Nyambo Jesca yavuze ko atigeze akundana na Titi Brown ndetse ko nta n’ibizabaho, ngo bari inshuti gusa banabikoreramo amafaranga.
Kuba batagikundana abantu babyumva, gusa kuvuga ko batandukanye ni indi ngingo abantu baganiraho bafite umwanya, ahanini bitewe n’uburyo aba bombi umubano wabo wari umeze, umwe kudahisha amarangamutima afitiye undi ku mbuga nkoranyambaga, kwambara imyenda isa bakanayishyira ku isoko… Byatumye bagira igikundiro kidasanzwe.
Mu kiganiro yagiranye n’ikinyamakuru ISIMBI, Nyambo Jesca yahakanye ko adakundana n’umubyinnyi Titi Brown.
Ati “Ntabwo nzashakana na we, kuki se nashakana na we? None se njyewe nkundana na we? Ntabwo dukundana nta n’ubwo twigeze dukundana, kandi ibi ni ubwa nyuma mbivuzeho.”
Yakomeje avuga ko batigeze bakundana kandi ko nta n’ibizabaho, bari mu kazi gusa.
Ati “Ntabwo njye na we twigeze dukundana nta nubwo bizabaho, twabaye inshuti. Icyabayeho ni uko byagiye ku mbuga nkoranyambaga tukaba turi no mu kazi tubibyaza n’amafaranga, none se iriya mipira ntiyaguzwe? Hari abantu bakundaga kuba twari inshuti magara, ikindi twabikozemo n’akazi, twari inshuti kandi inshuti ya we iragufasha mu kazi. N’ubu turi inshuti.”
Muri Mata 2024 ni bwo Titi Brown wavugwaga mu rukundo na Nyambo ariko bakabihakana ahubwo bakavuga ko ari ‘Aba-Besto’, yaganjwe n’amarangamutima agaragaza urukundo afitiye Nyambo ubwo yamwifurizaga isabukuru y’amavuko.
Kuva icyo gihe imitoma yahoraga yisukiranya buri umwe abwira undi amagambo meza y’urukundo, ari n’aho abantu bahereye bemeza ko bakundana koko.
Nyambo yavuze ko atigeze akundana na Titi kandi ko bitazanabaho
Dj Brianne yavuze ko abakobwa bakora akazi ko gutegura ibirori no kureshya abakiriya mu bizwi nka 'Hosting’ kwigira kuri Muyango Claudine kuko abikora neza, yihesha agaciro bikaba hari aho bimugejeje.
Mu kiganiro yagiranye na ISIMBI, Brianne yavuze ko imwe mu mpamvu zituma hari abakobwa bahura n’ihohoterwa rishingiye ku gitsina, ari uko bajya muri aka kazi badafite intego isobanutse n’imbago bihaye itagomba kurengerwa n’abakoresha babo.
Yagarutse kuri Muyango Claudine nk’urugero rw’umuntu wubatse izina rye akava ku rwego rwo guhostinga gusa, akaguka akaba n’umushyushyarugamba (MC) mu rwego kugira ngo hatazagira umukoresha we umufata nk’uri aho kugira ngo yishyurwe amaze gusambanywa.
Yagize ati 'Muyango aho batangiriye kuvuga ko guhostinga ari uburaya yahise abivamo, afata indi ntera. Ubu ni MC, akora ku rubyiniro mu birori bikomeye, ku buryo nta muntu wamubona ngo yumve ko kugira ngo akomeze akazi bisaba ko asambanywa.'
Brianne yananenze abibasira Muyango ku mbuga nkoranyambaga, abashinja kumuca intege aho kumushimira imbaraga n’umuhate agaragaza. Yibukije ko kuba umuntu akora akazi k’ijoro bitavuze ko adafite indangagaciro, anasaba abantu kureba kure kurushaho.
Yatanze urugero rw’uburyo Muyango agaragara mu birori bikomeye birimo nka Tour du Rwanda, aho aba ayoboye gahunda ku rubyiniro umunsi wose, agashyushya imbaga yitabiriye, bukira agasubira mu yindi mirimo.
Ati 'Arakora, akabikora neza, ariko hari abamwita amazina amutesha agaciro.'
Brianne yashimangiye ko abantu bakwiye guhindura iyi myumvire ahubwo bagatera imijugujugu iherekejwe no guhangayikira bamwe mu bakobwa b’i Kigali batunzwe no kujya kwigurisha mu bihugu byo mu Burasirazuba bwo hagati birimo Qatar, Oman na Leta Zunze Ubumwe biri kubarizwamo umutekano muke.
Guhera mu ntangiriro z’iki cyumweru, umwuka mubi wongeye gututumba hagati ya Iran n’ihuriro ry’ubufatanye bw’ibihugu birimo Leta Zunze z’Amerika ndetse na Israel n’inshuti zabyo z’abanyaburayi, ibi byanakurikiwe n’inkubiri y’ibitero by’ibisasu bya kirimbuzi ku mpande zombi byanaguyemo uwari Umuyobozi w’Ikirenga wa leta ya Tehran, Ayatollah Ali Khamenei.
Dj Brianne yasabye abakobwa bakizamuka kwigira kuri Muyango
DJ Brianne yahishuye ibihe bitoroshye yanyuzemo ubwo yatangiraga umwuga wo kuvanga imiziki kugera no ku rwego rwo gutira imyenda yo kwambara mu gihe yabaga agiye gukora ibiganiro.
Esther Brianne Gateka wamamaye mu kuvanga umuziki nka Dj Brianne yatangaje ko mu myaka itandatu ishize ubwo yarimo yishakisha mu rugendo rwo kubaka izina afite uyu munsi yahuriyemo n’inzitane zirimo ubukene bukabije, gusuzugurwa ndetse no kwirengagizwa bikozwe n’abo yabonagamo amakiriro ye.
Mu kiganiro na ISIMBI, Dj Brianne yavuze ko igihe cyose yajyaga agira gahunda yamusabaga kuba yambaye umwambaro ugaragara neza byamusabaga ko ajya kuzenguruka mu nshuti ze azitira imyenda yo kwambara kugira ngo hatagira umucishamo ijisho.
Ati 'Njyewe ukuntu najemo muri ibi bintu meze, ntafite ikintu na kimwe nkaza gukora ibiganiro byo kuri Youtube natiye imyenda n’inkweto, mbese icyo gihe nta kintu cyanjye nabaga nicaranye aho. Navaga aho mpita nsubiza iby’abandi.'
Mu kugaragaza ugukomera k’ubu buzima yanyuzemo, Brianne yavuze ko rimwe na rimwe hari ubwo yajyaga atinya guhura n’uwo yabaga yatiye iyo myenda mu gihe yabaga yarengeje igihe babaga bemeranijwe ko aza kuyigarurira.
Ati 'Najyaga ntira umuntu ikabutura namubwiye ko nari buyijyanye ku cyumweru gusenga yayimbonana ku wa mbere mu kiganiro agahita abona ko narenze ku mabwiriza ndetse nanjye nkatinya guhura nawe.”
Brianne yongeyeho ko byageze mu gihe kimwe akicara agasaba Imana ko rimwe nawe yazabona imyenda yazajya yambara ahinduranya akabura amahitamo kubera ubwinshi n’ubwiza bwayo kandi ntawe yigeze ayitira.
Dj Brianne yavuze uburyo yatangiye umwuga nta n’imyenda afite
Uwayezu Jean Fidele wahoze ayobora Rayon Sports, yavuze ko adashobora kongera kuyobora iyi kipe kandi ko ikwiye umuyobozi utarigeze ugaragara mu bibazo byayo.
Uyu mugabo wayiyoboye kuva 2020 kugeza 2024 nabwo yari yagiyeho nyuma y’uko hagaragaye ibibazo mu miyoborere.
Yavuyeho yahise asimburwa na Twagirayezu Thaddée wari umuyobozi w’Umuryango ndetse n’Urwego rw’Ikirenga rwari ruyobowe na Paul Muvunyi.
Yakomeje avuga ko Rayon Sports yakabaye ifite abayobozi bake bahuje kandi batagaragaye mu bibazo iyi kipe imazemo iminsi, bakorera inyungu z’ikipe atari abakorera inda zabo.
Ati “Bagomba kuba ari abantu bakwiriye kuba bahuje, ari abantu bakorera Rayon Sports bashaka kuyibyaza umusaruro w’igihe kirambye, atari abantu bakorera ibyubahiro byabo cyangwa se inda zabo.'
Uwayezu Jean Fidele wayoboye Rayon Sports ndetse igikombe ifite ikaba ari icyo iheruka akiyiyobora (Igikombe cy’Amahoro) yarahiye ko niyo yakongera kugirirwa icyizere n’abakunzi b’iyi kipe atakongera kuyiyobora.
Yavuze ko hakwiye impinduka mu buyobozi bwa Rayon Sports
Queen Ringo wamenyekanye mu gukina amafilime yatangaje ko atajya ata umwanya ku bantu bakomeje kumwita indaya nyuma yo gutandukana na Captain Regis agahita atangirana umushinga mushya n’umuhanzi Nizzo Kaboss.
Uyu wigeze kuvugwa mu rukundo na Captain Regis byakurikiwe n’imishinga myinshi bahuriyeho yavuze ko ubukana bw’icyo abantu bafata nko guharabikwa muri rubanda ahanini bituruka ku mitekerereze y’ubikorewe ndetse n’agaciro abiha mu buzima bwe.
Mu butuma yanyujije kuri shene ya Youtube, Queen yagaragaje ko buri muntu wese afite uburenganzira bwo kureba icyo yashyize ku mbuga nkoranyambaga ze zose ndetse ibyo bikajyana no kwifashisha ahatangirwa ibitekerezo hashyizweho n’abashinze izo mbuga mu kugaragaza amarangamutima ashobora kuba ahabanye n’ukuri guhari.
Ati “Buri wese yemerewe kugaragaza igitekerezo ku byo namweretse akurikije uburyo yabonye icyo kintu. Ibyo kuvuga ngo ndi indaya, si njyewe muntu wa mbere waba wiswe indaya kandi niyo untutse ko ndi indaya ntabwo bivuze ko mpita mpinduka yo.'
Queen yanongeyeho ko nubwo benshi mu batekereza ko bari kumusebya bamwita indaya ari ukumusenya ahubwo ko bimufasha kwinjiriza amafaranga menshi ku mbuga nkoranyambaga.
Ati 'Buriya iyo abantu bari kugutuka ari benshi njyewe mbifata nk’aho ari intsinzi ikomeye kuko mba ndimo no kwinjiza amafaranga menshi ahubwo njyewe nanakwishimira ko bakomeza gukora icyo bita kuntuka.'
Kuva mu 2024 ubwo byamenyekanaga ko Captain Regis yatandukanye na Micky bari bamaze igihe bakundana, yahise agaragaza ko yamusimbuje Queen Ringo. Kuva batangira urugendo rw’urukundo, aba bombi bakunze kugaragara mu mashusho bahuriyemo, filime bagiye bakorana ndetse banatemberana ahantu hatandukanye.
Ku gicamunsi cyo kuri uyu wa 03 Werurwe 2026, mu Kagari ka Masaka, Umurenge wa Rugalika ho mu Karere ka Kamonyi hatangijwe ku mugaragaro igikorwa cyo kwishyura Ubwisungane mu kwivuza( Mituweli) 2026-2027 hagendewe kuri Sisitemu Imibereho. Imiryango ibiri ari nayo yabimburiye abandi baturage b'Akarere ka Kamonyi, barimo uwo mu cyiciro cy'abishyura ibihumbi 8 n'uwo mu cy'abishyura Ibihumbi 20, babwiye intyoza.com ko barebye ku gaciro k'Ubuzima kuruta ak'amafaranga kuko ngo yo ntawe uhaga kuyashakisha. Bishyuye ntakangononwa banasaba abandi guha agaciro Ubuzima kuruta Amafaranga.
Nzaramba Focus, umuturage wo mu Mudugudu wa Rwimondo, Akagari ka Masaka ho mu Murenge wa Rugalika, ahagarariye umuryango w'abantu batandatu, aho bose yabishyuriye Mituweli ingana n'amafaranga y'u Rwanda ibihumbi ijana na makumyabiri( 120,000Frws). Bivuze ko ari mu cyiciro cy'abishyura ibihumbi 20 ku muntu umwe.
Aganira n'Umunyamakuru wa intyoza.com yavuze ko ashyize ku munzani w'Ubuzima, asanga nta kiruta ubuzima kuko ngo n'ushaka amafaranga abikora kuko afite Ubuzima bwiza, ariko ngo mu gihe ntabwo, nta nakimwe waba ugihihibikanira.
Yagize kandi ati' Ibintu byose ni ubushake!, burya iyo ufite ubushake ikintu cyose uragikora kandi ukagishobora. Mituweli ntawe utayishobora, ahubwo mbona ari ikibazo cy'imyumvire no kudaha agaciro Ubuzima. Twajyaga twivuza ku buryo budasobanutse ariko ubu indwara zose zashyizwemo ari nayo mpamvu mbona ko tuzivuza neza'.
Yongeyeho ati' Kwikura amafanga Ibihumbi 120 si ikintu cyoroshye nk'umuturage wo mu cyaro, ariko na none njyewe nshyira ku munzani, Ubuzima n'Amafaranga. Uyu munsi wanyiba amafaranga cyangwa nkayata ngashaka andi nubwo kuyabona biba bitoroshye, ariko se Ubuzima bugiye, ndamutse ndwaye si mbashe kwivuza byaba bimariye iki ko n'ayo mafaranga ntaba nkiyashatse'?.
Nzaramba, asaba buri wese guha agaciro Ubuzima kuko ngo aribwo buhenze kurusha Amafaranga. Ati' Hari ibimina tugira aha ngaha bya dutabarane, nyamara mbona ko mbere ya byose, aho gutabara umuntu wabanza ubwawe ukitabara, ukivuza kuko ibi bimina byo guteganya gupfa, umuntu akwiye kubanza guteganya kwivuza. Ntawe ukwiye kwiganyira ku kwishyura Mituweli kuko utabiha agaciro abyumva yarwaye cyangwa se yarwaje, nibwo umenya agaciro k'Ubuzima'.
Emmanuel Ngendahimana, atuye mu Mudugudu wa Taba, Akagari ka Masaka ho mu Murenge wa Rugalika. Avuga ko ku muryango w'abantu bane afite, mbere yishyuraga ibihumbi bitatu(3,000Frws) kuri buri muntu, ariko ubu Sisitemu Imibereho yamushyize ku bishyura Ibihumbi umunani(8,000Frws) kuri buri muntu, bivuze ko aho yishyuraga ibihumbi Cumi na bibiri(12,000Frws), yishyuye ibihumbi Mirongo itatu na bibiri(32,000Frws).
Meya Dr Nahayo Sylvere, Umuyobozi w'Akarere ka Kamonyi atangiza ku mugaragaro Ubwisungane mu kwivuza( Mituweli) 2026-2027 bufatiye kuri Sisitemu Imibereho, yavuze ko abaturage b'Akagari ka Masaka bumva neza Ubwisungane mu kwivuza kuko ngo n'umwaka ushize aribo babaye abambere mu karere ku kwishyura Mituweli, none ngo ni nabo babaye abambere mu gutangirana na Sisitemu Imibereho.
Dr Nahayo Sylvere, Meya wa Kamonyi.
Yagize ati' N'Umwaka ushize babaye abambere mu karere kose. Bigaragaza rero yuko bumva neza ikijyanye n'ubwisungane mu kwivuza. Bumva inyungu yo kugira ubwisungane mu kwivuza, batitaye ku mafaranga kuko icyo bareba ni Ubuzima bwabo, ari nacyo dushishikariza abaturage bacu, kureba agaciro k'Ubuzima mbere na mbere'.
Dr Nahayo Sylvere, yabwiye intyoza.com ko iki gikorwa cyo gutanga Ubwisungane mu kwivuza kirakomereza mu bindi bice byose by'Akarere mu mirenge yose, abaturage bashishikarizwa gutanga Ubwisungane mu kwivuza cyane ko ngo hari impinduka zabaye aho hari Serivise zongewe ku zo bajyaga bahabwa mbere, bityo bakaba bagomba gusobanurirwa.
Yagize kandi ati' Abaturage bacu ntabwo bagakwiye gutekereza cyane ku kibazo cy'amafaranga, bakwiye gutekereza ku Buzima bwabo no kuri Serivise nyinshi kandi zihenze zongewe mu zo bahabwaga. Abesamihigo ba Kamonyi, ni bagende mu cyerekezo cyo gusigasira Ubuzima bwabo bishyura Ubwisungane mu kwivuza kuko barwaye bakwishyura menshi aruta ayo basabwa none. Amafaranga ahora akenewe mu bikorwa bitandukanye ariko icya mbere ni Ubuzima, abantu bariho kubera ko bafite Ubuzima'.Â
Mu gutangiza iki gikorwa cyo kwishyura Ubwisungane mu kwivuza( Mituweli) ifatiye kuri Sisitemu Imibereho 2026-2027, Abanyamasaka bakoze ibirori bishimira ko besheje Umuhigo wa Mituweli 100 ku ijana(100%) muri 2025-2026. Bakoze Ubusabane bumva icyanga cy'ikigiro, barasangira ariko kandi baniyemeza kudasubira inyuma mu kwishyura Mituweli. Bijejwe ko abafite ibibazo ku byiciro by'amafaranga basabwa muri Sisitemu Imibereho bazafashwa bigakosorwa.
Meya Dr Nahayo Sylvere, ashimira aba bagabo babimburiye Abanyamasaka n'Abanyakamonyi muri rusange kwishyura Mituweli bagendeye kuri Sisitemu Imibereho.
Umutsima bawukase, barasangira bishimira ko besheje Umuhigo wa Mituweli 2025-2026.Inkuru y'Ikigori yabara uwakiriyeho.
Indege bwite ya rutahizamu wa Al Nassr muri Saudi Arabia, Cristiano Ronaldo yamaze kugera muri Espagne, ni nyuma y’ibitero Iran ikomeje kugaba muri iki gihugu.
Nyuma y’uko USA na Israel zishoje intambara kuri Iran, nayo yatangiye kugenda irasa mu bihugu bitandukanye aho Leta Zunze Ubumwe za Amerika zifite ibirindiro bya gisirikare.
Saudi Arabia ni kimwe mu bihugu Iran yarasheho cyane aho indege 2 zitagira abapilote (drone) zarashe Ambasade ya USA muri Saudi Arabia iherereye mu murwa mukuru, Riyadh ari naho Cristiano Ronaldo n’umuryango we batuye.
Nyuma y’iki gitero Private Jet ya Cristiano Ronaldo yahagurutse Saudi Arabia yerekeza Spain mu mujyi wa Madrid, nubwo bitaremezwa ko Ronaldo ayirimo, amakuru avuga ko yaba yahunze n’umuryango we kugira ngo iby’iyi ntambara arebe iyo bigana.
Iyi ndege ya Cristiano utarimo gukina kubera imvune, ikaba yanyuze muri Afurika mu Misiri, yambuka Inyanja ya Mediterrane (Mediterranean Sea) ibona kugera muri Espagne.
Iyi ndege yaguze amayero miliyoni 61, yahagurutse saa mbili za nimugoroba zo muri Saudi Arabia, igera muri Spain saa saba z’ijoro.
Private Jet ya Cristiano yamaze kugera i Madrid
Ronaldo n’umugore muri 2024 ubwo bari muri Private Jet yabo
Umuhanzi Nyarwanda, Itahiwacu Bruce uzwi nka Bruce Melodie yamaze kugera mu Bubiligi aho afite igitaramo mu Mujyi wa Brussels tariki ya 7 Werurwe 2026.
Ni igitaramo cyiswe Afro Legacy, cyateguwe mu rwego rwo kwizihiza umunsi mpuzamahanga wahariwe abagore wizihizwa buri tariki ya 8 Werurwe, kikazaba mu ijoro riwubanziriza.
Bruce Melodie, umwe mu bahanzi nyarwanda bakunzwe cyane akaba yamaze kugera mu Bubiligi aho yavuze “Brussels nahageze ndi mu mujyi kandi nditeguye muzaze twishimane tariki ya 7/3 muri Birmingham Palace, njyewe ngiye gutangira imyitozo.”
Iki gitaramo kizagaragaramo Dj Princess Flor umunyarwandakazi uzwi cyane ku rwego mpuzamahanga mu kuvangavanga imiziki, azaba afatanya na Dj Vicious na Dj Saido bitezweho kuzacuranga zimwe mu njyana zikunzwe cyane muri Afurika nka Afrobeat na Dancehall.
Dj Brianne wamamaye mu kuvanga vanga imiziki n’inshuti ye Tesha bagiye kwerekeza i Burayi gusabana n’abakunzi babo.
Aba bombi bakunzwe cyane binyuze no biganiro bakora bitambuka kuri “Dj Brianne Vogue” bamaze kugira abakunzi benshi mu gihugu no hanze yacyo.
ISIMBI yamenye ko nta gitaramo cyangwa ikindi kintu icyo ari cyo cyose kijyanye n’akazi kizaba kibajyanye ahubwo ari ugusabana n’abakunzi babo baba i Burayi.
Biteganyijwe ko bazahaguruka mu Rwanda tariki ya 7 Werurwe 2026 aho kuri gahunda bazajya mu bihugu bitatu burimo u Bufaransa, u Bubiligi na Polond.
Ikinyamakuru The New Times cyari cyatangaje ko uyu mukinnyi wabaye kapiteni w’Ikipe y’Igihugu Amavubi, yasezeye gukina umupira w’amaguru burundu.
Haruna wari warasezeye mu Mavubi, iki kinyamakuru cyanditse ko yagitangarije ko 'Nahagaritse gukina umupira w’amaguru nk’uwabigize umwuga. Mu minsi ya vuba turategura umukino wo kubishyira ku mugaragaro. Twavuganye na FERWAFA kuri uwo mukino kandi twizeye neza ko bizakunda. Ni umwanya uzaba ari mwiza ku bafana n’abakinnyi ntabwiye ko nasezeye.'
'Nakoze byinshi nari nshoboye mu mupira w’amaguru, ubu ni umwanya wo kureba ibindi bimpa amahirwe. Ndacyafite imbaraga zo gukina, ariko ni byiza ko nshyira imbaraga ku masomo yanjye natangiye yo gutoza.'
Abinyujije ku mbuga nkoranyambaga ze, Haruna Niyonzima yahakanye aya makuru aho yavuze ko atarasezera, wenda bizaba vuba cyangwa kera.
Ati “Ntabwo ari ukuri sinasezeye ku mukino mwiza (nk’umukinnyi). Umunsi umwe nzabikora… Wenda ni vuba cyangwa nyuma, ni inde ubizi? Ariko igihe ntikiragera, si nonaha.”
Haruna Niyonzima akaba amaze igihe nta kipe afite aho aheruka mu ikipe ya AS Kigali mu mwaka w’imikino wa 2024-25, muri iyi minsi akaba ahugiye mu bijyanye n’amasomo y’ubutoza aho afite impamyabushobozi y’ubutoza yo ku rwego rwa C yabonye muri 2019, itangwa n’Impuzamashyirahamwe y’Umupira w’Amaguru muri Afurika (CAF).
Akaba kandi ari mu batoza 13 batsindiye kuzajya gukarishya ubumenyi mu gihugu cya Spain, akaba ari ku bufatanye bw’u Rwanda n’ikipe ya Atletico Madrid.
