Blog

Umuhanzi Nyarwanda mu Njyana Gakondo wibera i Burayi mu Bubiligi, Lionel Sentore nyuma yo gushakana n’umukinnyi wa Sinema Nyarwanda Munezero Aline [Bijoux] ariko ntibigende neza, yavuze ko ubu afite undi mukobwa kandi mwiza bari mu rukundo.

Ni kiganiro yahaye ikinyamakuru ISIMBI yahamije ko ubu anezerewe n’urukundo rushya kandi bakaba bamaranye igihe.

Ati “Umuntu rahari cyane, umuntu watowe mwiza cyane, arahari cyane ni ukuri ku Imana. Tumaranye igihe kinini, kirimo gihagije.”

Abajijwe ikintu cyamutinyuye yongera kujya mu rukundo nyuma yo kudahirwa n’urugo rwa mbere, yagize ati “Ni igeno ry’Imana, Imana iba ifite ibintu igenera umuntu, ikakunyuza muri bino kugira ngo uzabone biriya, ni muri ubwo buryo nabivugamo.”

Ku kijyanye n’ubukwe yirinze kuvuga byinshi ariko ahamya ko byose bishoboka kandi bikorwa n’Imana.

Muri Mutarama 2022 ni bwo Lionel Sentore na Bijoux bakoze ubukwe biyemeza kubana akaramata ariko nyuma y’igihe gito bahise batandukana.

Haiye havugwa byinshi ku cyasenye urugo rwa bo ariko muri Gicurasi 2023 ni bwo Sentore yeruriye ISIMBI ko yatandukanye na Bijoux kubera ko batabashije guhuza nta kindi.

Byari ku Cyumweru tariki 03 Ukuboza 2023, nibwo hari hateganyijwe kuba igitaramo cyiswe ‘University Connect Festival 2023’ cyari cyatumiwemo abahanzi babiri; B Threy ndetse na Davis D.

Iki gitaramo byarangiye kitabaye kubera habuze abantu na bake bakitabira, abahanzi bahita bakata bisubirira i Kigali bataririmbye n’akanya na gato.

Gupfa kw’iki gitaramo,benshi bagiye babigereka ku bintu bitandukanye, bagaragaza zimwe mu mpamvu zatumye abantu batacyitabira.

Abaturage batari bake batuye hanze ya Kaminuza, bavugaga ko  bahemukiwe kuba bimwe uburenganzira n’ubuyobozi bwa Kaminuza bwo kwinjira muri iki gitaramo.

Umwe yagize ati:” Ntakubeshye byarambabaje cyane, twaraje turi abantu benshi mu ma Saaha ya saa Saba ariko batwangira ko twinjira ngo ntabwo tubyemerewe kandi ubundi mbere twarabaga tubyemerewe nta mananiza, rero iyo baza kureka tukinjira, ntabwo igitaramo rwose cyari guhomba kubera ko twari turi benshi”.

Ushinzwe umutekano muri kaminuza ya Huye, Rutayisire Claude,avuga ko impamvu batigeze bemerera abo bantu kwinjira mu kigo, atari ikindi ahubwo ariyo masezerano uwateguye igitaramo yagiranye n’ubuyobozi bwa Kaminuza.

Agira ati:” Twebwe nta ruhare tujya tugira mu gutuma ibitaramo bihomba cyangwa se mu kwica imyidagaduro y’i Huye. Abantu bo hanze bakomeje kwijujutira ko tutigeze tubareka ngo binjire, ariko uwateguye igitaramo yari yabyumvikanyeho na Kaminuza. Ni ukuvuga ngo, iyo umuntu agiye gutegura igitaramo yumvikana na Kaminuza abakiriya ashaka, niba ari abanyeshuri cyangwa se abantu bose (no hanze ya Kaminuza) muri rusange”.

“Hanyuma rero uriya wateguye kiriya gitaramo yari yemeye ko abakiriya be ari abanyeshuri gusa. Ikindi kandi iyo aramutse avuze ko abakiriya be ari abanyeshuri ndetse n’abandi bantu bo hanze, icyo gihe hari ibindi bintu byinshi twumvikanaho bijyanye no gukaza umutekano kuko gucunga ubuzima bw’abanyeshuri bo muri Kaminuza, ni inshingano zacu”. 

Mu karere ka Huye ahazwi nko ku Mukoni munsi ya Kaminuza, hakunze kurangwa n’ubujura bwo kwambura abantu ibirimo telephone, Mudasobwa n’ibindi. Uyu muyobozi rero akomeza avuga ko ushobora kureka abantu bose bakinjira nta mutekano wakajijwe ugasanga habereyemo ibyaha bigendanye n’urugomo. Avuga ko iyo wemeye gukorera igitaramo i Huye, ukavuga ko abakiriya bawe harimo n’abantu bo hanze, haba hagomba kuzanwa abantu benshi bashinzwe umutekano urugero nko ku gitaramo cyabaye cya MTN Iwacu Muzika Festival, hari abashinzwe umutekano benshi baturutse hanze.

Urugero, ku masezerano InyaRwanda.com yabonye  agaragaza ko uwateguye iki gitaramo  cya B Threy na Davis D yari yiyemereye ko abo akeneye ari abanyeshuri gusa.

Hari abandi bantu bategura ibitaramo bavuga ko mbere Kaminuza yajyaga ifasha mu gutegura igitaramo, ugasanga nk’urugero Kaminuza ikijyanye n’amajwi n’urumuri (lighting and Sound), ariko kuri ubu umuntu akaba abyifasha byose.

Umuyobozi ushinzwe Umuco na Siporo muri Kaminuza,Gatsinzi Apolo, agira ati “Ariko se ubwo ni gute abantu baba batabafashije?, Iriya Sallé yonyine kuyikodesha hano hanze ni amafaranga atari make, umuriro ukoreshwa muri icyo gitaramo uba mwinshi cyane ndetse  n’amazi akoreshwa byose biba bihenze, ibyo rwose biba bihagije”.

Ubuyobozi  bwa Kaminuza kandi  bwongera kwibutsa abategura ibitaramo kwirinda kwipasa muremure ahubwo bagashima aho bishyikira. Bagira bati :” Erega na none nibo babyitera kenshi, usanga umuntu agiye gutegura igitaramo hanyuma udufaranga twose yifitiye akatumarira mu gutumira umuhanzi uhenze cyane urenze urwego rwe, kubera iki bagiye batumira abahanzi batari bubahende?.

Ku rundi ruhande na none, abashaka gutegura ibitaramo bavuga ko kuri iki gihe kugira ngo uzabone inzu mberabyombi ‘Main Auditorium’ yo gukoreramo igitaramo biba bigoye  kuko usanga haberamo ibintu byinshi bitandukanye.

Nyamara Gatsinzi we agira ati “Ntabwo abantu bose baba bagambiriye kujya hariya kubyina indirimo z’isi, hano muri Kaminuza abana bose tubafata kimwe. Hari abo usanga bashaka gusenga, kubyina indirimbo za gakondo, ndetse no gukoreramo ibindi bintu bitandukanye, rero ntabwo byashoboka ko kuva ku wa mbere kugeza ku cyumweru hahora hatumirwamo abahanzi gusa b’indirimbo z’Isi kuko haba hari n’abanddi bana bakeneye kwidagaduro mu bintu bakeneye”.

Si ibyo gusa bikomeza bishinjwa Kaminuza y’ u Rwanda mu kwica imyidagaduro y’i Huye, kuko abandi bavuga ko mbere hajyaga habaho amarushanwa agamije guteza imbere abahanzi bakiri bato no kubafasha kumenyekanisha impano zabo, ibi byose bikaba biri mu bituma i Huye hatakibasha kugira impano zikomeye mu buhanzi zihava ngo zijye guhatana ku isoko ry’umuziki.

Ku ruhande rw’abayobozi ba Kaminuza  bagira bati ” Kuri iki gihe ubundi usanga kwiga biba bingana na 90%, rero ugasanga kugira ngo bazabone umwanya wo kujya mu bindi birimo n’ubuhanzi birabagoye kuko kenshi baba bananiwe”.

Icyakora Gatsinzi, yahamirije InyaRwanda.com  ikintu kijyanye n’amarushanwa y’abafite impano mu ngeri zitandukanye agiye kugaruka vuba cyane ko kiri imbere mu bintu biri kwigwaho.

Muri rusange, Ubuyobozi bwa Kaminuza bunyomoza amakuru y’ibivugwa ko muri iyi minsi bari kugira uruhare mu kwica imyidagaduro y’i Huye, ahubwo bakemeza  bayishyigikiye bikomeye ahubwo abantu bakaba batabimenya. Ku ruhande rwabo, bavuga ko ku kijyanye no kuba ibitaramo bimwe bikorerwa i Huye bigashya/bigahomba, nta ruhare na ruto baba babigizemo ahubwo ko byose n’impamvu zitandukanye zirimo:

Kutamenya igihe nyacyo cyo guteguriraho igitaramo (ugasanga ateguye igitaramo abanyeshuri batarabona Buruse , cyangwa se akagitegura mu gihe cyo kwiga, harimo kandi kutamenyekanisha igitaramo cyabo, gukorana n’abantu batari abizerwa aho gukorana umwete n’umurava, bakiryamira gusa ndetse na duke turi kuvamo bakatwirira, kuzana abahanzi badakunzwe cyangwa se batagezweho  n’ibindi byinshi bitandukanye.

Ubwo Davis D na B Threy bazaga gutaramira muri Kaminuza nabuze  n’umwe 

Kaminuza y’u Rwanda ishami rya Huye bavuga ko ruhare na ruto  bagira mu gutuma ibitaramo bihomba

Ubuyobozi bwa Kaminuza buvuga ko buri kwiga ku kintu cyo kugarura amarushanwa agamije guteza imbere abahanzi bakiri bato no kubafasha kumenyekanisha impano zabo 

Umwaka wa 2023 ubura iminsi 25 gusa ngo ugere ku musozo, wabaye udasanzwe mu bisata byose bigize imyidagaduro, abahanzi baca uduhigo ku rwego mpuzamahanga, sinema nyarwanda iraguka, urwenya ruzamura urwego, abanyarwanda bahindura imyumvire.

Byumwihariko, muri uyu mwaka, u Rwanda rwakiriye ibyamamare bikomeye ku Isi, habera ibitaramo byitabiriwe n'amahanga, abanyarwanda baserukira u Rwanda hanze yarwo ndetse bamwe banegukana ibihembo byabonaga umugabo bigasiba undi.

Nubwo hari ibintu byinshi byagarutsweho cyane muri uyu mwaka, InyaRwanda yaguhitiyemo iby'ingenzi cyane bidateze kwibagirana mu mitwe y'abanyarwanda ndetse n'abanyamahanga bashoboye kubikurikirana.

1.     Ibitaramo mpuzamahanga byabereye i Kigali

Ku bakunzi b'ibitaramo n'ibirori muri rusange, uyu mwaka wababereye uw'amateka kuko ntibigeze babona akanya n'ako guhumeka. Mu Rwanda habereye ibitaramo mpuzamahanga bikomeye byitabiriwe n'ibyamamare binyuranye.

Muri ibi bitaramo twavuga nka Trace Awards 2023 yabereye mu BK Arena ku ya 21 Ukwakira, Giants of Africa Festival yamaze icyumweru cyose ibera muri BK Arena kuva tariki 13-19 Kanama 2023, Move Africa yatumiwemo Kendick Lamar iri kubica bigacika i Kigali n'ibindi byinshi.

Ibi bitaramo byahaye ibyishimo abanyarwanda, ibitangazamakuru bibyandikaho inkuru zitabarika, imbuga nkoranyambaga zirashyuha, ubukerarugendo burushaho kwinjiza.

2.     Ubukwe bw'ibyamamare nyarwanda

Kimwe mu bintu binezeza mu buzima bwa muntu, ni ubukwe bikaba akarusho noneho iyo ari ubw'icyamamare.

Muri uyu mwaka habaye ubukwe bwinshi bw'ibyamamare haba mu bwiza, sinema, muzika ndetse no mu zindi nzego

Mu bukwe butazibagirana harimo ubwa Nyampinga w'u Rwanda wa 2017, Miss Iradukunda na Ishimwe Dieudonne [Prince Kid] bwabaye nyuma y'ifungurwa ry'uyu mugabo wamaze igihe kinini afunzwe azira ibyaha yashinjwaga bishingiye ku ihohoterwa byavugwaga ko yakoreye abakobwa baciye mu irushanwa rya Miss Rwanda yari ahagarariye.

Ubundi bukwe butegerejwe mu mpera z'uyu mwaka, ni ubwa Miss Uwicyeza Pamela na Mugisha Benjamin [The Ben] nabwo buri mu bwavuzwe cyane muri uyu mwaka bitewe n'uburyo budasanzwe aba bombi bahisemo kubuteguramo, ibihe bidasanzwe n'amagambo yuje urukundo yagiye abaranga.

Hari kandi ubukwe bwa Bishop Gafaranga na Annette Murava bwateje impagarara mu itangazamakuru no ku mbuga nkoranyambaga.

Muri Werurwe 2023 nabwo habaye ubukwe bwa Uwineza Kelly wo mu Itsinda Mackenzies wasezeranye imbere y'amategeko ndetse n'imbere y'Imana n'umukunzi we Nsengiyumva David uri mu basirikare bafite ipeti rya Lieutenant mu Ngabo z'u Rwanda unakinira APR BBC.

Ubundi bukwe bwarikoroje, ni ubwa Bahati wamenyekanye mu itsinda rya Just Family warushinze na Unyuzimfura Cécile, wari usanzwe utuye hanze y'u Rwanda nyuma y'iminsi bakundana. Aba bombi basezeranye imbere y'Imana tariki 5 Kanama 2023 mu rusengero rwa Noble Family Church rwa Apôtre Munezero Alice Mignonne, maze buravugwa biratinda bamwe bashinja Bahati gukurikira Visa.

3.  Abahanzi nyarwanda baserukiye u Rwanda mu mahanga

Muri uyu mwaka, abahanzi benshi bashoboye kurenga umupaka w'u Rwanda bagurira ibikorwa byabo no mu mahanga binyuze mu bitaramo bagiye bahakorera, kuzenguruka imigabane ndetse n'ibindi bikorwa binyuranye bagiye bakorera hanze y'igihugu.

Mu bahanzi nyarwanda bahagarariye neza urwababyaye harimo Bruce Melody umaze iminsi muri Leta Zunze Ubumwe za Amerika, aho yahuriye ndetse agataramana n'umunyabigwi Shaggy wubashywe ku rwego rw'Isi ndetse banakoranye indirimbo 'When She is Around' ikomeje kuzenguruka umubumbe.

Abandi harimo Kenny Sol ukubutse muri Canada, Bushali wanditse amateka muri Uganda binyuze mu iserukamuco rya Nyege Nyege aherutse kuhakorera, Bwiza, Ariel Wayz, Massamba tutibagiwe igitaramo cy’amateka The Ben yakoreye mu Burundi  n'abandi benshi bagize uruhare rukomeye mu kumenyekanisha umuziki nyarwanda ku rwego mpuzamahanga.

4.     Imanza z'ibyamamare

Imanza z'ibyamamare nyarwanda zaravuzwe, zirandikwa biratinda. Mu bibanzweho cyane, harimo urubanza rw'umubyinnyi Tity Brown wafunzwe ashinjwa gusambanya umwana utujuje imyaka y'ubukure nyuma akaza kugirwa umwere, urwa Prince Kid wanaje gukatirwa  imyaka Itanu mu bujurire bw’Ubushinjacyaha  ariko  bikaba bivugwa ko  yacitse ubutabera atari mu Rwanda. 

Urundi rubanza n'ubu rukivugwa cyane ku mbuga nkoranyambaga, ni urw'umunyamakuru wari umenyerewe mu biganiro yatambutsaga kuri Youtube, Jean Paul Nkundineza warezwe na Nyampinga w'u Rwanda wa 2016, Mutesi Jolly. Mu byo Jean Paul aregwa harimo gutukana mu ruhame, guhohotera uwatanze amakuru ku byaha, gukoresha ibikangisho n'icyaha cyo gutangaza amakuru y'ibihuha.

Umuhanzi Jowest umenyerewe mu ndirimbo z'imitoma nka 'Pizza' n'izindi yatawe muri yombi ku ya 01 Gashyantare 2023 akurikiranweho gukoresha undi imibonano mpuzabitsina ku gahato. Yaje kurekuwa tariki 21 Gashyantare 2023 nyuma y'uko urukiko rubonye ko nta mpamvu zifatika zatuma akomeza kuburana afunzwe.

5. Ibihangano nyarwanda byihariye imbuga nkoranyambaga muri uyu mwaka

Igihangano aho kiva kikagera, kimenyekana cyane bitewe n'imbaraga nyiracyo yashyize mu kucyamamaza. Abanyarwanda, nabo bamaze kwiyungura ubumenyi mu bijyanye no kwamamaza ibikorwa byabo ndetse bagaragaje ko bavumbuye ibanga riri mu kwifashisha imbuga nkoranyambaga.

Mu ndirimbo zacicikanye ku mbuga nkoranyambaga harimo Bana ya Chriss Eazy yahuriyemo na Shaffy, Confirm ya Danny na None, Munda ya Kevin Kade, When She is Around ya Bruce Melodie afatanije na Shaffy, Oya Shn ya Butera Knowless, Njyenyine ya Yverry na Butera Knowless, One Time ya Shemi, Nuyu ya Malani Manzi, Fou De Toi ya Element EleéeH, Bruce Melodie na  Ross Kana, Mama Loda ya Calvin Mbanda na Kenny Sol, n'izindi nyinshi.

Hari n'ibisigo byakunzwe cyane ku mbuga nkoranyambaga nka 'Rudahinyuka' cya Junior Rumaga na Bahali Ruth, Narakubabariye Rumaga yakoranye na Bruce Melodie, Ndatsinzwe cya Dinah Poetess n'ibindi.

Hari kandi filime zakunzwe zirimo 'Umuturanyi Series,' 'Bamenya Series,'My Heart ya Killer Man , Impanga Series, Papa Sava, Maya Series na Comedy zitandukanye.

  

Perezida w’ikipe ya Sunrise FC, Hodari Hillary yatawe muri yombi n’Urwego rw’Igihugu rw’Ubugenzacyaha (RIB) aho akurikiranyweho kunyereza miliyoni 160 z’amafaranga y’u Rwanda.

Aya mafaranga akaba ari aya Koperative icuruza Amata i Nyagatare n’ibiyakomokaho (Nyagatare Dairy Marketing Cooperative) yari abereye umuyobozi akaba afunganywe na Muhoza Happy wari umubaruramari wa yo bakaba bafungiye kuri Sitasiyo ya Nyagatare.

Aba bagabo batawe muri yombi ku wa Mbere w’iki Cyumweru, amakuru ISIMBI yamenye ni uko bagiye muri Banki kwaka inguzanyo mu izana rya Koperative ariko ntibayikoreshe icyo bayisabiye.

Ibi bikiyongera ku bindi bifitanye isano no kunyereza umutungo nk’aho Hodari yakoreshaga imbaraga afite agashyira amavuta mu modoka ye bikandikwa ko ari mu ya Koperative akaba ari yo izayishyura, hakazaho no guhishira imicungire mibi ya Koperative.

Bahamwe n’icyaha bahanishwa ingingo ijyanye n’itegeko rya Ruswa. Itegeko riteganya ko igifungo kiva ku myaka itanu kikageza ku myaka icumi. Uwakoze ibyo byaha iyo abihamijwe n’inkiko kandi yongeraho ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’umutungo yanyereje.

Ku cyaha cyo guhishira amakuru yerekeranye n’imicungire mibi ya koperative, itegeko riteganya igihano cy’igifungo cy’amezi atandatu ariko kitarenze imyaka ibiri, n’ihazabu y’amafaranga y’u Rwanda kuva kuri 1 000 000 Frw ariko atarenze 2 000 000 Frw.

Gukoresha nabi cyangwa konona umutungo wa koperative, ubihamijwe n’urukiko ahanishwa igifungo kuva ku myaka ibiri ariko kitarenze imyaka itanu n’ihazabu y’amafaranga y’u Rwanda kuva kuri 500 000 Frw ariko atarenze 5 000 000 Frw.