupfunyika, gutwara, kwakira, kubika no gusuzuma ibimenyetso by'ahakorewe icyaha.

Nyuma yo gusobanurirwa, Minisitiri Helena n'itsinda ayoboye bafashe umwanya wo kwirebera serivisi zitangwa muri iki kigo, asobanurirwa imikorere yazo.

Yeretswe serivisi zirimo Serivisi ya Toxicology ifasha mu gupima ibyashobora guhungabanya umuntu bikaba byamuviramo urupfu; serivisi ya Drugs and Chemistry ifasha mu kumenya ubwoko n'ingano by'ikinyabutabire kiri mu kintu runaka, serivisi ya Microbiology ipima ibintu byose byahumanyijwe na microbes n'izindi. 

Minisitiri w'Ubutabera muri Mozambique, Helena Mateus Kida [Uri hagati] ari kumwe n'itsinda bazanye mu ruzundiko mu Rwanda basuye Laboratwari y'u Rwanda y'ibimenyetso bishingiye ku bumenyi n'ubuhanga bikoreshwa mu butabera (RFL)

Mozambique iherereye mu Majyepfo y'Umugabane wa Afurika ituwe n'abaturage miliyoni 31.26 nk'uko Imibare ya Banki y'Isi yo mu 2020 ibigaragaza.

Iki gihugu kiyobowe na Perezida Filipe Nyusi giteretse ku buso bwa 801,590 km². Ururimi rukoreshwa muri iki gihugu ni ikinya-Portugal.

Ministiri Helena yari kumwe na Mário Adriano Vicente wamufashaga guhindura/gusobanura mu Cyongereza ibyo yavugaga ndetse n'ibyo yashakaga gusobanuza muri iki kigo cya RFL.

Uyu muyobozi yavuze ko yanyuzwe na serivisi zitangwa na RFL, avuga ko akurikije ibyo yabonye nta kibura kugira ngo iki kigo gikomeze gutanga umusanzu wacyo mu gukorera abaturage, by'umwihariko mu kubafasha kubona ubutabera.

Ati 'Mwaduteye ishyari ryiza, byatumye tubona ko natwe twabikora. Twumvise kandi ko hari ubufasha/ubufatanye bwa Leta y'u Rwanda mu kugera kuri ibi byose. Ndabashimiye kandi mukomereze aho […] Nyuma yo gusura izi serivisi zose nabonye ko mwashyize ku murongo buri kimwe gituma mutanga ubutabare bubereye buri wese.'

Helena yavuze ko iki kigo cyabaye inzira nziza ifasha inzego z'ubutabera kugenza ibyaha n'ibindi. Asaba ko habaho ubufatanye rw'urwego rw'ubutabera rwa Mozambique n'urw’u Rwanda, ariko no mu zindi nzego.

Uyu mugore wabaye Umuyobozi Wungirije wa Minisitiri w'Umutekano w'Imbere mu gihugu cya Mozambique, yasabye ko abakozi b'urwego rw'Ubutabera rwa Mozambique n'abandi bahugurwa na RFL mu bijyanye no gufata ibimenyetso byifashishwa mu butabera.

Ati 'Ndasaba ko mu gihe ikigo cyizaba cyatangiye guhugura abantu batandukanye, Mozambique izaba iya mbere muri uru rugendo. Tuzazana abatekinisiye n'abakozi bacu b'abahanga n'abandi kugira ngo bazatangirane n'iyi gahunda nziza numvise.”

Umuyobozi Mukuru wa Laboratwari y'u Rwanda y'ibimenyetso bishingiye ku bumenyi n'ubuhanga bikoreshwa mu butabera (RFL) Lt Col Dr. Charles Karangwa, yabwiye INYARWANDA ko Minisitiri Helena yasabye ubufatanye hagati y'ibihugu byombi “kugira ngo nabo babone kuri serivisi dutanga”.

Ati 'Icyo bashimangiye ni ukureba uburyo twabigishiriza abantu kugira [ngo] nabo bashobore kuba bazagira igihe cyo gukora nk'ibyo dukora.”

“Kandi twabibemereye. Tubawira ko tuzavugana n'inzego z'Igihugu cyane Minisiteri y'Ubutabera itureberera kugira ngo ubwo bufatanye bubeho. Mu byo twavuganye bavuze ko batifuza ko byarenga imyaka ibiri tudatangiye guhugura abakozi babo.'

Dr Karangwa yavuze ko ubu bari mu mushinga wo gushyiraho ahantu bazajya bigishiririza (Center of Excellence) kandi bashaka ko bizaba byatangiye mu gihe cy'imyaka ibiri iri imbere. Iyi gahunda bayitezeho gusubiza ibihugu byagiye bisaba 'igihugu cyacu ubwo bufasha'.

Uyu muyobozi yavuze ko U Burundi, Cameroon, Congo Brazaville, Togo, Repubulika Iharanira Demokarasi ya Congo n'abandi bamaze gusaba guhabwa amahugurwa ajyanye no gufata no kugenzura ibimenyetso byifashishwa mu nkiko kugira ngo batange ubutabera bwuzuye n'ibindi.

Dr Karangwa wahawe kuyobora RFL muri Werurwe 2022, avuga ko binyuze mu bufatanye bafitanye na Leta y'u Rwanda bamaze kubona ibigo n'abantu bazafasha mu guhugura abantu birimo nka National Forensic Sciences University yo mu Buhinde, Netherlands Forensic Institute (NFI) yo mu Buholandi n'abandi.

Uyu muyobozi wakoze ubushakashatsi bwinshi ku bijyanye n'imiti n'ibiribwa, yanavuze ko hari itegeko riri kuvugururwa ku buryo 'iki kigo (RFL) cyazahinduka kikaba Rwanda Forensic Institute', bizatuma kiba ahantu ho kwigishiriza.

Ati “Mwabonye ko hari za Laboratwari hano ntabwo dushobora kuhigishiriza abantu ariko icyo gihe tuzaba dufite amashuri aho bazajya bigishirizwa bakagira ahantu ho gukorera imyitozo-ngiro.'

Akomeza ati 'Numva rero ari gahunda nziza Leta ifite kandi izatanga umusaruro. Twifuza ko umunsi umwe u Rwanda rwaba igicumbi cya 'Forensic-Science' muri Afurika. Cyane cyane ko ntahandi muri Afurika bafite ikigo nk'iki cyujuje serivisi zirenga 12.'

Dr Karangwa wabaye umwalimu muri Kaminuza y'u Rwanda mu ishami rya 'Pharmacie', yavuze ko ubu bishimira kuba serivisi zitangwa na RFL ziri mu ikoranabuhanga, kandi mu minsi iri imbere zizahuzwa n'abo bakorana.

Yavuze kandi ko buri mwaka hari ibipimo bahana na Laboratwari Mpuzamahanga z’indi, bagasanga ibyo bakoze nta kosa ririmo. Ni ibintu bishimira!

Dr Karangwa yavuze ko bari gukoresha ikoranabuhanga rigezweho kugira ngo bajye batanga ibisubizo mu gihe cya vuba. 

Asaba abakorerwa ihohoterwa rishingiye ku gitsina kudaceceka, ahubwo bagane RFL ibafasha kubona ubutabera.

Kanda hano urebe amafoto menshi:

Minisitiri Helena Mateus Kida wabaye umucamanza mu Nkiko zitandukanye muri Mozambique, yasabye ko abatekinisiye n'abahanga bo muri Mozambique bazahugurirwa muri RFL 

Umuyobozi Mukuru wa Laboratwari y'u Rwanda y'ibimenyetso bishingiye ku bumenyi n'ubuhanga bikoreshwa mu butabera (RFL), Lt Col Dr. Charles Karangwa yashimye Minisitiri Helena wasuye ikigo RFL amwizeza ubufatanye buhoraho 

Dr Karangwa yabwiye Minisitrii Helena ko mu gihe kitageze ku myaka ibiri iki kigo kizaba gihugura abantu batandukanye mu bijyanye no gukusanya ibimenyetso bya gihanga 

Minisitiri Helena yavuze ko akurikije ibyo yabonye ari umusaruro wa Leta ishyize imbere gufasha abaturage kubona ubutabera bukwiye 

Minisitiri Helena yeretswe imikorere ya serivisi zirimo iya 'Drugs and Chemistry' ifasha mu kumenya ubwoko n'ingano by'ikinyabutabire kiri mu kintu runaka    

Minisitiri Helena yashimye ikoranabuhanga rifitwe na RFL, abaza ibiciro bya zimwe mu mashini zifashishwa n'iki kigo 

Uhereye ibumoso: Umuyobozi w'Ikigo RFL, Lt Col Dr. Charles Karangwa, Umuyobozi w'Ishami rya Minisiteri y'Ubutabera (MINIJUST) rishinzwe Ubutabera mpuzamahanga, Providence Umurungi, Minisitiri w'Ubutabera wa Mozambique, Helena Mateus Kida na Ambasaderi w’igihugu cya Mozambique mu Rwanda, Amade Miquidade 

Dr Karangwa yavuze ko RFL ifite gahunda yo guteza imbere ireme rya serivisi rigashyirwa ku rwego mpuzamahanga 

Kuva mu 2018, RFL imaze kwakira no gusuzuma amadosiye arenga ibihumbi 23 muri serivisi zitandukanye 

Umuyobozi w'Ishami rya Minisiteri y'Ubutabera (MINIJUST) rishinzwe Ubutabera mpuzamahanga, Providence Umurungi 

RFL itanga serivisi zirimo guhuza umuntu n'ahabereye icyaha hifashishijwe uturemangingo, gupima abafitanye isano (DNA Test), gupima inyandiko mpimbano no kugereranya ibikumwe by'abakekwaho ibyaha  

Dr Karangwa Charles uyobora RFL asuhuzanya na Ambasaderi wa Mozambique mu Rwanda, Amade Miquidade 

Mário Adriano Vicente [Uri ibumoso] wafashije gusobanura mu Cyongereza ibyo Minisitiri Helena yavugaga 

Nyuma y'urugendo-shuri, bafashe ifoto y'urwibutso hanze y'aho RFL ikorera

Ifoto y’urwibutso 

AMAFOTO: Sangwa Julien-INYARWANDA.COM

VIDEO: Bachir – INYARWANDA TV