Blog

Perezida wa Gasogi United, Kakooza Nkuriza Charles, (KNC) yavuze ko uko byagenda kose azasezerera APR FC mu mikino ya ¼ cy’Igikombe cy’Amahoro.

Ni nyuma y’uko yasezereye muri 1/8 Musanze FC igera muri ¼ cy’Igikombe cy’Amahoro aho izahura na APR FC yo yasezereye Kiyovu Sports.

Uyu mugabo uzwiho guhiga cyane yavuze ko APR FC ibarusha byose ariko azakuramo iyi kipe akoresheje abakinnyi bakiri bato.

Ati 'Turabizi APR iturusha byinshi mu bushobozi, ifite n’abakinnyi b’amazina. Ariko aho gutunga abakinnyi bageze iyo bajya nagira abashaka kwandika amazina. Iyi APR FC ndayikuzamo abana kandi ndababwiza ukuri bazapfukama. Uzakomeza wese azagenda yikanda ibikomere.'

KNC yakomeje avuga ko atarimo avuga ibi kugira ngo ashyushye umukino abafana bazaze kuko APR FC nta bafana ikigira, ngo bashaka bazakina nta bafana bahari.

Ati 'APR FC nta bafana ikigira, abafana bayo bajya ku mikino yayo yakiriye ni nk’abacu twakinnye na Mukura n’izindi. Nta bafana ifite rwose. Ntihagire uvuga iby’amafaranga kuko ni dushaka tuzakine nta bafana bahari.'

Mu gihe Gasogi United na KNC basezerera APR FC ntibaba babikoze bwa mbere kuko no muri 2024 barayisezereye muri 1/4 kuri 4-3, ni nyuma y’uko amakipe yombi yari yanganyije ubusa ku busa mu mikino yombi.

KNC yahize kubabaza APR FC

Byahishuwe ko Leta y'u Burundi yateguye kandi itanga imyitozo, kandi iyobora abagabye igitero cy'abitwaje intwaro cyatwaye ubuzima bw'abasivili 14 mu Karere ka Musanze mu Ukwakira 2019, abandi benshi bagakomereka.

Uwase Muyango Claudine yatangaje ko atemeranya n’imvugo ya Kakooza Nkuriza Charles wavuze ko akazi kazwi nko 'guhostinga’ gahwanye n’uburaya.

Muyango yabigarutseho mu kiganiro yagiranye n’itangazamakuru yakoze mu ijoro ryakeye mbere yo guhaguruka yerekeza mu Mujyi wa Brussels mu Belgium, aho agiye kuyobora igitaramo kizahuza abahanzi barimo Bruce Melodie na Sheebah Karungi.

Uyu mugore wegukanye ikamba rya Miss Photogenic mu irushanwa rya Miss Rwanda 2019 yahagurutse ku Kibuga Mpuzamahanga cy’Indege cya Kigali i Kanombe atangira urugendo rwerekeza i Burayi, mu gihe ku mbuga nkoranyambaga hakomeje impaka ku bijyanye n’akazi ka 'hosting’, gakunze gukorwa mu birori no mu bitaramo bitandukanye.

Izi mpaka zatangiye nyuma y’amagambo ya KNC, washinze ikipe ya Gasogi United ndetse akaba anafite Radio/TV1.

Mu kiganiro cye gica kuri iyi radiyo na televiziyo, yavuze ko kuri we akazi ka 'hosting’ hari aho gahuriye n’uburaya, avuga ko hari aho abakora aka kazi bafasha abagabo kubona abakobwa bajyana mu buzima bw’ijoro.

Aya magambo yahise akurura impaka ndende ku mbuga nkoranyambaga, aho bamwe bayashyigikiye mu gihe abandi bayamaganye, bavuga ko atesha agaciro akazi gatunze abakobwa benshi.

Agaruka kuri ayo magambo, Muyango yavuze ko adashyigikiye uburyo aka kazi kagereranywa n’uburaya, ashimangira ko buri wese akwiye kubahwa ku murimo akora.

Yagize ati 'Ntitukajye dusebya ibintu abantu bakora, sibyo. Kubera ko nanjye Muyango ntabwo ndi hasi ku buryo ntashobora kugenda ngo nshake ikintu kwa KNC nza nkavuga kandi kikamenyekana, rero ntabwo ari uko njyewe nteye. (Gusa) ntabwo twemeranya.'

Muyango yasobanuye ko kuyobora ibirori cyangwa kwakira abitabiriye ibikorwa bitandukanye (MC cyangwa Host) ari umwuga usaba ubunyamwuga, icyizere no kumenya guhuza abantu, bityo ko bidakwiye kuwusiga icyasha rusange.

Hagati aho, Bruce Melodie yamaze kugera i Bruxelles ku wa 3 Werurwe 2026 aho azahurira na Sheebah Karungi mu gitaramo giteganyijwe ku wa 7 Werurwe. Aba bahanzi bombi basanzwe bazwi cyane mu karere, ndetse banakoranye indirimbo yise Embeera Zo yakunzwe mu Rwanda no muri Uganda.

KNC mu minsi yashize yavuze ko ‘Hosting’ ari nk’uburaya

Muyango yavuze ko atemeranya na KNC

APR FC yageze muri 1/4 cy’Igikombe cy’Amahoro isezereye Kiyovu Sports ku giteranyo cy’ibitego 2-0.

Yabigezeho kuri uyu wa Gatatu tariki ya 4 Werurwe 2026, ni nyuma y’uko amakipe yombi yanganyije ubusa ku busa, ni mu gihe mu mukino ubanza APR FC yawutsinze 2-0.

Muri uyu mukino wabereye kuri Kigali Pele Stadium, umutoza wa APR FC yari yabyoroheje ubona yakoze impinduka nyinshi nka Lamine Bah wari umaze igihe atabanzamo, Mamadou Sy, Mugisha Gilbert nabo bari babanjemo ni mu gihe abakinnyi nka Dao, Djibril Ouattara, William Togui Mel bari babanje hanze.

Kiyovu Sports wabonaga ifite inyota y’ibitego ntabwo yigeze ibasha kumenera mu bwugarizi bwa APR FC nubwo bageragezaga kurema amahirwe atandukanye.

APR FC nayo yari ifite impamba y’ibitego bibiri, ntiyabashije kubona ikindi umukino urangira ari 0-0, APR FC ikomeza ku giteranyo cy’ibitego 2-0.

Muri 1/4, APR FC izahura na Gasogi United yasezereye Musanze FC ku giteranyo cy’ibitego 3-2. Umukino ubanza wabaye 1-1 uwo kwishyura Gasogi itsinda 2-1.

Indi mikino yabaye kuri uyu wa Gatatu, yasize Bugesera FC yasezereye Amagaju FC ku giteranyo cy’ibitego 4-3 (umukino ubanza Bugesera yatsinze 2-1 uwo kwishyura banganya 2-2), izahura na Etincelles FC yasezereye Mukura VS kubera igitego cyo hanze.

Umukino ubanza wabereye i Musanze, Mukura VS yatsinze 2-1 uwo kwishyura wabereye mu Magepfo Etincelles yatsinze 3-2 bihita biba 4-4 mu mikino yombi, Etincelles ikomeza kuko ari yo yatsindiye ibitego byinshi hanze.

APR FC yageze muri 1/4 cy’Igikombe cy’Amahoro isezereye Kiyovu Sports

Umukinnyi wa filime Nyarwanda ugezweho, Nyambo Jesca yahakanye amakuru yari amaze iminsi avuga ko yaterewe ivi, ahamya ko ari AI (Ubwenge bugangano) ababikoze bifashishije.

Hamaze iminsi ku mbuga nkoranyambaga ifoto ya Nyambo ari Doha muri Qatar, ari ahantu imbere ye hapfukamye umusore afite impeta mu ntoki amubaza niba yakwemera kuzamubera umugore.

Nyambo aba yipfutse ku munwa ubona ko byamutunguye cyane atarimo kubyiyumvisha.

Nyambo yabwiye ISIMBI ko atari byo ahubwo abantu bifashishije amafoto yashyize ku mbuga nkoranyambaga ze ari Qatar maze bakoresha AI maze bamugaragaza yaterewe ivi.

Ati “Rero biriya bintu byo gutererwa ivi ni amakuru y’ibinyoma, ni AI (ubwenge buhangano) dore ko ntacyo itazakora.”

Yakomeje avuga ko inzozi za buri wese ari ugukora ubukwe, gusa ngo kuri we yatunguwe no kubona baramaze no kumusohorera ‘Save the Date’

“Buri mukobwa wese aba abyifuza, guterwa ivi hagarukiraho indi mihango, n’integuza y’ubukwe bwanjye (Save the Date) barayikoze, n’aho ubukwe buzabera barabirangije.”

“Ahubwo mbere y’uko mujya gukoresha AI mujye mubanza mumbaze ngo ‘urifuza ko ubukwe bwawe buzabera he? ryari, urabuteganya gute?’ Noneho mukore ibijyanye n’ibyifuzo byanjye.”

Nyambo wavuze ko adakundana na Titi Brown, yavuze ko afite umukunzi kandi babirimo neza, igihe nikigera bazakora ubukwe.

Yavuze ko ibi ari AI

Ifoto yakoreshejwe bamugaragaza yaterewe ivi

Mu minsi ishize yari Doha muri Qatar

Nizeyimana Didier uzwi mu ruganda rw’umuziki nka Muchoma, yasabye ko atakabaye akurikiranwa n’Urukiko afunzwe kuko ibyaha byokorewe kuri YouTube yashinze byaryozwa ababikoze kuko bahari.

Ni mu iburanisha mu Bujurire ku ifungwa n’ifungurwa by’agateganyo ryabereye mu Rukiko Rwisumbuye rwa Nyarugenge kuri uyu wa 4 Werurwe 2026.

Uru rubanza rukaba ruregwamo abantu 5 gukwirakwiza amakuru y’ibihuha binyuze ku muyoboro wa YouTube, abo ni; Barafinda Sekikubo Fred, Mazimpaka Patrick, Nizeyimana Didier (Mucoma), Nkeramihigo Japhet na Tumukunde Djuma.

Ni ibiganiro byatambukaga ku miyoboro ya YouTube ya Umurwa Live TV, Ndasinwa Tv n’itatu ya Mucoma ari yo Sana TV, Saneza TV hamwe na Mucoma Sana TV, ariko nyir’ubwite ahamya ko ayinyuzaho imiziki gusa kuko asanzwe ari umuhanzi.

Muchoma we yaburanye agaragaza ko hari impamvu nyinshi asanga akwiye gukurikiranwa adafunze ahereye ku kuba amakuru y’ibihuha yanyuzwaga ku miyoboro ya YouTube yashinze atari we wayagenaga.

Yagaragaje ko ubwo yagarukaga mu Rwanda yaje nk’umushoramari ashora mu by’amahoteli i Rubavu ndetse ashinga n’imiyoboro ya YouTube ya Saneza TV na Sana TV izajya ikorerwaho ibiganiro mu gihe iyo iyitwa Mucoma Sana yo avuga ko ayinyuzaho imiziki gusa.

Bitewe n’uko atari azobereye mu by’itangazamakuru byatumye aha akazi uwitwa Nshimiyimana Methode ngo amubere Umuyobozi Mukuru w’ibyo bikorwa ndetse ajye akurikirana kandi agene ibitangazwa kuri iyo miyoboro n’abandi banyamakuru bakoraho.

Ati 'Nashyizeho 'manager’ aba na 'Chief Editor’ ngo agenzure ibyo bikorwa byose kuko ni ibikorwa ntari mfiteho inararibonye ni yo mpamvu nashatse abantu babizi.'

Asanga rero uwo Nshimiyimana ari we ukwiriye kubibazwa kuko ngo amashusho bivugwa ko yakorewemo ibyaha yashyizweho we ari muri Amerika, aho asanzwe akora akazi ko gutwara amakamyo ariko na we ngo yaje gufata umwanzuro wo kuyisiba kuko yabonaga itamunyuze.

Yongeyeho ko uretse kuba aburanye adafunze byamufasha gukomeza gukurikirana ibikorwa bye kuko binatunze abandi babikoramo, na Pasiporo ye yafatiriwe ku buryo adashobora gutoroka Igihugu ndetse akaba afite n’umuryango we yitaho.

Avuga kandi ko ikigaragaza ko iyo miyoboro yashinze nta mugambi mubi yari igamije ari uko nyuma yagiye akomeza kuza mu Rwanda nta cyo yikanga ku buryo iyo aba umuntu ufite icyo yikeka yari kuguma muri Amerika dore ko afite n’ubwenegihugu bwaho.

Tumukunde Juma wari ushinzwe kujya gutara amakuru yagaragaje ko akwiye kuburana adafunze kuko ari we mukuru iwabo mu muryango w’abana batanu, kandi ko ari we ushinzwe kubitaho kuko nyina yagize ikibazo cyo mu mutwe yatewe na Jenoside yakorewe Abatutsi.

Mazimpaka Patrick usanzwe afite ubumuga bw’uruhu we yagaragaje ko kumukurikirana afunze bitamworohera kuko imibereho yo mu igororero itamworohereza muri iyo miterere kandi ko afite umugore n’umwana asanzwe ashakira imibereho.

Ikindi yagaragaje ni uko mu cyaha bakurikiranyweho we asanga atari we wo kubibazwa kuko yakoraga nk’umunyamakuru abaza umutumirwa ku buryo amagambo agize icyaha yaba yaravuzwe yabazwa abayavuze kuko icyaha ari gatozi ku wagikoze.

Nkeramihigo Japhet wari ushinzwe gufata amashusho muri ibyo biganiro we yabanje kugaragaza ko asanga nta cyaha yakoze kuko amashusho yafataga yayahaga ababishinzwe bakagena ibikurikiraho nta rundi ruhare abigizemo.

Barafinda akaba yitabye Urukiko akaba atigeze aburana ngo avuge impamvu yajuriye. Umwanzuro ukazasomwa ku wa Mbere tariki ya 9 Werurwe 2026 saa cyenda.

Muchoma yasabye ko hakurikiranwa abakozi yahaye akazi kuko ari bo bakoze amakosa