Blog

Apostle Mignonne Kabera uyobora Umuryango Women Foundation Ministries usanzwe utegura igiterane ngarukamwaka cy'abagore 'All Women Together' yatangaje ko kuri iyi nshuro ya 12, iki giterane kigiye guhuriza hamwe abagore b'ingeri zose kitezweho gutangirwamo ibitekerezo byo kwiteza imbere ndetse no kubaka imiryango ihamye.

Mu kiganiro yagiranye n'itangazamakuru kuri uyu wa Kane tariki 27 Nyakanga 2023, Apotre Mignonne uri mu bakunzwe mu Rwanda, yavuze ko abavuga ko abagabo bahejwe muri ibi biterane babeshya kuko bemerewe kubiyungaho kuko 'Imana yaremye umugore kugira ngo abe icyuzuzo cy'umugabo’.

Yagize ati 'Imana yaremye umugore kugira ngo abe icyuzuzo cy'umugabo kandi bose babikore mu nyungu zabo n'iz'igihugu.'

Mignonne Kabera avuga ko umugore wo muri iki gihe akeneye kumenya guhuza ibintu mu buryo bugira ingaruka nziza. Ngo hari benshi biyubatse ariko bashobora kwisenya muri uko kwiyubaka kwabo. 

Ati: 'Umugore agomba kuba umugore usenga ariko anakora, akamenya kuba yarateye imbere ariko akanubaha umutware we.'

Avuga ko umugore afite ubushobozi bwo kwiyubaka, akamenya guhuza ibikenewe byose ngo urugo rwe rutere imbere. Mu kwiyubaka k'umugore ariko, Apostle Mignonne Kabera avuga ko ari ngombwa ko n'umugabo we aba ahari.

Apotre Mignonne avuga ko igitekerezo cyo gutangiza igiterane 'All Women Together' cyatangiye mu mwaka wa 2011, agamije ko abagore bari baratsikamiwe bivana muri iyo ngoyi bakaba abatsinzi kandi ngo imbuto yateye kuva icyo gihe zatanze umusaruro.

Abajijwe ku bijyanye no kwakira abo mu yandi madini, yasobanuye ko 'Ministries' bivuze umurimo w'ivugabutumwa kandi ko uwo murimo udatoranya uwukorerwa ahubwo ko ukwiriye kugera kuri bose yaba abizera Yesu Kristo ndetse n'abatamwizera.

Yavuze ko bakira buri wese, bakamwigisha ubutumwa bwiza bwa Yesu Kristo ubundi bakamuha rugari akajya gusengera no kubatirizwa aho umutima we wishimiye. Yijeje kandi ko Women Foundation Ministries iri gukora ibishoboka byose ngo iki giterane kigere kuri bose.

Ku buryo kizitabirwa n'ingeri zose z'abagore n'abagabo bakabasha kumva ubuhamya n'inyigisho zishobora kugira ingaruka nziza mu buzima bwabo, bakabasha kubaka ingo zihamye kandi zikunda zikanubaha Imana.

Uyu mubyeyi yakomeje asobanura ko iki giterane giteganyijwe kuva tariki 08 kugeza 11 Kanama 2023 muri Kigali Convention Center, kwinjira bizaba ari ubuntu ariko bigasaba kwiyandikisha hakiri kare kugira ngo bazakirwe mu buryo buri ku murongo. 

Yavuze ko kandi ku bantu batabasha gukoresha murandasi biyandisha bazifashisha nimero ziri ku mpapuro z'ubutumire [Flyers] ziboneka ahantu hatandukanye bakabasha gufashwa n'ababishinzwe.

Yasoje avuga ko abantu badakwiye gutinya kujya muri Kigali Convention Center nubwo hasa n’aho hahenze cyane kuko kwinjira azaba ari ubuntu, kandi ko benshi bazagira amahirwe yo kuganirizwa n'Umuramyi Mpuzamahanga Sinach ukomoka muri Nigeria.

Uretse gutanga ikiganiro, benshi bajyaga kureba Sinach bishyuye ay'umurengera, bazagira amahirwe yo kumva indirimbo ze mu buryo bw'imbonankubone kandi ku buntu.

Apotre Mignonne Kabera yatangaje ko igiterane ‘All Women Together’ 2023 kitezweho kuganirirwamo ingingo z’iterambere ku bagore 

Apotre Mignonne yahumurije abagabo, avuga ko nabo bemerewe kwitabira iki giterane cy’abagore kigiye kuba ku nshuro ya 12 

Mignonne yavuze ko muri Women Foundation Ministries bakira buri umwe, badashingiye ku myizerere ye ahubwo ko bamwigisha ubutumwa bwiza akihitiramo 

Apotre Mignonne uyobora WFM asanga Imana yararemye umugore ngo abe icyuzuzo cy’umugabo 

Mu kiganiro n’itangazamakuru kigaruka ku giterane ‘All Women Together 2023’ Apotre Mignonne yaciye amarenga ko ashobora gutangiza inyigisho zigisha urubyiruko kuzubaka ingo zishikamye 


Umunyamakuru Antoinette Niyongira ukorera Kiss FM niwe wayoboye iki kiganiro n’itangazamakuru cyateguwe na Women Foundation Ministries 

Reba andi mafoto ya Apotre Mignonne aganira n’Itangazamakuru ku giterane ngarukamwaka ‘All Women Together 2023″

AMAFOTO: Serge Ngabo – INYARWANDA 

VIDEO: Dieudonne Murenzi – INYARWANDA

Nyuma yo kujya ku isoko ry’abanyamahanga itanga amafaranga y’intica ntikize, Police FC yaje kubona kubona ko amazi atakiri ya yandi irimo kuyoga magazi, yazamuye ibiciro.,

Igifata gahunda yo gukinisha abanyamahanga nayo, umukinnyi wa mbere yakandiyeho ni Umurundi wakiniraga Kiyovu Sports, Bigirimana Abedi ariko biza kwanga kubera amafaranga yamuhaga.

Bigirimana Abedi yatunguwe no kumva iyi kipe y’abashinzwe umutekano ishaka kumugura miliyoni 10 mu gihe hari n’amakipe yatanze miliyoni 20 akayanga.

Ibiganiro byahise bisubikwa ahubwo bikomereza muri Rayon Sports banumvikanye ariko hakabaho ikibazo cy’uko amafaranga azishyurwa kuko bashakaga kuyamuha mu byiciro.

Police FC ikaba yaraje kubona ko ibintu bitoroshye bitewe n’uburyo andi makipe arimo kwiyubaka, yongera gukomanga kwa Abedi yazamuye amafaranga.

Bivugwa ko basubiye imbere y’uyu mukinnyi bamubwira ko biteguye kwishyura miliyoni 18 ariko akaza kubasinyira, yababwiye ko ari make gusa ababwira ko niba bayazamura yiteguye kujya mu biganiro nabo.

Bivugwa ko uyu mukinnyi yaraye ageze mu Rwanda avuye i Burundi aho aje kuganira na Police FC ngo yayerekezamo ndetse iyi kipe ni nayo yamukuye ku kibuga cy’indege, ibiganiro bikaba biri mu murongo muzima.

Iyi kipe kandi kuri miliyoni 25 bivugwa ko yamaze kugura umunya-Nigeria Aboubakar Djibrine Akuki wakiniraga AS Kigali.

Aba baje biyongera ku munyezamu Rukundo Onésime w’Umurundi yamaze gusinyisha.

Bigirimana Abedi mu biganiro bya nyuma na Police FC

Akuki Djibrine bivugwa ko yarangizanyije na Police FC

Amakipe y’imirenge ya Kigoma yo mu Karere ka Nyanza, Rugalika yo mu Karere ka Kamonyi, Ntongwe yo mu Karere ka Ruhango na Ndora yo mu Karere Gisagara, yatsindiye kuzakina 1/2 cy’amarushanwa ya 'Green Amayaga Football Competition', ku rwego rw’Uturere.

Aya marushanwa yateguwe n’Ikigo cy’Igihugu cyo Kubungabunga ibidukikije (REMA), kibinyujije mu mushinga Green Amayaga wo gutera amashyamba no gusubiranya urusobe rw’ibinyabuzima mu gice cy’Amayaga, ku bufatanye n’Umuryango APEFA, ushinzwe ubukangurambaga n’amahugurwa mu bagenerwabikorwa muri uyu mushinga, ndetse n’uturere twa Kamonyi, Nyanza, Ruhango na Gisagara uwo mushinga ukoreramo, agamije ubukangurambaga bwo gushishikariza abagenerwabikorwa b’umushinga mu gufata neza ibikorwa wakoze no kubungabunga ibidukikije muri rusange.

Muri iyi mikino ya nyuma ku rwego rw’Imirenge yabaye tariki 21 Nyakanga 2023, mu Karere ka Nyanza, Kigoma yitwaye neza itsinda iy’Umurenge wa Kibirizi ibitego 7-1.

Mu karere ka Ruhango, ikipe y’ Umurenge wa Ntongwe yatsindiye kuzahagararira aka karere nyuma yo gutsinda iy’umurenge wa Kinazi ibitego 2-1 ni mu gihe ikipe y’Umurenge wa Rugalika yatsindiye kuzahagararira Akarere ka Kamonyi, ni nyuma yo gutsinda ikipe y’Umurenge wa Nyarubaka kuri penaliti 3-0, amakipe yombi anganyije igitego 1-1.

Ku Cyumweru tariki 23 Nyakanga 2023, mu mukino wabereye kuri Sitade y’Akarere ka Gisagara, ikipe y’Umurenge wa Ndora yatsinze iy’Umurenge wa Save ibitego 3-1.

Nyuma yo kumenya amakipe yatsindiye kuzaserukira uturere, biteganyijwe ko iyi mikino izakomeza ahatana ku rwego rw’Akarere, aho kuri uyu wa Gatanu tariki 28 Nyakanga 2023, ikipe y’Umurenge wa Rugalika ihagarariye Akarere ka Kamonyi izahura n’iy’Umurenge wa Ntongwe isazerukira Akarere ka Ruhango ukazabera i Kibingo ku isaha ya saa munani z’amanywa (14h00).

Ku rundi ruhande, ku Cyumweru tariki 30 Nyakanga 2023, ikipe y’Umurenge wa Kigoma ihagarariye Akarere ka Nyanza, izahura n’iy’Umurenge wa Ndora izaserukira Akarere ka Gisagara, ukazabera i Ndora, ku isaha ya saa munani z’amanywa (14h00).

Amakipe abiri azatsinda muri iki cyiciro, akaba azahurira ku mikino wa nyuma w’aya marushanwa yiswe 'Green Amayaga Football Competition', uzabera mu Karere ka Nyanza naho azatsindwa azahatanire umwanya wa 3, bizaba tariki 4 Kanama 2023.

Mu bikorwa umushinga Green Amayaga ukora mu kubungabunga urusobe rw’ibinyabuzima mu Ntara y’Amajyepfo, harimo gutanga amatungo magufi n’amaremare afasha abaturage kwikura mu bukene, gutanga imbabura zirondereza ibicanwa hagamijwe kugabanya iyangizwa ry’amashyamba, gutanga gaz mu bigo by’amashuri, kubungabunga inkombe z’imigezi no gucukura imirwanyasuri.

Umushinga Green Amayaga witezweho kugira uruhare mu ishyirwa mu bikorwa ry’ingamba leta y’u Rwanda yiyemeje zijyanye n’ishyirwa mu bikorwa ry’amasezerano yasinyiwe i Paris mu Bufaransa hagamijwe kurwanya ihumana ry’ikirere (National Determined Contributions: NDC), aho Guverinoma y’u Rwanda yiyemeje kugabanya imyuka ihumanya ikirere ku gipimo cya 38% kugeza mu mwaka wa 2030.