Blog

Urugendo rwo kwibuka rwahereye ahahoze ari kuri ETO Kicukiro, ubu hakaba ari kuri IPRC Kigali aho imbaga y'Abatutsi barenga 3,000 bashyizwe hamwe bakajyanwa i Nyanza ya Kicukiro biciwe mu mvura y'amahindu. 

Ubu i Nyanza hari Urwibutso rushyinguyemo imibiri isaga ibihumbi ijana na bitanu, harimo abaguye ku musozi wa Nyanza ya Kicukiro n’abandi bakuwe mu bindi bice by’Umujyi wa Kigali bazize Jenoside yakorewe Abatutsi mu Rwanda muri Mata 1994.

Aho muri ETO Kicukiro kandi hari ingabo zaharaniraga amahoro za MINUAR, ariko zasize Abatutsi mu maboko y'Interahamwe zirigendera. 

Mu nzira, abari mu rugendo rwo Kwibuka bageraga ahabereye ibikorwa ndengakamere byo kwica urubozo Abatutsi bagahagarara bakavuga amateka yaho, ndetse hakanatangwa ubutumwa bw'icyizere bwo gukomeza abanyarwanda.

Hakozwe Urugendo rwo Kwibuka kuva muri IPRC Kicukiro kugera Nyanza ya Kicukiro, bagera ahihariye bagasobanurirwa

Mu kugera ku Urwibutso rwa Nyanza ya Kicukiro, habayeho igikorwa cyo gushyira indabo ku Urwibutso cyayobowe na Minisitiri w'Ubumwe Dr Bizimana Jean Damascene, Rubingisa Pudence Umuyobozi w'umujyi wa Kigali, Umuyobozi nshingwabikorwa w'akarere ka Kicukiro Antoine Mutsinzi, na bamwe mu bahagarariye ibihugu byabo mu Rwanda.

Hakurikiyeho gucana urumuri rw'icyizere. Nyuma Antoine Mutsinzi, umuyobozi nshingwabikorwa w'akarere ka Kicukiro mu ijambo rye ryo gutanga ikaze yavuze uburyo ingabo zari iza MINUAR zatereranye Abatutsi, anashimira cyane uruhare rw’urubyiruko mu bikorwa byo kwibuka kuko bitanga imbaraga ku gihugu n'icyizere cy'ejo hazaza.

Umuyobozi Nshingwabikorwa w’Akarere ka Kicukiro kandi Mutsinzi, yongeye gusaba uwaba azi ahakiri imibiri y’abishwe muri Jenoside yakorewe Abatutsi ko yatanga amakuru iyi mibiri igashyingurwa mu cyubahiro.

Hatanzwe ubuhamya bw'abarokotse Jenoside yakorewe Abatutsi bari mu bavuye muri ETO icyo gihe, by'umwihariko ubuhamya bwa Niwemfura Kaberuka Marie Aimée watanze ubuhamya bw'uko bamwe mu bo mu muryango we, baguye Nyanza ya Kicukiro.

Uyu mubyeyi watanze ubuhamya muri iki gikorwa, yavuze ko yanyuze mu nzira ikomeye. Atanga ubu buhamya ari kumwe na nyirasenge.

Ati ''Ni ubuhamya twabayemo, Ubuhamya ngiye kubasangiza turi benshi tubusangiye, ariko n'ubwo ibintu byatubayeho muri Jenoside n'ubwo abantu babaga bari hamwe ibyababagaho wasangaga bitandukanye.''

Akomeza avuga ko ababyeyi be, Kaberuka Aimable na Muteteri Esperance bari batuye muri Sahara Kicukiro. Avuga ko bavukanaga ari abana bane we akaba imfura, icyo gihe muri Jenoside akaba yari afite imyaka itanu naho bucura bwabo akaba yari uruhinja rw'iminsi 11. 

Ati ''Ibya Mbere ya Jenoside ntabwo nabibonye, mbyita ko ari amahirwe kuko abantu babonye byinshi bagaca muri byinshi. Njye ibyo nabonye ni uguhera ku wa 6 Mata ubwo indege ya Habyarimana yagwaga, iwacu aho twari dutuye twarebanaga n'ikibuga cy'indege. Muri iryo joro rero bari bari kudutegura tugiye kuryama twumva ikintu kiraturitse. Papa wanjye ubona ko agize impungenge.'' Ubuhamya bwe burakomeza mu yindi nkuru.

Iki gikorwa cyabanjirijwe n'urugendo rwo kwibuka

Muri iki gikorwa kandi umuhanzi Bonhomme yaririmbye indirimbo zihumuriza, wakurikiwe n'urubyiruko rwasomye amazina ya bamwe mu bazize Jenoside yakorewe Abatutsi mu Rwanda muri Mata 1994. 

Uwari umushyitsi mukuru muri uyu muhango, Minisitiri w'Ubumwe bw'Abanyarwanda, Dr Bizmana Jean yashimye urubyiruko kubwo guhugukira kumva amateka cyane ko igihe cyagiye ariko bakaba bagihari, anyura mu mateka yaranze Jenoside yakorewe Abatutsi ubona ko azi neza murakurikira ikiganiro kirambuye ku InyaRwanda Tv.

Dr Bizimana yagaragaje uruhare rw'ibihugu byatereranye abarenga ibihumbi bibiri bakicwa muri Etoo, ariko ashimira igihugu cy'Ububiligi cyasabye imbabazi ku ruhare rwabo ndetse ashimira uburyo igihugu cy'Ububiligi cyakiye imanza ndetse iki gihugu gishyiraho itegeko ryihariye gihana icyaha cya Jenoside.

Harimo nk'uwitwa Fabiane Neretswe rero igihugu cy'u Bubiligi mu butabera cyafatikanyije ndetse kikaba gikomeje gufatikanya n 'u Rwanda mu butabera.

Dr Bizimana kandi yavuze ko bifuza ko urubanza rwa Kabuga Felicien rwacibwa n'ubwo hari impamvu zigaragazwa z'uburwayi, ariko abacamanza nabo bavuga ko urubanza rwaba.

Umuyobozi w’umujyi wa Kigali, Pudence Rubingisa yari muri uru rugendo

Dr Bizimana yibukije urubyiruko ko ejo heza h’Igihugu hari mu biganza byabo, bityo ko bagomba kwirinda ingengabitekerezo ya Jenoside bakarwanya uwo igaragayeho wese avuga ko rugomba kumva inama za Perezida wa Repubulika ko badakwiye gutegereza inkunga z'amahanga.

Agira ati: 'Ntabwo tugomba gutegereza ko amahanga azadufasha, tugomba kwishakamo imbaraga tukiyubakira igihugu nk'uko Nyakubahwa Perezida wa Repubulika akunda kubivuga.''

Urubyiruko rwinshi rwari rwitabiriye uru rugengo bigiyemo amateka y’u Rwanda

Umuyobozi w’Umujyi wa Kigali, Pudence Rubingisa yashyize indabo ahashyinguwe imibiri y’abazize Jenoside yakorewe Abatutsi

Minisitiri w’Ubumwe, Dr Bizimana yunamiye ahashyinguwe imibiri y’Abatutsi bazize Jenoside yakorewe Abatutsi mu Rwanda muri Mata 1994

Umuhanzikazi Nyiranyamibwa Suzanne yaririmbye mu mugoroba wo Kwibuka abatutsi i Nyanza ya Kicukiro

Niwemfura Kaberuka Marie Aimee watanze ubuhamya agaragaza inzira itoroshye abatutsi banyuzemo ubwo bavanwaga muri ETO Kicukiro

Amb. Nsengimana Joseph yatanze ikiganiro cyagarutse ku mateka ya Jenoside yakorewe Abatutsi mu Rwanda

 

Ambasaderi wa Israel mu Rwanda, Ron Adam yunamiye inzirakarengane zishyinguye muri uru rwibutso

 

Umuhanzi Bonnhomme yaririmbye mu Kwibuka ku nshuro ya 29 abatutsi biciwe i Nyanza ya Kicukiro 

Umuyobozi wa Polisi wungirije ushinzwe abakozi, DGIP Ujeneza Chantal

Antoine Cardinal Kambanda ni umwe mu bitabiriye iki gikorwa cyo #Kwibuka29

Gatabazi Jean Marie Vianney wabaye Minisitiri w’Ubugetsi [Uri hagati] 

Umuyobozi wa Rwanda we Want, Murenzi Tristan

Umunyamabanga Nshingwabikorwa w’Akarere ka Kicukiro, Antoine Mutsinzi

Kanda hano urebe amafoto menshi yaranze iki gikorwa cyo #Kwibuka29

AMAFOTO: Rwigema Freddy

Ubutumwa bw’umuhanzi Nice Ndatabaye kuri ubu ubarizwa muri Leta Zunze Ubumwe za Amerika yabuhuje n’ijambo ry’Imana riri mu Abakorinto ba 2 igice cya 5, umurongo wa 19.

Handitse hati “Nk’uko Imana yiyungiye n’abantu muri Kristo Yesu ntiyaba ikibabaraho ibyaha byabo, ngo kandi natwe yadusigiye umurimo wo kunga abantu n’Imana. “

Iri jambo yarihuje no kwibutsa abantu muri rusange “Kwiyunga” agira ati “Mu gihe twibuka abacu bazize uko basa, reka twongere kandi tunibutse abantu kwiyunga.

Abahekuye imiryango babashe kwemera icyaha no gusaba imbabazi, ndetse n’ababuze ababo babashe kubabarira.” Yongeraho ko ibyo bazabishibozwa n’Imana.

Yakomeje agenera ubutumwa abagifite ingengabitekerezo ya Jenoside, ndetse n’abayihakana n’abayipfobya ababwira ko ari uburenganzira bw’umuntu gukoresha imbuga nkoranyambaga n’irindi tangazamakuru iryo ariryo ryose uko ashaka.

Ariko ukuri kuri Jenoside yakorewe Abatutsi muri Mata 1994, ari kumwe, ndetse abanyarwanda baharanira ko bitazongera kubaho ukundi. 

Yasoje ahumuriza imiryango yose yasigiwe ibikomere na Jenoside yakorewe Abatutsi mu 1994, yongeraho ati “Tuvugango Ntibizongera kubaho ukundi.” 

Nice Ndatabaye yatanze ubutumwa bw’ihumure ku miryango yabuze abayo muri Jenoside yakorewe Abatutsi mu 1994

Ukwezi kwa Mata kugeza kugeza kuwa 4 Nyakanga, Abanyarwanda baba bazirikana ibikorwa byo Kwibuka Abazize Jenoside yakorewe Abatutsi. Ku ngabo zari iza RPA bo hiyongeraho urugamba rutoroshye barwanye kugira ngo batabare ubuzima bwa benshi bicwaga urw'agashinyaguro bazira uko bavutse.

Umujyanama wa Perezida wa Repubulika mu by'Umutekano, Gen James Kabarebe, ubwo yaganirizaga abanyeshuri n'abayobozi ba African Leadership University ku rugamba rwo guhagarika Jenoside, yavuze ko rutari rworoshye ndetse ko mu bihe bya mbere babanje gutsindwa, bamwe bagasezera abandi bakiruka.

Yavuze ko intwaro ikomeye bari bafite ari ubuyobozi bwiza bwa Perezida Paul Kagame wabashije gushyira ibintu kuri gahunda mu gihe ingabo za RPA nta kintu na kimwe zari zisigaranye, ariko zirakomeza zirwana urugamba.

Ati 'Twari dufite urubyiruko rwinshi ruturutse mu bice bitandukanye, muri Uganda, Tanzania, Burundi n'ahandi bo mu byiciro bitandukanye. Hari harimo abize kaminuza n'abize ayisumbuye.'

'Tekereza umuganga cyangwa umunyamategeko, umwubatsi akaza ku rugamba, ukwezi kwa mbere ukwa kabiri, ibyo twari dufite bigashira, nta nkweto zo kwambara, nta mwenda ariko agakomeza akarwana.'

Yavuze ko RPF yari ishyize umutima ku cyo iri kurwanira kandi ifite inyota yo kukigeraho. Ubumenyi bw'umuyobozi mukuru wari ubayoboye, Perezida Kagame ngo bwari ingenzi cyane kuko abenshi bari bavuye mu mashuri batanayarangije.

Uko urugamba rwakomezaga, ari na ko ingabo za RPA zigarurira ibice bitandukanye, Ingabo zari iza Leta, Ex-FAR cyane cyane izo mu mutwe w'ingabo wihariye [Special Forces] zahungiye muri Zaire, ubu yahindutse Repubulika Iharanira Demokarasi ya Congo ariko abandi bamwe ntibirirwa bahunga.

Gen Kabarene ati 'Abenshi mu basirikare ntabwo bahunze ahubwo bahise baza ku ruhande rwacu. Ndibuka ko mu matariki ya 5 Nyakanga 1994 twari dufite ingabo 1500 zavuye mu ngabo zatsinzwe. Tekereza ingabo zari ziri ku ruhande rwicaga Abatutsi zikaza tukazakira tukavanga.'

Yavuze ko nyuma yo kubakira babashyize mu ngabo z'igihugu bamwe muri bo bagashyirwa mu myanya ikomeye ndetse abandi bakajya no mu myanya ikomeye muri guverinoma.

Ati 'Iyo yari intambwe ya mbere y'ubwiyunge cyane cyane mu gisirikare.'

Gen James Kabarebe yavuze ko guha rugari ingabo za EX-FAR zikiyunga ku za RPA ari intangiriro y’urugendo rw’ubwiyunge

Ko FAR bari benshi, kuki batsinzwe urugamba?

Abasirikare batangiye urugamba rwo kubohora igihugu bari ibihumbi 21 mu gihe ingabo za leta ya Habyarimana zari ibihumbi 50 hakiyongeraho Abajandarume barengaga ibihumbi 30 n'Interahamwe zirenga miliyoni.

Gen Kabarebe avuga ko uru rugamba barurwanye bagendeye ku buhanga n'inararibonye bya Perezida Kagame kuko nta bundi bufasha budasanzwe babonye, uretse kubyaza umusaruro duke bari bafite no kumenya intego yatumye batangira urugamba.

Asobanura icyatumye Leta y'abajenosideri itsindwa urugamba yagize ati'Abasirikare ba Leta, ba Ex-FAR bari ibihumbi 50, kongeraho abajandarume ibihumbi 30, kongeraho Interahamwe zirenga miliyoni, icyo cyari igisirikare kinini cyane.'

'Iyo leta yakoze Jenoside iza kwibanda ku kurwanya RPA bari kudutsinda. Byonyine uwo mubare kuwutsinda ntibyari gushoboka. Bafashe abasirikare benshi, abajandarume benshi babohereza kujya guhiga inzirakarengane ngo bazice.'

'Batsinzwe kubera ko batatanyije imbaraga bajya guhiga inzirakarengene z'Abatutsi. Iyo bashyira hamwe imbaraga zabo bakaza bose baje kurwanya RPA bari kudutsinda. Byose bikorwa n'imiyoborere.'

Aba bamaze gutsindwa bagiye muri Zaire kwisuganya ngo bazagaruke guhirika ubutegetsi bakomeze umugambi mubisha wabo wari uhagaritswe na FPR-Inkotanyi.

Yavuze ku barozi bo muri Congo

Gen Kabarebe yavuze ko mu 1996 ubwo yari ku rugamba muri Zaire bahanganye n'Interahamwe zari zisize zikoze Jenoside zishaka kongera gutera u Rwanda, mu rugamba rwakomeje rukaganisha no gukura Mobutu ku butegetsi, hari ibintu basanze muri icyo gihugu.

Ati 'Nabikubira mu ngingo eshatu z'ibintu niboneye byari bigize Zaire icyo gihe mu 1997. Icya mbere cyari navuga ni Kiliziya Gatolika. Ni rwo rwego rwonyine rwari ruhari rukomeye.'

'Ikindi ni abayobozi ba gakondo, buri bwoko bwari bufite abayobozi ba gakondo babo. Ikindi gitangaje cyari gifite imbaraga mu miyoborere ni abarozi. Kuko mu gihe nta butabera, buyobozi, nta polisi, nta gisirikare, abarozi ni bo baba basigaranye ingufu. Ntiwagirira nabi umuturanyi, ntiwamwiba ubikoze barakuroga.'

'Ugeze kuri urwo rwego ufite igihugu kinini, gifite umutungo kamere ariko icyo ufite akaba ari Kiliziya Gatolika n'abayobozi bo ku rwego rwa gakondo n'abarozi, ntaho wagera.'

Yavuze ko buri kiragano kivoma ibitekerezo ku mateka n'imibereho kibamo, bigaha umurongo ibitekerezo byabo n'ibyo bakora.

Yongeyeho ko urubyiruko ruriho ubu rubona imiyoborere ya Perezida Kagame, bityo ikwiye kurubera urugero, rukayifatiraho icyerekezo rukazavamo abakora nk'uko akora.

Gen Kabarebe yanavuze ko urugendo rw'u Rwanda kuva ku ntangiriro y'urugamba rwo kubohora igihugu kugeza na nyuma yo guhagarika Jenoside yakorewe Abatutsi, ndetse n'iterambere rugezeho ubu nta kindi cyabigizemo uruhare atari ubuyobozi bwiza.

Umujyanama wa Perezida Kagame mu bijyanye n’umutekano, Gen Kabarebe James, mu ifoto y’urwibutso hamwe n’abanyeshuri ba ALU