Blog

Inshuro nyinshi cyane hakunze kumvikana abantu bashinja Melodie kubihiriza abo ari gutaramira bitewe n’imitegurire y’urubyiniriro idahwitse. Wasangaga abantu bavuga ko Melodie ari umuhanga mu kuririmba ariko byagera ku rubyiniriro ugasanga rwose nta kintu kiri kuvamo na gito. 

Uyu muhanzi yashinjwaga gutegura urubyiniriro ariko n’ubundi ugasanga ibyo ari gukora, nibyo yamye akora mu myaka icumi yose ishize akora muzika, nta kintu gihinduka akora bitandukanye n’abandi bahanzi bo mu bindi bihugu bategura urubyiniriro uyu munsi, ejo ukabona yahinduye imitegurire. Ibi bikaba byarahamyaga ko nakomeza kubikora nta mpinduka ashyiramo, nta kabuza nyuma y’imyaka ibiri gusa atazaba akibasha no kubona abantu barenga icumi mu gitaramo cye kuko n’ubundi nta kintu gishya na kimwe azaba agiye kubereka.

Ikindi  na none kandi iyo yajyaga ku rubyiniriro, yarijyanaga buri gihe nta w’undi muntu bajyanye (umubyinnyi), ibintu ubundi biba bisa nabi cyane ku muhanzi mukuru nka Melodie, ikindi kandi wabonaga ko abantu batanyuzwe.

Melodie yagiye agirwa inama kenshi zo kujya arebera ku bahanzi bakomeye ku Isi bazaga gutaramira mu Rwanda, imitegurire y’urubyiniriro rwabo, ukabona baranyeganyega bakava hasi, bakajyana n’ababyinnyi ku rubyiniriro, bakajyana imyenda igizweho n’udushya n’ibindi bitandukanye.

Uyu muhanzi ubwo yajyaga gutaramira muri Amerika mu gitaramo yari yatumiwemo n’umunyabigwi muri muzika y’Isi, Shaggy, byose bisa nk’aho ariho byahereye kugerageza kuzana impinduka. Niwitegereza amashusho ari ku mbuga nkoranyambaga agaragaza uyu muhanzi ari gutaramira muri Amerika, ubona ko r yari afite impinduka zikomeye cyane. Ukurikije ukuntu yari asanzwe ataramira abanyarwanda nk’urugero mu bitaramo bizenguruka igihugu bya MTN Iwacu Muzika Festival, wabonaga ko  bamwe  bamushinja kubabihiriza ku rubyiniriro nta banga ririmo.

Mbere y’amasaha make kugira ngo ajye gutaramira muri BK Arena, ukurikiranye ibiganiro yagiye agirana n’ibitangazamakuru bitandukanye. Iyo bamubazaga ku kijyanye n’imitegurire yo kuri uwo munsi, Melodie yasubizaga ko ibintu agiye gukora bizandikwa mu mateka ya muzika nyarwanda kuko haraza kubonekamo udushya tutigeze tubaho ariko akirinda kugira icyo abivugaho .

Ntibyatinze kuko muri iri joro niwe muhanzi wabimburiye abandi mu gitaramo.

Uyu muhanzi uburyo yaserutse byatunguye abantu batagira ingano ndetse kugira ngo bizanibagirane mu mitwe yabo bikazagorana cyane. Ibyo abanyarwanda batari bamumenyereyeho, kuri iyi nshuro yaje noneho ahubwo abibagiza ibyo bamuvugagaho byose bijyanye no kutabasha gutegura urubyiniriro.

Uyu muhanzi yaje ku rubyiniriro  afite ababyinnyi be ibintu atikozaga, ikindi na none imyambarrire yazanye  bivugwa ko ihenze.Si ibyo gusa kandi Melodie ntabwo yigeze azana ibyo guhagaraga ahantu hamwe nka kumwe yajyaga abikora ahubwo yikozaga hasi akikoza hejuru akazenguruka urubyiniriro, muri rusange ukabona ni ibintu biryoshye cyane. 

Ibi bintu byose yakoze byatumye ivumbi ritumuka muri BK Arena, abantu barahaguruka barabyina karahava imyenda barikura bajugunya ku ruhande.

Reba igitaramo cy’amateka  Bruce Melodie yakoreye muri BK Arena

“>

Melodie yari yambaye ibihenze gusa

Melodie yari yazanye n’ababyinnyi

Melodie kuri iyi nshuro yari afite imyuka iri hejuru gusa

Kuri iyi nshuro Melodie yatanze ikosora

Shampiyona y’icyiciro cya mbere mu Rwanda (Rwanda Premier League) yasinyanye amasezerano n’Ikigo gusakaza amashusho cya StarTimes yo kujya yerekana iyi shampiyona afite agaciro ka miliyari imwe na miliyoni 240 z’amafaranga y’u Rwanda.

Ni amasezerano yashyizweho umukono kuri uyu wa Kane tariki ya 7 Ukuboza 2023 na perezida w’Inama y’Ubutegetsi ya Shampiyona y’u Rwanda, Mudaheranwa Hadji Yusufu aherekejwe na perezida wa FERWAFA, Munyantwali Alphonse ndetse na CEO wa StarTimes Rwanda, Wang Fan aherekejwe na Munyangeyo Kennedy wa RBA izerekana iyi shampiyona.

Ni amasezerano azamara imyaka 5 aho afite agaciro ka 1,240,800,000 Frw, iyi shampiyona ikaza inyura kuri Shene ya Magic Sports iri kuri StarTimes.

Umuyobozi w’Inama y’Ubutegetsi ya Shampiyona y’u Rwanda, Mudaheranwa Hadji Yusufu yavuze ko aya masezerano uretse uburyo bw’amajwi yamaze guhabwa Ikigo cy’igihugu cy’itangazamakuru (RBA).

Ati “Amasezerano turi dusinye afite ingingo zitandukanye, shampiyona y’u Rwanda izerekanwa na StarTimes iri kumwe na RBA. RBA kandi izavuga umupira mu buryo bwa Live (kogeza kuri radio) ariko n’ikindi gitangazamakuru kizabyifuza kuwutambutsa live kizegera Rwanda Premier League tuvugane.”

Yakomeje avuga ko aya mafaranga ari mu bice bitatu aho igice cya mbere cy’imyaka 3 kimeze nk’igeragezwa.

Ati “amafaranga azishyurwa mu bice 3, imyaka 3 ya mbere izaba imeze nk’igeragezwa aho bazajya bishyura miliyoni 220 Frw ku mwaka mu gihe cy’imyaka 3. Umwaka wa kane haziyongeraho 20% (bivuze miliyoni 264 Frw), umwaka wa nyuma ni bazishyura hiyongereyeho 20% y’umwaka 4 (miliyoni 316.8 Frw).”

Wang Fun CEO wa Star Rwanda yavuze ko bishimiye gukorana na Shampiyona y’u Rwanda berekana umupira.

Ati “twishimiye gukorana na RPL, turizera ko mu myaka 5 iri mbere tuzabaha ibyiza kandi twizeye ko abafana bazaryoherwa.”

Bavuze ko kandi nta handi iyi shampiyona izajya inyura uretse kuri StarTimes ndetse ko nabajyaga bayerekana kuri YouTube bitemewe uzabigerageza azahanwa ndetse n’amakipe yayinyuzaga kuri YouTube za yo bitemewe.

Rwanda Premier League yasinyanye na StarTimes amasezerano y’imyaka 5

Umunyarwanda ukiri muto w’imyaka 15 ukinira CF Montreal, Josh Duc Nteziryayo yahuye na Jimmy Gatete, ni umwe mu bo ikipe y’igihugu ikwiye guhanga amaso mu minsi iri mbere.

Uyu mwana w’imyaka 15 akaba akina mu mutima w’ubwugarizi akaba afite metero na 1.83, yahuye n’umunyabigwi wakiniye ikipe y’igihugu Amavubi, Jimmy Gatete aho bahuriye muri Leta Zunze Ubumwe za Amerika.

Bahuye ejo hashize ku wa Gatatu tariki ya 6 Ukuboza 2023 mu Mujyi wa Arizona aho ikipe ye ya Montreal U17 yitabiriye amarushanwa arimo kubera muri uyu Mujyi.

Uyu akaba ari umuhungu wa Iradukunda Liliane utuye muri Canada akaba ari umubyeyi ukunda kugaragaza ko ashyigikiye umuhungu we cyane, inshuro nyinshi ku mbuga nkoranyambaga akunda gusangiza abamukurikira aho we anamwita Camavinga (Umufaransa ukinira Real Madrid muri Espagne).

Ubu butumwa buragira buti 'ndi umufana w’uyu muhangu w’u Rwanda, njye mwita Camavinga, mfite amatsiko yo kubona ibyo ahazaza haguhishiye Josh.'

Ni kenshi kandi yagiye agaragaza ko azishimira kubona umuhungu we yambaye umwenda uriho ibendera ry’u Rwanda akinira ikipe y’igihugu y’u Rwanda Amavubi.

Uretse ibi kandi Liliane nubwo aba muri Canada akunda kugaragaza ko akunda u Rwanda binyuze cyane cyane mu butumwa anyuza ku mbuga nkoranyambaga ndetse akaba atewe ishema n’aho u Rwanda rugeze rwiyubaka.

Josh-Doc Nteziryayo ni umukinnyi w’umuhanga

Yahuye na Jimmy Gatete

Nyina ni umufana we ukomeye

Winston wamamaye binyuze muri filime zirangajwe imbere na 'Black Phanther' yari ku rutonde rw'abashyushyarugambaga bagombaga kuyobora iki gitaramo cyaririmbyemo Kendrick Lamar, Bruce Melodie, Zuchu na Ariel Wayz ariko siko byagenze.

Ibi birori byayobowe n'umunyarwenya akaba n'umunyamakuru Arthur Nkusi, umukinnyi kandi uzwi cyane ku mbuga nkoranyambaga w’Umunya-Kenya, Azziad Nasenya, umunyamakuru Jackie Lumbasi ndetse n'umunyamakuru w'ikigo cy'Igihugu cy'Itangzamakuru, Davy Carmel.

Mu gihe cy'amasaha arenga atanu iki gitaramo kimaze kiba, ntawigeze aca iryera Winston Duke ndetse ntihatangajwe impamvu atabonetse muri iki gitaramo.

Mu itangaro rigenewe abanyamakruu ryasohotse mu minsi ishize, Winston usanzwe ari Ambasaderi wa Loni mu by'Ubukerarugendo yari yavuzemo ati 'Ibishoboka ku Rwanda na Afurika yose ntibigira umupaka. 

Ntewe ishema no kugira uruhare muri iki gikorwa cya mbere cya Move Afrika muri Kigali nziza. Iki ntabwo ari igitaramo gusa, ni intangiriro y'impinduka ku myidagaduro muri Afurika, bikazagira impinduka z'igihe kirekire ku bukungu mu Rwanda ndetse no hirya no hino ku Mugabane.'

Ni cyo gitaramo cya mbere uyu mugabo yari agiye kuyobora nyuma yo guhabwa ubwenegihugu.

Winston azwi cyane binyzue muri 'Black Panther', filime y'imirwano igaruka ku mibereho y'igihugu gihimbano cyo muri Afurika cyiswe 'Wakanda'  gikoresha  ikoranabuhanga rihambaye.

Umwami w'icyo gihugu yaje gupfa maze umwana we witwa T'Challa wabaga mu mahanga, agaruka iwabo aje gusimbura se ku butegetsi.

Mbere y'uko ajya ku butegetsi ariko igihugu cye cyatewe n'umwanzi wari ugambiriye guteza intambara y'Isi yose ahereye muri icyo gihugu cya Wakanda.

Byabaye ngombwa ko T'Challa atabara maze yambara umwambaro umuha imbaraga zidasanzwe unamuha isura nk'Igisamagwe cyangwa 'Black Panther'.

Role ya T'Challa yakinnwaga na Chadwick Boseman witabye Imana nta wundi wigeze uyifata ahubwo mu gice cya kabiri giheruka kujya hanze, umukobwa we witwa Shuri niwe ukina ashaka guhorera se T'Challa witabye Imana mu buzima busanzwe bakabihuza na filime.

Iki gice cya kabiri cya Black Panther cyayoboye na Ryan Coogler wayoboye n'icya mbere.

Black Panther ni imwe muri filime zakunzwe cyane, aho bibarwa ko yinjije arenga miliyari y'amadorali.

Ni yo ya mbere iri mu cyiciro cy'izizwi nka 'superhero films' yegukanye igihembo cya filime ifite amashusho meza mu bihembo muri Oscar. 

Umunyamakuru Jackie Lumbasi na Davy bafatanyije kuyobora iki gitaramo  

Nkusi Arthur na Azziad bafatanyije kuyobora iki gitaramo cyaranzwe n’ubwitabire bwo hejuru

Umuraperi Kendrick Lamar yashimangiye ibigwi yagwijeho mu buzima bwe

Perezida Kagame yashimye umuryango Global Citizen watangije ibitaramo bya “Move Afrika” mu Rwanda

 Ariel Wayz yifashishije basaza be ku rubyiniro Kivumbi na Bruce The 1st

Umuhanzikazi Zuchu wo muri Tanzania yataramiye i Kigali, atahana umutima wishimye

Bruce Melodie yaririmbye yitaye cyane kuri zimwe mu ndirimbo ze zakunzwe mu bihe bitandukanye 

REBA VIDEO IGARAGAZA UKO KENDRICK LAMAR YITWAYE MURI IKI GITARAMO

“>

Umukinnyi wa Rayon Sports, Muhire Kevin avuga ko kuba ubu Rayon Sports yarafashe umwanya wa 2 ndetse irushwa na APR FC ya mbere inota rimwe, babikesha ugutakaza kwa hato na hato kw’amakipe yari abari imbere arimo na APR FC yabarushaga amanota menshi.

Kugeza ku munsi wa 10, Rayon Sports yarushwaga amanota 7 na Musanze FC yari iyoboye urutonde ndetse ikarushwa 5 na APR FC yari iya kabiri aho yari ifite 21 ndetse benshi bemeza ko kuba APR FC yarashyizemo amanota angana gutya kuri Rayon Sports yari ifite 16 bitazayoroherera kuyakuramo.

Nyuma y’uko APR FC itsinze umukino 1 muri ine iheruka aho indi yayinganyije (harimo n’ikirarane cya Sunrise), Rayon Sports igatsinda 3 muri 4 ikanganya 1 (harimo ikirarane cya Police FC), yahise iyisatira aho ubu APR FC iyoboye urutonde n’amanota 27, Rayon Sports igakurikira n’amanota 26.

Muhire Kevin avuga ko gukuramo aya manota bungukiye mu guhuzagurika kw’amakipe abari imbere, bo bashyira hamwe kuko bari bazi icyo bashaka ndetse ubu intego akaba ari igikombe nk’uko yabibwiye ikinyamakuru ISIMBI.

Ati 'Ni ububwe, guhuza dufite hagati yacu, ikipe iyo ihuza bakorera hamwe ndumva ntacyabananira, twari tubizi ko baturusha amanota menshi mbere, twaragiye turakora twirengagiza abari imbere yacu ku bw’amahirwe bagenda batakaza, mu gutakaza kwabo tubibyaza umusaruro biraduhira ni yo mpamvu gahunda ari igikombe kugeza aka kanya, ni iby’agaciro ku ikipe muri rusange ariko nta kirakowa haracyari byinshi byo gukora turacyasunika.'

Uwavuga ko urugamba rwa APR FC na Rayon Sports ku gikombe ari bwo rutangiye ntiyaba abeshye, Muhire Kevin agaruka ku mahirwe bafite ku gikombe ugereranyije abakinnyi bafite n’abo APR FC, yavuze ko icy’ingezi ari ukumenya uko ukinisha abakinnyi ufite ibyo rero abatoza ba bo bakaba babizi akaba yizeye kwegukana igikombe.

Ati 'Amahirwe arahari ku gikombe kuko abakinnyi ufite (squad) si ikibazo ahubwo uburyo uyikinishamo hari igihe uba ufite abakinnyi beza utazi kubakoresha bikakubera impfabusa, ku bwanjye navuga ko dufite abatoza beza bazi gukoresha abakinnyi neza, tubanye neza rero, navuga ko uko dukoreshwa ari byo bituma tubona umusaruro kandi intego ni igikombe nk’uko nabivuze.'

Kugeza ubu harabura imikino 2 gusa kugira ngo igice kibanza cya shampiyona kirangire aho APR FC ku munsi wa 14 izahura na Gorilla FC ni mu gihe Rayon Sports izakina AS Kigali, APR FC izasoreza kuri Amagaju FC n’aho Rayon Sports isoreze kuri Kiyovu Sports.

Muhire Kevin yavuze ko intego bafite ari ukwegukana igikombe