Blog

Gukunda ni kimwe mu bintu byiza kandi bitangaje bishobora kuba ku muntu. Bikaba agahebuzo iyo ukunzwe n'uwo umutima wawe wihebeye kuko bihindura ubuzima bwawe umunezero uhoraho.

Ni nayo mpamvu itariki ya 14 Gashyantare, umunsi ubusanzwe Kiliziya Gatolika yageneye Mutagatifu Valentin (Saint Valentin) ufatwa nk'umurinzi w'abakundana, warenze imbibi z'idini utangira kuzirikanwa no kwizihizwa na buri wese ufite uwo bakundana.

Ni umunsi abantu bato n'abakuru, abaroheje n'abakomeye usanga bongera kubwirana amagambo meza y’urukundo ari na ko bahererekanya impano nk'uburyo bwo kongera kugaragarizanya agaciro buri umwe afite mu buzima bwa mugenzi we.

Hari bamwe ariko usanga kumenya impano ikwiriye bagenera abakunzi babo biba ingorabahizi, ari nayo mpamvu twifashishije imbuga zitandukanye zirimo El Crema tubakusanyiriza urutonde rw'ibintu 15 byoroheje waha umukunzi wawe kuri uyu munsi:

1. Chocolat

Niba uri umusore ukaba wibaza impano waha umukunzi wawe kandi yoroheje bitewe n'ubushobozi ufite, hari ubwoko butandukanye bwa 'chocolat' ushobora kumugurira kandi umutima we ukishima.

Kugira ngo birusheho kumuryohera ushobora kuyiherekeresha indabo, ukaba wabimushyikiriza wowe ubwawe cyangwa ukamutumaho umuntu.

2. Divayi

Nta cyashimisha umukunzi wawe kuri uyu munsi nk'impano ya divayi by'umwihariko itukura dore ko nayo ubwayo isanzwe ikoreshwa mu kwizihiza urukundo. Ushobora kumuha icupa rifunze neza, cyangwa ukaba wayikoresha mu guherekeza amafunguro mwasangiye haba mu rugo cyangwa aho mwasohokeye.

3. Imyenda

Niba uteganya kuza gusohokana n'umukunzi wawe kuri uyu munsi mugasangira mwishimira urukundo ruri hagati yanyu, ushobora kumutungura ukamugurira ikanzu ari buze kuba yambaye.

Uretse kuba ibi bimurinda guhangayika ashakisha umwenda ari buze kwambara ukakunyura, ni n'uburyo bwo kumwereka ko urukundo umukunda rwaguhaye ubushobozi bwo kumenya ibimubereye.

4. Serivisi za 'spa'

Mbere yo gutekereza gahunda zirebana no gusangira, ushobora gutungura umukunzi wawe ukamusaba ko mujyana aho batangira serivisi zo kuruhura umubiri 'spa'. By'umwihariko ariko mushobora gusaba gukorerwa 'massage' igenewe abakundana, aho muyikorerwa mu cyumba kimwe kandi giteguye mu buryo bunogeye ijisho.

5. Inkweto

Si umusore cyangwa umugabo gusa ushobora gutungura umukunzi we akamugurira impano y'umwambaro, kuko n'umugore ashobora kubikora ariko noneho akaba yamugurira inkweto.

Niba wibaza impano yoroheje kandi itagoye kubona waha umukunzi wawe uyu munsi, nyarukira mu iduka umugurire inkweto ariko wibande cyane ku zo ashobora kwambara mu bihe bisanzwe nka 'sneakers'.

6. Isaha

Ku rutonde rw'impano zoroheje kandi zishobora kuboneka mu byiciro bitandukanye bitewe n'amikoro yawe ntihaburamo isaha. Isaha uretse kuba ari kimwe mu by'ibanze ku muntu wese uzi kandi ukunda kurimba, ni n'uburyo bwo kwibutsa umukunzi wawe kujya azirikana kubahiriza igihe mu byo akora byose.

7. Ububiko bw'udukoresho akunda gukenera

Niba umusore mukundana cyangwa umugabo wawe ari umuntu ukunda kubika utuntu twose ku murongo, impano yoroheje ushobora kumugenera kuri uyu munsi w'abakundana ni agasandaku ashobora kubikamo udukoresho tw'ingenzi nk'amasaha, imikufi n'impeta.

8. Umubavu

Umubavu ni imwe mu mpano waha umukunzi wawe waba uri umugore cyangwa uri umugabo akishima ndetse akongera kwibuka ko umukunda kandi iteka uhora umuzirikana.

9. Ikawa n'agakombe kayo

Niba uzi neza ko umukunzi wawe akunda ikawa byahebuje, ushobora kumutungura kuri uyu munsi wa Saint Valentin ukaba wamugurira iyo azajya yitekera ndetse n'agakombe ashobora kuyitwaramo agiye nko ku kazi cyangwa ahandi. Kugira ngo ariko birusheho kumushimisha, ushobora gusaba aho wayiguriye akaba aribo bayimugezaho.

10.Ibikoresho byifashishwa mu kwisiga ibirungo

Kuri uyu munsi ntacyashimisha umugore cyangwa umukobwa mukundana nk'impano y'ibikoresho byifashishwa mu kwisiga ibirungo ndetse byaba na ngombwa nabyo ukaba wabyongeramo. Ibi kandi biroroshye kuko ababicuruza bashobora kugufasha kumuhitiramo ibyiza bakurikije uruhu rwe, cyangwa nawe ukaba wagendera ku byo asanzwe akoresha.

11 .Amaherena n'umukufi

Kuri uyu munsi kandi ushobora gutungura umukunzi cyangwa umugore wawe ukaba wamuha impano y'amaherena n'umukufi bijyanye. By'akarusho kandi ushobora kujya kubikoresha aho wahitamo ko bijyana n'umudali ushushe mu buryo bugize icyo busobanuye mu buzima bwanyu.

12. Ikofi

Mu zindi mpano zoroheje ushobora kugurira umukunzi wawe kuri Saint Valentin hazamo n'ikofi ashobora gutwaramo ibyangombwa bye, amakarita ya banki, aha ushobora no guhitamo inini yajyamo na telefoni igendanwa.

13. Ikanzu yo kujyana mu bwogero

Iyi nayo n'indi mpano yoroheje buri wese ashobora guha umukunzi we kuri uyu munsi ikaba yamushimisha ndetse ikajya ituma afata umwanya wo kumutekerezaho dore ko buri uko ayambaye agiye cyangwa avuye mu bwogero yajya ahita amwibuka.

14. Imyenda yo kwambara mwaruhutse

Niba utarigeze ubona umwanya uhagije wo gutekereza ku mpano waha umukunzi wawe kuri uyu munsi, ushobora kumugurira imyenda yo kwambara igihe yaruhutse izwi nka 'Joggers'. Aha ushobora kumuhitiramo imeze kimwe n'iyawe ku buryo igihe mwembi mutagiye mu mirimo mwatemberana muyambaye.

15.Ifunguro ryihariye

Kabone n’ubwo mwaba mubana cyangwa musangira inshuro nyinshi mu cyumweru, nta mpano ikomeye yaruta kuba watungura umukunzi wawe kuri uyu munsi mugasangira ifunguro riteguye ku buryo bwihariye kandi mukarisangirira ahantu hatuje hateguye mu buryo bugaragaza urukundo mu mpande zose.

Yaba umugore cyangwa umugabo ashobora gutegurira umukunzi we ifunguro ryihariye, aho bashobora kurifatira mu rugo cyangwa ahandi hantu yahisemo.

Ubusanzwe gutandukana hagati y’abakundana ni ikintu gikomeye cyane kandi kibabaza benshi bikanabagora kubyakira ndetse bikanabatwara igihe kinini cyo kubyikuramo. Ibi ariko bibabaza kurusha iyo umukunzi wawe akubenze cyangwa aguteye akadobo (imvugo benshi bakoresha), ku munsi wa Saint Valentin wo kwizihizaho urukundo.

Hari ‘Couples’ z’ibyamamare by’imahanga na hano muri Africa zagiye zica ibintu mu myidagaduro, gusa zigatungurana ku munsi wa Saint Valentiz zitangazako zatandukanye:

1. Zari Hassan na Diamond Platnumz

Duhereye hano mu karere k’ibiyaga bigari, couple y’umuhanzi w’icyamamare Diamond Platnumz n’umuherwekazi Zari Hassan, iri mu zaciye ibintu mu myaka yashize. Ku itariki nk’iyi mu 2018 Zari yatunguye benshi ubwo yatangazaga ko yatandukanye n’uyu muhanzi amuziza kumuca inyuma akaryamana na Hamisa Mobetto yanahise anatera inda. Ibi yabitangaje aciye kuri Instagram ye aho yashyizeho ubutumwa burebure busobanura impamvu yashwanye na Diamond.

2. Jennifer Lopez na Diddy

Abakurikiranye imyidagaduro mpuzamahanga kuva kera, baribuka urukundo rw’icyamamarekazi Jennifer Lopez n’umuraperi w’umuherwe Sean Combs wamamaye nka Diddy. Aba bombi batangiye gukundana mu mu 1998 maze baca ibintu i Hollywood. 

Ibyabo byarangiye kuri Saint Valentin ya 2001 ubwo Lopez yatangazaga ko yatandukanye na Diddy bapfako uyu muhanzikazi yashakaga ko bakora ubukwe naho uyu muraperi atabikozwa.

3. Lady Gaga na Christian Carino

Umuhanzikazi akaba n’umukinnyi wa filime Lady Gaga, ni umwe mu baririmbyi bakundanye n’abajyanama babo. Gaga yatangiye gukundana n’umujyanama we Christian Carino mu 2015. Yamwambitse impeta y’urukundo mu 2018 gusa ibyabo ntibyagejeje ku munsi w’ubukwe bwabo dore ko batandukanye kuri Saint Valentin ya 2019. Lady Gaga yabwiye People Magazine ko kutizerana kwari hagati ye n’umujyanama we biri mu byatumye batandukana.

4. Sophia Bush na Austin Nichols

Bimaze kumenyerwa kubona abakinnyi ba filime bahuriye muri filime bakina bakundana bikarangira banakundanye mu buzima busanzwe. Ibi ni byo byabaye kuri Sophia Bush na Austin Nichols bakinnye bakundana muri filime y’uruhererekane yakunzwe ya ‘One Tree Hill’. Bombi batangiye gukundana mu 2009 batandukana ku munsi nk’uyu mu 2012.

5. Hillary Duff na Mike Comrie

Umuhanzikazi akaba n’umwanditsi w’indirimbo Hillary Duff uri mubamaze igihe mu muziki wo muri Amerika, yarushinze n’umugabo we wa mbere Mike Comrie mu 2010 baza gutangaza ko batandukanye ku munsi wa Saint Valentin mu 2015 babinyujije mu itangazo bashyize kuri Instagram. Aba bombi basinye gatanya mu 2016 nyuma y’umwaka batandukanye.

6. Milo Ventimiglia na Hayden Panettiere

Abandi bakinnyi ba filime bakundanye nyuma yo guhurira muri filime ni Milo Ventimiglia na Hayden Panettiere bakinanye filime y’uruhererekane yitwa ‘Heroes’. Batangiye gukundana mu 2007 baza gutandukana ku munsi w’abakundana mu 2013. 

Hayden icyo gihe yatangarije Oprah Winfrey mu kiganiro cye ko yatandukanye na Milo kubera itandukaniro ry’imyaka yabo umuryango we utari ushyigikiye. Icyo gihe Milo yarafite imyaka 30 naho Hayden afite imyaka 18 y’amavuko.

7. Regina King na Malcom-Jamal Warner

Icyamamarekazi muri Sinema, Regina King wamamaye muri filime nka ‘Watchmen’, ‘Friday’ n’zindi, yatangiye gukundana na Malcom Jamal mu 2008 batandukana kuri Saint Valentin ya 2013. Aba bombio ntibigeze bavuga impamvu yatumye batandukana gusa byavugwaga ko Malcom yaba yarabyaranye n’undi mugore.

8. Nick Jonas na Delta Goodrem

Mbere y’uko umuhanzi Nick Jonas arushinga n’umuhindekazi Priyanka Chopra, yabanje kukanyuzaho n’umuhanzikazi Delta Goodrem wo muri Australia. Bombi bakundanye igihe gito dore ko batandukanye kuri Saint Valentin ya 2012 bamaze umwaka umwe gusa bakundana.

9. Jude Law na Sienna Miller

Abakinnyi ba filime Jude Law na Sienna Miller bari mu baciye ibintu mu Bwongereza mu gihe cy’imyaka 7 bakundanye ndetse banibanira nk’umugore n’umugabo. Baje gutandukana kuri Saint Valentin ya 2014 aho Sienna yanditse ku mbuga nkoranyambaga ko yafashe umwanzuro wo kureka Jude Law nyuma yo kumufata amuca inyuma.

10. Ryan Phillipe na Amanda Seyfried

Indi couple yakanyujijeho muri Hollywood ni iya bakinnyi ba filime Ryan Phillipe uzwi muri filime z’imirwano na Amanda Seyfried wamamaye cyane muri filime yitwa ‘Mean Girls’. Aba bombi bakundanye kuva mu 2009 baza gutandukana mu 2012 ku munsi wa Saint Valentin nibwo bahishuye ko ibyabo byarangiye.

Police FC yandikiye Ishyirahamwe ry’Umupira w’Amaguru mu Rwanda, FERWAFA, isaba ko yakurikirana umusifuzi Uwikunda Samuel kubera amakosa 3 yakoze bigatuma itakaza umukino wa Rayon Sports.

Hari mu mukino w’umunsi wa 20 wa shampiyona y’icyiciro cya mbere mu Rwanda wabaye ku Cyumweru tariki ya 11 Gashyantare 2024 muri Kigali Pelé Stadium warangiye Rayon Sports itsinze ibitego 2-1.

Ni umukino Police FC itishimiye imisifurire y’umusifuzi mpuzamahanga Uwikunda Samuel wasifuye uyu mukino.

Police FC ikaba yamaze kwandikira FERWAFA isaba ko uyu musifuzi yakurikiranwa akaryozwa amakosa yakoze kuri uyu mukino.

Mu ibaruwa yandikiye FERWAFA, Police FC ikaba yatanze impamvu zigera muri 3 agomba gukiranwa.

Yagize iti “Ngabonziza Pacifique yakorewe ikosa aho kurisifura [Uwikunda] agatanga ‘avantage’ [kurekera umupira ikipe iwufite] kuri Rayon, iyo ‘avantage’ ikaba yaravuyemo igitego.”

“Kuba Police FC yarimwe penaliti kandi umukinnyi wayo Chukuma Odili yarategewe cyangwa yarakorewe ikosa mu mwanya aho bakwiriye gutanga penaliti.”

“Kuba umukinnyi wa Police FC, Ndahiro Derrick yarahawe ikarita itukura umukino urangiye kandi nta kosa akoze, cyane ko atanegereye abasifuzi.”

Police FC kandi yakomeje ivuga ko uyu musifuzi yari yateye ubwoba abakinnyi ba Police FC mbere y’umukino.

Iti “Umusifuzi yashyize iterabwoba ku bakinnyi ba Police FC mbere y’umukino kandi bitari ngombwa. Yababwiye mbere yo gutangira umukino ko icyo bakora cyose abaha amakarita kandi yakagombye gutegereza bagakora ayo makosa, akabona kubahana.”

Basabye ko Uwikunda Samuel akurikiranwa nyuma y’uko iri shyirahamwe riheruka guhagarika abasifuzi babiri imikino 5 badasifura kubera amakosa bakoze ku mukino wa nyuma w’igikombe cy’Intwari wahuje APR FC na Police FC, abo ni Umutoni Aline na Mugabo Eric.

p

Uyu mugore wihaye gutondagira Paul Okoye [Rudeboy], ni uwo yafashije umwaka ushize ubwo umwana we yari arembye cyane. Mu rwego rwo kwereka isi ibyo uyu mugore yamubwiye amucyurira, Paul yashyize hanze ubutumwa bwose yamwandikiye.

Muri ubu butumwa, uyu mugore yabanje kumushimira ku bugiraneza yamukoreye akamufasha kurokora umwana we wari uremejwe n'uburwayi.

Mu magambo ye yagize ati: 'Bwana Paul, waramfashije ubwo umwana wanjye yari arwaye cyane, wampaye amafaranga y'amaraso bateye mu mubiri we umwaka ushize. Ndacyagushimira nyakubahwa, Imana ishobora byose ikomeze kukuzamura ndetse n'abawe.

Nkoherereje ubu butumwa kubera abana banjye, kugeza ubu nta biryo biheruka mu kanwa kabo, ndakwingize ndanapfukamye nkusaba kumfasha ukangenera icyo kubagaburira.'

Nyuma y'ubu butumwa bumushimira ariko bunamusaba ubufasha, Rudeboy yaryumyeho yanga kumusubiza maze wa mugore washimiraga atangira gutukana kubera umujinya.

Yarongeye arandika ati: 'Mwiriwe neza nyakubahwa, kubera iki uri umugome? Ujye wibuka ko umunsi umwe uzapfa ugasiga aya mafaranga.'

Asubiza uyu mugore, Rudeboy yatangaje ko ibintu bikomeje kuba bibi mu gihugu cyabo, atangarira uburyo umuntu yafashije mu gihe cyashize ariwe utangiye kumutuka no kumutega iminsi.

Yagize ati: 'Ibintu bikomeje kuba bibi mu gihugu ku buryo n'umuntu ntarahura nawe nafashije ariwe uri kuntuka uyu munsi akanyita umugome, akambwira ko nzapfa nkasiga amafaranga yanjye yose!'

 

Rudeboy yashyize hanze ubutumwa yahawe n’umugore yafashije amutega iminsi

Yababajwe no kubona atukwa n’uwo yagiriye neza

Rayon Sports yamaze gutandukana na rutahizamu ukomoka muri Repubulika Iharanira Demokarasi ya Congo nyuma yo kutishimira imyitwarire yagaragaje ku mukino wa Police FC.

Ni nyuma y’uko ku gicamunsi cyo kuri uyu wa Kabiri tariki ya 13 Gashyantare 2024, na FERWAFA yari yamuhagaritse amezi 6.

Rayon Sports ikaba yamaze kwemeza ko yamaze gutandukana na Héritier Nzinga Luvumbu wayigarutsemo mu mpera za 2022 ayikinira imikino yo kwishyura ya shampiyona ya 2022-23, yari yasinye amezi 6 arangiye yongerwa amasezerano y’umwaka umwe yagombaga kurangirana n’umwaka w’imikino wa 2023-24.

Iti “ku bwumvikane bw’impande zombi, Rayon Sports yatandukanye n’umukinnyi Héritier Luvumbu Nzinga.”

Uko byagenze

Iyi myitwarie idahwitse yayigaragaje mimukino wa shampiyona w’umunsi wa 20 wabaye ku Cyumweru tariki ya 11 Gashyantare 2024 aho Rayon Sports yatsinzemo Police FC 2-1. Igitego cya mbere cyatsinzwe na Luvumbu.

Mu buryo bwo kwishimira iki gitego, Luvumbu yishimiye iki gitego mu buryo bwatunguye benshi ndetse bufitanye isano na politiki kandi bitemewe kuiyivanga na ruhago.

Uyu mukinnyi yakoze nk’ibyo Ikipe y’Igihugu ya DR Congo yakoze ku mukino wa ½ cy’Igikombe cy’Afurika bakinnye na Ivory Coast. Aba bakinnyi bifashe ku munwa n’ukuboko kumwe ni mu gihe ukundi urutoki ruba rutunze ku gahanga (bimeze nk’imbunda itunzweho), gusa aya mashusho bahise bayakuraho.

Ibi ni byo Luvumbu yaraye akoze yishimira igitego cye yari atsindiye Rayon Sports. Bikaba byatunguye abantu aho byafashwe nk’ubushotoranye ndetse bamwe batangira gukeka ko ashobora kuba hari abamutumye.

Iyi 'Geste’ ikaba yarazanywe na Leta ya Congo (yamamajwe cyane na Patrick Muyaya umuvugizi wa Guverinoma ya Congo) aho basobanuye ko Imiryango Mpuzamahanga ndetse n’Isi yose yacecetse, irebera ubwicanyi buri muri DR Congo, Leta y’iki gihugu yabigeretse ku Rwanda ariko rwo rukabyamaganira kure.

Nyuma y’umukino urangiye, Luvumbu yongeye kubisubiramo ndetse ashanwa n’abantu bamubuzaga kongera kubisubiramo.

Amakuru ISIMBI yamenye ni uko nyuma y’uyu mukino umunyamabanga wa Rayon Sports, Patrick Namenye yaganiriye n’uyu mukinnyi amubwira ko ibyo yakoze atari ndetse atakagombye kuba yabikoze.

Byagaragaye ko ibyo yakoze yari yabiteguye kubera ko nyuma y’uyu mukino, Luvumbu yagiye ku rukuta rwe rwa Instagram ashyiraho amashusho ye arimo gukora iyo 'geste’ maze iherekezwa n’amagambo agira ati 'dukuneye amahoro hagati y’ibihugu byombi.'

Ku mugoroba w’ejo hashize Rayon Sports ikaba yari yasohoye itangazo yitandukanya n’iyi myitwarire ye.

View this post on Instagram

A post shared by ISIMBI TV (@isimbi__tv)

Kuri uyu wa Gatatu tariki 14 Gashyantare, nibwo ikipe ya Vision FC, izakira Rayon Sports mu mukino ubanza wa 1/4 cy’igikombe cy’Amahoro. Ni umukino uzabera i Nyamirambo ku kibuga cya Mumena, iyi kipe isanzwe yakiriraho, ukazatangira ku isaha ya Saa 15:00 PM.

Mu myitozo ya nyuma Vision FC yakoze kuri uyu wa kabiri, umutoza w’iyi kipe Fils Muvunyi aganira n’itangazamakuru, yavuze ko aricyo gihe ngo bakorere amateka kuri Rayon Sports.

Yagize ati” Abantu bagomba kwitega ko tuzakina umupira mwiza ubureye ijisho. Tuzakina n’ikipe nziza mu kugura abakinnyi beza, ikazahura n’ikipe nziza mu gukora abakinnyi. Iyo ugize amahirwe yo guhura n’ikipe nka Rayon Sports, bifasha kureba urwego rw’abakinnyi bawe.

Umutoza yakomeje avuga ko kwakirira ku Mumena ntacyo byahindura ku migendekere y’umukino. Yagize “Ati twese tuzaba dukinira ku kibuga kimwe, abakinnyi baba bangana mbese turiteguye aho twahurira hose. Tuzakora ibishoboka byose nk’ikipe iri mu rugo, kuko niwo mwanya mwiza tubonye wo gukora amateka.”

Kapiteni wa Vision FC Mukunzi Vivens nawe yunze mu ry’umutoza, avuga ko umukino wa Rayon Sports bawufata nkaho ari uwa nyuma. Yagize ati” Rayon Sports ni ikipe nkuru, ariko umukino wayo turi kuwitegura nk’indi yose. Imikino yose tuyitegura nkaho ari iya nyuma. Vision FC turi ikipe ikomeye kandi Rayon Sports igomba kumenya ko itazaba ije gutsinda byorose.”

Ntabwo ari uyu mukino gusa uzaba, kuko i Bugesera, Bugesera FC izakira Mukura Victory Sports, Police FC ikine na Gorilla FC i Nyamirambo naho Saa 18:00 PM Gasogi United yakire APR FC.

KANDA HANO UREBE IMYITOZI YA VISSION FC

KANDA HANO UREBE IBYO UMUTOZA WA VISION FC YATANGAJE

Bamwe mu byamamare hirya no hino ku Isi, bagiye batangaza ubuzima bugoye banyuzemo nyuma yo kwisanga barwaye uburwayi budasanzwe bwo kuzana amabara ku ruhu buzwi nk’Ibibara [Vitiligo].

Ubusanzwe Vitiligo ni indwara ifata uruhu ikarutera guhindura ibara ryarwo aho usanga ku birenge, ku ntoki, mu ijosi cyangwa mu maso h'umuntu haba hasa n'ahahiye. Abahanga mu by'ubuzima, bagaragaza ko ahanini iki kibazo kiba cyatewe n'uko uturemangingo dushinzwe gutanga ibara ku ruhu twitwa 'melanocytes' tuba twangiritse bigatuma dukora nabi.

Mu byamamare 20 Inyarwanda yaguteguriye harimo:

1.     Winnie Harlow

Winnie Harlow, Umunyamideli ukomeye muri Amerika wavukiye muri Canada ,akaba afite ababyeyi bakomoka mu gihugu cya Jamaica.

Uyu mukobwa w’uburanga bwihariye yabaye ikirangirire muri 2014 ubwo yatsindaga irushanywa rya American Next Top Model. Kuba yaravukanye indwara y’uruhu idasanzwe ntibyamubujije kugera kure akaba ari umwe mu banyamideli batunze agatubutse.

2.     Michael Jackson

Michael Jackson uzwi nk'Umwami w'injyana ya Pop, wagize uruhare rukomeye mu guteza imbere umuziki muri rusange.

Yatsindiye ibihembo amagana, bituma aba umuhanzi wanditse amateka yo kuba umuhanzi wegukanye ibihembo byinshi.

Bivugwa ko akarindantoki yambaraga ku kiganza kagurishijwe Amadolari  200,000 mu myaka 11 ishize, yakambaraga kubera indwara ya 'Vitiligo.'

3.     Confy

Confiance Munyaneza [Confy] ni umuhanzi nyarwanda winjiye mu mwuga w'umuziki mu 2018. Kuva yatangira, yagaragaje ubuhanga budasanzwe mu ndirimbo ze zakunzwe cyane zirimo 'Panga,' 'Jowana,' 'Confirm,' 'Mali,' 'Bae' ndetse na 'Dimension' aheruka gushyira hanze. Uyu muhanzi yahishuye ko yamaze igihe kinini arwana no kwakira uburwayi bwa 'Vitiligo' bwafashe mu isura ye bikamutera ihungabana ryari rigiye gutuma areka umuziki.

4.     Karl Dunbar

Karl Dunbar ni icyamamare mu mumpira w'amaguru muri Leta Zunze Ubumwe za Amerika, akaba umutoza wa  NY Jets. Nyuma y'igihe gito ari umupolisi, Dunbar yatangiye gutoza. Yanze ko Vitiligo yamubera inkomyi mu guhagarika akazi ke. Karl yifashisha urubuga rwe nk'umutoza wa NFL mu gusobanurira abantu byinshi ku ndwara ya Vitiligo.

5.     Holly Marie Combs

Marie Coms ni umukinnyikazi wa filime muri Amerika, akaba umu Producer w'ibiganiro bikomeye birimo icyitwa 'Charmed,' n'ibindi byinshi yakoze nyuma.

6.     Rasheed Abdul Wallace

Abdul Wallace ni umukinnyi w'umupira w'amaboko muri Amerika uri mu kiruhuko cy'izabukuru, kuri ubu akaba akora nk'umutoza wungirije wa Detroit Pistons ndetse n'umunyamuryango w'icyubahiro w'ikipe ya NBA All-Star. Azwiho kuba afasha abaturage batuye mu mujyi yavukiyemo wa Detroit.

7.     Amitabh Bacchan

Amitabh wamenyekanye cyane muri Sinema y’u Buhinde ndetse no mu mahanga, afatwa nk'umwe mu bakinnyi ba filime bakomeye kandi bagize uruhare mu mateka ya sinema yo mu Buhinde.

Yatangiye kwamamara mu ntangiriro ya za 1970 i Bollywood, agaragara muri filime zirenga 180 z’Abahinde mu gihe kirekire yamaze muri sinema.

8.     Eric Arthur Hammer

Usibye amatsinda menshi y'umuziki yabayemo, Erica Arthur Hammer uzwi nka Doc Hammer akunda cyane ibijyanye no gushushanya kandi nabyo byamuhesheje amahirwe menshi.

9.     Kara Louise Tointon

Kara Louise azwi cyane nka 'Dawn Swann' muri filime yatambukaga kuri BBC ya  ‘EastEnders.’ Uyu, ntabwo ari umukinnyi mwiza w'amafilime gusa ahubwo yigeze no gutoza ibijyanye no kubyina.

10. Shante Artis

Shante Artis uzwi nka L.U.V/ Rapping Housewife, yatangiye ibyo kurapa no kuririmba afite imyaka 11. Uyu muraperikazi ni rwiyemezamirimo akaba n'umwanditsi w'indirimbo ukomeje kuzamura urwego rw'injyana ya Hip hop mu b'igitsina gore.

11.  Édouard Charles Philippe

Édouard Charles Philippe yahoze ari Minisitiri w'Intebe w'u Bufaransa, aba n'umuyobozi w'Akarere ka Le Havre.

12.  Darius Vernon

Darius Vernon ni umunyamuziki akaba n'umunyamideli wibasiwe n'indwara y'Ibibara, imwangiza cyane ibiganza ndetse n'umunwa. Uyu, yigeze gushaka kwiyahura nyuma y'igihe atukirwa uko asa bitewe  n'amabara indwara ya Vitiligo yamuteye.

13.   Jonathan Daniel “Jon” Hamm

Jonathan Daniel “Jon” Hamm ni umukinnyi wa filime muri Amerika, akaba n'umuyobozi wa gahunda zitandukanye za Televiziyo. Yagiye yegukana ibihembo bikomeye birimo icya Golden Globe, ndetse anatoranywa mu bihembo icumi bya Emmy Awards. Imihangayiko yagize ubwo hafatwaga amashusho ya 'Mad Men' niyo yateye Jon ikibazo cya vitiligo.

14.   Scott Jorgensen

Scott Jorgensen ni umukinnyi w'imikino njyarugamba muri Amerika. Scott wamenyekanye cyane mu irushanwa rya UFC, ashimishwa no gutera amakofe kandi agaharanira insinzi uko byagenda kose. Uruhu rwe rwera rwibasiwe cyane n'indwara ya vitiligo.

15.  Marie Whatley ‘Fez’

Fez ni umunyarwenya akaba akora n'ibiganiro bitandukanye muri Amerika, umwuga amazemo imyaka irenga 20. Yakinnye kandi muri filime zirimo 'Grand Theft Auto IV.'

16.   Richard Mark Hammond

Richard ni umunyamakuru w'Umwongereza, akaba n'umwanditsi. Yamenyekanye cyane ku rwego mpuzamahanga abikesheje ikiganiro cye cy'ibijyanye n'imodoka yise 'Top Gear.' Uyu, yigeze kurokoka impanuka ikomeye y'imodoka ubwo yari ari mu irushanwa ry'ibirometero 288 ku isaha.

17.   Graham Norton

Graham Norton ni umunyamakuru w'ibiganiro by'urwenya wo muri Irlande usigaye utuye mu Bwongereza. Ni we watangije ikiganiro cy'urwenya yise 'The Graham Norton Show.' Mu bihembo yatsindiye, harimo icya BAFTA TV.

18.  Yvette Fielding

Yvette Fielding azwiho ubuhanga budasanzwe mu kuyobora ibiganiro bitambuka kuri televiziyo birimo Blue Peter, Most Haunted, Most Haunted Live!, n'ibindi. Afatanyije n'umugabo we Karl Beattie, yatangije umuyoboro wa Paranormal mu Bwongereza mu 2008, umuyoboro wa mbere wa televiziyo ku Isi wahariwe abafite ubumuga.

19.    Big Krizz Kaliko

Big Krizz ni umuhanzi akaba n'umuraperi w'umunyamerika. Yakoresheje izina ry'uburwayi arwaye, aryitirira album ye yaciye agahigo ko kuza ku mwanya wa 19 muri Top Independent Albums ndetse iza no ku mwanya 167 kuri Billboard 200 muri Gicurasi 2008.

20.   Michaela DePrince

Michaela ni umubyinnyi w'umunyamerika uri kuzamuka neza wavukiye muri  Sierra Leone.

Uyu mukobwa, yatereranwe akiri muto nyuma y'uko ababyeyi be bitabye Imana, afatwa nabi, agira imirire mibi, arasuzugurwa, yitwa 'umwana wa sekibi.'

Amaze kwakirwa no gutangira kurerwa n'umuryango w'abanyamerika, Michaela yakurikiranye umwuga we, none ubu utangiye kumugirira akamaro