Webrwanda Backend

Blog

  • Ndoli ahishuye ko Bakame yamuroze akamusenyera urugo : Yasezeye umupira w’amaguru mu gahinda #rwanda #RwOT

    Ubu ugiye gukora urutonde rw’abakinnyi icumi beza b’Abanyarwanda babayeho uyu mugabo w’umunyabigwi wakiniye amakipe atandukanye nka APR FC, Police FC, AS Kigali, Musanze FC n’ikipe y’igihugu Amavubi ntiyaruburaho.

    Yubatse izina rikomeye yaba mu Rwanda ndetse no hanze yarwo, abana mu makipe mato baramwiyitirira yewe nubwo hari abataramubona.

    Ndoli uherutse gufata umwanzuro wo guhagarika gukina umupira w’amaguru, yaganiriye n’abanyamakuru mu kiganiro OneSport Show kuri Radio1 agaruka ku byaranze ubuzima bwe mu mupira w’amaguru.

    Mu kiganiro hagati, Ndoli yahishuye ko mugenzi we Ndayishimiye Eric uzwi nka Bakame yamugiriye nabi akamuroga ndetse akagira uruhare mu isenyuka ry’umuryango we ubwo bahuriraga mu ikipe ya APR FC.

    Ibi yabikomojeho ubwo yagarukaga ku mubano yari afitanye na Bakame ubwo yajyaga mu ikipe ya APR FC nyuma yo gusezerera uwari umuzamu wa mbere muri iyo kipe Ndanda.

    Yagize ati 'Akihagera byari byiza kandi narabyishimiye urumva nari nsigaye njyenyine kandi APR FC yakundaga gukoresha abazamu babiri kandi yari n’inshuti yanjye magara.'

    Umwuka waje kuba mubi hagati ya 2009 na 2010 ubwo biteguraga gukina imikino ya CAF Champions League.

    Muri ibyo bihe Ndoli yagize ikibazo cyo kurwara umugongo ubwo ikipe y’igihugu Amavubi yari igiye gukina umukino wa gicuti na Côte d’Ivoire.

    Yavuze ko ubwo yishyushyaga yumvise akantu kameze nk’agashinge kamujombye mu mugongo bimuviramo kuwurwara umwaka wose nk’uko abitangaza.

    Yagize ati 'Mu mikino itandukanye twakinnye muri ibyo bihe benshi barambwiraga ngo Bakame arakuroga ariko njye simbyemere kuko namufataga nk’inshuti yanjye magara.'

    Ndoli yakomeje avuga ko hari igihe cyageze atangira kwemera ko ashobora kuba yararozwe na mugenzi we nyuma y’imyaka hafi ine amukeka.

    Ati 'Kuko nari ntangiye kumukeka, twari tumaze guhabwa uruhushya rwo kujya kureba imiryango yacu mbere y’uko tujya gukina CECAFA ihuza amakipe y’ibihugu mu 2012 ndamubwira ngo sindi butahe ariko ndi kumubeshya. Ngeze mu rugo nsanga amakuru yagezeyo kare. Yari yabwiye umugore wanjye ko ntari butahe iryo joro nagiye kwirarira ahandi.'

    'Tugeze Tanzania [ gukina CECAFA] telefoni ye icyo gihe ntiyakoraga byabaye ngombwa ko akoresha iyanjye yandikirana n’umugore we mbona ubutumwa bw’umugore we [wa Bakame] amubwira ko amaze kubwira umugore wanjye ko ntaraye mu rugo anamusaba guhita asiba ubwo butumwa akimara kububona.'

    Ndoli ahamya ko icyo ari kimwe mu bihe bibi yagize kuko umugore we yakomeje kumva ibyo yabwirwaga birangira nyuma y’umwaka umwe gusa atandukanye na we.

    Ndoli avuga ko nubwo hari gihe cyageze Bakame akamara umwaka adakina kubera imvune byanamuviriyemo kwirukanwa muri APR FC, nta ruhare yabigizemo.

    Avuga ko nyuma igihe cyaje kugera hafi mu 2015 akabwira Bakame ko yamuhemukiye ariko ntiyabikozwa abihakana yivuye inyuma avuga ko atigeze amuroga.

    Ndoli mu biyobyabwenge

    Ndoli yagarutse kandi ku gihe yigeze kwishora mu biyobyabwenge ari mu ikipe ya APR FC nyuma yo kubona amahirwe yo kujya gukina mu ikipe ya FC Pyunik yo muri Armenia, ariko akaza kuyavutswa n’ikipe yakiniraga.

    Icyakora yavuze ko yaje kubireka mu mwaka wa 2013 kuko yari amaze kubona ko ntaho bizamugeza.

    Ndoli uherutse gusoza urugendo rwe nk’umukinnyi w’umupira w’amaguru yakiniye amakipe atandukanye arimo APR FC, ikipe y’igihugu imyaka igera kuri 12 aho yakinanye na yo amarushanwa menshi arimo imikino ya CECAFA ndetse n’iy’irushanwa rya CHAN mu 2011 no mu 2016.

    Source : http://www.ukwezi.rw/11/article/Ndoli-ahishuye-ko-Bakame-yamuroze-akamusenyera-urugo-Yasezeye-umupira-w-amaguru-mu-gahinda

  • Manchester City yaguze umusimbura ukomeye wa Fernandinho #rwanda #RwOT

    Ikipe ya Manchester yatanze miliyoni 45 z'ama pound kuri Kalvin Phillips wari usanzwe ukinira Leeds United kugira ngo mu mwaka w'imikino utaha azabe umusimbura wa Fernandinho wagiye.

    Umutoza Pep Guardiola yabonyemo uyu musore w'Umwongereza w'imyaka 26 ubushobozi buhambaye,ahitamo kumugura kugira ngo asimbure kapiteni w'iyi kipe Fernandinho wari watangaje muri Mata ko azava kuri Etihad.

    Mu ntangiriro z'uku kwezi SunSport yatangaje ko City izongera ingufu mu gushaka Phillips ikamukura muri Leeds yahataniraga kutamanuka umwaka ushize.

    Nyuma yo kwirinda kumanuka muri Gicurasi, Leeds yari yizeye ko ishobora kwemeza uyu mukinnyi wabo kubongerera amasezerano y'amezi 12 ariko ntibyakunze.

    Bizeraga ko kumuha umwanya uhagije wo gukina kugira ngo azerekeze mu gikombe cy'isi mu Gushyingo bishobora kuba impamvu ikomeye yo kumugumana.

    Ariko, Phillips yifuza kugerageza amahirwe ye ku rwego rwo hejuru no gukina amarushanwa akomeye nka Champions League.

    Uyu mukinnyi yari amaze imyaka umunani hamwe na Leeds ndetse yabahaye serivisi nziza.

    Yemeye rero kumugurisha City izabongera miliyoni 3 z'ama pound niyitwara neza.

    Ibiganiro bisanzwe na Phillips ntibirarangirana kuko kuri ubuari mu biruhuko ariko biteganijwe ko bizasozwa mu minsi iri imbere yagarutse.

    Amasezerano hagati y'amakipe yombi yatumye umukinnyi wo hagati Darko Gyabi wa City nawe yerekeza kuri Elland Road kuri miliyoni 5 z'ama pound.

    Source : https://umuryango.rw/imyidagaduro/imikino/article/manchester-city-yaguze-umusimbura-ukomeye-wa-fernandinho

  • Musanze:Umwana w’imyaka 13 yarusimbutse, Hari umugabo wabwiye nyina ko azamwica cyangwa akamwicira umwana #rwanda #RwOT

    Ibi byabaye mu ijoro ryo ku wa 23 Kamena 2022, ahagana saa saba z’ijoro ubwo yari atashye, agahura n’abo bagizi ba nabi bakamuniga.

    Uyu mwana yavuze ko ku munsi wabanjirije uwo [ku wa 22 Kamena] yari yagiranye ibibazo n’umubyeyi we wamushinjaga ko yamwibye 1 000 Frw, bigatuma ava mu rugo.

    Ngo uwo munsi yiriwe abuyera, aza gutaha mu gicuku, ari na bwo yahuye n’iryo sanganya ry’abantu bashatse kumwivugana.

    Yagize ati 'Naje mpagarara ku muryango w’aho mama acumbitse mbona ruguru yanjye haturutse abantu batatu muri kaburimbo bari kuganira harimo umugore umwe witwa Kecuru n’abandi bagabo babiri, umwe avamo ansanga aho nari nicaye ku ibuye iruhande rw’umuryango ; arambaza ngo ndi uwande ndamwibwira, nkirangiza kumwibwira yahise amfata ijosi araniga.'

    Uyu mwana avuga ko uyu mugabo yamunize kugeza aho ananiwe kuvuga, ati 'Arakomeza araniga, sinzi uko yarekuye gato ndabira nabiye araniga cyane agenda ankurubana ari nako numva ndi guhera umwuka, bigeze aho numva ndapfuye neza neza, arakomeza arankurubana angeza mu mago, numva urusaku rw’abantu anta aho ariruka.'

    Umuturage witwa Bazihinza uri mu batabaye uyu mwana, yavuze ko bumvise umuntu ataka mu gicuku bakajya kureba ibibaye.

    Ati 'Tugeze imbere tubona umuntu urenga ari kwirukanka cyane hanyuma dusanga akana karerembuye amaso, tugaha amazi karazanzamuka.'

    Umubyeyi w’uyu mwana avuga ko kuba umwana we yarahohotewe nyuma yuko bagiranye ibibazo ntaho bihuriye.

    Abaturanyi b’uyu muryango bakeka ko ubu bugizi bwa nabi bakeka ko bwakozwe n’umugabo wabwiye nyina w’uyu mwana ko azamwica cyangwa akamwicira umwana.

    Umunyamabanga Nshingabikorwa w’Umurenge wa Muko, Edouard yavuze ko iki kibazo atari yakimenye, icyakora yizeza ko agiye kugikurikirana afatanyije na RIB.

    Ivomo:Rwandatribune

    Source : http://www.ukwezi.rw/1-1/Amakuru-anyuranye/article/Musanze-Umwana-w-imyaka-13-yarusimbutse-Hari-umugabo-wabwiye-nyina-ko-azamwica-cyangwa-akamwicira-umwana

  • Senderi Hit yatanze amafaranga, Igisupusupu kigaruka ku rubyiniro – Nyamirambo yari yafashwe #rwanda #RwOT

    Ryari ijoro ridasanzwe i Nyamirambo ahazwi nko kuri Tapis mu gitaramo cya ‘People’s Concert’ cyari cyahuje ibyamamare mu muziki aho bataramiye abantu bagataha batabishaka.

    Ni igitaramo cyateguwe mu rwego rwo gusurutsa abanyarwanda ndetse n’abandi bantu bitabiriye inama ya CHOGM ikomeje kubera i Kigali.

    Itorero Intayobera n’Inganzo Ngari mu mudiho gakondo nibo babanje ku rubyiniro muri iki gitaramo cyari kiyobowe na Anita Pendo na Phil Peter.

    Umuhanzi Senederi International Hit yageze ku rubyiniro maze yakiranwa urugwiro rwinshi cyane.

    Uyu muhanzi wanamenyekanye mu ndirimbo zo kubaka u Rwanda yafashijwe n’abakunzi be kuzibyina aho yanatanze amafaranga ku barushije abandi.

    ‘Mariya Jeanne’, ‘Mutesi’ izo ni zimwe mu ndirimbo Nsengiyumva François [Igisupusupu] yamenyekanyemo, nyuma y’igihe adahura n’abakunzi be, yongeye kugaragara ku rubyiniro aho yashimye Imana kongera guhura n’abakunzi be.

    Uyu mugabo na we yishimiwe mu buryo budasanzwe n’abari muri iki gitaramo banyuzwe n’umuduri we.

    Byageze mu gice cy’abahanzi bagezweho muri iyi minsi biba ibindi bindi, abahanzi nka Ariel Ways waririmbye imwe mu ndirimbo ze nshya ‘Good Luck’, Chris Eazy mu ndirimbo ‘Inana’, Bwiza yakoze mu muhogo mu ndirimbo ze zakunzwe nka ‘Ready’, Platini P umwe mu bahanzi bakunzwe yaririmbye izirimo ‘Ibyapa’, Mico The Best ntiyari kuva ku rubyiniro ataririmbye ‘Indembo’, batanze ibyishimo karahava.

    Igitaramo nk’iki kandi cyarimo kibera i Rugendo aho abahanzi nka Siti True Kaligombe, Riderman, Alyn Sano, Juno Kizigenza, Bushalin’abandi bahakoreye amateka.

    Anita Pendo ni we wari umushyushyarugamba

    Itorero Intayoberana mu mudiho gakondo

    Abantu bo bari benshi

    Igisupusupu cyishimiwe na benshi

    Senderi yatanze ibyishimo bisesuye

    Source : http://isimbi.rw/imyidagaduro/article/senderi-hit-yatanze-amafaranga-igisupusupu-kigaruka-ku-rubyiniro-nyamirambo-yari-yafashwe

  • #COVID19: Abantu 34 banduye babonetse mu bipimo 3,815 #Rwanda #RwOT via @kigalitoday #rwanda #RwOT

    Minisiteri y’Ubuzima (MINISANTE) yatangaje ko ku wa Gatanu tariki 24 Kamena 2022 mu Rwanda habonetse abanduye Covid-19 bashya 34, bakaba babonetse mu bipimo (…)

    Source : https://www.kigalitoday.com/ubuzima/indwara/article/covid19-abantu-34-banduye-babonetse-mu-bipimo-3-815

  • Tekno, Fave, Dj Neptune, Khaligraph Jones na… – #rwanda #RwOT

    Mu minsi micye ishize mbere gato y'uko icyumweru cya CHOGM2022 gitangira, nibwo hamenyekanye urutonde rw’ibitaramo bitandukanye biteganijwe hirya no hino muri Kigali.

    Muri ibyo bitaramo harimo icyateguwe na VISIT RWANDA ku bufatanye n’ikompanyi yitwa Empawa Africa, yashinzwe n’umuhanzi Mr Eazi nawe uri kubarizwa mu Rwanda. 

    Iki gitaramo cyiswe Choplife kikaba kiraba kuri uyu wa gatandatu tariki 25 Kamena, mu nyubako y’imyidagaduro izwi cyane nka Kigali Arena ariko kuri ubu isigaye yitwa BK Arena.

    Iki gitaramo kizaririmbamo abahanzi barimo Tekno, Fave na Dj Neptune wamaze kugera i Kigali mu ma saa 21:11, Khaigraph Jones wahageze saa 21:58 kimwe na Nasty wahageze saa 22:07.

    Mu bandi bategerejwe muri iki gitaramo b'abanyamahanga harimo Fave naho mu bahanzi b’abanyarwanda harimo Bruce Melodie, Afrique, Okkama, Kenny Sol n’abandi batandukanye.

    Tekno ukunzwe muri ‘Buga’ yakoranye na Kizz Daniel yageze i Kigali

    Fave wamamaye mu ndirimbo ‘Beautiful’ yamamaye cyane kuri Tik Tok yageze i Kigali

    Khaligraph Jones uheruka gukora indirimbo na Bruce Melodie nawe yageze i Kigali

    Nasty C uri mu baraperi bakomeye muri Africa yageze muri Kigali

    Dj Neptune uri mu bavanzi b’umuziki akaba n’umuririmbyi yamaze kugera i Kigali

    Dj Toxxyk uri mu bateguye kandi bazasusurutsa abazitabira Choplife ari mu bari baje kwakira abahanzi b’ibyamamare baje gutaramira muri Kigali

    Abakobwa bagize Kigali Protocal nibo baje kwakira abahanzi b’abanyamahanga bazataramira Kigali ejo

    Aba bahanzi baje baherekejwe n’abazabafasha 

    Ubwo Nasty C yageraga ku kibuga cy’indege

    Abakobwa ba Kigali Protocal bagiye bashyikiriza umuhanzi umwe ku wundi indabo

    Choplife hazaca uwambaye

    Source : https://inyarwanda.com/inkuru/118444/tekno-fave-dj-neptune-khaligraph-jones-na-nasty-c-bageze-i-kigali-amafoto-118444.html

  • “Ufite ijwi ryiza cyane sis” Miss Bahati Grace yanogewe n’imiririmbire ya Mutesi Jolly (Video) – YEGOB #rwanda #RwOT

    Miss Bahati Grace wabaye Nyampinga w'u Rwanda muri 2009 yeretse Miss Jolly ko yishimiye ijwi rye nyuma yo kumwumva agenda aririmba indirimbo ya Cecile Kayirebwa yitwa Tarihinda.

    Ni nyuma y'amashusho uyu Miss Mutesi Jolly yari ashyize kuri instagram ari mu modoka agenda aririmba maze binogera cyane Miss Bahati.

    Mu kumusubiza yamubwiye ati :'ufite ijwi ryiza sis,iyi ndirimbo ni iyi ibihe byose iranezeza'

    Source : https://yegob.rw/ufite-ijwi-ryiza-cyane-sis-miss-bahati-grace-yanogewe-nimiririmbire-ya-mutesi-jolly-video/

  • Nyuma yo gucuruza imva kuri internet, ikiryabarezi Thomas Nahimana cyiyemeje gutanga pasiporo z'ibicupuri #rwanda #RwOT

    Burya koko iyo uri ikigarasha uba uri ikigarasha, kuko bigaragarira no mu bikorwa byawe. Nyuma yo gucuruza imva kuri Internet bagahabwa urwamenyo, ibigarasha biyobowe na Thomas Nahimana wataye umwambaro w'ubupadiri akabyara nabo atitaho hirya no hino, bemeje ko bashyizeho Pasiporo izajya ifasha abantu kugenda mu bihugu bitandukanye ikaba igura amadorali 75 ni ukuvuga hafi amanyarwanda ibihumbi 76.

    Usibye kurwara mu mutwe umuntu yakwibaza niba aba bantu bitwa ko bahuriye muri Guverinoma yo mu buhungiro barageze mu ishuri; mu byo Thomas Nahimana yatangaje yarikirigise araseka ngo abazagura iyi pasiporo izabahesha uburenganzira bwo kubona akazi aho bazaba bari mu bihugu byabo.

    Ubu butekamutwe bukabije buhuriweho na Nahimana n'abambari be nubwo kwamaganwa; abantu baraho ngo bari muri Leta yo mu buhungiro nabo ubwabo bataziranye.

    Nahimana yakomeje kubeshya ko nta gihugu na kimwe kizanga iyi pasiporo ngo ibizayanga bizabona akaga. Aha Nahimana mu butekamutwe bwe, yatanze numero ya konti ya Youtube Channel yiwe Isi n'Ijuru avugako bazi gutandukanya umutungo w'Isi n'Ijuru ndetse nuwa Guverinoma. Ibi byose aba abifashijwemo na Ntagara witwa ko ari Minisitiri w'Intebe. Umushinga wa Pasiporo ni umwe mu mishinga ya balinga ikiryabarezi Nahimana cyatangaje harimo imva yo kuri Internet ndetse na kaminuza izigisha ibya Politiki.

    Ikiryabarezi Thomas Nahimana ni muntu ki?

    Thomas Nahimana ni Mwene Nkujuwimye Mathias na Iyamubonye Claudine, yavukiye mu karere ka Rusizi muri 1971, Umurenge wa Nzahaha .
    Yahunze u Rwanda ahunze ubutabera kubera ibyaha byo kubiba amacakubiri yari akurikiranweho hagati ya 2005-2006.

    Nyina umubyara ntabwo yigeze ahirwa n'urushako kuko umugabo we yamuhozaga ku nkeke akamuraza hanze n'abana be, bityo akaba ariho abana bakuye kutagira umuco abakahakomora n'ubugome.

    Thomas Nahimana afite murumuna we wari interahamwe Kabombo wamaze Abatutsi muri Cyangugu yose wiyitaga Bakame akaba n'ubu akibarizwa cyangwa yaraguye muri FDLR.

    Ubu buzima bwagize ingaruka nyinshi kuri Nahimana dore ko niyo yabeshyaga ngo ari kwigisha mu Kiliziya yajyaga abigarukaho.
    Ari mu Iseminari Nkuru nk'abandi ba Faratiri bose, yaruhukiraga muri Paruwasi ya Mwezi, aho Padiri Mukuru buri gihe yamutangagaho raporo yo gushurashura abana b'abakobwa cyane cyane abangavu bazaga mu bikorwa bya Paruwasi nko gukora isuku mu Kiliziya, abitabiriye imiryango y'urubyiruko n'abandi. Aha yabashije gutera bamwe mu bakobwa inda ataraba Padiri ariko akabashukisha udufaranga bagaceceka. Ubu abenshi ngo niyo bamusabye indezo abatera ubwoba, bityo tukaba tudashaka gutangaza amazina yabo.

    Amaze kuba Padiri, Nahimana yabaye mu iseminari ya Cyangugu yitiriwe Mutagatifu Aloys nyuma yo kuva muri Paruwasi ya Mwezi; mu iseminari yahasanze undi mupadiri ugendera ku matwara ya Hutu-Pawa, Fortunatus Rudakemwa aho bahinduye Seminari ya Cyangugu indiri ya CDR. Abana mbarwa bari bararokotse Jenoside bahigaga, babaye nk'abari mu menyo y'intare bibona bisanze mbere ya 1994. Inzego z'ubuyobozi zarabibonye n'ubwo byakorwaga mu ibanga; Padiri Nahimana na Rudakemwa bakundaga kumvisha abaseminari BBC Gahuzamiryango cyane cyane igihe havugwaga gusohoka kw'icyegeranyo cy'ingirwamucamanza Bruguiere, bagashishikariza abana kwitabira politike. Muri iyo ngengabitekerezo ya Hutu Powa bigishaga abana, umwana umwe yateguye ikiganiro cyitwa 'la mauvaise gouvernance qui règne au Rwanda' bisobanuye 'imiyoborere mibi iri mu Rwanda' akiganiriza abandi bana bagenzi babo Nahimana na Rudakemwa nabo bahari.

    Byazamuye umwuka mubi muba Seminari bagiye kurwana, n'uko ubuyobozi burahagera bukuriwe n'uwari Perefe wa Cyangugu icyo gihe Musa Fazil Harerimana, abakuru b'ingabo na Polisi ndetse na Musenyeri wa Cyangugu, Nyakwigendera Bimenyimana Jean Damascene. Nyuma y'inama Rudakemwa na Nahimana baje gusaka abana bitaga inkotanyi bitwaje ko bari gusaka telephone bakoresheje ngo bahamagare ubuyobozi.

    Abo bapadiri baje kwamaganwa ku mugaragaro maze Nahimana yimurirwa muri Paruwasi ya Muyange aho yaje gukora agashya agatera inda umukobwa arangije amutsindagira murumuna we wo kwa Se wabo ngo ara mu murambagirije, nyuma riko umusore amenya amakuru ko atwite inda ya Padiri abivamo. Nahimana Thomas ahita acikira iburayi agenda acucuye umutungo wose wa Paruwasi Muyange, Musenyeri atabizi maze ageze iburayi yihomora kuri Musenyeri aramutuka koko amubwira ko yamuteje abasirikari n'abapolisi none ngo yageze iburayi nta ruhare abigizemo.

    Nahimana kandi akiri mu Rwanda, ibiro bishinzwe abinjira n'abasohoka byaramufashe biramufunga, Musenyeri Bimenyimana niwe waje bumva ikibazo cye arafungurwa aho yagiye mu bikorwa bye byo gusambana I Bukavu muri Kongo, noneho kuko yari mu murenge wa Nyabitekeri akoresha ubwato buto agera ku Ijwi afata ubwato bunini ajya Bukavu; Nahimana mu bucucu bwe arangije kubonana n'umugore I Bukavu agaruka mu Rwanda akoresheje umupaka wa Rusizi, atanze Pasiporo ye, bigaragara ko ari kwinjira ariko ko bitagaragara ko yasohotse bityo ko yasohotse igihugu ku buryo butemewe n'amategeko. Nibwo bamufunze bamukoresha inyandikomvugo, asaba imbabazi, Musenyeri Bimenyimana wari waragowe aramucyura, dore ko abapadiri ari abana ba Musenyeri.

    Tugarutse rero kuri uyu mu Padiri nako ingirwa mu Padiri Nahimana ageze iburayi muri France nyuma yo kwandagaza Musenyeri Bimenyimana, yaje kujya muri Paroisse imwe ya Notre Dame de la Pointe de Caux, kuvuga ko ari umupadiri ko bamwakira akavuga ubutumwa; yagiyeyo ari nka Padiri kandi abana n'umugore we uzwi ku izina rya Maman Ritha n'umukobwa we Ritha. Iyo Paruwasi yamwibukijeko amategeko ya Kiliziya aruko kwerekana ikarita y'ubupadiri (Celebret) gusa bidahagijeko agomba kuzana ibaruwa iriho umukono wa Musenyeri waho yavugaga ubutumwa. Nahimana umusatsi wamuvuyeho yibutse ibitutsi yatutse Musenyeri, nuko aramuhamagara kuko ntakundi, yari kubigenza amusaba imbabazi, amwibutsa ko ari umuhungu we, anamwibutsa umugani w'umwana w'ikirara……Musenyeri Bimenyimana yabanje kumwihorera, ariko amakuru agera kuri Rushyashya, avugako Nahimana yakomeje gutakamba aho mu gihe cy'imyaka ibiri yandikiye Musenyeri Bimenyimana amabaruwa agera muri magana abiri asaba imbabazi kuko niwo mugati wonyine yarasigaranye.

    Musenyeri Bimenyimana nk'umubyeyi yaje kumwoherereza ibaruwa (Recommendation letter) ariko ataziko ayoherereje umugabo ubana n'umugore. N'uko ajya muri Paruwasi yavuzwe ruguru aba Padiri kandi afite n'urugo.
    Nahimana yirirwa atuka uwari Padiri mukuru Ubald Rugirangoga kuko banabanye agihabwa ubupadiri, muri Paruwasi ya Mwezi ariko icyo amwangira cyane n'uko Padiri Ubald yamaganye kumugaragaro Nahimna ubwo yafataga inzira akajya Arusha gushinjura Interahamwe Yussuf Munyakazi wayoboye ubwicanyi muri Cyangugu, akaba arinawe wazanye Interahamwe zivuye Gisenyi na Cyangugu kurimbura Abatutsi mu Bisesero bari bagerageje kwirwanaho.

    Nahimana yashinjuye Yussuf Munyakazi ariko urukiko rw'Arusha TPIR rumukatira imyaka 25. Padiri Ubald azwiho kutihanganira amafuti ndetse no kwimakaza ubumwe n'ubwiyunge mu bakirisitu bishingiye mu kubabarira.
    Nahimana Thomas ntabwo ari ugukunda abagore gusa kuko abo yambuye mu Bubiligi nibo bavuga ko abonye aho ijipo yanitse, yayitwara. Nahimana yaje kujya mu bya politiki kugirango anyunyuze imitsi yabo abeshya. By'umwihariko ubwo yabeshyaga ko aje kuba Perezida, nyamara abizi ko ari ikinamico ngo yambure abantu, yambuye abitwa Niwenshuti Ladislas ukora ubucuruzi bwo kuguriza amafaranga kuburyo butemewe (Bank Lambert) mu Bubiligi, Zena Mukabuduwe, Simeon Musabyimana, Interahamwe yo ku rwego rwo hejuru yatorotse Gacaca I Kanombe n'abandi. Ubu rero yababwiye ko yari yizeye ko nagera mu Rwanda abazungu bazamuha amafaranga akabishyura none amaso yabo yambuye yaheze mu kirere.

    Ubundi abazi neza Nahimana Thomas, bemeza ko batazi neza umubare w'abana afite ariko abagore bamenyekanye hanze y'igihugu ni batanu udashyizemo abo babyaranye mu Rwanda; muri abo harimo Kwitonda Marie Claire, Jeanne Mukamurenzi, Chantal Mutega n'abandi….. Mu Rwanda ho mu bagore babashije kubyarana twabashije kumenya ni Mukantagwabira Marthe bakaba bafitanye umwana w'umusore w'umuhungu.

    Politiki Nahimana abeshya ko akora, ni politiki y'ivangura n'amakimbirane nk'uko bigaragara mu biganiro yagiye akora, aho ashishikariza abandi gukoresha imbaraga zigamije gukuraho ubutegetsi bwa Kigali (Violence). Abenshi mu bakurikiye amagambo yagiye avuga nk'ukuriye Ishema Party, avuga amagambo neza ameze nka ya Ngeze Hassan ngo 'abahutu ni ibicucu…baritinya…ntibashyira hamwe….'

    Nahimana kandi akomeza avuga ko u Rwanda ruyobowe n'abagande.! Mu gice cya kabiri cy'iyi nkuru, tuzabagezaho isesengura ry'amagambo abiba urwango, Nahimana yagiye atangaza, binyuze mu Kinyamakuru cye Le Prophete, ndetse no kuri YouTube.

    The post Nyuma yo gucuruza imva kuri internet, ikiryabarezi Thomas Nahimana cyiyemeje gutanga pasiporo z'ibicupuri appeared first on RUSHYASHYA.

    Source : https://rushyashya.net/nyuma-yo-gucuruza-imva-kuri-internet-ikiryabarezi-thomas-nahimana-cyiyemeje-gutanga-pasiporo-zibicupuri/?utm_source=rss&utm_medium=rss&utm_campaign=nyuma-yo-gucuruza-imva-kuri-internet-ikiryabarezi-thomas-nahimana-cyiyemeje-gutanga-pasiporo-zibicupuri

  • Icyegeranyo cy'itsinda ry'impuguke za Loni kirashinja igisirikari cya Kongo kwica, gusahura abaturage no gusambanya abagore ku ngufu. Nta ruhare rw'u Rwanda mu bibera muri Kongo rwagaragajwe. #rwanda #RwOT

    Ni icyegeranyo Rushyashya yashoboye kubonera kopi, cyamaze gushyikirizwa akanama ka Loni gashinzwe amahoro n'umutekano ku isi, gishyirwaho umukono n'impuguke 6 zigize itsinda ryakoze iperereza, zirimo Madamu Virginie MONCHY wari umuhuzabikorwa waryo.

    Ni icyegeranyo cyibanze cyane cyane ku mezi asaga 11 hagiyeho iteka rya Perezida Félix Tshisekedi, rishyiraho 'ibihe bidasanzwe'(état de siège) mu Ntara za Kivu y'Amajyaruguru, iy'Amajyaruguru na Ituri, mu burasirazuba bwa bwa Repubulika Iharanira Demokarasi ya Kongo.

    Umuzingo w'impapuro 301 uragaruka ku mutekano mucye muri Kivu y'Amajyaruguru, Kivu y'Amajyepfo na Ituri, watewe n'ingabo za Kongo, FARDC, ubwazo, n'imitwe yitwaje intwaro, irimo FDLR-FOCA, ADF, CODECO, Mai-Mai/Nyatura, Mai-Mai/Yakutumba, n'indi myinshi itabarika.

    Nubwo hashyizweho amategeko yo mu 'bihe bidasanzwe' ngo yari agamije kugarura umutekano mu ntara z'uburasirazuba bwa Kongo, iki cyegeranyo gisobanura neza uburyo ingabo za FARDC zishe abaturage benshi zibaroshyeho ibisasu bya rutura, cyane cyane ubwo intambaza zirwana n'umutwe wa M23 yuburaga, kuva mu mpera z'umwaka wa 2021, n'ubu ikaba ica ibintu.

    FARDC kandi ngo yasambanyije abagore ku ngufu nko muri Teritwari ya DJUGU, inasahura imitungo y'abaturage. Abasirikari bakuru benshi, nka Col Charles Muhinda santos, umuyobozi wa batayo ya 13011 na 13012, bagurishije intwaro n'amabuye y'agaciro mu mitwe y'iterabwoba, nyamara FARDC yagombye kuba irwanya. Amatariki yakoreweho ubu bugizi bwa nabi, amazina y'ababugizemo uruhare, aho bwabereye n'ababukorewe, biragaragara cyane cyane ku mpapuro za 28, 30, 31, 32 na 33 z'iki cyegeranyo.

    Abandi bagarutsweho muri iki cyegeranyo ni abajenosideri bo mu mutwe w'iterabwoba wa FDLR, aho byagaragajwe ko mu myaka ya mbere ya 2020 uyu mutwe wari warashegeshwe n'ibitero bya FARDC, nyamara kuva muw'2021 ukaba wariyuburuye. Ngo wongeye kubona intwaro, ndetse ukaba ukomeje kwinjiza abarwanyi bava mu bihugu byo muri aka karere. Itsinda ry'impuguke za Loni zirerekana uburyo muri FDLR bakomeje kwisuganya, babifashijwemo n'ubucuruzi bunyuranyije n'amategeko, ubucukuzi bw'amabuye y'agaciro butemewe, n'inkunga bahabwa n'igisirikari cya Kongo. Magingo aya Gaston Iyamuremye wiyise Victor Byiringiro alias Rumuli niwe Perezida wa FDLR-FOCA, kandi nyamara yarafatiwe ibihano ku rwego mpuzamahanga. Yasimbuye kuri uwo mwanya Ignace Murwanashyaka wapfiriye mu Budage muw'2019.

    Ntawunguka Pacifique bita 'Omega' niwe wasimbuye ku buyobozi bwa gisirikari Sylvèstre Mdacumura wishwe. Ntawunguka, nawe wafatiwe ibihano, ubu yungirijwe na Jean-Baptiste Gakwerere bita 'Julius Mkobo', 'Sobo Stany' cyangwa 'Kolomboka', umwicanyi kabuhariwe.

    Ikindi cyatunzwe agatoki ni ingabo za Uganda n'iz'uBurundi zinjiye ku butaka bwa Kongo akanama ka Loni gashinzwe amahoro ku isi kakaza kubimenyeshwa zaratangiye kurwanira yo.Ibi rero ngo ni amakosa akomeye, kuko ubundi ingabo z'igihugu runaka zigomba kubimenyesha ako kanama mbere yo kwinjira mu kindi gihugu, kabone n'iyo ibyo bihugu byombi byaba bifitanye amasezerano mu bya gisirikari.

    Muri iki cyegeranyo nta hantu na hamwe bavuga uruhare rw'uRwanda mu bibazo by'umutekano muri Repubulika iharanira Demokarasi ya Kongo, mu gihe nyamara ubutegetsi bwa Kongo budasiba kuvuza induru bubesha ko uRwanda ari rwo ruri inyuma y'ibitero bya M23. Aha twibutse ko n'ingabo za Loni ziri muri Kongo, MONUSCO, ziherutse kuvuga ko nta kimenyetso na kimwe gishimangira ibirego by'icyo gihugu. Inama y'Abakuru b'Ibihugu by'Umuryango w'Afrika y'Uburasirazuba yateraniye i Nairobi muri Kenya kuwa mbere ushize, nayo ntiyagaragaje ngo inamagane uruhare rw'uRwanda mu ntambara FADRC irwana na M23.

    Mu myanzuro y'iki cyegeranyo, itsinda ry'impuguke za Loni zisoza zisaba Leta ya Kongo gushyira mu bikorwa amasezerano anyuranye agamije kugarura amahoro muri icyo gihugu, harimo n'aya Nairobi, iyo Leta yagiranye n'umutwe wa M23. Ubutegetsi bwa Kongo kandi burasabwa kuvugurura igisirikari cy'icyo gihugu, FARDC, kigahabwa ubumenyi, disipuline n'ibikoresho byagifasha gukora kinyamwuga. Ibihugu byo muri aka karere byongeye gusabwa kugira uruhare mu kugarura amahoro muri Kongo no mu karere muri rusange, bikagenzura ko nta bantu babivamo bajya mu mitwe y'itwaje intwaro iri mu Burasirazuba bwa Kongo.

    The post Icyegeranyo cy'itsinda ry'impuguke za Loni kirashinja igisirikari cya Kongo kwica, gusahura abaturage no gusambanya abagore ku ngufu. Nta ruhare rw'u Rwanda mu bibera muri Kongo rwagaragajwe. appeared first on RUSHYASHYA.

    Source : https://rushyashya.net/icyegeranyo-cyitsinda-ryimpuguke-za-loni-kirashinja-igisirikari-cya-kongo-kwica-gusahura-abaturage-no-gusambanya-abagore-ku-ngufu-nta-ruhare-rwu-rwanda-mu-bibera-muri-kong/?utm_source=rss&utm_medium=rss&utm_campaign=icyegeranyo-cyitsinda-ryimpuguke-za-loni-kirashinja-igisirikari-cya-kongo-kwica-gusahura-abaturage-no-gusambanya-abagore-ku-ngufu-nta-ruhare-rwu-rwanda-mu-bibera-muri-kong

  • Patricia Scotland yongeye gutorerwa kuba Umun… – #rwanda #RwOT

    Mu 2016 nibwo Patricia Scotland yari yatorewe kuyobora umuryango wa Commonwealth muri manda yagombaga kumara imyaka 4, ariko bitewe n'icyorezo cya COVID19 cyatumye akomeza kuyobora uyu muryango.

    Nk'uko byari biteganijwe, hagombaga kuba amatora y'Umunyamabanga Mukuru wa Commonwealth aho mu bahabwaga amahirwe yarimo [Patricia Scotland], hakabamo na Minisitiri w'Ububanyi n'Amahanga wa Jamaica, Madamu Kamina J Smith.

    Amakuru agezweho nyuma y'amatora yabaye mu masaha ashize, Patricia Scotlanda akaba yatorewe indi manda ikaba ari nayo ya nyuma muzo yemerewe, ikaba ari manda yindi y'imyaka 4.

    Patricia Scotland yongeye gutorerwa kuba Umunyamabanga Mukuru wa Commonwealth


    Source : https://inyarwanda.com/inkuru/118439/patricia-scotland-yongeye-gutorerwa-kuba-umunyamabanga-wa-commonwealth-118439.html