Blog

Polisi y’u Rwanda ikomeje iperereza ku mpanuka y’imodoka yahitanye abantu babiri mu gace ka mbere ka Tour du Rwanda 2026 kabaye uyu munsi.

Ni nyuma y’uko Ubuyobozi bwa Tour du Rwanda, bwatangaje ko abantu babiri baguye mu mpanuka y’imodoka zibanza imbere y’amagare, abandi batandatu bagakomereka mu gace ka mbere ka Gicumbi-Rwamagana.

Iyi mpanuka yabaye kuri iki Cyumweru tariki ya 22 Gashyantare 2026 aho imodoka zirimo ibigo byamamaza muri iri siganwa zari zigeze mu Karere ka Gatsibo, i Gabiro, imwe yataye umuhanda igonga abafana bari ku muhanda.

Abantu babiri muri bo bahise bitaba Imana, abandi batandatu bakomeretse bahita bihutanwa kwa muganga, mu gihe Polisi y’u Rwanda iri gukora iperereza ku cyateye iyo mpanuka.

Ubuyobozi bwa Tour du Rwanda bwemeje ko impanuka yahitanye abantu babiri

Abakomeretse bihutanywe kwa muganga

Umunya-Israel Itamar Einhorn ukinira ikipe ya NSN ni we wegukanye Agace ka Mbere ka Tour du Rwanda 2026, nyuma yo gutsinda sprint ya nyuma i Rwamagana.

Iri siganwa ryatangiye Saa Tanu zuzuye rihagurukira i Rukomo mu Karere ka Gicumbi, abasiganwa berekeza i Rwamagana ku ntera y’ibilometero 173,6.

Ni umunsi waranzwe n’ihangana rikomeye kuva ku ntangiriro, aho abakinnyi batanu barimo Henrique da Silva Avancini na Miguel Heidemann bagerageje gucika igikundi hakiri kare.

Mu bilometero bya mbere, igikundi cyasizwe iminota irindwi, ariko amakipe akomeye arimo NSN, Eritrea na Movistar aza gushyiramo imbaraga, atangira kugabanya intera buhoro buhoro. Ibi byatumye mu bilometero 10 bya nyuma, ikinyuranyo kigabanuka ku buryo abari imbere batangiye kugaragaza umunaniro.

Imvura yaguye mu muhanda wa Gatsibo-Kayonza-Rwamagana na yo yagize uruhare mu kugabanya umuvuduko, ariko ntiyabujije igikundi kwihuta mu bilometero bya nyuma. Hasigaye ibilometero bitanu gusa, intera yari isigaye hagati y’abari imbere n’igikundi yari amasegonda 30, maze mu bilometero bibiri bya nyuma, isiganwa riba irya buri wese.

Mu gusatira umurongo, Einhorn yerekanye imbaraga n’ubunararibonye, atsinda sprint ya nyuma, aba uwa mbere kugera i Rwamagana. Ni etape ya gatatu atwaye muri iri rushanwa, nyuma yo gutsindira i Kayonza n’i Nyaruguru mu 2024.

Kubera ayo manota ya sprint n’amasegonda ya bonification yatangiwe i Rwamagana, Einhorn yahise yambara umwambaro w’umuhondo uhabwa uyoboye isiganwa muri rusange aho yakoresheje amassha 4 n’iminota 5.

Yakoresheje ibihe bimwe na Munoz Gabina wa Quick Step, Girmay Mewael, Mulueberhan Henock ukomoka muri Eritrea, Van Rees Christian wabaye uwa gatanu wa Development Team Princ Postnl, Cuylits Mauro wa Lotto Groupe Wanty, Boss Benjamin wa Rembe | Rad-Net, Almeida Luiz Fernando wa Swift Pro Cycling, Umunyarwanda Muhoza Eric wa Team Amani na Vidal Victor wa Bike Aid. Yagiye barushabwa iby’ijana.

Tour du Rwanda 2026 irimo gukinwa n’amakipe 17 aturuka mu bihugu bitandukanye, nyuma y’uyu munsi wa mbere, amaso yose ahanzwe ku Gace ka Kabiri kazanyura Nyamata kerekeza Huye, aho isiganwa rishobora kongera guhindura isura.

Natacha Ndahiro yagaragaje ko uruganda rwa sinema nyarwanda rukigorwa no kubona ubushobozi buhagije kugira ngo rubashe gucuruza filime zarwo ku rwego mpuzamahanga.

Umukinnyi wa filime, Natacha Ndahiro yavuze ko nubwo uruganda rwa sinema nyarwanda rwifuza gutera ikirenge mu cy’uruganda rw’umuziki, rukizitirwa n’imbogamizi zirimo kubona ikiraro n’uburyo faranga iyo bigeze mu kwambutsa igihugu ibyo rukora.

Mu kiganiro na ISIMBI, Natacha yagize ati 'Ntabwo byoroshye kubera ko icya mbere ntiwapfa gukora filime icuruzwa hanze y’u Rwanda nta muntu uguhuza n’ayo masoko ufite, gusa natwe turifuza kwagura tukabigeza hanze y’igihugu nkuko n’abahanzi bacu bari kubikora.'

Natacha yakomeje ashimangira ko nubwo muri iki gihe filime yose ikozwe mu buryo bwiza igashyirwaho ubusobanuro bw’amagambo buri mu rurimi rw’icyongereza ishobora kugera kure ariko ko hakiri imbogamizi z’ubwiza n’ireme z’amafilime nyarwanda ari gukorwa kuri ubu ahanini bishingiye ku mikoro ashyirwamo.

Ati ' Filime yose ikozwe neza yacuruzwa mu muhanga ariko kugira ngo umuntu agere ku rwego rwo gukora filime ifite ubwiza bw’amashusho n’amajwi buri ku kigero byifuzwaho si ikintu gihubukirwa ahubwo kibanza kubakwa, kigashorwamo imari itubutse ari nabyo tukiri kubura.'

Uyu mukobwa yanateguje abafana be ko mu kwezi gutaha azashyira hanze ibindi bikorwa bishya bigomba kuzashyirwa kuri shene ye youtube.

Natacha ukunzwe cyane ku mbuga nkoranyambaga, yinjiye muri sinema ahereye ku yitwa Natacha Series yatangiye kujya hanze mu 2022. Kuva icyo gihe Natacha Ndahiro wakundirwaga ikimero cye, yatangiye kwigarurira abakunzi ba sinema akora izindi filime nka 'Love is my sin’, Masezerano 'Lover’s Cage’ n’izindi.

Natacha Ndahiro yavuze impamvu filame Nyarwanda zitambuka imipaka

Umukinnyi wa filime Nyarwanda, Clapton Kibonge yambitse impeta y’urukundo umugore we Ntambara Jacky maze amusaba ko yazaba uwe iteka ryose.

Ni impeta yamwambitse nyuma y’imyaka 8 basezeranye imbere y’amategeko aho banabanaga banafitanye abana batatu.

Ku mugoroba w’ejo hashize ku wa Gatandatu tariki ya 21 Gashyantare 2026 aho mu birori byiza yasabye umugore we “Uzaba uwanjye iteka ryose?”

Bari kumwe n’abana babo aho bari bafite ibyapa, umwe icyapa cyari cyanditseho “Mama, imyaka 8 ishize…” umukobwa mukuru wabo yari afite ibindi byapa bibiri, kimwe cyanditseho “wavuze yego ku rukundo.” Ikindi cyanditseho “Ubu uravuga yego iteka?”.

Umugore we Ntambara Jacky akaba yahise abyemera ndetse ahita amwambika impeta y’urudashira.

Mu minsi yashize nibwo aba bombi batangaje ko bagiye gukora imihango y’ubukwe yari isigaye.

Umuhango wo gusaba no gukwa uteganyijwe kubera i Rwempasha mu Karere ka Nyagatare ku wa 4 Mata 2026. Bazahita banasezerana imbere y’Imana bizabera Gasinga Miracle Center i Rwempasha.

Clapton Kibonge wasezeranye mu mategeko mu 2018 yakunze kuvuga ko yahisemo gusezerana imbere y’amategeko agahita abana n’umugore we kuko nta bushobozi yari afite bwo gukora indi mihango.

Nyuma y’igihe gito aba bibarutse imfura yabo mu gihe mu 2022 ari bwo bibarutse ubuheta bwabo mu 2024 bibaruka umwana wa gatatu.

Clapton Kibonge ni umwe mu bakinnyi ba filime bubatse izina akaba azwi cyane muri Seburikoko, Umuturanyi ye bwite ndetse na Mugisha na Rusine na yo ye.

Bamaze kubyarana abana batatu

Bari bamaze imyaka 8 basezeranye imbere y’amategeko

Byari ibyishimo bikomeye kuri Ntambara Jacky

Rutahizamu wa APR FC, Cheikh Djibril Ouattara yashimiye abakunzi b’iyi kipe ukuntu baza kubashyigikira nubwo rimwe na rimwe babatenguha.

Ni nyuma y’umukino w’umunsi wa 21 wa Shampiyona y’icyiciro cya mbere mu Rwanda umwaka w’imikino wa 2025-26 baraye banganyijemo na Police FC 1-1.

Igitego kimwe rukumbi cya APR FC kikaba cyatsinzwe na Cheikh Djibril Ouattara ku munota wa 67.

Nyuma y’uyu mukino, Ouattara akaba yashimiye abakunzi ba APR FC uburyo baza kubashyigikira ari benshi.

Ati “Abakunzi ba APR FC icyo nababwira ni ukubashimira uburyo bahorana natwe umunsi ku munsi baje kudushyigikira, ni byiza.”

Yakomeje abasaba ko no mu mikino iri imbere bakomeze kwitanga kuko babakeneye cyane.

Ati “Bakomeze baze kudushyigikira no mu mikino iri imbere uhereye kuri Kiyovu Sports kuko nibwo tubakeneye cyane.”

Ouattara ni umwe mu bakinnyi bakunzwe n’abafana nubwo muri iyi minsi abakunzi ba APR FC batari mu rukundo n’abakinnyi babo kubera uburyo barimo kwitwara batabona intsinzi.

Djibril Ouattara yashimiye abakunzi b’iyi kipe

Minisitiri w'Ububanyi n'Amahanga n'Ubutwererane, Ambasaderi Olivier Nduhungirehe, yagaragaje ko Perezida Félix Tshisekedi wa Repubulika Iharanira Demokarasi ya Congo yarenze ku masezerano y'agahenge menshi, nyamara abahuza ntibagire icyo babikoraho.

Umukinnyi wa Police FC, Manishimwe Djabel agomba kunyura mu cyuma, ni nyuma y’uko imvune ye ikomeje kuzamo amayobera.

Uyu mukinnyi ukina inyuma ya ba rutahizamu, imikino ibanza ya Shampiyona ya 2025-26, yarangiye adakina kubera imvune y’agatsintsino.

Ubwo imikino yo kwishyura yari itangiye yari yagarutse ndetse agenda agaragara mu mikino imwe n’imwe yazaga mu kibuga asimbuye.

No ku mukino baraye banganyijemo na APR FC yari ku ntebe y’abasimbura ariko amakuru ISIMBI yamenye ni uko atari gukandagira mu kibuga.

Uyu mukinnyi nubwo avuga ko ari agatsintsino si ko ababara ahubwo ni munsi yako mu kirenge ku buryo ubu gukina bidakunda.

ISIMBI yamenye ko kuri uyu wa Gatandatu tariki ya 21 Gashyantare 2026 agomba kujya kwa muganga kunyura muri MRI kugira ngo barebe ikibazo cya nyacyo afite.

Mu Kwakira 2025 ni bwo Manishimwe Djabel yasinyiye Police FC amasezerano y’imyaka ibiri.

Manishimwe Djabel agomba kunyura mu cyuma

Nyuma yo kuyitsinda igitego cyo ku munota wa nyuma, myugariro wa Police FC yasabye imbabazi APR FC ko yarenze ku isezerano yihaye ko atazigera yishimira igitego ayitsinze.

Hari mu mukino w’umunsi wa 21 wa Shampiyona ya 2025-26 wabaye ejo hashize ku wa Gatanu tariki ya 20 Gashyantare 2026.

Uyu mukino wabereye kuri Kigali Pelé Stadium warangiye amakipe yombi anganya 1-1.

APR FC ni yo yabanje gutsinda ku munota wa 67 cyatsinzwe na Cheikh Djibril Ouattara, iki gitego cyaje kwishyurwa na Nsabimana Eric Zidane ku munota wa nyuma.

Uyu mukinnyi wakiniye APR FC, byaramurenze yishimira iki gitego mu buryo budasanzwe aho yanakuyemo jersey bakamuha umuhondo wa kabiri bikaba ikarita itukura asohoka mu kibuga.

Mu kiganiro yahaye ikinyamakuru ISIMBI, Zidane yavuze ko yari yarisezeranyije ko atazigera yishimira igitego azatsinda APR FC ariko bikaba byanze na we atazi uko byagenze.

Ati “Bambabarire kuba nishimiye igitego nabatsinze, ni amarangamutima, ni amarangamutima nari naravuze ko ntazigera nishimira igitego nzatsinda APR FC ariko byabaye ngombwa kuri uriya munota nshiduka nanjye byabaye, banyihanganire ni inshuti zanjye barabizi.”

Zidane kandi yavuze ko umukino wa APR FC awufata nk’umukino ukomeye cyane ko ari ikipe yavuyemo aba ashaka kwerekana ko agishoboye.

Ati “Sinzi uko abandi bawufata ariko njye ni umukino mpa agaciro gakomeye, ni ikipe navuyemo kandi iyo wavuye ahantu uba ugomba kubereka ko hari ubushobozi ugifite, nubwo navuyeyo kera ni abantu mpora nshimira kuko nahabaye neza, si nahabaye nabi.”

Zidane yakiniye APR FC kuva 2012 avuye mu Isonga kugeza 2015 ubwo yajyaga muri AS Kigali yavuyemo ajya muri Police FC abereye kapiteni uyu munsi

Yari yaravuze ko atazishimira igitego azatsinda APR FC

APR FC yisubije umwanya wa mbere ku rutonde rwa Shampiyona nyuma yo kunganya na Police FC igitego kimwe kuri kimwe.

Ni wo wari umukino ubimburira indi y’umunsi wa 21 wa Shampiyona ya 2025-26 aho Police FC ari yo yari yakiriye APR FC.

Police FC ikaba itari ifite bamwe mu bakinnyi bayo nka Ndayishimiye Dieudonne na Isaac Eze bafite imvune ntiyari ifite kandi Byiringiro Lague na Msanga Henry bafite amakarita atatu y’imihondo.

APR FC ntabwo yari ifite Ishimwe Pierre ufite imvune, kapiteni wayo Niyomugabo Claude wari umaze iminsi arwaye akaba yari yabanje ku ntebe y’abasimbura

Wari umukino uryoheye ijisho aho mu gice cya mbere amakipe yombi yasatiranye ndetse akabona n’amahirwe ariko ntiyabyazwa umusaruro.

Police FC niyo yabonye amahirwe menshi harimo imipira ibiri ya Kwitonda Alain Bacca yakubise igiti cy’izamu, umupira wa Ani Elijah Adolphe yakuyemo ndetse n’undi mupira w’umutwe wa Elijah rutahizamu William Togui Mel yakuriyemo ku murongo.

Amahirwe afatika APR FC yabonye ni imipira ibiri ya William Togui yose yakubise igiti cy’izamu. Amakipe yombi yagiye kuruhuka ari ubusa ku busa.

Kimwe no mu gice cya mbere amakipe yombi yarimo ashaka igitego,Byiringiro Gilbert yaje guhindura umupira imbere y’izamu Djibril Ouattara ashyizeho umutwe umupira ukubita igiti cy’izamu.

Nyuma y’iminota mike Ekison Ekorie wa Police FC yagaragaje ishoti rikomeye ariko Hakizimana Adolphe awukuramo.

Ku munota wa 67, Cheikh Djibril Ouattara yatsindiye APR FC igitego cya mbere ku ishoti yatereye inyuma y’urubuga rw’amahina, umunyezamu Patience ntiyamenya uko bigenze.

Police FC yashatse uko yishyura iki gitego maze ku munota wa nyuma Nsabimana Eric Zidane arayishyurira umukino urangira ari 1-1.

Kunganya uyu mukino APR FC yahise ifata umwanya wa mbere n’amanota 39, Al Hilal ifite 38, Al Merreikh 37 zo zikaba zitarakina umunsi wa 21, Al Hilal yo ikaba inafite ibirarane 3. Police FC iri ku mwanya wa 4 n’amanota 35.

Bishimira igitego cya Ouattara Cheikh Djibril