Webrwanda Backend

Blog

  • Perezida Kagame yayoboye inama y’Abaminisitiri #Rwanda #RwOT via @kigalitoday #rwanda #RwOT

    Perezida Paul Kagame, kuri uyu wa Kane tariki 08 Nzeri 2022, yayoboye inama y’Abaminisitiri yateraniye muri Village Urugwiro, haganirwa ku ngingo (…)

    Source : https://www.kigalitoday.com/amakuru/amakuru-mu-rwanda/article/perezida-kagame-yayoboye-inama-y-abaminisitiri-59002

  • Onana yafashije Rayon Sports kugumana icyubahiro kuri Police FC #rwanda #RwOT

    Rayon Sports yabonye amanota 3 bigoranye nyuma yo gutsinda Police FC igitego 1-0 mu mukino wabereye kuri stade ya Kigali.

    Rayon Sports yatsinze iki gitego ku munota wa 79 bigoranye,nyuma y'ishoti rutahizamu Essomba Willy Onana yatereye inyuma y'urubuga rw'amahina aroba umunyezamu Habarurema Gahungu wari uhagaze nabi.

    Muri uyu mukinoPolice FC ni yo yabonye amahirwe ya mbere akomeye ku mupira Danny Usengimana yacomekewe agacika ubwugarizi bwa Rayon Sports ariko umunyezamu Kabwili akawumutanga.

    Ku munota wa 35 Musa Esenu yahushije uburyo bukomeye ku mupira yacomekewe na Paul Were mu rubuga rw'amahina ariko myugariro Moussa Omar arawumutanga.

    Rayon Sports yashoboraga kurangiza igice cya mbere iyoboye ariko umutwe Onana yateye awuherejwe na Paul Were ku munota wa 40 wakuwemo n'umunyezamu Gahungu.Igice cya mbere cyarangiye ari 0-0.

    Ku munota wa 66 Rwatubyaye Abdul yarokoye ikipe ya Rayon Sports ku mupira Sibomana Patrick yazamukanye awuha Rutanga nawe awuha Zidane ariko ateye mu izamu Rwatubyaye Abdul aritambika awukuramo.

    Ku munota wa 75,Police FC yahushije igitego cyabazwe ubwo rutahizamu Sibomana Patrick yasigaga ab'iny'uma ba Rayon Sports atera mu izamu umupira ugarurwa n'igiti cy'izamu.

    Andre Onana yahagurukije abafana ba Rayon Sports bari baje ku bwinshi ku munota wa 79 ubwo yaherezwaga umupira na Arsene arawufunga,acenga myugariro wa Police FC abona Gahungu yasohotse niko guhita amuroba.

    Police FC n'imwe mu makipe Rayon Sports ishobora cyane kuko mu mikino 15 iheruka guhuza aya makipe mu myaka 7 iheruka, Rayon Sports yatsinzemo 8, Police FC itsindamo 2 banganya 2.

    Police FC nta nota na rimwe irabona muri shampiyona kuko mu mikino 2 imaze gukina yaratsinzwe.

    Umukino w'umunsi wa mbere yatsinzwe na Sunrise FC 1-0, ni mu gihe Rayon Sports yari yatsinze Rutsiro FC 2-1.

    Source : https://umuryango.rw/imyidagaduro/imikino/article/onana-yafashije-rayon-sports-gutsinda-police-fc

  • ITANGAZO RYA CYAMUNARA YUMUTUNGO UTIMUKANWA – #rwanda #RwOT

    MU RWEGO RWO GUSHYIRA MU BIKORWA ICYEMEZO CY'UMWANDITSI MUKURU CYO KUGURISHA INGWATE CYO KUWA 28/07/2022, ORG (MORTGAGED PROPERTY) – O22081063 KUGIRA NGO HISHYURWE UMWENDA UMUKIRIYA ABEREYEMO BANKI.

    UWASHINZWE KUGURISHA INGWATE Me UMULISA Josephine ARAMENYESHA ABANTU BOSE KO AZAGURISHA MURI CYAMUNARA KU NSHURO YA 3 ARI NAYO YA NYUMA.

    BINYUZE MU BURYO BW'IKORANABUHANGA UMUTUNGO UTIMUKANWA UGIZWE N'UBUTAKA BURIMO INZU IGERETSE RIMWE UFITE UPI: 1/03/08/03/5943 UHEREREYE MU MUDUGUDU WA REBERO, MU KAGARI KA GAKO, UMURENGE WA MASAKA, AKARERE KA KICUKIRO, MU MUJYI WA KIGALI. 

    INGENGABIHE Y'UBURYO  CYAMUNARA ZIZAKURIKIRANA MU BURYO BW’IKORANABUHANGA.

    3. Kuva 10/09 kugeza 17/09 2022 Saa Sita (12h00) 

    UWO MUTUNGO UTIMUKANWA UFITE UBUSO BUNGANA NA 304 SQM UFITE AGACIRO 

    FATIZO KANGANA NA 154,719,000 Frw BITYO INGWATE Y'IPIGANWA YA 5% INGANA NA 7,735,950 Frw ISHYIRWA KURI KONTI 00040-06965754-29 IRI MURI BANKI YA KIGALI (B.K) YANDITSE KURI MINIJUST AUCTION FUNDS ICUNGWA NA MINISITERI Y'UBUTABERA.

    USHAKA GUPIGANWA ATANGA IBICIRO BINYUZE MUBURYO BW'IKORANABUHANGA KURI www.cyamunara.gov.rw ARI NAHO MUSANGA IFOTO Y'UMUTUNGO 

    UZATSINDIRA UMUTUNGO AZISHYURA KURI KONTI YA UMULISA JOSEPHINE NO 01720640005 IRI MURI BANK OF AFRICA Rwanda Plc.

    GUSURA UWO MUTUNGO BIKORWA IMINSI YOSE.

    ABIFUZA IBINDI BISOBANURO BABAZA KURI NOMERO ZA TELEFONE IGENDANWA ZIKURIKIRA: 0787329840

    BIKOREWE I KIGALI KU WA: 08/09/2022  

    UWASHINZWE KUGURISHA INGWATE 

    Me UMULISA Josephine.

               

    Source : https://inyarwanda.com/inkuru/120791/itangazo-rya-cyamunara-yumutungo-utimukanwa-120791.html

  • Umwamikazi w'u Bwongereza yatanze #rwanda #RwOT

    Umwamikazi w'u Bwongereza, Elizabeth II, yatanze kuri uyu wa Kane tariki ya 08 Nzeri 2022, ku myaka 96 y'amavuko.Yari amaze imyaka 70 ku ngoma.

    Umwamikazi yimye ingoma mu 1952 kandi yiboneye impinduka nyinshi mu mibereho y'abantu.

    Nyuma y'urupfu rwe, umuhungu we w'imfura Charles, wahoze ari igikomangoma cya Wales, azayobora igihugu mu cyunamo nk'umwami mushya.

    Mu ijambo rye, Nyiricyubahiro Umwami yagize ati: “Urupfu rwa mama nkunda Nyiricyubahiro Umwamikazi, ni akababaro gakomeye kuri njye no ku bagize umuryango wanjye bose

    …… Nzi ko igihombo cye kiragera mu gihugu hose, mu Bwami no muri Commonwealth, ndetse ku bantu batabarika ku isi.”

    Ingoro ya Buckingham yasohoye itangazo rigira riti: “Umwamikazi yatanze mu mahoro i Balmoral kuri iki gicamunsi.

    Abana b'umwamikazi bose bagiye i Balmoral, hafi ya Aberdeen, ubwo abaganga bari bamaze gushyira umwamikazi mu kumwitaho byihariye.

    Mu masaha y'igitondo, nibwo byatangiye kuvugwa ko ubuzima bwe buhangayikishije cyane. Minisitiri w'Intebe, Liz Truss, yatangaje ko igihugu cyose gihangayikishijwe n'amakuru aza guturuka ibwami.

    Kuva muri Nyakanga ubuzima bw'Umwamikazi Elizabeth II ntibwari bumeze neza ku buryo byavugagwa ko yatakaje ibiro byinshi, kubera uburwayi bufitanye isano n'izabukuru.

    Umwamikazi Elizabeth yatangiye mu gace ka Balmoral muri Ecosse, hamwe mu hantu yakundaga cyane ndetse yajyaga kuruhukira mu mpeshyi.

    Source : https://umuryango.rw/amakuru/mu-mahanga/ubuzima/article/umwamikazi-w-u-bwongereza-yatanze

  • Itangazo: KAMAGAJU MUNYANEZA Constance yasabye guhindura amazina akitwa SHUMBUSHO Constance #rwanda #RwOT

    Uwitwa KAMAGAJU MUNYANEZA Constance yasabye guhindura amazina mu buryo bwemewe n'amategeko akitwa SHUMBUSHO Constance mu bitabo by'irangamimerere.

    Impamvu atanga zituma asaba guhindura amazina akaba ari uko ari amazina ari kuri Passport.

    Ingingo z'ingenzi yashingiyeho asaba inzego zibishinzwe guhindura amazina zikaba ziri hano hasi:

    Source : https://umuryango.rw/amatangazo/article/itangazo-kamagaju-munyaneza-constance-yasabye-guhindura-amazina-akitwa

  • Amateka y'Umwamikazi Elizabeth II waciye agahigo ku kuramba ku ngoma #rwanda #RwOT

    Umwamikazi Elizabeth II, wari urambye ku ngoma kurusha abandi mu mateka y'Ubwongereza, yatangiye I Balmoral ku myaka 96, nyuma yo kumara ku ngoma imyaka 70.

    Elizabeth II watanze kuri uyu wa Kane tariki ya 08 Nzeri 2022,yari Umwamikazi wa kabiri w'Ubwami bw'u Bwongereza (United Kingdom), bugizwe n'ibihugu bine: England, Scotland, Wales na Northern Ireland.

    Amazina ye yose ni Elizabeth Alexandra Mary Windsor, yavutse ku itariki 21 Mata 1926. Usibye kuba umwamikazi w'Ubwami bw'u Bwongereza, ni n'umwamikazi w'ibihugu 14 bihuriye ku rurimi rw'Icyongereza mu muryango wa Commonwealth, birimo ikitwa Antigua and Barbuda, Australia, The Bahamas, Belize, Canada, Grenada, Jamaica, New Zealand, Papua New Guinea, Saint Kitts and Nevis, Saint Lucia, Saint Vincent and the Grenadines, ibirwa bya Solomon n'igihugu kitwa Tuvalu.

    Elizabeth wa 2 yavukiye ahitwa Mayfair, London mu Bwongereza, avuka ari umwana wa mbere w'abatware b'umujyi wa York, ni ukuvuga Duke na Duchess (ariko nyuma baje kuba umwami n'umwamikazi (George wa 6 na Elizabeth), byumvikana ko Elizabeth wa 2 yitiranwa na nyina.

    Ise wa Elizabeth (George wa 6), yimye ingoma mu 1936, nyuma y'uko umuvandimwe we Edward wa 3 yeguye, bityo Elizabeth nk'umwana w'impfura yegukana inshingano zo kuzasimbura se.

    Elizabeth yaherewe amasomo yose mu rugo iwabo, atangira kujya mu mirimo y'igihugu mu gihe cy'intambara ya kabiri y'isi yose, ari umwe mu bari bagize icyo bitaga Auxiliary Territorial Service (ishami ry'igisirikare cy'i bwami), ryabagamo abakorerabushake b'abagore.

    Mu Gushyingo 1947, Elizabeth yashakanye na Philip Mountbatten, wari Igikomangoma cy'u Bugereki na Denmark ataraba Umutware w'umujyi wa Edinburgh, bamarana imyaka 73, ni ukuvuga kugeza Philip atabarutse muri 2021, amusigira abana bane, abahungu batatu n'umukobwa umwe. Aribo Charles (Igikomangoma cya Wales); Anne; Prince Andrew, uyobora umujyi wa York na Prince Edward, wari umutware w'igihugu kitwaga Earl of Wessex, hatarabaho ukwihuza kw'ibihugu bigize Ubwami bw'u Bwongereza.

    Elizabeth yimye ingoma muri Gashyantare 1952 ise George wa 6 amaze gutanga, ni uko ku myaka 25 Elizabeth ahabwa ububasha bwo kuyobora ibihugu birindwi byigenga, biri mu muryango wa Commonwealth ari byo: Ubwami bw'u Bwongereza, Canada, Australia, New Zealand, South Africa, Pakistan, n'igihugu cyitwaga Ceylon (Sri Lanka), ndetse ahita agirwa n'Umuyobozi wa Commonwealth.

    Elizabeth II, ku myaka 70 ku ngoma, ni we mwamikazi w'u Bwongereza wari umaze igihe kirekire mu buzima no ku ngoma, ni na we mukuru w'igihugu w'umugore mu mateka umaze igihe kirekire ku buyobozi no mu buzima.

    Uwa hafi ugereranywa nawe ni umwamikazi Victoria wategetse imyaka 63 (1837 – 1901), naho ku rwego rw'amahanga ntabwo ari kure cyane y'umwami Louis XIV w'Ubufaransa wategetse imyaka 72.

    Ku myaka 96 ni umwihariko we mu bami n'abamikazi b'Ubwongereza. Elizabeth II ni umwe mu bongereza 138,000 bagize hejuru y'imyaka 95, kandi benshi muri aba ni abagore.

    Uretse Elizabeth II, abandi bami babiri gusa nibo barengeje imyaka 80 y'amavuko, abo ni Victoria na George III. Nta wundi mwami w'Ubwongereza wari ku ngoma ari mu myaka 90.

    Tariki 06 Gashyantare(2) nibwo Elizabeth II yujuje imyaka 70 ari ku ngoma,hanyuma akorerwa ibirori bidasanzwe.

    Ingoma y'Umwamikazi Elizabeth II yabonye ibihe bitandukanye birimo iby'intambara, guhinduka k'ubwami (Empire) hakaza Commonwealth, kurangira kw'intambara iteruye izwi nka Guerre Froide/Cold War hamwe no kwinjira k'Ubwongereza — no kuva kwabwo — mu Ishirahamwe ry'Uburayi.

    Ingoma ye yabayemo Abaminisitiri b'Intebe 15 guhera kuri Winston Churchill, wavutse mu 1874, hamwe na Liz Truss, wavutse imyaka 101 nyuma mu 1975, akaba yarahuye n'Umwamikazi mu ntangiriro z'iki cyumweru.

    Ku ngoro ya Buckingham Palace i London,abantu benshi bari barindiye kumenya amakuru y'Umwamikazi bahise barira cyane bamaze kumenya inkuru y'urupfu rwe.

    Nyuma yo gutanga k'umwamikazi, umuhungu we w'imfura,Prince Charles,wahoze ayoboye Wales, azayobora umuhango wo kumwunamira nk'Umwami mushya akaba n'umukuru w'amaleta 14 y'umuryango wa Commonwealth.

    Source : https://umuryango.rw/amakuru/mu-mahanga/ubuzima/article/ibyaranze-ubuzima-bw-umwamikazi-elizabeth-ii-waciye-agahigo-ku-kuramba-ku-ngoma

  • Umwamikazi wu Bwongereza yatanze ku myaka 96 – #rwanda #RwOT

    Umwamikazi Elisabeth II yitabye Imana nyuma ho umwaka avuye mu bitaro ubuzima bwe butameze neza, ku moamvu zitigeze zitangazwa.

    Amakuru yatambutse kare mu bitangazamakuru binyuranye, yavugaga ko umuryango we wari umuri hafi aho yari arwariye i Balmoral muri Scotland. Umuhungu we mukuru, Prince Charles, niwe wahise amuzungura, aba umwami.

    Umwamikazi Elisabeth II Imana imuhe iruhuko ridashira.

    Source : https://inyarwanda.com/inkuru/120786/umwamikazi-wu-bwongereza-yatanze-ku-myaka-96-120786.html

  • Amashyari ni menshi muri Showbiz – Sedy Djano… – #rwanda #RwOT

    Sedy Djano ari mu bagize uruhare mu kumenyekanisha no kuzamura impano z’abagabo batatu Peter, Paul na Andrea aho yabahurije muri filime y’uruhererekane yitwa “Twitonze” yatangiye gusohoka muri Kamena 2020. Ni filime yakozwe binyuze muri “Be Kind Family” umuryango watangijwe ukora ibikorwa by’ubugiraneza watangijwe n’uyu muhanzi.

    Mu muziki, azwi mu ndirimbo zitandukanye zirimo “Be Kind” yakoranye n’abahanzi b’ibyamamare mu muziki nyarwanda ari bo Riderman na Social Mula ndetse na “Don’t judge me” yakoranye na Uncle Austin. Izindi ndirimbo ze harimo; “Ntabe ari njye” yakoranye na Serge Iyamuremye na “Turagushima” yakoranye na Gikundiro, Kadogo na Mussa.

    Nyuma y’imyaka ibiri yari amaze adashyira hanze indirimbo nshya, Sedy Djano agarukanye iyo yise “Riratse” yifashishijemo umunyarwenya Rusine Patrick ugezweho muri iyi minsi. Ni indirimbo ikubiyemo ubuzima bukakaye abantu bacamo muri iyi minsi, ikaba yarashibutse ku nkuru ye mpamo.

    Sedy Djano agarutse mu muziki

    Sedy Djano yabwiye inyaRwanda ko impamvu yari acecetse mu gihe kingana n’imyaka ibiri “ni uko mu muziki nyarwanda nabonye tudashyigikirana, kuko abo wizeraga ko ari bo bagufata ukuboko muri uru rugendo, ahubwo ni bo bafata iya mbere mu kuguca kwa kuboko barwanya iterambere ryawe”.

    Yahishuye ko yagiriwe ishyari bimuca intege. Ati “Amashyari ni menshi muri Showbiz yacu. Rero mu myaka 2 ishize nari nyimaze mu gahinda ari nako nikoreshaga akanama. Ariko ubu nagarutse noneho n’imizigo ikubita irandurana n’imizi. Nta mpamvu yo gucika intege mu gihe Imana ikidutije iminsi yo kubaho. Ubu ndagarutse rero kandi ndi tayali gupambana mpaka ku ntsinzi”.

    Sedy Djano umuhanzi ukora umuziki usingiza Imana n’ufasha abantu mu buzima busanzwe akaba n’umushoramari muri cinema, yunzemo ati “Gusa tujye tuzirikana ko iyi si tuyirimo si yo iturimo, ejo umunsi wacu nugera tuzayivamo twigendere”.

    “Ese ni ibihe bikorwa byiza wifuza kuzasiga muri iyi si? Ubuse nanjye koko murashaka kuzumva ibihangano byanjye no gushaka kunshyigikira ntakiriho koko? Biteye agahinda, ab’isi ntitugikunda ibyiza”.

    Yavuze ku ntego afite nyuma yo kugaruka mu muziki, ati “Gusa njye ngarutse kuhashumikana ibyiza! Waba unzi cyangwa utari wamenya, nyarukira kuri YouTube yanjye wihere ijisho. Nuvayo, ukomeze imbere gato duhurire kuri Instagram yanjye @sedy_djano turusheho kumenyana ubundi tuhatwikire rimwe”.

    “Iyi ndirimbo irimo inyigisho zirenze pe, kutayumva ni uguhomba” Sedy avuga kuri iyi ndirimbo imugaruye mu muziki. Yavuze ko “ikubiyemo ubuzima bukakaye abantu duhura nabwo umunsi ku munsi, bwaba bwiza cyangwa bubi aho abenshi usanga twihiringa amanywa n’ijoro dushakisha amaramuko ariko mu nzira ducamo ntihaburemo undi muntu wifuza kuduhutaza”.

    Yagarutse ku masomo y’ubuzima ari mu ndirimbo ye, ati “Rero muri iyi ndirimbo hakubiyemo inyigisho zidukangurira kudacika intege mu buzima, kudahutaza undi muntu uwariwe wese kuko ejo arashobora kubariwe ukugoboka”.

    Ati: “Guha agaciro ikiremwa muntu muri rusange utarobanuye ku butoni kuko uyu munsi ushobora kunyima akazi, nyamara mu myaka 5 cyangwa 10 iri imbere tugahura warakubiswe njye meze neza ukifuza ubufasha bwanjye. Rero iyi si ntisakaye uyirimo wese yanyagirwa”.

    Yavuze ko impamvu yahisemo gukoresha Rusine “ni uko ari umuntu uzi neza ingorane z’ubuzima, ndetse n’ubuzima bwe hakaba hari aho buhuriye n’iyi ndirimbo “Riratse”. Ati “Ni ni umu ‘Actor’ mwiza ushoboye ndetse nkunda cyane. Aca bugufi, ni inyangamugayo anaha agaciro buri umwe wese”.

    Asoza avuga ko “Riratse’ isubizamo abantu ibyiringiro. Ati “Uyu munsi ushobora kuba uri mu mwijima w’icuraburindi, ariko humura kuko Itara rigiye kukwakira nawe ku mutima wawe habe umucyo. Gusa, ubuzima nibuduhira, ntitukibagirwe aho twavuye ngo tumere nka ba bandi usanga babayeho nk’abatazapfa aho usanga umuntu ari umuhemu ukibaza ikibumutera ukakibura”.

    “Ugasanga umuntu agufitiye ishyari ntacyo mupfa. Undi ukamusaba akazi agafite akakakwima. Umuherwe ugasanga aramena ibyo kurya, umuturanyi we amaze kabiri atarya, umutindi waje amusaba akamwirukana nabi ari nako amutuka, anamuvuma. Ariko igitangaje ni uko ejo iyo muhuye ikarita yarihindurije, usigaye ubayeho neza, we yarakubiswe nibwo yibukako iyi si idasakaye. Let's be humble before this life humbles us!”.

    Ikinyamakuru cyo muri Amerika giherutse kumwandikaho inkuru y’uburyo ashyigikirana yisunze umuziki

    Sedy Djano yateguje izindi ndirimbo nshya

    Yahishuye ko ishyari ryo muri Showbiz ryamuciye intege

    Sedy Djano ni inshuti y’ibyamamare bitandukanye

    Ari mu bashyigikiye cyane impano za Peter, Paul na Andrea

    Rusine ni we wifashishijwe mu mashusho y’indirimbo nshya ya Sedy Djano

    REBA HANO INDIRIMBO NSHYA “RIRATSE” YA SEDY DJANO

    REBA HANO INDIRIMBO “BE KIND” YA SEDY DJANO FT RIDERMAN & SOCIAL MULA

    Source : https://inyarwanda.com/inkuru/120748/amashyari-ni-menshi-muri-showbiz-sedy-djano-agarukanye-indirimbo-riratse-yubuzima-bukakaye-120748.html

  • Rayon Sports yakamuye amanota 3 kuri Police F… – #rwanda #RwOT

    Ni umukino usoza umunsi wa 2 wa shampiyona wabereye kuri sitade ya Kigali i Nyamirambo, ku isaha ya saa 18:00. Umukino wagiye gutangira Police FC irwana no kudatsindwa umukino wa 2 ,mu gihe Rayon Sports yashakaga gushimangira ko umukino ikinira ku itara iba yageze i Bwami.

    Umukino ugitangira ku munota wa kabiri gusa, Musa Esenu yateye umupira ugana mu izamu uca hejuru gato urarenga. Bwari uburyo bwa mbere Rayon Sports ibonye bugana mu izamu. Ku munota wa 4 Police FC yabonye Koroneri yateye nabi, umuzamu arawufata.

    Mu minota 15 gusa byari bihagije kubona ko ubwugarizi bwa Rayon Sports butameze neza uhereye kuri Rwatubyaye Abdul wari ukinnye umukino we wa mbere muri Rayon Sports kuva yagaruka, ariko akaba yarimo kurangwa n’ubwumvikane bucye hagati ye na Ndizeye Samuel.


    Abakinnyi Rayon Sports yabanje mu kibuga

    Ramadhan Kabwiri
    Didier MUCYO
    Abdul RWATUBYAYE
    Samuel NDIZEYE
    Elie GANIJURU
    Eric Mbirizi
    Francois MUGISHA
    Blaise NISHIMWE
    Willy Onana
    Musa Esenu
    Paul Were

    Koroneri ya mbere Rayon Sports yayibonye ku munota wa 16 ariko ntiyagira icyo itanga. Ku munota wa 20 Danny Usengimana yavuye mu kibuga kubera ikibazo cy’imvune, hinjiramo Pappy Sibomana.

    Igice cya mbere cyenda kurangira, Rayon Sports yabonye Koroneri yatewe na Paul were umupira ushyirwa ku mutwe na Mucyo Didier Junior, umupira ugana mu izamu Gahungu awukuramo mu buryo bwari bugoye benshi kwemera. Umusifuzi yongeyeho iminota 2 y’inyongera itagize icyo itanga amakipe ajya kuruhuka anganya 0-0.

    Miggy arimo gukumbagurikana na Mbirizi Eric muri Koroneri 

    Igice cya kabiri cyatangiye Police FC ikora impinduka, Martin Fab ava mu kibuga hinjira ntirushwa Aime. Ku munota wa 63 Police FC yabonye koroneri yatewe na Rutanga Eric, umupira awuha Sibomana Patrick adafunze ahita atera mu izamu umupira Ramadhan Kabwiri awushyira hanze.

    Ntabwo Police FC yatuke kuko yakomeje gucungira ku mipira itungura, yaje kongera kotsa igitutu Rayon Sports ku mupira wazamukanwe na Sibomana Patrick awuhereza Rutanga Eric, nawe awuhereza Nsabimana Eric wahise atera ishoti rirerire umupira Rwatubyaye awukuramo umunyezamu yaguye ahandi.

    Abakinnyi Police FC yabanje mu kibuga

    Habarurema Gahungu
    Mugiraneza Jean Baptiste
    Rutanga Eric
    Moussa Omar
    Hakizimana Amani
    Nsabimana Eric
    Iyabivuze Osee
    Ndayishimiye Antoine Dominique
    Usengimana Danny
    Twizeyimana Martin Fabrice
    Nkubana Marc

    Ku munota wa 68 Rayon Sports yakoze impinduka  Nishimwe Blaise ava mu kibuga asimburwa na Patrick. Ku munota wa 75 Rayon Sports yongeye ikora impinduka, Tuyisenge Arsène asimbura Paul were naho Nkurunziza Félicien yinjira mu kibuga asimbuye Ganijuru Elie Ishimwe.

    Police FC yari ifite abafana bambaye impuzankano zisa inyuma yabo hari abandi ba Police.

    Bidatinze na Police FC yahise ikora impinduka ku munota wa 78, Nshuti Savio yinjira mu kibuga asimbuye Ndayishimiye Antoine. Ku munota wa 79 gusa ku mupira wa mbere Tuyisenge Arsène yari afashe yawuhereje Onana Essomba Willy wari mu kibuga hagati, areba uko umunyezamu wa Police FC yari ahagaze yohereza umupira muremure uruhukira mu izamu Rayon Sports iba ibonye igitego cya mbere.

    Nyuma y'aho Rayon Sports itsinze igitego, umukino watangiye gukinirwa mu kibuga hagati ndetse Police FC igashaka uburyo yakishyura ariko abakinnyi bo kubikora. Iminota 90 y’umukino yarangiye nta mpinduka zibaye, umusifuzi yongeraho iminota 4 nabwo biguma uko, umukino urangira Rayon Sports yongeye kubona amanota atatu yikurikiranya.

    Rayon Sports nk’ibisanzwe abafana bayo nabo bari babucyereye 

    Rayon Sports ibaye ikipe ya kabiri itsinze imikino 2 yikurikiranya, nyuma yo gutsinda Rutsiro FC ibitego 2-1 ku munsi wa mbere wa shampiyona. Kiyovu Sports niyo kipe yari yabikoze mbere ubwo yatsindaga Espoir FC igitego 1-0. Police FC ifite umutoza mushya Mashami Vincent imaze imikino ibiri idatsinda, nyuma y’umukino ufungura shampiyona yatsinzwe na Sunrise FC igitego 1-0.

    Nyuma y’umukino abatoza bagize icyo bavuga

    Umutoza Haringingo utoza Rayon Sports yavuze ko n’ubwo abonye amanota atatu ariko wari umukino wamugoye. Yagize ati” Ni umukino navuga ko wari ukomeye, kuko ikipe ya Police FC imenyereye shampiyona kandi yakoze impinduka nyinshi. Twabarushije kuguma mu mukino ariyo nayo mpamvu twaje kubona igitego kimwe, ariko muri rusange wari umukino ukomeye.”

    Ishoti rirerire rya Onana Gahungu yashatse kurwana naryo biranga

    Umupira wakubise mu izamu mu mbere ugaruka imbere ya Gahungu

    Umutoza Mashami Vincent utoza Police FC yavuze ko impamvu batsinzwe, babonye amahirwe bakayatakaza. Yagize ati ” Ngira ngo twatangiye dukora neza ku mpande zombi mwabibonye. Kuko twari twatakaje umukino ubanza twaje twifuza gutsinda ndetse tubona amahirwe yo gutsinda ariko tuyapfusha ubusa. Tutsinzwe igitego kubera ikosa abakinnyi banjye bakoze batakaje intego kandi umukinnyi nk’uriya nta kindi yagukorera.”

    Rayon Sports ubu iri ku mwanya wa 2 aho  inganya amanota na Kiyovu Sports, ariko ikayirusha ibitego izigamye. Police FC uburi iri ku mwanya wa 14 n’ubusa bw’inota aho ikurikorwa n’ikipe ya Rwamagana City na Marine FC nazo zitarabona inota.

    Onana Essomba Willy watsinze igitego atangiye urugendo rwavuyemo ishoti yateye Police FC 

    Rwatubyaye Abdul yongeye guhura na Mugiraneza Jean Baptiste baherukana mu Ikipe y’igihugu  

    Umukino wari witabiriwe n’ingeri zitandukanye 

    AMAFOTO: Ngabo Serge Mutuyimana 

    Source : https://inyarwanda.com/inkuru/120788/rayon-sports-yakamuye-amanota-3-kuri-police-fc-mu-mukino-wagapingane-amafoto-120788.html

  • Ngororero: Ba Mutimawurugo basabwe kudapfusha ubusa amahirwe bahawe #rwanda #RwOT

    Abagize Inama y'Igihugu y'Abagore mu Karere ka Ngororero basinyiye guhashya ibibazo bikibangamiye imibereho myiza y'abaturage, birimo kugira imiryango yo mu midugudu itarangwamo amakimbirane, umuryango utarangwamo imirire mibi n'igwingira, umuco w'isuku n'isukura ku isonga n'ibindi.

    Ni igikorwa cyabaye ejo hashize muri gahunda y'inama rusange isanzwe y'inama y'igihugu y'abagore ku rwego rw'Akarere ka Ngororero. Hasinywe kandi imihigo ya 2022 — 2023 hagati y'ubuyobozi bw'akarere, imirenge n'Inama y'Igihugu y'Abagore ( CNF).

    Umuhuzabikorwa w'Inama y'Igihugu y'Abagore ku rwego rw'Akarere ka Ngororero Mukeshimana Marie Claire yashimiye Perezida wa Repubulika y'u Rwanda Paul Kagame wahaye umugore ijambo, agatuma atinyuka none ubu umugore akaba agira uruhare mu iterambere ry'igihugu cye.

    Yavuze ko umugore wa Ngororero atazapfusha ubusa ayo mahirwe yahawe  ahubwo ko azafata iya mbere mu gushyira imbaraga ahakiri intege nke  harebwa ibibazo bicyugarije umuryango bakabikemura.

    Yibutsa ko kuri ubu umugore yahawe byose. Yagize ati : ' BDF ni kimwe mu bisubizo Perezida wa Repubulika  yaduhaye kugira ngo hatezwe imbere imishinga mito n'iciriritse aho umugore ufite umushinga cyangwa wihangiye umurimo  yishingirwa ku kigero cya 75%.'

    Nk'uko abishimangira ngo inkunga zihabwa umugore wikorera igihe yujuje ibisabwa ngo zatuma umugore agira aho agera yubaka umuryango utekanye.

    Uhagarariye Police mu Karere ka Ngororero J. Kayihura yibukije abagore ko bifitemo imbaraga zikomeye cyane ko ari ba mutima w'urugo.

    Yagize ati : ' Umutima n'urugingo rukomeye. Abagore muri ibihangange. Mufite imbaraga zitagaragara. Mubyara abana mukabaha uburere. Ni ibintu tubashimira.'

    Yabasabye gukomeza gushyira imbaraga mu burere bw'abana hagamijwe kugira umuryango utekanye, aho abawugize bafatanyiriza hamwe gushaka igisubizo kibibazo biwugarije.

     Ishoramari si iry'abagabo gusa

    Mukahigiro Laurence, utuye mu murenge wa Ndaro, mu Karere ka Ngororero, akaba ari umupfakazi ukora  ubukorikori, yatanze ubuhamya bw'ukuntu yari umukene cyane, aza guhera kuri duke atangira adoda amatapi, akora ibikapu byo mu bikongorwa by'ibisheke, inkoko  ziva mu rufunzo bikaba byaratumye abasha kugera ku rwego yitabira amamurikabikorwa mpuzamahanga aho ajya mu bindi bihugu kumurika ibihangano bye.

    Ni ibikorwa yatoje bagenzi be yabashije kubumbira muri koperative, akaba amaze kurihira bamwe mu bana bafite imiryango itishoboye  amashuri. Kuri ubu,  afite umudari wo ku rwego rw'igihugu, wo kuba ari indashyikirwa mu bukorikori.

    Ni igikorwa gishimwa na Sano Emmanuel, uhagarariye abikorera mu Karere ka Ngororero ariko akavuga ko umubare w'abagore batinyuka kwikorera ukiri hasi cyane ugereranyije n'abagabo.

    Yibutsa abagore ko ishoramari atari iry'abagabo gusa ahubwo ko n'abagore baryinjiramo bigashoboka . Ati : ' Amahirwe arahari agenewe abagore. Nimuyabyaze umusaruro muri benshi bityo, bigirire umumaro umuryango wose.'

    Mu mpanuro z'umushyitsi mukuru Annoncée Manirarora, yashimye ibimaze kugerwaho n'abagore bo mu Ngororero, akebura ba mutima w'urugo, avuga ko  bahawe byose ariko  ko hari ibyo atishimiye, agira ati : ' Niba twemera ko turi kujyana na Nyakubahwa Perezida wa Repubulika, ntabwo ari twe dukwiye kuba aba mbere mu kugwingiza abana. Turambiwe igisuzuguriro. Ese turi mu ngamba cyangwa turajenjetse? Ibintu bimwe nitutabirakarira ntabwo bizakunda.  Reka imbaraga twahawe tuzikoreshe.'

    Yibukije abagore ko bahawe amahirwe yose ashoboka ko bityo, bakwiye kugira ibikorwa byinshi, amagambo akaba make.

    Mu Karere ka Ngororero, abagore bageze kuri  53% by'abaturage batuye ako karere.

    Yanditswe na Rose Mukagahizi

     

     

    The post Ngororero: Ba Mutimawurugo basabwe kudapfusha ubusa amahirwe bahawe appeared first on IRIBA NEWS.

    Source : https://iribanews.rw/2022/09/08/ngororero-ba-mutimawurugo-basabwe-kudapfusha-ubusa-amahirwe-bahawe/